A A A A A

Bir il Bibliya


Bilər 14


1 Şamuel 29:1-11
1. فئلئسطلی‌لر بوتون قوشونلاريني اَفِقده ييغديلار. ائسرايئللی‌لر يئزرِعِلده اولان بولاغين يانيندا اوردوگاه قوردولار.
2. فئلئسطلی‌لرئن آغالاري يوز نفرلئک و مئن نفرلئک دسته‌لرله ائره‌لي‌ گدئردئلر. داوودلا آداملاري دا آکئشله بئرلئکده آرخادان گلئردئلر.
3. فئلئسطلی‌لرئن آغالاري ددئلر: "بو عئبرانئلرئن بورادا نه ائشي وار؟" آکئش اونلارا ددي: "بو ائسرايئل پادشاهي شاعولون قولو داووددور کي، بو گونلرده، يا داها دوغروسو، بو ائل‌لرده منئم يانيمدا قاليب. منئم يانيما گلن گوندن بَري اوندا پئس بئر شي گؤرمه‌مئشم."
4. فئلئسطلی‌لرئن آغالاري آکئشئن اوستونه قضبله‌نئب اونا ددئلر: "بو آدامي گری قايتار، قوي او تعيئن اتدئيئن يره قاييتسين و بئزئمله دؤيوشه گتمه‌سئن، يوخسا دؤيوشده بئزه دوشمنچئلئک اِدَر. چونکي او اؤزونو آغاسينا مقبول اتمک اوچون داها نه ياخشي يول تاپا بئلر؟ مگر بو آداملارين کَسئک باشلاري اولماز؟
5. مگر بو او داوود ديئل کي، رقصلرده ترنّوم ادئب اوخويوردولار: «شاعول قيردي مئنلري، داوود اون مئنلري؟»"
6. آکئش داوودو چاغيريب اونا ددي: "وار اولان ربّه آند اولسون، سن دوز آدامسان. قوشوندا منئمله يوروشه چيخماغين گؤزومده خوشدور، چونکي يانيما گلدئيئن گوندن بو گونه قدر سنده پئس بئر شي تاپماديم. لاکئن آغالارين گؤزونه خوش گؤرونمورسن.
7. ائندي صاغ-سالامات اؤز يرئنه قاييت کي، فئلئسطلی‌لرئن آغالارينين گؤزونده پئس گؤرونمه‌يه‌سن."
8. داوود آکئشه ددي: "مگر من نه اتمئشم؟ يانينا گلن گوندن بو گونه قدر قولوندا نه تاپيبسان کي، آغام پادشاهين دوشمنلرئنه ضئدّ گدئب ووروشماييم؟"
9. آکئش داوودا جاواب وردی: "بئلئرم کي، منئم گؤزومده سن تارينين مَله‌يي کئمي ياخشي‌سان، آمّا فئلئسطلی‌لرئن باشچيلاري ديئبلر: «او گرک بئزئمله بئر دؤيوشه چيخماسين.»
10. ائندي سنئنله گلن آغانين قوللاري ائله بئرلئکده سحر تزدن قالخين. صوبح تزدن قالخين و سحر آچيلار-آچيلماز بورادان گدئن."
11. بلجه داوود و آداملاري سحر اِرکَن قالخديلار کي، آيريليب فئلئسطلی‌لرئن تورپاغينا قاييتسينلار. فئلئسطلی‌لر ده يئزرِعِله گتدئلر.

1 Şamuel 30:1-31
1. داوودلا آداملاري اوچونجو گون صئقلَگه چاتديلار. اله بو زامان عَمالِقلی‌لر نِگِبه و صئقلَگه هوجوم ادئب صئقلَگ شهرئنه اود وورموشدولار.
2. اورادا اولان آروادلاري و بوتون اهالئني بؤيوکدن کئچئيه قدر اسئر ادئب اؤلدورمه‌مئشدئلر و اؤز يوللاري ائله گتمئشدئلر.
3. داوود آداملاري ائله شهره گلئب گؤردو کي، شهر يانديريليب و اونلارين آروادلاري، اوغوللاري و قيزلاري اسئر آپاريليب.
4. بونا گؤره داوود يانينا ييغيلان جاماعاتلا بئرلئکده طاقتدن دوشَنه قدر هؤنکوروب آغلاديلار.
5. اسئر آپاريلانلار آراسيندا داوودون ائکي آروادي، يئزرِعِل‌لي اَخئنوعَمله کَرمِل‌لي نابالين دول آروادي اَبئگائل دا وار ائدي.
6. داوودون اوره‌يي چوخ سيخيليردي، چونکي خالق "اونو داشلاياق" ديئردي. اونا گؤره کي، جاماعاتين هر بئرئنئن اوغول و قيزيندان اؤتري جاني آجي چکئردي. لاکئن داوود اؤزونو تاريسي ربده قووّتلَندئردي.
7. او، اَخئمِلِکئن اوغلو کاهئن اِبياتارا ددي: "خاهئش ادئرم، اِفودو منئم اوچون بورايا گتئر." اِبياتار دا اِفودو داوودون يانينا گتئردي.
8. داوود ربدن مصلحت ائسته‌يئب ددي: "بو فوجون داليسيجا دوشسَم، اونلارا چاتارام؟" رب اونا ددي: "اونلارين داليسيجا گت، قطعن اونلارا چاتاجاقسان و قطعن اسئرلري قورتاراجاقسان."
9. داوود يانيندا اولان آلتي يوز نفرله گدئب بِسور دره‌سئنه چاتديلار. دالا قالانلار اورادا قالديلار.
10. لاکئن داوود دؤرد يوز نفرله تالانچيلارين تعقئبئنه داوام وردی، چونکي ائکي يوز نفر يورولوب بِسور دره‌سئني کچه بئلمه‌مئشدي.
11. چؤلده بئر مئصئرلي تاپديلار و اونو داوودون يانينا گتئردئلر. اونا چؤرک يِدئردئب، سو ائچئرتدئلر.
12. سونرا بئر تئکه باسيلميش انجئر لاواشاسي ائله ائکي سالخيم قورو اوزوم وردئلر. او دا يِيئب اؤزونه گلدي. چونکي اوچ گون-اوچ گجه چؤرک يمه‌مئش و سو ائچمه‌مئشدي.
13. داوود اونا ددي: "سن کئمئن قولوسان؟ هارادانسان؟" او ددي: "بئر عَمالِقلي‌نئن قولو، مئصئرلي بئر جاوانام. اوچ گون قاباق ناخوشلاديم، اونا گؤره ده آغام منی آتدي.
14. بئز کِرِتلی‌لرئن نِگِبئنه، يهودا تورپاغينا و کالئبئن نِگِبئنه هوجوم اتدئک، صئقلَگه اود ووروب يانديرديق."
15. داوود اوندان سوروشدو: "منی بو تالانچيلارين يانينا آپارارسان؟" آدام جاواب وردی: "تاري حاقّي اوچون آند ائچ کی، منی اؤلدورمَيه‌جکسن و آغاما تسلئم اتمَيه‌جکسن. من ده سني تالانچيلارين يانينا آپارارام."
16. او، داوودو تالانچيلارين يانينا اِندئردي. بو زامان اونلار هر يانا ياييلميشديلار. فئلئسطلي و يهودا دئياريندان بؤيوک تالان مالي گؤتوردوکلري اوچون يِيئب-ائچئب شَنلئک ادئردئلر.
17. داوود گون باتاندان صاباحيسي گونون آخشاميناجاق اونلاري قيردي. هچ کئم جا‌نيني قورتارا بئلمه‌دي مگر دؤرد يوز نفر جاوان کي، دوه‌لره مئنئب قاچديلار.
18. او، عَمالِقلئلرئن گؤتوروب آپارديغي هر شيي گری قايتاردي، ائکي آرواديني دا قورتاردي.
19. اونلارين هچ بئر شيلري ائتمه‌مئشدي ائستر بؤيوک اولسون، ائستر کئچئک‌، اوغوللار اولسون، يا دا قيزلار، عَمالِقلی‌لرئن تالان اتدئکلرئنئن هاميسيني داوود گری قايتاردي و اونلاردان هچ نه اَسکئک اولمادي.
20. داوود قويون-کچئلرله اؤکوزلري ده گری قايتاردي. اونلاري او بئري حيوانلارين قاباغيندان سوروب ديئردئلر: "بو، داوودون تالان مالي‌دير."
21. داوود يورولوب دالينجا گله بئلمه‌يَن و بِسور دره‌سئنده قالان ائکي يوز نفرئن يانينا گلدي. اونلار داوودون و يانينداکي آداملارين پئشوازينا چيخديلار. داوود اورايا ياخينلاشيب سالام وردی.
22. داوودلا بئرلئکده گدن آداملار آراسيندا اولان دَيَرسئز آداملار ددئلر: "اونلار بئزئمله بئرلئکده گتمه‌دئکلري اوچون بئز ده قورتارديغيميز تالان ماليندان اونلارا هچ نه ورميه‌جيئک. آنجاق هر آداما اؤز آرواد-اوشاقلاريني وره‌جيئک. قوي اونلاري گؤتوروب بورادان گتسئنلر."
23. آمّا داوود اونلارا ددي: "خير، قارداشلاريم! ربّئن بئزه وردئيي شيلرله بله اتميه‌جکسئنئز. رب ائدي کي، بئزي قورودو و اوستوموزه گلن تالانچيلاري او بئزه تسلئم اتدي.
24. سئزئن بو سؤزونوزه کئم قولاق آسار؟ چونکي دؤيوشه گده‌نئن پايي نه قدردئر، اَسبابلارين يانيندا قالانين دا پايي او قدر اولاجاق، برابر بؤلونه‌جک."
25. داوود بونو او گوندن بو گونه قدر بوتون ائسرايئل اوچون بئر قانون و حؤکم تعيئن اتدي.
26. داوود صئقلَگه گلدي و تالاندان دوستلاري اولان يهودانين آغساقّاللارينا گؤنده‌رئب ددي: "باخين، سئز اوچون ربّئن دوشمنلرئندن آلينان تالاندان بئر هدئيّه."
27. بِيت ائلده اولانلارا، نِگِبده‌کي راموتدا اولانلارا، يَتّئرده اولانلارا،
28. عَروعِرده اولانلارا، سئفموتدا اولانلارا، اِشتِموعه‌ده اولانلارا،
29. راکالدا اولانلارا، يِرَخمِه‌اِللئلرئن و قِنلئلرئن شهرلرئنده اولانلارا،
30. خورمادا اولانلارا، بورعاشاندا اولانلارا، عَتاقدا اولانلارا،
31. خِبروندا اولانلارا، و بوتون او يرلره کي، داوودلا آداملاري اونلاري گَزئردئلر.

1 Şamuel 31:1-13
1. فئلئسطلی‌لر ائسرايئللی‌لرله دؤيوشوردولر. ائسرايئللی‌لر فئلئسطلی‌لرئن قاباغيندان قاچديلار و گئلبوعا داغيندا قيريليب دوشدولر.
2. فئلئسطلی‌لر شاعوللا اوغوللاريني تعقئب ادئب شاعولون اوغوللاري يوناتاني، اَبئنادابي و مِلکئشوعه‌عي اؤلدوردولر.
3. دؤيوش شاعولون اطرافيندا شئدّتلننده اوخ‌آتانلار اونو تاپديلار و آغير يارالاديلار.
4. شاعول اؤز سئلاحدارينا ددي: "قيلينجيني چک، منی وور، يوخسا بو ختنه‌سئزلر گلئب قيلينجلاريني منه سوخوب باشلاريني قال اده‌جکلر." لاکئن سئلاحداري چوخ قورخدوغوندان بونو اتمک ائستمه‌دي. اونا گؤره ده شاعول قيلينجي گؤتوروب اؤزونو اونون اوستونه ييخدي.
5. سئلاحداري شاعولون اؤلدويونو گؤرنده، او دا اؤزونو قيلينجينين اوستونه ييخيب شاعوللا بئرلئکده اؤلدو.
6. او گون شاعول، اوچ اوغلو، سئلاحداري، بوتون آداملاري ائله بئرلئکده هلاک اولدولار.
7. دره‌نئن او بئري طرفئنده و اوردون چايينين او بئري تاييندا اولان ائسرايئللی‌لر، ائسرايئل قوشونونون قاچديغيني و شاعوللا اوغوللارينين اؤلدويونو گؤرنده شهرلري قويوب قاچديلار. فئلئسطلی‌لر گلئب او يرلرده ياشاديلار.
8. او گونون صاباحي فئلئسطلی‌لر اؤلدورولَنلري سويماق اوچون گلنده، گئلبوعا داغيندا شاعوللا اوچ اوغلونون مِيئتئني تاپديلار.
9. شاعولون باشيني کسئب سئلاحلاريني گؤتوردولر. بوتلرئنئن معبدئنه و خالقا خوش خبر ورمک اوچون فئلئسطلی‌لرئن اؤلکه‌سئنئن هر طرفئنه قاصئد گؤندردئلر.
10. شاعولون سئلاحلاريني ائلاهه عَشتاروتون معبدئنه قويدولار و جسدئني بِيت‌شه‌آن شهرئنئن دووارينا ميخلاديلار.
11. يابش گئلعاد اهالئسي فئلئسطلی‌لرئن شاعولا اتدئکلرئني اشئدنده،
12. بوتون جنگاورلري قالخديلار و گجه بويو يول گدئب شاعولون و اوغوللارينين جسدئني بِيت‌شِه‌آنين دوواريندان گؤتوردولر و يابِشه گلئب اورادا جسدلري يانديرديلار.
13. سونرا جسدلرئن سوموکلرئني گؤتوروب يابِشده، گَز آغاجينين آلتيندا باسديرديلار و يدّي گون اوروج توتدولار.

Zəbur 61:5-8
5. نذئرلرئمي اشئدئبسن، اي تاري، آديندان قورخانلارين مئراثيني منه ورئبسن.
6. پادشاهين حيات گونلرئنه گونلر آرتير، ائللري نسئلدن-نسله قدر چاتسين؛
7. تارينين حوضوروندا ابده کئمي تختئنه اوتورسون. اونو حئفظ اتمک اوچون محبّت ور، وفا ور.
8. او زامان سنئن آدينا ابده کئمي پرستئش نغمه‌سي اوخوياجاغام کي، نذئرلرئمي هر گون يرئنه يتئرئم.

Süleymanın Məsəlləri 16:7-9
7. آدامين يوللاري ربّئن خوشونا گلسه، دوشمنلرئني ده اونونلا باريشديرار.
8. صالحلئکله قازانيلان آز شي، حاقسيز يوللا اولان بول گلئردن ياخشي‌دير.
9. ائنسان اوره‌يئنده اؤزو اوچون يول قورار، لاکئن رب قدملرئني هئدايت ادر.

Yəhya 3:19-36
19. و حؤکم بودور؛ نور دونيايا گلدي، آمّا ائنسانلار قارانليغي نوردان داها آرتيق سودئلر، چونکي عمللري پئس ائدي.
20. چونکي پئس ائشلر گؤرن هر آدام نوردان نئفرت ادر و اونا ياخين گلمز، مبادا ائشلري آشکار اولسون. ‌
21. آمّا حقئقتله ياشايان آدام نورا ياخين گلر کي، عمل​لرئنئن تاريدان ائطاعت اده‌رک يرئنه يتئشدئيي آشکار اولسون."
22. بوندان سونرا عئسا و شاگئردلري يهودئيه دئيارينا گلدئلر و عئسا بئر مودّت اونلارلا اورادا قاليب تعمئد ورئردي.
23. يحيا دا سالئمئن ياخينليغيندا، عِينوندا تعمئد ورئردي. چونکي اورادا سو چوخ ائدي. و خالق گلئب اوندان تعمئد آليرديلار.
24. يحيا حله زئندانا سالينماميشدي.
25. ​​​طهارت حاقّيندا يحيانين شاگئردلري ائله بئر يهودي آراسيندا موباحئثه دوشدو.
26. و اونلار يحيانين يانينا گلئب اونا ددئلر: "اوستاد، اوردونون او بئري تاييندا سنئنله اولان و حاقّيندا شهادت وردئيئن آدام، اؤزو تعمئد ورئر و هامي اونون يانينا گلئر."
27. يحيا جاواب ورئب ددي: "ائنسان هچ بئر شي آلا بئلمز، مگر گؤيدن اونا ورئلمئش اولسون.
28. سئز اؤزونوز شاهئدسئنئز کي، ددئم؛ من مسئح ديئلم، آمّا اوندان قاباق گؤنده‌رئلمئشم.
29. گلئن آلان، بَي‌دئر. آمّا بَيئن يانيندا دوران و اونا قولاق آسان دوستو، اونون سسئندن چوخ سِوئنَر. من ده بله سوئنئرم و ائندي بو شادليق کامئل اولوبدور.
30. او گرک آرتسين، آمّا من گرک اسکئلم.
31. يوخاريدان گلن هاميدان اوستوندور. دونيادان اولان دونيانينکي​دير و دونيادان دانيشار. گؤيدن گلن هاميدان اوستوندور.
32. او گؤردويونه-اشئتدئيئنه شهادت ورر، آمّا هچ کئم اونون شهادتئني قبول اتمز.
33. اونون شهادتئني قبول ادن آدام تارينين دوغرو اولدوغونا مؤهور باسيب.
34. ​​​تاري طرفئندن گؤنده‌رئلمئش آدام تاريدان دانيشار. چونکي تاري موقدّس روحو اؤلچو ائله ورمئر.
35. آتا اوغولو سوئر و هر شيي اونون ائختئياريندا قويوب.
36. اوغولا ائمان گتئره​نئن ابدي حياتي وار، آمّا اوغولدان ائطاعت اتمه‌ين آدام حيات گؤرمه‌يه‌جک، لاکئن تارينين قضبي اونون اوستونده قالير."