A A A A A

2 Korintiyawa 4:1-18
1. Saboda haka, da yake ta wurin jinƙan Allah ne muke da wannan hidima, ba za mu fid da zuciya ba.
2. Ba ruwanmu da ɓoye-ɓoye na munafuncin da suke abubuwan kunya. Ba ruwanmu da ruɗu, ko yin ƙarya da kalmar Allah. Sai dai muna faɗin gaskiya a fili. Ta haka ne kowa zai yi shaidar gaskiyarmu a gaban Allah cikin zuciyarsa.
3. Ko da bishararmu a rufe take, tana a rufe ne ga waɗanda suke hallaka.
4. Allahn zamanin nan ya makanta hankulan marasa ba da gaskiya, yadda har ba za su iya ganin hasken bishara ta ɗaukakar Kiristi ba, wanda yake kamannin Allah.
5. Gama ba waʼazin kanmu muke yi ba, sai dai na Yesu Kiristi, a kan shi ne Ubangiji, mu kuma bayinku saboda Yesu.
6. Domin shi Allah wanda ya ce, “Bari haske yǎ haskaka daga duhu,” ya sa haskensa ya haskaka a cikin zukatanmu, don yǎ ba mu hasken sanin ɗaukakar Allah a fuskar Kiristi.
7. Amma muna da wannan dukiya a cikin tulunan yumɓu, don a nuna wannan mafificin ikon nan daga Allah ne, ba daga gare mu ba.
8. A matse muke a kowane gefe, sai dai ba a gurgunta mu ba. An rikitar da mu, amma ba mu fid da zuciya ba.
9. An tsananta mana, amma ba a yashe mu ba, an fyaɗe mu a ƙasa, amma ba a hallaka mu ba.
10. Kullum muna ɗauke da mutuwar Yesu a jikinmu, domin ran Yesu yǎ bayyana a jikinmu.
11. Muddin muna a raye, kullum zaman mutuwa muke yi saboda Yesu, don a bayyana ran Yesu ta wurin jikin nan namu mai mutuwa.
12. Ta haka, mutuwa tana aiki a cikinmu, ku kuwa rai a cikinku.
13. A rubuce yake cewa: “Na gaskata; saboda haka na yi magana.” Da wannan ruhun bangaskiya ne mu ma muka gaskata, saboda haka muke magana.
14. Domin mun san cewa shi da ya ta da Ubangiji Yesu daga matattu, zai tashe mu mu ma tare da Kiristi, yǎ kuma miƙa mu a gabansa tare da ku.
15. Duk wannan fa don amfaninku ne, domin alherin nan da yake bazuwa zuwa ga mutane masu yawa, yǎ zama dalilin godiya mai yawa ga ɗaukakar Allah.
16. Saboda haka, ba mu fid da zuciya ba. Ko da yake a waje, jikinmu mai mutuwa yana lalacewa, amma can ciki, ana sabunta mu kowace rana.
17. Don wannan ʼyar wahalar tamu mai saurin wucewa, ita take tanadar mana madawwamiyar ɗaukaka mai yawa, fiye da kwatanci.
18. Domin ba abubuwan da ido yake gani ne muke dubawa ba, sai dai marasa ganuwa. Gama abubuwan da ake gani masu saurin wucewa ne, marasa ganuwa kuwa, madawwama ne.