A A A A A

Bir il Bibliya


Aprel 6


Yeşua 1:1-18
1. ربّئن قولو موسانين اؤلوموندن سونرا، رب موسانين خئدمتچئسي نون اوغلو يوشَعه دانيشيب ددی:
2. "قولوم موسا اؤلدو. ائندي قالخ، سن و بوتون بو خالق اوردون چاييني کِچئب ائسرايئل اؤولادلارينا وره‌جيئم تورپاغا گدئن.
3. موسايا ددئيئم کئمي، آياق قوياجاغينيز هر يري سئزه ورمئشم.
4. صحرا و بو لوبناندان بؤيوک چايا قدر، يعني فَرات چايينا قدر، خئتلی‌لرئن بوتون اؤلکه‌سي بؤيوک دهنزه قدر کي، گونشئن باتديغي طرف اولسون، يِر سئزئن تورپاقلارينيز اولاجاق.
5. بوتون عؤمرون بويو هچ کس سنه ضئدّ چيخا بئلميه‌جک. موسا ائله اولدوغوم کئمي، سنئنله ده اولاجاغام، سني بوراخماياجاغام، سني ترک اتميه‌جيم.
6. گوجلو و اورَکلي اول، چونکي آتالارينا ورمک اوچون آند ائچدئيئم بو تورپاغي، سن بو خالقا مولک وره‌جکسن.
7. آنجاق چوخ گوجلو و اورَکلي اول؛ دئقّت ات کي، قولوم موسانين سنه تاپشيرديغي بوتون قانونا عمل اده‌سن؛ اوندان نه صاغا، نه ده سولا دؤن کي، گده‌جيئن هر ياندا اوغور قازاناسان.
8. بو شرئعت کئتابينين سؤزلري دئلئندن دوشمه‌سئن، گجه-گوندوز اونون اوستونده دوشون کي، اورادا يازيلان هر شيه دقئق عمل اده‌سن. چونکي او واخت يولون اوغورلو اولاجاق و آماجينا چاتاجاقسان.
9. مگر سنه امر اتمه‌مئشم؟ گوجلو و اورَکلي اول! قورخما، اوره‌يئن ده اوزولمه‌سئن. چونکي تارين رب گده‌جيئن هر يرده سنئنله‌دئر."
10. او واخت يوشَع خالقين سرکرده‌لرئنه امر ادئب ددی:
11. "اوردوگاهي گَزئن و خالقا امر ادئب ديئن: «اؤزونوزه آذوقه حاضيرلايين، چونکي گلن اوچ گونده اوردون چاييني کچه‌جيئک و تارينيز ربّئن سئزه مولک اولاراق وردئيي تورپاغا گئرئب اورايا مالئک اولاجاقسينيز.»"
12. يوشَع رِعوبئنلی‌لره، جادلي‌لارا، و مِنَسّه قبئله‌سئنئن ياريسينا بله ددی:
13. "يادينيزا سالين کي، ربّئن قولو موسا سئزه بله امراتمئشدي: «تارينيز رب سئزه راحاتليق ورئر و بو تورپاغي سئزه وره‌جک.»
14. آروادلارينيز، اوشاقلارينيز، و مال-حيوانلارينيز اوردون چايينين بو تاييندا، موسانين سئزه وردئيي تورپاقدا قالسين. لاکئن سئز يعني سئزئن بوتون ائگئد آداملارينيز گرک سئلاحلانيب، قارداشلارينيزين قاباغيندا او تايا کچه‌سئنئز. سئز گرک اونلارا کؤمک اده‌سئنئز.
15. او زاماناجاق کي، رب، سئزه وردئيي کئمي، سئزئن قارداشلارينيزا دا راحاتليق ورسئن و اونلار دا تارينيز ربّئن اونلارا وره‌جيی تورپاغا مالئک اولسونلار. سونرا اؤز مولکونوزه قاييديب اونا مالئک اولارسينيز، او مولک کي، ربّئن قولو موسا اوردون چايينين شرقئنده سئزه مولک وردی."
16. اونلار يوشَعه جاواب ورئب ددئلر: "بئزه نه امر ادئبسن، اده‌جيئک و هارايا گؤندره‌سن، گده‌جَيئک.
17. نجه هر ائشده موسادان ائطاعت ادئردئک، سندن ده اِله ائطاعت اده‌جيئک. آنجاق تارين رب قوي موسا ائله اولدوغو کئمي، سنئنله ده اولسون.
18. سنئن امرلرئنه ضئدّ چيخان و بويوردوغون سؤزه قولاق آسمايان هر کس اؤلدوروله‌جک. آنجاق سن گوجلو و اورَکلي اول."

Yeşua 2:1-24
1. نون اوغلو يوشَع شئطّئمدن ائکي کئشئني جاسوسلوق اتمه‌يه گئزلي گؤندرئب ددي: "گدئن اورانين تورپاغيني خوصوصن ده اَرئحاني گؤزدن کچئردئن." اونلار گتدئلر و راخاب آدلي بئر فاحئشه‌نئن اِوئنه گئرئب اورادا قالديلار.
2. اَرئحا پادشاهينا خبر آپاريلدي: "باخ، بو گجه ائسرايئل اؤولادلاريندان بورايا آداملار گلئب کي، تورپاغيميزي گؤزدن کچئرتسئنلر."
3. اَرئحا پادشاهي راخابا خبر گؤندرئب ددي: "سنئن يانينا گلن و سنئن اِوئنه گئرن آداملاري چيخارت، چونکي اونلار بوتون تورپاغيميزين جاسوسلوغونا گلئبلر."
4. لاکئن راخاب او ائکي کئشئني گؤتوروب گئزلَتمئشدي. راخاب ددي: "بلی، آداملار يانيما گلمئشدي، آمّا هارادان اولدوقلاريني بئلمئردئم.
5. آخشام واختي دروازا باغلاناندا او آداملار چيخديلار؛ بئلمئرم هارايا گتدئلر. تِز داللارينجا گدئن کي، اونلاري توتا بئله‌سئنئز."
6. لاکئن آرواد اونلاري داما چيخارديب، دامدا سَردئيي کتان لئفلرئن آراسيندا گئزلَتمئشدي.
7. پادشاهين گؤندردئيي آداملار جاسوسلاري يول بويو اوردون چايينين کچئدئنه قدر تعقئب اتدئلر. تعقئبچئلر باييرا چيخان واخت دروازا باغلاندي.
8. جاسوسلار ياتماميش آرواد اونلارين يانينا داما چيخدي.
9. و بو آداملارا ددي: "بئلئرم کي، رب بو تورپاغي سئزه ورئب. سئز بئزي دهشته ساليبسينيز و بو تورپاغين بوتون ساکئنلري سئزئن قاباغينيزدا اَرئيئبلر.
10. چونکي اشئتمئشئک کي، مئصئردن چيخديغينيز زامان، رب قيرميزي دهنزئن سولاريني نجه قاباغينيزدا قوروتدو و اوردون چايينين او تاييندا محو اتدئيئنئز ائکي اِمور پادشاهي سئخون و عوگا نه اتدئنئز.
11. بونلاري اشئدنده اوره‌يئمئز اوزولدو و سئزئن قورخونوزدان، هچ کئمئن طاقتي قالمادي، چونکي تارينيز رب يوخاريدا گؤيون و آشاغيدا يِرئن تاريسي‌دير.
12. ائندي خاهئش ادئرم، منه ربّئن آديندا آند ائچئن کي، سئزه مهرئبانليقلا رفتار اتدئيئم اوچون، سئز ده منه و آتامين عايئله‌سئنه مهرئبان اولاجاقسينيز. منه اعتئبارلي بئر نئشانه ورئن کي،
13. آتامي، آنامي، قارداشلاريمي، باجيلاريمي، اونلارين يانيندا اولان هر کسي صاغ قوياجاقسينيز و جانيميزي اؤلومدن قورتاراجاقسينيز."
14. آداملار اونا ددئلر: "اگر بو ائشئمئزئن اوستونو آچماياسينيز، جا‌نيميز سئزه فدا اولسون. رب بو تورپاغي بئزه ورن واخت، سؤزوموزه وفا ادئب سئزه مهرئبان اولاجاغيق."
15. او واخت آرواد اونلاري ائپل پنجره‌دن آشاغي اِندئردي، چونکي اونون اِوي شهرئن قالا دوواريندا ائدي و او، دووارين ائچئنده ياشاييردي.
16. آرواد اونلارا ددي: "داغليغا گدئن کي، تعقئبچئلر سئزه چاتماسينلار، اونلار قاييدانا قدر، اوچ گون اورادا گئزله‌نئن. سونرا يولونوزا داوام ورَرسئنئز."
17. آداملار اونا ددئلر: "سنئن بئزه ائچدئردئيئن بو آندين آلتيندا اولماياجاغيق،
18. مگر بو تورپاغا گلدئيئمئز واخت، بئزي دوشوردويون پنجره‌يه بو قيرميزي ائپي باغلاياسان. آتاني، آناني، قارداشلاريني و آتانين بوتون قوحوملاريني يانينا، اؤز اِوئنه ييغ.
19. سنئن اِوئنئن قاپيسيندان کئم باييرا چيخسا، قاني اؤز باشينا اولاجاق و بئز بونا گوناهکار اولماياجاغيق. لاکئن سنئنله بئرلئکده اِوئنده اولان هر کسه توخونولسا، قوي اونون قاني بئزئم باشيميزا اولسون.
20. آمّا اگر بو ائشئمئزئن اوستونو آچاسان، اوندا سنئن بئزه ائچدئردئيئن بو آنددان آزاد اولاجاغيق."
21. راخاب ددي: "نجه ديئرسئنئز، اله ده اولسون.» سونرا اونلاري يولا سالدي و اونلار گتدئلر. راخاب قيرميزي ائپي پنجره‌يه باغلادي.
22. بو آداملار گتدئلر و داغليغا چيغيب، تعقئبچئلر قاييدانا قدر، اوچ گون اورادا قالديلار. تعقئبچئلر بوتون يول بويو اونلاري آختارميشديلار، لاکئن تاپماميشديلار.
23. سونرا او ائکي کئشي گری دؤنوب داغليق بؤلگه‌دن اِندئلر، و چايي کچئب نون اوغلو يوشَعئن يانينا گلدئلر و باشلارينا گلن هر شيي اونا نقل اتدئلر.
24. اونلار يوشَعه ددئلر: "حقئقتن، رب بوتون او تورپاغي بئزئم اَلئمئزه ورئب؛ او تورپاغين بوتون ساکئنلري ده قاباغيميزدا قورخودان اَرئيئبلر."

Zəbur 41:1-13
1. خوش او آدامين حالينا کي، ضعئف آدامين قيدئنه قالير. يامان گونده رب اونو قورتاراجاق،
2. رب اونو حئفظ ادئب دئري ساخلاياجاقدير، اؤلکه‌ده موبارک اولاجاق. سن اونو دوشمنلرئن الئنه بوراخماياجاقسان،
3. ناخوشلوق دؤشه‌يئنده رب اونا قووّت وره‌جک. سن اونو ناخوشلوق ياتاغيندان صاغالداجاقسان.
4. من ددئم: "يارب، منه يازيغين گلسئن!" جانيما شفا ور، چونکي سنئن ضئدّئنه گوناه اتمئشم.
5. دوشمنلرئم منئم حاقّيمدا يامان دانيشيب ديئرلر: "نه واخت اؤله‌جک؟ نه واخت آدي محو اولاجاق؟"
6. گؤروشويومه بئري گلن واخت، بوش سؤزلر دانيشماغا باشلايير، بو آرادا اوره‌يئنده بؤهتانلار ييغير، سوراسي دا اشئيه گدئب اونو هر يرده يايير.
7. بوتون منه کئن باغلايانلار، آرالاريندا پيچيلداشيرلار؛ منئم ضررئمه فئکئرله‌شئب ديئرلر:
8. "پئس بئر درد جانينا دوشوب؛ ياتديغي يردن آرتيق قالخماياجاق."
9. اعتئماد اتدئيئم ياخين دوستوم، حتّا چؤره‌يئمي يئين بله، منه خيانت ادئب.
10. لاکئن سن، يارب، منه يازيغين گلسئن و مني قالدير؛ قوي بو ائنسانلارا حاق اتدئکلرئني ورئم.
11. بوندان بئلئرم کي، مندن خوشلانيرسان، چونکي دوشمنئم منه قالئب گلمئر.
12. لاکئن منه گلئنجه، ائخلاصيم اوچون مني مؤحکم ساخلاييرسان، ابده کئمي حوضوروندا ساکئن ادئرسن.
13. ائسرايئلئن تاريسي ربّه حمد اولسون، ازلدن ابده کئمي! آمئن، آمئن.

Süleymanın Məsəlləri 13:15-16
15. شوعورلو آدام لوطف قازانار، خائنئن يولو چتئندئر.
16. شوعورلو آدام بوتون ائشئني معرئفتله گؤرر، آمّا آخماق اؤز سفه‌لئيئني هامي‌يا گؤرسه‌در.

Luka 8:26-56
26. اونلار جلئلئن موقابئلئنده اولان جده‌رئلرئن وئلايتئنه گلدئلر.
27. عئسا قاييقدان ساحئله چيخاندا، او شهر اهلئندن ائبلئس الئنه توتولموش بئر آداما راست گلدي. بو آدام اوزون زاماندان بري پالتار گيمئردي و اِوده يوخ، مقبره‌لرده ياشاييردي.
28. او، عئساني گؤرن زامان، باغيريب اونون قاباغيندا يره دؤشندي و اوجا سسله ددي: "اي تاعالا تارينين اوغلو عئسا، مندن نه ائسته‌يئرسن؟ سنه يالواريرام، منه عذاب ورمه!"
29. چونکي عئسا اونا امر اتمئشدي کي، بو آدامدان اشئيه چيخسين. ناپاک روح دفه​لر​له اونو توتموشدو و آدامي زنجئرلر و کونده​لر​له باغلاييب باشينا موحافئظ قويموشدولار. آمّا گئنه ده زنجئرلري قيريردي و ائبلئس طرفئندن چؤللره قوولوردو.
30. عئسا اوندان سوروشدو: "آدين نه‌دئر؟" جاواب وردي: "قوشون." اونا گؤره کي، اونا بئر چوخ ائبلئس گئرمئشدي.
31. اونلار عئسايا يالوارديلار کي، اونلارا برزخه گتمه‌يه امر اتمه‌سئن.
32. اورادا، داغدا بؤيوک بئر دونگوز سوروسو اوتلاييردي. اونا يالوارديلار کي، دونگوزلارين ائچئنه گئرمه‌يه اونلارا ائجازه ورسئن. عئسا دا ائجازه وردي.
33. ائبلئسلر او آدامدان چيخيب دونگوزلارا گئردئلر. دونگوز سوروسو اوچوروما طرف قاچيب، اورادان گؤله آتيلدي و هاميسي بوغولدولار.
34. چوبانلار بو حادئثه​ني گؤرن واخت قاچيب، بو خبري شهرده و کندده يايديلار.
35. خالق اولوب-کچنلري گؤرمک اوچون چيخيب، عئسانين يانينا گلدي و ائچئندن ائبلئسلر چيخميش آدامي گؤردولر کي، عئسانين آياقلاري يانيندا پالتار گيئنمئش و عاغيل‌لاشميش اوتوروب. و دهشته دوشدولر.
36. بو حادئثه​ني گؤرنلر ائبلئس الئنه توتولموش آدامين نجه صاغالديغيني اونلارا نقل اتدئلر.
37. او زامان جَده‌ره وئلايتئنئن بوتون خالقي عئسادان خاهئش اتدئلر کي، اورادان گتسئن، چونکي اونلاري بؤيوک دهشت بوروموشدو. عئسا دا قاييغا مئنئب قاييتدي.
38. اوندان ائبلئسلر چيخميش آدام عئسايا يالواردي کي، اونون يانيندا قالسين. آمّا عئسا اونو مورخّص ادئب ددي:
39. "اِوئنه قاييت و تارينين سنه نه اتدئيئني نقل ات." او دا گدئب عئسانين اونا اتدئکلرئني بوتون شهرده يايدي.
40. عئسا گري قاييدان زامان، خالق شادليقلا اونون پئشوازينا چيخدي، چونکي اونو گؤزله​يئردئلر.
41. بو آرادا، يايروس آدلي بئر کنئسه ريئسي گلئب، عئسانين آياقلارينا دوشدو و اونا يالواردي کي، اونون اِوئنه گلسئن.
42. چونکي اون‌ائکي ياشلاريندا اولان بئري‌​بئردانه قيزي اؤلوم حاليندا ائدي. اونون اوئنه گدنده، جاماعات عئساني هر طرفدن سيخيشديرديلار.
43. اورادا بئر آرواد وار ائدي کي، اون‌ائکي ائلدن بري قان آخماسي کسئلمه​مئشدي و هچ کس اونا شفا وره بئلمه​مئشدي.
44. آرواد عئسانين آرخاسيندان گلئب، پالتارينين اَته‌يئنه ال سورتدو و او آندا اونون قان آخماسي کسئلدي.
45. عئسا سوروشدو: "منه کئم ال سورتدو؟" هامي ائنکار اتدي. او زامان پطروس ددي: "اوستاد، جاماعات هر طرفدن هوجوم ادئب، سني سيخيشديرير."
46. لاکئن عئسا ددي: "منه بئر نفر ال سورتدو، چونکي اؤزومدن قووّت چيخديغيني بئلدئم."
47. او زامان آرواد، گئزلی قالا بئلمه‌دئيئني گؤرنده تئتره‌يه-تئتره‌يه گلئب، عئسانين آياقلارينا دوشدو و بوتون خالقين حوضوروندا نقل اتدي کي، نه سببدن اونا ال سورتوب و او آندا نجه شفا تاپيب.
48. عئسا دا اونا ددي: "قيزيم، ائمانين سني خئلاص اتدي. سالامات گت."
49. عئسا حله بو سؤزو ديئردي کي، کنئسه ريئسئنئن اوئندن بئر آدام گلئب ددي: "قيزين اؤلدو، آرتيق اوستادا زحمت ورمه."
50. لاکئن عئسا بونو اشئدن زامان اونا ددي: "قورخما، آنجاق ائمان ات و او صاغالاجاق."
51. اِوه گئردئکلري واخت عئسا، پطروس، يوحنّا، يعقوب، و قيزين آتا‌-آناسيندان باشقا هچ کئمه اِوه گئرمه‌يه ائجازه ورمه‌دي.
52. بو آرادا، هامي قيز اوچون ياس توتوب آغلاييردي. آمّا عئسا ددي: "آغلامايين، او اؤلمه‌يئب، آنجاق ياتيب."
53. اونلار قيزين اؤلدويونو بئلدئکلري اوزوندن عئسايا گولدولر.
54. لاکئن عئسا قيزين الئندن توتوب ددي: "اوشاق، قالخ!"
55. قيزين روحو گري قاييتدي. قيز او آندا آياغا قالخدي. عئسا امر اتدي کي، اونا يمک ورسئنلر.
56. قيزين آتا‌-‌​آناسي تعجّوبدن مات قالميشديلار. آمّا عئسا اونلارا تاپشيردي کي، بو حادئثه​نئن حاقّيندا هچ کسه دانيشماسينلار.