A A A A A

Bir il Bibliya


Iyun 16


2 Padşahlar 19:1-37
1. پادشاه خئزقئيا بونو اشئدنده پالتاريني جيردي و چولا بورونوب ربّئن معبدئنه گئردي.
2. سونرا ساراي ريئسي اِلياقئمي، مئرزه شِبنايي و کاهئنلرئن آغساقّال‌لاريني چولا بورونموش حالدا آموص اوغلو پيغمبر اِشَعيانين يانينا گؤندردي.
3. اونلار اِشَعيايا ددئلر: "خئزقئيا بله ديئر: «بو گون دارليق، تحقئر و روسوايچيليق گونودور، چونکي اوشاقلارين دوغولماسي واختي چاتيب، آنجاق دوغماغا گوج يوخدور.
4. بلکه سنئن تارين رب رَبشاقِه‌نئن سؤزلرئني اِشئدَر، او آدامين سؤزلرئني کي، اونون آغاسي آشور پادشاهي اونو گؤنده‌رئب کي، ياشايان تاريني تحقئر اتسئن. و تارين رَب، اشئتدئيي سؤزلري توبئخ اِدَر. اونا گؤره ده قالانلار اوچون دوعا ات.»"
5. بلجه خئزقئيا پادشاهين نؤکرلري اِشَعيانين يانينا گلدئلر.
6. اِشَعيا اونلارا ددي: "آغانيزا ديئن کي، رب بله ديئر: «اشئتدئيئن آشور پادشاهينين نؤکرلرئنئن سؤزلرئندن کي، اونونلا منه کوفر اتدئلر، قورخما.
7. باخ، من اونون ائچئنه اِله بئر روح قوياجاغام کي، بئر خبر اشئدئب اؤز اؤلکه‌سئنه قاييداجاق و اؤز اؤلکه‌سئنده اونو قيلينجلا اؤلدورتدوره‌جيم.»"
8. رَبشاقِه گری قاييديب آشور پادشاهينين لئبنا شهري اوستونه هوجوم اتدئيئني گؤردو. چونکي پادشاهين لاکئشدن گری چکئلدئيئني اشئتمئشدي.
9. آشور پادشاهينا خبري چاتدي کي، "کوش پادشاهي تئرهاقا سنئن اوستونه ووروشماغا گلئب." او، خئزقئيانين يانينا تزه‌دن قاصئدلر گؤندرئب ددي:
10. "يهودا پادشاهي خئزقئيايا بله ديئن: «قويما بِل باغلاديغين تارين سني آلداديب دسئن: ‹اورشلئم آشور پادشاهينين اَلئنه ورئلميه‌جک.›
11. باخ، اشئدئبسن کي، آشور پادشاهلاري بوتون اؤلکه‌لره نه ادئبلر، اونلاري نجه بوسبوتون وئران ادئبلر. مگر سن قورتولا بئله‌جکسن؟
12. آتالاريمين محو اتدئکلري مئلّتلرئن، حتّا گوزانين، خارانين، رِصِفئن و تِلَسّاردا اولان عِدِنلی‌لرئن آللاهلاري مگر اونلاري قورتاردي؟
13. هاني خَمات پادشاهي، اَرپاد پادشاهي؟ هاني لاعئرئن، سِفَروَيئمئن، هِنَعئن و عئوّانين پادشاهي؟»"
14. خئزقئيا مکتوبو قاصئدلرئن اَلئندن آليب اوخودو. او، ربّئن معبدئنه قالخيب، مکتوبو ربّئن قاباغيندا يره سَردي.
15. خئزقئيا ربّئن قاباغيندا دوعا ادئب ددي: "ای کَرّوبلار اوستونده اَيلَشَن ائسرايئلئن تاريسي رب! بوتون دونيا پادشاهليقلارينين تاريسي آنجاق سنسن. گؤيو و يري سن ياراديبسان.
16. يارب، قولاق ور و اشئت. گؤزونو آچ و گؤر يارب، سَنخِرئبئن سؤزلرئنه قولاق آس کي، وار اولان تارييا کوفر اتمک اوچون گؤنده‌رئب.
17. يارب، دوغرودور، آشور پادشاهلاري مئلّتلري و اونلارين تورپاقلاريني محو ادئبلر،
18. آللاهلاريني اودا آتديلار. چونکي اونلار تاري ديئلدئلر، ائنسانلار اونلاري آغاج و داشدان دوزلتمئشدئلر. اونا گؤره ده آرادان گتدئلر.
19. ائندي ای تاريميز رب، يالواريرام، بئزي اونون اَلئندن قورتار و بوتون دونيا پادشاهليقلاري بئلسئنلر کي، يارب، سن، فقط سن تاريسان!"
20. او واخت آموص اوغلو اِشَعيا خئزقئيايا خبر گؤندرئب ددي: "ائسرايئلئن تاريسي رب بله ديئر: «آشور پادشاهي سَنخِرئب باره‌ده منه اتدئيئن دوعاني اشئتدئم.»
21. اونون ضئدّئنه ربّئن ددئيي سؤز بودور: "باکئره صَهيون قيزي، سنه خور باخيب لاغ ادئر، اورشلئم قيزي، سنئن آرخانجا باشيني تَرپه‌دئب.
22. کئمي سؤيوب کوفر ادئبسن؟ کئمئن ضئدّئنه سَسئني قالديريبسان؟ کئمه لووغاليقلا باخيبسان؟ ائسرايئلئن موقدّسئنه!
23. قاصئدلرئنئن واسئطه‌سئله ربّی تحقئر ادئبسن: ديئبسن: ‹چوخلو دؤيوش عارابالاريملا داغلارين زئروه‌سئنه، لوبنانين لاپ اوزاق يرلرئنه چيخديم. اوجا سئدر آغاجلاريني، سچمه شام آغاجلاريني کَسدئم، لاپ آخير مسکنئنه، ثمره‌لي ياشيل مِشه‌لرئنه چيخديم.
24. قويو قازديم و اؤزگه سولاريني ائچدئم، مئصئرئن بوتون چايلاريني آياغيمين داباني ائله قوروتدوم.›
25. مگر اشئتمه‌يئبسن؟ من بونو چوخ قاباق اتدئم. قدئمدن بَري اونون نقشه‌سئني چکدئم. ائندي يرئنه يتئرمئشم کي، سن قالالي شهرلري وئرانه‌لئيه چِوئره‌سن.
26. بونا گؤره بو شهرلرئن ساکئنلري ضعئف ائدئلر، هراسا، خجالته دوشدولر. يِتئشمه‌مئشدن اوّل يانديريلان چؤل اوتو کئمي، گؤيَرتي کئمي، دامدا بؤيومه‌دن يانيب گِدن اوت کئمي اولدولار
27. سنئن اوتوروشونو، گئرئشئني-چيخيشيني، منئم ضئدّئمه اولان حئدّتئني بئلئرم.
28. منئم ضئدّئمه حئدّتلَندئيئنه گؤره، لووغاليغين قولاغيما چاتديغينا گؤره، حالقامي بورنونا و جئلووومو آغزينا تاخاجاغام، سني گلدئيئن يوللا گری قايتاراجاغام.
29. سنئن اوچون علامت بو اولاجاق؛ بو ائل و گلن ائل اؤزو يِتئشَن باريني ييئن، آمّا اوچونجو ائل اَکئن ادئن، بئچئن ادئن، اوزوم باغلاري ساليب اونلارين بهره‌سئني ييئن.
30. يهودا نسلئندن خئلاص اولوب قالانلار، گئنه آشاغي‌يا طرف کؤک سالاجاقلار، يوخارييا طرف بهره وره‌جکلر.
31. چونکي قالانلار اورشلئمدن، خئلاص اولانلار صَهيون داغيندان چيخاجاقلار. قوشونلار ربّئنئن قيرتي بونو اده‌جک.»
32. بونا گؤره رب آشور پادشاهي باره‌ده بله ديئر: «او بو شهره گئرميه‌جک، اورايا اوخ آتماياجاق، موقابئلئنه قالخانلا چيخماياجاق، قاباغيندا تورپاق قالاغي قورماياجاق.
33. آنجاق گلدئيي يوللا گری قاييداجاق، و بو شهره گئرميه‌جکدئر.» رب بله بويورور.
34. «من بو شهري اؤزوم اوچون، قولوم داوودون خاطئرئنه قورويوب خئلاص اده‌جيم.»"
35. او گجه ربّئن مَله‌يي چيخيب آشور اوردوگاهيندا يوز هشتاد بش مئن نفري قيردي. سحر اِرکَن قالخيب گؤردولر کي، اونلارين هاميسي اؤلدورولوب.
36. آشور پادشاهي سَنخِرئب گری چکئلئب گتدي و نِينَوادا قالدي.
37. او اؤز آللاهي نئسروکون معبدئنده پرستئش اِدَرکَن، اوغوللاري اَدرَم‌مِلِک و شَرِ‌سِر اونو قيلينجلا اؤلدوردولر و آرارات اؤلکه‌سئنه قاچديلار. سَنخِرئبئن يرئنه اوغلو اِسَرخَدّون پادشاه اولدو.

2 Padşahlar 20:1-21
1. او گونلرده خئزقئيا اؤلومجول ناخوشلادي. آموص اوغلو پيغمبر اِشَعيا اونون يانينا گلئب ددي: "رب بله ديئر: «اِوئنئن ائشلرئنئن ترتئباتيني ات، چونکي ناخوشلوقدان صاغالماييب اؤله‌جکسن.»"
2. خئزقئيا اوزونو دووارا چِوئردي و ربّه دوعا ادئب ددي:
3. "يالواريرام، يارب، يادينا سال کي، نجه سنئن قاباغيندا صالحلئک و کامئل اورَکله ياشاميشام، نجه سنئن گؤزونده ياخشي اولان ائشلراتمئشم." خئزقئيا آجي-آجي آغلادي.
4. اِشَعيا حله اورتا حَيَطدن چيخماميش ربّئن بو سؤزو اونا نازئل اولدو:
5. "قاييت، منئم خالقيمين رهبري خئزقئيايا دِه کي، آتان داوودون تاريسي رب بله ديئر: «سنئن دوعاني اشئتدئم، گؤز ياشلاريني گؤردوم. باخ، سني صاغالداجاغام و اوچونجو گون ربّئن معبدئنه قالخاجاقسان.
6. سنئن عؤمرونو اون بش ائل آرتيراجاغام. سني و بو شهري آشور پادشاهينين اَلئندن قورتاراجاغام، اونو اؤزوم اوچون و قولوم داوودون خاطئرئنه حئفظ اده‌جيم.»"
7. سونرا اِشَعيا ددي: "انجئر کونده‌سي گؤتورون." بونو گؤتوروب چئبانين اوستونه قويدولار و پادشاه صاغالدي.
8. خئزقئيا اِشَعيادان سوروشدو: "ربّئن منی صاغالداجاغينا و اوچونجو گون ربّئن معبدئنه قالخاجاغيما علامت ندئر؟"
9. اِشَعيا جاواب وردی: "سنه ربّئن ددئيي سؤزه عمل اده‌جيئنه علامت بودور: آيا کؤلگه اون قدم اوزانسين، و يا قيسالسين؟"
10. خئزقئيا ددي: "کؤلگه اوچون اون قدم اوزانماق آساندير. قوي اون قدم قيسالسين."
11. پيغمبر اِشَعيا ربّی چاغيردي، رب ده آخازين تئکدئيي پئلّه‌که‌نئن اوستونه دوشَن کؤلگه‌ني اون قدم گری چکدي.
12. او زامان بابئل پادشاهي بَلَدان اوغلو مِرودوک بَلَدان خئزقئيايا مکتوبلار و هدئيّه‌لر گؤندردي، چونکي خئزقئيانين ناخوشلاديغيني اشئتمئشدي.
13. خئزقئيا اونلارا قولاق آسدي. او، خزئنه‌سئنده اولان بوتون شيلري، قيزيل-گوموشو، عطرئيّاتي، قئيمتلي ياغلاري، سئلاح آنبارينداکي بوتون اشيالاري اِلچئلره گؤرستدي. خئزقئيانين ساراييندا و بوتون پادشاهليغيندا اونلارا گؤرستمه‌دئيي بئر شي قالمادي.
14. او واخت اِشَعيا پيغمبر، خئزقئيا پادشاهين يانينا گلئب اوندان سوروشدو: "بو آداملار نه ددئلر؟ سنئن يانينا هارادان گلدئلر؟" خئزقئيا ددي: "اوزاق بئر اؤلکه‌دن، بابئلدن گلدئلر."
15. اِشَعيا سوروشدو: "سنئن ساراييندا نه گؤروبلر؟" خئزقئيا ددي: "ساراييمدا اولان بوتون شيلري گؤروبلر. خزئنه‌لرئمده اونلارا گؤرستمه‌دئيئم بئر شي قالمادي."
16. اِشَعيا خئزقئيايا ددي: "ربّئن سؤزونو اشئت:
17. «باخ، اله گونلر گله‌جک کي، سنئن ساراييندا اولان هر شي و آتالارينين بو گونه قدر ييغديقلاري شيلر بابئله آپاريلاجاق، هچ نه قالماياجاق.» رب ديئر.
18. "سنئن نسلئندن اولان و سندن عمله گلن بعضی اوغوللاريني گؤتوروب آپاراجاقلار و اونلار بابئل پادشاهينين ساراييندا حرم‌آغاسي اولاجاقلار.»"
19. سونرا خئزقئيا اِشَعيايا ددي: "ددئيئن ربّئن سؤزو ياخشي‌دير." چونکي دوشونوردو: "هچ اولماسا منئم دؤورومده صولح و اَمئن-آمانليق اولاجاق."
20. خئزقئيانين قالان ائشلري، اونون بوتون قووّتي، نجه حوووض و سو کمري دوزَلدئب سويو شهره گتئرمه‌سي باره‌ده مگر يهودا پادشاهلارينين سالنامه‌لر کئتابيندا يازيلماييبدير؟
21. خئزقئيا اؤلوب آتالاري ائله ياتدي و يرئنه اوغلو مِنَسّه پادشاه اولدو.

2 Padşahlar 21:1-26
1. مِنَسّه پادشاه اولدوغو واخت، اون ائکي ياشيندا ائدي و اورشلئمده اَلّي بش ائل پادشاهليق اتدي. آناسينين آدي خِفصئباه ائدي.
2. مِنَسّه، ربّئن گؤزونده پئس اولان ائشلر ادئب، او مئلّتلرئن ائيرنج ائشلري کئمي اتدي کي، رب اونلاري ائسرايئل اؤولادلارينين قاباغيندان قووموشدو.
3. آتاسي خئزقئيانين داغيتديغي پرستئشگاهلاري تزه‌دن تئکدي. ائسرايئل پادشاهي اَخابين اتدئيي کئمي بَعَل بوتو اوچون قوربانگاهلار قوردو و اَشِرا بوتو دوزلتدي، بوتون گؤي جئسئملرئنه سجده و قوللوق اتدي.
4. ربّئن "آديمي اورشلئمده قوياجاغام" ددئيي معبدئنده، مِنَسّه قوربانگاهلار تئکدي.
5. ربّئن معبدئنئن هر ائکي حَيَطئنده بوتون گؤي جئسئملرئنه قوربانگاهلار دوزلتدي.
6. او، اوغلونو اوددا قوربان وردی، فالچيليغا مشغول اولدو، باخيجيليق ادئب جئندارلارا و روح چاغيرانلارا اوز گتئردي. او، ربّئن گؤزونده چوخلو پئس ائشلر گؤروب اونون قضبئني آلوولانديردي.
7. دوزلتدئيي اويما اَشِرا بوتونو معبده قويدو. او معبده کي، رب داوودا و اوغلو سوليمانا دمئشدي: "بو معبدده و بوتون ائسرايئل قبئله‌لرئندن سچدئيئم اورشلئمده، اؤز آديمي ابده‌جک قوياجاغام.
8. اگر منئم بوتون اونلارا بويوردوقلاريما و قولوم موسانين اونلارا امر اتدئيي بوتون قانونا عمل اتسه‌لر، ائسرايئللی‌لري قویمایاجاغام کی، آتالارينا وردئيئم تورپاقدان دئدَرگئن دوشسونلر."
9. آمّا اونلار قولاق آسماديلار. مِنَسّه اونلاري اله يولدان چيخارتدي کي، ربّئن ائسرايئل اؤولادلارينين قاباغيندا محو اتدئيي مئلّتلردن ده چوخ پئس ائشلر اتسئنلر.
10. رب اؤز قوللاري پيغمبرلر واسئطه‌سئله دانيشيب ددي:
11. "ائندي کي، يهودا پادشاهي مِنَسّه بو ائيرنج ائشلري اتمکله، اؤزوندن اَوّلکي اِمورلولارين اتدئکلرئندن ده چوخ پئسلئک ادئب و بوتلري ائله يهودالي‌لاري دا گوناها چکئب،
12. بونا گؤره ائسرايئلئن تاريسي رب ديئر: «باخ، من اورشلئمئن و يهودانين اوستونه اله بئر بلا گتئرئرم کي، اونو اشئدن هر کسئن قولاقلاري جئنگئلده‌يه‌جک.
13. سامئره‌ني اؤلچدويوم ائپي و اَخاب نسلئنئن اوستونه چکدئيئم شاقولو، اورشلئمئن اوستونه ده چکه‌جيم. بئر نفر بوشقابي نجه سئلئب اوزو اوسته چِوئرئر، من ده اورشلئمي اله سئله‌جيم.
14. ائرثئمئن قالانلاريندان اوز دؤندره‌جيم، اونلاري دوشمنلرئنه تسلئم اده‌جيم و دوشمنلري اونلاري سويوب تالان اده‌جکلر.
15. چونکي گؤزومده شرارت ادئبلر و آتالارينين مئصئردن چيخديقلاري گوندن حتّا بو گونه قدر منی قضبلَندئرئبلر.»"
16. مَنسّه ربّئن نظرئنده پئس ائشلري اده‌رک، يهودالي‌لاري گوناها باتيرماقلا بس اتمه‌دي، اورشلئمي بئر اوجدان او بئري اوجونا قدر گوناهسيز قانلارلا دا بولادي.
17. مِنَسّه‌نئن قالان ائشلري، اتدئيي هر شي و اِله‌دئيي گوناه باره‌ده مگر يهودا پادشاهلارينين سالنامه‌لر کئتابيندا يازيلماييبدير؟
18. مِنَسّه اؤلوب آتالاري ائله ياتدي و اؤز سارايينين باغچاسيندا، عوزّا باغچاسيندا باسديريلدي. اونون يرئنه اوغلو آمون پادشاه اولدو.
19. آمون، پادشاه اولدوغو واخت، ائيئرمي ائکي ياشيندا ائدي و اورشلئمده ائکي ائل پادشاهليق اتدي. آناسي يوطبالي خاروصون قيزي مِشول‌لِمِت ائدي.
20. آمون، آتاسي مِنَسّه‌نئن اتدئيي کئمي، ربّئن گؤزونده پئس اولان ائشلر اتدي.
21. آتاسينين يولو ائله گدئب اونون قوللوق اتدئيي بوتلره پرستئش و قوللوق اتدي.
22. بلجه آتالارينين تاريسي ربّی ترک اتدي و ربّئن يولو ائله گتمه‌دي.
23. آمونون اعيانلاري اونون ضئدّئنه قصد حاضيرلاديلار و پادشاهي اؤز ساراييندا اؤلدوردولر.
24. اؤلکه خالقي پادشاه آمونون ضئدّئنه قصد حاضيرلايانلارين هاميسيني قيرديلار و اونون يرئنه اوغلو يوشئياني پادشاه اتدئلر.
25. آمونون اتدئيي قالان ائشلري باره‌ده مگر يهودا پادشاهلارينين سالنامه‌لر کئتابيندا يازيلماييبدير؟
26. او، عوزّا باغچاسيندا، اؤز قبئرئنده باسديريلدي. اونون يرئنه اوغلو يوشئيا پادشاه اولدو.

Zəbur 74:9-17
9. علامتلرئمئزي آرتيق گؤرموروک؛ داها پيغمبر يوخدور، آراميزدا هچ کس بئلمئر نه واختا کئمي.
10. نه واختا کئمي دوشمن سنه حقارت اده‌جک، اي تاري؟ مگر سنئن آدينا خصم ابده کئمي کوفر دئيه‌جک؟
11. نه اوچون الئني، صاغ الئني، گري چکئرسن؟ اونو قوينوندان چيخارت و اونلاري محو ات.
12. اي تاري، قدئم زاماندان بري پادشاهيمسان؛ ير اوزونده نئجات گتئرن سنسن.
13. سن دهنزي اؤز قووّتئنله بؤلدون؛ دهنز اژداهالارينين باشيني اَزدئن،
14. لئوياتانين باشيني پارچالايان سن ائدئن، سن اونو چؤل حيوانلارينا يمک اوچون وردئن.
15. سن بولاغي فيشقيرتدين، سلي آخيتدين؛ سن ائدئن کی، همئشه‌آخان چايلاري قوروتدون.
16. گوندوز سنئن‌دئر، گجه ده سنئن؛ آيي، گونو سن حاضيرلادين.
17. يرئن بوتون سرحدلرئني سن قويوبسان؛ يايي و قيشي سن ياراديبسان

Süleymanın Məsəlləri 19:1-2
1. کاماللا گزن يوخسول، اَيري دانيشان آخماقدان ياخشي‌دير.
2. معرئفتسئزلئک ائنسان اوچون ياخشي ديئل، آياقلاري ائله تله‌سن آدام دا يولوندان چيخار.

Həvarilərin İşləri 2:1-21
1. پنطئکاست گونو گلنده، اونلارين هاميسي بئرلئک ائچئنده بئر يرده ائدئلر.
2. قفلتن گوجلو بئر يل اَسن کئمي، گؤيدن بئر سس گلدي و اوتوردوقلاري اِوئن هر يانيني دولدوردو.
3. و اوددان اونلارا دئللره بنزر بئر شيلر گؤروندو کي، اؤزلرئني بؤلوب اونلارين هر بئرئسئنئن اوستونه قوندو.
4. و اونلارين هاميسي موقدّس روحلا دولوب، روحون اونلاري دانيشديرديغي باشقا دئللرده دانيشماغا باشلاديلار.
5. بو زامان، دئندار يهودئلر گؤيون آلتيندا اولان هر مئلّتدن اورشلئمده ياشاييرديلار.
6. و بو سَس باش ورن زامان، جاماعات بئر يره ييغيليب حيران قالديلار؛ چونکي هر بئري اونلارين اونون دئلئنده دانيشديقلاريني اشئدئردي.
7. اونلار مات قاليب حيرت ائچئنده ائدئلر و بئربئرلرئنه ديئردئلر: "باخ، مگر بو دانيشانلارين هاميسي جلئل​لي ديئل؟!
8. بس نجه​دئر کي، اؤز آنا دئلئمئزي اشئدئرئک؟!
9. بئز پارتلي​لار، مادلي​لار، عِيلاملي​لار، مِسوپوتامئيادا، يهودئيه​ده، کاپادوسئيادا، پونطوس و آسئيادا
10. فئرئجئيه و پامفئلئيه‌ده، مئصئرده، لئبيانين کرِنيا بؤلگه​سئنده ياشايانلار، رومدان گلن قرئبلر،
11. هم يهودئلر، هم ده يهود دئنئنه دؤنن​لر، کرئتلي​لر و عرب​لر، اونلارين اؤز دئللرئمئزده دانيشماقلاريني اشئدئرئک کي، تارينين قووّتلي ائشلري حاقّيندا دانيشيرلار."
12. و اونلارين هاميسي مات قاليب، بؤيوک حيرت ائچئنده بئربئرلرئنه ديئردئلر: "بو نه اولا بئلر؟"
13. لاکئن اؤزگه​لر اَله ساليب ديئردئلر: "تزه شرابين چوخ ائچدئکلرئندن کفلئدئرلر."
14. آمّا پطروس او "اون بئر" نفرله دوردو و سَسئني اوجالديب اونلارا خئطاب اتدي: "اي يهودئلر، و سئز اي بوتون اورشلئمده ياشايانلار! بو سئزه معلوم اولسون و سؤزلرئمه قولاق آسين.
15. بو آداملار سئزئن گومان اتدئيئنئز کئمي کفلي ديئللر، چونکي ائندي گوندوزون اوچونجو ساعاتي‌دير.
16. لاکئن بو، يوئل پيغمبرئن واسئطه‌سئله ديئلمئش سؤزدور:
17. «تاري ديئر: بله اولاجاق کي، آخير گونلرده روحومدان بوتون بشر اوستونه تؤکه​جه‌يم؛ اوغوللارينيز و قيزلارينيز نبئلئک اده​جکلر، جاوانلارينيز رؤيالار، قوجالارينيز دا يوخولار گؤره​جکلر؛
18. او گونلرده حتّا قوللاريمين و کنئزلرئمئن اوستونه ده روحومدان تؤکه​جه‌يم و اونلار نبئلئک اده​جکلر.
19. يوخاريدا، گؤيده بؤيوک عجايئبلر، و آشاغي دا، ير اوزونده علامتلر گؤرسده​جه‌يم؛ قان، اود و توستو دوماني.
20. ربّئن او بؤيوک و شؤوکتلي گونو گلمه‌دن گون قارانليغا، آي دا قانا دؤنه​جک.
21. و اله اولاجاق کي، هر کئم ربّئن آديني ذئکر اتسه، نئجات تاپاجاقدير.»