A A A A A
Bible in one year
March 3

4 Mose 3:1-51
1. Esiawo nye Aron kple Mose viwo, le ɣeyiɣi, si me Yehowa ƒo nu kple Mose le Sinai-to la dzi.
2. Aron viŋutsuwo ƒe ŋkɔwo nye si: Eƒe ŋgɔgbevi Nadab, eyome Abihu, Eleazar kple Itamar.
3. Esiawo nye nunɔla Aron, amesi wòsi ami na heɖoe be, wòanye nunɔla asubɔ la, ƒe viŋutsuwo ƒe ŋkɔwo.
4. Ke Nadab kple Abihu ku le Yehowa ŋku me, esime wotsɔ dzo bubu va Yehowa ŋku me le Sinai-gbedzi; ke viŋutsu mele wo si o, eye Eleazar kple Itamar zu nunɔlawo kpe ɖe wo fofo Aron ŋu.
5. Eye Yehowa ƒo nu kple Mose bena:
6. Na Lewi-to la nava nunɔla Aron gbɔ, bena woasubɔe.
7. Eye woawɔ do, si le eya ŋutɔ kple ha blibo la ŋu, le Mawu ƒe agbadɔ la nu; woawoe awɔ dɔ, si le nɔƒe la ŋu.
8. Woakpɔ Mawu ƒe agbadɔ la ŋuti nuwo dzi, eye woakpe ɖe Israel-viwo ŋu, ne wova subɔsubɔ ge, eye woawɔ nɔƒe la ŋu dɔwo.
9. Eye natsɔ Lewitɔwo ade asi na Aron kple viaŋutsuwo, etɔ woanye blibo le Israel-viwo dome.
10. Eye naɖo Aron kple viaŋutsuwo, be woawɔ nunɔladɔ; ke ne ame tutɔa ɖe le va la, woawui.
11. Eye Yehowa ƒo nu kple Mose bena:
12. Nye ŋutɔe ɖe Lewitɔwo le Israel-vi bubuawo dome ɖe ŋgɔgbevi, siwo ʋu ɖɔ nu na wo dada la teƒe, bena Lewitɔwo nanye tɔnye le Israel-viwo dome.
13. Ŋgɔgbeviwo katã nye tɔnye; elabena gbesigbe mewu ŋgɔgbeviwo katã le Egipte-nyigba dzi la, mekɔ amewo kple lãwo ƒe ŋgɔgbeviwo ŋu le Israel, be woanye tɔnye, nye Yehowa.
14. Eye Yehowa ƒo nu kple Mose le Sinai-gbedzi bena:
15. Tia Lewitɔwo xlẽ le wo fofowo ƒe aƒewo kple woƒe ƒomeawo nu; ŋutsuvi, siwo katã xɔ dzinu ɖeka alo wu nenema la, natia axlẽ.
16. Eye Mose tia wo xlẽ, abe alesi Yehowa gblɔ hede se ne la ene.
17. Lewi-viwo ƒe ŋkɔwo nye si: Gerson, Kehat kple Merari.
18. Gerson-viwo ƒe ŋkɔwo nye si le woƒe ƒomewo nu: Libni kple Simei.
19. Kehat-viwo nye si le woƒe ƒomewo nu: Amram, Yizhar, Xebron kple Uziel.
20. Eye Merari viwo nye si le woƒe ƒomewo nu: Maxeli kple Musi. Esiawo nye Lewitɔwo ƒe ƒome le wo fofowo ƒe aƒewo nu.
21. Gerson-hawo nye: Libni-viwo ƒe ƒome kple Simei-viwo ƒe ƒome. Woawo nye Gerson ƒomeawo.
22. Wotia ŋutsu, siwo xɔ dzinu ɖeka alo wu nenema la, xlẽ le wo dome, eye woƒe xexlẽme le ame akpe adre alafa atɔ̃.
23. Eye Gerson ƒome la ƒu asaɖa anyi ɖe nɔƒe la megbe le ɣedzeƒe gome.
24. Gerson ƒome la ƒe amegã nye Eliasaf, Lael vi.
25. Dɔ, siwo le Mawu ƒe agbadɔ la ŋu na Gerson-viwo wonye: Woakpɔ nɔƒe la, etamevɔ kple edzigbanuwo kpakple Mawu ƒe agbadɔ la ŋu vɔ,
26. kpɔ, si ƒo xlã nɔƒe la kple vɔsamlekpui la godoo va kpe, eŋuti vɔwo, agbadɔ ŋu kawo kple eŋu nu bubuawo kpakple kpɔnuvɔ la dzi.
27. Kehat-hawo nye. Amram-viwo ƒe ƒome, Yizhar-viwo ƒe ƒome, Xebron-viwo ƒe ƒome kple Uziel-viwo ƒe ƒome. Woawo nye Kehat ƒomeawo.
28. Ŋutsu, siwo xɔ dzinu ɖeka alo wu nenema la, ƒe xexlẽme le ame akpe enyi alafa ade, woawo nakpɔ kɔkɔeƒe la me nuwo dzi.
29. Kehat ƒome la naƒu asaɖa anyi ɖe nɔƒe la ƒe axa dzi le dziehe gome.
30. Kehat ƒome la ƒe amegã nye Elzafan, Uziel vi.
31. Woƒe dɔe nye be, woakpɔ aɖaka la kple kplɔ la, akaɖiti la, vɔsamlekpuiwo kple kɔkɔeƒe la me nuwo kpakple xɔmetsovɔ la kple nu bubuawo dzi.
32. Lewitɔwo ƒe amegã ƒe tatɔ enye Eleazar, nunɔla Aron ƒe vi, eƒe dɔe nye be, wòakpɔ amesiwo le dɔ wɔm le nu kɔkɔeawo ŋu la dzi.
33. Merari-hawo nye: Maxeli-viwo ƒe ƒome kple Musi-viwo ƒe ƒome. Woawo nye Merari ƒomeawo.
34. Wo dome ŋutsu, siwo xɔ dzinu ɖeka alo wu nenema la, ƒe xexlẽme le ame akpe ade alafa eve.
35. Merari ƒome la ƒe amegã nye Zuriel, Abixail vi; woawo naƒu asaɖa anyi ɖe nɔƒe la ƒe axa dzi le anyiehe gome.
36. Merari-viwo ƒe dɔe nye be, woakpɔ nɔƒe la ŋu ʋuƒoawo, gametiawo, sɔtiawo kple woƒe afɔwo kple nu bubuawo katã,
37. kpɔtiawo katã kple woƒe afɔwo, tsyotiawo kpakple wo ŋu kawo dzi.
38. Eye Mose kple Aron kpakple viaŋutsuwo ƒu asaɖa anyi ɖe nɔƒe, si nye Mawu ƒe agbadɔ la ŋgɔ le ɣedzeƒe gome. Woƒe dɔe nye be, woawɔ dɔ le kɔkɔeƒe la na Israel-viwo; ke ne ame tutɔa ɖe te va la, woawui.
39. Ŋutsu, siwo katã xɔ dzinu ɖeka alo wu nenema le Lewitɔwo dome, amesiwo Mose kple Aron tia xlẽ, abe alesi Yehowa de se ene la, le ame akpe blave vɔ eve.
40. Eye Yehowa gblɔ na Mose bena: Tia Israel-viwo ƒe ŋutsu ŋgɔgbeawo katã, amesiwo xɔ dzinu ɖeka alo wu nenema la xlẽ, eye naŋlɔ woƒe ŋkɔwo ƒe xexlẽme di.
41. Tia Lewitɔwo na Yehowa ɖe Israel-viwo ƒe ŋgɔgbeviwo katã teƒe; eye natia Lewitɔwo ƒe lãwo ɖe Israel-viwo ƒe lã ŋgɔgbeawo katã teƒe.
42. Eye Mose tia Israel-viwo ƒe ŋgɔgbeviwo katã xlẽ, abe alesi Yehowa de se ne ene.
43. Eye ŋutsu ŋgɔgbeawo katã, amesiwo xɔ dzinu ɖeka alo wu nenema la, ƒe xexlẽme le ame akpe blave va eve alafa eve blaadre va etɔ̃.
44. Eye Yehowa ƒo nu kple Mose bena:
45. Tia Lewitɔwo nam ɖe Israel-viwo ƒe ŋgɔgbeviwo katã teƒe, eye tia Lewitɔwo ƒe lãwo ɖe woƒe lãwo teƒe, bena Lewitɔwo nanye Yehowa tɔ.
46. Ke woaxe fe ɖe ame alafa eve blaadre vɔ etɔ̃, siwo Israel-viwo ƒe ŋgɔgbeviwo tsɔ sɔ gbɔ wu Lewitɔwo la ta;
47. naxa sekel kokoe atɔ̃ ɖe ame ɖeka ta; gera blave nanye sekel ɖeka.
48. Eye natsɔ wo dometɔ, siwo tsi dzi, ƒe ga la ana Aron kple viaŋutsuwo.
49. Eye Mose xɔ sekel kɔkɔe akpe ɖeka alafa etɔ̃ blaade vɔ atɔ̃
50. le amesiwo Israel-viwo ƒe ŋgɔgbeviwo tsɔ sɔ gbɔ wu Lewitɔwo la si.
51. Eye Mose tsa ga la na Aron kple viaŋutsuwo, abe alesi Yehowa gblɔ hede se na Mose ene.

4 Mose 4:1-49
1. Eye Yehowa ƒo nu kple Mose kpakple Aron bena:
2. Miɖe Kehat viwo le Lewitɔwo dome, eye miŋlɔ woƒe xexlẽme le woƒe ƒomewo kple wo fofowo ƒe aƒewo nu.
3. Amesiwo xɔ ƒe blaetɔ̃ kple vo vaseɖe ƒe blaatɔ̃, eye wodze na dɔwɔwɔ la, nawɔ Mawu ƒe agbadɔ la ŋu dɔwo.
4. Kehat viwo ƒe dɔ enye be, woakpɔ nu kɔkɔewo ƒe nu kɔkɔeawo dzi le Mawu ƒe agbadɔ la me.
5. Ne ameha la le hoho ge la, ekema Aron kple viaŋutsuwo nayi ɖe eme, eye woaɖe xɔmetsovɔ la atsyɔ na aɖaka, si me se la le,
6. eye woatsɔ nyogbalẽ atsyɔ edzi, emegbe woatsɔ aɖabɛ blɔtɔ akeke ɖe dzi, eye woade kpoawo eŋu.
7. Eye woakeke aɖabɛ blɔtɔ ɖe ŋkumeɖobolokplɔ̃ la dzi, emegbe woafɔ agbawo, nutɔgbawo, trewo kple goe, siwo me wokua nunovɔsa ɖo kpakple gbesiagbe boloawo ada ɖe edzi.
8. Emegbe woatso nyagadzĩ atsyɔ nuawo dzi, eye woatsɔ nyogbalẽ abu edzi, eye woade kpoawo eŋu.
9. Eyome woabia akaɖiti la kple eŋu kaɖigbɛawo, ɖovulãnuawo kple ganuviawo kpakple amigoe, siwo kpe ɖe eŋu la, ɖe aɖabɛ blɔtɔ me;
10. emegbe woabia nyogbalẽ ɖe eŋu, eye woatsɔe aɖo agbati dzi.
11. Woakeke aɖabɛ blɔtɔ ɖe sikavɔsamlekpui la dzi, eye woatsɔ nyogbalẽ abu dzi, eye woade kpoawo eŋu.
12. Emegbe woabia nusi wo katã ŋu dɔ wowɔna le kɔkɔeƒe la, ɖe aɖabɛ blɔtɔ me, eye woaxatsa nyogbalẽ ɖe wo ŋu, eye woatsɔ wo aɖo agbati dzi.
13. Emegbe woalɔ afi le vɔsamlekpui la me, eye woakeke aɖabɛ dzĩtɔ ɖe edzi.
14. Eyome woafɔ eŋu nu, siwo ŋu dɔ wowɔna la, aɖa ɖe dzi, afilɔnuawo, gafloawo, sofiawo, zeawo kple vɔsamlekpui la ŋu nuwo katã, eye woatsɔ nyogbalẽ abu wo dzi, eye woade kpoawo eŋu.
15. Ne Aron kple viaŋutsuwo bia nu ɖe nu kɔkɔeawo kple wo ŋu nuawo katã ŋu va, eye ameha la le hoho ge la, eya ko hafi Kehat viwo nava atsɔ wo, bena womagaka asi nu kɔkɔeawo ŋu ahaku o. Esiawo nye Mawu ƒe agbadɔ la ŋu nusiwo Kehat-viwo natsɔ.
16. Eleazar, nunɔla Aron viŋutsu, ƒe dɔ enye be, wòakpɔ ami, si woade akaɖigbɛawo me, dzudzɔʋeʋẽedonu, gbesiagbe nuɖuvɔsa, ami sisi la, nɔƒe blibo la kple eme nu kɔkɔeawo katã kpakple wo ŋu nuwo dzi.
17. Eye Yehowa ƒo nu kple Mose kple Aron bena:
18. Migana Kehat viwo natsrɔ̃ ɖa le Lewitɔwo dome o;
19. ke boŋ miwo ale na wo, bena ne wote ɖe nu kɔkɔewo ƒe nu kɔkɔeawo ŋu la, ne womagaku o. Aron kple viaŋutsuawo nayi ɖe eme, eye woafia amesiame ƒe da kple eƒe agbae.
20. Ke womegava eme akpa nu kɔkɔeawo aɖabaƒoƒo ɖeka pɛ hã, ne woava ku o.
21. Eye Yehowa ƒo nu kple Mose bena:
22. Ŋlɔ Gerson viwo ƒe xexlẽme hã le wo fofowo ƒe aƒewo kple woƒe ƒomeawo nu.
23. Tia amesiwo xɔ ƒe blaetɔ̃ kple vɔ vaseɖe ƒe blaatɔ̃, eye wodze na dɔwɔwɔ la xlẽ, bena woawɔ Mawu ƒe agbadɔ la ŋu dɔwo.
24. Gerson viwo ƒe dɔwɔwɔ kple woƒe nutsɔwo nye si:
25. Woawoe atsɔ nɔƒe la ƒe kuntruawo kple Mawu ƒe agbadɔ la tamekuntruawo kple nyogbalẽ, siwo wotsɔ gba wo dzii, kpakple Mawu ƒe agbadɔ la ŋu vɔ,
26. kpɔ, si ƒo xlã nɔƒe la kple vɔsamlekpui la godoo va kpe la ŋu vɔwo kple agbonuvɔ la, agbadɔ ŋu kawo kple eŋu nu bubuawo: woawɔ eŋu dɔwo katã.
27. Alesi Aron kple viaŋutsuawo de se be, woatsɔ agbawo, eye woawɔ woƒe dɔwoe la, nenema ŋu Gerson viwo nawɔ woƒe do blibo la ɖo; miana amesiame ƒe agbae ɖekaɖeka.
28. Esia enye Gerson viwo ƒe ƒome la ƒe dowo le Mawu ƒe agbadɔ la ŋu, eye Itamar, nunɔla Aron viŋutsu, nakpɔ wo dzi.
29. Eye tia Merari viwo xlẽ le woƒe ƒomewo kple wo fofowo ƒe aƒewo nu.
30. Tia amesiwo katã xa ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ la xlẽ, bena woawo Mawu ƒe agbadɔ la ŋu dɔwo.
31. Dɔ, si le Mawu ƒe agbadɔ la ŋu na wo, enye be, woatsɔ nɔƒe la ƒe ʋuƒoawo kple gametiawo, sɔtiawo kple woƒe afɔawo,
32. kpɔtiawo katã kple woƒe afɔawo, wo ŋu tsyoliwo kple wo ŋu kawo kpakple wo ŋu nuwo ka lã, eye woa wɔ wo ŋu dɔwo katã; miaha amesiame ƒe agba, si wòatsɔ lae ɖekaɖeka.
33. Esia nye Merari viwo ƒe ƒome la ƒe dɔwo le Mawu ƒe agbadɔ la ŋu, eye Itamar, nunɔla Aron viŋutsu, nakpɔ wo dzi.
34. Eye Mose kple Aron kpakple ha la ƒe amegãwo tia Kehat viwo xlẽ le woƒe ƒomewo kple wo fofowo ƒe aƒewo nu.
35. Woxlẽ amesiwo xɔ ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ le Mawu ƒe agbadɔa ŋu la.
36. Amesiwo wotia xlẽ le woƒe ƒomewo nu la, le ame akpe eve alafa adre blaatɔ̃.
37. Esiawo nye amesiwo katã Mose kple Aron tia xlẽ le Kehat viwo ƒe ƒome la me, bena woawɔ dɔ le Mawu ƒe agbadɔ la ŋu, abe alesi Yehowa de se na Mose ene.
38. Eye wotia Gerson viwo xlẽ le woƒe ƒomewo kple wo fofowo ƒe aƒewo nu.
39. Woxlẽ amesiwo katã xɔ ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ le Mawu ƒe agbadɔa ŋu la.
40. Amesiwo wotia xlẽ le woƒe ƒomewo kple wo fofowo ƒe aƒewo nu la, le ame akpe eve alafa ade blaetɔ̃.
41. Esiawo nye amesiwo katã Mose kple Aron tia xlẽ le Gerson viwo ƒe ƒome la me, eye woate ŋu awɔ ɖɔ le Mawu ƒe agbadɔa ŋu la, abe alesi Yehowa de se ene.
42. Eye wotia Merari viwo xlẽ le woƒe ƒomewo kple wo fofowo ƒe aƒewo nu.
43. Woxlẽ amesiwo katã xɔ ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ le Mawu ƒe agbadɔa ŋu la.
44. Amesiwo wotia xlẽ le woƒe ƒomewo nu la, le ame akpe etɔ̃ alafa eve.
45. Esiawo nye amesiwo Mose kple Aron tia xlẽ le Merari-viwo ƒe ƒome la me, abe alesi Yehowa de se na Mose ene.
46. Lewitɔ, siwo katã Mose kple Aron kpakple Israel-amegãwo tia le woƒe ƒomewo kple wo fofowo ƒe aƒewo nu,
47. eye woxɔ ƒe blaetɔ̃ kple vɔ vaseɖe ƒe blaatɔ̃, bena woasubɔ le Mawu ƒe agbadɔ la me, eye woatsɔ agba la,
48. ƒe xexlẽme le ame akpe enyi alafa atɔ blanyi.
49. Mose na wòfiã amesiame ƒe dɔ kple agba, si wòatsɔ lae, abe alesi Yehowa ɖe se ene: eye wotia wo xlẽ, abe alesi Yehowa ɖe se na Mose ene.

Psalmowo 30:1-7
1. Dawid ƒe ha; xɔ ŋu kɔha.
2. Mado wò ɖe dzi, Yehowa, elabena wòe hem ɖo goe, eye mèna be, nye futɔwo kpɔ dzidzɔ ɖe ŋunye o.
3. Yehowa, nye Mawu, wòe medo ɣli na, eye neda gbe le ŋu nye.
4. Yehowa, wòe he nye luʋɔ tso tsiẽƒe, eye nègbɔ agbem tso amesiwo yi aʋli me la dome.
5. Midzi kafukafuha na Yehowa, mi eƒe ame kɔkɔewo, eye mikafu eƒe ŋkɔ kɔkɔe la!
6. Elabena eƒe dziku nu mesena yina o, ke eƒe amenuveve nɔa anyi agbenɔɣi katã; fiẽ la avi dzɔna, ke ŋdi la aseyetsotso vaa aƒe.
7. Nyea megblɔ le nye dziɖeɖi me bena: Ke maɖe le tenye akpɔ gbeɖe o!

Lododowo 10:30-32
30. Ame dzɔdzɔe maʋã akpɔ o tegbee, ke ame vɔ̃ɖiwo matsi anyigba dzi o.
31. Nunya míena tsoa ame dzɔdzɔe ƒe nu me, ke alakpaɖe atsrɔ̃.
32. Ame dzɔdzɔe ƒe nuyi nyaa nya dzeto gbɔgblɔ, ke ame vɔ̃ɖi ƒe nu enye alakpago.

Marko 8:1-21
1. Le ŋkeke ma wo me, esi ameha gãa ɖe gava, eye naneke mele wo si, be woaɖu o la, Yesu yɔ eƒe nusrɔ̃lawo va egbɔ gblɔ na wo bena:
2. Nye dɔme trɔ ɖe ameha la ŋuti; elabena egbee nye ŋkeke etɔ̃agbe wole ŋutinye, eye womekpɔ naneke, be woaɖu o;
3. eye ne medo mɔ wo dɔme ɣeɣi, be woayi aƒe la, aƒetrɔ latsɔ wo le mɔ dzi, eye wo dome amea ɖewo hã tso didiƒe.
4. Eye eƒe nusrɔ̃lawo xɔ edzi nɛ bena: Afika amea ɖe late ŋu akpɔ abolo atsoe le gbedzi afii, be amesiawo naɖi ƒo mahã?
5. Eye wòbia wo bena: Abolo nenie le mia si mahã? Ke wogblɔ bena: Wo ame adre.
6. Eye wòɖo bena, ameha la nabɔbɔ nɔ anyigba; eye wotsɔ abolo adre la, eye esi wòda akpe ɖe wo dzi la, èŋe me, eye wòtsɔe na eƒe nusrɔ̃lawo, bena woatsɔe na wo, eye wotsɔe ɖo ameha la kɔ me.
7. Eye lãvi ʋeea ɖewo hã le wo si, eye esi wòyra ɖe wo dzi la, ena wotsɔ woawo hã ɖo wo kɔ me.
8. Eye woɖu nu, eye woɖi ƒo, eye wòfɔ kakɛ, siwo susɔ la, wòde kevi adre.
9. Ke wo nu anɔ ame akpe ene, eye wòdo mɔ wo.
10. Eye enumake wòɖo ʋu kple eƒe nusrɔ̃lawo, eye wova Dalmanuta-nutoawo me.
11. Eye farisitɔwo do go va, eye wode asi nusese me kplii hele dzesi biamii tso dziƒo hele etem kpo.
12. Eye wòɖe hũ le eƒe gbɔgbɔ la me gblɔ bena: Nukaŋuti dzidzime sia le dzesi dim mahã? Vavã mele egblɔm na mi bena: Womele dzesia ɖeke na ge dzidzime sia o.
13. Eye wògblẽ wo ɖi gaɖo ʋu heyi go keme dzi.
14. Eye woŋlɔ abolotsɔtsɔ ɖe asi be, eye ɖeke mele wo si le ʋua me o, negbe abolo ɖeka ko.
15. Eye wòde se na wo bena: Mikpɔ nyuie, eye milé be na mia ɖokui le farisitɔwo ƒe amiwo ʋaʋã kple Herodes ƒe amewo ʋaʋã la ŋuti.
16. Eye wòke ɖi le wo nɔewo dome gblɔ bena: Le esi míetsɔ abolo de asi o la ŋutie.
17. Eye esi wòdze sii la, egblɔ na wo bena: Nuka miele di kem be, mietsɔ abolo de asi o mahã? Ɖe miedze si nu kpo haɖe alo se nu gome hã oa, alo miaƒe dzime ɖe wògasẽ mahã?
18. Ŋku li na mi, miekpɔa nu o! Eye to li na mi, miesea nu o! Eye mieɖoa ŋku nu dzi o,
19. bena meŋe abolo atɔ̃ me hemã ɖe ame akpe atɔ̃ dome, eye abolo kakɛawo la kevi nenie miefɔ mahã? Wogblɔ nɛ be: Wo ame wuieve.
20. Eye wo ame adre ɖe ame akpe ene dome la, kakɛawo la kevi nenie fũ miefɔ mahã? Eye wobena: Wo ame adre.
21. Eye wògblɔ na wo bena: Ɖe miese nu gome haɖe ke o mahã?