A A A A A

Bible in one year

Nuwamba 4

Filemon 1:1-25
1. Wasiƙa daga Bulus, ɗan kurkuku saboda Kiristi Yesu, da kuma Timoti ɗanʼuwanmu, zuwa ga Filemon ƙaunataccen abokinmu da kuma abokin aikinmu,
2. zuwa kuma ga Affiya ʼyarʼuwarmu, zuwa kuma ga Arkiffus abokin famarmu, da zuwa kuma ga ikkilisiyar da take taruwa a gidanka:
3. Alheri gare ku da salama daga Allah Ubanmu da kuma Ubangiji Yesu Kiristi.
4. Kullum nakan gode wa Allahna saʼad da nake tuna da kai cikin adduʼoʼina,
5. domin ina jin labari bangaskiyarka cikin Ubangiji Yesu da kuma ƙaunarka da kake yi saboda dukan tsarkaka.
6. Ina adduʼa ka zama mai ƙwazo cikin shaida bangaskiyarka, domin ka sami cikakken fahimta ta kowane abin da yake nagarin da muke da shi cikin Kiristi.
7. Ƙaunarka ta sa ni farin ciki ƙwarai ta kuma ƙarfafa ni, domin kai, ɗanʼuwa, ka wartsake zukatan tsarkaka.
8. Saboda haka, ko da yake cikin Kiristi ina iya yin ƙarfin hali in umarce ka ka yi abin da ya kamata,
9. duk da haka ina roƙonka saboda ƙauna, na fi so in roƙe ka, ni Bulus tsoho, a yanzu kuma ga ni ɗan sarƙa saboda Kiristi Yesu.
10. Ina roƙonka saboda ɗana Onisemus, wanda ya zama ɗana yayinda nake cikin sarƙoƙi.
11. Dā kam, ba shi da amfani a gare ka, amma yanzu ya zama da amfani a gare ka da kuma gare ni.
12. Ina aike shi yǎ koma gare ka-shi da yake zuciyata.
13. Na so in riƙe shi a wurina a madadinka domin yǎ taimake ni yayinda nake cikin sarƙoƙi saboda bishara.
14. Sai dai ban so in yi kome ban da yardarka ba, domin kowane alherin da za ka yi, yǎ fito daga zuciyarka, ba na tilas ba.
15. Wataƙila abin da ya sa aka raba ka da shi na ɗan lokaci ƙanƙani shi ne don ka same shi da amfani— 
16. ba kamar bawa kuma ba, sai dai fiye da bawa, a matsayin ƙaunataccen ɗanʼuwa. Shi ƙaunatacce ne sosai a gare ni amma a gare ka ya ma fi zama ƙaunatacce, kamar mutum da kuma kamar ɗanʼuwa a cikin Ubangiji.
17. Saboda haka in ka ɗauke ni a kan ni abokin tarayya ne, sai ka marabce shi kamar yadda za ka marabce ni.
18. In ya yi maka wani laifi ko kuma yana riƙe maka wani bashi, sai ka mai da shi a kaina.
19. Ni, Bulus, nake rubuta wannan da hannuna. Zan biya ka-kada ma a yi zancen ranka da kake riƙe mini bashi.
20. Ina fata, ɗanʼuwa, zan sami amfani daga gare ka cikin Ubangiji; ka wartsake zuciyata cikin Kiristi.
21. Da tabbacin biyayyarka, ina rubuta maka, da sanin za ka yi fiye da abin da na ce.
22. Abu guda ya rage: Ka shirya mini masauƙi, domin ina bege za a mayar da ni gare ku albarkacin adduʼoʼinku.
23. Efafaras, abokin tarayyata a kurkuku cikin Kiristi Yesu, yana gaishe ka.
24. Haka kuma Markus, Aristarkus, Demas da kuma Luka, abokan aikina.
25. Alherin Ubangiji Yesu Kiristi yǎ kasance da ruhunku.