A A A A A

Bir il Bibliya


Iyul 26


Nehemya 3:1-31
1. باش کاهئن اِلياشئبله قارداشلاري قالخيب قويون دروازاسيني تئکدئلر. اونو تقدئس ادئب قاپي تايلاريني يرئنه قويدولار. اونلار دوواري يوز بورجونه و خَنه‌نِل بورجونه قدر تقدئس اتدئلر.
2. اِلياشئبئن يانينداکي حئصّه‌ني ‌ده اَرئحا ساکئنلري تئکدئلر. اونلارين يانيندا ائمري اوغلو زَکّور تئکدي.
3. باليقلار دروازاسيني هَسّناعا اوغوللاري تئکدئلر. اونلار تئرلري يرئنه قويدولار، قاپي تايلاريني، رَزه‌لرئني و چفته‌لرئني يرئنه تاخديلار.
4. اونلارين يانيندا دا حَقّوص اوغلو اورئيا اوغلو مِرِموت تعمئر ائشلرئني گؤردو. مِرِموتون يانيندا مِشِزه‌بِل اوغلو بِرِکيا اوغلو مِشولّام تعمئر ائشلرئني گؤردو. اونلارين يانيندا دا بَعَنا اوغلو صادوق تعمئر ائشلرئني گؤردو.
5. صادوقون يانيندا تِقوعَع ساکئنلري تعمئر ائشلرئني گؤردولر، لاکئن اورانين اصئل‌زاده‌لري نظارتچئلرئن وردئيي ائشلره بويون اَيمه‌دئلر.
6. کؤهنه دروازاسيني پاسِه‌اَخ اوغلو يوياداع و بِسوديا اوغلو مِشولّام تعمئر اتدئلر. اونلار تئرلري يرئنه قويوب قاپي تايلاريني، رَزه‌لري و چفته‌لري تاخديلار.
7. اونلارين يانيندا گئبعونلو مِلَطيا، مِرونوتلو يادون، گئبعون و مئصپا ساکئنلري تعمئر ائشلرئني گؤردولر. مئصپا فَرات چايينين قربئنده‌کي تورپاقلارين والئسئنئن والئلئک مکاني ائدي.
8. اونلارين يانيندا دا زرگرلردن خَرهَيا اوغلو اوزّي‌اِل تعمئر ائشلرئني گؤردو. اوزّي‌اِلئن يانيندا عطرئيّاتچي‌لاردان بئري اولان خَنَنيا تعمئر ائشلرئني گؤردو. اونلار اورشلئمي گِنئش دووارا قدر تزه‌دن تئکدئلر.
9. اونلارين يانينداکي دوواري خور اوغلو رِفايا تعمئر اتدي کي، اورشلئم شهرئنئن ياري حئصّه‌سئنئن مأمورو ائدي.
10. خَرومَف اوغلو يِدايا دا اونون يانيندا اؤز اِوئنئن موقابئلئنده تعمئر ائشلرئني گؤردو. اونونلا ياناشي خَشَبنِيا اوغلو خَطّوش تعمئر اتدي.
11. خارئم اوغلو مَلکئيا و پَخَت‌موآب اوغلو خَشّوب آيري بئر ساحه‌ني و تندئرلر بورجونو برپا اتدئلر.
12. مَلکئيانين و خَشّوبون يانيندا هَلّوخِش اوغلو شَلّوم کي، اورشلئم شهرئنئن او بئري ياريسينين مأمورو ائدي، قيزلاري ائله بئرلئکده تعمئر اتدي.
13. وادي دروازاسيني خانون و زانواَخ ساکئنلري تعمئر اتدئلر. اونلار دروازاني تئکئب قاپي تايلاريني، رَزه‌لرئني و چفته‌لرئني يرئنه تاخديلار. پِيئن دروازاسينا قدر مئن قول‌آچ مسافه‌يه دوواري تعمئر اتدئلر.
14. پِيئن دروازاسيني بِيت‌هَکّرِم وئلايتئنئن مأمورو رِکاب اوغلو مَلکئيا برپا اتدي. اوراني تئکئب قاپي تايلاريني، رَزه‌لرئني و چفته‌لرئني يرئنه تاخدي.
15. چشمه دروازاسيني مئصپا وئلايتئنئن مأمورو کول‌خوزه اوغلو شَلّون برپا اتدي. اوراني تئکئب اوستونو اؤرتدو و قاپي تايلاريني، رَزه‌لرئني، چفته‌لرئني يرئنه تاخدي. او، پادشاه باغچاسينين يانيندا شِلَخ حوووضونون دوواريني دا داوودون شهرئندن اِنَن پئلّه‌کنه قدر تئکدي.
16. شَلّوندان سونرا عَزبوق اوغلو نِحِميا کي، بِيت‌صور وئلايتئنئن ياري حئصّه‌سئنئن مأمورو ائدي، دوواري داوودون عايئله قَبئرلرئنئن قاباغينا، حوووضا و ائگئدلر اِوئنه قدر تئکدي.
17. اوندان سونرا دا لاوئلی‌لر باني اوغلو رِخومون رهبرلئيي آلتيندا تعمئر اتدئلر. رِخومون يانيندا قِعئلا وئلايتئنئن ياري حئصّه مأمورو خَشَبيا اؤز ايالتي اوچون تعمئر ائشلرئني گؤردو.
18. خَشَبيادان سونرا اونلارين قارداشلاري خِناداد اوغلو بَوّه‌يئن نظارتي آلتيندا کي، قِعئلا وئلايتئنئن ياري حئصّه مأمورو ائدي، تعمئر ائشلرئني گؤردولر.
19. اونون يانيندا يوشَع اوغلو عِزِر کي، مئصپا وئلايتئنئن مأمورو ائدي، سئلاح آنبارينا چيخان يولون قاباغيندان دووارين کونجونه قدر باشقا ساحه‌ني تعمئر اتدي.
20. اونون يانيندا زَبّه‌ي اوغلو باروک دووارين کونجوندن باش کاهئن اِلياشئبئن اِوئنئن گئرئشئنه قدر اولان باشقا بئر ساحه‌ني قيرتله تعمئر اتدي.
21. اوندان سونرا حَقّوص اوغلو اورئيا اوغلو مِرِموت، اِلياشئبئن اِوئنئن گئرئشئندن آخيرينا قدر تعمئر اتدي.
22. اوندان سونرا دا، او اطرافلاردا ياشايان کاهئنلر تعمئر ائشلرئني گؤردولر.
23. اونلاردان سونرا بِنيامئن و خَشّوب اؤز اِولرئنئن يانينداکي ساحه‌ني تعمئر اتدئلر. اونلاردان سونرا عَنانيا اوغلو مَعَسِيا اوغلو عَزَريا اؤز اِوئنئن يانينداکي ساحه‌ني تعمئر اتدي.
24. عَزَريادان سونرا خِناداد اوغلو بئنّوي، عَزَريانين اِوئندن دووارين کونج-بوجاغينا قدر اولان ساحه‌ني تعمئر اتدي.
25. اوزاي اوغلو پالال دووارين کونجوندن و پادشاهين يوخاري ساراييندان ائره‌لي چيخان کشئکچي حَيَطئنئن يانيندا اولان گؤزَتچي بورجوندن باشلاييب تعمئر ائشلرئني گؤردو. اوندان سونرا پَرعوش اوغلو پِدايا ائله تعمئر اتدئلر.
26. عوفِلده ياشايان معبد قوللوقچولاري شرقه طرف سو دروازاسينين قاباغينا و گؤزَتچي بورجونه قدر ساحه‌ني تعمئر اتدئلر.
27. اونلارين يانيندا تِقوعَع ساکئنلري بؤيوک گؤزَتچي بورجوندن عوفِل دووارينا قدر آيري بئر ساحه‌ني تعمئر اتدئلر.
28. آت دروازاسينين يوخاري حئصّه‌سئنده کاهئنلردن هر بئري اؤز اِوئنئن قاباغيني برپا اتدي.
29. کاهئنلردن سونرا ائمّر اوغلو صادوق اؤز اِوئنئن قاباغيني تعمئر اتدي. اوندان سونرا شرق قاپيسينين گؤزَتچئسي شِکَنيا اوغلو شِمَعيا تعمئر ائشلرئني گؤردو.
30. اوندان سونرا شِلِميا اوغلو خَنَنيا و صالافين آلتينجي اوغلو خانون باشقا بئر ساحه‌ني برپا اتدئلر. خَنَنيا و خانوندان سونرا بِرِکيا اوغلو مِشولّام اؤز اِوئنئن قاباغيني تعمئر اتدي.
31. اوندان سونرا مَلکئيا آدلي بئر زرگر معبد قوللوقچولارينين و تاجئرلرئن نظارت دروازاسينين موقابئلئنده‌کي بئناسينا و دووارين کونج طرفده‌کي يوخاري اوتاغا قدر ساحه‌ني تعمئر اتدي.

Nehemya 4:1-23
1. سنبَلّط دوواري تئکدئيئمئز باره‌ده اشئدنده قاني قارالدي، چوخ قضبلَندي و يهودئلري اَله سالماغا باشلادي.
2. او هموطنلرئنئن و وارلي سامئره‌لي‌لرئن قاباغيندا بله ددي: "بو عاجئز يهودئلر نه ادئرلر؟ اونلار بوراني تزه‌دن مگر قوراجاقلار؟ قوربان مگر کَسه‌ بئلرلر؟ بو ائشي مگر بئر گونده قورتارا بئلرلر؟ مگر بو يانميش تورپاق وئرانه‌سئندن تزه‌دن داشلار يارادا بئلرلر؟"
3. اونون يانيندا اولان عَمّونلو طوبئيا ددي: "اگر تئکدئکلري داش دووارين اوستونه بئر تولکو آتيلسا، اونلارين داش دوواريني ييخاجاق."
4. "اشئت، ای تاريميز، گؤر بئزه نجه حقارتله باخيرلار! حقارتلرئني اؤز باشلارينا دوندَر و اونلاري اسئرلئک تورپاغيندا تالانچيلارا تسلئم ات.
5. اونلارين تقصئرئني عفو اتمه. قوي گوناهلاري سنئن ياديندان چيخماسين! چونکي اونلار بنّالاري روحدان ساليبلار.‎"
6. بلجه بئز دووارين تئکمه‌سئنه داوام وردئک و اونون هر يري اوجاليغينين ياريسينا قدر بئتئشدئرئلدي. چونکي خالق اورَکدن چاليشيردي.
7. سنبَلّط، طوبئيا، عربلر، عَمّونلولار، و اَشدودلولار اورشلئم دووارينين تعمئر ائشلرئنئن داواميني و داغيديلميش يرلرئن تئکئلدئيئني اشئدنده چوخ حئرصلَندئلر.
8. اونلارين هاميسي بئرلَشدئلر کي، گلئب اورشلئمئن ضئدّئنه دؤيوشسونلر و اورادا قارماقاريشيقليق سالسينلار.
9. لاکئن بئز تاريميزا دوعا اتدئک و اونلارين اوزوندن اونلارين ضئدّئنه گجه-گوندوز گؤزَتچئلر قويدوق.
10. او زامان يهودادا ديئلدي: "ائشله‌يَنلر طاقتدن دوشوب، زئل-زئبئل حله ده چوخدور. بئز اؤزوموز قادئر ديئلئک کي، بو دوواري تزه‌دن تئکَک."
11. دوشمنلرئمئز ددئلر: "گلئن اونلار بئلمه‌دن، بئزي ده گؤرمه‌دن آرالارينا گئرئب اونلاري اؤلدورَک و بو ائشي دايانديراق."
12. اونلارين يانيندا ياشايان يهودئلر گلئب بئزه اون دفه ددئلر کي: "بئزه قوشولون، يوخسا سئزه هر طرفدن هوجوم اده‌جکلر."
13. بونا گؤره ده من قيلينجلي، نئزه‌لي، اوخ-کامانلي آداملاري، نسئل‌به‌نسئل، دووارين آرخاسينداکي لاپ آشاغيداکي آچيق يرلره دوزدوم.
14. بو وضعئيّتي گؤرنده، قالخيب اصئل‌زاده‌لره، حؤکومت مأمورلارينا و خالقين قالانينا ددئم: "اونلاردان قورخمايين! بؤيوک و زَهملي ربّی خاطيرلايين! سئز هموطنلرئنئز، اوغوللارينيز، قيزلارينيز، آروادلارينيز و اِولرئنئز خاطئرئنه ووروشون."
15. دوشمنلرئمئز اشئتدي کي، بو ائش بئزه معلوم اولوب، چونکي تاري اونلارين نئيّتئني بوشا چيخارتميشدي. بونا گؤره هاميميز ائشئمئزه، دووارين تئکئلمه‌سئنه قاييتديق.
16. او گوندن سونرا آداملاريمين ياريسي تئکئنتئده چاليشدي. ياريسي دا نئزه‌لري، قالخانلاري، اوخ-کامانلاري توتوب زئرِه گِيدي. سرکرده‌لر بوتون دووار تئکَن يهودا خالقينين آرخاسيندا کشئک چکدئردئلر.
17. دوواري تئکَنلر و يوک داشييان فحله‌لر بئر اَلي ائله ائش گؤروب، او بئري اَلي ائله سئلاح توتوردولار.
18. بنّالارين دا هر بئري قيلينجي بِلئنه باغلاييب دووار تئکئردي. کَره‌نايچي دا منئم يانيمدا ائدي.
19. اصئلزاده‌لره، حؤکومت مأمورلارينا و خالقين قالانينا ددئم: "ائش چوخدور، تئکئنتي ساحه‌مئز گِنئشدئر. بئز دووار اوستونده بئربئرئمئزدن آيري‌ييق، اوزاقداييق.
20. هارادا کَره‌ناي سَسي اِشئده‌سئنئز، اورايا، يانيميزا ييغيلين. تاريميز بئزئم اوچون ووروشاجاق."
21. بلجه، ائشئمئزي گؤردوک و خالقين ياريسي گون چيخان واختدان اولدوزلار گؤرونه قدر نئزه توتموشدو.
22. او واخت من جاماعاتا ددئم: "هر کس اؤز نؤکري ائله بئرلئکده گجه‌ني اورشلئمده کچئرتسئن و گجه کشئکده دوروب، گوندوز ده ائشله‌سئن."
23. نه من، نه هموطنلرئم، نه نؤکرلرئم، نه ده آرخامدا دايانان کشئکچئلر، هچ پالتارلاريميزي سويونماديق. سو باشينا گدنده ده سئلاح اَلئمئزده ائدي.

Nehemya 5:1-19
1. او زامان خالقين کئشئلري و آروادلاري يهودي هموطنلرئندن بَرک شئکايت اتمه‌يه باشلاديلار.
2. بعضئلري بله ديئردئلر: "بئز، اوغوللاريميز و قيزلاريميز چوخوق. بونا گؤره ده قويون تاخيل تاپاق کي، يِيئب ياشاياق."
3. بعضئلري ده بله ديئردئلر: "قيتليغين اوزوندن زَمئلرئمئزي، اوزوم باغلاريميزي و اِولرئمئزي گئروو قويوروق کي، تاخيل تاپاق."
4. بله دئيَنلر ده وار ائدي: "پادشاهين زَمئلرئمئزه و اوزوم باغلاريميزا قويدوغو خراجي ورمک اوچون پول بورج آلميشيق.
5. ائندي بئزئمله هموطنلرئمئز هَمن نسئلدئر، اوشاقلاريميز دا اونلارينکي‌ کئمي‌دئر. لاکئن باخ، بئز مجبوروق کي، اوغوللاريميزي و قيزلاريميزي قول کئمي ساتاق. آرتيق قيزلاريميزدان بعضئلري بله ساتيليب. بئز چاره‌سئزئک، چونکي زَمئلرئمئز و اوزوم باغلاريميز آيريلارين اَلئنده‌دئر."
6. من اونلارين شئکايت و بو ائتّئهاملاريني اشئدنده چوخ قضبلَندئم.
7. جئدّي دوشوندوکدن سونرا اعيانلارلا حؤکومت مأمورلاريني تنبه ادئب بله ددئم: "قارداشلارينيزدان سَلَم پولو آليرسينيز." اونلارين ضئدّئنه بؤيوک بئر ييغين ييغديم.
8. من اونلارا ددئم: "بئز ياد اِللي‌لره قول ساتيلان يهودي قارداشلارينيزي گوجوموز چاتانا قدر ساتين آلميشيق. ائندي سئز قارداشلارينيزي ساتيرسينيز کي، اونلاري تزه‌دن بئزه ساتسينلار؟" اونلار دِمَيه بئر سؤز تاپماييب ساکئت قالديلار.
9. گئنه ددئم: "اتدئيئنئز بو ائش ياخشي ديئل. مگر سئز دوشمنلرئمئز اولان ياداِللي مئلّتلرئن دانلاغيندان تاريميزين حؤرمتئنده ياشامالي ديئلسئنئز؟
10. من ده قارداشلاريم و نؤکرلرئمله بئرلئکده اونلارا پول و تاخيل بورج ورئرم. گلئن بو سَلَمچئلئيي دايانديراق.
11. خاهئش ادئرم اله ائندي بو گون اونلارا زمئلرئني، اوزوم باغلاريني، زيتونلوقلاريني، اِولرئني، اونلاردان آلديغينيز پولون، تاخيلين، تزه شرابين و ياغين يوزده-بئر سَلَمئني گری قايتاراسينيز."
12. اونلار ددئلر: "بئز بونلاري قايتاراريق و داها اونلاردان هچ بئر شي طَلَب اتمه‌رئک. سن نجه ديئرسن، بئز ده اِله اده‌رئک." من کاهئنلري چاغيرديم و بو سؤزه عمل اده‌جکلري باره‌ده اونلارا آند ائچدئردئم.
13. سونرا اَته‌يئمي سئلکَله‌يئب ددئم: "قوي بو سؤزه عمل اتمه‌يَن هر کسي تاري اِوئندن، مال-مولکوندن بلجه سئلکَله‌سئن و او، سئکَله‌نئب بوشا چيخسين." بوتون جاماعات ددي: "آمئن!" و ربّه حمد اتدئلر. سونرا جاماعات بو سؤزه موطابئق عمل اتدئلر.
14. بوندان علاوه پادشاه اَرتَخشَستانين حؤکمدارليغينين ائيئرمئنجي ائلئندن اوتوز ائکئنجي ائلئنه قدر، يهودا تورپاغينا والي تعيئن ادئلدئيئم گوندن بَري، اون ائکي ائل من و هموطنلرئم والئلره تعيئن اولونموش آذوقه‌ني يِمه‌دئک.
15. آمّا مندن اَوّلکي والئلر خالقين اوستونده يوک اولموشدولار. اونلاردان يمک و شرابدان علاوه قيرخ شِکِل گوموش آليرديلار. حتّا او والئلرئن نؤکرلري ده خالقا آغاليق ادئردئلر. لاکئن من تاري قورخوسونا گؤره بله اتمئردئم.
16. من اؤزومو بو دووارين برپاسينا وقف اتدئم. بئز بئر زمي بِله، آلماديق. بوتون نؤکرلرئم اورايا، ائش باشينا ييغيلميشديلار.
17. اطراف مئلّتلردن يانيميزا گلنلردن علاوه، يهودئلردن و مأمورلاردان دا يوز اَلّي آدام سوفره‌مده اوتورارديلار.
18. هر گون منئم اوچون بئر اؤکوز، آلتي سچمه قويون و تويوقلار کَسئلردي. اون گوندن بئر جوربه‌جور شراب بوللوقلا گتئرئلردي. لاکئن گئنه ده من والئلره تعيئن اولونموش آذوقه‌ني طلب اتمئردئم، اونسوز دا خالقين يوکو آغير ائدي.
19. ای تاريم، بو خالق اوچون اتدئيئم ائشلره گؤره منی ياخشيليقلا خاطيرلا!

Zəbur 89:1-4
1. ربّئن محبّتئني همئشه اوخوياجاغام؛ آغزيملا سنئن وفادارليغيني بوتون نسئل‌لره بئلدئره‌جيم.
2. اعلان ادئرم کي، سنئن محبّتئن ابده کئمي قالير. گؤيلرده وفادارليغيني مؤحکم ادئرسن.
3. ددئن: "سچدئيئم آداملا عهد باغلاميشام، قولوم داوودا آند ائچمئشم:
4. سنئن نسلئني ابده کئمي دوردوراجاغام، تختئني بوتون نسئل‌لر اوچون قوراجاغام." سِلا

Süleymanın Məsəlləri 21:21-27
21. صالحلئک و صداقت دالينجا گدن، حيات، صالحلئک و عئزّت تاپار.
22. حئکمتلي بئر آدام ائگئدلرئن شهري اوستونه چيخار، شهرئن اعتئماد اتدئيي قالاسيني يره ييخار.
23. آغزيني، دئلئني قورويان آدام جانيني دارليقلاردان قورويار.
24. مغرور و تکبّورلو آدام؛ اونون آدي "رئشخند ادن" دئر. او لاپ چوخ تکبّورله رفتار ادر.
25. تنبلئن آرزوسو اونو اؤلدورَر، چونکي اللري ائشله‌مک ائسته‌مز.
26. او، بوتون گون طاماحلا آرزولايار، آمّا صالح آدام ورر و اسئرگه‌مز.
27. پئس آداملارين قورباني مکروهدور؛ گؤر پئس نئيّتله تقدئم اتسه، نه قدر آرتيق!

Həvarilərin İşləri 26:1-32
1. اَغرئپا پولوسا ددي: "اؤزون حاقّيندا دانيشماغا ائجازن وار." او زامان پولوس اَلئني اوزاديب مودافئعه​سئني باشلادي:
2. "اغرئپا پادشاه! من اوچون بئر سعادتدئر کي، يهودئلر طرفئندن وورولدوغوم بوتون ائتّئهاملارا گؤره بو گون سنئن حوضوروندا اؤزومدن دئفاع ادئرم.
3. عَلَلخوصوص کي، سن اؤزون يهودئلرئن بوتون آيئنلر و موباحئثه​لرئني بئلئرسن. بونا گؤره ده خاهئش ادئرم کي، منه صبئرله قولاق آساسان.
4. بوتون يهودئلر بئلئرلر کي، نجه من جاوانليغيمدان عؤمرومو خالقيمين ائچئنده و اورشلئمده کچئرتمئشم.
5. مني اوّلدن اوزون بئر مودّت تانيديقلارينا گؤره، اگر ائسته‌سه​لر، شهادت وره بئلرلر کي، دئنئمئزئن لاپ جئدّي فئرقه​سي اولان فرئسي فئرقه​سئنه باغلي ياشاميشام.
6. و ائندي تاري طرفئندن آتالاريميزا ورئلمئش وعده اومئدي اوچون موحاکئمه​يه چکئلمئشم.
7. او وعده کي، بئزئم اون‌ائکي قبئله​مئز، گجه-گوندوز تارييا صداقتله خئدمت اده​رک يرئنه يتئشمه‌سئني گؤزله‌يئرلر. و بو اومئد اوچون اي پادشاه، يهودئلر طرفئندن موتّهئم اولموشام.
8. نه اوچون سئز تارينين اؤلولري دئرئلتمه‌سئني ائنانيلماز بئر شي حساب ادئرسئنئز؟
9. دوغروسو، من اؤزوم ده گومان ادئردئم کي، ناصئره​لي عئسانين آدينا گرک چوخ عداوتلي ائشلر گؤروم.
10. اله اورشلئمده ده بونو ادئردئم. باش کاهئنلردن ائختئيار آليب موقدّسلردن چوخلاريني زئندانلارا سالديم، اونلارين اؤلومه ورئلمه‌سئنه ده راضي ائدئم.
11. بوتون کنئسه​لرده اونلاري جزالانديريب چاليشديم کي، کوفر دمه‌يه مجبور ادئم. اونلارين ضئدّئنه حددن آرتيق قودوروب، حتّا ياد شهرلرده بله اونلاري تعقئب ادئردئم.
12. بو خوصوصدا باش کاهئنلرئن ائختئيار و فرماني ائله دمشقه گدئردئم.
13. گون اورتا واختي، اي پادشاه، يول اوستونده گونون ائشيغيندان داها پارلاق بئر ائشيق منئم و منئمله سفره چيخانلارين اطرافينا ساچدي.
14. بئز هاميميز يره ييخيلديق و بئر سس اشئتدئم کي، عئبراني دئلئنده منه ديئر: «شاعول! شاعول! نه اوچون منه عذاب ورئرسن؟! ميخلارا تپئک وورماق سنه چتئندئر.»
15. ددئم: «سن کئمسن، يارب؟» رب ده ددي: «من عذاب وردئيئن عئسايام!
16. لاکئن قالخ، آياغا دور. چونکي بو مقصد اوچون سنه ظاهئر اولموشام کي، سن هم گؤردويون هم ده سنه ظاهئر اده​جه‌يئم شيلرئن خئدمتچي و شاهئدي اولاسان؛
17. سني يهودي خالقيندان و قيري‌يهودئلردن خئلاص اده​رک، ائندي اونلارين يانينا گؤنده‌رئرم کي،
18. گؤزلرئني آچاسان و اونلار قارانليقدان ائشيغا و شيطانين حاکئمئيّتئندن تارييا طرف دؤنه​لر و گوناهلارين باغيشلانماسينا و منه اولان ائمانلا تقدئس ادئلنلر آراسيندا مئراثا نايئل اولالار.»
19. بونا گؤره، اي پادشاه اَغرئپا، گؤيدن گلن رؤيايا ناموطئع اولماديم،
20. آمّا اوّلجه دمشقده اولانلارا، اورشلئمده​کئلره، سونرا بوتون يهودئيه دئياريندا ياشايانلارا، و حتّا قيري‌يهودئلره ده اعلان اتدئم کي، تؤوبه ادئب تارييا طرف دؤنسونلر و تؤوبه‌يه لايئق ائشلر گؤرسونلر.
21. بونلاردان اؤتري يهودئلر مني معبدده توتوب اؤلدورمه‌يه چاليشديلار.
22. لاکئن تاريدان گلن کؤمکله بو گونه قدر قاليب هم کئچئيه، هم ده بؤيوکه شهادت ورئرم و هچ بئر شي دمئرم مگر بو کي، پيغمبرلر و موسانين بويوردوقلاري يرئنه يتئشئر؛
23. بو کي، مسئحئن عذاب چکمه‌سي واجئب ائدي و اؤلولردن ائلک دئرئلن اولدوغو اوچون ائشيغي، هم يهودي خالقينا هم ده قيري‌يهودئلره اعلان اده​جک."
24. پولوس اؤز دئفاعسيندا حله بو سؤزو ديئردي کي، فِستوس اوجا سَسله ددي: "پولوس، عاغيلين باشيندان چيخيب! علمئنئن چوخلوغو سني دلئيه دؤنده‌رئر."
25. آمّا پولوس ددي: "عالئجناب فِستوس، عاغيليم باشيمدان چيخماييب، آنجاق حقئقت و عاغيلا سيغان سؤزلري ديئرم.
26. چونکي پادشاهين دا بو شيلردن خبري وار و يقئنلئکله اونا خئطاب ادئرم. آرخايينام کي، بونلارين هچ بئري اونون نظرئندن قاچماز، چونکي بو ائش خلوت بئر گوشه​ده باش ورمه‌يئب.
27. پادشاه اغرئپا، آيا سن پيغمبرلره ائنانيرسان؟ بئلئرم کي، ائنانيرسان."
28. اغرئپا پولوسا جاواب وردي: "آز بئر زاماندا مني مسئحي اولماغا بله قانع اده​جکسن."
29. پولوس دا اونا ددي: "آز يا چوخ، تاريدان ائستردئم کي، آنجاق سن يوخ، بو گون مني اشئدنلرئن هاميسي، منئم کئمي اولسايديلار، بو زنجئرلردن باشقا."
30. پادشاه قالخدي. والي، برنئکي و اونلارلا اوتورانلار دا قالخديلار.
31. و بئر يانا چکئلدئکلري زامان، بئربئرلری ائله دانيشيب ديئردئلر: "بو آدام اؤلومه، و يا حبسه لايئق بئر ائش گؤرمور."
32. و اَغرئپا فِستوسا ددي: "بو آدام اگر قيصرئن محکمه​سئني طلب اتمه‌سيدي، آزاد اولا بئله‌ردي."