A A A A A

Bible in one year

Nuwamba 3

Titus 3:1-15
1. Ka tuna wa mutane su zama masu biyayya ga masu mulki da kuma hukumomi, su zama masu biyayya suna kuma a shirye su yi kowane abin da yake mai kyau,
2. kada su zama masu ɓata sunan kowa, su zama masu salama da kulawa, su kuma zama masu matuƙar tawaliʼu ga dukan mutane.
3. A wani lokaci can baya mu ma wawaye ne, marasa biyayya, aka ruɗe mu, shaʼawace-shaʼawace da kwaɗayi iri-iri suka ɗaure mu, muka yi zaman ƙiyaya da kishi, aka ƙi mu, mu kuma muka ƙi juna.
4. Amma da alheri da kuma ƙaunar Allah Mai Cetonmu suka bayyana,
5. sai ya cece mu, ba saboda abubuwan adalcin da muka aikata ba, sai dai saboda jinƙansa. Ya cece mu ta wurin wankan nan na sāke haihuwa da kuma sabuntawan nan ta Ruhu Mai Tsarki,
6. wanda ya zubo mana a yalwace ta wurin Yesu Kiristi Mai Cetonmu,
7. wannan fa domin an kuɓutar da mu ne ta wurin alherinsa, don mu zama magāda masu begen ga rai madawwami.
8. Wannan magana tabbatacciya ce, ina kuma ina so ka nanata waɗannan abubuwa ƙwarai, domin waɗanda suka dogara ga Allah su himmantu ga aiki mai kyau. Waɗannan abubuwa suna da kyau sosai suna kuma da amfani ga kowane mutum.
9. Amma ka guji jayayyar banza da ƙididdigar asali da gardandami da faɗace faɗace game da Doka, gama ba su da riba kuma aikin banza ne.
10. Ka gargaɗe mutumin da yake kawo tsattsaguwa sau ɗaya, ka kuma gargaɗe shi sau na biyu. Bayan haka, kada wani abu yǎ haɗa ka da shi.
11. Ka dai san cewa irin mutumin nan ya taurare kuma mai zunubi ne; ya yanke wa kansa hukunci.
12. Da zarar na aika Artemas ko Tikikus zuwa wurinka, sai ka yi iyakacin ƙoƙarinka ka zo wurina a Nikofolis, domin na yanke shawara in ci damina a can.
13. Ka yi iyakacin ƙoƙarinka ka taimaki Zenas lauyan nan da Afollos a hanyarsu ka kuma tabbata ba su rasa kome ba.
14. Dole mutanenmu su koyi ba da kansu ga aikata abin da yake nagari, domin su iya biyan bukatunsu na yau da kullum kada kuma su yi rayuwar marar amfani.
15. Dukan waɗanda suke tare da ni suna gaishe ka. Ka gaggai mini da masoyanmu, masu bangaskiya. Alheri yǎ kasance tare da ku duka.