A A A A A

Bir il Bibliya

Avqust 8

Əyyub 7:1-21
1. ائنسانين ير اوزونده‌کي حياتي مگر زحمت چکمک اوچون ديئل؟ مگر گونلري ده فَحله‌‌نئن گونلري کئمي ديئل؟
2. کؤلگه‌يه حسرت چکن قول کئمي، اوجرَتئنه اومئد باغلايان فَحله‌لر کئمي،
3. منه مئراث بوش آيلار ورئلدي، پاييما مشقّت گجه‌لر دوشدو.
4. ياتان زامان دوشونورَم: نه زامان قالخاجاغام؟ لاکئن گجه اوزوندور، و سحره قدر ائکي يانيما وورنوخورام.
5. بدنئمه قورد دوشوب، قابيقلانير دَرئم چاتلايير، چئرک آخيدير.
6. گونلرئم جولّانين مَکئيئندن داها سورعتلي گدئر، اومئدسئز آخيرينا چاتير.
7. خاطيرلا کي، حياتيم بئر نفسدير؛ گؤزلرئم بئر داها ياخشيليق گؤرميه‌جک.
8. منه باخانين گؤزو، منی داها گؤرميه‌جک؛ گؤزلرئن اوستومده اولاجاق، آمّا من اولماياجاغام.
9. بولود داغيليب گتدئيي کئمي، اؤلولر دئيارينا اِنَن بئر داها چيخماز؛
10. بئر داها اِوئنه دؤنمَز، يري ده آرتيق اونو تانيماز.
11. بونا گؤره آغزيمين قاباغيني آلماياجاغام؛ روحومون دارليغيني دئله گتئره‌جيم؛ جانيمين آجيليغيندان شئکايت اده‌جيم.
12. مگر من دهنزَم، مگر اَژداهايام کي، اوستومه گودوکچو قويورسان؟
13. اگر دئيَم: «ياتاغيم منی راحاتلار، دؤشه‌يئم شئکوه‌مي آزالدار»
14. او زامان منی يوخولارلا قورخودورسان، و رؤيالارلا جانيما ولوله ساليرسان.
15. اله کي، بوغولوب اؤلمه‌يه آرتيق راضي اولسون، و اؤلومو بو دردلردن داها سِوسئن.
16. حياتيمدان بِزمئشَم؛ اوزون عؤمور ائسته‌مئرم. مندن اَل چک؛ چونکي گونلرئم بئر نفس کئمي‌دئر.
17. ائنسان ندئر کي، اونو بو قدر بؤيودورسن، قيدئنه قاليرسان،
18. اونا هر سحر باش چکئرسن، هر آن اونو ائمتاحان ادئرسن؟
19. داها نه زاماناجاق گؤزونو اوستومدن گؤتورميه‌جکسن، تَک بوراخماياجاقسان کي، آغزيمين سويونو بئر اودوم؟
20. مگر گوناه اتمئشم؟ سنه نه اتمئشم، ای ائنسانا گودوکچو اولان؟ نه اوچون منی اؤزونه هدف ادئبسن؟ اله کي، سنئن اؤزونه بئر يوک اولموشام؟
21. نه اوچون عوصيانيمي باغيشلاميرسان و خاطامي دا اوستومدن گؤتورمورسن؟ بئر آزدان تورپاق آلتيندا ياتاجاغام، منی آختاراجاقسان، و من اولماياجاغام."

Əyyub 8:1-22
1. او زامان شواَخلي بئلدَد جاواب ورئب ددی:
2. «نه واختا قدر بونلاري دئيه‌جکسن؟ آغزينين سؤزلري ده يِل کوله‌يي کئمي اولاجاق؟
3. مگر تاري عدالتي اَيَر؟ مگر قادئري-موطلق صالح اولاني اَيري اِدَر؟
4. بلکه اوغوللارين اونون ضئدّئنه گوناه ادئب، او دا اونلاري عوصيانلارينين اَلئنه ورئب.
5. اگر سن تاريني آختارسايدين، قادئري-موطلقه يالوارسايدين،
6. اگر طاهئر و دوز اولسايدين، يقئن کي، او دا سنه گؤره قالخاردي و حاقّين اولان يري سنه گری ورَردي.
7. باشلانيشين کئچئک اولسا دا، آخيرين چوخ بؤيوک اولار.
8. گل ائندي قدئم نسئل‌لردن بئر سوروش، آتالارينين نه آراشديرديقلاريني بئر دوشون.
9. بئز دونَنکي اؤولادلاريق، بئر شي بئلمئرئق. ير اوزونده‌کي گونلرئمئز آنجاق بئر کؤلگه کئمي‌دئر.
10. مگر اونلار سنه اؤيره‌دئب دِمَزلر؟ مگر اورَکلرئندن سؤزلر چيخارتمازلار؟
11. مگر باتاقليق اولمايان يرده قاميش بئتَر؟ مگر سو اولمايان يرده نِي بؤيويَر؟
12. حله ياشيل ائکَن، داها کَسئلمه‌دن، هر اوتدان قاباق قورويار.
13. تاريني اونودان هر کَسئن يولو بله‌دئر؛ تاريسيز آدامين اومئدي ده محو اولار.
14. تَوَکّول اتدئکلري قيريلار؛ بِل باغلاديقلاري اله بئل کي، حؤرومچک تورودور.
15. اِوئنه سؤيکَنَرکَن، اِوي اوچار. اوئندن بَرک توتارکَن، داغيلار.
16. گونون قاباغيندا ياشيل‌دير، بوداقلاري باغينين هر طرفئنه اوزانار.
17. کؤکلري داش ييغينلاري اوستونه حؤرولر؛ داشلار آراسيندا اؤزونه بئر ير آختارار.
18. آمّا يرئندن قوپاريلارکَن، ير اونو ائنکار ادئب دئيَر؛ سني هچ واخت گؤرمه‌مئشم.
19. باخ، اونون يولونون شادليغي بودور؛ اونون يرئنده، اؤزگه‌لري بئتَر.
20. باخ، تاري کامئل آدامي اؤزوندن ردّ اِتمَز، پئسلئک ادنلرئن ده اَلئندن توتماز.
21. سنئن آغزيني گئنه گولوشله، دوداقلاريني شادليق سَسي ائله دولدورار.
22. سندن نئفرت ادنلري روسوايچيليق بورويه‌جک، شرور آداملارين چاديري يوخ اولاجاقدير.»

Zəbur 92:8-15
8. آمّا سن، يارب، ابده کئمي اوجاسان.
9. يقئن کي، سنئن دوشمنلرئن، يارب، يقئن کي، سنئن دوشمنلرئن محو اولاجاقلار؛ بوتون يامانليق ادنلر داغيلاجاقلار.
10. آمّا سن بوينوزومو، چؤل اؤکوزونون بوينوزو کئمي اوجالديبسان؛ باشيما تزه ياغي تؤکوبسن.
11. گؤزلرئم دوشمنلرئمئن ييخيلماسيني گؤروب، قولاقلاريم منئم ضئدّئمه چيخانلارين هلاکتئني اشئدئب.
12. صادئق آدام خورما آغاجي کئمي گؤيه‌رَر، لوبنانداکي سئدر آغاجي کئمي بؤيوير.
13. اونلار ربّئن اوئنده اَکئلئب، بئزئم تارينين صحنلرئنده گول آچار.
14. قوجاليق زامانيندا حله ده مئيوه وِرَر؛ همئشه سولودور، همئشه ياشيل‌دير،
15. بو اعلان ادئر: "رب دوغرودور، منئم قايامدير، اوندا ناحاقليق يوخدور."

Süleymanın Məsəlləri 22:17-21
17. قولاق آس و حئکمتلي آداملارين سؤزلرئني اشئت، اوره‌يئني منئم معرئفتئمه ور.
18. چونکي اونلاري اؤز ائچئنده ساخلاياسان، ياخشي اولار؛ اونلارين هاميسيني دئلئنه سال.
19. بو گون سنه خبر وردئم کي، توکّولون ربّه اولسون.
20. مگر سنه مشورتلر و معرئفتئن اوتوز سؤزونو يازماميشام کي،
21. حقئقت سؤزلرئنئن دوغرولوغونو بئله‌سن، سني گؤنده‌رَنلره حقئقتله جاواب وره‌سن؟!

Romalılara 9:1-15
1. مسئحده حقئقتي ديئرم، يالان دانيشميرام؛ وئجدانيم دا موقدّس روحدا ددئکلرئمي تصدئق ادئر.
2. اوره‌يئمده بؤيوک بئر قم، دائمي بئر ائضطئراب وار.
3. چونکي ائسته‌يه بئله‌ردئم کي، قارداشلاريمين خاطئري اوچون، جئسمن هموطنلرئمئن خاطئري اوچون، من اؤزوم مسئحدن اوزاقلاشيب لعنت اولونوم.
4. اونلار ائسرايئللي‌دئرلر کي، اوغوللوق و عئزّت، عهدلر، شرئعتئن ورئلمه‌سي، معبدئن خئدمتي و وعده​لر اونلاريندير.
5. بؤيوک آتالار دا اونلاريندير، مسئح ده جئسمن اونلارداندير؛ او کي، هر شيئن اوستونه ابده کئمي موبارک تاري‌دير. آمئن.
6. لاکئن بله ديئل کي، تارينين کلامي بوشا چيخيب. چونکي ائسرايئلدن اولانلارين هاميسي ائسرايئل ديئل.
7. ائبراهئم نسلئندن اولانلارين هاميسي دا ائبراهئمئن اؤولادلاري ديئل: آمّا "سنئن نسلئن ائسحاقدان آدلانديريلاجاق."
8. بو او دمکدئر کي، تارينين اؤولادلاري جئسماني اؤولادلار يوخ، وعده​نئن اؤولادلاري‌ديرلار کي، ائبراهئمئن نسئلي ساييليرلار.
9. چونکي وعده بله ورئلدي: "بو واخت گله​جه‌يم و سارانين اوغلو اولاجاق."
10. و آنجاق بو يوخ، رئبقا دا بئر کئشئدن، يعني آتاميز ائسحاقدان بويلو اولدو.
11. و ائکي اوغول حله آنادان اولماميش و ياخشيليق يا دا پئسلئک اتمه​مئش ائکن-اونا گؤره کي، تارينين سچمه باره​ده اولان مقصدي عمللردن يوخ، اونون دعوتئندن اولسون-
12. رئبقايا ديئلدي: "بؤيوکو کئچئيئنه قوللوق اده​جک."
13. نجه کي، حتّا يازيليب دا: "يعقوبو سودئم، لاکئن عئسودان نئفرت اتدئم."
14. ائندي نه دئيک؟ مگر تارينين يانيندا حاقسيزليق وار؟ اصلا!
15. چونکي او، موسايا ديئر: "کئمه رحمئم گلسه، رحم اده​جه‌يم، کئمه اوره‌يئم يانسا، شفقت گؤرسده‌جه‌يم."