A A A A A

Bir il Bibliya


Aprel 1


Qanunun Təkrarı 25:1-19
1. ائنسانلار آراسيندا موناقئشه اولسا، قوي اونلار محکمه‌يه گتسئنلر. حاکئملر بو ائشه باخيب حاقلي آداما برائت، آمّا حاقسيزا جزا ورسئنلر.
2. اگر تقصئرکار آدام کؤتَکلَنمه‌يه لايئقدئر، قوي حاکئم اونو يره اوزانديريب کؤته‌يي گوناهينين آغيرليغينا گؤره ووردورسون.
3. تقصئرکارا قيرخ ضربدن آرتيق وورولماسين. اگر قيرخدان چوخ ضربه ووراسينيز، هموطنئنئز گؤزونوز قاباغيندا ذلئل اولا بئلر.
4. خرمن دؤيَن اؤکوزون آغزيني باغلامايين.
5. قارداشلار بئر يرده ياشايان زامان، اگر اونلاردان بئري اؤلسه و اؤله‌نئن اوغلو اولماسا، دول آرواد آيري عايئله‌دن اولان بئر آداما اَره گتمه‌سئن. اَرئنئن قارداشي گلئب اونو آرواد آلسين و قايين-قَيّوملوق وظئفه‌سئني يرئنه يتئرسئن.
6. آروادين دوغاجاغي ائلک اوغول، اؤلَن قارداشينين آديني ياشاتسين. قوي ائسرايئلده مرحومون آدي باتماسين.
7. کئم مرحوم قارداشينين دول آرواديني آلماق ائستَمه‌سه، دول آرواد دروازادا يِرلَشَن آغساقّاللارين يانينا گتسئن و بله دسئن: «قاينيم ائمتئناع ادئر کی، ائسرايئلده قارداشينين آديني ياشاتسين. ائسته‌مئر کی، منئم اوچون قايين-قَيّوملوق وظئفه‌سئني ائجرا اتسئن.»
8. او واخت شهر آغساقّاللاري اونون قاينيني چاغيريب دانيشاجاقلار. اگر او عئناد ادئب گئنه ده «اونو آلميرام» دِسه،
9. او زامان همئن آرواد آغساقّاللار قاباغيندا گلئب قاينينين چاريغيني آياغيندان چيخارتسين و اوزونه توپوروب دسئن؛ «قارداشينين نسلئني ياشاتمايانا بله ادئلئر.»
10. ائسرايئلده اونون نسلی «چاريغي چيخارديلانين نسلي» آدلاناجاق.
11. اگر ائکي کئشي بئربئري ائله ساواشيرلار و اونلارين بئرئنئن آروادي ياخين گلئر کي، اَرئني دؤيَن کئشئنئن اَلئندن قورتارسين، و اَلئني اوزاديب او بئري کئشئنئن جئنسئيّت عوضووندن ياپيشير،
12. بله آروادين اَلئني کَسئن و رحم گؤرسدمه‌يئن.
13. توربانيزدا ائکي جور چکي داشي، بئري آغير، او بئري يونگول اولماسين.
14. اِوئنئزده سئزئن اوچون ائکي جور اؤلچو، بئري بؤيوک، او بئري کئچئک اؤلچَن اولماسين.
15. چکي داشينيز، اؤلچونوز دوز و دقئق اولسون کي، تارينيز ربّئن سئزه وره‌جيی تورپاقدا اوزون عؤمور سوره‌سئنئز.
16. چونکي تارينيز رب بله پئس ائشلر گؤرن و حاقسيزليق ادنلردن ائيره‌نئر.
17. مئصئردن چيخاندان سونرا عَمالِقلي‌لرئن يولدا سئزه نه اتدئيئني يادا سالين.
18. سئز يورولوب اَلدن دوشَرکَن، اونلار يولدا سئزه هوجوم اتدئلر، آرخادا قالان بوتون گوجسوزلري قيرديلار؛ و تاريدان قورخماديلار.
19. تارينيز رب مولک اتمک اوچون ائرث اولاراق سئزه وره‌جيی تورپاقدا و اطرافينيزدا اولان دوشمنلرئن هاميسيندان راحاتليق ورنده، گؤيلرئن آلتيندان عَمالِقلي‌لرئن خاطئره‌سئني سئلئن؛ بونو گرک ياددان چيخارتماياسينيز.

Qanunun Təkrarı 26:1-19
1. تارينيز ربّئن ائرث اولاراق سئزه وره‌جيی تورپاغا گئرئب اورادا اونا مالئک اولوب ساکئن اولاندا
2. تارينيز ربّئن سئزه وره‌جيی اؤلکه‌نئن تورپاقلاريندان ييغديغينيز بوتون محصوللارين نوباريني گؤتوروب، بئر سبده ييغين. سونرا تارينيز ربّئن اؤز آدينا مسکن سچه‌جيی يره گدئن.
3. او دؤورده خئدمت ادن کاهئنئن يانينا گدئب ديئن: «تاريم ربّه بو گون اعلان ادئرم کي، ربّئن آتالاريميزا ورميه آند ائچدئيي اؤلکه‌يه داخئل اولموشام.»
4. کاهئن اَلئنئزدن سبدي آليب اونو تارينيز ربّئن قوربانگاهي قاباغيندا يره قويسون.
5. تارينيز ربّئن قاباغيندا جاواب ورئب ديئن: «آتام کؤچَري اَرَملي ائدي، مئصئره گدئب اورادا ساکئن اولدو، سايدا چوخ آز ائدي؛ لاکئن بؤيوک، گوجلو و چوخ‌سايلي بئر مئلّت اولدو.
6. مئصئرلی‌لر بئزئمله پئس رفتار اتدئلر. بئزي ذلئل ادئب اوستوموزه آغير ائش يوکله‌دئلر.
7. او واخت آتالاريميزين تاريسي ربّه فرياد اتدئک و رب سَسئمئزي اشئتدي. عذابيميزي، اَذئيّتئمئزي و ذلالتئمئزي گؤردو.
8. رب قووّتلي اَلي، اوزانان قولو، بؤيوک زَهمي، علامت و مؤجوزه‌لري ائله بئزي مئصئردن چيخارتدي.
9. او بئزي بو يره گتئرئب سود و بال آخان بو تورپاغي بئزه وردی.
10. ائندي، يارب، منه وردئيئن تورپاغين محصول نوباريني سنه گتئرمئشَم.» سونرا سبدي تارينيز ربّئن قاباغينا قويوب اونون حوضوروندا سجده ادئن.
11. سئز، لاوئلی‌لر، آرانيزدا ياشايان قرئبلر تارينيز ربّئن سئزه و عايئله‌نئزه وردئيي بوتون ياخشي شيلر اوچون شادليق اده‌جکسئنئز.
12. اوچونجو ائل، اوندا بئر حئصّه‌سئني تقدئم اتمه ائلي، محصولونوزون بوتون اوندا-بئرئني بئر يانا ييغين. آييرما ائشئني قورتاراندان سونرا، اوندا-بئر حئصّه‌سئني لاوئلی‌لره، قرئبلره، يِتئملره و دول آروادلارا ورئن کي، شهرلرئنئزده اونلار دا يِيئب دويسونلار.
13. تارينيز ربّه ديئن: «منه امر اتدئيئن بوتون امرلره موطابئق، من موقدّس پايي اِودن چيخارديب لاوئلی‌لره، قرئبلره، يِتئملره و دوللارا وردئم. امرلرئندن چيخماديم، هچ بئرئني ياددان چيخارماديم.
14. بو پايدان ياس توتارکَن يمه‌دئم، اونو اِودن چيخارداندا نجئس ديئلدئم و اونو اؤلولره تقدئم اتمه‌دئم. تاريم ربّئن سؤزونه قولاق آسديم؛ منه امر اتدئکلرئنئن هاميسيني يرئنه يتئردئم.
15. موقدّس مسکنئندن، گؤيلردن آشاغي‌يا باخ. خالقين ائسرايئله، آتالاريميزا ائچدئيئن آندا گؤره بئزه وردئيئن تورپاغا، سود و بال آخان تورپاغا برکت ور.»
16. بو گون تارينيز رب سئزه امر ادئر کي، بو قايدالارا، حؤکملره عمل اده‌سئنئز. اونلارا بوتون قلبئنئزله، بوتون جانينيزلا عمل اتمک اوچون دئقّتلي اولون.
17. بو گون ربّئن تارينيز اولدوغونو، اونون يوللاري ائله گده‌جَيئنئزي، قانونلارينا، امرلرئنه، حؤکملرئنه رئعايت اده‌جَيئنئزي، اونون سؤزونه قولاق آساجاغينيزي بيان اتدئنئز.
18. بو گون رب سئزه وردئيي سؤزه گؤره بيان اتدي کي، اونا مخصوص خالق اولاسينيز. اونا گؤره ده بوتون امرلرئنه رئعايت اتمه‌لي‌سئنئز.
19. او زامان ددئيي کئمي رب، ياراتديغي بوتون مئلّتلردن تعرئفده، شؤهرتده و حؤرمتده سئزي اوستون اده‌جک کي، تارينيز رب اوچون تقدئس ادئلمئش خالق اولاسينيز."

Zəbur 39:7-11
7. اونا گؤره، ای پروردئگار، نه‌يه توکّول ادئم؟ اومئدئم بئرجه سنده‌دئر.
8. مني بوتون عوصيانلاريمدان قورتار. مني آخماقلار يانيندا روسواي اتمه.
9. لال اولوب آغزيمي آچميرام، چونکي بونو ادن سنسن.
10. گؤندردئيئن بلاني اوستومدن گؤتور. الئنئن ووروشلاري ائله تلف اولموشام.
11. سن ائنساني گوناهين جزاسي اوچون وورورسان؛ اونون سودئيي شيلرئني گووه يدئيي کئمي هچ ادئرسن. دوغرودان دا هر کس آنجاق بئر نفس‌دئر. سِلا

Süleymanın Məsəlləri 13:4-6
4. تنبل آرزولاديغينا چاتماز، لاکئن چاليشقان آدامين جاني کؤکه‌لر.
5. صالح آدام يالان سؤزدن نئفرت ادر، آمّا شر آدام خجالت و روسوايچيليق گتئرر.
6. يولو کامئل اولاني، صالحلئک حئفظ ادر، لاکئن گوناهکاري شر ييخار.

Luka 6:1-26
1. بئر سبّت گونو عئسا اکئنلر آراسيندان کچئردي. شاگئردلري سونبول​لري درئردئلر و اوووجلاريندا اووب ييئردئلر.
2. فرئسئلردن بعضئلري اونلارا ددئلر: "نه اوچون سبّت گونونده جائز اولمايان ائشي ادئرسئنئز؟"
3. عئسا اونلارا جاواب ورئب ددي: "مگر اوخوماييبسينيز کي، داوود و اونونلا اولانلار آج قالان زامان نه اتدئلر؟
4. نجه داوود تارينين اِوئنه گئردي و تارييا تقدئم ادئلمئش چؤرکلري گؤتوروب يدي و اؤزو ائله اولانلارا دا وردي؟! حال بو کي، بونلارين يمه‌يي کاهئنلردن باشقا هچ کسه جائز ديئل."
5. و عئسا اونلارا ددي: "ائنسان اوغلو سبّت گونونون ده صاحئبي‌دئر.""
6. آيري بئر سبّت گونو عئسا کنئسه​يه گئردي و تعلئم ورئردي. اورادا صاغ اَلي قوروموش بئر آدام وار ائدي.
7. دئن عالئملري و فرئسئلر عئسايا بؤهتان آتماق اوچون سبب آختاريرديلار. اونون اوچون ده اونو گؤز آلتينا آلميشديلار کي، بلکه سبّت گونونده شفا ورسئن.
8. آمّا عئسا اونلارين فئکئرلرئني بئلئب، اَلي قوروموش آداما ددي: "آياغا قالخ و اورتادا دور." او دا آياغا قالخيب دوردو.
9. سونرا عئسا اونلارا ددي: "سئزدن سوروشورام: سبّت گونو نه اتمک جائزدئر، ياخشيليق اتمک، يوخسا يامانليق؟ جان قورتارماق، يوخسا اؤلدورمک؟"
10. عئسا اطرافيندا اولان آداملارين هاميسينا باخيب، اَلي قوروموش آداما ددي: "اَلئني اوزات!" او دا اِله اتدي و الي صاغالدي.
11. لاکئن اونلار داها چوخ قضبله‌نئب آرالاريندا دانيشيرديلار کي، عئسايا نه اتسئنلر.
12. او گونلرئن بئرئنده عئسا دوعا اتمک اوچون داغا چيخدي. و بوتون گجه​ني تارييا دوعا اتمکله کچئرتدي.
13. گوندوز اولاندا شاگئردلرئني يانينا چاغيردي. اونلاردان اون‌ائکي نفري سچئب اونلارا حواري آدي قويدو:
14. شمعون کي، اونا پطروس آديني ورمئشدي، قارداشي آندرياس، يعقوب، يوحنّا، فئلئپوس، بارتولماي،
15. متّا، توما، آلفاعوس اوغلو يعقوب، وطنپرست آدلانان شمعون،
16. يعقوب اوغلو يهودا، و سونرالاردا اونا خيانت ادن يهودا ائسکاريوت.
17. عئسا بونلارلا آشاغي اِنئب هامار بئر يرده دوردو. شاگئردلرئندن چوخلاري اورادا ائدئلر و يهودئيه​نئن هر يرئندن، اورشلئمدن، صور و صيدون ساحئل​لرئندن چوخ آداملار گلمئشدئلر کي،
18. اونون سؤزلرئني اشئتسئنلر و مرضلرئندن شفا تاپسينلار. ناپاک روحلاردان عذاب چکن آداملار دا صاغاليرديلار.
19. ​​جاماعاتين هاميسي اونا توخونماغا چاليشيردي، چونکي اوندان قووّت چيخيب هاميسينا شفا ورئردي.
20. عئسا شاگئردلرئنه نظر ساليب ددي: "خوش سئزئن حالينيزا کي، فاغيرسينيز، چونکي تارينين پادشاهليغي سئزئندئر.
21. خوش سئزئن حالينيزا کي، ائندي آجسينيز، چونکي دويورولاجاقسينيز. خوش سئزئن حالينيزا کي، ائندي آغلاييرسينيز. چونکي گوله​جکسئنئز.
22. خوش سئزئن حالينيزا او زامان کي، آداملار ائنسان اوغلونون خاطئرئنه گؤره سئزدن نئفرت ادئرلر، آرالاريندان قووالاييرلار، سئزي تحقئر ادئرلر و آدينيزي پئسله‌يئرلر.
23. او گونده سوئنئن و شادليقدان آتيليب-دوشون. چونکي گؤيده اجرئنئز بؤيوکدور. اونلارين آتالاري دا پيغمبرلرله بله رفتار اتدئلر.
24. لاکئن واي سئزه اي وارلي​لار! چونکي تسلّئنئزي اله ائندي آليبسينيز.
25. واي سئزه اي توخ اولانلار! چونکي آج اولاجاقسينيز. واي سئزه اي گولَنلر، چونکي ياس توتوب آغلاياجاقسينيز.
26. واي سئزه او زامان کي، آداملار سئزئن باره​ده ياخشي دانيشيرلار. چونکي اونلارين آتالاري يالانچي پيغمبرلرله ده بله رفتار اتدئلر.