A A A A A

Piibel ühe aasta


Rujan 9


Yeşaya 9:1-21
1. لاکئن سيخينتي چکمئش خالق آرتيق ظولمتده قالماياجاق؛ تاري کِچمئشده زِبولون و نَفتالي بؤلگه‌لرئني ذلئل اتمئشدي، لاکئن گله‌جکده دهنز کناري يولوندا، اوردون چايينين او بئري تاييندا، و موختلئف مئلّتلر ياشايان جَلئله شرف وره‌جک.
2. ظولمتده ياشايان خالق بؤيوک بئر ائشيق گؤره‌جک. اؤلوم کؤلگه‌سي دئياريندا ساکئن اولانلارين اوستونه نور ساچاجاق.
3. يارب، مئلّتي چوخالديب سِوئنجلرئني آرتيراجاقسان، اَکئب-بئچَنلرئن فَرَحلَندئيي کئمي، قنئمت بؤلَنلرئن سِوئندئيي کئمي، اونلار دا سنئن حوضوروندا سِوئنه‌جکلر.
4. چونکي اونلارا يوک اولان يوغو، چئيئنلرئني دؤيَن دَيَنه‌يئني، اونلارا ظولم ادنلرئن دَيَنه‌يئني سينديريبسان؛ مئديانلي‌لارين باشلارينا گتئردئيئن گون کئمي.
5. چکمه‌لي جنگاورئن دؤيوشده گِيدئيي چکمه، قانا بولانميش پالتار يانديريلماق اوچون اولاجاق، اودا يِم اولاجاق.
6. چونکي بئزئم اوچون بئر کؤرپه دوغولاجاق، بئزه بئر اوغول ورئله‌جک، حاکئمئيّت اونون چئيئنلري اوستونده اولاجاق، اونون آدي اَعلا مصلحتچي، قودرتلي تاري، ابدی آتا، صولح شاهزاده‌سي چاغيريلاجاق.
7. حاکئمئيّتئنئن و اَمئن-آمانليغينين آرتماسينين آخيري اولماياجاق، او، داوودون تختي و سلطنتي اوستونده حؤکم سوره‌جک، او، حاکئمئيّتئني عدالتله و صالحلئکله ائندئدن ابده کئمي قوراجاق. قوشونلار ربّئن قيرتي بونو اده‌جک.
8. پروردئگار، يعقوبون ضئدّئنه بئر سؤز گؤنده‌رئر، و او ائسرايئلئن اوستونه دوشور.
9. بوتون خالق بونو بئلئر، يعني اِفرايئمئن و سامئره‌نئن ساکئنلري. بو مغرور و تکبّورلو خالق بله ديئر:
10. "کَرپئج اِولرئمئز ييخيليب، آمّا يونما داشدان اِولر تئکه‌رئک. وحشي انجئر آغاجلاري کَسئلئب، آمّا بئز اونلارين عوضئنه سئدر آغاجلاري اَکه‌رئک."
11. بونا گؤره رب، رِصئنئن خصملرئني اونلارين ضئدّئنه قالديرير، دوشمنلرئني دئرچَلدئر،
12. اَراملي‌لار شرقدن، فئلئسطلی‌لر قربدن؛ اونلار آغيزلاريني آچيب ائسرايئلي اودورلار. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.
13. آمّا خالق اونو جزالانديران ربّه طرف دؤنمور، قوشونلار ربّئني آختارمير.
14. بونا گؤره رب ائسرايئلدن باشي و قويروغو، هم خورما آغاجينين بوداغيني، هم ده قارغيني بئر گونده کَسئب آتير.
15. باش، آغساقّال و حؤرمتلي بئر کئشئدئر، قويروق دا يالان تعلئم ورن پيغمبردئر.
16. چونکي بو خالقا يول گؤرسدنلر اونلاري آزديريرلار، اونلارين يولو ائله گِدنلر قيريليرلار.
17. بونا گؤره ده پروردئگار اونلارين جاوانلارينا گؤره سِوئنمَيه‌جک، يِتئملرئن و دول آروادلارين حالينا يانماياجاق. چونکي هامي نجئسدئر، شر ائشلر گؤرور، هامينين آغزيندان آخماق سؤزلر چيخير. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.
18. چونکي پئسلئک اود کئمي آلوو چکئر، تئکانلا قانقالي يانديريب کول ادئر، مِشه‌ده‌کي کوللوقلاري دا اودا چکئر، توستو سوتونوندا گؤيه قالخيرلار.
19. قوشونلار ربّئن قضبي اؤلکه‌ني اود کئمي يانديرير، خالق آلوو اوچون يِمدئر، قارداش قارداشا رحم اتمئر.
20. صاغدا اولانلاري قاپيب يِيئرلر، آمّا حله ده آجديرلار، سولدا اولانلاري يِيئرلر، لاکئن دويمورلار؛ هر کس اؤز قولونون اَتئني يِيئر.
21. مِنَسّه اِفرايئمي اودور، اِفرايئم مِنَسّه‌ني. سونرا بئرلئکده يهودانين ضئدّئنه قالخيرلار. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.

Yeşaya 10:1-34
1. واي شر قايدالار قورانلارين حالينا، دايئمن عدالتسئز قانون قويانلارين،
2. يوخسوللاردان عدالتي اسئرگه‌‌‌يَنلرئن، خالقيمين کاسيبلارينين حاقّيني اَل‌لرئندن آلانلارين، دول آروادلاري سويانلارين، يِتئملرئن ماليني تالان ادنلرئن.
3. جزا گونو اوزاقلاردان باشينيزا بلا گلنده نه اده‌جکسئنئز؟ کؤمک اوچون کئمئن يانينا قاچاجاقسينيز؟ مال-دؤولتئنئزي هارادا ساخلاياجاقسينيز؟
4. اسئرلر آراسيندا اَيئلمکدن و يا اؤلدورولَنلر آراسيندا ييخيلماقدان آيري بئر چاره قالمايير. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.
5. "واي، آشورون حالينا، او منئم قضب عصام، اونلارين اَلئنده‌کي دَيَنَک ده منئم قِيضئمدئر!
6. آشورو نجئس مئلّتئن اوستونه گؤندره‌جيم؛ قضبلَندئيئم خالقين اوستونه هوجوم اتمه‌يه، قارت اتمه‌يه، تالان مالي گؤتورميه گؤنده‌ره‌جيم. اونلاري کوچه‌لرده‌کي پالچيق کئمي تاپدالاماغا امر وره‌جيم.
7. آمّا آشور پادشاهي بوندان دا پئسئني دوشونور، محو ادئب بئر-بئر چوخ مئلّتئن کؤکونو کَسمه‌يي فئکئرله‌شئر.
8. او ديئر: «مگر سرکرده‌لرئمئن هاميسي پادشاهلار ديئل؟
9. مگر کَلنو، کَرکِمئش کئمي ديئل؟ خَمات، اَرپَد کئمي، سامئره ده دَمَشق کئمي؟
10. بوتپرست مملَکتلري نجه اَله کچئردئم، او مملکتلري کي، اورشلئمله سامئره‌دن داها چوخ اويما بوتلري وارلاري ائدي.
11. سامئره‌يه و اونون بوتلرئنه نه اتدئم، مگر اورشلئمه و اونون بوتلرئنه ده اِله اتمه‌رم؟»"
12. پروردئگار صحيون داغيندا و اورشلئمده ائشئني بئتئرندن سونرا بله دئيه‌جک: "آشور پادشاهيني، کئبئرلي اوره‌يئنه گؤره، تکبّورلو باخيشلارينا گؤره جزالانديرجاغام.
13. چونکي ديئب: «بونو من اَلئمئن گوجو ائله، حئکمتئمئن قووّتي ائله اتدئم. چونکي عاغيليم وار، خالقلارين سرحدلرئني يوخ اتدئم، خزئنه‌لرئني ده تالان اتدئم، گوجلو بئر جنگاور کئمي اونلارين ساکئنلرئني يِره ييخديم.
14. قوش يوواسينا چاتان کئمي، اَلئم خالقلارين وار-دؤولتئنه چاتدي. يئيه‌سئز يومورتالاري ييغان بئر شخص کئمي، بوتون دونياني ضبط اتدئم. قاناد چيرپان، آغزيني آچيب سَسئني چيخاردان بِله، اولمادي.»"
15. بالتا مگر اونو ائشلَده‌نئن قاباغيندا فخر اِدَر؟ اَره مگر اونو قالديرانين قاباغيندا کئبئرله‌نَر؟ سانکي دَيَنَک اونو گؤتوره‌ني ائشله‌دئر، اِله بئل آغاجدان دوزه‌لمئش دَيَنَک جانليني حرکت اتدئرئر.
16. بونا گؤره قوشونلار پروردئگاري رَب، آشورون گوجلو عسگرلرئنه اؤلومجول مرض گؤندره‌جک، اونون جلالي آلتيندا بئر اود توتوشوب آلوولانار.
17. ائسرايئلئن نورو اود، ائسرايئلئن موقدّسي آلوو اولاجاق. آشورون تئکانلار و قانقاللاريني بئر گونده يانديريب يوخ اده‌جک.
18. گؤزل مِشه‌لرئني، بار ورن باغلاريني، کامئل وئران اده‌جک، آغير ناخوشلوغا توتولان ائنسانين بوتون جاني کئمي اَرئيئب گده‌جک.
19. مِشه‌لرئنده قالان آغاجلارين سايي او قدر آزا اولاجاق کي، بئر اوشاق اونو سايا بئلر.
20. او گون ائسرايئلئن صاغ قالانلاري، يعقوبون نسلئندن خئلاص اولوب صاغ قالانلار، آرتيق اونلاري هلاک ادنلره بِل باغلاماياجاقلار. لاکئن، حقئقتن، ربّه، ائسرايئلئن موقدّسئنه بِل باغلاياجاقلار.
21. صاغ قالانلار يعقوب نسلئندن صاغ قالانلار قودرتلي تارييا طرف دونه‌جکلر.
22. ای ائسرايئل، خالقين دهنز قومو قدر چوخ اولسا بِله، اونلارين آراسيندان آنجاق بئر آزي دؤنه‌جک. توکَنمَز عدالتله داغيديلما حؤکمو ورئلئب.
23. قوشونلار پروردئگاري رب، داغيديلما حؤکمونو بوتون دونيادا يرئنه يتئره‌جک.
24. بونا گؤره ده قوشونلار پروردئگاري رب بله ديئر: "ای صحيوندا ياشايان خالقيم، مئصئرلی‌لرئن سنه اتدئيي کئمي، سني دَيَنَکله ووران، اوستونه دَيَنَک قالديران آشورلولاردان قورخما.
25. چونکي بو ياخيندا قضبئم سؤنه‌جک، حئدّتئم آشورلولارين محوئنه سبب اولاجاق."
26. قوشونلار ربّي، مئديانلي‌لاري عورِب قاياسيندا ووردوغو کئمي، اونلاري دا شاللاقلا ووراجاق. دَيَنه‌يي مئصئرلی‌لرئن ضئدّئنه نه جور دهنزئن اوستونه اوزاتدي، ائندي ده اِله اده‌جک.
27. او گون آشورون يوکو چئينئزدن، يوغو بوينونوزدان گؤتوروله‌جک. ياغدان اؤتری يوغ قيريلاجاق.
28. اونلار عَيّت شهرئنئن ضئدّئنه گلئبلر، مئگرونو کِچئبلر؛ مئکماسدا يوکلرئني بوشالديبلار.
29. اونلار کِچئدي کِچئبلر، و ديئرلر: «گِبَع بئزئم گجه قالاجاغيميز يِر اولاجاق، راما شهري دهشته دوشوب، شاعولون شهري گئبعه‌ده ياشايانلار قاچيبلار.
30. ای گلّئم قيزي، سَسئني اوجالت! ای لَيشا، قولاق آس، ای بِچارا عَناتوت!
31. مَدمِنا ساکئنلري قاچيب، گِبئم ساکئنلري سيغيناجاق يِر آختارير.
32. آمّا بو گون ائشغالچيلار نوبدا قالاجاقلار، صحيون شهرئنئن قورولدوغو داغا، اورشلئم تپه‌سئنه يومروق گؤرسه‌دئر.
33. باخ، قوشونلار پروردئگاري رب، دوشمنی وار گوجو ائله بوداقلار کئمي کَسه‌جک، لاپ اوجا آغاجلاري يِره سَره‌جک، کئبئرلی‌لري آلچالداجاق.
34. مِشه‌ده‌کي کوللوقلاري بالتا ائله کَسئب يِره سَره‌جک. لوبنان عظمتلي اولانين اَلي ائله ييخيلاجاق.

Zəbur 106:1-5
1. ربّه حمد ادئن! ربّه شوکور ادئن، چونکي او ياخشي‌دير؛ چونکي محبّتي ابدي‌دئر.
2. ربّئن قودرتلي ائشلرئني کئم آنلادا بئلر، يا دا اونون بوتون حمدئني کئم اعلان اده بئلر؟!
3. خوش او آداملارين حالينا کي، عدالتي ساخلاييرلار، همئشه دوروست اولاني يرئنه يتئرئرلر.
4. يارب، خالقينا لوطفونو گؤرستدئيئن زامان، مني يادا سال. اونلاري قورتاران زامان منه کؤمک ات کي،
5. سچدئکلرئنئن خوشبختلئيئني گؤروم، مئلّتئنئن شادليغيندا سوئنئم، سنئن مئراثيندا فخر ادئم.

Süleymanın Məsəlləri 25:1-2
1. بولار دا سوليمانين مثللري‌دئر کي، يهودا پادشاهي خئزقيانين آداملاري بئر يره ييغيب يازديلار:
2. بئر ائشي گئزلتمک تارينين عئزّتئدئر، لاکئن ائشي آراشديرماق پادشاهلارين عئزّتئدئر.

2 Korinflilərə 1:1-24
1. تارينين ائراده​‌سي ائله مسئح عئسانين حوارئسي پولوس و تئموتاعوس قارداشدان، تارينين قورئنتده اولان کئلئساسي ائله بوتون اَخايئه‌ده اولان موقدّسلرئن هاميسينا:
2. آتاميز تاريدان و رب عئسا مسئحدن سئزه فيض و باريش اولسون.
3. موتبارک اولسون تاري و ربّئمئز عئسا مسئحئن آتاسي کي، مرحمتلرئن آتاسي و بوتون تسلّي‌لرئن تاريسي‌دير.
4. او کي، بئزه بوتون موصئبتلرئمئزده تسلّي ورئر کي، بئز ده هر جور موصئبت آلتيندا اولانلارا، تارينين بئزه وردئيي تسلّي ​ائله تسلّي وره بئلک.
5. چونکي نجه مسئحئن عذابلاري بئر چوخ اؤلچوده بئزئمدئر، الجه ده مسئحئن واسئطه​‌سئله تسلّئمئز بئر چوخ اؤلچوده​دئر.
6. اگر بئز موصئبت آلتينداييق، بو سئزئن تسلّي و نئجاتينيز اوچوندور. و يا اگر تسلّي تاپيريق، سئزئن تسلّئنئز اوچوندور کي، اله بئزئم همن چکدئيئمئز عذابلارين صبر​‌له دؤزمه‌يئنده تأثئرلي اولور.
7. و سئزئن باره​ده اولان اومئدئمئز ثابئتدئر، چونکي بئلئرئک کي، بئزئم عذابلاريميزدا شرئک اولدوغونوز کئمي، بئزئم تسلّئمئزده ده شرئک اولاجاقسينيز.
8. چونکي اي قارداشلار، ائسته‌مئرئک کي، آسئيا ايالتئنده باشيميزا گلن موصئبتدن بئخبر اولاسينيز؛ نجه حدّئمئزدن آرتيق و طاقتئمئزدن چوخ آغير يوکله‌ندئک، اله کي، حياتدان بله اومئد کَسدئک.
9. ائچئمئزده اؤلوم حؤکمونو حئسّ اِتدئک، لاکئن بو اونون اوچون اولدو کي، اؤزوموزه يوخ، اؤلولري دئرئلدن تارييا توکّول ادک.
10. او کي، بئزي بله بؤيوک اؤلومدن قورتاردي و قورتارار و اونا اومئد باغلاميشيق کي، بئزي گئنه ده قورتاراجاقدير.
11. سئز ده دوعالارينيزلا بئزه کؤمک ادئرسئنئز کي، بئر چوخلارينين دوعاسي سايه​سئنده بئزه عطا اولونان لوطفدن اؤتري بئر چوخ کئمسه بئزئم اوچون تارييا شوکور اتسئن.
12. چونکي فخرئمئزئن سببي، يعني وئجدانيميزين شهادتي بودور کي، بئز بو دونيادا خوصوصن ده سئزئن حاقّينيزدا جئسماني حئکمتله يوخ، تارينين فيضئنده، موقدّسلئک و تارييا مقبول اولان صمئمئيّتله رفتار اتدئک.
13. چونکي اوخودوغونوز و آنلاديغينيزدان باشقا سئزه هچ بئر شي يازميريق و اومئد ادئرم کي، آخيرا کئمي آنلاياجاقسينيز؛
14. نجه کي، بئزي قئسمن ده اولسا، آنلادينيز کي، ربّئمئز عئسانين گونونده بئز سئزئن فخرئنئزئک، سئز ده بئزئم فخرئمئزسئنئز.
15. بو يقئنلئکله اوّل سئزئن يانينيزا گلمه‌يه قصد اتدئم کي، سئز بئر برکته، ائکي دفه نايئل اولاسينيز.
16. و سئزدن کچئب مقدونئيه​يه گدئم و مقدونئيه​دن گئنه سئزئن يانينيزا گلئم و سئزئن کؤمه‌يئنئز​له يهودئيه اوچون يولا دوشوم.
17. بو نئيّتده اولماقلا مگر من يونگول رفتار اتدئم؟! و يا منئم هدفئم جئسماني بئر هدفدئر کي، منده اوّل "بلي، بلي" آمّا سونراسي "يوخ، يوخ" اولسون؟!
18. لاکئن تاري اَمئندئر کي، بئزئم سؤزوموز سئزه هم "بلي"، هم "يوخ" ديئل.
19. اونا گؤره کي، سئزئن آرانيزدا بئزئم، يعني منئم، سئلوانوسون، و تئموتاعوسون وعظ اتدئيي تارينين اوغلو عئسا مسئح، هم "بلي" هم "يوخ" ديئلدي، آمّا اوندا "بلي" دئر.
20. چونکي تارينين وعده​لري نه قدر چوخ دا اولسا، مسئحده "بلي" دئر؛ اونا گؤره ده مسئحئن وسئله‌سئله بئز ده "آمئن" دئيه‌بئله‌رئک کي، بئزئم واسئطه‌مئز​له تاري جلال تاپسين.
21. تاري‌دير کي، بئزي سئزئنله برابر مسئحده ثابئت دوردورور و مسح ادئر
22. و بئزي مؤهورله‌يئب و موقدّس روحون بِيئني اوره‌يئمئزه قويوب.
23. تاريني جانيما شاهئد توتورام کي، سئزه رحم اتدئيئم اوچون ائندئيه کئمي قورئنته گلمه​مئشم.
24. بو او دمک ديئل کي، گويا بئز سئزئن ائمانينيز اوستونده حاکئمئک. يوخ! بئز سئزئن شادليغينيز اوچون سئزئنله چاليشيريق. چونکي ائمانينيزدا ثابئت دورورسونوز.