A A A A A

Bir il Bibliya


Bilər 4


1 Şamuel 10:1-27
1. سمويئل بئر قاب زيتون ياغي گؤتوروب شاعولون باشينا تؤکدو و اونو اؤپوب ددي: "مگر رب سني مسح اتمه‌يئب کي، اؤز ائرثي اولان ائسرايئل اوستونده باشچي اولاسان؟
2. بو گون مندن آيريلاندان سونرا بِنيامئن تورپاغيندا، صِلصَخده اولان راحئلئن مزاري يانيندا ائکي آداما راست گله‌جکسن و اونلار سنه دئيه‌جکلر: «آختارماغا گتدئيئن اِششَکلر تاپيليبلار. آرتيق آتان، اِششَکلري ياددان چيخارديب سئزئن اوچون نئگاراندير و ديئر: ‹اوغلوما گؤره نه اِدئم؟›»
3. اورادان دا ائره‌لي کچئب تابورداکي پاليد آغاجينين يانينا چاتاجاقسان و همئن يرده سني بِيت ائله، تارينين حوضورونا چيخان اوچ آدام پئشواز اده‌جک. اونلاردان بئري اوچ کِچي بالاسي، او بئري اوچ کؤمبه چؤرک، بئري ده بئر تولوق شراب آپارير.
4. اونلار سني سالاملاييب سنه ائکي کؤمبه چؤرک وره‌جکلر. سن ده او چؤرکلري اونلاردان آلاجاقسان.
5. بوندان سونرا فئلئسطلي کشئک دسته‌سئنئن اولدوغو يره يعني گئبعَت‌اِلوهئمه چاتاجاقسان. شهره گئرن زامان اورادا پرستئشگاهدان اِنَن بئر پيغمبر دسته‌سئنه راست گله‌جکسن. اونلارين قاباقلاريندا چنگ، دف، ني و طنبور چاليناجاق و اونلار پيغمبرلئک اده‌جکلر.
6. او واخت ربّئن روحو سنئن اوستونه قووّتله اِنه‌جک و سن ده اونلارلا بئرلئکده پيغمبرلئک اده‌جکسن و دؤنوب باشقا بئر آدام اولاجاقسان.
7. بو علامتلر سنده باش ورنده وضعئيّته موناسئب حرکت ات، چونکي تاري سنئنله‌دئر.
8. سن مندن اوّل گئلگالا اِنه‌جکسن، من ده اورايا گله‌جيم کي، يانديرما قوربانلاري تقدئم ادئب باريش قوربانلاري کَسئم. من يانينا گلئب نه اده‌جيئني سنه بئلدئره‌نه‌جک، يدّي گون گؤزله‌مَلي اولاجاقسان."
9. شاعول سمويئلئن يانيندان يولا دوشمَک اوچون چِورئلَنده، تاري اونون اوره‌يئني دَيئشدئردي و بوتون بو علامتلر او گون يرئنه يتئشدي.
10. اورادان گئبعايا گِدَرکَن، اونلارا بئر پيغمبر دسته‌سي راست گلدي و تارينين روحو شاعولون اوستونه قووّتله اِندي، اله کي، اونلارين آراسيندا شاعول دا پيغمبرلئک اتمه‌يه باشلادي.
11. اوّلدن اونو تاني‌يان جاماعاتين هاميسي اونون پيغمبرلئک اتدئيئني گؤرنده بئربئرئنه ددئلر: "قئشئن اوغلونا نه اولوب؟ مگر شاعول دا پيغمبرلرئن سيراسيندادير؟"
12. بئر آدام جاواب ورئب ددي: "گؤرون اونلارين آتاسي کئمدئر؟" بونا گؤره ده "مگر شاعول دا پيغمبرلر سيراسيندادير؟" سؤزو مَثَله چِورئلدي.
13. شاعول پيغمبرلئک ادندن سونرا پرستئشگاها قالخدي.
14. شاعولون عَمئسي اوندان و نؤکرئندن سوروشدو: "هارا گتمئشدئنئز؟" شاعول ددي: "اِششَکلري آختارماغا گتمئشدئک، تاپا بئلمه‌دئيئمئزي گؤرن واخت، سمويئلئن يانينا گتدئک."
15. شاعولون عَمئسي ددي: "خاهئش ادئرم، سمويئلئن سنه نه ددئيئني منه دانيش."
16. شاعول عَمئسئنه ددي: "اِششَکلرئن تاپيلديغيني بئزه آيدين بئلدئردي." لاکئن پادشاهليق حاقّيندا سمويئلئن سؤزونو عَمئسئنه دانيشمادي.
17. بوندان سونرا سمويئل خالقي ربّئن حوضورونا، مئصپا‌يا چاغيردي.
18. او، ائسرايئل اؤولادلارينا ددي: "ائسرايئلئن تاريسي رب بله ديئر: «ائسرايئلي مئصئردن من چيخارتديم. مئصئرلی‌لرئن و سئزه ظولم ادن بوتون سلطنتلرئن اَلئندن سئزي من آزاد اتدئم.»
19. لاکئن بلالارينيزدان و موصئبتلرئنئزدن سئزي قورتاران تارينيزي بو گون ردّ ادئبسئنئز و اونا "اوستوموزه بئر پادشاه قوي" ديئبسئنئز. ائندي قبئله‌لرئنئزه و نسئل‌لرئنئزه گؤره ربّئن حوضوروندا دورون."
20. سمويئل ائسرايئلئن بوتون قبئله‌لرئني بئر-بئر قاباغا چيخارتدي، بِنيامئن قبئله‌سي پوشکله سچئلدي.
21. سونرا بِنيامئن قبئله‌سئني نسئل‌به‌نسئل قاباغا چيخارتدي. پوشک مَطري نسلئنه دوشدو. نهايت قئش اوغلو شاعول سچئلدي. لاکئن اونو آختاريب تاپا بئلمه‌دئلر.
22. گئنه ربدن سوروشدولار: "او بورايا حله مگر گلمه‌يئب؟" رب ددي: "باخ، يوکلرئن آراسيندا گئزله‌نئب."
23. قاچيب شاعولو اورادان گتئردئلر. خالق آراسيندا دوران زامان شاعول خالقين هاميسيندان بئر بويون اوجا گؤرونوردو.
24. سمويئل بوتون خالقا ددي: "آيا ربّئن سچدئيي آدامي گؤرورسونوز؟ دوغرودان دا بوتون خالقين آراسيندا اونا بَنزَر هچ کس يوخدور." او زامان خالق بئر سَسله قيشقيريب ددئلر: "ياشاسين پادشاه!"
25. سمويئل پادشاهليق قايدالاريني خالقا ددی و کئتابا يازيب ربّئن حوضورونا قويدو. سونرا سمويئل بوتون خالقي اِوئنه گؤندردي.
26. شاعول دا گئبعايا، اؤز اِوئنه قاييتدي و قلبلرئنده تارينين اويانيش ياراتديغي جنگاورلر ده اونونلا برابر گتدئلر.
27. لاکئن بعضی ياراماز آداملار ددئلر: "بو آدام بئزي نجه قورتاراجاق؟" اونا حقارتله باخيب هدئيّه گتئرمه‌دئلر. لاکئن شاعول بونا ساکئت قالدي.

1 Şamuel 11:1-15
1. عَمّونلو ناخاش گلئب يابِش‌گئلعادي موحاصئره‌يه آلدي. بوتون يابش اهالئسي ناخاشا ددئلر: "بئزئمله عهد باغلا، بئز ده سنه قوللوق اده‌رئک."
2. آمّا عَمّونلو ناخاش اونلارا ددي: "بو شرطله سئزئنله باغلايارام کي، هر بئرئنئزئن صاغ گؤزونو چيخارديب بوتون ائسرايئلي روسواي اِدئم."
3. يابش آغساقّاللاري اونا ددئلر: "بئزه يدّي گون مؤهلَت ور کي، ائسرايئلئن بوتون اراضئسئنه قاصئدلر گؤنده‌رَک و اگر بئزي خئلاص ادن بئري اولماسا، سنه تسلئم اولاريق."
4. قاصئدلر شاعولون گئبعا شهرئنه گلدئلر و خالق آراسيندا بو سؤزلري جار چکدئلر. بوتون خالق دا شئون ادئب آغلادي.
5. بو واخت شاعول اؤکوزلرئن داليسيجا زمئدن گلئردي. او ددي: "خالقا نه اولوب کي، آغلايير؟" اونا يابِشلی‌لرئن سؤزونو چاتديرديلار.
6. همئن سؤزلري اشئدن زامان تارينين روحو شاعولون اوستونه قووّتله اِندي، قضبدن اود توتوب ياندي.
7. او، بئر جوت اؤکوزونو گؤتوروب پارچا-پارچا دوغرادي و اونلاري قاصئدلرئن اَلي ائله بوتون ائسرايئل اراضئسئنه گؤندرئب ددي: "کئم شاعولون و سمويئلئن دالينجا گتمه‌سه، اؤکوزلرئنئن باشينا بو گله‌جک." خالقين آراسينا ربّئن قورخوسو دوشدو و هامي بئر نفر کئمي يولا چيخدي.
8. شاعول اونلاري بِزِقده سايدي: ائسرايئل اؤولادلاري اوچ يوز مئن و يهودا آداملاري دا اوتوز مئن نفر اولدو.
9. گلن قاصئدلره ددئلر: "يابِش گئلعادلي‌لارا بله دئيَرسئنئز: «صاباح گون قيزينجا سئزه قورتولوش اولاجاق.»" قاصئدلر گدئب بونو يابِشلی‌لره بئلدئردئلر و اونلار دا سِوئندئلر.
10. يابِشلی‌لر عَمّونلولارا ددئلر: "صاباح تسلئم اولاجاغيق و بئزئمله گؤزونوزده خوش گؤرونَن کئمي رفتار ادئن."
11. صاباحيسي شاعول خالقي اوچ قئسمته بؤلدو و سحر کشئک نؤوبتئنده دوشمنئن اوردوگاهينين ائچئنه گئرئب، گون قيزانا قدر عَمّونلولاري قيرديلار. قالانلار دا اله داغيلديلار کي، اونلاردان ائکي نفر بئر يرده قالمادي.
12. خالق سمويئله ددي: "کئملردئر او آداملار کي، دِمئشدئلر «مگر شاعول اوستوموزده پادشاه اولاجاق؟» او آداملاري ورئن، اؤلدورَک."
13. لاکئن شاعول ددي: "بو گون هچ کس اؤلدورولمه‌يه‌جک، چونکي رب بو گون ائسرايئله قورتولوش ورئب."
14. سمويئل خالقا ددي: "گلئن گئلگالا گِدَک و اورادا پادشاهليغي تزه‌دن تصدئق اِدَک."
15. بلجه بوتون خالق گئلگالا گتدي. اورادا، گئلگالدا شاعولو ربّئن حوضوروندا پادشاه اتدئلر. ربّئن حوضوروندا باريش قوربانلاري دا کَسدئلر. بوتون ائسرايئللی‌لر شاعوللا بئرلئکده بؤيوک بايرام اتدئلر.

Zəbur 55:16-23
16. آمّا من، تاريني چاغيراجاغام، رب منه نئجات وره‌جک.
17. آخشام واختي، سحر واختي، گون اورتا واختي دوعا اده‌جيم، اوجا سَسله باغيراجاغام، او منئم سسئمي اشئده‌جک.
18. ضئدّئمه اولان موحارئبه‌دن، مني سالاماتليقلا خئلاص اده‌جک، چونکي ضئدّئمه قالخان چوخدور.
19. ازلدن بري تختئنده اوتوران تاري اشئده‌جک، اونلاري ذلئل اده‌جک. سِلا. چونکي اونلار اصلا ديئشئلمئرلر، تاريدان قورخمورلار.
20. يولداشيم دوستونا اَل قالديرير، دوستلوق عهدئني پوزور. عهدئني سينديريب.
21. آغزينين سؤزلري کره ياغيندان داها ياغلي‌دير، لاکئن اوره‌يئنده موحارئبه وار؛ سؤزلري زيتون ياغيندان داها يومشاقدير، لاکئن يالين قيلينجلاردير.
22. يوکونو ربّه بوراخ، او، سني پايدار ادر؛ صالح آدامين ييخيلماغينا هچ واخت ائجازه ورمز.
23. آمّا سن، اي تاري، اونلاري هلاکت قويوسونا آتاجاقسان؛ قان تؤکَنلرئن، حئيله‌گر آداملارين عؤمرو يارييا چاتماياجاق، لاکئن من سنه توکّول اده‌جيم.

Süleymanın Məsəlləri 15:18-20
18. قضبلي آدام داعوا قالديرار، لاکئن صبئرلي ديئشمه‌ني ياتيردار.
19. تنبل آدامين طرئقي تئکانلي چپر کئمي‌دئر، آمّا دوز آدامين يولو گنئش جادّه‌دئر.
20. حئکمتلي اوغول آتاسيني سوئندئرر، لاکئن آخماق آدام آناسينا خور باخار.

Luka 22:24-46
24. اونلارين آراسيندا بئر موباحئثه دوشدو کي، اونلاردان کئم لاپ بؤيوک ساييلمالي‌دير.
25. لاکئن عئسا اونلارا ددي: "مئلّتلرئن پادشاهلاري اونلارين اوستونه حؤکم سورورلر و بو حؤکمدارليق ادنلره نعمت صاحئبي ديئلئر.
26. آمّا سئز گرک بله اولماياسينيز. آرانيزدا لاپ بؤيوک اولان، لاپ کئچئک کئمي اولسون و ريئسلئک ادن، خئدمتکار کئمي اولسون.
27. کئم داها بؤيوکدور: سوفره​ده اوتوران، يوخسا خئدمت ادن؟ مگر سوفره​ده اوتوران ديئل؟! لاکئن من سئزئن آرانيزدا خئدمتکار کئمي‌يَم.
28. و سئز او آداملارسينيز کي، کچئرتدئيئم ائمتاحانلاردا منئمله داياندينيز.
29. نجه کي، آتام منه بئر پادشاهليق ورئب، من ده سئزه بئر پادشاهليق ورئرم.
30. اِله کي، منئم پادشاهليغيمدا سوفرمده ييئب ‌​ائچه​سئنئز و تختلرده اوتوروب، ائسرايئلئن اون‌ائکي قبئله​سئنه حؤکم اِده​سئنئز.
31. شمعون، شمعون! شيطان طلب اتمئشدي کي، بوغدا کئمي سئزي خَلبئرله‌سئن.
32. آمّا من سنئن اوچون دوعا اِتمئشم کي، ائمانين آزالماسين؛ تکرار دؤندويون زامان، سن ده اؤز قارداشلارينا قووّت ور."
33. شمعون عئسايا ددي: "يارب! سنئنله زئندانا دا، اؤلومه ده گتمه‌يه حاضيرام."
34. لاکئن عئسا اونا ددي: "پطروس، سنه ديئرم کي، بو گون خوروز بانلاماميش، سن مني تانيديغيني اوچ دفه ائنکار اده​جکسن."
35. و اونلارا ددي: "او زامان کي، سئزي کئسه​سئز، تورباسيز، و آياق قابيسيز گؤنده‌ردئم، آيا بئر اَسکئيئنئز اولدو؟" شاگئردلر جاواب وردئلر: "هچ بئر شيئمئز."
36. او زامان عئسا اونلارا ددي: "آمّا ائندي کئسه​سي اولان اونو گؤتورسون، توربا دا گؤتورسون. قيلينجي اولمايان دا پالتاريني ساتيب قيلينج آلسين.
37. چونکي سئزه ديئرم: بو يازيلميش اولان سؤز کي، ديئر «او، گوناهکارلارلا بئر ساييلدي»، گَرَک منئم طرفئمدن ائجرا اولسون. چونکي منئم بارَمده ديئلن سؤز عنقرئب يرئنه يتئشه​جک."
38. اونلار ددئلر: "يارب! باخ، بورادا ائکي قيلينج وار." عئسا دا اونلارا ددي: "کئفايتدئر."
39. عئسا چيخيب عادتئنه گؤره زيتون داغينا گتدي و شاگئردلري ده اونون دالينجا گتدئلر.
40. او يره چاتان زامان، عئسا اونلارا ددي: "دوعا ادئن کي، ائمتاحانا دوشميه​سئنئز."
41. و اؤزو بئر داش آتيمي قدر اوزاقلاشدي و دئز چؤکوب دوعا اتدي:
42. "اي آتا، اگر راضيسان، بو پئياله​ني مندن اوزاقلاشدير، آمّا گئنه ده منئم ائسته‌دئيئم يوخ، سنئن ائسته‌دئيئن اولسون."
43. گؤيدن بئر ملک عئسايا گؤرونوب، اونا قووّت وردي.
44. شئدّتلي ائضطئراب ائچئنده عئسا داها چوخ دوعا اتدي، اِله کي، تري قان دامجيلاري کئمي يره تؤکولوردو.
45. دوعادان قالخيب شاگئردلرئن يانينا گلدي، و اونلاري قوصّه​دن ياتميش تاپدي.
46. و اونلارا ددي: "نه اوچون ياتيرسينيز؟ قالخين و دوعا ادئن کي، ائمتاحانا دوشميه​سئنئز."