A A A A A

Bir il Bibliya

Sentyabr 22

Yeşaya 35:1-10
1. صحرا و قورو تورپاق سِوئنه‌جک، چؤل شادلاناجاق، نرگئس کئمي چئچکلَنه‌جک.
2. هر يان گول آچاجاق، شادلاناجاق، سِوئنجدن نغمه اوخوياجاق. لوبنانين شؤوکتي، کَرمِل و شارونون جاه-جلالي اونا ورئله‌جک. ائنسانلار ربّئن عئزّتئني، تاريميزين عظمتئني گؤره‌جکلر.
3. ضعئف اَل‌لره قووّت ورئن، اَسن دئزلري مؤحکملَندئرئن.
4. اورَکلرئنده قورخانلارا ديئن: "جسارتله‌نئن، قورخمايين! باخ، تارينيز ائنتئقام آلماق اوچون گلئر، قئصاص آلماق اوچون گلئر. او گلئب سئزه قورتولوش وره‌جک!"
5. او واخت کورلارين گؤزلري آچيلاجاق، کارلارين قولاقلاري آچيلاجاق،
6. او واخت آخساقلار مارال کئمي آتيليب دوشه‌جکلر، لال‌لارين دئلي شادليقلا نغمه اوخوياجاق، چونکي صحرادا بولاقلار فيشقيراجاق، قورو تورپاقدا چايلار آخاجاق.
7. قيزقين قوم حوووضا، سوسوز تورپاق سو بولاقلارينا چِورئله‌جک. چاقّاللارين راحاتلاديغي يِرلرده، اوت، قاميش و بوتا بئته‌جک.
8. اورادا بئر يول اولاجاق، بؤيوک بئر طرئق؛ او يول "موقدّسلئک يولو" آدلاناجاق. نجئس آدام اورادان کِچميه‌جک، او يول، ربّئن يولو ائله گِدن آدام اوچوندور. او يولدا يِرئيَنلر، حتّا آغيلسيز دا اولسالار، يولونو اصلا آزماياجاقلار.
9. اورادا شئرلر اولماياجاق، ييرتيجي حيوانلار او يولا چيخماياجاقلار، بونلار اورادا تاپيلماياجاقلار. آنجاق قورتولوش تاپانلار او يوللا گده‌جکلر.
10. ربّئن ساتين آلينميش آداملاري قاييداجاق، سِوئنجله نغمه اوخوياراق صحيونا گله‌جک. باشلاريندا ابدی شَنلئک اولاجاق، اونلار سِوئنج و شادليق تاپاجاقلار، کَدَر و قَم-قوصّه يوخ اولاجاق!

Yeşaya 36:1-22
1. خئزقئيانين پادشاهليغينين اون دؤردونجو ائلئنده، آشور پادشاهي سَنخِرئب، يهودانين بوتون قالالي شهرلرئنه هوجوم ادئب اونلاري آلدي.
2. آشور پادشاهي رَبشاقِه‌ني لاکئشدن بؤيوک قوشونلا اورشلئمه، پادشاه خئزقئيانين يانينا گؤندردي. رَبشاقه پالتار آغاردان زَمئسي يولونا، يوخاري حوووضون سو کمرئنئن يانينا قالخيب اورادا داياندي.
3. خئلقئيا اوغلو ساراي ريئسي اِلياقئم، مئرزه شِبنا و آساف اوغلو سالنامه‌چي يوآخ اونون قاباغينا چيخديلار.
4. رَبشاقِه اونلارا ددي: "ائندي خئزقئيايا ديئن: آشور پادشاهي، بؤيوک پادشاه بله ديئر: «نه‌يه بِل باغلاييرسان؟
5. آيا اِله دوشونورسن کي، بومبوش لافلار موحارئبه اوچون تدبئر و گوج اولا بئلر؟ ائندي سن کئمه بِل باغلاييرسان کي، منئم ضئدّئمه عوصيان ادئبسن؟
6. باخ، سن اَزئلمئش قاميش چوبوغونا، يعني مئصئره بِل باغلاييرسان. بئل کي، کئم اونا سؤيکَنسه، اوووجونا باتيب دِشَر. مئصئر پادشاهي فئرعون، اونا بِل باغلايانلارين هاميسي اوچون بله‌دئر.
7. بلکه منه دئيه‌سن: ‹بئز تاريميز ربّه بِل باغلاييريق.› مگر بو همئن تاري ديئلدي کي، خئزقئيا اونون پرستئشگاهلاريني و قوربانگاهلاريني آرادان قالديردي؟ مگر يهودالي‌لارا و اورشلئملی‌لره دِمه‌دي کي، ‹فقط بو قوربانگاهين قاباغيندا پرستئش ادئن›؟
8. ائندي آغام آشور پادشاهي ائله مَرجه گل: اگر سن ائکي مئن سوواري تاپا بئله‌سن، من سنه او قدر آت وره‌رم.
9. بس نجه اده بئلرسن کي، آغامين کئچئک قولو اولان بئر باشچيني دفع ادئب دؤيوش عارابالاري و آتلي‌لار اوچون مئصئره بِل باغلاياسان؟
10. مگر ائندي من بو تورپاغي وئران اتمه‌يه ربّئن ائسته‌يي ائله گلمه‌مئشم؟ رب منه ددي: ‹بو اؤلکه‌يه هوجوم آپار و اونو وئران ات.›»"
11. اِلياقئم، شِبنا و يوآخ رَبشاقِه‌يه ددئلر: "خاهئش ادئرئک، بو قوللارينلا اَرامي دئلئنده دانيش، بئز بو دئلي باشا دوشوروک. آنجاق دووار اوستونده‌کي خالقين اشئتدئيي يرده بئزئمله يهودي دئلئنده دانيشما."
12. لاکئن رَبشاقِه ددي: "مگر آغام منی گؤنده‌رئب کي، بو سؤزلري تَکجه سنئن آغانا و سنه دِيئم، و دووار اوستونده اوتوران بو آداملارا دِمه‌يئم کي، سئزئنله بئرلئکده نجئسلرئني يِيئب، سودوکلرئني ائچه‌جکلر؟"
13. او واخت رَبشاقِه دوروب يهودي دئلئنده اوجا سَسله باغيردي: "بؤيوک پادشاهين، آشور پادشاهينين سؤزونو اِشئدئن!
14. پادشاه بله ديئر: «قويمايين خئزقئيا سئزي آلداتسين، چونکي او، سئزي قورتارا بئلميه‌جک.
15. قويمايين خئزقئيا سئزي تارييا آرخايين ادئب دسئن: ‹رب بئزي قطعن قورتاراجاق و بو شهر آشور پادشاهينا تسلئم ادئلمَيه‌جک.›»
16. اونا قولاق آسمايين! چونکي آشور پادشاهي بله ديئر: «منئمله صولح باغلايين و يانيما گلئن. هر کس اؤز اوزوم آغاجينين و اؤز اَنجئر آغاجينين مِيوه‌سئندن يِيئب، اؤز قويوسونون سويوندان ائچسئن.
17. سونرا من گلئب سئزي اؤلکه‌نئزه بَنزَر بئر اؤلکه‌يه، بوغدا، تزه شراب، چؤرک و اوزوم باغلاري اولان بئر تورپاغا آپاراجاغام.
18. قويمايين خئزقئيا سئزي آزديريب دسئن: ‹رب بئزي قورتاراجاق.› مگر مئلّتلرئن آللاهلاريندان بئري، اؤز اؤلکه‌سئني آشور پادشاهينين اَلئندن قورتاردي؟
19. هاني خَماتين و اَرپادين آللاهلاري؟ هاني سِفَروايئمئن آللاهلاري؟ مگر اونلار سامئره‌ني منئم اَلئمدن قورتارديلار؟
20. بوتون بو آللاهلاردان هانسي اؤز اؤلکه‌سئني منئم اَلئمدن قورتاردي، کي رب ده اورشلئمي منئم اَلئمدن قورتارا بئلسئن؟»"
21. جاماعات ساکئت قالدي و اونون جاوابيندا هچ بئر سؤز دِمه‌دي. چونکي پادشاه امراتمئشدي: "اونا جاواب ورمه‌يئن."
22. خئلقئيا اوغلو ساراي ريئسي اِلياقئم، مئرزه شِبنا و آساف اوغلو سالنامه‌چي جيريلميش پالتارلاردا خئزقئيانين يانينا گلئب، رَبشاقِه‌نئن سؤزلرئني اونا چاتديرديلار.

Zəbur 109:6-13
6. اونون اوستونه پئس بئر آدام تعيئن ات، قوي مذمّت ادن اونون صاغيندا دورسون.
7. حؤکم اولوندوغو زامان تقصئرکار چيخسين، دوعاسي دا گوناه ساييلسين.
8. قوي اونون گونلري آز اولسون، وظئفه‌سئني اؤزگه‌سي آلسين.
9. قوي اوشاقلاري يتئم، آروادي دول اولسون.
10. قوي اؤولادلاري دئد‌رگئن اولوب يولچولوغا دوشسونلر؛ چؤرکلرئني وئرانه‌لرئنده آختارسينلار.
11. قوي طلبکار اونون بوتون وار-يوخونو آلسين، قازانديغيني اؤزگه‌لر قارت اتسئنلر.
12. قوي اونا مرحمت گؤرسدن اولماسين، اونون يتئملرئنه ده رحم ادن تاپيلماسين.
13. قوي اونون نسلي کسئلسئن، گله‌جک نسئلدن آدلاري سئلئنسئن.

Süleymanın Məsəlləri 25:27-28
27. چوخ بال يمک ياخشي ديئل؛ اله ده اؤز عئزّتئني آختارماق، آداما عئزّت ديئل.
28. نفسئنه حاکئم اولمايان بئر آدام، داغيلميش، حاصارسيز بئر شهر کئمي‌دئر.

2 Korinflilərə 13:1-14
1. بو اوچونجو دفه​دئر کي، سئزئن يانينيزا گلئرم: "هر سؤز ائکي و يا اوچ شاهئدئن آغزي ائله تصدئق اولوناجاق."
2. ائکئنجي دفه اورادا حاضير اولارکن دمئشم و ائندي ده ائره​لئدن قايئب اولارکن کچمئشده گوناها باتانلارا، هم ده سئزئن هامينيزا ديئرم کي، اگر گئنه يانينيزا گلسم، هچ کئمي اسئرگمه‌يه​جه‌يم.
3. اوندان اؤتري کي، مسئحئن منئم واسئطمله دانيشديغينا دلئل آختاريرسينيز. او، سئزئن قاباغينيزدا ضعئف ديئل، لاکئن سئزئن آرانيزدا قووّتلي‌دئر.
4. چونکي او، ضعئفلئيي اوچون چارميخا چکئلدي، لاکئن حله ده تارينين قودرتي اوچون ياشايير. بئز ده اوندا ضعئفئک، لاکئن تارينين سئزده اولان قودرتي اوچون اونونلا ياشاياجاغيق.
5. اؤزونوزو ائمتاحان ادئن، گؤرون آيا ائمانداسينيز. اؤزونوزو يوخلايين. مگر درک اتمئرسئنئز کي، عئسا مسئح سئزده​دئر؟! مگر بو کي، حقئقتن ائمتاحاندا مردود اولورسونوز.
6. لاکئن اومئد ادئرم کي، بئزئم ائمتاحاندا مردود اولماديغيميزي باشا دوشه​جکسئنئز.
7. آمّا تارييا دوعا ادئرئک کي، سهو بئر ائش گؤرمه‌يه​سئنئز. بونون اوچون يوخ کي، بئز حاقلي گؤرونک. بونون اوچون کي، سئز صحئح اولاني يرئنه يتئره​سئنئز، حتّا اگر بئز حاقلي گؤرونمه‌يک.
8. چونکي بئز حقئقتئن ضئدّئنه هچ بئر ائش گؤره بئلمه‌رئک، آنجاق حقئقتئن يولوندا گؤره بئله‌رئک.
9. چونکي بئز ضعئف، لاکئن سئز قووّتلي اولاندا بئز سوئنئرئک. دوعا دا ادئرئک کي، سئز کامئل‌لَشه​سئنئز.
10. من قايئب ائکن بونلاري اونا گؤره يازيرام کي، اورادا حاضير اولدوغوم زامان، ربّئن منه وردئيي ائقتئداري​ ائله سئزئنله، ييخماق اوچون يوخ، بئنا اتمک اوچون برک رفتار اتمه​يئم.
11. نهايت، قارداشلار! سوئنئن، کامئلله‌شئن، تسلّي تاپين، همفئکئر اولون، باريش ائچئنده ياشايين و سوگي و باريش تاريسي سئزئنله اولار.
12. بئر​بئرئنئزي موقدّس اؤپوشله سالاملايين.
13. بوتون موقدّسلر سئزه سالام گؤنده‌رئرلر. بوتون موقدّسلر سئزه سالام گؤنده‌رئرلر. بوتون موقدّسلر سئزه سالام گؤنده‌رئرلر.
14. رب عئسا مسئحئن فيضي، تارينين محبّتي، و موقدّس روحون رفاقتي سئزئن هامينيزلا اولسون.