A A A A A

Bible in one year

Yuni 14

Yohanna 21:1-25
1. Daga baya Yesu ya sāke bayyana kansa ga almajiransa, a bakin Tekun Tibariya. Ga yadda ya faru:
2. Siman Bitrus, Toma (wanda ake kira Didaimus), Natanayel daga Kana ta Galili, ʼyaʼyan Zebedi maza, da kuma waɗansu almajirai guda biyu suna tare.
3. Sai Siman Bitrus ya ce musu, “Za ni kamun kifi,” suka ce, “Za mu tafi tare da kai.” Saboda haka suka fita suka shiga jirgin ruwa, amma a daren nan ba su kama kome ba.
4. Da sassafe, sai ga Yesu tsaye a gaci, amma almajiran ba su gane cewa Yesu ne ba.
5. Sai ya ce musu, “Abokai, kuna da kifi kuwa?” Suka amsa suka ce, “Aʼa.”
6. Ya ce musu, “Ku jefa tarunku dama da jirgin ruwan, za ku samu.” Da suka yi haka, sai suka kāsa jawo tarun saboda yawan kifi.
7. Sai almajirin da Yesu yake ƙauna ya ce wa Bitrus, “Ai, Ubangiji ne!” Nan da nan da Siman Bitrus ya ji ya ce, “Ai, Ubangiji ne,” sai ya yafa mayafinsa, (don dā ma ya tuɓe shi), ya fāɗa cikin ruwan.
8. Sauran almajiran kuwa suka bi shi cikin jirgin ruwan, janye da tarun cike da kifi, don ba su da nisa daga gaci, wajen yadi ɗari ne.
9. Da suka sauka, sai suka ga garwashin wuta a can da kifi a kai, da kuma ʼyan burodi.
10. Yesu ya ce musu, “Ku kawo waɗansu kifin da kuka kama yanzu.”
11. Sai Siman Bitrus ya hau ya jawo tarun gaci. Ya cika da manyan kifi, 153, amma duk da yawansun nan tarun bai tsintsinke ba.
12. Yesu ya ce musu, “Ku zo ku karya kumallo.” Ba wani daga cikin almajiran da ya yi karambanin tambayarsa, “Wane ne kai?” Sun san cewa Ubangiji ne.
13. Yesu ya zo, ya ɗauki burodin ya ba su, haka kuma kifin.
14. Wannan fa shi ne sau na uku da Yesu ya bayyana kansa ga almajiransa bayan an tashe shi daga matattu.
15. Da suka gama ci, sai Yesu ya ce wa Siman Bitrus, “Siman ɗan Yohanna, kana ƙaunata da gaske fiye da waɗannan?” Ya ce, “I, Ubangiji, ka san cewa ina sonka.” Yesu ya ce, “Ciyar da ʼyaʼyan tumakina.”
16. Har wa yau Yesu ya ce, “Siman ɗan Yohanna, kana ƙaunata da gaske?” Ya amsa ya ce, “I, Ubangiji, ka san cewa ina sonka.” Yesu ya ce, “Lura da tumakina.”
17. Sau na uku ya ce masa, “Siman ɗan Yohanna, kana ƙaunata?” Sai Bitrus ya ɓata rai saboda Yesu ya tambaye shi sau na uku, “Kana ƙaunata?” Ya ce, “Ubangiji ka san kome duka; ka san cewa, ina ƙaunarka.” Yesu ya ce, “Ciyar da tumakina.
18. Gaskiya nake faɗa maka, saʼad da kake saurayi kakan yi wa kanka sutura ka tafi inda ka so; amma saʼad da ka tsufa za ka miƙa hannuwanka, wani dabam yǎ yi maka sutura yǎ kai ka inda ba ka so.”
19. Yesu ya faɗi wannan ne, don yǎ nuna irin mutuwar da Bitrus zai yi yǎ ɗaukaka Allah. Saʼan nan ya ce masa, “Bi ni!”
20. Bitrus ya juya ya ga cewa almajirin nan da Yesu yake ƙauna yana binsu. (Wannan ne ya jingina a jikin Yesu saʼad da suke cin abincin yamman nan da ya ce, “Ubangiji wane ne zai bashe ka?”)
21. Da Bitrus ya gan shi sai ya ce, “Ubangiji, wannan fa?”
22. Yesu ya amsa, ya ce, “In na so yǎ kasance da rai har in dawo, mene ne naka a ciki? Kai dai bi ni.”
23. Saboda wannan, jita-jita ta bazu a cikin ʼyanʼuwa cewa wannan almajirin ba zai mutu ba. Amma fa Yesu bai ce ba zai mutu ba; shi dai ya ce, “In na so yǎ kasance da rai har in dawo, mene ne naka a ciki?”
24. Wannan shi ne almajirin da ya ba da shaida a kan waɗannan abubuwa ya kuma rubuta su. Mun san cewa shaidarsa gaskiya ce.
25. Yesu ya yi waɗansu abubuwa da yawa kuma. Da a ce an rubuta kowannensu, na tabbata ko duniya duka ba za ta sami wuri saboda littattafan da za a rubuta ba.