A A A A A
Biblia en un año
Diciembre 29

Zacarías 10:1-12
1. TAYTA DIOSTA mañacuy-llapa micuy wiñaycashan wichan tamyachimunanpaj. Chaura illguyta illgöchej TAYTA DIOSMI intëruman tamyachimonga. Llapan runatami micuyta tarichenga. Chacracunachöpis lantacuna canga.
2. Wasi ïdulucuna ribilacushanmi ichanga mana rasunpachu. Musyacojcuna «cayno wacno» nishanpis manami rasunpa cajchu. Chay runacuna suyñucunata willacushanga manami rasunpachu. Shacyächir willapashancunapis manami rasun cajchu. Chaymi gamcunaga uysha mashtacajnöpis pantacasha carcaycanqui. Uyshëruynaj uyshacuna-jinami fiyupa ñacarcaycanqui.
3. Chaymi TAYTA DIOSGA nin: «Nogaga fiyupami rabyacurcushcä mandajnincunapaj. Acrashä runacunata pusharajcunataga castigashämi. Chay uyshäcunataga noga munayniyoj Tayta Diosmi ricashaj. Paycunaga caycan Judäpita mirar-aywaj runacunami. Paycunaga canga guërracho pillyananpaj caycaj sinchi cawallucunanömi.
4. Paycunapitami yurengapaj llapan mandajcuna: wasi isquïnan simintucho tucnaj rumino, tolduta ichichinanpaj caycaj istäcano, guërracho pillyananpaj lëchata jitacunanno. Chaynömi paycunapitaga yurengapaj munayniyoj mandajcuna.
5. Paycunaga pillyacho contrancunata binsir cällicunacho caycaj mituchömi lluchcar-ushanga. Paycunaga pillyanga noga yanapajnin captëmi. Cawallun muntasha cajcunatami pengayman churangapaj.
6. «Nogami callpayojyächishaj Judäpita mirar aywaj runacunataga. Josëpita mirar aywajcunatapis salbashaj. Yapaymi cutichimur nasyunninman pushamushaj. Chaynöga rurashaj paycunata cuyapashpämi. Chaura paycunaga cangapaj noga imaypis mana cachaycushänömi. Nogami caycä mañacamashanta wiyaj TAYTA DIOSNIN.
7. Israel runacunaga suldärunömi canga. Fiyupa cushishami carcaycangapaj runa bïnuta upur caycashannöraj. Ricashpan wamrancunapis fiyupami cushiconga. ¡Yanapashäpitami cushicur alabamanga!
8. «Israelcunataga wichyacur gayashpämi juc pachallaman shuntashaj. Chaynöga shuntashaj noga salbasha cashpämi. Chauraga unay wichan aypalla cashanno yupaytapis mana atipaypämi cangapaj.
9. Nogami machicächishcä juc-lä nasyuncunaman. Ichanga may carucho cashpanpis paycuna nogata yarpämangami. Nircorga wamrancunawannami cutimonga.
10. Cutichimushämi Egipto nasyunpita. Shuntamushämi Asiria nasyunpitapis. Nircorga pushashaj Galaadcamami, Libanucamami. Paycunaga fiyupa aypallami cangapaj. Chaymi chaychöpis tiyananpaj pishengaraj.
11. Lamarta päsajnömi ñacaycunacho goyanga. Chaypis lamarpa pullchajyaynincunaga manami imatapis rurangachu. Nilo mayutapis ushajpämi chaquirachishaj. Asiria runacuna alli chölu-tucoj cashantapis manacajmanmi churashaj. Egipto runacuna munayniyoj caycashantapis illgächishämi.
12. Acrashäcunataga nogami callpayojyächishaj. Nircorga nogaman yäracamushpannami aywanga. Noga TAYTA DIOSMI chayno në.»

Zacarías 11:1-17
1. ¡Líbano, puncuyquicunata quichay. Sedru gueruyquicunatapis ninami rupacurconga!
2. Wagay pino gueru. Sedru gueruga maynami tunisha. Chay cuyayllapaj guerucuna ushacashanami caycan. Basancho caj encina yöracuna, nanaywannöraj gaparpay. Fiyupa juntasha caycaj muntitaga ushajpämi sajtargärisha.
3. Uyshërucunaga gaparayparämi wagarcaycan, cuyayllapaj guewancuna ushajpaj illgasha captin. Jordancho fiyupa juntasha caycaj jachacuna ushajpaj illgasha captinmi liyunpis wagaycan.
4. TAYTA DIOSNËGA caynömi nin: «Pishtapaj caycaj uyshacunataga sumaj ricay.
5. Chay uyshacunata rantejcunaga mana cuyapaypami pishtan. Ranticoj cajcunanami ichanga nin: ‹¡TAYTA DIOS, ima allishi gam rïcuyächimashcanqui!› nir. Uyshërucunapis manami ni imanillarpis cuyapanchu.
6. Nogapis yapayga manami cuyapäshänachu cay nasyuncho tiyaj runacunata. Chaypa ruquenga raypa y runa-masincunapa maquinmanmi cachaycushäpaj. Chay runacunami nasyuntaga pasaypa ushacashata cachayconga. Paycunapa maquinpitaga manami pitapis salbashäpächu. Noga TAYTA DIOSMI chayno në.»
7. Chaymi pishtananpaj caycaj uyshancunata michipänäpaj nigusyanticunawan parlarä. Nircorga ashirä ishcay tucruta: Jucajpa jutinta churaparä «Alli goyay» nir. Jucajtanami churaparä «Jucllachasha» nir. Chaypitanaga uyshata michirä.
8. Chaypita juc quillallachömi jitarirä quimsaj uyshërucunata. Paycunaga fiyupana rabyachimaran; quiquincunapis chiquicarcäramaran.
9. Uyshacunatanami nirä: «¡Manami imaypis gamcunapa michishojniqui cashänachu! ¡Mayganiquipis wañoj cäga, wañuy! ¡Pipis wañuchishushpayquega wañurachishunqui! ¡Cawaycajcunaga quiquin-pura micunacuchun!»
10. Chayno nircorga «Alli goyay» jutiyoj tucröta paquirirä. Nasyuncunawan conträtuta Tayta Dios rurashan ushacänanpäna cashanta musyachishpämi paquirirä.
11. Chay junaj ushacaran Tayta Dios conträtu rurashan. Chaura uyshata michichimaj ricapaycämaj nigusyanticunaga tantiyacuran noga ruraycashächo TAYTA DIOS imanöpis rurananpaj cashanta musyaycächishanta.
12. Chaura noga nirä: «Gamcuna munarga michipashäpita pägamay. Man'chäga cacuchun.» Chaymi paycunaga quimsa chunca (30) guellayta pägamaran.
13. TAYTA DIOS nimaran: «Chay guellaytaga aparcur wiñay Templucho caycaj guellayta wiñacunaman» nir. Chaura nogaga arupashäpita pägamashan wallcalla quimsa chunca (30) guellayta aparcur wiñarcurä Templucho caycaj guellay wiñacunaman.
14. Nircurnaga paquirirä «Jucllachasha» nir jutichapashä tucrutana. Chay paquirishänöllami rasunpa ushacaran Judäwan Israel runacuna alli goyashanga.
15. TAYTA DIOS nimaran: «Cananga mana alli uyshërunöna cay.
16. Cananpitaga cay nasyunman churaj aywä juc uyshërutanami. Chay uyshëruga manami yarpachaconganachu pantacaj uyshapaj. Ogracajtapis manami ashenganachu. Paquicushatapis manami jampipangachu. Uyucunatapis manami alli guewaman gatengachu. Chaypa ruquenga micucurcongapaj werannin caj uyshacunatami. Chay uyshacunapataga shilluncunatapis rachir wicaparengami.
17. «¡Ay imanöraj canga uyshata michiycashanpita cachaycoj uyshëru! ¡Chay uyshërutaga sabli cuchurichun maquinta; derëchu caj ñawintapis gaprarichun! ¡Ricranpis chaquicäcuchun; derëchu caj ñawinpis gaprayar amana ricachunnachu!»

Zacarías 12:1-14
1. Cay willacuyga caycan Israelcuna imano cananpäpis TAYTA DIOS willacachimashanmi. Syëluta camacächej, cay pachatapis sumaj tacyachej y runata cawayta goj TAYTA DIOSMI cayno nin:
2. «Jerusalentaga nogami ticrachishaj castigacuna cöpämanno. Chaymi bisïnun nasyun runacuna Jerusalenman, Judá siudäcunaman magaj yaycorga machashano ricacongapaj. Chauraga yarpashancuna yangami canga.
3. «Chay junäga llapan nasyuncunapaj Jerusalenta ticrachishäpaj fiyupa lasaj rumimannömi. Pipis jogarcuyta munaj cajtaga wañojpämi ñitirenga. Llapan nasyun runacunami Jerusalén runacunata chiquishpan shuntacanga.
4. «Chay junaj nogami mancharachishäpaj llapan cawalluncunata. Muntädu aywajcunatanami löcuyächishaj. Juc-lä nasyun runacunapa cawalluncunatapis gaprayarachishämi. Judäpita mirar aywajcunatami ichanga cuydaycäshaj.
5. Chaymi Judäpa mandajnincunaga shongullancho nenga: ‹Munayniyoj TAYTA DIOSMI Jerusalencho tiyajcunapa Diosnenga. Paymi yanapan mas callpayoj cananpäpis› nir.
6. «Chay junäga camacächishäpaj Judäpa mandajnincuna yantacho rataycaj shanshacunano cananpaj, rïgu päjacunacho nina rataycajno cananpaj. Bisïnun nasyuncunataga ichoj caj-lämanpis derëchu caj-lämanpis rupar ushacurconga. Jerusalén runacunami ichanga yapay siudänillancho tiyarcaycangapaj.
7. Nogaga rimëru salbashäpaj waquin Judá runacunatami. Chaynöpami mana camacächishächu Davidpita mirajcuna mas alli-tucunanta. Chaura Jerusalén runacunapis manami alli chölu-tuconganachu Judäpa siudänincunacho tiyajcunapita masga.
8. «Chay junäga noga TAYTA DIOSMI imapitapis chapäshaj Jerusalencho tiyajcunata. Chaycho tiyajcuna pishi callpa cajmi cangapaj ray David cashanno fiyupa sinchi. Davidpita mirar aywaj mandaycajcunanami canga Diosno, guërraman aywaycaj runacunapa ñaupanta aywaj anjilnëno.
9. «Chay junäga illgächishämi maygan nasyun runacunatapis Jerusalenman magaj yaycoj cajtaga.
10. Davidpita mirar aywajcunata, Jerusalén runacunataga shacyächishaj cuyapäcoj cananpaj, nogaman yäracamur mañacamunanpaj. Chaypitaga tucsimashanmanmi ricäramonga. Chaymi llaquicur waganga japallan wamran wañushapänöraj, guechpa wamran wañushapänöraj.
11. «Chay junäga Jerusalencho fiyupami llaquicongapaj. Llaquiconga Meguiducho caycaj Hadad-rimonpaj llaquicushannörämi.
12. Judá runacunaga cada casta shuyni-cama fiyupami llaquiconga: «Davidpita mirar aywajcunapis llaquiconga, chayno warmincunapis. Natanpita mirar aywajcunapis llaquiconga, chayno warmincunapis.
13. Levïpita mirar aywajcunapis llaquiconga, chayno warmincunapis. Simeipita mirar aywajcunapis llaquiconga, chayno warmincunapis.
14. Chaynömi waquin caj castacunapis llaquiconga, chayno warmincunapis.

Salmos 149:1-4
1. ¡Aleluya! ¡TAYTA DIOSGA alabasha cachun! Mushoj alabansawan TAYTA DIOSTA alabay. Payta sirbejcunawan iwal alabay-llapa.
2. Israelcuna cushicur Tayta Diosta alabay. Gamcunataga Paymi camashurayqui. Sión runacuna cushicuy Tayta Dios rayniqui captin.
3. Tayta Diostaga dansashpayqui alabay-llapa. Arpacunata panderëtacunata tucashpayqui imnucunata cantay-llapa.
4. TAYTA DIOSGA cushicunmi acrashan runacuna alabaptin. Umildicunatami yanapan allicho llojshinanpaj.

Proverbios 30:32-33
32. Mana tantiyacoj upa-jina mana allita ruranayquipaj yarpasha caycarga sumajraj yarpachacuy.
33. Musyashayquinöpis lëchita gaywerga mantiquillatami jorgunqui. Callpaycur-callpaycur sinyaptenga senganpita yawarmi llojshimun. Chaynömi runa-masinta achäquita ashipajpis pillyayman chayanga.

Apocalipsis 19:1-21
1. Chaypitaga syëlucho aypalla sinchipa cantamojta wiyarä: «¡Tayta Diosninchi alabasha cachun! ¡Paymi munayninwan runacunata salban! ¡Llapanpäpis munayniyojmi caycan!
2. Payga rasun cajpita allimi jusgasha. Llapan runacunata juchata rurachej mañösatapis castigashanami. Tayta Diosta sirbejcunata wañuchishanpitami castigasha.»
3. Nircurnami anjilcuna yapay niran: «¡Tayta Diosninchi alabasha cachun! Chay siudätaga rupacurcushami. Rupaptin mana chawaypami goshtay jatariycanga.»
4. Chaypitanami Tayta Diospa ñaupancho caj ishcay chunca chuscu (24) mayur runacuna, chuscu munayniyoj anjil-nirajcunapis gongurpacuran llapanpaj munayniyoj Tayta Diosta adurananpaj. Paycunami niran: «¡Amén, Tayta Dios alabasha cachun!»
5. Tayta Dios jamaraycashan ñaupanpitanami wiyacämuran: «¡Dios munashanno cawajcuna Tayta Diosta alabay! ¡Jatunpis tacshapis llapayqui Tayta Diosta alabay!» nir.
6. Chaypitaga chayasha mayu aywar gaparashanno, räyu junrurushanno, achca runacuna rimashanno wiyacaran. Cayno niycaran: «¡Tayta Diosninchi alabasha cachun! ¡Paymi munaynincho llapanta chararaycan!
7. ¡Llapan shongunchïwan cushicushun! Tayta Diosninchïta alabashun-llapa. Chayamushanami Cashni uysha casarananpaj caj fista. Parlay-masin jipashpis listu camaricushanami caycan.
8. Chay jipashtami lïnupita achicyaycachaycaj fïnu röpata jaticunanpaj camaripasha.» (Chay fïnu lïnu röpaga Tayta Diosman yäracojcuna allicunata rurashancunami caycan.)
9. Chaymi nogawan caycaj anjil nimaran: «Cayta isquirbiy: Cushishami canga Cashni uyshapa casaray fistanman gayachisha caj runacunaga.» Nircur nimaran: «Cay nishäcunaga Tayta Dios nishanmi caycan.»
10. Nimaptin anjilta aduranäpaj gongurpacurä. Chaymi pay nimaran: «Nogataga ama aduramaychu. Nogapis gamno, yäracoj-masiquicunanöllami Tayta Diospa sirbejnin caycä. Tayta Diosllanchïta adurayga. Jesucristupaj nishäcunaga llapanpis caycan profëtacunatano Tayta Diosninchi willachimashallanmi.»
11. Chaypitanami ricarä janaj pachapa puncun quicharaycämojta. Yuraj cawallun muntasha caycajtapis ricarä. Muntaraycäga caran nishanta cumlejmi. Paymi pitapis mana chapaypa juchancunapita jusganga.
12. Ñawincunami ninanöraj achicyaran. Umanchömi achca corönacunata jatiraycaran. Urcunchönami jutin isquirbiraycaran. Chay isquirbiraycaj ima niycashantapis quiquillanmi musyaran.
13. Röpanpitaga yawarmi jutuycaran. Paypa jutenga: Tayta Diospa Palabranmi.
14. Paytami aywäshimuran yuraj cawallun muntasha janaj pachapita caj suldärucuna. Paycunaga lïnupita fïnu yuraj röpan jatishami caycaran.
15. Llapan nasyuncunata castigananpämi afilasha sabli shiminpita llojshimuran. Chaywanmi llutanta ruraj runacunata fiyupa rabyar mana cuyapaypa castiganga. Übasta gapchishannömi runacunata castiganga llapanpaj munayniyoj Tayta Diosta rabyachishanpita.
16. Racu chancancho y jacurashanchömi isquirbiraycaran «RAYCUNAPA RAYNIN, MANDAJCUNAPA MANDAJNIN» nir.
17. Chaypita ricarä inti janancho juc anjil ichiraycämojta. Chay anjilmi aycha micoj äbicunata gayacur niran: «¡Llapayqui shamuy Tayta Dios camarishan micuyta micunayquipaj!
18. Chaura gamcunaga tucuy casta runacunapa aychantami micunquipaj. Nasyun mandajcunapata, suldärucunapata, suldärucunapa mandajnincunapata, muntacushan cawalluncunapa aychantapis micunquipämi. Rïcu, pobri captinpis, yachaj, mana yachaj captinpis, llapanpa aychantami micunquipaj.»
19. Chaychömi ricarä lamarpita llojshimoj waräcuyta y llapan nasyuncunapa mandajnincuna suldäruncunawan caycajta. Paycunami shuntacaran yuraj cawallun muntashata y suldäruncunatawan magananpaj.
20. Chaymi waräcuyta y engañacoj profëtatapis Jesucristo prësu chariran. Manaraj prësu chariptinmi chay engañacoj profëtaga milagrucunata ruraran runacunata engañananpaj. Engañashpanmi chay waräcuypa señalninwan señalachiran, ïdulunta adurachiran. Chaypitami waräcuyta, engañacoj profëtatapis cawaycajta Jesucristo gaycuran asufriyoj nina rataycaj gochaman.
21. Waräcuypa suldäruncunatanami yuraj cawalluta muntaraycäga wañuchiran shiminpita llojshimoj sabliwan. Chay wañojcunapa aychantanami aycha micoj äbicuna sacsanancama micuran.