A A A A A

Bir il Bibliya


Sentyabr 20


Yeşaya 30:1-33
1. رب اعلان ادئر: "واي بو دئکباش اؤولادلارين حالينا، منئم نئيّتلرئمي يوخ، اؤز نئيّتلرئني قورورلار، راضيلاشما ادئرلر، لاکئن منئم روحوما موناسئب يوخ، اِله کي، گوناه اوستونه گوناه آرتيرسينلار.
2. مندن مصلحت آلمادان مئصئره گدئرلر، فئرعونون اَمئن-آمانليغينا پناه آپاريرلار، مئصئرئن کؤلگه‌سي آلتيندا سيغيناجاق يِر آختاريرلار.
3. بونا گؤره فئرعونون حئمايه‌سي سئزئن خجالتئنئز اولاجاق، مئصئر کؤلگه‌سي آلتينداکي سيغيناجاق، سئزئن روسوايچيليغينيزا چِورئله‌جک.
4. چونکي باشچيلاري صوعَنده‌دئرلر، اِلچئلري خانِسه يتئشئرلر.
5. اونلارا فايداسي اولمايان بئر خالقا گؤره هامي اوتاناجاق. او خالق کي، اونلارا نه کؤمکدئر، نه ده فايدا، آنجاق خجالت و روسوايچيليق."
6. نِگِب حيوانلاري باره‌سئنده ائخطار: دارليق و ناراحات بئر تورپاقدان، اِرکَک و دئشي آصلانلارين، افعئلر و اوچان ائلانلارين ياشاديغي يردن، اونلار مال-دؤولَتئني اِششَکلرئن بِلئنه، خزئنه‌لرئني دَوه‌لرئن حورگونجونه يوکله‌يئب کچئرلر، و اونلارا فايداسي اولمايان خالق اوچون آپاريرلار.
7. حتّا مئصئرئن کؤمه‌يي ده بوش و فايداسيزدير، بونا گؤره ده من مئصئره "تنبل‌ رَهَب" آديني قويموشام.
8. ائندي گت، سنه دِدئيئمي اونلارين قاباغيندا بئر لؤوحه‌يه ياز، بئر طومارا ياز کي، گله‌جکده، همئشه‌لئک بئر شاهئد اولسون.
9. چونکي بو، عاصي بئر خالق، يالانچيلار نسلي‌دئر، ربّئن قانونونا قولاق آسماق ائستَمه‌يَن بئر نسئلدئر.
10. اونلار گؤروجولره ديئرلر: «بئر داها رؤيالار گرک گؤرميه‌سئنئز»، پيغمبرلره ده ديئرلر: «بئزئم اوچون دوزگون شيلر حاقّيندا نبئلئک گرک اتميه‌سئنئز. بئزه شئرئن سؤزلر دانيشين، ساختا شيلر نبئلئک ادئن.
11. يولوموزا مانع اولمايين، يولدان چکئلئن، قويون بئر داها ائسرايئلئن موقدّسي باره‌ده اشئتمه‌يک.»"
12. بونا گؤره ده ائسرايئلئن موقدّسي بله ديئر: "بو سؤزو ردّ اتدئيئنئزه گؤره، ظولم و يالانا اِعتئماد ادئب بِل باغلاديغينيزا گؤره،
13. بو قباحت سئزئن اوچون اوجا دوواردا عمله گلن چاتلاغا بَنزه‌يئر؛ بله دووار بئردن‌بئره، بئر آن ائچئنده ييخيلار.
14. اونون ييخيلماسي کوزه‌گرئن قيريلميش بئر کوزه‌سي کئمي اولار، اِله شئدّتلي پارچالانار کي، اوجاقدان اود گؤتورمک اوچون، يا دا حوووضدان سو چکمک اوچون يِتَرلي بئر تئکه قالماز."
15. پروردئگار رب، ائسرايئلئن موقدّسي بله بويوروب: "تؤوبه ادئب راحاتليق تاپاندا، خئلاص اولارسينيز، سئزئن قووّتئنئز ساکئت اولماقدادير، ائنانماقدادير." لاکئن سئز بونو ائسته‌مئرسئنئز.
16. سئز دِدئنئز: «خِير، آتلارا مئنئب قاچاجاغيق.» بونا گؤره سئز قاچمالي اولاجاقسينيز. «چِوئک آتلارا مئنه‌جَيئک.» بونا گؤره تعقئبچئلرئنئز ده چِوئک اولاجاقلار.
17. مئن نفر بئر نفرئن تهدئدئندن قاچاجاق، بش نفرئن تهدئدئندن هامينيز قاچاجاقسينيز. او قدر کي، داغين باشينداکي بئر بايراق کئمی، تپه‌ده‌کي بئر علامت کئمی قالاسينيز."
18. آمّا رب سئزه ائلتئفات گؤرسدمک اوچون حسرت چکئر، اوجالاردا گؤزله‌يئر کي، سئزه شَفقَت گؤرسدسئن. چونکي رب عادئل تاري‌دير، اونو ائنتئظارلا گؤزله‌يَنلر نه بختوردئرلر!
19. ای اورشلئمده ياشايانلار، ای صحيون خالقي، سئز آرتيق آغلاماياجاقسينيز. فرياد اتدئکده رب قطعن سئزه ائلتئفات گؤرسده‌جک؛ فريادينيزي اشئتدئکده، سئزه جاواب وره‌جک.
20. گَرچي رب سئزه عذاب چؤره‌يئني و سئتم سويونو ورئب، لاکئن او، سئزئن موعلّئمئنئز، اؤزونو آرتيق سئزدن گئزلَتميه‌جک. اونو گؤزونوزله گؤره‌جکسئنئز.
21. صاغا يا دا سولا دؤندوکده، قولاقلارينيز آرخادان بئر سَس اِشئده‌جک: "يول بودور، گدئن بو يولا."
22. او واخت سئز گوموشله اؤرتولَن اويما بوتلرئنئزي، قيزيل‌لا اؤرتولموش تؤکمه بوتلرئنئزي نجئس حساب اده‌جکسئنئز. اونلاري نجئس بئر شيي آتديغينيز کئمي آتاجاقسينيز و اونلارا دئيه‌جکسئنئز: "ردّ اولون!"
23. سونرا رب يِره اَکدئيئنئز توخوم اوچون ياغيش وره‌جک و تورپاغين وردئيي چؤرک بول و برکتلي اولاجاق. او گون مال-حيوانينيز گِنئش اوتلاقلاردا اوتلاياجاق.
24. تورپاغي شوخوملايان اؤکوزلرله اِششَکلر کورَکله، شَنه ائله سوورولموش دوزلانميش يِم يئيه‌جکلر.
25. او بؤيوک مغلوبئيّت گونونده، قالا بورجلري يِره چؤکَنده، هر اوجا داغدان و هر اوجا تپه‌دن سو آرخلاري آخاجاق.
26. رب اؤز خالقينين يارالاريني ساريديغي گون، ضربه‌سي ائله آچديغي يارالارينا شفا ورن گون، آي ائشيغي گونش پاريلتيسي کئمي اولاجاق، گونشئن ده ائشيغي يدّي گونون ائشيغي کئمی يدّي قات آرتيق پارلاياجاق.
27. باخ، ربّئن آدي اوزاق بئر يردن گلئر، قضبي يانار اود کئمي‌دئر، توستوسو چوخ قَلئظ؛ آغزي قضبله دولودور، دئلي سانکي هر شيي محو ادن آلوودور.
28. اونون نفسي داشان سل کئمي‌دئر کي، ائنسانين بوغازيناجاق چاتيب. اِله کي، مئلّتلري اَلَکده سئلکَتسئن و دَيَرسئزلري آييرسين، و خالقلارين آغزينا يولدان آزديران يويَن تاخسين.
29. آمّا سئز موقدّس بايرام گجه‌سي کئمي نغمه‌لر اوخوياجاقسينيز. ربّئن داغينا، ائسرايئلئن قاياسينا نِي چالاراق چيخان کئمی، اوره‌يئنئز شادلاناجاق.
30. رب قودرتلي سَسئني اشئتدئره‌جک، حئدّتلي قضبله، هر شيي يانديران آلوولا، طوفانلا، بولود پارتلاماسي ائله، دولو ائله قولونون قودرتئني گؤرسده‌جک.
31. رب دَيَنه‌يي ائله ووراندا، آشور ربّئن سَسئندن واهئمه‌يه گله‌جک.
32. ربّئن اونلارا اِندئردئيي دَيَنه‌يئنئن هر ضربه‌سئني، دفلر و طنبورلار نغمه‌سي موشايئعت اده‌جک. موحارئبه‌ده سئلاحلار چکئب اونلارلا ووروشاجاق.
33. چونکي توفِت چوخدان حاضيردير، دوغرودان دا پادشاه اوچون حاضيرلانيب. اونو درئن و گِنئش ادئب؛ اود قالاسي چوخلو اودونلارلا؛ ربّئن نفسي گوگورد آخيني کئمي اونو يانديرار.

Yeşaya 31:1-9
1. واي او آداملارين حالينا کي، کؤمک اوچون مئصئره طرف اِنئرلر، آتلارا بِل باغلاييرلار، عارابالارينين چوخلوغونا، آتلي‌لارين گوجونه بِل باغلاييرلار! لاکئن ائسرايئلئن موقدّسئنه باخميرلار، ربّی آختارميرلار!
2. آمّا رب تام حئکمته مالئکدئر و بلا گتئرر، اؤز سؤزلرئني گری گؤتورمز، لاکئن پئسلئک ادن آداملارين اِوئنه، شر قورانلارا کؤمک ادنلرئن ضئدّئنه قالخار.
3. مئصئرلی‌لر تاري يوخ، ائنسانديرلار، آتلاري دا اَتدئر، روح ديئل. بونا گؤره، رب اؤز اَلئني اوزاداجاق، کؤمک ادن ييخيلاجاق، کؤمک آلان ييخيلاجاق، اونلارين هاميسي بئرلئکده محو اولاجاقلار.
4. چونکي رب منه بله ديئر: "شئر و يا جاوان آصلان نجه اؤز شئکاري اوستونه نعره چکنده، بئر دسته چوبان اونون ضئدّئنه هاراي چکميه باشلايير، نجه آصلان اونلارين سَسلرئندن قورخمور، قيشقيريقلارينا محل قويمور. قوشونلارين ربّی ده اِله اِنه‌جک، صحيون داغيندا و اونون تپه‌لرئنده دؤيوشه‌جکدئر.
5. قوشونلارين رَبّي، قاناد آچميش قوشلار کئمي اورشلئمي قوروياجاق، مودافئعه اده‌جک، اونو قورتاراجاق، اونو اسئرگَيه‌جک، خئلاص اده‌جکدئر."
6. ای ائسرايئل اؤولادلاري، اونا چوخ عاصي اولدوغونوز ربّه طرف، دؤنون!
7. چونکي او گون هر بئرئنئز، گوناهکار اَل‌لرئنئزله دوزه‌لتدئيئنئز قيزيل و گوموش بوتلرئنئزي اؤزوزدن آتاجاقسينيز.
8. "آشورلولار قيلينجدان محو اولاجاقلار، لاکئن ائنسان قيلينجيندان يوخ. اونلار قيلينج آغزينا ورئله‌جکلر، آمّا بو، ائنسان قيلينجي اولماياجاق. قيلينجدان قاچا بئلميه‌جکلر، جاوانلاري دا ياخالانيب قول اولاجاقلار.
9. اونلارين قايا داشي دهشت اوزوندن ييخيلاجاق؛ سرکرده‌لري بايراغي گؤرونجه ولوله‌يه دوشه‌جکلر." بونو او رب ديئر کي، آلووو صحيوندا، اوجاغي اورشلئمده‌دئر.

Yeşaya 32:1-20
1. باخ، بئر پادشاه صالحلئکله سلطنت اده‌جک، باشچيلار عدالتله حؤکم سوره‌جکلر.
2. اونلارين هر بئري کولَک قاباغيندا بئر پناهگاه، طوفان قاباغيندا بئر سيغيناجاق اولاجاق. قوراقليقدا بولاقلار، جان‌سيخيجي تورپاقدا، کؤلگه سالان بؤيوک قايا کئمي اولاجاق.
3. او واخت گؤرَنلرئن گؤزلري بئر داها يومولماياجاق، اشئدنلرئن قولاقلاري قولاق آساجاق.
4. تَلَسنلرئن آغلي معرئفتي آنلاياجاق، پلتَکلرئن دئلي آچيق-آيدين دانيشماغا تَلَسه‌جک.
5. آرتيق آخماق آداما عالئجناب ديئلميه‌جک، خَسئس آدامي دا سخاوتلي ائنسان سايماياجاقلار.
6. چونکي آخماق سَفِه-سَفِه دانيشير، اوره‌يئنئن نئيّتي پئسلئک اتمکدئر. اونون ائشي شرارت اتمکدئر، ربّئن ضئدّئنه ياوا دانيشماقدير، آجلاري آج بوراخماق، سوسوزلاري سوسوز قويماقدير.
7. آلچاق آدامين سئلاحلاري شردئر. او، حئيله ائشله‌دئر کي، يالان سؤزلرله مظلوم آدامي محو اتسئن، گرچي او مؤحتاج، داعواسيندا حاقلي‌دير.
8. آمّا اَصئلزاده آدام عالي نئيّتلر قورار. و عالي نئيّتلرله برقرار قالار.
9. ای لاقيد آروادلار، قالخين، سَسئمي اِشئدئن! ای لاقيد قيزلار، سؤزومو اِشئدئن!
10. ای لاقيد آروادلار، سئز بئر ائل نچه گوندن سونرا ائضطئرابا دوشه‌جکسئنئز، چونکي باغدا محصول قورتاراجاق، ميوه ييغيمي اولماياجاق.
11. اَسئن، ای لاقيد آروادلار؛ ائضطئرابا دوشون، ای لاقيد قيزلار؛ پالتارلارينيزي چيخاردين، سويونون، بِلئنئزه چول قورشايين.
12. گؤزل زَمئلر، محصوللو مِينه‌لر اوچون سئنه‌لرئنئزه وورون.
13. چونکي خالقيمين تورپاغيندا تئکانلي کوللار بئته‌جک؛ بلی، بوتون شَن اِولر اوچون، صفالي شهر اوچون سئنه‌لرئنئزه دؤيون.
14. چونکي ساراي ترک ادئلئب، ائزدئحاملي شهر بوش قاليب، تپه ائله کشئکچي بورجو ابدئلئک ماغارالارا چِورئلئب؛ وحشي اِششَکلرئن خوشلارينا گلن يِر اولوب، سورولره اوتلاق يري اولوب.
15. بونلار يوخاريدان اوستوموزه روح تؤکولَنه‌جک داوام اده‌جک. او واخت صحرا محصوللو زَمئيه، محصوللو زَمي ده، مِشه‌ ساييلاجاق.
16. سونرا عدالت صحرادا ساکئن اولاجاق، صالحلئک محصوللو زَمئده ياشاياجاق.
17. صالحلئيئن عملي اَمئن-آمانليق، نتئجه‌سي ده ابدی اَرامليق و آرخايينليق اولاجاق.
18. او واخت خالقيم اَمئن-آمانليق ائچئنده اِولرئنده، خطَرسئز مسکنده، راحات يِرلرده ياشاياجاق.
19. مِشه‌لر دوشَنده دولو ياغاجاق، شهر يِرله بئر اولاجاق.
20. سئز نه بختور اولاجاقسينيز، سئز کي، بوتون سولار قيراغيندا اَکئرسئنئز، سئز کي، اؤکوزو و اِششه‌يي آزاد بوراخيرسينيز.

Zəbur 108:7-13
7. تاري موقدّس يرئنده دانيشيب: "شِکِمي شادليقلا بؤله‌جيم، سوکّوت دره‌سئني اؤلچه‌جيم.
8. جئلعاد منئمدئر، منسّه ده منئم، اِفرايئم ده باشيمين دبئلقه‌سي‌دئر؛ يهودا عصامدير.
9. موآب يويونماق لگنئمدئر، اِدوم اوستونه چاريغيمي آتيب اونا مالئک اولاجاغام، فئلئسطئن اوستونه ظفرله هاراي چکه‌جيم."
10. کئم مني حاصارلي شهره آپاراجاق؟ کئم منه ادوما قدر يول گؤرسده‌جک؟
11. مگر سن بئزي اؤزوندن آتمادين، اي تاري؟ بئزئم قوشونلاريميزلا چيخميرسان، اي تاري.
12. دوشمن قاباغيندا بئزه ائمداد ات؛ چونکي ائنسانين کؤمه‌يي هچدئر.
13. تارينين کؤمه‌يي ائله قهرمانليق گؤرسده‌جيئک، چونکي دوشمنلرئمئزي آياق آلتينا سالان اودور.

Süleymanın Məsəlləri 25:23-24
23. شئمال يلي ياغيش دوغورار، قيبت ادن دئل ده قضبلي اوز!
24. دامين کونجونده اوتورماق، داعواچي بئر آروادلا بؤيوک بئر اِوده ساکئن اولماقدان داها ياخشي‌دير.

2 Korinflilərə 11:16-33
16. گئنه ديئرم؛ قوي هچ کس دوشونمه‌سئن کي، من عاغيلسيزام. لاکئن اگر بله​دئرسه ده، مني آغيلسيز کئمي قبول ادئن کي، من ده بئر آز فخر ادئم.
17. بو فخره گؤره ددئکلرئمي ربّئن دئيه​جه‌يي کئمي يوخ، آغيلسيز بئري کئمي ديئرم.
18. ائندي کي، بئر چوخلاري جئسمه گؤره فخر ادئر، من ده فخر اده​جه‌يم.
19. چونکي سئز عاغيلّي اولدوغونوز حالدا، عاغيلسيزلارا شادليقلا دؤزورسونوز.
20. چونکي اگر کئمسه سئزي قول اتسه، مالينيزي يِسه، اؤز منفعتي اوچون سئزدن ائستئفاده اتسه، اؤزونو بؤيوکلندئرسه، اوزونوزه وورسا، اونو دؤزورسونوز.
21. بونو خجالتله دمه‌لئيم کي، بئز ضعئف عمل اتمئشئک. آمّا کئمسه نه ائله جسور اولسا-(عاغيلسيز کئمي دانيشيرام)-من اؤزوم ده او قدر جسورام.
22. آيا اونلار عئبراني‌دئرلر؟ من ده عئبراني‌يَم. ائسرايئللي‌دئرلر؟ من ائسرايئللي‌يَم. ائبراهئم نسلئندندئرلر؟ من ده.
23. مسئحئن خئدمتچئلري‌دئرلر؟ (دلي بئر آدام کئمي دانيشيرام)، من اونلاردان داها چوخ؛ داها چوخ زحمت چکمئشم، داها چوخ زئندانلاردا اولموشام، ساييسيز-حسابسيز دؤيولموشم، چوخ واخت دا اؤلوم خطرئنه دوشموشم.
24. بش دفه يهودئلردن قيرخدان بئر اَسکئک شالّاق يمئشم.
25. اوچ دفه دَيَنَکله وورولموشام، بئر دفه داشا باسيلميشام، اوچ دفه گمئم سينيب؛ بئر گجه-بئر گوندوز درئن دهنزده کچئرتمئشم.
26. چوخ دفه سفرلرده چايلارين خطرلرئنده، اوغرولارين خطرلرئنده، هموطنلرئمئن خطرلرئنده، قيري‌يهودئلرئن خطرلرئنده، شهرئن خطرلرئنده، چؤلون خطرلرئنده، دهنزئن خطرلرئنده، يالانچي قارداشلارين خطرلرئنده،
27. زحمت و مشقّتده، چوخ دفه ده يوخوسوز، آجليق و سوسوزلوقدا، چوخ دفه ده يمکسئز سويوقلوق و لوتلوکده اولموشام.
28. اشئگدن اولان بو شيلردن باشقا، هر گون مني ازن، او فئکئردئر کي، بوتون کئلئسالار اوچون چکئرم.
29. کئم ضعئف اولور و من ضعئف اولمورام؟ کئم گوناها دوشور و من ائچئمده يانميرام؟!
30. اگر فخر اتمک لازيم گلسه، ضعئفلئيئمي گؤرسه‌دن شيلر​له فخر اده​جه‌يم.
31. رب عئسانين آتاسي، او ابدي موتبارک تاري بئلئر کي، يالان دمئرم.
32. دَمَشقده آرتاس پادشاهين والئسي، دَمَشقلي​لرئن شهرئني گودوردو کي، مني ياخالاسين.
33. من ده بئر سبد ائچئنده شهرئن دوآرينداکي بئر پنجره​دن اِندئرئلئب، اونون الئندن قاچديم.