A A A A A

Hibrania 7:1-28
1. Melkizedekno ne ruodh Salem, kendo ne en jadolo mar Nyasaye Manyalo Gik Moko Duto. Noromo gi Ibrahim kane Ibrahim dok dala koa loyo ruodhi, mi noguedhe.
2. En ema ne Ibrahim omiye achiel kuom apar, mag gik moko duto mane omayo ruodhigo. To tiend nying mar Melkizedek gin ariyo: mokwongo en ni ‘Ruoth Makare’, to bende en ruodh Salem, tiende ni ‘Ruodh Kue’
3. Onge wach moro mondiki ni en gi wuon kata min kata anywolane, kendo onge wach chakruok mar ndalone kata giko mar ngimane. En kaka Wuod Nyasaye. Osiko jadolo nyaka chieng’.
4. Parieuru duong’ ma jali nigo, ka Ibrahim kwarwa ema ne omiye achiel kuom apar mag gik mabeyo mope!
5. To chik ochiko nyikwa Lawi, ma gin joma tiyo tich dolo, mondo ochok achiel kuom apar mag gik moko kuom ogandagi, tiende ni gigol gigo kuom jo-Israel wetegi, kata obedo ni owetegigo bende gin nyikwa Ibrahim kamano.
6. Melkizedek to ne ok en nyakwar Lawi, to kata kamano Ibrahim nomiye achiel kuom apar mag gik mope, mi noguedho kata mana Ibrahim, ng’at mane oyudo singruok mag Nyasaye!
7. Ong’ere malong’o ni ng’ama duong’ ema guedho ng’ama tin.
8. To korka jodolo, to waneno ni joka Lawi, ma gin joma yudo achiel kuom apar mag gik mokogo, gin joma tho. Korka Melkizedek to waneno ni ng’at mane oyudo achiel kuom apar, Muma wacho ni pod ngima.
9. Chutho, wanyalo wacho ni kane Ibrahim ochulo achiel kuom apar, to kata mana Lawi nyakware, ma en ng’at mane onego oyud pok mar achiel kuom apar, bende nochulo pokno,
10. nimar Lawi ne pod nie ringre Ibrahim kwar mare kane Melkizedek oromo gi Ibrahim.
11. Chik mane omi jo-Israel notenore kuom tich dolo mar jo-Lawi. To ka dine bed ni tich dolo mar jo-Lawi ochopo tichne maonge gima orem, to onge gima dine mi jadolo moro machielo wuogi e kanyakla mar Melkizedek, to ok e kanyakla mar Harun.
12. To ka kit tich dolo oloki, to mano nyiso ni chik bende nyaka loki.
13. Awacho kamano nikech Jal mwawuoyo kuomeni, tiende ni ruodhwa, noa e dhoot moro ma ng’ato pok oaye mondo oti tich dolo kendo-mar-misango.
14. Ong’ere malong’o ni Ruodhwa noa e dhood Juda. To kane Musa owuoyo kuom tich jodolo ne ok omulo nying dhood Juda.
15. To tiend wachni medo nenore malong’o moloyo, ka jadolo machielo owuok machalo Melkizedek.
16. Ne ok okete e tich dolo kaka chik pinyni dwaro, to nokete kuom teko mar ngima maonge gima nyalo ketho,
17. mana kaka Muma wacho niya, “In jadolo nyaka chieng’ e kit tich dolo mar Melkizedek.”
18. Chik machon osegol oko nikech oonge teko kendo ok onyal konyo gimoro,
19. nimar Chik ne ok ochopo gima ne oketene. To geno manyien koro osekel, mamiyo wasudo machiegni gi Nyasaye.
20. To bende mano ne ok otim maonge kuong’ruok. Kane oketi jo-Lawi e tich dolo, to kuong’ruok ne onge.
21. Yesu to ne oket jadolo gi kuong’ruok, kaka Muma wacho ni, “Ruoth Nyasaye osekuong’ore, kendo ok nolokre ngang’ kuom wachne mawacho ni, ‘In jadolo nyaka chieng’.’ ”
22. Mano omiyo singruok ma Yesu osiro ber moloyo singruok machon.
23. Nitie wach moro machielo bende, jodolo ma jo-Lawi ne nyaka bed mang’eny, nikech kaka gin dhano matho, tho ne monogi siko e tichgi.
24. Yesu to nigi tich dolo ma ok we ni ng’at moro machielo, nikech osiko nyaka chieng’.
25. Kuom mano en gi teko mochwere mar reso jogo makadho kuome kasudo ir Nyasaye, nikech ongima nyaka chieng’ mondo okwanigi Nyasaye.
26. To jadolo maduong’ ma kamano ema wadwaro, nikech oler, kendo oonge ketho; chilo moro onge kuome, bende osepoge kuom joricho, kendo oseting’e malo moyombo polo.
27. Onge gima dimi otim misengni pile, kaka jodolo madongo moko kwongo timo misengni ma gipwodhogo richogi giwegi, to eka gitimo misengni mipwodhogo richo oganda. En to notimo misango dichiel kende, kane ochiwore en owuon ka misango.
28. Chik Musa to keto dhano adhana manyap mondo obed jodolo madongo, to weche singruok mane Nyasaye okuong’orego mane obiro achien bang’ Chik, oketo Wuowi mosedoko ng’ama kare chuth jadolo maduong’.