A A A A A
Bible in one year
April 15

Yosua 19:1-51
1. Dzidze evelia dze Simeon-viwo ƒe to la dzi le woƒe ƒomeawo nu, eye woxɔ woƒe anyigba ɖe Yuda-viwo ƒe anyigba dzi.
2. Du, siwo nye wo to le woƒe anyigba dzi, wonye: Beer-Seba, Seba, Molada.
3. Xazar-Sual, Bala, Ezem.
4. Eltolad, Betul, Xorma,
5. Ziklag, Bet-Markabot, Xazar-Susa,
6. Bet-Lebaot kple Saruxen. Wole du wuietɔ̃ kple woƒe kɔƒewo.
7. Ayin, Rimon, Eter kple Asan. Wole du ene kple woƒe kɔƒewo,
8. hekpe ɖe kɔƒe, siwo katã le du, siawo gbɔ vaseɖe Baalat-Beer la ŋuti, eya nye Ramat le dziehe. Esia nye Simeon-viwo ƒe to la ƒe anyigba le woƒe ƒomeawo nu.
9. Yuda-viwo ƒe gome ŋu woɖe anyigba le na Simeon-viwo, elabena Yuda-viwo tɔ lolo na wo akpa, eyata Simeon-viwo xɔ woƒe anyigba ɖe wo dome.
10. Dzidze etɔ̃lia dze Zebulon-viwo dzi le woƒe ƒomeawo nu, eye woƒe anyigba ƒe liƒo de Sarid.
11. Woƒe liƒo zɔ ɣetoɖoƒe gome va to Marala heto Bedabaset ŋu, eye wòva ke ɖe tɔʋu la nu le Yokneam kasa.
12. Eye liƒo la trɔ tso Sarid ɖo ta ɣedzeƒe gome va to Kislot-Tabor ƒe liƒo ŋu, eye wòto Daberat ŋu va ke ɖe Yafia,
13. eye wòtso afisia ɖo ta ɣedzeƒe gome va to Gat-Xefer kple Et-Kazin hemlo to Rimon va ke ɖe Nea;
14. eye liƒo la gɔdɔ̃ zɔ Xanaton ƒe anyiehe gome heva to Yiftax-El-bali la me.
15. Katat, Nahalal, Simron, Yidala kple Betlexem. Wole du wuieve hekpe ɖe woƒe kɔƒewo ŋu.
16. Esia nye Zebulon-viwo ƒe anyigba, woƒe duwo kple kɔƒewo le woƒe ƒomeawo nu.
17. Dzidze enelia dze Isaxar-viwo dzi le woƒe ƒomeawo nu.
18. Eye woƒe anyigba to Yezreel, Kesulot, Sunem,
19. Xafarayim, Sion, Anaxarat,
20. Harabit, Kision, Abez,
21. Remel, En-Ganim, En-Xada kple Bet-Pazez.
22. Eye liƒo la va ke ɖe Tabor, Saxazima kple Bet-Semes ŋu heva wu nu ɖe Yordan nu. Wole du wuiade hekpe ɖe woƒe kɔƒewo ŋu.
23. Esia nye Isaxar-viwo ƒe to la ƒe anyigba, woƒe duwo kple kɔƒewo le woƒe ƒomeawo nu.
24. Dzidze atɔ̃lia dze Aser-viwo ƒe to la dzi le woƒe ƒomeawo nu.
25. Eye woƒe anyigba to Xelkat, Xali, Beten, Axsaf,
26. Alamelex, Amad kple Misal va zɔ Karmel kple Sixor-Libnat ŋu le ƒu gome;
27. eye wònyè kpo to ɣedzeƒe gome va ke ɖe Bet-Dagon, eye wòmlo to Zebulon, Yiftax-El-bali la ƒe anyiehe, Bet-Haemek kple Negiel, eye wòzɔ Kabul ƒe mia me gome
28. va to Ebron, Rexob, Xamon kple Kana vaseɖe Zidon, ɖu gã la gbɔ.
29. Eye liƒo la tro to Rama kple du sesẽ Tirus gbɔ, eye wònyè kpo to Xosa heva wu nu ɖe ƒu nu tso Axsib-nuto me
30. vaseɖe Uma, Afek kple Rexob. Wole du blave vɔ eve hekpe ɖe woƒe kɔƒewo ŋu.
31. Esia nye Aser-viwo ƒe to la ƒe anyigba, woƒe duwo kple kɔƒewo le woƒe ƒomeawo nu.
32. Dzidze adelia dze Naftali-viwo dzi le woƒe ƒomeawo nu.
33. Eye woƒe liƒo tso Xelef kple logotiwo gbɔ le Zaananim, Adami-Hanekeb kple Yabneel vaseɖe Lakum, eye wòva wu nu ɖe Yordan nu.
34. Eye liƒo la nyẽ kpo ɖe ɣetoɖoƒe gome va to Aznot-Tabor, eye wòmlo zɔ Xukok ŋu va to Zebulon ŋu le dziehe, eto Aser ŋu le ɣetoɖoƒe, eye wòto Yuda ŋu le Yordan nu le ɣedzeƒe.
35. Du sesẽwo nye: Zidim, Zer, Xamat, Rakat, Kineret,
36. Adama, Rama, Xazor,
37. Kedes, Edrei, En-Xazor,
38. Yireon, Migdal-El, Xorem, Bet-Anat kple Bet-Semes. Wole du wuiasieke hekpe ɖe woƒe kɔƒewo ŋu.
39. Esia nye Naftali-viwo ƒe anyigba, woƒe duwo kple kɔƒewo le woƒe ƒomeawo nu.
40. Dzidze adrelia dze Dan-viwo ƒe to la dzi le woƒe ƒomeawo nu.
41. Eye du, siwo le woƒe anyigba dzi, wonye: Zora, Estaol, Ir-Semes,
42. Saalabin, Ayalon, Yitla,
43. Elon, Timnat, Ekron,
44. Elteke, Gibeton, Baalat,
45. Yehud, Bene-Berak, Gal-Rimon,
46. Me-Hayarkon kple Harakon kple eƒe anyigba, si le Yafo kasa.
47. Ke Dan-viwo ƒe anyigba xaxa na wo akpa, eyata Dan-viwo yi ɖawɔ aʋa kple Lesem; woɖu wo dzi, wu wo kple yi, eye woxɔe hetso aƒe ɖe eme, eye wona ŋkɔ Lesem bena Dan, le wo fofo Dan ƒe ŋkɔ nu.
48. Esia nye Dan-viwo ƒe to la ƒe anyigba, woƒe duwo kple kɔƒewo le woƒe ƒomeawo nu.
49. Esi wode liƒo anyigba la me hemãe vɔ keŋ la, Israel-viwo na anyigba Yosua, Nun vi, ɖe wo dome;
50. wotsɔ ɖu Timnat-Serax, si wòbia la, nɛ ɖe Efrayim-to dzi, abe alesi Yehowa gblɔ ene, eye wògbugbɔ du la tso henɔ eme.
51. Esia nye anyigba, siwo nunɔla Eleazar kple Yosua, Nun vi, kpakple Israel-viwo ƒe ƒomewo ƒe amegãwo dzidze nu ma le Silo le Yehowa ŋku me, le Mawu ƒe agbadɔ la nu. Ale wowu anyigba la mamã nu.

Yosua 20:1-9
1. Eye Yehowa gblɔ na Yosua bena;
2. Gblɔ na Israel-viwo be, woatia sitsoƒedu, siwo ŋu meƒo nu le na mi to Mose dzi la;
3. eye amesi menyae o, eye mebua wu ame o la, nasi ayi afima, eye woanye sitsoƒe na mi tso hlɔ̃tɔ si me.
4. Ne esi yi du siawo dometɔ ɖeka me la, ekema wòatɔ ɖe ɖu la ƒe agbo nu, eye wòagblɔ eƒe nya la na dumegãwo, hafi woaxɔe ɖe dua me, eye woana teƒee wòanɔ wo gbɔ.
5. Ke ne hlɔ̃tɔ ti eyome la, womegatsɔ amewula la de asi nɛ o; elabena mebua hafi wu nɔvia o, eye menye ɖe wòlé fui tsã hafi o.
6. Eye wòana du ma me, vaseɖe esime woakplɔe ava ameha la ŋku me, eye woadzro nya la me; eye ne nunɔla gã, si fi ɣemaɣi ku la, ekema amewula la kpɔ mɔ agbugbɔ ayi du, si me wòsi tso kple eya ŋutɔ ƒe xɔ nu.
7. Tete woɖo Kedes le Galilea le Naftali-to dzi kple Sixera le Efrayim-to dzi kpakple Kiryat-Arba, si nye Xebron le Yuda-to dzi.
8. Eye woɖo Bezer, si le gbedzi kple tagba la, ɖe Ruben-to la me le Yordan ƒe go keme dzi le Yerixo ƒe ɣedzeƒe, kple Ramot le Gilead ɖe Gad-to la me, kpakple Golan le Basan ɖe Manase-to la me.
9. Esiawo nye ɖu, siwo woɖo na Israel-viwo katã kple amedzro, si le wo dome bena, ne amea ɖe mebua wu nɔvia o la, wòasi ayi afima, ne magaku ɖe hlɔ̃tɔ si me, hafi woahe eƒe nya ava ameha la ŋku mee o.

Psalmowo 46:1-6
1. Korax-viwo ƒe ha na henɔ la, ne woadzi ɖe ɖetugbiwo ƒe gbe nu.
2. Yehowa enye sitsoƒe kple ŋusẽ na mí, xɔnametɔ ŋutɔ wònye le xaxawo me.
3. Eyata míavɔ̃ o, nenye be, anyigba gli le enu, eye towo ʋã le atsiaƒu titina,
4. ne eƒe tɔwo dze agbo, eye wotso futukpɔ, eye towo ʋuʋu le eƒe nyanyrã me hã. Sela.
5. Tɔsisi la ƒe alɔdzewo doa dzidzɔ na Mawu ƒe du, si nye dziƒoʋitɔ ƒe nɔƒe kɔkɔe la.
6. Mawu le eme, maʋã o, Mawu xɔna nɛ, ne agu dze.

Lododowo 14:7-11
7. Te ɖa le bometsila gbɔ, elabena mèdzea si gɔmesese ƒe nuyiwo o.
8. Nunyalawo ƒe ayedzedze enye be, woalé ŋku ɖe woƒe zɔzɔme ŋu; ke bometsilawo ƒe bometsitsi enye alakpa.
9. Avulévɔsa le alɔme ɖem le bometsilawo ŋu; ke ŋudzedze kpɔkpɔ le nuteƒewɔlawo dome.
10. Dzi nya eya ŋutɔ ƒe nuxaxa, eye ame tutɔ mate ŋu akpɔ dzidzɔ ɖee ti o.
11. Ame vɔ̃ɖiwo ƒe aƒe agblẽ, ke nuteƒewɔlawo ƒe agbadɔ ade ama.

Luka 12:32-59
32. Ha sue, megavɔ̃ o! Elabena edze mia Fofo la ŋu be, yeatsɔ fiaɖuƒe la na mi.
33. Midzra nusi le mia si, eye mina nu ame dahewo; miwɔ kotoku, siwo medo xoxo o la, na mia ɖokui, nu nyui, siwo nu metsina o la, ɖe dziƒo, afisi fiafitɔ megogo o, eye agbagblaʋui hã megblẽa nu le o.
34. Elabena afisi miaƒe nu nyui le la, afima miaƒe dzi hã lanɔ.
35. Mina miaƒe aliwo dzi nanɔ babla, eye miaƒe akaɖiwo nanɔ bibim;
36. eye miawo la miɖi amesiwo le mɔ kpɔm na woƒe aƒetɔ bena, ne adzo le srɔ̃ɖeƒe, eye wòava aƒo nɔa la, ne woaʋui nɛ enumake.
37. Woayra dɔla ma, siwo, ne aƒetɔ la va la, akpɔ wo le ŋudzɔ; vavã mele egblɔm na mi bena: Asa avɔ ɖe ali, eye wòana be, woanɔ kplɔ ŋuti, eye wòatsa wo dzi asubɔ wo.
38. Eye ne ava le ŋudzɔɣi evelia kple etɔ̃lia me, eye wòakpɔ wo nenema la, woayra woamawo.
39. Ke minya esia bena, ne aƒeatɔ anya gaƒoƒo, si dzi fiafitɔ ava la, anɔ ŋudzɔ, eye mana mɔe be, wòadze kpɔ age ɖe eƒe aƒe me o.
40. Eyaŋuti miawo hã minɔ dzadzraɖoɖi; elabena Amegbetɔvi la ava le gaƒoƒo, si miele mɔ kpɔm ne o la dzi.
41. Tete Petro gblɔ nɛ bena: Aƒetɔ, miawoe nèle lo sia dom na loo, alo na wo katã hã mahã?
42. Eye Aƒetɔ la gblɔ bena: Azɔ amekae nye xɔnuvi nuteƒewɔla kple nunyala, amesi eƒe aƒetɔ aɖo eƒe aƒemetɔwo dzi be, wòana woƒe nuɖuɖu wo le ɣeyiɣi nyui dzi mahã?
43. Woayra dɔla ma, si, ne eƒe aƒetɔ va la, akpɔe be, èwɔ nenema.
44. Vavã mele egblɔm na mi bena, aɖoe eƒe nuwo katã dzi.
45. Ke ne dɔla ma gblɔ le eƒe dzi me bena: Nye aƒetɔ la ƒe vava he ɖe megbe, eye wòaɖe asi dɔlaŋutsuwo kple dɔlanyɔnuwo ƒoƒo me, eye wòaɖu nu, ano nu, eye wòamu aha;
46. dɔla ma ƒe aƒetɔ ava le ŋkeke, si mele mɔ kpɔm ne o kple gaƒoƒo, si menya o la dzi, eye wòafee ɖe eve, eye wòana eƒe gomee akpe ɖe ame mawɔnuteƒewo ŋu.
47. Eye dɔla ma, si nya eƒe aƒetɔ ƒe lɔlɔ̃nu, eye medzrae do alo wɔ eƒe lɔlɔ̃nu o la, woaƒoe geɖe;
48. eye amesi menyae o, ke wòwɔ nusi dze ƒoƒo la, woaƒoe ʋee. Eye amesiame, si wona nu geɖee la, woabia nu geɖe le esi; eye amesi wode nu geɖe, esi la, woabia nu geɖe wu le esi.
49. Meva dzo da ge ɖe anyigba dzi, eye nuka dim mele wu eƒe xoxo xoxo mahã?
50. Ke ele nam be, woade mawutsi ta nam kple mawutsia ɖe, eye ale wotee ɖe ŋunye, vaseɖe esime woawu enu!
51. Miebu xa bena, ŋutifafa na ge meva le anyigba dzi mahã? Kpao, mele egblɔm na mi bena, memamã boŋ ye;
52. elabena tso esia dzi yina la ame atɔ̃ ano aƒe ɖeka me, eye woamã wo me, etɔ̃ atsi tre ɖe eve ŋuti, eye eve atsi tre ɖe eta ŋuti.
53. Woamã fofo kple viŋutsu me, eye viŋutsu kple fofo me, ɖada kple vinyɔnu me, eye vinyɔnu kple ɖada me; lɔ̃xo kple visrɔ̃ me, eye visrɔ̃ kple lɔ̃xo me.
54. Eye egblɔ na amehawo hã bena: Ne miekpɔ alilikpo le ɖoɖom le ɣetoɖoƒe la, enumake miegblɔna bena: Tsi gbɔna, eye wòva vea me nenema.
55. Eye ne dzieheya le ƒoƒom la, miegblɔna bena: Xexeme le dzo xɔ ge, eye wòva vea me.
56. Alakpatɔwo! Mienya alesi miaɖo anyigba kple dziƒo ƒe ŋku me akpɔ: ke aleke wɔ, bena mienya alesi míado ɣeyiɣi sia akpɔ o mahã?
57. Eye nukaŋuti miekpɔa nusi dzɔ la me le mia ŋutɔwo mia ɖokui si o mahã?
58. Elabena ne mia kple wò ketɔ miele fia ƒe ŋku me yim la, dze agbagba le mo dzi be, naɖe ɖokuiwò le esi me; ne menye nenem o la, ahe wò ayi ʋɔnudrɔ̃la gbɔ, eye ʋɔnudrɔ̃la aɖe wò asi na atikplɔtɔ, eye atikplɔtɔ la ade wò gaxɔ me.
59. Mele egblɔm na wò bena: Màdo go le afima o, vaseɖe esime naxe ho mlɔetɔ.