A A A A A

Bir il Bibliya


Aprel 28


Rut 1:1-22
1. داورلرئن حؤکم اتدئيي گونلرده، اؤلکه‌ده قيتليق اولدو. اِله بو واختلاردا يهودانين بِيت‌لِخِم شهرئندن بئر کئشي آروادي و ائکي اوغلو ائله بئرلئکده موآب تورپاغينا کؤچدو کی، اورادا مووَقّتي ياشاسين.
2. بو کئشئنئن آدي اِلئمَلِک، آروادينين آدي ناعومي، بئر اوغلونون آدي مَخلون، او بئرئنئن آدي دا کئليون ائدي. اونلار يهودانين بِيت‌لِخِم شهرئندن اولان اِفراتلي‌لار ائدئلر. بو آداملار موآب تورپاغينا گلئب اورادا قالديلار.
3. سونرا ناعومئنئن اَري اِلئمَلِک اؤلدو و او، ائکي اوغلو ائله قالدي.
4. اوغوللاري اؤزلرئنه موآب قيزلاريندان آرواد آلديلار. بو آروادلارين بئرئنئن آدي عورپا، او بئرئنئن آدي دا روت ائدي. اونلار اون ائله ياخين بو تورپاقدا ياشاديلار.
5. سونرا مَخلون و کئليون دا اؤلدو، ناعومي هم اوغولسوز، هم ده اَرسئز قالدي.
6. بئر گون ناعومي گلئنلري ائله آياغا قالخدي کي، موآب تورپاغيندان گری قاييتسين. چونکي او، موآب تورپاغيندا اشئتمئشدي کي، رب اؤز خالقينا نظر ساليب اونلارا چؤرک ورئب.
7. بلجه ناعومي ياشاديغي يردن آيريلدي، اونون ائکي گلئني ده اونونلا ائدئلر؛ گِدئردئلر کي، يهودا اؤلکه‌سئنه قاييتسينلار.
8. ناعومي هر ائکي گلئنئنه ددي: "گدئن، هر بئرئنئز آنانيزين اِوئنه قاييدين. رب سئزه مهرئبان اولسون، نجه کي، سئز منه و مَرحوملارا مهرئبانليق اتدئنئز.
9. رب اِله اتسئن کي، هر بئرئنئز اَر اِوئنده راحاتليق تاپاسينيز.» سونرا او، گلئنلرئني اؤپدو و اونلار هؤنکوروب آغلاديلار.
10. گلئنلري اونا ددئلر: "خير، بئز ده سنئنله بئرلئکده خالقينين يانينا گدئرئک."
11. آمّا ناعومي ددي: "قيزلاريم، قاييدين گدئن. نئيه گرک منئمله گده‌سئنئز؟ مگر بطنئمده گئنه اوغوللاريم وار کي، سئزه اَر اولسونلار؟
12. قاييدين، قيزلاريم! گدئن. من ائندي اَره گتمک اوچون چوخ ياشلي‌يام. دسم کي، اومئدئم وار، حتّا بو گجه اَره گدئب اوغوللار دوغاجاغام،
13. مگر اونلار بؤيويه‌نه قدر گؤزله‌يَرسئنئز؟ اَره گتمه‌يئب مگر صبر ادرسئنئز؟ يوخ، قيزلاريم! منئم وضعئم سئزئنکئندن داها چتئندئر، چونکي منئم ضئدّئمه قالخان ربّئن اَلئدئر."
14. اونلار گئنه ده بَرکدن آغلاشديلار. عورپا قايين‌آناسيني اؤپوب وئداعلاشدي، آمّا روت اونا ساريلدي.
15. ناعومي روتا ددي: "باخ، قاينين آروادي اؤز خالقينين و آللاهلارينين يانينا قاييتدي، گل سن ده اونون دالينجا گری قاييت."
16. آمّا روت ددی: "مجبور اتمه کي، سني ترک اِدئم َ و سنئنله گتمه‌يئم. بئل کي، هارايا گده‌سن، اورايا گده‌جيم، هارادا قالاسان، اورادا قالاجاغام؛ خالقين منئم خالقيم اولاجاق، تارين دا منئم تاريم.
17. هارادا اؤله‌سن، اورادا اؤله‌رم، اورادا دا باسديرالارام. اگر اؤلومدن باشقا بئر شي منی سندن آييرسا، قوي رب منه بله‌سئني و بوندان داها بَتَرئني اتسئن."
18. ناعومي روتون اونونلا گتمک اوچون بله قرارلي اولدوغونو گؤرنده آرتيق اونا بئر شي دمه‌دي.
19. بلجه هر ائکئسي بِيت‌لِخِمه قدر گدئب اورايا چاتديلار. بِيت‌لِخِمه داخئل اولاندا، دؤنوشلري بوتون شهر اهالئسئني حرکته گتئردي و ددئلر: "ناعومي بودور؟"
20. ناعومي اونلارا ددي: "منه ناعومي دمه‌يئن، منه مارا ديئن، چونکي قادئري موطلق حياتيمي آجي ادئب.
21. من بورادان دولو چيخديم، رب منی بوش قايتاردي. ائندي کي رب منئم ضئدّئمه قالخيب و قادئري موطلق باشيما موصئبت گتئرئب، داها نئيه منی ناعومي چاغيريرسينيز؟"
22. بلجه، ناعومي موآب تورپاغيندان گلئني موآبلي روتلا برابر گری قاييتدي. اونلار بِيت‌لِخِمه آرپا بئچئني باشلاناندا گلدئلر.

Rut 2:1-23
1. ناعومئنئن اَري طايفاسيندان بوعَز آدلي وارلي بئر قوحومو وار ائدي کي، اِلئمَلِکئن طايفاسيندان ائدي.
2. بئر گون موآبلي روت ناعومئيه ددي: "ائجازه ور، زمئيه گدئم. کئمئن گؤزونده لوطف تاپسام، اونون دالينجا باشاق ييغيم." ناعومي اونا ددي: "گت، قيزيم."
3. روت گتدي و بئر زمئيه گئرئب بئچئنچئلرئن دالينجا باشاق ييغماغا باشلادي؛ روت تصادوفن او ساحه‌يه گئرمئشدي کي، اِلئمَلِکئن طايفاسيندان اولا‌ن بوعَزئنکي ائدي.
4. بو واخت بوعَز بِيت‌لِخِمدن گلدي و بئچئنچئلره ددي: "رب سئزئنله اولسون!" بئچئنچئلر جاواب وردئلر: "رب سنه برکت ورسئن."
5. بوعَز بئچئنچئلره نظارت ادن نؤکرئنه ددي: "بس بو جاوان آرواد کئمئندئر؟"
6. بئچئنچئلره نظارت ادن نؤکر جاواب وردی: "بو، او جاوان موآبلي آرواددير کي، ناعومي ائله بورايا موآب تورپاغيندان گلئب.
7. منه ددي: «خاهئش ادئرم، قوي بئچئنچئلرئن دالينجا دوشَن باشاقلاري دَرزلرئن آراسيندان ييغيم.» سحردن گلئب، ائندئيه‌جک بورادادير، تالوار آلتيندا دا لاپ آز دئنجه‌لئب."
8. او واخت بوعَز روتا ددي: "منه قولاق آس، قيزيم! باشاق ييغماق اوچون آيري زمئيه گتمه. بورادان گتمه، منئم کنئز قيزلاريملا قال.
9. گؤزونو بئچئنچئلرئن بئچدئيي بو زمئيه دئک و قيزلارين دالينجا گت. نؤکرلره امراتمئشم کي، هچ کئمئن سنئنله ائشي اولماسين. سوسوز اولاندا، سو قابلارينين يانينا گت و نؤکرلرئن چکدئيي سودان ائچ."
10. روت باشيني اَيئب يره‌جک تعظئم اتدي و ددي: "نه‌يه گؤره من گؤزلرئنده لوطف تاپديم کي، منئم قيدئمه قالاسان. من کي، بئر قرئبم؟"
11. بوعَز اونا جاواب وردی: "اَرئن اؤلَندن سونرا قايين‌آنانا اتدئيئن هر شيي اشئتمئشم. سن آتاني، آناني، دوغما تورپاغيني آتيب، تانيماديغين بئر خالقين يانينا گلئبسن."
12. بو ائشئنئن عوضئني، قوي رب ورسئن! قوي قانادي آلتينا سيغينماق اوچون گلدئيئن ائسرايئلئن تاريسي رب، سنه بول عوض ورسئن!
13. روت ددي: "قوي سنئن گؤزونده تاپديغيم بو لوطف اَسکئلمه‌سئن. نجه ده منه تسلّی وردئن. سنئن کنئزلرئنه تاي اولماديغيم حالدا، بو کنئزئنه مهرئبان سؤزلر ددئن."
14. يمک زاماني بوعَز روتا ددي: "بورايا گل، سن ده چؤرکدن يِه، تئکه‌ني سئرکه-شئره‌يه باتير." بلجه آرواد گلئب بئچئنچئلرئن يانيندا اَيلَشدي. بوعَز اونا قووورغا اوزاتدي. آرواد يِيئب دويدو و يِمه‌يئندن آرتيق دا قالدي.
15. روت باشاق ييغماق اوچون آياغا قالخاندا، بوعَز نؤکرلرئنه امر ادئب ددي: "قويون او حتّا دَرزلردن ده باشاق ييغسين، اونو ائنجئتمه‌يئن.
16. دَرزلر آراسيندان چکئب اونون اوچون ده آتين کي، او دا ييغسين. اونو قينامايين."
17. روت آخشاما قدر زَمئده باشاق ييغدي و ييغديغي باشاغي دؤيوب بئر اِفايا ياخين آرپا چيخارتدي.
18. سونرا اونو گؤتوروب شهره گلدي. قايين‌آناسي اونون نه قدر باشاق ييغديغيني گؤردو. روت ناهاردا دوياندان سونرا آرتيق قالان يِمه‌يئني قايين‌آناسينا وردی.
19. قايين‌آناسي اونا ددي: "بو گون هارادا باشاق ييغدين؟ هارادا ائشله‌دئن؟ سنه حؤرمت ادن قوي برکت آلسين!" روت يانيندا ائشله‌دئيي آدام حاقّيندا قايين‌آناسينا دا‌نيشيب ددي: "بو گون يانيندا ائشله‌دئيئم آدامين آدي بوعَزدئر."
20. ناعومي گلئنئنه ددي: "دئرئلردن و اؤلولردن اؤز مهرئبانليغيني قييمايان رب، قوي اونا برکت ورسئن!" ناعومي گئنه روتا ددي: "او کئشي ياخين قوحوملاريميزدان بئرئدئر. او بئزي قورتاراجاق قَيّومدور"
21. موآبلي روت ددي: "بئر ده او منه ددی کي، «منئم بئچئنئم قورتارانا قدر ائشچئلرئمله بئرلئکده ائشله.»"
22. ناعومي گلئنئنه ددي: "قيزيم، اونون کنئز قيزلاري ائله ائشلَمه‌يئن چوخ ياخشي‌دير، يوخسا آيري زَمئلرده سني ائنجئدَرلر."
23. بِلَجه، روت آرپا و بوغدا بئچئنلري قورتارانا قدر، بوعَزئن کنئز قيزلارينين يانيندا باشاق ييغدي و قايين‌آناسي ائله بئرلئکده ياشادي.

Zəbur 52:1-5
1. نه اوچون پئسلئيه فخر ادئرسن، اي گوجلو؟ تارينين محبّتي دائمي‌دئر.
2. سنئن دئلئن پئسلئک ائختئراع ادئر، ائتي بئر اولگوج کئمي‌دئر، اي حئيله‌گر.
3. سن پئسلئيي ياخشيليقدان، يالاني دا دوز دانيشماقدان داها چوخ سوئرسن. سِلا
4. بوتون هلاک ادن سؤزلري سوئرسن، سن، اي حئيله چيخاردان دئل!
5. تاري دا سني همئشه‌لئک ييخاجاق، چاديريندان سني توتوب پارچالاياجاق، کؤکونو دئرئلر دئياريندان چيخارداجاق. سِلا

Süleymanın Məsəlləri 15:4-5
4. شفا ورن دئل حيات آغاجي‌دير، آمّا اَيري دئل اورک قيرار.
5. سفه آدام آتاسينين تربئيه‌سئني اله سالار، تأدئبي قبول ادن شوعورلودور.

Luka 19:28-48
28. عئسا، بونلاري دئيندن سونرا، قاباقدا يرئيئب اورشلئمه طرف گتدي.
29. زيتون داغي آدلانان داغين اَته‌يئنده‌کي بيت فاجي و بيت عنيايا ياخينلاشاندا شاگئردلرئندن ائکئسئني گؤنده‌رئب،
30. ددي: "قاباقدا اولان کنده گدئن. اورايا گئردئيئنئز زامان باغلانميش بئر سيپا تاپارسينيز کي، ائندئيه کئمي هچ کس اونا مئنمه‌يئب. اونو آچيب گتئرئن.
31. اگر کئمسه سئزدن سوروشسا کي، «نه اوچون سيپاني آچيرسينيز؟»، اونا بله ديئن: «ربّئن بونا احتئياجي وار.»"
32. گؤنده‌رئلن​لر گدئب هر شيي عئسانين ددئيي کئمي تاپديلار.
33. سيپاني آچان واخت، اونون صاحئبلري اونلارا ددئلر: "سيپاني نه اوچون آچيرسينيز؟"
34. شاگئردلر جاواب وردئلر: "بو سيپا ربّه لازيمدير."
35. سيپاني عئسانين يانينا گتئردئلر و پالتارلاريني سيپانين بلئنه سرئب عئساني اونا مئندئردئلر.
36. و عئسا يولدا گدنده، آداملار پالتارلاريني يولا سرئردئلر.
37. زيتون داغينين اَته‌يئنه ياخينلاشاندا شاگئردلرئندن چوخلاري گؤردوکلري بوتون مؤجوزه​لر اوچون سوئنئب، گور سسله تارييا حمد و ثنا اتمه‌يه باشلاديلار.
38. ديئردئلر: "ربّئن آديندا گلن پادشاه موبارک اولسون. گؤيلرده امئن-آمانليق و لاپ اوجالاردا عئزّت اولسون."
39. فرئسئلردن بعضئسي خالقين ائچئندن اونا ددئلر: "اوستاد، شاگئردلرئنه بئر آجيقلان."
40. عئسا جاوابيندا اونلارا ددي: "سئزه ديئرم کي، اگر اونلار ساکئت اولسالار، داشلار دئله گله​جکلر."
41. شهره ياخينلاشديغي زامان عئسا اونا باخيب شهر اوچون آغلادي.
42. و ددي: "آه، کاشکي سن بو گونونده امئن-آمانليغينا باعئث اولان شيلري بئلسه‌يدئن! آمّا بونلار حله​لئک سنئن گؤزلرئندن گئزلي‌دئر.
43. چونکي سني اله گونلر گؤزله‌يئر کي، دوشمنلرئن سني سنگرلر​له احاطه ادئب، موحاصئره​يه آلاجاقلار و هر يردن سيخيشديراجاقلار.
44. سني و ائچئنده‌کي اوشاقلاريني يرله بئر اده​جکلر، سنئن ائچئنده داشي داش اوسته قويماياجاقلار، چونکي تارينين سنئن کؤمه‌يئنه گلدئيي زاماني درک اتمه‌دئن."
45. عئسا معبده گئرئب اورادا آليش-ورئش ادنلري قووماغا باشلادي.
46. و اونلارا ددي: "يازيليب کي، منئم اوئم دوعا اِوئدئر. آمّا سئز اونو اوغرولار يوواسينا دؤنده‌رئبسئنئز."
47. عئسا هر گون معبدده تعلئم ورئردي. باش کاهئنلر، دئن عالئملري، و خالقين اعيانلاري اونو هلاک اتمه‌يه فورصت آختاريرديلار.
48. لاکئن نه اده​جکلرئني بئلمئردئلر. چونکي بوتون خالق ائشتئياقلا اونا قولاق آسيردي.