A A A A A

Bible in one year

Oktoba 9

Filibbiyawa 4:1-23
1. Saboda haka ʼyanʼuwana, ku da nake ƙauna, nake kuma marmarin ganinku, ku da kuke farin cikina da kuma rawanina, ku dage ga Ubangiji, ya ku ƙaunatattuna!
2. Ina roƙon Yuwodiya ina kuma roƙon Sintike, su yi zaman lafiya da juna saboda su na Ubangiji ne.
3. I, ina kuma roƙonka, abokin famata, ka taimaki matan nan waɗanda suka yi fama aikin bishara tare da ni, haka ma Kilemen da kuma sauran abokan aikina, waɗanda sunayensu suna cikin littafin rai.
4. Ku yi farin ciki a cikin Ubangiji kullum. Har wa yau ina dai ƙara gaya muku, ku yi farin ciki!
5. Bari kowa yǎ kasance da sauƙinkai. Ubangiji ya yi kusan zuwa.
6. Kada ku damu game da kome sai dai a cikin abu duka, ku gabatar da roƙe roƙenku ga Allah ta wurin adduʼa da roƙo, tare da godiya.
7. Salamar Allah, wadda ta wuce dukan fahimta, za ta tsai da zukatanku da tunaninku cikin Kiristi Yesu.
8. A ƙarshe, ʼyanʼuwa, duk abin da yake na gaskiya, duk abin da yake na girmamawa, duk abin da yake daidai, duk abin da yake da tsarki, duk abin da yake kyakkyawa, duk abin da yake na shaʼawa-in ma wani abu mafifici ne, ko ya cancanci yabo-ku yi tunani a kan irin abubuwan nan.
9. Duk abin da kuka koya ko kuka karɓa ko kuka ji daga wurina, ko kuka gani a cikina-ku yi aiki da shi. Allah na salama kuma zai kasance tare da ku.
10. Na yi farin ciki sosai ga Ubangiji don yanzu kun sāke nuna kun kula da ni. Ko da yake dā ma kun kula da ni sai dai ba ku sami dama ku nuna mini ba.
11. Ba na faɗin haka domin ina cikin bukata, gama na koya yadda zan gamsu a cikin kowane hali.
12. Na san mene ne zaman rashi, na kuma san mene ne zaman samu. Zan iya zama cikin kowane hali, ko cikin ƙoshi ko cikin yunwa, ko cikin yalwa ko kuma cikin fatara.
13. Ina iya yin kome ta wurin wannan wanda yake ba ni ƙarfi.
14. Duk da haka kun kyauta da kuka yi tarayya da ni cikin wahalolina.
15. Ban da haka, kamar yadda ku Filibbiyawa kuka sani, a farkon kwanakin da kuka ji bishara, saʼad da na tashi daga Makidoniya, babu wata ikkilisiyar da ta yi tarayya da ni a fannin bayarwa da karɓa, sai ku kaɗai;
16. gama ko saʼad da nake a Tassalonika ma, kun aiko mini da taimako sau da sau saʼad da nake cikin bukata.
17. Ba cewa ina neman kyauta ba ne, sai dai ina neman abin da za a ƙara a kan ribarku.
18. An biya ni duka, biyan da ya wuce misali. Bukatata ta biya, da yake na karɓi kyautarku da kuka aiko ta hannun Afaforiditus. Baiwa mai ƙanshi, hadaya abar karɓa, mai faranta wa Allah rai.
19. Allahna kuma zai biya dukan bukatunku bisa ga ɗaukakar wadatarsa cikin Kiristi Yesu.
20. Ɗaukaka ta tabbata ga Allahnmu da Ubanmu har abada abadin. Amin.
21. Ku gai da dukan tsarkaka cikin Kiristi Yesu. ʼYanʼuwan da suke tare da ni suna gaishe ku.
22. Dukan tsarkaka suna gaishe ku, musamman waɗanda suke na gidan Kaisar.
23. Alherin Ubangiji Yesu Kiristi yǎ kasance da ruhunku. Amin.