A A A A A

Bir il Bibliya


Bilər 20


2 Şamuel 11:1-27
1. باهار گلنده پادشاهلار موحارئبه‌يه چيخان واخت، داوود يوآبي، سرکرده‌لرئني، بوتون ائسرايئل قوشونو ائله بئرلئکده موحارئبه‌يه گؤندردي. اونلار عَمّونلولاري قيريب رَبّاني موحاصئره‌يه آلديلار. آمّا داوود اورشلئمده قالدي.
2. بئر آخشامچاغي داوود ياتاغيندان قالخيب پادشاه سارايينين دامي اوستونده گَزئردي. او، دامدان باخيب گؤردو کي، بئر آرواد يويونور. آرواد چوخ گؤزل ائدي.
3. داوود آدام گؤندرئب بو آرواد باره‌سئنده خبر آلدي. بئري بله ددي: "مگر بو آرواد اِلئآم قيزي خئتلي اورئيانين آروادي بَتشِبَع ديئل؟"
4. داوود قاصئدلر گؤندرئب اونو يانينا گتئرتدي. آرواد اونون يانينا گلدئکده داوود اونونلا ياتدي و آرواد اؤزونو نجئسلئيئندن تمئز ادندن سونرا اِوئنه قاييتدي.
5. آرواد بوندان بويلو اولوب داوودا خبر گؤندردي: "من بويلويام."
6. داوود يوآبين يانينا آدام گؤندرئب ددي: "خئتلي اورئياني منئم يانيما گؤندر." يوآب اورئياني داوودون يانينا گؤندردي.
7. اورئيا داوودون يانينا گلنده داوود يوآبين، خالقين و دؤيوشون وضعئيّتئني سوروشدو.
8. سونرا داوود اورئيايا ددي: "اِوئنه گت، ائستئراحت اِله." اورئيا پادشاهين ساراييندان چيخاندا پادشاه داليسيجا اونا هدئيّه ده گؤندردي.
9. لاکئن اورئيا پادشاهين سارايينين قاپيسيندا، آغاسينين بوتون موحافئظه‌چئلري ائله بئرلئکده ياتيب اِوئنه گتمه‌دي.
10. داوودا خبر وردئلر: "اورئيا اِوئنه گتمه‌دي." داوود اورئيايا ددي: "مگر سن يولدان گلمه‌يئبسن؟ نئيه اِوئنه گتمه‌دئن؟"
11. اورئيا داوودا ددي: "عهد سانديغي، ائسرايئللی‌لر و يهودالي‌لار چاديرلاردا قالارکن، آغام يوآب و آغامين سرکرده‌لري چؤل‌لرده مسکن سالارکن، من نجه يمک-ائچمَک و آرواديملا ياتماق اوچون اِوئمه گده بئله‌رم؟ حياتينا و جانينا آند اولسون، من بله شي اتمه‌رم."
12. داوود اورئيايا ددي: "بو گون ده بورادا قال، صاباح سني يولا سالارام." اورئيا او گونو و گونون صاباحيني اورشلئمده قالدي.
13. داوود اونو چاغيردي و اورئيا اونون حوضوروندا يِيئب ائچدي. داوود اونو کِفلَندئردي. اورئيا پادشاهين يانيندان آخشام اوستو چيخدي. او گئنه ده اوئنه گتمه‌دی؛ آغاسينين موحافئظه‌چئلرئنئن يانينا گدئب، اورادا اؤز ياتاغيندا ياتدي.
14. سحر آچيلاندا داوود يوآبا مکتوب يازدي و مکتوبو اورئيانين اَلي ائله يوآبا گؤندردي.
15. مکتوبوندا بله يازميشدي: "اورئياني آلوولانان دؤيوشلره گؤندر و اونو لاپ قاباق خطّه قوي و يانيندان چکئل کي، وورولوب اؤلدورولسون."
16. يوآب شهري موحاصئره آلتيندا ساخلايارکن، اورئياني او يره تعيئن اتدي کي، بئلئردی دوشمنئن جنگاورلرئنئن لاپ جسورلاري اورادادير.
17. شهرئن آداملاري قالخيب يوآبلا دؤيوشه چيخديلار. داوودون آداملاريندان اؤلَنلر اولدو. خئتلي اورئيا دا اؤلَنلر آراسيندا ائدي.
18. يوآب داوودون يانينا آدام گؤندرئب دؤيوش حاقّيندا اولان معلوماتلارين هاميسيني خبر وردی.
19. قاصئده امر ادئب ددي: "دؤيوش حاقّيندا اولان بوتون معلوماتلاري پادشاها ديئب بئتئرَنده،
20. پادشاه سنه قضبله‌نئب دئيَر: «شهره هوجوم اتمک اوچون نئيه بو قدر ياخينلاشدينيز؟ مگر بئلمئردئنئز کي، دووارين اوستوندن سئزه اوخ آتاجاقلار؟
21. يِروبّشِت اوغلو اَبئمِلِکي کئم ووردو؟ مگر دووارين اوستوندن بئر آرواد ديئرمانين اوست داشيني اونون اوستونه آتمادي، اله کي، تِبِصده اؤلدو؟ بس نئيه بو قدر دووارا ياخينلاشدينيز؟» او زامان دئيَرسن: «قولون خئتلي اورئيا دا اؤلوب.»"
22. قاصئد يولا دوشدو و داوودون يانينا گلئب يوآبين گؤندردئيي معلوماتلارين هاميسيني اونا خبر وردی.
23. قاصئد داوودا ددي: "آداملار بئزه قالئب گلدئلر. اونلار بئزئم ضئدّئمئزه دؤيوشمَک اوچون چؤله چيخديلار. اونلاري دروازانين گئرئشئنه قدر قوودوق.
24. اوخ‌آتانلار دوواردان دؤيوشچولرئن اوستونه اوخ ياغديرديلار و پادشاهين آداملاريندان اؤلَنلر ده اولدو. قولون خئتلي اورئيا دا اؤلَنلر آراسيندادير."
25. داوود قاصئده ددي: "يوآبا دئيَرسن کي، «بو حادئثه سنئن گؤزونده پئس گؤرونمه‌سئن، چونکي قيلينج گاه بئرئنئن، گاه دا آيريسينين باشيني يِيئر. شهرئن ضئدّئنه دؤيوشو گوجلَندئرئب اوراني ييخ.» بونونلا يوآبي تشوئق ات."
26. اورئيانين آروادي اَرئنئن اؤلومونو اشئدنده اونون اوچون ياس توتدو.
27. ياس قورتاراندان سونرا داوود آدام گؤندرئب بَتشِبَعي اؤز اِوئنه گتئردي و او، داوودون آروادي اولدو. سونرا داوودا بئر اوغول دوغدو. لاکئن داوودون گؤردويو بو ائش ربّئن گؤزونده پئس ائدي.

2 Şamuel 12:1-31
1. رب ناتاني داوودون يانينا گؤندردي. ناتان اونون يانينا گلئب اونا ددي: "بئر شهرده ائکي آدام وار ائدي. اونلاردان بئري وارلي، او بئري ده کاسيب ائدي.
2. وارلي آدامين چوخلو سورولري و ناخيري وار ائدي.
3. لاکئن کاسيب آدامين هچ بئر شيي يوخ ائدي مگر ساتين آليب بَسله‌دئيي بئر کؤرپه دئشي قوزو. او، قوزوسونو اؤز يانيندا اوشاقلاري ائله برابر بؤيوتموش، اونا اؤز يِمه‌يئندن يدئرتمئش، اؤز ائچدئيي قابدان سو ائچئرتمئش و قوينوندا ياتيرتميشدي. قوزو اونا دوغما قيزي کئمي ائدي.
4. بئر گون وارلي آدامگئله بئر موسافئر قوناق گلدي. وارلي آدام قييمادي کي، اؤز سوروسوندن و ناخيريندان حيوان گؤتوروب کَسسئن و اونلارا گلن قوناغا يمک حاضيرلاسين. او گدئب کاسيبين قوزوسونو گؤتوروب کسدي و يانينا گلن قوناغا يمک حاضيرلادي."
5. بو واخت داوودون قضبي او آدامين ضئدّئنه آلوولاندي و ناتانا ددي: "وار اولان ربّئن حاقّي اوچون، بونو ادن آدام اؤلومه لايئقدئر.
6. بو ائشي گؤردويونه گؤره، رحم اتمه‌دئيئنه گؤره، قوزونون عوضئني دؤرد قات وره‌جک."
7. او واخت ناتان داوودا ددي: "او آدام سنسن! ائسرايئلئن تاريسي رب بله ديئر: «من ائدئم کی، سني ائسرايئلئن اوستونده پادشاه مسح اتدئم. من ائدئم کی، سني شاعولون اَلئندن قورتارديم.
8. سنه آغانين اِوئني ده وردئم. آغانين آروادلاريني قوينوندا ياتيرديب، ائسرايئل و يهودا نسلئني سنه وردئم. اگر بو سنه آزليق اولسايدي، سنه بله شيلردن داها چوخونو علاوه اِدَردئم.
9. نه اوچون ربّئن سؤزونه حقارتله باخيب، ربّئن گؤزونده پئس اولان ائشي اتدئن؟ خئتلي اورئياني قيلينج آغزيندان کچئرتدئن، اونون آرواديني اؤزونه آرواد اتدئن. اورئياني عَمّون اؤولادلارينين قيلينجي ائله اؤلدورتدوردون.
10. بوندان سونرا هچ واخت قيلينج سنئن اِوئندن آيريلماياجاق، چونکي سن منی تحقئر اتدئن و خئتلي اورئيانين آرواديني اؤزونه آرواد اتدئن."
11. بونا گؤره ده رب ديئر: «باخ سنئن ضئدّئنه پئسلئيي اؤز اِو اهلئندن چيخارداجاغام. سنئن گؤزونون قاباغيندا حتّا آروادلاريني گؤتوروب ياخينينا وره‌جيم. او دا گوندوزون گون‌اورتا چاغي سنئن آروادلارينلا ياتاجاق.
12. بو ائشي سن گئزلي اتدئن، آمّا من بو ائشي بوتون ائسرايئللی‌لرئن قاباغيندا گوندوزون گون‌اورتا چاغي اده‌جيم.»"
13. داوود ناتانا ددي: "من ربّئن ضئدّئنه گوناه اتمئشم." ناتان داوودا ددي: "رب ده سنئن گوناهيني سئلئبدئر، اؤلمَيه‌جکسن.
14. لاکئن بونو اتمکله ربّئن دوشمنلرئنه بؤيوک فورصت ورئبسن کي، اونا کوفر دسئنلر. اونا گؤره ده قطعن سندن دوغولان اوشاق اؤله‌جک."
15. سونرا ناتان اِوئنه قاييتدي. رب داوودون اورئيانين دول آرواديندان اولان اوشاغيني ووردو و اوشاق ناخوشلادي.
16. داوود اوشاق اوچون تارييا يالواردي. اوروج توتوب گتدي و بوتون گجه‌ني قورو يرده اوزاندي.
17. اِوئنئن آغساقّاللاري اونو يردن قالديرماق اوچون يانيندا دايانديلار، لاکئن او قالخماق ائستمه‌دي و اونلارلا بئرلئکده چؤرک يمه‌دي.
18. يدّئنجی گون کؤرپه اؤلدو. داوودون اعيانلاري قورخدولار کی، اوشاغين اؤلدويونو اونا بئلدئرسئنلر و بله دوشوندولر: "اوشاق صاغ ائکَن اونو دئله توتدوق، لاکئن سؤزوموزه قولاق آسمادي. ائندي اوشاغين اؤلدويونونو اونا نجه دئيَک؟ اؤزونه بئر زئيان يتئرَر."
19. داوود اعيانلارينين پيچيلداشماسيني گؤرنده باشا دوشدو کي، اوشاق اؤلوب. اونا گؤره ده اعيانلارينا ددي: "آيا اوشاق اؤلدو؟" اونلار ددئلر: "اؤلدو."
20. داوود يردن قالخدي، يويونوب باشينا زيتون ياغي سورتدو و پالتارلاريني دَيئشئب، ربّئن اِوئنه گتدي و پرستئش اتدي. اِوه قاييديب يمک ائسته‌يئنده قاباغينا يمک قويدولار و او يدي.
21. او واخت اعيانلاري اونا ددئلر: "بو نه ائشدئر کي، ادئرسن؟ کؤرپه صاغ ائکن نه اوچون اوروج توتوب آغلادين، آمّا کؤرپه اؤلَنده دوروب چؤرک يدئن؟"
22. داوود جاواب وردی: "اوشاق صاغ اولاندا اوروج توتوب آغلاييرديم و ديئردئم کي، بلکه رب منه لوطف اِدَر، اوشاق صاغ قالار.
23. لاکئن ائندي اوشاق اؤلوب، نه اوچون اوروج توتوم؟ مگر اونو گری قايتارا بئله‌رم؟ من اونون يانينا گده‌جيم، لاکئن او منئم يانيما قاييتماياجاق."
24. داوود آروادي بَتشِبَعه تسلّی وردی و يانينا گئرئب اونونلا ياتدي. بَتشِبَع اونا بئر اوغول دوغدو و داوود اونون آديني سولِيمان قويدو. رب بو اوشاغي سِودی
25. و ناتان پيغمبرئن وسئله‌سئله سؤز گؤندردي. او دا ربّئن آدينا اوشاغين آديني يِدئدياه قويدو.
26. يوآب عَمّون اؤولادلارينين رَبّا شهرئنه هوجوم ادئب شاهنئشئن شهري آلدي.
27. سونرا يوآب داوودون يانينا قاصئدلر گؤندرئب ددي: "رَبّا شهري ائله موحارئبه ادئب سو منبعلرئني آلميشام.
28. آمّا ائندي سن خالقين قالان حئصّه‌سئني بئر يره ييغ و شهرئن ضئدّئنه اوردوگاه قوروب اوراني آل. يوخسا من گدئب شهري آلارام و بو ائش منئم آديما چيخار."
29. بلجه داوود دا بوتون خالقي ييغيب رَبّا شهرئنه گتدي و شهره هوجوم ادئب اوراني آلدي.
30. سونرا اونلارين پادشاهينين باشيندان تاجيني گؤتوردو. تاج قيزيلدان اولوب چکئسي بئر تالانت ائدي. اونون اوستونده قئيمتلي بئر داش وار ائدي. بو تاج داوودون باشينا قويولدو. داوود بو شهردن چوخلو قنئمت آپاردي.
31. او، شهرده اولان خالقي کؤچوردوب اَره، دمئر کولونگ، دمئر بالتا ائله گؤرولَن ائشلرده و کرپئج اِعماليندا ائشلَتدي. داوود عَمّونلولارين بوتون شهرلرئنده بله ادندن سونرا، بوتون خالقلا بئرلئکده اورشلئمه قاييتدي.

Zəbur 65:9-13
9. تورپاغين گؤروشويونه گلئرسن و اونو سوواريرسان، اونو حاصئل‌لي ادئرسن. تارينين چايي سو ائله دولودور؛ ائنسانلارين بوغداسيني فراهم ادئرسن، چونکي سن اونو بله حاضيرلاييبسان.
10. تورپاغين شيريملاريني سولاييرسان، چالالاريني دوزه‌لدئرسن، ياغيشلارلا اونو يومشالديرسان، تورپاغين محصولونو برکتلندئرئرسن.
11. ياخشيليقلارينلا ائلي تاجدار ادئرسن، سنئن يوللاريندان ياغ دامير،
12. چؤلون اوتلاقلارينا دامير، تپه‌لر شادليقلا بورونور.
13. اوتلاقلار سورولرله گِيئنئر، دره‌لر بوغدا ائله اؤرتولور؛ شادليقدان چيغيريرلار، نغمه اوخويورلار.

Süleymanın Məsəlləri 16:22-24
22. عاغيل، صاحئبئنه حيات بولاغي‌دير، لاکئن سفه‌لرئن تربئيه‌سي سفه‌لئکدئر.
23. حئکمتلي آدامين اوره‌يي اونون آغزيني آغيلّي ادر، دوداقلاري اوستونه علم آرتيرار.
24. خوش سؤزلر شان بالي کئمي‌دئر، جانا شئرئندئر، سوموکلره شفا.

Yəhya 6:22-51
22. او گونون صاباحي گؤلون او تاييندا اولان جاماعات آنلادي کي، شاگئردلر اورادا اولان بئرجه قاييغا مئنئب گدئبلر و عئسا اونلارلا همن قاييغا مئنئب گتمه‌يئب.
23. ​​​بو آرادا طئبريادان اؤزگه قاييقلار، او يرئن ياخينليغينا گلدئلر کي، رب شوکور ادندن سونرا چؤرک يمئشدئلر.
24. ​​​​جاماعات عئسا و شاگئردلرئنئن اورادا اولماديغيني گؤرنده، قاييقلارا مئنئب اونو آختارماق اوچون کفرناحوما گلدئلر.
25. جاماعات گؤلون او تاييندا عئساني تاپديلار و اونا ددئلر: "اوستاد، نه واخت بورايا گلدئن؟"
26. عئسا اونلارا جاواب وردي: "دوغروسونو سئزه ديئرم؛ مؤجوزه​لر گؤردويونوز اوچون يوخ، چؤرکلردن ييئب دويدوغونوز اوچون مني آختاريرسينيز.
27. او يمک اوچون چاليشمايين کي، فاني‌دئر. او يمک اوچون چاليشين کي، ابدي حياتا قدر قالار. او حيات ورن يمک کي، ائنسان اوغلو سئزه وره​جک. آتا تاري بونون اوچون اونا تصدئق مؤهرونو باسيب."
28. او واخت عئسادان سوروشدولار: "تارينين ائشلرئني يرئنه يتئرمک اوچون نه اتملي​يئک؟"
29. عئسا جاواب ورئب اونلارا ددي: "تارينين ائشي بودور کي، اونون گؤنده‌ردئيي آداما ائمان گتئره​سئنئز."
30. اونلار او زامان عئسايا ددئلر: "نه علامت گؤرسدئرسن کي، گؤروب سنه ائمان گتئرک؟ نه ادئرسن؟
31. آتالاريميز چؤلده مانّا يدئلر. نجه کي، يازيليب؛ «يمک اوچون اونلارا گؤيدن يمک وردي.»"
32. عئسا اونلارا ددي: "دوغروسونو سئزه ديئرم؛ گؤيدن سئزه چؤرک ورن موسا ديئلدي، منئم آتامدير کي، گؤيدن سئزه حقئقي چؤره‌يي ورئر.
33. چونکي تارينين چؤره‌يي اودور کي، گؤيدن اِنئر و دونيايا حيات ورئر."
34. او زامان اونا ددئلر: "آغا، بو چؤره‌يي همئشه بئزه ور."
35. عئسا اونلارا ددي: "حيات چؤره‌يي منم. منئم يانيما گلن اصلا آج اولماز. منه ائمان گتئرن اصلا سوسوز اولماز.
36. ​​​آمّا سئزه دمئشم کي، مني گؤردويونوز حالدا، گئنه ائمان گتئرمئرسئنئز.
37. آتامين منه وردئيي آداملارين هاميسي منئم يانيما گله​جکلر و منئم يانيما گلني اصلا اشئيه قوومارام.
38. گؤيدن اِنمئشم کي، اؤز ائسته‌دئيئمي يوخ، مني گؤنده‌ره​نئن ائسته‌دئيئني يرئنه يتئرئم.
39. ​​​و مني گؤنده‌ره​نئن ائسته‌دئيي بودور کي، منه وردئکلرئنئن هچ بئرئسئني ائتئرمه‌يئب، آخير گونده اونلاري دئرئلدئم.
40. ​​​چونکي آتامين ائسته‌دئيي بودور کي، اوغولا باخيب اونا ائمان گتئرن هر کسئن ابدي حياتي اولسون. و من اونو آخير گونده دئرئلده​جه‌يم."
41. او واخت يهودئلر، عئسانين "گؤيدن اِنَن چؤرک منم" ددئيئنه گؤره اونون باره​سئنده ديئنميه باشلاديلار.
42. و ديئردئلر: "مگر بو آدام آتا-آناسيني تانيديغيميز يوسئف اوغلو عئسا ديئل؟ ائندي نجه «گؤيدن اِنمئشم» ديئر؟!"
43. عئسا اونلارا جاواب ورئب ددي: "آرانيزدا ميريلدانمايين.
44. هچ کس منئم يانيما گله​بئلمز، مگر مني گؤنده‌رن آتا اونو چکئب گتئرسئن و من آخير گونده اونو دئرئلده​جه‌يم.
45. ​​​​پيغمبرلرئن يازديقلاريندا يازيليب؛ «اونلارين هاميسي تاريدان اؤيرنه‌جکلر.» اونا گؤره آتادان اشئدئب اؤيره‌نَن هرکس منئم يانيما گلئر.
46. کئمسه آتاني گؤرمه‌يئب، مگر او کي، تاريداندير. آتاني او گؤروبدور.
47. ​​​دوغروسونو سئزه ديئرم؛ ائمان گتئرن آدامين ابدي حياتي وار.
48. حيات چؤره‌يي منم.
49. ​​​آتالارينيز چؤلده مانّا يدئلر، گئنه ده اؤلدولر.
50. آمّا بورادا گؤيدن انمئش اِله بئر چؤرک وار کي، اوندان يئين اؤلمه‌يه​جک.
51. ​​​گؤيدن انمئش او حيات ورن چؤرک منم. بو چؤرکدن يئين هرکس ابده کئمي ياشاياجاق. بو چؤرک منئم بدنئمدئر کي، دونيايا حيات ورمک اوچون اونو وره​جه‌يم."