A A A A A
Biblia en un año
Agosto 12

Job 15:1-35
1. «Chayno niptin Temán parti runa Elifaz yapay niran:
2. «¿Yachaj runaga manacajcunata parlashpanchuraj cutichinman? ¿Wayrata cacnejnölla llutancunallata rimanmanchuraj?
3. ¿Yachaj runaga shimin tarishallanpitapis rimanmanchuraj? ¿Manacajcunatapis parlanmanchuraj?
4. Tayta Diosta manchacuna cashantapis gamga manami tantiyanquinachu. ¡Llapan shongunpa Tayta Diosta adurana cashantapis chapatami ruraycanqui!
5. Llutan yarpayniquimi mana allita rimachishunqui. Chaymi yachaj-tucoj runano gampis rimaycanqui.
6. Quiquiquipa shimillayquimi jitarpushunqui, manami nogachu. Quiquiquipa shimillayquimi ticrapaycäshunqui.
7. «¿Gamga yarpanquichu gampita mas unayga cay pachapis mana cashanta? ¿Yarpanquichu gampita mas unayga puntacunapis ni jircacunapis mana cashanta?
8. ¿Diosta pacayllapa tantiyachejchu canqui? ¿Gamllachu cay munduchöga llapantapis mas yachanqui?
9. ¿Imatataj musyanqui nogacuna musyashäpita mastaga? ¿Imatataj gamga mas yachanqui nogacuna mana tantiyashä cajta?
10. ¡Nogacunachöga caycanmi chacha auquin runacunapis! ¡Caycanmi papäniquipita mas unayta cawajcuna, llapanta musyajcunapis!
11. ¿Gampäga manachu alli caycan quiquin Tayta Dios shogashushallayqui, alli shimillanpa willapäshushayqui?
12. ¿Imanirtaj shonguyqui munashanta ruraycanqui? ¿Imanirtaj ñawiquipis saltanaypa saltanaycan?
13. ¿Imanirtaj Tayta Diospaj rabyaycanqui? ¿Imanirtaj shimiqui tarishanta rimanqui?
14. «¿Runaga ‹limyumi cä› ninmanchuraj? ¿Runaga juchaynaj canmanchuraj?
15. Diosga anjilnincunatapis manami llapan shongunpaga yäracunchu. Pay ricaptenga syëlupis manami limyunöchu.
16. Chayno caycaptenga runaga piyur-rächari, mana alli melanaypaj caycarga, yacunaycajnöraj jucha rurayta ashiycarga.
17. «Masqui sumaj wiyamay. Noga nishayqui cawashä watacunacho imano yachacushätapis,
18. yachajcuna imallatapis yachachimashanchïta. Paycunaga yachacuran unay caj awiluncunapitami.
19. Paycunatami chacrataga goycuran. Paycunachöga manami jäpa runacunaga talluraranchu.
20. Mana allita ruraj fiyu runacuna manami alläpaga cawanchu. Paycunaga rabyar ñacallarmi goyan.
21. Paycunaga imapis gaparämojta wiyar fiyupa mancharin. Pipis mana yaycunancho caycaptinpis suwacunaga suwapanmi.
22. Paycuna manami yarpanchu chacajman chayananpita gueshpiyta. ¡Espädawan wañunallanpänami acrasha caycan!
23. Paycunaga micuyta ashirmi purin. Musyannami paycunapäga pacha chacacäcunanpaj cashanta.
24. Llaquicuycunallami pasaypa manchariycächin. Juc ray pillyapita chapacunanpaj shuyaraycajnömi caycan.
25. Chaynöga canga Tayta Diospa contran ricacojcunapämi; Ima-aycapäpis munayniyojta manacajman churar parlajcunapämi;
26. chapacuna escüdunwan chapacushpan callpanman yäracushpan Tayta Diospa contran aywajpämi.
27. «Chay runacunapaga cäranpis werami caycan. Wera cayllawanmi pachanpis liwaraycan.
28. Chayno captinpis paycuna tiyashan siudäcunaga ragällanmi quëdanga. Wasincunapis chunyaj jaguirishami canga. Chaycunaga ganra goturaycajllami ricaconga.
29. Rïcuga manami unaycamaga rïculla cangapächu. Charashancunapis manami aypallamanga miranganachu.
30. Yanauyaycaj chacaypitaga manami imanöpis gueshpengapächu. Chay runaga ricacongapaj jachapa rämancunata nina wapcharishannömi. Tayta Dios pücariptin ushajpämi ushacanga.
31. Yanga manacajcunallaman ama yäracuchunchu. Chayman yäracorga yanga manacajcunallatami tarenga.
32. Manaräpis timpun chayamuptinmi rämancuna wañutacäconga. Chaycunaga mananami yapayga berdiranganapischu.
33. Chaycunaga canga übas yörapa wayuynin mana pogojnömi, olivo yörapa waytancuna marpur shicwacojnömi.
34. Diosman mana yäracojcunapaga wamrancunapis manami canganachu. Saynita chasquishan ima-aycanpis ninachömi rupanga.
35. Chay runacunaga juchallatami gueshyaj caycan. Pachanchöga engañacuyllami caycan. Wachangapis llullacuyllatami.»

Job 16:1-22
1. Chayno niptin Job cutichishpan niran:
2. «Chay nishayquitanöga achca cutinami wiyashcä. Gamcunaga shacyachimänayquipa ruquin masmi llaquicaycächimanqui.
3. ¿Imaycamaraj manacajcunallata rimarcaycanqui? ¿Imataj togripaycäshunqui chayno nimänayquipäga?
4. Gamcuna nogano ñacaycaptiquega nogapis gamcunanömi nëman. Asipashpä umätapis jajtachëmanrämi. Nircur tucuy-niraj parlarmi nëman.
5. Nogaga gamcunata alli shimëpami parlapäman. Shacyachëman. Masta balurta göman.
6. Imano parlaptëpis nanaynëga manami chawanchu. Upälla cacuptëpis manami päsarpunchu.
7. «Diosga pasaypanami callpäta ushacächisha. Llapan famillyäcunatanami ograshcä.
8. Intëröpa curalaraycämajtanömi mayaycä. Chayno caycashätaga cayno yamajna caycashämi musyacaycächin.
9. Tayta Diosga micucoj animalnömi manchachiman. Gaticachämar rachir usharaman. Chiquimaj-jinarämi mana cachaypa ricapacarcamashapis.
10. Nogata chiquimarmi runacuna gotucan. Ricapämashpan umancunatapis jajtachinraj. Manacajman churamashpan lagyar-ushaman.
11. Diosmi cachaycamasha fiyu runacunapawan wañuchicojcunapa maquinman.
12. Nogaga allimi goyäcuycarä. Paymi illajpita cuncapita charimasha. Nircurmi llapir usharamasha. Lëchawan chayachinanpämi apuntaraycäman.
13. Wacpita caypita lëchawan chayaycächiman. Mana cuyapaypami intëröman yaycoj-yaycoj chayachimasha. Aguillëcunapis pampachömi mashtaraycan.
14. Jananman-jananman pasaypa ñacaycächiman. Runa pillyaman yaycojnörämi nogamanga yaycaycämun.
15. «Fiyupa llaquicushpämi gachga röpacunata jaticushcä. Umätapis ñuchu allpacunamanmi jatishcä.
16. Wagaycaptillämi gaglläpis jacacurcusha. Ñawëpis pucayacäcusha.
17. Chaynömi päsamasha imatapis mana ruraycaptë, llapan shongöpa mañacuycaptëpis.
18. «¡Cay pacha, yawarnëtaga ama pacaycuchunchu! ¡Ama pacaycuchunchu mañacushätaga!
19. Janaj pachachöga faburnë parlananpaj caycanmi. Janajchöga abogädö caycanmi.
20. Amïgöcunaga manacajmanmi churaman. Nogami ichanga Tayta Diosta mañacur wagä.
21. Juc runa runa-masinpaj parlashanno pillapis Tayta Diospa ñaupancho nogapaj faburnë parlarcuchun.
22. Wallca watallapis cawanäpaj caj watacuna ushacaycannami. Manapis aycällatanami imaypis mana cutimoj aywacushaj.

Salmos 94:20-23
20. Mana alli arriglaj juezcunapa amïgonga ama canquimanchu. Paycunaga mana allimi arriglan. Laynincunacho niycashanwanmi runacunata ñacachin.
21. Paycunaga alli runacunapa contranmi parlacun. Juchan mana caycaptinmi wañuchinanpaj aunin.
22. Chayno caycaptinpis TAYTA DIOSMI nogacunapa pacacunä. Diosllami caycan imapitapis chapämaj gagaga.
23. Fiyucunataga Tayta Diosmi castiganga mana allita rurashanpita. TAYTA DIOSNINCHÏMI illgarachenga.

Proverbios 22:28-29
28. Unay castayquicuna jawishan lindacunataga ama witichinquichu.
29. Ima aruytapis yachaj bïbu runaga raypa palasyunchörämi aronga. Manami manacaj runacunapa munayninchöchu canga.

Romanos 11:19-36
19. Capaschari gamcuna cayno nircaycanqui: «Imano captinpis Israel runacunaga mutusha rämacunanöllami caycan. Paycunata salbananpa ruquenga nogacunatanami Tayta Diosninchi chasquiycäman.»
20. Au, nishayquinöllami caycan. Paycunataga mana yäracushanpitami muturir wicaparisha. Gamcunapis yäracuyniquipami chay yöracho injertaraycanqui. Chaymi ama alabacuychu. Chaypa ruquenga Tayta Diosninchïta wiyacur caway.
21. Quiquin yörapa rämanno Abrahampita mirajcuna captinpis Israel runacunata mana perdunaycarga mana wiyacuptiqui gamcunatapis Tayta Diosninchi manami perdunashunquipächu.
22. Chauraga tantiyacuy Tayta Dios cuyapäcoj cashanta y castigacoj cashanta. Castigacöga caycan mana yäracoj runacunawanmi. Payman yäracuptiquimi ichanga cuyapäcoj caycan. Mana yäracuptiquega rämata cuchuriycushannömi gamcunapis Tayta Diospita raquisha canquipaj.
23. Israel runacuna Jesucristuman yäracuptenga Tayta Diosninchi yapaymi chay yöraman cutichengapaj. Payga munayniyojmi caycan cuchusha rämata yöraman yapay cutichinanpäpis.
24. Mana Israel runa car gamcunaga munti olivo rämanömi carcaycanqui. Israel runacunami ichanga alli caj olivo rämano carcaycan. Munti olivopa rämanno captiquipis alli caj yörapa rämanno canayquipaj churaycäshushpayquega ¿manachuraj Israel runacunatapis yapay cutichenga?
25. Ermänucuna, gamcunaga achcatami mana musyanquirächu. Chaymi canan willashayqui Tayta Dioslla musyashancunata. Waquin Israelcuna Jesucristuman pasaypa mana yäracuyta munanchu mana Israel runacunapita Tayta Dios acrashan cajcuna Jesucristuman yäracunancamallami.
26. Chaynöpami llapan Israel runacunapis salbacongapaj. Chayno cananpaj captinmi Tayta Diosninchïpa palabranchöpis cayno niycan: «Sionpitami salbacoj shamonga. Jacobpita mirar-aywajcunataga juchanpita perdunangami.
27. Paycuna jucha rurashanta perdunarmi paycunawan conträtuta rurashaj.»
28. Canancunaga Israelcunapa contran-nirajmi Tayta Diosninchi caycan. Ichanga chayno caycan gamcuna Jesucristuman yäracunayquipämi. Israelcunataga jinallami Tayta Dios cuyaycan. Unay awiluncunatami auniran acrashan runacuna cananpaj.
29. Tayta Diosninchi imatapis aunirga imaypis cumlengami. Chaynölla pitapis yanapänanpaj acrarga imaypis yanapangami.
30. Unayga gamcuna manami Tayta Diosninchïta wiyacurayquichu. Cananmi ichanga Israelcuna mana wiyacuyninpa gamcunatana cuyapaycäshunqui.
31. Imanömi gamcunata Tayta Dios cuyapäshurayqui, chaynöllami paycunatapis mana wiyacusha captinpis cuyapanga.
32. Tayta Diosga Israel runacunatapis mana Israel runacunatapis mana wiyacojtanömi rican. Chaynöpami llapan runacunatana iwal cuyapan.
33. Tayta Diosninchëga fiyupa cuyapäcojmi. Payga fiyupa yachajmi y musyajmi. Manami pay imata munashanta ni rurashantapis tantiyayta atipanchïchu.
34. Paytaga ¿piraj «manami chaynöchu» nisha? U ¿piraj «caynömi ruranchi» nir yachachisha?
35. ¿Piraj payta imallatapis gosha cutichinanpaj?
36. Llapantapis Tayta Diosninchïmi camasha. Pay cayninpami imapis caycan y payllapami llapanpis. ¡Imaycamapis Tayta Diosninchi alabasha caycullächun! Amén.