| 1 Corintianach 16:1-24 |
| 1. A‑nis a thaobh an tionail airson nan naomh: mar a thug mi stiùireadh do dh'eaglaisean Ghalàtia, mar sin dèanaibh‑se cuideachd. |
| 2. Air a' chiad latha gach seachdain, cuireadh gach neach agaibh rud air leth mar a shoirbhicheas leis agus gleidheadh e e, airson 's nach bi tional ri dhèanamh nuair a thig mise. |
| 3. Agus nuair a thig mi, ge b' e cò a mholas sibh, cuiridh mise iadsan, le litrichean, a ghiùlain ur tiodhlaic gu Ierusalem; |
| 4. agus mas iomchaidh dhòmhsa a dhol ann cuideachd, thèid iadsan còmhla rium. |
| 5. Ach thig mi thugaibh‑se nuair a thèid mi tro Mhacedònia — oir tha mi a' dol tro Mhacedònia; |
| 6. agus 's dòcha gum fan mi còmhla ribh, no fiù 's gun cuir mi seachad an geamhradh còmhla ribh, airson 's gun cuir sibh air mo thuras mi, ge b' e dè an t‑àite dhan tèid mi. |
| 7. Oir chan eil mi ag iarraidh ur faicinn an‑dràsta san dol seachad; oir tha dùil agam fuireach còmhla ribh airson ùine bheag, ma cheadaicheas an Tighearna. |
| 8. Ach fuirichidh mi ann an Ephesus chun na Caingis, |
| 9. oir chaidh doras mòr agus èifeachdach fhosgladh dhomh, agus tha tòrr nàimhdean ann. |
| 10. A‑nis ma thig Timòteus, feuchaibh gum bi e gun eagal còmhla ribh, oir tha e a' dèanamh obair an Tighearna, mar a tha mise. |
| 11. Mar sin na dèanadh neach sam bith tàir air. Ach cuiribh air a shlighe ann an sìth e, airson 's gun till e thugamsa, oir tha mi ga fheitheamh còmhla ri na bràithrean. |
| 12. Ach a thaobh ar bràthair Apollos, dh'earalaich mi air a dhol thugaibh le na bràithrean, ach cha b' e a mhiann‑san idir tighinn an‑dràsta, ach thig e nuair a gheibh e cothrom. |
| 13. Dèanaibh faire, seasaibh gu daingeann sa chreideamh, bithibh fearail, bithibh làidir. |
| 14. Biodh a h‑uile sìon a nì sibh air a dhèanamh ann an gràdh. |
| 15. Is aithne dhuibh teaghlach Stephanuis, gum b' iad ciad‑thoradh Achaia, agus gu bheil iad air iad fhèin a choisrigeadh do fhrithealadh dha na naoimh. A‑nis tha mi gur n‑earalachadh, a bhràithrean, |
| 16. gum biodh sibh umhail dhan leithidean sin, agus dhan a h‑uile neach a chuidicheas san obair agus a nì saothair. |
| 17. Tha mi a' dèanaibh gàirdeachas mu thighinn Stephanuis is Fhortunatuis is Achaicuis, oir rinn iad suas na bha a dhìth oirbhse. |
| 18. Oir dh'ath‑ùraich iad mo spiorad‑sa agus ur spiorad‑se. Mar sin aithnichibh an leithidean sin. |
| 19. Tha eaglaisean na h‑Àisia a' cur fàilte oirbh. Tha Acuila is Prisca, cuide ris an eaglais a tha nan taigh, a' cur fàilte chridheil oirbh san Tighearna. |
| 20. Tha na bràithrean gu lèir a' cur fàilte oirbh. Cuiribh‑se fàilte air a chèile le pòig naoimh. |
| 21. Tha mise, Pòl, a' sgrìobhadh na fàilte seo lem làimh fhèin. |
| 22. Ma tha neach ann aig nach eil gràdh dhan Tighearna, biodh e mallaichte. Thig, a Thighearna. |
| 23. Gràs an Tighearna Ìosa gu robh leibh. |
| 24. Mo ghràdh‑sa gu robh leibh uile ann an Crìosd Ìosa. Amen. |