A A A A A

Bir il Bibliya


Aprel 9


Yeşua 7:1-26
1. آمّا ائسرايئل اؤولادلاري حارام شيلر باره‌ده خيانت اتدئلر. چونکي يهودا قبئله‌سئندن زِراخ اوغلو زَبدي اوغلو کَرمي اوغلو آکان حارام اولونموش شيلردن گؤتوردو. اونا گؤره ده ربّئن قضبي ائسرايئل اؤولادلارينين ضئدّئنه آلوولاندي.
2. يوشَع اَرئحادان بِيت‌آوِنئن يانيندا اولان عاي شهرئنه کي، بِيت ائلئن شرقئنده ائدي، آداملار گؤندرئب اونلارا ددي: "گدئن، اؤلکه‌ني گؤزدن کچئردئن." آداملار چيخيب عاي شهرئني گؤزدن کچئرتدئلر.
3. اونلار يوشَعئن يانينا قاييديب ددئلر: "بوتون خالق گتمه‌سئن، عايي وورماق اوچون آنجاق ائکي يا اوچ مئن نفر آداما احتياج وار؛ بوتون خالقي اورايا گؤندرئب يورما، چونکي اونلار آزديرلار."
4. بلجه، اورايا خالقدان اوچ مئن نفره قدر گتدئلر، لاکئن اونلار عاي ساکئنلرئنئن قاباغيندان قاچديلار.
5. عايلي‌لار اونلاردان اوتوز آلتي نفر اؤلدوردولر و ائسرايئللی‌لري شهرئن دروازاسي قاباغيندان شِبارئمه قدر قوودولار و باييردان آشاغي قاچانلاري قيرديلار. اونا گؤره خالقين اوره‌يي قورخودان اَرئيئب سو کئمي اولدو.
6. يوشَع پالتاريني جيردي، اؤزو و ائسرايئلئن آغساقّاللاري ربّئن سانديغي قاباغيندا اوزو اوسته آخشاما کئمي يره سَرئردئلر؛ و باشلارينا تورپاق تؤکدولر.
7. يوشَع ددي: "آه، ای پروردئگار رب، آيا بئزي اِمورلولارا تسلئم اتمک اوچون، بئزي محو اتمک اوچوندور کي، بو خالقي اوردون چاييندان کچئرتدئن؟ کاشکي اوردون چايينين او تاييندا ياشاماغا راضي اولايديق.
8. ای پروردئگار، ائسرايئللی‌لر دوشمنلرئنه آرخا چِوئردئکدن سونرا، من نه دئيه بئله‌رم؟
9. کَنَعانليلار و بو اؤلکه‌ده ياشايان بوتون خالقلار بونو اشئده‌جکلر، بئزي موحاصئره‌يه آليب، آديميزي ير اوزوندن سئله‌جکلر. بس سن اؤز بؤيوک آدين اوچون نه اده‌جکسن؟"
10. رب يوشَعه ددي: "قالخ، نه اوچون بله اوزو اوسته ييخيليبسان؟"
11. ائسرايئللی‌لر گوناه ادئبلر و اونلارا امر اتدئيئم عهدئمي پوزوبلار. حتّا حارام اولونموش شيلردن گؤتوروبلر، اونلاردان هم اوغورلاييب هم ده مَکر ادئبلر. بوندان علاوه اونلاري اؤز اشيالاري آراسيندا گئزلَدئبلر.
12. بونا گؤره ده ائسرايئل اؤولادلاري دوشمن قاباغيندا دورا بئلمئرلر؛ دوشمنه آرخا چِوئرئرلر. چونکي اونلار لعنته دوچار اولوبلار. اگر حارام شيلري آرانيزدان يوخ اتميه‌سئنئز، بئر داها سئزئنله اولماياجاغام.
13. قالخ! خالقي تقدئس ات و دِه: «صاباحکي گون اوچون اؤزونوزو تقدئس ادئن، چونکي ائسرايئلئن تاريسي رب بله ديئر: ای ائسرايئللی‌لر، آرانيزدا حارام شي وار. اونو آرانيزدان گؤتورميه‌سئنئز، دوشمنلرئنئز قاباغيندا دورا بئلمزسئنئز.
14. صاباح سحر قبئله‌به‌قبئله ربّئن حوضورونا چيخارسينيز و اونون پوشکله سچدئيي قبئله نسئل‌به‌نسئل ائره‌لي گلر. ربّئن سچدئيي نسئل، عايئله‌به‌عايئله ائره‌لي چيخار. و ربّئن گؤرستدئيي عايئله کئشي‌به‌کئشي قاباغا گلر.
15. حارام اولونموش شيلردن گؤتورن آدام و اونا عاييد اولانلارين هاميسي اوددا يانديريلاجاق، چونکي او، ربّئن عهدئني پوزوب و ائسرايئلده روسوايچيليق ادئبدئر.»"
16. يوشَع سحر تزدن قالخدي و ائسرايئللی‌لري، قبئله‌‌به‌قبئله ربّئن حوضورونا گتئردي و يهودا قبئله‌سي گؤتورولدو.
17. يهودا قبئله‌سئنئن نسئل‌لرئني ائره‌لي چيخارتدي و زِراخ نسلئني گؤتوردو؛ زِراخ نسلئني عايئله‌به‌عايئله گؤره ائره‌لي چيخارتدي و زَبدي عايئله‌سي گؤتورولدو.
18. زَبدي عايئله‌سئني کئشي‌به‌کئشي ائره‌لي چيخارتدي؛ زِراخ اوغلو، زَبدي اوغلو، کَرمي اوغلو آکان کي، يهودا قبئله‌سئندن ائدي، گؤتورولدو.
19. يوشَع آکانا ددي: "اوغلوم، سنه يالواريرام، ائسرايئلئن تاريسي ربّی عئزّتلَندئر، و اونو حمد ات؛ ائندي منه دِه گؤروم نه ادئبسن؟ مندن گئزلَتمه."
20. آکان يوشَعه جاواب وردی: "حقئقتن، من ائسرايئلئن تاريسي ربّئن ضئدّئنه گوناه اتمئشم. اتدئيئم بودور:
21. او زامان کي، تالان مالي آراسيندا شئنعار مالي اولان گؤزل بئر پالتار، ائکي يوز شِکِل گوموش، و آغيرليغي اَلي شِکِل اولان بئر قيزيل تئکه‌سي گؤردوم، اونلارا طاماح ساليب گؤتوردوم. باخ، هاميسي چاديريمين اورتاسيندا تورپاغا باسديريليب، گوموش ده اونلارين آلتيندادير."
22. يوشَع آداملار گؤندردي و اونلار چاديرا قاچديلار. باخ، شيلر اونون چاديريندا گئزلَدئلمئشدي، گوموش ده آلتيندا ائدي.
23. اونلاري چاديرين ائچئندن گؤتوروب يوشَعئن و بوتون ائسرايئل اؤولادلارينين يانينا گتئردئلر و ربّئن قاباغيندا يره قويدولار.
24. يوشَع و اونونلا بئرلئکده بوتون ائسرايئللی‌لر، زِراخ اوغلو آکاني، گوموشو، پالتاري، قيزيل تئکه‌ني، اوغوللاريني، قيزلاريني، اؤکوزلرئني، اِششَکلرئني، قويونلاريني، چاديريني و بوتون ماليني گؤتوروب، آکور دره‌سئنه چيخارتديلار.
25. يوشَع ددي: "نه اوچون بئزي بلايا سالدين؟ رب بو گون سني بلايا سالاجاق." بوتون ائسرايئللی‌لر اونلاري داشا باسديلار؛ سونرا دا اوددا يانديرديلار.
26. اونلارين اوستونه بؤيوک داش قالاغي ييغديلار کي، بو گونه قدر دورور. بوندان سونرا ربّئن قضب آلووو سؤندو. بونون اوچون بو گونه قدر او يرئن آدينا آکور دره‌سي ديئلئر.

Yeşua 8:1-35
1. رب يوشَعه ددي: "قورخما، اوره‌يئن ده اوزولمه‌سئن. بوتون دؤيوشچولرئني اؤزونله گؤتور و عاي شهرئنه هوجوم ات. باخ، من عاي شهرئنئن پادشاهيني، خالقيني، شهرئني و تورپاغيني سنه تسلئم اتمئشم.
2. اَرئحانين و اورانين پادشاهينين باشينا نه گتئردئن، عاي شهرئنئن و اونون پادشاهينين باشينا دا اِله گتئر؛ آنجاق ماللاريني و حيوانلاريني اؤزونوز اوچون قارت ادئن. شهرئن ضئدّئنه آرخا طرفدن کمئن قورون."
3. يوشَعله بوتون دؤيوشچولر عاي شهرئنه گتمک اوچون قالخديلار؛ يوشَع اوتوز مئن ائگئد آدام سچئب، اونلاري گجه ائکن اورايا گؤندردي.
4. و اونلارا بله امر اتدي: "قولاق آسين، شهرئن ضئدّئنه آرخا طرفدن کمئن قوراجاقسينيز، شهردن چوخ اوزاغا گتمه‌يئن، لاکئن هامينيز حاضير دورون.
5. من و يانيمدا اولان بوتون خالق شهره ياخينلاشاجاغيق. اوّلکي کئمي شهرئنئن ساکئنلري بئزئم ضئدّئمئزه چيخاندا، بئز ده اونلارين قاباغيندان قاچاجاغيق.
6. آرخاميزجا او قدر آپاراجاغيق کي، شهردن اوزاق دوشسونلر. چونکي «اوّلکي کئمي قاباغيميزدان قاچيرلار» دئيه‌جکلر. بلجه اونلارين قاباغيندان قاچاجاغيق.
7. او واخت سئز کمئندن قالخيب شهري آلين، چونکي تارينيز رب اوراني سئزه تسلئم اده‌جک.
8. شهري اَله کچئرتدئيئنئز زامان، شهره اود وورون. بونو ربّئن سؤزونه گؤره ادئن. گؤرون، سئزه بله امر اتدئم."
9. بلجه، يوشَع اونلاري گؤندردي. اونلار کمئن يرئنه گتدئلر و بِيت ائلله عاي شهري آراسيندا کمئنده، عاي شهرئنئن قرب طرفئنده گؤزله‌دئلر. آمّا يوشَع گجه‌ني جاماعاتين آراسيندا کچئرتدي.
10. يوشَع سحر تزدن دوردو، خالقا نئظام وردی، اؤزو و خالقين آغساقّاللاري خالقين قاباغيندا عاي شهرئنئن طرفئنه گتدئلر.
11. بوتون دؤيوشچولر ده اونونلا بئرلئکده گتدئلر و ياخينلاشيب شهرئن قاباغينا گلدئلر و عاي شهرئنئن شئمال طرفئنده ييغيلديلار. ائندي يوشَعله عاي شهري آراسيندا آنجاق بئر دره وار ائدي.
12. يوشَع بش مئنه قدر آدام گؤتوردو، اونلاري بِيت‌ ائلله عاي شهري آراسيندا، شهرئن قرب طرفئنده کمئنه قويدو.
13. شهرئن شئماليندا اولان بوتون قوشون و شهرئن قربئنده کمئنده دورانلار دؤيوش اوچون يِرلَشدئرئلدي. يوشَع او گجه‌ني دره‌نين اورتاسينا کچئرتدي.
14. عاي شهرئنئن پادشاهي بونو گؤردوکده، سحر تزدن شهرئن آداملاري ائله بئرلئکده تَله‌سئک قالخدي و بوتون جاماعات موعيّن يرده ائسرايئللی‌لرئن ضئدّئنه عَرابا دره‌سئنئن قاباغيندا دؤيوشه چيخديلار. لاکئن پادشاه بئلمئردي کي، شهر آرخاسيندا اونون ضئدّئنه کمئن قورولوب.
15. يوشَعله بوتون ائسرايئللی‌لر اؤزلرئني اونلارين قاباغيندا مغلوب اولموش کئمي گؤرسدئب چؤله طرف قاچديلار.
16. شهرده اولان بوتون جاماعات چاغيريلدي کي، اونلاري تعقئب اتسئنلر. اونلار يوشَعي تعقئب ادئب شهردن اوزاقلاشديلار.
17. عاي و بِيت ائل شهرلرئنده بئر نفر ده قالمادي کي، ائسرايئللی‌لرئن دالينجا گتمه‌سئن. اونلار شهري آچيق قويوب ائسرايئللی‌لري تعقئب اتدئلر.
18. او واخت رب يوشَعه ددي: "اَلئنده‌کي نئزه‌ني عاي شهرئنه طرف اوزات، چونکي اوراني سنه تسلئم اده‌جيم." يوشَع اَلئنده‌کي نئزه‌ني عاي شهرئنه طرف اوزاتدي.
19. يوشَع اَلئني شهره طرف اوزاتديقدا، کمئنده دورانلار جَلد يرلرئندن قالخديلار. قاچيب شهره گئردئلر و اوراني آلديلار. و تزلئکله شهره اود ووردولار.
20. عاي شهرئنئن اهالئسي آرخايا دؤنوب باخاندا، گؤردولر کي، شهردن گؤيه توستو قالخير و اونلارين او يان بو يانا قاچماغا دا يرلري يوخ ائدي. چونکي چؤله طرف قاچان ائسرايئللی‌لر ده اونلاري تعقئب ادنلره طرف دؤندولر.
21. يوشَع و بوتون ائسرايئللي‌لر او واخت کي، گؤردولر کمئنده اولان آداملار شهري آليبلار و شهردن توستو گؤيه قالخير، دؤنوب عاي شهرئنئن آداملارينا هوجوم اتدئلر.
22. او بئري ائسرايئللی‌لر ده شهردن اونلارا طرف چيخديلار. او واخت اونلار ائکي طرفدن گلن ائسرايئللی‌لرئن آراسيندا تله‌يه دوشدولر. اونلاري او قدر قيرديلار کي، اونلاردان هچ کس دئري و يا قاچميش اولمادي.
23. آمّا عاي شهرئنئن پادشاهيني دئري توتوب يوشَعئن يانينا گتئردئلر.
24. ائسرايئللی‌لر عاي شهرئنئن اهالئسئنئن هاميسيني اؤلدوروب قورتارانا قدر، اونلاري زَمئده و تعقئب اتدئکلري چؤلده قيلينجدان کچئرتدئلر. سونرا بوتون ائسرايئللی‌لر عاي شهرئنه قاييديب، اورادا قالانلاري دا قيلينجدان کچئرتدئلر.
25. او گون قيريلان کئشئلر و آروادلارين ساييسي، اون ائکي مئن نفر ائدي؛ يعني عاي شهرئنئن بوتون اهالئسئني.
26. چونکي يوشَع بوتون عاي شهرئنئن اهالئسئني کامئل قيريب قورتارانا قدر، نئزه اوزادان اَلئني گری چکمه‌دي.
27. آنجاق ربّئن يوشَعه بويوردوغو سؤزه گؤره، ائسرايئللی‌لر او شهرئن حيوانلاريني و اشيالاريني تالان ادئب اؤزلرئنه گؤتوردولر.
28. بلجه يوشَع عاي شهرئني يانديردي. اوراني ابدی بئر داش قالاغينا دؤندَردي، يعني بئر وئرانه‌يه کي، بو گونه قدر قالير.
29. او، عاي شهرئنئن پادشاهيني آغاجدان آسيب آخشاما قدر ساخلادي. گون باتاندا يوشَع امر وردی و اونون جسدئني آغاجدان دوشورتدولر. اونو شهر دروازاسينين گئره‌جيئنه آتديلار. اوستونه اِله بؤيوک داش قالاغي ييغديلار کي، بو گونه کئمي قالير.
30. او زامان يوشَع عِيبال داغيندا ائسرايئلئن تاريسي ربّه بئر قوربانگاه قوردو.
31. او، اوستونه هچ کئمئن دمئر وورماديغي، يونولماميش داشلاردان بئر قوربانگاه دوزلتدي، نجه کي، ربّئن قولو موسا ائسرايئل اؤولادلارينا امراتمئشدي و موسانين شرئعت کئتابيندا يازيلميشدي؛ اونون اوستونده ربّه يانديرما قوربانلاري و باريش قوربانلاري تقدئم اتدئلر.
32. يوشَع اورادا، موسانين ائسرايئل اؤولادلاري حوضوروندا يازديغي شرئعتئن بئر نوسخه‌سئني داشلار اوستونه يازدي.
33. بوتون ائسرايئللی‌لر، آغساقّاللار، سرکرده‌لر، حاکئملر، و حتّا قرئبلر ربّئن عهد سانديغينين ائکي طرفئنده، سانديغي داشييان لاوئلي کاهئنلرئن قاباغيندا دايانديلار. خالقين ياريسي گِرِزئم داغينين، او بئري ياريسي دا عِيبال داغينين قاباغيندا دوردو. نجه کي، ربّئن قولو موسا ائسرايئل خالقينا برکت ورمک اوچون اوّللر بو جور دايانماغي بويورموشدو.
34. اوندان سونرا يوشَع شرئعتئن بوتون سؤزلرئني، برکت و لعنتي، يعني شرئعت کئتابيندا يازيلانلارين هاميسيني اوخودو.
35. بوتون ائسرايئل جاماعاتينين، آروادلارين، اوشاقلارين و آرالاريندا اولان قرئبلرئن حوضوروندا موسانين بوتون بويوردوقلاريندان هچ بئر سؤز قالمادي کي يوشَع اونو اوخوماميش اولسون.

Zəbur 43:1-5
1. مني حاقلي چيخارت، اي تاريم، موتّقي اولمايان مئلّتدن منئم حاقّيمي آل؛ حئيله‌کار و حاقسيز آدامدان مني قورتار!
2. چونکي پناهيمين تاريسي سنسن؛ نه اوچون مني قوووبسان؟ نه اوچون دوشمنئن ظولموندن ياسلي گزئم؟!
3. نورونو و حقئقتئني گؤندَر، قوي اونلار مني هئدايت اتسئنلر؛ قوي مني سنئن موقدّس داغينا، سنئن مسکنئنه گتئرسئنلر.
4. او واخت تارينين قوربانگاهينا گده‌رم، مسرّتئمئن تاريسينا؛ سنه طنبورلا حمد اوخويارام، اي تاري، منئم تاريم.
5. اي جانيم، نه اوچون بله بوکولوبسن؟ نه اوچون ائچئمده بله چوبالاييرسان؟ تارييا اومئد باغلا؛ من حله ده اونا حمد اوخوياجايام، منه نئجات وِرَنه، منئم تاريما.

Süleymanın Məsəlləri 13:22-23
22. ياخشي بئر آدام نوه‌لرئنه ده مئراث قويار، لاکئن گوناهکارين ييغديغي ثروت صالحه قالار.
23. يوخسوللارين اَکئني بول محصول ورسه ده، عدالت اولمايان يرده بادا گدر.

Luka 9:37-62
37. او گونون صاباحي داغدان اِنَن زامان، بئر چوخ خالق عئسانين پئشوازينا چيخدي.
38. بئردن جاماعات آراسيندان بئر آدام قيشقيريب ددي: "اوستاد، سنه يالواريرام، اوغلوما نظر سال، چونکي او، منئم بئرجه بالامدير.
39. بئر روح اونو توتور، او دا بئردن بئره باغيرماغا باشلايير. روح اونو اِله تئتره​دئر کي، اوشاغين آغزي کؤپوکله‌نئر. و اونو قووّتدن سالاندان سونرا زورلا اوندان آيريلير.
40. سنئن شاگئردلرئنه يالوارديم کي، روحو قووسونلار، لاکئن باجارا بئلمه‌دئلر."
41. عئسا جاواب ورئب ددي: "اي ائمانسيز و ترسه نسئل! نه واختا قدر سئزئنله اولوب سئزه دؤزه​جه‌يم؟! اوغلونو بورايا گتئر."
42. اوشاق عئسانين يانينا گلن واخت، ائبلئس اونو يره چيرپيب چوبالاتدي. آمّا عئسا اونا آجيقلاندي و اوشاغي صاغالديب آتاسينا وردي.
43. هامي تارينين عظمتئنه مات قالميشدي. و هر کس عئسانين اتدئيي بوتون ائشلره حيرت ادنده، او، اؤز شاگئردلرئنه ددي:
44. "بو سؤزلر قولاقلارينيزدا قالسين؛ چونکي ائنسان اوغلو ائنسانلارين الئنه تسلئم ادئله​جک."
45. لاکئن اونلار بو سؤزو آنلاماديلار و سؤزون معناسي اونلار اوچون درک ادئلمه​مئش قالدي و بو باره​ده عئسادان سوروشماغا قورخوردولار.
46. اونلارين آراسيندا بله بئر موباحئثه دوشدو کي، اونلاردان هانسي داها بؤيوکدور.
47. عئسا اونلارين اورکلرئنده‌کي فئکئري بئلدي و کؤرپه بئر اوشاغي گؤتوروب يانينا چکدي
48. و اونلارا ددي: "کئم بو اوشاغي منئم آديما قبول اتسه، مني قبول اتمئش اولور و کئم مني قبول ادئر، مني گؤنده‌ره‌ني قبول اتمئش اولور. آرانيزدا لاپ کئچئک کئم اولسا، اِله لاپ بؤيوک اودور."
49. بو زامان يوحنّا سؤز آليب ددي: «اوستاد، بئر آدام گؤردوک کي، سنئن آدينلا​ ائبلئسلري قووور و اونا مانع اولدوق چونکي بئز​ئمله سنئن دالينجا گلمئر.»
50. عئسا اونا ددي: "اونا مانع اولمايين. چونکي سئزه ضئدّ اولمايان سئزئن طرفدارينيزدير."
51. عئسانين دونيادان گؤيه آليناجاغي گونلر ياخينلاشاندا، او، اورشلئمه گتمک قرارينا گلدي.
52. اؤزوندن قاباق الچئلر گؤنده‌ردي. اونلار، عئسا اوچون تداروک گؤرمک قصدي ائله سامئره​لي‌لرئن بئر کندئنه گئردئلر.
53. لاکئن اورانين اهلي اونو قبول اتمه‌دئلر، چونکي اونون قصدي اورشلئمه گتمک ائدي.
54. عئسانين شاگئردلري يعقوب و يوحنّا بونو گؤرن زامان ددئلر: "يارب! ائسته‌يئرسن امر ادک کي، گؤيدن اود ياغسين و اونلاري محو اتسئن؟"
55. لاکئن عئسا دؤنوب اونلارا آجيقلاندي. و ددي: "سئز هانسي روحدان اولدوغونوزو بئلمئرسئنئز.
56. چونکي ائنسان اوغلو گلمه‌يئب کي، ائنسانلارين جانيني محو اتسئن. گلئب کي، اونلاري خئلاص اتسئن." و آيري بئر کنده گتدئلر.
57. اونلار يولدا گدن واخت، بئر نفر عئسايا ددي: "يارب! هارايا گده​سن، سنئن دالينجا گله‌رم."
58. عئسا اونا ددي: "تولکولرئن يوواسي، گؤي قوشلارينين دا يوواسي وار، لاکئن ائنسان اوغلونون باشيني داياماغا بئر يري يوخدور."
59. و آيري بئر آداما ددي: "منئم داليمجا گل." آمّا او ددي: "يارب منه ائجازه ور، اوّلجه گدئم آتامي دفن ادئم."
60. عئسا اونا بله ددي: "قوي اؤلولر اؤز اؤلولرئني دفن اتسئنلر. آمّا سن گت تارينين پادشاهليغيني اعلان ات."
61. آيري بئري ده ددي: "يارب! سنئن دالينجا گله​جه‌يم، آمّا ائجازه ور اوّلجه اِوئمده اولانلارلا وئداعلاشيم."
62. لاکئن عئسا اونا ددي: "اَلئني جوت اوستونه قويوب آرخايا باخان آدام تارينين پادشاهليغينا ياراشماز."