A A A A A

Bible in one year

Agusta 24

1 Korintiyawa 6:1-20
1. In wani a cikinku yana da damuwa da wani, don me zai kai ƙara a gaban marasa bi, maimakon yǎ kai ƙara a gaban tsarkaka?
2. Ba ku san cewa tsarkaka ne za su yi wa duniya shariʼa ba? In kuwa za ku yi wa duniya shariʼa, ai, kun isa ku yi shariʼa a kan ƙananan damuwoyi ke nan.
3. Ba ku san cewa za mu yi wa malaʼiku shariʼa ba? Balle alʼamuran da suka shafi duniyan nan!
4. Saboda haka, in kuna da damuwa game da irin waɗannan alʼamura, sai ku naɗa alƙalai ko cikin waɗanda ba kome ba ne a ikkilisiya!
5. Na faɗi haka ne don ku kunyaya. Ashe, ba za a iya samun wani a cikinku mai hikima wanda zai iya sasanta tsakanin masu bi ba?
6. Me zai sa ɗanʼuwa yǎ kai ƙarar ɗanʼuwa-a gaban marasa bi?
7. Ƙarar junanku ma da kuke yi, ai, kāsawa ce a gare ku. Ba gara ku haƙura a cuce ku ba? Ku kuma haƙura ko an zambace ku?
8. Amma ga shi ku da kanku kuna cuta, kuna kuma zamba, har ma ga ʼyanʼuwanku ne kuke yi wannan.
9. Ba ku sani ba cewa mugaye ba za su gāji mulkin Allah ba? Kada fa a ruɗe ku: Ba masu fasikanci ko masu bautar gumaka ko masu zina ko karuwan maza, ko ʼyan daudu,
10. ko ɓarayi ko masu kwaɗayi ko mashaya ko masu ɓata suna ko masu zamba da za su gāji mulkin Allah.
11. Haka waɗansu a cikinku ma suke a dā. Amma an wanke ku, an tsarkake ku, aka kuma sa kuka zama marasa laifi cikin sunan Ubangijinmu Yesu Kiristi da kuma ta wurin Ruhun Allahnmu.
12. “Ina da dama in yi kome,” sai dai ba kome ba ne yake da amfani. “Ina da dama in yi kome” — sai dai ba abin da zai mallake ni.
13. “An yi abinci domin ciki ne, cikin kuma domin abinci.” Amma Allah zai hallaka su duka. Ba a yi jiki saboda fasikanci ba, sai dai domin Ubangiji, Ubangiji kuma domin jiki.
14. Ta wurin ikonsa, Allah ya tashe Ubangiji daga matattu, haka zai tashe mu mu ma.
15. Ba ku sani ba cewa jikunanku gaɓoɓin Kiristi ne kansa? Zai kyautu in ɗauki gaɓoɓin Kiristi in haɗa da jikin karuwa? Sam!
16. Ba ku san cewa shi wanda ya haɗa jikinsa da karuwa sun zama ɗaya a cikin jiki ke nan ba? Gama an ce, “Biyun za su zama jiki ɗaya.”
17. Wanda kuwa ya haɗa jikinsa da Ubangiji ya zama ɗaya da shi ke nan a ruhu.
18. Ku guji fasikanci. Duk sauran zunubai da mutum yakan aikata suna waje da jikinsa, amma mai yin fasikanci, yana ɗaukar alhalin jikinsa ne.
19. Ba ku san cewa jikin nan naku haikalin Ruhu Mai Tsarki ba ne wanda yake cikinku yake kuma daga Allah? Ku ba na kanku ba ne;
20. saye ku fa aka yi da tsada, saboda haka, sai ku girmama Allah da jikinku.