A A A A A

Bir il Bibliya


Iyun 7


2 Padşahlar 1:1-18
1. اَخابين اؤلوموندن سونرا موآب ائسرايئلئن ضئدّئنه عوصيان قالديردي.
2. پادشاه اَخَزيا سامئره‌ده‌کي سارايينين بالاخاناداکي موشَبّک پنجره‌‌سئندن ييخيليب ناخوشلادي. او، قاصئدلر دالينجا گؤندرئب اونلارا ددي: "گدئن، عِقرون آللاهي بَعَلزِبوبدان سوروشون، آيا بو ناخوشلوقدان صاغالاجاغام؟"
3. لاکئن ربّئن مَله‌يي تئشبِلي ائليايا ددي: "قالخ سامئره پادشاهينين قاصئدلرئنئن پئشوازينا چيخ و اونلارا دِه: «ائسرايئلده تاري يوخدور کي، عِقرون آللاهي بَعَلزِبوبدان سوروشماغا گِدئرسئنئز؟»
4. بونا گؤره ده رب بله ديئر: «اوستونده اوزانديغين ياتاقدان قالخا بئلميه‌جکسن، قطعن اؤله‌جکسن!»" سونرا ائليا گتدي.
5. قاصئدلر پادشاهين يانينا قاييتديقدا، پادشاه اونلارا ددي: "نئيه گری قاييتدينيز؟"
6. اونا ددئلر: "بئر آدام بئزئمله راستلاشدي و بئزه ددي: «سئزي گؤندرَن پادشاهين يانينا قاييديب اونا ديئن کي، رب بله ديئر: ‹ائسرايئلده تاري يوخدور کي، عِقرون آللاهي بَعَلزِبوبدان سوروشماق اوچون قاصئدلر گؤندردئن؟› بونا گؤره ده اوستونده اوزانديغين ياتاقدان قالخا بئلميه‌جکسن، قطعن اؤله‌جکسن!»"
7. پادشاه اونلاردان سوروشدو: "سئزئنله راستلاشان و سئزه بو سؤزلري دئيَن آدام نه قئيافه‌ده ائدي؟"
8. اونا ددئلر: "اَينئنده توکلو بئر پالتار اولان آدام ائدي، بِلئنه ده دَري قورشاق باغلاميشدي." پادشاه ددي: "او، تئشبِلي ائليادير."
9. پادشاه بئر اَلّي‌باشي ائله اَلّي آداميني ائليانين يانينا گؤندردي. اَلّي‌باشي اونون يانينا گلدي. ائليا تپه‌نئن باشيندا اوتورموشدو. اَلّي‌باشي اونا ددي: "ای تاري آدامي، پادشاه ديئر «آشاغي دوش.»"
10. ائليا اَلّي‌باشي‌يا جاواب ورئب ددي: "اگر من تاري آدامي‌يام، گؤيدن اود ياغسين، سني و اَلّي آداميني تَلَف اتسئن!" او واخت گؤيدن اود ياغدي، اَلّي‌باشي ائله اَلّي آداميني تلف اتدي.
11. پادشاه باشقا بئر اَلّي‌باشي ائله اَلّي آداميني اونون يانينا گؤندردي. اَلّي‌باشي اونا ددي: "ای تاري آدامي، پادشاه بله ديئر: «تِز آشاغي دوش.»"
12. ائليا اونلارا جاواب ورئب ددي: "اگر من تاري آدامي‌يام، گؤيدن اود ياغسين، سني و اَلّي آداميني تلف اتسئن!" او واخت گؤيدن تارينين اودو ياغدي، اَلّي‌باشي ائله اَلّي آداميني تلف اتدي.
13. پادشاه گئنه اوچونجو بئر اَلّي‌باشي ائله اَلّي آداميني گؤندردي. اوچونجو اَلّي‌باشي گلئب چاتديقدا، ائليانين قاباغيندا دئزه دوشدو و اونا يالواريب ددي: "ای تاري آدامي، خاهئش ادئرم، منئم و بو اَلّي قولونون جانينا يازيغين گلسئن.
14. باخ، گؤيدن اود ياغيب اوّل گلن ائکي اَلّي‌باشيني و اونلارين هَره‌سئنئن اَلّي آداميني تلف اتدي. ائندي منئم جانيما يازيغين گلسئن."
15. او واخت ربّئن مَله‌يي ائليايا ددي: "اونونلا بئرلئکده آشاغي دوش، اوندان قورخما." ائليا قالخيب آشاغي دوشدو و اَلّي‌باشي ائله بئرلئکده پادشاهين يانينا گلدي.
16. اونا ددي: "رب بله ديئر: «ائسرايئلده سؤزونو سوروشماغا تاري يوخدور کي، عِقرون آللاهي بَعَلزِبوبدان سوروشماق اوچون قاصئدلر گؤندردئن؟ بونا گؤره ده اوستونده اوزانديغين ياتاقدان قالخا بئلميه‌جکسن، قطعن اؤله‌جکسن!»"
17. بلجه اَخَزيا ائليانين ددئيي ربّئن سؤزونه گؤره اؤلدو. اوغلو اولماديغي اوچون يرئنه قارداشي يورام پادشاه اولدو. بو دا يهودا پادشاهي يِهوشافاط اوغلو يِهورامين پادشاهليغينين ائکئنجي ائلئنده اولدو.
18. اَخَزيانين اتدئيي قالان ائشلري مگر ائسرايئل پادشاهلارينين سالنامه‌لر کئتابيندا يازيلماييبدير؟

2 Padşahlar 2:1-25
1. ائليا، اِلئشَعله گئلگالدان گتدي. بو او زامان باش وردی کي، رب ائلياني عنقرئب فيرلانان يِل‌له گؤيه آپاراجاق ائدي.
2. او واخت ائليا اِلئشَعه ددي: "خاهئش ادئرم بورادا قال، چونکي رب منی بِيت ائله گؤندرئر." اِلئشَع ددي: "وار اولان ربّه و سنئن جانينا آند اولسون کي، سندن اَل چکمه‌رم.» اونلار بِيت ائله گتدئلر.
3. بِيت ائلده اولان پيغمبرلر اؤولادلاري اِلئشَعئن يانينا گلئب اوندان سوروشدولار: "آيا بئلئرسن رب بو گون آغاني سنئن باشين اوستوندن گؤتوره‌جک؟" اِلئشَع ددي: "بلی، بئلئرم، ساکئت اولون."
4. ائليا اونا ددي: "اِلئشَع، خاهئش ادئرم بورادا قال، چونکي رب منی اَرئحايا گؤندرئر." آمّا اِلئشَع ددي: «وار اولان ربّه و سنئن جانينا آند اولسون کي، سندن اَل چکمه‌رم." اونلار اَرئحايا گلدئلر.
5. اَرئحادا اولان پيغمبرلر اؤولادلاري اِلئشَعئن يانينا گلئب اوندان سوروشدولار: "آيا بئلئرسن رب بو گون آغاني سنئن باشين اوستوندن گؤتوره‌جک؟" اِلئشَع جاواب وردی: "بلی، بئلئرم، ساکئت اولون!"
6. او واخت ائليا اونا ددي: "خاهئش ادئرم بورادا قال، چونکي رب منی اوردون چايينين يانينا گؤندرئر." اِلئشَع ددي: "وار اولان ربّه و سنئن جانينا آند اولسون کي، سندن اَل چکمه‌رم." اونلار گتدئلر.
7. پيغمبرلر اؤولادلاريندان اَلّي آدام گدئب اوزاقدا اونلارين موقابئلئنده داياندي. اونلار دا اوردون چايينين يانيندا دايانديلار.
8. ائليا جوبّه‌سئني گؤتوردو و اونو بوکوب سويا ووردو. سو ائکي يره آيريلدي و اونلار قورو يرئن اوستوندن کچدئلر.
9. اونلار کچندن سونرا ائليا اِلئشَعدن سوروشدو: "من سنئن يانيندان گؤتورولمه‌دن، مندن بئر شي ائسته؛ سنئن اوچون نه اِدئم؟" اِلئشَع ددي: "لوطفن سنده اولان روح، ائکي قات مَنده اولسون."
10. ائليا ددي: "سن چتئن بئر شي ائسته‌دئن. اگر سنئن يانيندان گؤتورولدويومو گؤره‌سن، سنئنله بله اولاجاق، يوخسا بو اولماياجاق."
11. اونلار دانيشا- دانيشا گِدَرکَن قفلتن اودلو بئر عارابا و اودلو آتلار گؤروندولر و اونلاري بئر-بئرئندن آييرديلار. ائليا فيرلانان يِل‌له گؤيه قالديريلدي.
12. اِلئشَع بونو گؤروب قيشقيردي: "آتام، ای آتام! ائسرايئلئن عاراباسي و آتلي‌لاري!" و ائلياني داها گؤرمه‌دي. او واخت اؤز پالتارلاريني گؤتوردو و اونلاري جيريب ائکي يره بؤلدو.
13. سونرا ائليانين اَينئندن دوشَن جوبّه‌ني گؤتوروب گری دؤندو و اوردون چايينين قيراغيندا داياندي.
14. ائليانين اَينئندن دوشَن جوبّه‌ني گؤتوروب سويا ووردو و ددي: "ائليانين تاريسي رب هارادادير؟" او دا جوبّه‌ني سويا ووراندا، سو ائکي يره آيريلدي. اِلئشَع اورادان کِچدي.
15. اَرئحادا اولان پيغمبرلر اؤولادلاري اونو اوزاقدان گؤروب ددئلر: "ائليانين روحو اِلئشَعئن اوستونده‌دئر." اونلار اِلئشَعئن پئشوازينا گلدئلر و اونون قاباغيندا يره قدر تعظئم اتدئلر.
16. اونا ددئلر: "باخ، بو قوللارينين يانيندا اَلّي ائگئد وار، لوطفن قوي گدئب آغاني آختارسينلار. بلکه ربّئن روحو اونو قالديريب داغلارين، يا دا دره‌لرئن بئرئنه آتيبدير؟" اِلئشَع ددي: "گؤندرمه‌يئن."
17. آمّا اونلار او قدر عئناد اتدئلر کي، اِلئشَع اوتانيب ددي: "گؤندرئن." اَلّي نفر گؤندردئلر و اونلار اوچ گون آختارديلار، آنجاق ائلياني تاپا بئلمه‌دئلر.
18. سونرا اِلئشَعئن يانينا کي، اَرئحادا قالميشدي، قاييتديلار. اِلئشَع اونلارا ددي: "من سئزه دِمه‌دئم کي، گتمه‌يئن؟"
19. شهرئن آداملاري اِلئشَعه ددئلر: "آغامين گؤردويو کئمي بو شهرئن يري ياخشي‌دير، آنجاق سويو پئسدئر، تورپاغي ثمر ورمئر."
20. او ددي: "منه تزه بئر قاب گتئرئن و اونون ائچئنه دوز قويون." بونو اونا گتئردئلر.
21. او، بولاغا چيخدي، دوزو اورايا آتيب ددي: "رب بله ديئر: «بو سولاري تمئز اتمئشم، آرتيق اوندا اؤلوم و ثمرسئزلئک اولماياجاق.»"
22. اِلئشَعئن ددئيي سؤزه گؤره بو سو بو گونه قدر ده تمئز قالير.
23. اِلئشَع اورادان بِيت ائله قالخدي. او يولا دوشَنده کئچئک اوغلانلار شهردن چيخديلار و اونو لاغا قويوب ددئلر: "گؤيه قالخ، کِچَل، گؤيه قالخ، کِچَل!"
24. او آرخايا دؤنوب اوغلانلاري گؤردو و اونلاري ربّئن آدي ائله لعنتله‌دي. مِشه‌دن ائکي دئشي آيي چيخيب اونلاردان قيرخ ائکي نفري پارچالادي.
25. اِلئشَع اورادان کَرمِل داغينا گتدي، اورادان دا سامئره‌يه قاييتدي.

Zəbur 71:9-16
9. قوجاليغيمدا مني اؤزوندن آتما، قووّتئم کسئلدئيي زامان مني بوراخما.
10. چونکي دوشمنلرئم ضئدّئمه دانيشيرلار؛ جانيمي گودَنلر بئربئرلري ائله مصلحتله‌شئرلر.
11. ديئرلر: "تاري اونو بوراخيب؛ اونو قووالاييب توتون، چونکي اونو خئلاص ادن يوخدور."
12. مندن اوزاق دورما، اي تاري؛ ائمداديما تز گل، تاريم!
13. قوي جانيمين قصدئنه دورانلار اوتانيب محو اولسونلار، قوي ضررئمي آختارانلار روسوايليق و رذالتله اؤرتولسونلر.
14. آمّا من، دائم اومئد باغلاييب سنه داها چوخ حمد اده‌جيم،
15. آغزيم بوتون گون سنئن صالحلئيئني، سنئن نئجاتيني نئدا اده‌جک، گرچي اونلارين حدّئني بئلمئرم.
16. اي پروردئگاريم ربّ، سنئن قووّتئنده گله‌جيم؛ سنئن، آنجاق سنئن صالحلئيئني نئدا اده‌جيم.

Süleymanın Məsəlləri 18:6-8
6. آخماغين دئلي موناقئشه‌يه گئرئشر، آغزي دؤيولمه‌يي دعوت ادر.
7. آخماق آدامين آغزي اونو ييخار، دوداقلاري جانينا تله‌دئر.
8. قيبتچي آدامين سؤزلري شئرئن تئکه‌لر کئمی‌دئر کی،، قارنين لاپ درئن يرلرئنه اِنَر.

Yəhya 16:1-33
1. بو سؤزلري اوندان اؤتري سئزه ددئم کي، ائمانينيز سوستلَشمه‌سئن.
2. سئزي کنئسه​لردن قوواجاقلار. بلي، اله واخت گلر کي، سئزي اؤلدورَن هر کس تارييا خئدمت اتدئيئني گومان اِدَر.
3. و بو ائشلري اِدَرلر، چونکي نه آتاني تاني‌ييرلار نه ده مني.
4. آمّا بو شيلري سئزه ددئم کي، همئن واخت گلنده، بونلاري سئزه ددئيئمي خاطيرلاياسينيز. بو شيلري باشلانيشدان سئزه دمه‌دئم، چونکي سئزئنله ائدئم.
5. آمّا ائندي مني گؤنده‌ره‌نئن يانينا گدئرم، و سئزدن هچ بئرئنئز مندن سوروشمور؛ «سن هارايا گدئرسن؟»
6. لاکئن بو شيلري سئزه ددئيئم اوچون اوره‌يئنئز قمله دولوب.
7. آمّا حقئقتي سئزه ديئرم؛ منئم گتمه‌يئم سئزئن اوچون خيئرلي​دئر. چونکي گتمه‌سم، تسلّي ورن سئزئن يانينيزا گلمز. آمّا اگر گِتسَم، اونو سئزئن يانينيزا گؤنده‌ره​رَم.
8. او، گلدئيي زامان، دونيانين آداملارينا گوناهين نه اولدوغونو، صالحلئيئن نه اولدوغونو، و تارينين موحاکئمه​سئنئن نه اولدوغونو بئلدئره‌جک.
9. اونلارين گوناهيني گؤرسده​جک کي، منه ائمان گتئرمئرلر.
10. حقئقي صالحلئيي اونلارا آشکار اده​جک، چونکي آتانين يانينا ​گدئرم و آرتيق مني گؤرمه‌يه​جکسئنئز.
11. و تارينين موحاکئمه​سئنئن نه اولدوغونو دا اونلارا گؤرسده​جک، چونکي بو دونيايا حؤکمدارليق ادن روح محکوم اولونوب.
12. سئزه دمه‌لي چوخ سؤزلرئم وار، آمّا ائندي اونلاري درک اده​بئلمزسئنئز.
13. لاکئن او، يعني حقئقت روحو گلنده، سئزي بوتون حقئقته هئدايت اده​جک. چونکي اؤزوندن هچ بئر شي دمه‌يه​جک. نه اشئدئر، اونلاري دئيه​جک و گله​جکده اولاجاقلاري سئزه خبر وره​جک.
14. او منه عئزّت وره​جک، چونکي منئم اولانلاردان آليب سئزه بئلدئره​جک.
15. آتانين هر شيي وار، منئمدئر. اونون اوچون ده ددئم کي، منئم اولانلاردان آليب سئزه بئلدئره​جک.
16. آز بئر زاماندان سونرا مني آرتيق گؤرمه‌يه​جکسئنئز و آز بئر زاماندان سونرا مني گئنه گؤره​جکسئنئز."
17. شاگئردلردن بعضئلري بئربئرلرئنه ددئلر: "«آز بئر زاماندان سونرا مني آرتيق گؤرمه‌يه​جکسئنئز و آز بئر زاماندان سونرا مني گئنه گؤره​جکسئنئز» و «چونکي آتانين يانينا گدئرم» سؤزدن نه نئيّتي وار؟"
18. اونا گؤره ده ديئردئلر: "«آز بئر زامان» دمکدن مقصدي نه‌دئر؟ اونون ددئيئني آنلاميريق."
19. عئسا اونلارين سوروشماق ائسته‌دئکلرئني آنلاييب اونلارا ددي: "«آز بئر زاماندان سونرا مني آرتيق گؤرمه‌يه​جکسئنئز» و «آز بئر زاماندان سونرا مني گئنه گؤره​جکسئنئز» ددئيئم اوچون بئربئرلرئنئزدن سوروشورسونوز؟
20. دوغروسونو سئزه ديئرم؛ سئز آغلاييب اَلَم چکه​جکسئنئز و دونيا شادليق اده​جک. سئز ماتم توتاجاقسينيز، آمّا سئزئن ماتمئنئز شادليغا دؤنه​جکدئر.
21. آرواد، اوشاغينين دوغوم واختي يتئشن زامان، آغري چکر، آمّا اوشاغيني دوغاندان سونرا، بئر ائنسان بو دونيايا گتئرمه‌سئنه گؤره، شادليغيندان آغري ياديندان چيخار.
22. ائندي سئز ده دوغرودان قوصّه​له‌نئرسئنئز، آمّا سئزي گئنه گؤره​جه‌يم و اوره‌يئنئز سوئنه​جک و هچ کئم سئزئن شادليغينيزي سئزدن آلماياجاق.
23. و او گون مندن هچ بئر شي سوروشماياجاقسينيز. دوغروسونو سئزه ديئرم؛ آتادان هر نه ائستيه​سئنئز، منئم آديمدا سئزه وره​جک.
24. ائندئيه کئمي منئم آديمدا هچ بئر شي ائستَمه‌يئبسئنئز. ائسته‌يئن و آلاجاقسينيز کي، شادليغينيز کامئل اولسون.
25. بو شيلري مثللر​له سئزه دمئشم. او ساعات گلئر کي، آرتيق سئزه مثللر​له دانيشماياجاغام. آتا حاقّيندا سئزئنله آچيقجا دانيشاجاغام.
26. او گون منئم آديمدا ائسته‌يه​جکسئنئز و دمئرم کي، سئزدن اؤتري آتادان خاهئش اده​جه‌يم.
27. چونکي آتا اؤزو سئزي سوئر، اونا گؤره کي، مني سوئبسئنئز و اونون يانيندان گلدئيئمه ائنانيبسينيز.
28. من آتانين يانيندان چيخيب بو دونيايا گلمئشم. دونياني ترک ادئب گئنه آتانين يانينا گدئرم."
29. شاگئردلري ددئلر: "آها! ائندي آچيقجا دانيشيرسان و هچ بئر مثلدن ائستئفاده اتمئرسن.
30. ائندي سنئن هر شيي بئلدئيئني آنلاييريق و احتئياجين يوخدور کي، کئمسه سندن سوآل سوروشسون. بوندان ائنانيريق کي، تارينين يانيندان چيخيب گلئبسن."
31. عئسا اونلارا ددي: "ائندي ائنانيرسينيز؟!
32. او ساعات گلئر و گلئبدئر ده کي، هر بئرئنئز اؤز طرفئنئزه داغيلاجاقسينيز و مني تک‌-‌​تنها بوراخاجاقسينيز. آمّا من تک ديئلم، چونکي آتا دا منئمله‌دئر.
33. بو شيلري سئزه ددئم کي، منده باريشينيز اولسون. بو دونيادا زحمت آلتينداسينيز، لاکئن جسور اولون! من دونيايا قالئب گلمئشم."