| 1 Corintianach 3:1-23 |
| 1. Agus cha b' urrainn dhòmhsa, a bhràithrean, bruidhinn ribhse mar ri daoine spioradail, ach mar ri daoine feòlmhor, mar leanabanan ann an Crìosd. |
| 2. Thug mi bainne dhuibh ri òl, is cha b'e biadh, oir cha robh sibh deiseil air a shon. Agus fiù 's an dràsta chan eil sibh deiseil air a shon, |
| 3. oir tha sibh fhathast feòlmhor. Oir fhad 's a tha farmad agus strì nur measg, nach ann feòlmhor a tha sibh, agus a' coiseachd mar dhaoine? |
| 4. Oir nuair a chanas cuideigin, “Is ann le Pòl a tha mise,” agus neach eile, “Is ann le Apollos a tha mise,” nach eil sibh feòlmhor? |
| 5. Dè mar sin a th' ann an Apollos? Dè a th' ann am Pòl? Seirbheisich tron do chreid sibh — mar a thug an Tighearna do gach aon. |
| 6. Chuir mise, dh'uisgich Apollos, ach is e Dia a dh'adhbhraich am fàs. |
| 7. Mar sin chan eil rud sam bith san neach a chuireas no san neach a dh'uisgicheas, ach a‑mhàin ann an Dia a tha ag adhbhrachadh an fhàis. |
| 8. Tha esan a chuireas agus esan a dh'uisgicheas nan aon, agus gheibh gach aon a thuarastal a rèir a shaothrach fhèin. |
| 9. Oir is sinne co‑luchd‑obrach Dhè. Is sibhse achadh Dhè, togalach Dhè. |
| 10. A rèir gràs Dhè a chaidh a thoirt dhòmhsa, mar shàr‑fhear‑togail glic, shuidhich mi bunait, agus tha neach eile a' togail oirre. Thoireadh gach neach an aire ciamar a thogas e oirre. |
| 11. Oir chan urrainn do neach sam bith bunait a shuidheachadh a bharrachd air an tè sin a chaidh a suidheachadh, as e Ìosa Crìosd. |
| 12. A‑nis ma thogas neach sam bith air a' bhunait le òr, airgead, clachan prìseil, fiodh, feur, connlach — |
| 13. bidh obair gach neach air fhoillseachadh, oir nochdaidh an Latha i, a chionn 's gun tèid a foillseachadh le teine, agus dearbhaidh an teine dè an seòrsa obair a tha gach aon air a dhèanamh. |
| 14. Ma dh'fhanas obair neach sam bith a thog air a' bhunait, gheibh e duais. |
| 15. Ma bhios obair neach sam bith air a losgadh, fulaingidh e call, ged a bhios e fhèin air a shàbhaladh, ach mar tro theine. |
| 16. Nach aithne dhuibh gur sibhse teampall Dhè agus gu bheil Spiorad Dhè a' còmhnaidh annaibh? |
| 17. Ma thruailleas neach sam bith teampall Dhè, sgriosaidh Dia an neach sin. Oir tha teampall Dhè naomh, agus is sibhse e. |
| 18. Na mealladh neach sam bith e fhèin. Ma tha neach sam bith nur measg a' smaoineachadh gu bheil e glic san linn seo, biodh e na amadan airson 's gum fàsadh e glic. |
| 19. Oir tha gliocas an t‑saoghail seo na amaideachd do Dhia. Oir tha e sgrìobhte, “Tha e a' glacadh nan daoine glice nan seòltachd,” |
| 20. agus a‑rithist, “Is aithne dhan Tighearna smuaintean nan daoine glice, gu bheil iad dìomhain.” |
| 21. Mar sin na bòstadh neach sam bith ann an daoine. Oir is ann leibhse a tha a h‑uile sìon, |
| 22. ge b' e Pòl no Apollos no Cèphas no an saoghal no beatha no bàs no rudan a th' ann no a tha ri thighinn — is ann leibhse a tha iad uile, |
| 23. agus is ann le Crìosd a tha sibhse, agus is ann le Dia a tha Crìosd. |