A A A A A

Bir il Bibliya


Bilər 30


1 Padşahlar 7:1-51
1. لاکئن سوليمانا اون‌اوچ ائل زامان چکدي کي، بوتون اؤز ساراييني تئکئب قورتارسين.
2. اونون تئکدئيي "لوبنان مِشه‌سي" آدلي سارايين اوزونلوغو يوز قول‌آچ، اِني اَلّي قول‌آچ، بويو دا اوتوز قول‌آچ ائدي. بو ساراي دؤرد ردئف سئدر سوتونلاردان و سوتونلار اوستونده اولان سئدر دئرَکلردن عئبارت ائدي.
3. سوتونلار اوستونده‌کي قيرخ بش دئره‌يئن اوستونده، سئدردن اولان تئرلر سالينميشدي و هر ردئفده اون بش دئرَک وار ائدي.
4. موشَبّک پنجره‌لر اوچ ردئف ائدي و اونلارين ائچئنده اوز-اوزه اوچ ردئف پنجره وار ائدي.
5. بوتون گئرئشلر و اونلارين چَرچئوه‌لري دؤردگوشه‌لي ائدي. پنجره‌لر اوچ ردئفده اوز-اوزه ائدئلر.
6. سوليمان سوتونلو بئر ايوان تئکدي. اونون اوزونلوغو اَلّي و اِني اوتوز قول‌آچ ائدي. ايوانين قاباغيندا آرتيرما و سوتونلار، اونلارين قاباغيندا دا هَشتي دوزلتدي.
7. او همچئنئن حؤکم وره‌جيی تخت اِيوانيني، يعني محکمه ايوانيني تئکدي و اونو دؤشَمه‌دن تاوانا قدر سئدر آغاجي ائله اؤرتدو.
8. اونون ياشاديغي ساراي، اِيوانين آرخاسيندا، او بئري حَيَطده ائدي و هَمن قورولوشدا تئکئلمئشدي. سوليمان آرواد آلديغي فئرعون قيزي اوچون ده بو اِيوان کئمي بئر اِو تئکدئردي.
9. بوتون بونلار بونؤوره‌دن داما و بايير طرفدن بؤيوک حَيَطه قدر کيفئيّتلي داشلاردان دوزَلمئشدي. بو داشلار ائچ و بايير طرفدن، اؤلچويه گؤره يونولموش و داش اَرّه‌سي ائله کَسئلمئشدئلر.
10. بونؤوره بؤيوک و کيفئيّتلي داشلاردان قويولموشدو؛ اون قول‌آچليق و سکّئز قول‌آچليق داشلاردان.
11. اونلارين اوستونده اؤلچويه گؤره يونولموش کيفئيّتلي داشلار و سئدر دئرَکلر وار ائدي.
12. بؤيوک حَيَط ده، ربّئن معبدئنئن ائچَري حَيَطي و معبدئن ايواني کئمي، اوچ ردئف يونولموش داش و بئر ردئف سئدر دئرَکلرله اَحاطه اولموشدو.
13. سوليمان پادشاه خئرام آدلي بئر نفري صوردان گتئرتدي.
14. اونون آناسي نَفتالي قبئله‌سئندن دول بئر آرواد، آتاسي دا صورلو بئر مئسگر ائدي. خئرام بورونجدن هر جور شي قاييرماق ائشئنده حئکمتلي، درّاکه‌لي و بئلئکلي آدام ائدي. او، سوليمان پادشاهين يانينا گلئب اونون بوتون ائشلرئني گؤردو.
15. خئرام ائکي بورونج سوتون دوزلتدي. بئرئنجي سوتونون بويو اون سکّئز قول‌آچ ائدي. ائکئنجئسئنئن اطرافينا اون‌ائکي قول‌آچليق بئر ائپ دولانميشدي.
16. او، سوتونلارين اوستونه تؤکمه بورونجدن ائکي باشليق دوزلتدي. هر ائکي باشليغين بويو بش قول‌آچ ائدي.
17. سوتونلارين اوستونده اولان باشليقلاردا حؤرمه تورلار و زنجئرواري چَلَنگلر وار ائدي. هر باشليقدا يدّي دنه وار ائدي.
18. او، سوتونلاري بله دوزلتدي. حؤرمه تورلارين اطرافيندا ائکي ردئف نار دوزلتدي کي، سوتونلارين اوستونده‌کي باشليقلاري اؤرتسونلر. هر باشليق اوچون ده بله اتدي.
19. اِيواندا اولان سوتونلارين اوستونده‌کي باشليقلار سو زانباغي شکلئنده دوزَلدئلمئشدي و هر بئرئنئن بويو دؤرد قول‌آچ ائدي.
20. هر ائکي سوتونون يوخاريسيندا اولان باشليقلار، حؤرمه تورلارين يانينداکي گئرده چيخينتينين اوست طرفئنده ائدي. هر باشليغين اوستونده دايره شکلئنده چَلَنگلرده ائکي يوز نار تصوئري وار ائدي.
21. خئرام معبدئن اِيوانيندا سوتونلار قويدو. صاغ طرفده اولان سوتونو قويوب اونو ياکئن، چاغيردي. سول طرفده اولان سوتونو قويوب اونو دا بوعَز آدلانديردي.
22. سوتونلارين اوستونده‌کي باشليقلار سو زانباغي شکلئنده ائدي. بلجه سوتونلارين ائشي قورتاريلدي.
23. خئرام تؤکولموش بورونجدن دايره شکلئنده بئر حوووض دوزلتدي. بئر کناريندان او بئري کنارينا قدر اون قول‌آچ ائدي، اونون درئنلئيي بش قول‌آچ ائدي و اوتوز قول‌آچليق بئر ائپ ده اونون اطرافينا دولانميشدي.
24. هر طرفدن کنارينين آلتيندان اونو بالقاباق تصوئرلري اَحاطه ادئردي. هر قول‌آچدا اون بالقاباق وار ائدي. بالقاباقلار ائکي ردئف ائدئلر و اونلار حوووضلا بئرلئکده تؤکولموشدولر.
25. حوووض اون‌ائکي تؤکمه اؤکوزون اوستونده دوردو: اوچو شئمالا، اوچو قربه، اوچو جنوبا، اوچو ده شرقه باخيردي. حوووض يوخاريدا، اونلارين اوستونده ائدي و اؤکوزلرئن بوتون آرخا حئصّه‌لري ائچَرئيه طرف ائدي.
26. حوووضون قالينليغي دؤرد بارماق قالينليغيندا ائدي، اونون کناري کاسا کناري کئمي دوزَلدئلمئشدي و آچيلان زانباغا بَنزه‌يئردي. او، ائکي مئن بَت سو توتوردو.
27. خئرام بورونجدن اون پايا دوزلتدي. هر پايانين اوزونلوغو دؤرد، اِني دؤرد و بويو دا اوچ قول‌آچ ائدي.
28. پايالار بله حاضيرلانميشدي: اونلارين يان لؤوحه‌لري وار ائدي و لؤوحه‌لر چَرچئوه‌يه بَرکئدئلمئشدي.
29. چَرچئوه‌نئن آراسيندا اولان لؤوحه‌لر اوستونده شئر، اؤکوز و کَرّوب تصوئرلري وار ائدي. همچئنئن چَرچئوه، شئر و بوزوو تصوئرلرئنئن يوخاريسيندا و آشاغيسيندا آسما چَلَنگلر وار ائدي.
30. هر پايانين دؤرد بورونج چرخي، بورونج اوخلاري و لَيَن اوچون دؤرد تؤکمه دسته‌يي وار ائدي. دستکلر هر طرفدن چَلَنگلرله بَزه‌دئلمئشدي.
31. پايانين باشليغيندا بئر دهنه وار ائدي. باشليغين بويو بئر قول‌آچ ائدي، دهنه ده مودوّر و بئر قول‌آچ ياريم اِنئنده ائدي، اوستونده اويمالار وار ائدي. لؤوحه‌لر دايره شکلئنده يوخ، دؤردگوشه‌لي ائدي.
32. دؤرد چرخ لؤوحه‌لرئن آلتيندا ائدي و چرخلرئن اوخلاري پايادا ائدي. بئر چرخين بويو بئر قول‌آچ ياريم ائدي.
33. چرخلرئن قورولوشو دؤيوش عارابالارينين چرخلري قورولوشو کئمي ائدي. اونلارين اوخلاري، فلکه‌لري، مئللري و توپلاري-هر شيي تؤکمه ائدي.
34. هر پايانين دؤرد کونجونده چيخينتي وار ائدي. چيخينتي‌لار پايايا بئتئشئک ائدي.
35. پايانين باشيندا ياريم قول‌آچ بويوندا مودوّر بئر چنبر وار ائدي. پايانين باشيندا اولان دستکلري و لؤوحه‌لري اؤزونه بئتئشئک ائدي.
36. خئرام دستکلرئن و لؤوحه‌لرئن اوستونده يِر چاتان قدر کَرّوب، شئر، خورما آغاجي تصوئرلري، اطرافيندا دا چَلَنگلر اويدو.
37. بلجه اون پايا دوزلتدي. اونلارين هاميسي بئر تؤکمه، بئر اؤلچوده و بئر قورولوشدا ائدي.
38. خئرام بورونجدن اون لَيَن دوزلتدي، هر لَيَن قيرخ بَت توتوردو؛ هر لَيَن دؤرد قول‌آچ اِنئنده ائدي و اون پايالارين هر بئري اوستونده بئر لَيَن وار ائدي.
39. پايالارين بِشئني معبدئن جنوب طرفئنده، بِشئني ده معبدئن شئمال طرفئنده قويدو. حوووضو دا معبدئن جنوب-شرق کونجونده يِرلَشدئردي.
40. خئرام قازانلار، کورَکلر و لَيَنچه‌لر ده دوزلتدي. خئرام ربّئن معبدي اوچون سوليمان پادشاهين امري ائله بوتون بو ائشلري گؤروب قورتاردي:
41. ائکي سوتون؛ سوتونلارين اوستونده ائکي مودّور باشليق؛ ائکي حؤرمه تور کي، سوتونلارين اوستونده‌کي ائکي مودّور باشليغي اؤرتسونلر؛
42. ائکي ردئفده دؤرد يوز نار تصوئري کي، سوتونلارين اوستونده اولان مودّور باشليقلاري اؤرتسونلر؛
43. اون پايا؛ پايالارين اوستونده اون لَيَن؛
44. حوووض؛ حوووضون آلتيندا اون ائکي تؤکمه اؤکوز؛
45. خَکَندازلار، کورَکلر، و لَيَنچه‌لر. بوتون بو اشيالاري خئرام ربّئن معبدي اوچون پادشاه سوليمانين امري ائله جئلالانميش بورونجدن دوزلتمئشدي.
46. پادشاه بونلاري اوردون چايينين کنارينداکي اووادا، سوکّوتلا صارِتان آراسينداکي گئل‌لي تورپاقلاردا تؤکموشدو.
47. بوتون بو اشيالار حَددن آرتيق چوخ اولدوغو اوچون، سوليمان اونلاري چکمه‌دي و بورونجون چکئسئني موعَيّن اتمه‌دي.
48. سوليمان ربّئن معبدئنده‌کي بوتون بو اشيالاري دوزلتدي: قيزيل قوربانگاه؛ قيزيل مئز کي، اوستونه تقدئس چؤرکلري قويولاردي؛
49. خالئص قيزيلدان چيراقدانلار کي، ائچ اوتاغين قاباغيندا بِشي صاغ طرفده، بِشي ده سول طرفده دوروردولار؛ قيزيلدان اولان قؤنچه، چيراقلار و ماشالار؛
50. خالئص قيزيلدان کاسالار، پئلته ماشالاري، لَيَنچه‌لر، قاشيقلار و بوخوردانلار؛ ائچ اوتاغين، يعني لاپ موقدّس يِرئن و بؤيوک اوتاغين قاپي تايلاري اوچون قيزيلدان لولالار.
51. سوليمان پادشاهين، ربّئن معبدئنده گؤردويو بوتون ائشلر قورتاردي. سوليمان آتاسي داوودون تقدئس اتدئيي قيزيل-گوموشو و اشيالاري ائچَري گتئرئب، ربّئن معبدئنئن خزئنه‌لرئنه قويدو.

1 Padşahlar 8:1-66
1. او زامان سوليمان پادشاه ائسرايئلئن آغساقّال‌لاريني، بوتون قبئله باشچيلاريني، يعني ائسرايئل اؤولادلارينين نسئل رهبرلرئني اورشلئمه، اؤزونون يانينا ييغدي کي، ربّئن عهد سانديغيني داوودون شهري اولان صَحيوندان يوخاري گتئرسئنلر.
2. يدّئنجی آيدا اولان بايرام واختي، يعني اتانئم آييندا بوتون ائسرايئل خالقي سوليمان پادشاهين يانينا ييغيلدي.
3. سونرا بوتون ائسرايئل آغساقّاللاري گلدئلر و کاهئنلر ربّئن سانديغيني گؤتوردولر.
4. کاهئنلر و لاوئلی‌لر، ربّئن سانديغيني و اونونلا بئرلئکده، حوضور چاديريني و چاديردا اولان بوتون موقدّس اشيالاري يوخاري گتئردئلر.
5. سوليمان پادشاه و اونون يانينا ييغيلميش بوتون ائسرايئل جاماعاتي سانديغين قاباغيندا او قدر قويون-کچي و اؤکوز قوربان کَسدئلر کي، چوخلوغونا گؤره سايي‌-حسابا گلمَز.
6. کاهئنلر ربّئن عهد سانديغيني معبدئن ائچ اوتاغينا، يعني لاپ موقدّس يره، کَرّوبلارين قانادلاري آلتينداکي اؤز يرئنه گتئردئلر.
7. کَرّوبلار قانادلاريني سانديغين يري اوستونده آچميشديلار، اونلار سانديغي و اونون دئرَکلرئني يوخاريدان اؤرتموشدولر.
8. دئرَکلر اله اوزون ائدي کي، اونلارين اوجو ائچ اوتاغين قاباغينداکي موقدّس يردن گؤرونوردو، آنجاق بايير طرفدن گؤرونموردو. اونلار بو گونه قدر اوراداديرلار.
9. سانديقدا هچ بئر شي يوخ ائدي، مگر موسانين خورِبده قويدوغو ائکي داش لؤوحه‌سي. رب اورادا ائسرايئل اؤولادلاري ائله، مئصئر تورپاغيندان چيخديقلاري زامان عهد باغلادي.
10. کاهئنلر موقدّس يردن چيخديقلاري واخت، بولود ربّئن معبدئني اله دولدوردو کي،
11. کاهئنلر بولودا گؤره دايانيب خئدمت اده‌بئلمه‌دئلر. چونکي ربّئن شؤوکتي اونون معبدئني دولدورموشدو.
12. او واخت سوليمان ددي: "رب بويوروب کي، قالين قارانليقدا ساکئن اولاجاق.
13. دوغرودان دا من سنئن اوچون شؤوکتلي بئر معبد تئکمئشم کي، سنئن ابدی ياشاياجاغين يِر اولسون."
14. پادشاه اوزونو دؤنده‌رئب بوتون ائسرايئل جاماعاتينا برکت وردی. بو زامان بوتون ائسرايئل جاماعاتي آياق اوسته دورموشدو.
15. پادشاه ددي: "ائسرايئلئن تاريسي رب موبارک اولسون کي، آتام داوودا اؤز آغزي ائله دانيشدي و اؤز اَلي ائله اونو يرئنه يتئردي. او دمئشدي:
16. «من خالقيم ائسرايئلي مئصئردن چيخارتديغيم گوندن بَري ائسرايئلئن هچ بئر قبئله‌سئندن بئر شهر سچمه‌دئم کي، اورادا بئر معبد تئکئم و آديم اوستونده اولسون.»
17. آتام داوودون اوره‌يئنده آرزو وار ائدي کي، ائسرايئلئن تاريسي ربّئن آدينا بئر معبد تئکسئن.
18. لاکئن رب آتام داوودا ددي: «سن ياخشي ادئبسن کي، منئم آديما بئر معبد تئکمک نئيّتئنه دوشوبسن.
19. آنجاق معبدي سن تئکميه‌جکسن، سنئن بِلئندن گلن اوغلون منئم آديما معبد تئکه‌جک.»
20. رب وعده وردئيئني يرئنه يتئردي: چونکي من آتام داوودون يرئنه قالخيب، ربّئن ددئيي کئمي ائسرايئل تختئنده اوتورموشام و ائسرايئلئن تاريسي ربّئن آدينا معبد تئکمئشم.
21. اورادا سانديق اوچون يِر حاضيرلاميشام کي، ربّئن باغلاديغي عهد اونون ائچئنده‌دئر، او عهد کي، رب آتالاريميزي مئصئر تورپاغيندان چيخارتديغي واخت اونلارلا باغلادي."
22. سوليمان ربّئن قوربانگاهي قاباغيندا، بوتون ائسرايئل جاماعاتينين حوضوروندا دوردو و اَللرئني گؤيه طَرف آچيب
23. ددي: "يارب، ائسرايئلئن تاريسي! نه يوخاريدا گؤيده، نه ده آشاغيدا يرده سنئن کئمي تاري وار. سن عهدئني و محبّتئني بوتون او قول‌لارينلا ساخلاييرسان کي، بوتون اورَکلري ائله سنئن حوضوروندا ياشاييرلار.
24. سن قولون آتام داوودا وردئيئن وعده‌يه عمل ادئبسن؛ اؤز دئلئن ائله ددئيئني بو گون اؤز اَلئنله يرئنه يتئرئبسن.
25. يارب، ائسرايئلئن تاريسي، ائندي ده قولون آتام داوودا وردئيئن وعده‌يه عمل ات، اؤزون دمئشدئن: «اگر سن يولوملا گتدئيئن کئمي، اوغوللارين دا يولوملا گدئب اؤز عمل‌لرئنه دئقّت اتسه‌لر، ائسرايئل تختئنده سنئن نسلئندن بئر کئشي اَسکئک اولماياجاق.»
26. ای ائسرايئلئن تاريسي، ائندي قولون آتام داوودا ددئيئن سؤزون تصدئق ادئلسئن!
27. لاکئن، مگر تاري دوغرودان دا يرده ساکئن اولار؟ سن گؤيه و گؤيلرئن گؤيونه سيغمازسان، او کي قالدي منئم تئکدئيئم معبده!
28. آنجاق سن بو قولونون دوعاسينا و يالواريشينا نظر سال، يارب تاريم، بو گون سنئن قاباغيندا اتدئيي فرياديني و دوعاسيني اشئت.
29. قوي سنئن نظرئن گجه-گوندوز بو معبدئن اوستونده اولسون. بو يِر باره‌ده سن ديئبسن: «منئم آديم اورادا اولاجاق.» قولونون بورايا اوز توتوب اتدئيي دوعاسيني اشئت.
30. بو يِره طرف دوعا اتدئکلري واخت، اؤز قولونون و خالقين ائسرايئلئن يالواريشلاريني سن اشئت؛ گؤيلرده اولان مسکنئنده اشئت و باغيشلا!
31. اگر بئر آدام اؤز ياخينينين ضئدّئنه گوناه اتسه و اوندان آند ائچمک طلب اولونسا، او دا گلئب بو معبده، سنئن قوربانگاهين قاباغيندا آند ائچسه،
32. او واخت سن گؤيده اشئت، عمل ات، و قوللارينا حؤکم ات. شَرور آدامين عملئني اؤز باشينا دؤنده‌ره‌رک اونو محکوم ات و صالح آداما صالحلئيئنه گؤره بَرائت ور.
33. خالقين ائسرايئل سنئن ضئدّئنه گوناه اتدئيي اوچون دوشمن قاباغيندا مغلوب اولاندا، اگر اونلار تکرار سنه طرف دؤنوب آديني دئل‌لرئنه گتئرسه‌لر و بو معبده سنه يالواريب فرياد اتسه‌لر،
34. او واخت سن گؤيده اشئت و خالقين ائسرايئلئن گوناهيني باغيشلا، اونلاري گئنه آتالارينا وردئيئن تورپاغا قايتار.
35. خالقين سنئن ضئدّئنه گوناه اتدئيي اوچون گؤي باغلانيب ياغيش ياغمايان واخت، اگر بو يره طرف دوعا ادئب آديني دئل‌لرئنه گتئرسه‌لر و اگر سن اونلارا بلا گؤندردئيئن واخت اؤز گوناهلاريندان دؤنسه‌لر،
36. او واخت سن گؤيده اشئت، قوللارينين و خالقين ائسرايئلئن گوناهيني باغيشلا و گده‌جکلري طرف ياخشي يولو اونلارا اؤيرَت. خالقينا ائرث وردئيئن تورپاغينا دا ياغيش گؤندر.
37. اگر اؤلکه‌ده آجليق اولسا، وبا اولسا، ائستي يِل يا دا کوف، چَيئرتکه يا دا بئتکي قوردو اولسا، اگر دوشمن اونلاري اؤلکه‌نئن هر هانسي بئر شهرئنده موحاصئره‌يه آلسا، هانسي بلا، هانسي ناخوشلوق اولور، اولسون،
38. بئر شخصئن، يا دا بوتون خالقين ائسرايئل طرفئندن بئر دوعا و يالواريشي اولسا، هر کس اؤز اوره‌يئنئن دردئني بئلئب بو معبده طرف اَللرئني آچسا،
39. او واخت سن گؤيده، اؤز مسکنئنده اشئت، باغيشلا و بئر علاج ات. اوره‌يئني بئلدئيئن هر آداما بوتون عمل‌لرئنه گؤره عوض ور، چونکي هر ائنسانين اوره‌يئني فقط سن بئلئرسن.
40. اله کي، اونلار آتالاريميزا وردئيئن تورپاقدا ياشاديقلاري بوتون گونلر بويو سندن قورخسونلار.
41. اگر خالقين ائسرايئلدن اولمايان ياداِللي ده سنئن آدينين خاطئرئنه اوزاق اؤلکه‌دن گلسه،
42. چونکي سنئن بؤيوک آدين، قودرتلي اَلئن و اوزانان قولون باره‌ده اشئده‌جکلر، او ياداِللي گلئب بو معبده طرف دوعا ادنده،
43. او واخت سن گؤيده، اؤز مسکنئنده اشئت و ياد اِللي‌نئن سنه فرياد اتدئيي هر شيي ات کي، يِر اوزونون بوتون خالقلاري دا سنئن آديني تانيسينلار، خالقين ائسرايئل کئمي سندن قورخسونلار و بئلسئنلر کي، تئکدئيئم بو معبد سنئن آدينلا چاغيريلير.
44. اگر خالقين گؤنده‌ردئيئن يوللا دوشمنلرئنئن ضئدّئنه موحارئبه‌يه چيخسالار و سنئن سچدئيئن شهره طرف، سنئن آدينا تئکدئيئم معبده طرف ربّه دوعا اتسه‌لر،
45. سن گؤيده اونلارين دوعا و يالواريشلاريني اشئت، اونلارين طرفئنده اول.
46. اگر اونلار سنئن ضئدّئنه گوناه اتسه‌لر–چونکي گوناه اتمه‌ين ائنسان يوخدور–سن قضبله‌نئب اونلاري دوشمنه تسلئم اده‌سن و دوشمن اونلاري اسئر ادئب ياخين يا اوزاق تورپاغينا آپارسا،
47. اگر اونلار اسئرلئکده اولدوقلاري اؤلکه‌ده اورَکلرئني دؤنده‌رئب تؤوبه اتسه‌لر و اسئر اولان يرده سنه دوعا ادئب دِسه‌لر کي، «بئز گوناه و خاطا اتمئشئک، پئسلئک اتمئشئک»،
48. اگر اونلاري اسئر ادن دوشمنلرئن اؤلکه‌سئنده بوتون اورَکلري و جانلاري ائله سنه طرف دؤنسه‌لر، آتالارينا وردئيئن تورپاغا، سچدئيئن شهره و آدينا تئکدئيئم معبده طرف اوز توتوب سنه دوعا اتسه‌لر،
49. او واخت سن گؤيده، اؤز مسکنئنده اونلارين دوعا و يالواريشلاريني اشئت، اونلارين طرفئنده اول.
50. سنئن ضئدّئنه گوناه ادن خالقيني و اونلارين سنئن ضئدّئنه اتدئکلري بوتون تقصئرلري باغيشلا و اونلاري اسئر آلانلارا شفقت ور کي، اونلارلا شفقتلي رفتار اتسئنلر.
51. چونکي اونلار سنئن خالقين، سنئن ائرثئندئرلر. سن اونلاري مئصئردن، دمئر اَرئتمه‌ کوره‌سئنئن ائچئندن چيخارديبسان.
52. بو قولونون و خالقين ائسرايئلئن يالواريشينا نظر يتئر کي، اونلارين سنه فرياد اتدئکلري هر سؤزو اشئده‌سن.
53. چونکي، يا پروردئگار رب، سن ائرثئن اولماق اوچون اونلاري يِر اوزونون بوتون خالقلاريندان آييردين. نجه کي، بونو آتالاريميزي مئصئردن چيخارتديغين واخت قولون موسا واسئطه‌سئله دمئشدئن."
54. سوليمان بوتون بو دوعا و يالواريشيني ربّه ديئب قورتاراندان سونرا، ربّئن قوربانگاهي قاباغيندان، اَللري گؤيه آچيق حالدا، دئزه دوشدويو يردن قالخدي.
55. او آياغا دوردو و بوتون ائسرايئل جاماعاتينا اوجا سَسله برکت ورئب ددی:
56. "رب موبارک اولسون کي، وردئيئن وعده‌لرئن هاميسينا موطابئق خالقي ائسرايئله دئنجلئک ورئب! اؤز قولو موسانين واسئطه‌سئله وردئيي ياخشي وعده‌لرئندن هچ بئري هدر اولماييب.
57. قوي تاريميز رب آتالاريميزا يار اولدوغو کئمي بئزه ده يار اولسون، قوي بئزي بوراخماسين و ترک اتمه‌سئن.
58. بئزئم اورَکلرئمئزي اؤزونه طرف يؤنَلتسئن کي، اونون بوتون يوللاري ائله گِدَک و اونون آتالاريميزا بويوردوغو امرلرئنه، قايدالارينا و حؤکملرئنه عمل اِدَک.
59. قوي ربّئن قاباغيندا بو يالواريش سؤزلرئم گجه-گوندوز رب تاريميزين خاطئرئنده اولسون، اؤز قولونون و خالقي ائسرايئلئن ياخشيليغي اوچون گون به گون چاليشسين.
60. اله کي يِر اوزونون بوتون خالقلاري بئلسئن کي، فقط رب تاري‌دير، اوندان باشقا يوخدور.
61. قوي سئزئن اوره‌يئنئز کامئل بئر شکئلده تاريميز ربّه صادئق اولسون کي، بو گون اولدوغو کئمي اونون قايدالاري ائله گده‌سئنئز و اونون امرلرئنه عمل اده‌سئنئز."
62. پادشاه و اونونلا بئرلئکده بوتون ائسرايئل ربّئن قاباغيندا قوربانلار کَسدي.
63. سوليمانين ربّه تقدئم اتدئيي باريش قوربانلارينين سايي ائيئرمي ائکي مئن اؤکوز و يوز ائيئرمي مئن قويون-کچي ائدي. بلجه، پادشاه و بوتون ائسرايئل اؤولادلاري ربّئن معبدئني تقدئس اتدئلر.
64. همئن گون پادشاه ربّئن معبدي قاباغينداکي حَيَطئن اورتاسيني تقدئس اتدي کي، يانديرما قوربانلاريني، تاخيل تقدئملرئني و باريش قوربانلارينين پئيئني اورادا تقدئم اتسئن، چونکي ربّئن قاباغينداکي بورونج قوربانگاه کئچئک ائدي و يانديرما قوربانلاري، تاخيل تقدئملري و باريش قوربانلارينين پئيي اورايا يِرلَشمَزدي.
65. او واخت سوليمان و اونونلا بئرلئکده بؤيوک بئر جاماعات، خَمات کِچئدئندن مئصئر دره‌سئنه قدر ياشايان بوتون ائسرايئل، تاريميز ربّئن قاباغيندا يدّي گون و داها يدّي گون يعني اون دؤرد گون بايرام توتدو.
66. سکّئزئنجي گون سوليمان خالقي بوراخدي. اونلار پادشاها برکت ورئب، ربّئن قولو داوودا و خالقي ائسرايئله اتدئيي بوتون ياخشيليقلارا گؤره شادليقلا و شاد اورَکله اؤز اِولرئنه گتدئلر.

Zəbur 68:28-35
28. اي تاري قودرتئني گؤرسد؛ بئزئم اوچون اتدئيئن کئمي قودرتئني گؤرسد، اي تاري،
29. اورشلئمده اولان معبدئندن. پادشاهلار سنه تؤحفه‌لر گتئرئرلر.
30. قاميشليقدا ياشايان حيوانلاري تنبه ات، او گاميشلار سوروسونو، او بوزوو خالقلاري؛ گوموش سِوَنلري آياق آلتيندا اَز، موحارئبه سِوَن خالقلاري داغيت.
31. مئصئردن الچئلر گله‌جکلر، کوشلولار اللرئني تز تارييا اوزاداجاقلار.
32. اي ير اوزونون مملکتلري، تارييا نغمه اوخويون، پروردئگارا پرستئش نغمه‌سي اوخويون. سِلا
33. قدئم گؤيلرئن گؤيو اوستونه مئنه‌نه نغمه اوخويون؛ قولاق آسين، گوجلو سسئني اشئتدئرئر.
34. تارينين قودرتئني اعلان ادئن؛ اونون جلالي ائسرايئل اوستونده‌دئر، اونون قودرتي گؤيلرده‌دئر.
35. اي تاري، موقدّس يرئنده نه هيبتلي‌سن! خالقينا قووّت و قودرت ورن تاري، ائسرايئلئن تاريسي اودور. تاري موبارک اولسون.

Süleymanın Məsəlləri 17:16-17
16. نه اوچون آخماق آدامين الئنده، حئکمتي ساتين آلماق اوچون مال وار؟! اونون کي، بونا عاغيلي يوخدور.
17. بئر دوست همئشه سِوَر، قارداش دارليق اوچون آنادان اولوب.

Yəhya 11:1-29
1. مريم و باجيسي مارتانين کندي بيت‌عنيادان، ائلعازر آديندا بئر کئشي ناخوش ائدي.
2. بو اله او مريم ائدي کي، ربّين آياقلارينا ياغ تؤکوب ساچلاري ائله سئلدي. ناخوش اولان ائلعازر اونون قارداشي ائدي.
3. اونا گؤره باجي‌لار عئسايا خبر گؤنده‌ردئلر: "آغا، سودئيئن آدام ناخوشدور."
4. عئسا بونو اشئدنده ددي: "بو ناخوشلوغون آخيري اؤلوم ديئل، تارينين جلالي اوچوندور کي، تارينين اوغلو اونونلا عئزّت تاپسين."
5. عئسا مارتا، باجيسي مريم، و ائلعازري سوئردي.
6. ​​​ائلعازرئن ناخوشلوغونو اشئدندن سونرا، عئسا قالديغي يرده ائکي گون ده قالدي.
7. اوندان سونرا شاگئردلرئنه ددي: "گلئن گئنه يهودئيه دئيارينا گدک."
8. شاگئردلري اونا ددئلر: "اوستاد، يهودئلر سني داشلاماق ائسته‌يئردئلر و ائندي سن گئنه اورايا گدئرسن؟!"
9. عئسا جاواب وردي: "مگر بئر گون اون‌ائکي ساعات ديئل؟ گوندوزده يرئين آدام سوروشمز. چونکي بو دونيانين ائشيغيندا گؤرور.
10. آمّا گجه قارانليغيندا گزن آدامدير کي، ائشيغي اولماديغينا گؤره سوروشر."
11. عئسا بو سؤزلري دئيندن سونرا اونلارا ددي: "دوستوموز ائلعازر يوخويا گدئب. گدئرم اونو يوخودان اوياديم."
12. شاگئردلر اونا ددئلر: "آغا، اگر يوخويا گتمئشسه، توختاياجاق."
13. عئسانين او سؤزدن مقصدي ائلعازرئن اؤلومو ائدي. آمّا اونلار اله گومان اتدئلر کي، يوخودان حاصئل اولان دئنجلمکدن دانيشير.
14. اونون اوچون ده عئسا آچيقجا اونلارا ددي: "ائلعازر اؤلوبدور.
15. سئزئن ائمان گتئرمه‌يئنئز اوچون اورادا اولماديغيمدان چوخ سوئنئرم. آمّا گلئن اونون يانينا گدک."
16. "اکئز" آدلانان توماس او بئري شاگئردلره ددي: "گلئن بئز ده اونونلا گدئب اونونلا بئرلئکده اؤلک."
17. عئسا بيت‌عنيايا ياخينلاشاندا، ائلعازرئن قبئره قويولماسيندان دؤرد گون کچئردي.
18. بيت عنيانين اورشلئمدن ياريم آغاجدان آز آراسي وار ائدي.
19. و يهودئلردن چوخلاري مريم و مارتانين يانينا گلمئشدئلر کي، قارداشلارينين اؤلومو اوچون اونلارا تسلّي ورسئنلر.
20. مارتا عئسانين گلدئيئني اشئدن واخت، اونون قاباغينا چيخدي. آمّا مريم اِوده اوتورموشدو.
21. مارتا عئسايا ددي: "آغا، اگر بورادا اولسايدين، قارداشيم اؤلمزدي.
22. و ائندي ده بئلئرم کي، تاريدان نه ائستيه​سن، تاري سنه وره​جک."
23. عئسا اونا ددي: "قارداشين گئنه دئرئله​جک."
24. مارتا اونا ددي: "بئلئرم کي، قئيامت گونونده، او آخير گونده گئنه دئرئله​جک."
25. عئسا اونا ددي: "«قئيامت و حيات منم. منه ائمان گتئرن اؤلسه ده، ياشايار.
26. و ياشايان هر کس منه ائمان گتئرسه، اصلا اؤلمز. آيا بونا ائنانيرسان؟"
27. مارتا اونا ددي: "بلي يارب، ائنانميشام کي، مسئح سنسن؛ او تارينين اوغلو کي، اونون بو دونيايا گله​جه‌يي قاباقدان خبر ورئلئب."
28. بونو دئيندن سونرا گدئب باجيسي مريمي گئزلئجه چاغيردي و اونا ددي: "اوستاد بورادادير و سني چاغيرير."
29. مريم بونو اشئدنده تله‌سئک قالخيب عئسانين يانينا گلدي.