A A A A A

Bir il Bibliya


Iyun 2


1 Padşahlar 13:1-34
1. يَروبعام بوخور يانديرماق اوچون قوربانگاهين يانيندا دورارکَن، بئر تاري آدامي ربّئن سؤزو ائله يهودادان بِيت ائله گلئب،
2. ربّئن سؤزو ائله قوربانگاهين ضئدّئنه فرياد ادئب ددي: "قوربانگاه، ای قوربانگاه! رب بله ديئر: «باخ، داوودون نسلئنده بئر اوغلان اوشاغي دوغولاجاق، اونون آدي يوشئيا اولاجاق. او سنئن اوستونده، بوخور يانديران پرستئشگاهلارين کاهئنلرئني قوربان اده‌جک و سنئن اوستونده ائنسان سوموکلري يانديراجاق.»"
3. تاري آدامي همئن گون بئر علامت ورئب ددي: "ربّئن ددئيي علامت بودور: «باخ، بو قوربانگاه آرادان بؤلونه‌جک و اوستونده‌کي کول تؤکوله‌جکدئر.»"
4. يَروبعام پادشاه تاري آدامينين بِيت ائلده قوربانگاهين ضئدّئنه ددئيي سؤزو اشئدنده، قوربانگاهين اوستوندن اَلئني اوزاديب ددي: "اونو توتون." لاکئن تاري آدامينين ضئدّئنه اوزاتديغي اَلي قورودو و اَلئني اؤزونه طرف دؤندره بئلمه‌دي.
5. قوربانگاه دا آرادان ائکي بؤلوندو و کول قوربانگاهدان تؤکولدو، اِله او علامته موطابئق کي، تاري آدامي ربّئن سؤزو ائله ورمئشدي.
6. پادشاه تاري آدامينا ددي: "خاهئش ادئرم رب تارينا يالوار و منئم اوچون دوعا ات کي، اَلئم اؤزومه طرف دؤنسون." تاري آدامي ربّه يالواردي و پادشاهين اَلي اؤزونه طرف دؤنوب اَوّلکي کئمي اولدو.
7. پادشاه تاري آدامينا ددي: "منئمله بئرلئکده اِوه گل و بئر آز دئنجَل. من ده سنه هدئيّه وره‌‌‌رم."
8. آمّا تاري آدامي پادشاها ددي: "سن منه اِوئنئن ياريسيني دا وره‌سن، سنئنله گتمه‌رم، بو يرده چؤرک يِيئب سو دا ائچمه‌رم.
9. چونکي ربّئن سؤزو ائله منه بله امر گلدي: «اورادا نه چؤرک يِه، نه ده سو ائچ. گتدئيئن يوللا دا گری قاييتما.»"
10. بلجه تاري آدامي آيري يوللا گتدي و بِيت ائله گلدئيي يوللا گری قاييتمادي.
11. بِيت ائلده قوجا بئر پيغمبر ياشاييردي. اونون اوغوللاريندان بئري گلئب تاري آدامينين همئن گون بِيت ائلده اتدئيي بوتون ائشلر باره‌ده اونا خبر وردی. اوغوللاري اونون پادشاها ددئيي سؤزلري ده آتالارينا بئلدئردئلر.
12. آتالاري اونلارا ددي: "او هانسي يوللا گتدي؟" اوغوللاري يهودادان گلن تاري آدامينين هانسي يوللا گتدئيئني گؤرموشدولر.
13. آتا، اوغوللارينا ددي: "منئم اوچون اِششه‌يي پالانلايين." اِششه‌يي اونون اوچون پالانلاديلار و او، اِششه‌يئن اوستونه مئنئب
14. تاري آدامينين دالينجا گتدي. اونو چؤل پوسته‌سي آغاجينين آلتيندا اوتورموش حالدا تاپدي و اوندان سوروشدو: "آيا يهودادان گلن تاري آدامي سنسن؟" او دا جاواب وردی: "منم."
15. او واخت قوجا پيغمبر اونا ددي: "منئمله اِوئمه گل و چؤرک يه."
16. او ددي: "سنئنله قاييدا بئلمه‌رم، گده ده بئلمه‌رم، سنئنله بو يرده چؤرک يِيئب سو دا ائچه بئلمه‌رم.
17. چونکي ربّئن سؤزو ائله منه بله امر ادئلدي: «اورادا نه چؤرک يِه، نه سو ائچ. گتدئيئن يوللا دا گری قاييتما.»"
18. قوجا پيغمبر اونا ددي: "من ده سنئن کئمي بئر پيغمبرم. بئر مَلَک ربّئن سؤزو ائله منه ددي: «اونو اؤزونله اِوئنه گری گتئر کي، چؤرک يِيئب سو ائچسئن.»" لاکئن بونو اونا يالاندان ددی.
19. تاري آدامي اونونلا قاييتدي و اونون اِوئنده چؤرک يِيئب سو ائچدي.
20. اونلار سوفره باشيندا اوتورارکَن، اونو يولدان قايتاران پيغمبره ربّئن سؤزو نازئل اولدو.
21. او، يهودادان گلن تاري آداميني خئطاب ادئب ددي: "رب بله ديئر: «ائندي کي، ربّئن امرئنه ناموطئع اولوب تارين ربّئن سنه اتدئيي امرئنه عمل اتمه‌يئبسن،
22. گری قاييديب اونون سنه ‹چؤرک يِيئب سو ائچمه› ددئيي يرده، چؤرک يِيئب سو ائچئبسن، جسدئن آتالارينين قبرئنه گئرميه‌جک.»"
23. تاري آدامي يِيئب ائچدئکدن سونرا، قوجا پيغمبر اونون اوچون يعني گری گتئرمئش پيغمبر اوچون اِششه‌يي پالانلادي.
24. تاري آدامي گتدي، يولدا اونا بئر شئر راست گلدي و اونو اؤلدوردو. اونون جسدي يولا سَرئلمئشدي و اِششَک اونون يانيندا دايانميشدي، شئر ده جسدئن يانيندا دورموشدو.
25. آداملار اورادان کچدئلر و يولا سَرئلمئش جسدي، جسدئن يانيندا دا دورموش شئري گؤردولر و گلئب قوجا پيغمبرئن ياشاديغي شهرده ددئلر.
26. اونو يولدان قايتاران پيغمبر بونو اشئدنده ددي: "او، ربّئن سؤزونه ضئدّ گِدن تاري آدامي‌دير. رب ده اونا ددئيي سؤزه گؤره، اونو شئره وردی و شئر اونو پارچالاييب اؤلدوردو."
27. سونرا اوغوللاري ائله دانيشيب اونلارا ددي: "منئم اوچون اِششه‌يي پالانلايين." اونلار اِششه‌يي پالانلاديلار.
28. او گدئب يولا سَرئلمئش جسدي تاپدي. اِششَک و شئر جسدئن يانيندا دورموشدولار. شئر نه جسدي يِمئشدي، نه ده اِششه‌يي پارچالاميشدي.
29. قوجا پيغمبر تاري آدامينين جسدئني گؤتوروب، اِششه‌يئن اوستونه قويدو و اؤز شهرئنه گری گتئردي کي، اونون اوچون ياس توتوب باسديرسين.
30. اونون جسدئني اؤزونون قبرئنه قويدو و ياس توتوب ديئردئلر: "واي، قارداشيم!"
31. اونو باسديراندان سونرا قوجا پيغمبر اوغوللاري ائله دانيشيب اونلارا ددي: "اؤلَنده منی تاري آدامينين باسديريلديغي قبئرده باسديرين، سوموکلرئمي اونون سوموکلرئنئن يانينا قويون.
32. چونکي ربّئن بِيت ائلده اولان قوربانگاها و سامئره شهرلرئنده اولان پرستئشگاهلارين بوتون معبدلرئنئن ضئدّئنه ديئلمئش سؤزو حتمن يرئنه يِتئشه‌جک."
33. بو ائشدن سونرا دا يَروبعام اؤز پئس يولوندان دؤنمه‌دي. گئنه ده پرستئشگاهلارا خالقين هر طبقه‌سئندن اولان کاهئنلر قويدو. او، پرستئشگاهلارين کاهئني اولماق ائسته‌ين هر کسي تقدئس اتدي.
34. بو ائش يَروبعامين اِو اهلئنه گوناه ساييلدي و ير اوزوندن سئلئنئب آتيلماسينا و محو اولماسينا سبب اولدو.

1 Padşahlar 14:1-31
1. او واخت يَروبعامين اوغلو اَبئيا ناخوشلادي.
2. يَروبعام آروادينا ددي: "قالخ اؤز قئيافه‌ني اله دَيئش کي، سنئن يَروبعامين آروادي اولدوغونو بئلمه‌سئنلر. شئلويا گت. باخ، پيغمبر اَخئيا اورادادير. او منئم بارَمده دمئشدي کي، بو خالقين پادشاهي اولاجاغام.
3. اَلئنه اون کؤمبه چؤرک، کولچه‌لر و بئر کوپه بال گؤتوروب اونون يانينا گت. اوغلانا نه اولاجاغيني او سنه بئلدئره‌جک."
4. يَروبعامين آروادي بله ده اتدي؛ قالخيب شئلويا گتدي و اَخئيانين اِوئنه گلدي. اَخئيا آرتيق گؤره بئلمئردي، قوجالديغي اوچون گؤزلري ضعئفله‌مئشدي.
5. رب اخئيايا دمئشدي: "باخ، يَروبعامين آروادي گلئر کي، سندن اوغلو باره‌ده سوروشسون، چونکي اوغلو ناخوشدور. او گلنده آيري بئر قئيافه‌ده‌ اولاجاق. سن اونا فئلان و بهمان دئيَرسن."
6. آرواد قاپيدان گئرَنده، اَخئيا اونون آياق سَسلرئني اشئدئب ددي: "يَروبعامين آروادي، ائچَري گل! نه اوچون قئيافه‌ني دَيئشئبسن؟ من گؤندرئلمئشم کي، سنه آغير بئر خبر ورئم.
7. گت، يَروبعاما دِه کي، ائسرايئلئن تاريسي رب بله ديئر: «من سني خالقين ائچئندن اوجالديب، خالقيم ائسرايئلئن اوستونده حؤکمران اتدئم.
8. پادشاهليغي داوودون اِوئندن چکئب آلديم و سنه وردئم. آمّا سن قولوم داوود کئمي اولماييبسان. او، امرلرئمه عمل ادئب بوتون اوره‌يي ائله منه پِيرَو اولدو و آنجاق گؤزومده دوز اولاني اتدي.
9. سن ده اؤزوندن قاباق اولانلارين هاميسيندان چوخ پئسلئک ادئبسن. منی قضبلَندئرمَک اوچون گدئب اؤزونه آيري آللاهلار، تؤکمه بوتلر دوزَلدئبسن و منی آرخانا آتيبسان.
10. بونون اوچون من يَروبعامين نسلی اوستونه بلا گتئرئرم. ائسرايئلده يَروبعامين نسلئندن بوتون اِرکَک جئنسئني، ائستر قول اولسون، ائستر آزاد، کَسئب آتاجاغام و اونلاري پِيئن يانديريلان کئمي يانديريب محو اده‌جيم، اله کی، هاميسي يانيب قورتارسين.
11. يَروبعامدان شهرده اؤلَنلري ائتلر، چؤلده اؤلَنلري ده گؤيلرئن قوشلاري يئيه‌جک، چونکي رب بله ديئب.»
12. ائندي سن قالخ و اِوئنه گت. شهره آياقلاريني باسديغين واخت اوغلان اؤله‌جک.
13. بوتون ائسرايئللی‌لر اونون اوچون ياس توتوب اونو باسديراجاقلار. يَروبعام نسلئندن فقط او، قبئره گده‌جک، چونکي يَروبعامين نسلئندن ائسرايئلئن تاريسي رب اوچون، فقط اوندا ياخشي بئر شي تاپيلدي.
14. بوندان علاوه، رب اؤزو اوچون ائسرايئل اوستونده بئر پادشاه قوياجاق، او دا يَروبعامين نسلئني بو گون، حتّا ائندئدن بله کَسئب آتاجاق.
15. رب ائسرايئلي سودا يِللَنَن بئر قاميش کئمي ووراجاق و ائسرايئللی‌لري آتالارينا وردئيي بو ياخشي تورپاقدان چکئب چيخارداجاق، اونلاري فَرات چايينين او طرفئنه سَپَلَيه‌جک، چونکي اؤزلرئنه ائلاهه اَشِرا بوتلري دوزَلدئب ربّی قضبلَندئرئبلر.
16. يَروبعامين اتدئيي گوناهلارينا گؤره کي، اونلارلا ائسرايئلي گوناها باتيردي، رب ائسرايئلدن اوز دؤندره‌جک."
17. يَروبعامين آروادي قالخيب گتدي و تئرصايا گلدي. اِوئن آستاناسينا آياق باسديغي واخت اوغلان اؤلدو.
18. بوتون ائسرايئللی‌لر اونو باسديريب اونون اوچون ياس توتدولار. بلجه ربّئن سؤزو کی، اؤز قولو اَخئيا پيغمبرئن واسئطه‌سئله دمئشدی، يرئنه يِتئشدي.
19. يَروبعامين قالان ائشلري، نجه دؤيوشدويو و نجه پادشاهليق اتدئيي باره‌ده، باخ، ائسرايئل پادشاهلارينين سالنامه‌لر کئتابيندا يازيليبدير.
20. يَروبعامين پادشاهليغي ائيئرمي ‌ائکي ائل سوردو. او، اؤلوب آتالاري ائله ياتدي و يرئنه اوغلو ناداب پادشاه اولدو.
21. سوليمان اوغلو رِحوبعام يهودادا سلطنت ادئردي. رِحوبعام، پادشاه اولان واخت، قيرخ بئر ياشيندا ائدي. او اورشلئمده اون يدّي ائل پادشاهليق اتدي. رب ائسرايئلئن بوتون قبئله‌لرئندن بو شهري سچمئشدي کي، اؤز آديني اونا قويسون. اونون آناسينين آدي عَمّونلو نَعَمه ائدي.
22. يهودالي‌لار ربّئن گؤزونده شرارت اتدئلر و آتالارينين اتدئيي بوتون گوناهلاردان داها چوخ گوناه اتمکله ربّئن قِيرَتئني قيزديرديلار.
23. اونلار دا هر اوجا تپه اوستونده و بول يارپاقلي هر آغاج آلتيندا اؤزلري اوچون پرستئشگاهلار، موقدّس سوتونلار و ائلاهه اَشِرا بوتلري دوزلتدئلر.
24. اؤلکه‌ده يالان دئنلره گؤره کئشي فاحئشه‌لر ده وار ائدي. خالق او مئلّتلرئن بوتون ائيرنج ائشلرئنه گؤره رفتار اتدي کي، رب اونلاري ائسرايئل اؤولادلارينين قاباغيندان قووموشدو.
25. رِحوبعامين پادشاهليغينين بشئنجي ائلئنده مئصئر پادشاهي شئشَق اورشلئمه هوجوم اتدي.
26. او، ربّئن معبدئنئن و پادشاه سارايينين خزئنه‌لرئني گؤتوردو. هر شيي آلدي، حتّا سوليمانين دوزلتدئيي بوتون قيزيل قالخانلاري دا گؤتوردو.
27. رِحوبعام پادشاه اونلارين يرئنه بورونج قالخانلار دوزلتدي و بونلاري پادشاه سارايينين قاپيسيني قورويان کشئکچي ريئسلرئنئن اَلئنه وردی.
28. هر دفه پادشاه ربّئن معبدئنه گلنده، کشئکچئلر اونلاري داشي‌ييرديلار و سونرا کشئکچئلرئن اوتاغينا گری گتئرئردئلر.
29. رِحوبعامين قالان ائشلري و اونون اتدئيي هر شي باره‌ده مگر يهودا پادشاهلارينين سالنامه‌لر کئتابيندا يازيلماييبدير؟
30. رِحوبعاملا يَروبعام آراسيندا همئشه موحارئبه گدئردي.
31. رِحوبعام اؤلوب آتالاري ائله ياتدي و داوودون شهرئنده، آتالارينين يانيندا باسديريلدي. آناسي عَمّونلو نَعَمه ائدي. اونون يرئنه اوغلو اَبئيا پادشاه اولدو.

Zəbur 69:16-21
16. منه جاواب ور، يارب، چونکي محبّتئن ياخشي‌دير. مرحمتئنئن چوخلوغونا گؤره منه طرف دؤن.
17. اوزونو قولوندان گئزلتمه، چونکي دارليقدايام؛ تزلئکله منه جاواب ور،
18. جانيما يتئش و اونو خئلاص ات، دوشمنلرئمدن اؤتري مني خئلاص ات.
19. منئم حقارتئمي، اوتانديغيمي، روسوايچيليغيمي بئلئرسن. خصملرئمئن هاميسي سنئن حوضوروندادير.
20. حقارت اوره‌يئمي سينديريب، دردلئيم. منه اوره‌يي يانان بئرئني آختاريرديم، آمّا هچ کس يوخ ائدي. تسلّي ورن بئرئني آختاريرديم، لاکئن هچ کسي تاپماديم.
21. خؤرک يرئنه منه آجي شي وردئلر، سوسوزلوغومدا منه سئرکه ائچدئردئلر.

Süleymanın Məsəlləri 17:23-24
23. شر آدام قولتوغونون آلتيندان روشوت آلار کي، عدالتئن يوللاريني پوزسون.
24. حئکمت، آنلايان آدامين نظرئنده‌دئر، آخماغين گؤزلري دونيانين او تاييني آختارار.

Yəhya 12:27-50
27. ائندي جانيم سيخيلير. و نه ديئم؛ «آتا، مني بو ساعاتدان قورتار؟!» آمّا من اله بو ساعات اوچون گلدئم.
28. آتا اؤز آديني اوجالت." او زامان گؤيدن بئر سس گلدي: "اوجالتديم، گئنه ده اوجالتاجاغام."
29. اورادا دوران و بونو اشئدن خالق ددي: "گؤي گورولدادي." اؤزگه​لري ددئلر: "بئر ملک اونونلا دانيشيب."
30. عئسا ددي: "بو سس منئم اوچون گلمه‌دي، سئزئن اوچون گلدي.
31. بو دونيا ائندي موحاکئمه اولونور. ائندي بو دونيانين حؤکمداري اشئيه آتيلاجاق.
32. آمّا من، يردن قالديريلديغيم زامان، بوتون ائنسانلاري اؤزومه چکه​جه‌يم."
33. ​​​عئسا بو سؤزو دمکده نجه اؤله​جه‌يئني بئلدئردي.
34. خالق اونا ددي: "بئز شرئعتدن اؤيرنمئشئک کي، مسئح ابده کئمي قالاجاق. سن ائندي نجه ديئرسن ائنسان اوغلونون قالديريلماسي لازيمدير؟! بو ائنسان اوغلو کئمدئر؟"
35. عئسا اونلارا ددي: "نور آز بئر زامان داها آرانيزدا اولاجاق. نورونوز وار ائکن گزئن، مبادا قارانليق سئزي توتسون. قارانليقدا گزن آدام هارايا گتدئيئني بئلمز.
36. نورونوز وار ائکن نورا ائنانين کي، نورون اوغوللاري اولاسينيز." عئسا بو سؤزلري دئيندن سونرا گدئب اونلاردان گئزلندي.
37. عئسا گرچي اونلارين گؤزلري قاباغيندا چوخ علامتلر گؤرستدي، اونلار گئنه اونا ائمان گتئرمه‌دئلر کي،
38. اشعيا پيغمبرئن خبر وردئيي سؤز يرئنه يتئشسئن؛ يارب، وردئيئمئز خبره کئم ائناندي؟ و ربّئن قودرتي کئمه گؤروندو؟
39. اونلار اونون اوچون اونا ائمان گتئره بئلمئردئلر چونکي، اشعيا باشقا بئر يرده دمئشدي؛
40. تاري اونلارين گؤزلرئني کور اتدي، اورکلرئني داشا دؤنده‌ردي. اونون اوچون ده نه گؤزلری ائله گؤرمه‌يه قادئر اولدولار، نه اورکلری ائله آنلاماغا، نه ده منه طرف دؤنمه‌يه کي، من اونلارا شفا ورئم.
41. اشعيا بو سؤزلري ددي، چونکي ربّئن جلاليني گؤردو و اونون حاقّيندا دانيشدي.
42. گئنه ده ريئسلردن چوخلاري عئسايا ائمان گتئردئلر، آمّا فرئسئلر اوزوندن ائمان گتئردئکلرئني آچيقجا دمه‌دئلر. چونکي قورخوردولار کنئسه​دن اشئيه سالينسينلار.
43. چونکي اونلار ائنساندان گلن عئزّتي تاريدان گلن عئزّتدن داها چوخ سوئردئلر.
44. آمّا عئسا اوجا سسله اونلارا ددي: "منه ائمان گتئرن، منه يوخ، مني گؤنده‌ره‌نه ائمان گتئرئر.
45. و مني گؤرَن، مني گؤنده‌ره‌ني گؤرور.
46. من دونيايا نور اولاراق گلدئم کي، منه ائمان گتئرن هر کس قارانليقدا قالماسين.
47. سؤزلرئمي اشئدئب اونلارا ائنانمايان آداما من حؤکم اتمه‌يه​جه‌يم. چونکي دونياني موحاکئمه اتمک اوچون گلمه​مئشم، دونيايا نئجات ورمک اوچون گلمئشم.
48. مني ردّ ادن و سؤزلرئمي قبول اتمه‌ين آداما حؤکم ادن بئري وار؛ ددئيئم سؤزلر آخير گونده اونا حؤکم اده​جک.
49. چونکي من اؤزومدن دانيشماديم. مني گؤنده‌رن آتا نه دئيه​جه‌يئمي و نه دانيشاجاغيمي منه بويوردو.
50. و من بئلئرم کي، اونون بويوردوقلاري ابدي حياتدير. اونون اوچون نه دانيشيرام، آتا منه ددئيي کئمي دانيشيرام."