A A A A A

Bir il Bibliya


Mart 20


Qanunun Təkrarı 1:1-27
1. بونلار موسانين بوتون ائسرايئله ددئيي سؤزلردئلر کي، اونلاري اوردون چايينين شرق طرفئنده، صحرادا پارانلا توفِل، لابان، خَصِروت و دي‌ذاهاب آراسيندا، سوفون موقابئلئنده اولان عَرابا دره‌سئنده ددی.
2. سِعئر داغينين يولو ائله خورِبدن قِدِش‌بَرنِعه‌يه گتمک اوچون اون بئر گون يول چکر.
3. لاکئن مئصئردن چيخديقلارينين قيرخينجي ائلئنده، اون بئرئنجي آيين بئرئنده، موسا ربّئن ائسرايئل اؤولادلارينا ورمک اوچون اونا امر اتدئيي هر شيي ددی.
4. بونو او زامان اتدي کي، خِشبوندا ياشايان اِمورلولارين پادشاهي سئخونو، عَشتاروت و اِدرِه‌عي‌ده ده ياشايان باشان پادشاهي عوگو مغلوب اتدي.
5. اوردون چايينين شرق طرفئنده يِرلَشَن موآب تورپاغيندا، موسا بو قانوني تشرئح اتمه‌يه باشلادي.
6. "خورِبده اولاندا تاريميز رب بئزئمله دانيشيب بله ددي: «بَسدئر بو داغدا قالديغينيز!
7. بورادان کؤچون و سفره داوام ورئب، اِمورلولارين داغليق بؤلگه‌سئنه گدئن، عَرابا دره‌سئنده، داغلاردا، هامار بؤلگه‌ده، نِگِبده و دهنز کناريندا ياشايان بوتون قونشو خالقلارين آراسينا گدئن، کَنَعان تورپاغينا و لوبنانا گدئن کي، بؤيوک فَرات چايينا قدر اوزانير.
8. باخين، بو تورپاقلاري سئزه وردئم؛ گدئن و بو تورپاغا کي، رب اونو آتالارينيزا، يعني ائبراهئمه، ائسحاقا، يعقوبا و اونلاردان سونرا گلن اؤولادلارينا ورمه‌سئني آند ائچئب، مالئک اولون.»
9. او واخت من سئزئنله دانيشيب بله ددئم: تک‌باشينا سئزئن يوکونوزو داشيماغا قادئر ديئلم.
10. تارينيز رب سئزي چوخالديب و باخ، بو گون سئز گؤيون اولدوزلاري قدر چوخسونوز.
11. قوي آتالارينيزين تاريسي ربّ، وعده وردئيي کئمي، سئزي اولدوغونوزدان مئن قات آرتيق چوخالتسين و سئزه برکت ورسئن.
12. من سئزئن زحمتئنئزه، يوکونوزه، و داعوالارينيزا تک باشينا نجه تاب گتئره بئله‌رم؟
13. اؤزونوز اوچون هر قبئله‌دن حئکمتلي، بصئرتلي، و تجروبه‌لي کئشئلر سچئن. من اونلاري سئزه باشچي تعيئن اده‌جيم.
14. سئز ده جاواب ورئب دِدئنئز: اتمه‌يئمئز اوچون سن دئيَن ياخشي‌دير.
15. بلجه من قبئله‌لرئنئزئن حئکمتلي و تجروبه‌لي باشچيلاريني گؤتوروب سئزه مئنباشي، يوزباشي، اَلّي‌باشي، اونباشي و قبئله مأمورلاري تعيئن اتدئم.
16. او واخت حاکئملرئنئزه امر ادئب ددئم: آرالاريندا موناقئشه‌سي اولان هموطنلرئنئزي اشئدئن. موناقئشه ائستر ائسرايئللي هموطنلرئنئز آراسيندا اولسون، ائستر بئر ائسرايئللي ائله ياداِلّي آراسيندا اولسون، حؤکم چيخاردارکَن عدالتلي اولون.
17. هچ کئمه طرفدارليق اتمه‌يئن؛ کئچئيي ده بؤيوک کئمي اشئدئب حؤکم چيخاردين. ائنساندان قورخمايين، چونکي حؤکم تارينين‌دير. سئزئن اوچون چتئن اولان موناقئشه‌لي مَسَله‌‌ني منئم يانيما گتئرئن. من اونلارا قولاق آسارام.
18. او واخت اده‌جَيئنئز شيلرئن هاميسيني سئزه امر اتدئم.
19. سونرا بئز خورِبدن کؤچدوک. تاريميز ربّئن بئزه امر اتدئيي کئمي گؤردويونوز بؤيوک و قورخولي صحراني کچئب، اِمورلولارين داغليق بؤلگه‌سئنه طرف کؤچدوک و قِدِش‌بَرنِعه‌يه چاتديق.
20. من سئزه ددئم: تاريميز ربّئن بئزه وره‌جيي اِمورلولارين داغليق بؤلگه‌سئنه چاتيبسينيز.
21. گؤرون، تارينيز رب بو تورپاغي سئزه ورئب. قالخين و آتالارينيزين تاريسي ربّئن سئزه ددئيي کئمي اورايا مالئک اولون. هچ نَدن قورخوب چکئنمه‌يئن.
22. او زامان هامينيز يانيما گلئب دِدئنئز: قوي اؤزوموزدن قاباق آداملار گؤنده‌رک کي، تورپاغي بئزئم اوچون نظردن کچئرتسئنلر. قوي گده‌جيئمئز يول و چاتاجاغيميز شهرلر باره‌ده اونلار بئزه معلومات گتئرسئنلر.
23. بو فئکئر خوشوما گلدي. اون ائکي نفر گؤتوردوم يعني هر قبئله‌دن بئر نفر.
24. اونلار داغليق بؤلگه‌سئنه دؤنوب اورايا گتدئلر. اِشکول دره‌سئنه قدر گلئب اوراني گؤزدن کچئرتدئلر.
25. سونرا بو تورپاغين ثمرئندن اَللرئنه گؤتوروب، يانيميزا اِنئب قاييتديلار و بله معلومات وردئلر: تاريميز ربّئن بئزه وره‌جيي تورپاق، ياخشي تورپاقدير
26. آمّا سئز تارينيز ربّئن امرئنه عاصي چيخيب، اورايا گتمک ائستمه‌دئنئز.
27. اؤز چاديرلارينيزدا ديئنئب دِدئنئز: رب بئزدن نئفرت اتدئيي اوچون، بئزي مئصئر اؤلکه‌سئندن چيخارتدي کي، اِمورلولارين الئنه تسلئم ادئب بئزي هلاک اتسئن.

Qanunun Təkrarı 2:1-37
1. ربّئن منه امر اتدئيي کئمي قاييديب، قيرميزي دهنز يولو ائله صحرايا کؤچدوک. چوخ گونلر سِعئر داغيني گَزئب دولانديق.
2. رب منئمله بله دانيشيب، ددي:
3. بَسدئر بو قدر بو داغي گَزئب دولانماغينيز. ائندي شئمالا طرف دؤنون.
4. خالقا بله امر ات: ‹عئسو اؤولادلارينين تورپاغيندان کی، سِعئرده ياشايان قوحوملارينيزدير، کچه‌جکسئنئز. اونلار سئزدن قورخاجاقلار، بونا گؤره چوخ دئقّتلي اولون.
5. اونلارلا موناقئشه ياراتمايين، چونکي تورپاقلاريندان بئر قاريش دا سئزه ورمَيه‌جيم. چونکي من سِعئر داغيني عئسونون نسلئنه ورمئشم کي، اونلارا مولک اولسون.
6. اونلاردان يِمه‌يي ده، سويو دا پوللا آلين، قوی يِيئب- ائچمه‌يئنئز بله اولسون.›
7. چونکي تارينيز رب اَلئنئزده اولان هر ائشه برکت ورئب. بو گِنئش چؤلده گَزئب-دولانديغينيز ربّئن نظرئنده‌دئر. بو قيرخ ائل عرضئنده سئزئنله اولوب؛ هچ نَيه اِحتئياجينيز اولماييب.
8. بئز سِعئر داغيندا ياشايان قارداشلاريميز عئسو اؤولادلاريندان، عَرابا يولوندان، اِيلَت و عِصيون‌گِبِردن گتدئک. دؤنوب موآب صحراسي يولوندان کچدئک.
9. رب منه ددي: موآبلي‌لاري ائنجئتمه و اونلارلا دؤيوشه گئرمه. من اونلارين تورپاغيندان سئزه هچ مولک ورميه‌جيم، چونکي عار شهرئني لوط اؤولادلاري اولان موآبلي‌لارا ورمئشم کي، اونلارا مولک اولسون.
10. اورادا اَوّل اِملي‌لر ياشاييرديلار؛ اونلار عَناقلي‌لار کئمي گوجلو، چوخ سايلي و اوجابوي بئر خالقديرلار.
11. اونلار دا عَناقلي‌لار کئمي رِفالي‌لار ساييلير، لاکئن موآبلي‌لار اونلاري اِملي‌لر چاغيريرلار.
12. سِعئرده ده اوّل‌لر خورلولار ياشاييردي. لاکئن عئسو اؤولادلاري اونلاري قوودولار و اونلاري قيريب، تورپاقلاريندا ساکئن اولدولار، نجه کي، ائسرايئللی‌لر، ربّئن اونلارا مولک وردئيي تورپاغين اهالئسئنه اتدئلر.
13. ‹ائندي دورون و زِرِد چاييني کِچئن.› بئز ده زِرِد چاييني کچدئک.
14. قِدِش‌بَرنِعه‌دن کؤچوب زِرِد چاييني کچنه‌جک اوتوز سکّئز ائل چکدي. اله کي، ربّئن آند ائچدئيي کئمي دوشَرگه‌ده اولان او دؤورده‌کي نسلئن دؤيوشچولرئنئن هاميسي اؤلدولر.
15. دوغرودان دا، ربّئن اَلي اونلارين ضئدّئنه ائدي کي، اونلاري اوردوگاهدان هلاک ادئب هاميسيني يوخ اتسئن.
16. خالقين بوتون دؤيوش آداملاري اؤلوب-قورتاراندان سونرا،
17. رب منئمله دانيشيب بله ددي:
18. سئز بو گون موآب سرحدئندن يعني عار شهرئندن کچه‌جکسئنئز.
19. عَمّون اؤولادلارينا ياخينلاشاندا، اونلاري ائنجئتمه‌يئن و موناقئشه ياراتمايين، چونکي عَمّون اؤولادلارينين تورپاغيندان سئزه هچ مولک ورميه‌جيم، اونا گؤره کي اوراني دا لوط اؤولادلاري اولان عَمّونلولارا مولک ورمئشم.
20. (اورا رِفالي‌لارين تورپاغي دا ساييلير، چونکي اَوّللر اورادا رِفالي‌لار ياشاييردي. عَمّونلولار اونلاري زَمزوملولار چاغيريرلار.
21. اونلار عَناقلي‌لار کئمي گوجلو، چوخ سايلي و اوجابوي بئر خالق ائدي، آمّا رب اونلاري عَمّونلولارين قاباغيندان يوخ اتمئشدي. عَمّونلولار اونلاري قوووب، يرلرئنده ساکئن اولموشدولار.
22. رب سِعئرده ياشايان عئسو اؤولادلاري اوچون ده همئن ائشي گؤروب، خورلولاري اونلارين قاباغيندان يوخ اتمئشدي. عئسو اؤولادلاري خورلولاري قوووب، يرلرئنده بو گونه قدر ساکئندئرلر.
23. کَفتوردان چيخان کَفتورلولار دا، کَندلرده ياشايان عَوّئلی‌لري، غَزّه‌يه قدر، قيرديلار و اونلارين يرئنده ساکئن اولدولار.)
24. رب ددي: قالخين، کؤچون، و اَرنون دره‌سئندن کچئن. باخين! خِشبون پادشاهي اِمورلو سئخونو و اونون اؤلکه‌سئني سئزئن اَلئنئزه ورمئشم. اوراني آلماغا باشلايين و اونلارلا دؤيوشه گئرئن.
25. بو گوندن من باشلاييرام کي، سئزئن قورخو و دهشتئنئزي گؤي آلتيندا اولان بوتون خالقلارين اوره‌يئنه ساليم. سئزئن سوراغينيزي اشئدنلر قاباغينيزدا تئتره‌يئب بوزوشه‌جکلر.
26. قِدِموت صحراسيندان خِشبون پادشاهي سئخونون يانينا قاصئدلر گؤندردئم کي، باريش باره‌ده دانيشسينلار. اونا ددئم:
27. ائجازه ور، سنئن تورپاغيندان کِچک. فقط گِنئش يولدان کچه‌جيئک، اورادان نه صاغا، نه ده سولا دؤنه‌جيئک.
28. يِمه‌يئمئز اوچون بئزه يمک ساتارسينيز، ائچمه‌يئمئز اوچون بئزه سو ساتارسينيز. بئزه اؤلکه‌ني پئيادا کچمک کئفايتدئر.
29. سِعئرده ياشايان عئسو اؤولادلاري و عاردا ياشايان موآبلي‌لار اتدئيي کئمي، سن ده ائجازه ور کي، اوردون چاييندان تاريميز ربّئن بئزه وره‌جيي تورپاغا کِچک.
30. لاکئن خِشبون پادشاهي سئخون بئزي تورپاغيندان کچمه‌يه قويمادي. چونکي تارينيز رب، سئزه تسلئم اتمک اوچون، اونون روحونو عئنادکار و اوره‌يئني داش اتدي، نجه کي، بو گون اِله اولوب.
31. رب منه ددي: باخ، سئخونو و اونون اؤلکه‌سئني سنه تسلئم اتمه‌يه باشلاميشام. اوراني تصرّوف اتميه باشلا کي، اونون مولکونه مالئک اولاسان.
32. سئخون بوتون خالقي ائله دؤيوشمَک اوچون ياهَصده بئزئم قاباغيميزا چيخدي.
33. تاريميز رب اونو بئزه تسلئم اتدي. بئز ده سئخونو، اوغوللاريني و بوتون قوشونونو قيرديق.
34. او واخت اونون بوتون شهرلرئني آلديق. هر بئر شهري کئشي، آرواد و اوشاقلاري ائله بئرلئکده کامئل محو اتدئک. هچ کسي صاغ قويماديق.
35. آنجاق حيوانلاريني گؤتوروب، آلديغيميز شهرلري تالان اتدئک.
36. اَرنون دره‌سئنئن کَناريندا عَروعِردن و دره‌ده اولان شهردن گئلعاداجاق قاباغيميزا بئزدن گوجلو بئر شهر چيخمادي. تاريميز رب اونلارين هاميسيني بئزه تسلئم اتدي.
37. آنجاق عَمّون اؤولادلارينين اؤلکه‌سئنه، بوتون يَبّوق چايي کنارينا و داغليق بؤلگه‌سئنده‌کي شهرلره و تاريميز ربّئن قدغن اتدئيي هچ يره ياخينلاشمادينيز.

Zəbur 36:1-6
1. پئس آدامين عوصياني حاقّدا اوره‌يئمئن دئبئنده بئر سؤز وار: اونون نظرئنده تارينين قورخوسو يوخدور،
2. اؤزونو اؤز گؤزونده اله بَيَنمئش کي، گوناهيني گؤرمز، اوندان نئفرت اتمز.
3. آغزينين سؤزلري شرارت و حئيله‌دئر. عاغيللانماقدان و ياخشيليق اتمکدن ال چکئب.
4. ياتاغينين اوستونده پئسلئک دوشونور؛ ياخشي اولمايان يولون اوستونده دورور؛ پئسلئکدن ائير‌نمئر.
5. يارب، محبّتئن گؤيلرده‌دئر، وفادارليغين بولودلارا چاتير،
6. صالحلئيئن اوجا داغلار کئمي‌دئر، عدالتئن بؤيوک درئنلئکدئر؛ ائنسان و حيواني سن حئفظ ادئرسن، يارب.

Süleymanın Məsəlləri 12:4-6
4. فضئلتلي آرواد ارئنئن تاجي‌دير، آمّا خجالت گتئرن آرواد اونون سوموکلرئنئن چورويو کئمي‌دئر.
5. صالح آداملارين فئکئرلري عدالتدئر، شر آداملارين مشورتلري حئيله‌دئر.
6. شر آداملارين سؤزلري اؤلوم اوچون کمئن قورار، آمّا دوز ائنسانلارين آغيزي اونلاري خئلاص ادر.

Mark 16:1-20
1. سبّت گونو کچندن سونرا، مجدللي مريم، يعقوبون آناسي مريم، و سالومه عطئرلر ساتين آلديلار کي، گدئب عئساني عطئرله‌سئنلر.
2. و هفته​نئن ائلک گونونده، سحر چوخ اِرکن، گونش دوغان واخت قبئره گلدئلر.
3. و آرالاريندا ديئردئلر: "گؤره​سن قبئرئن آغزينداکي داشي بئزئم اوچون کئم دئيئرله‌ده‌جک؟"
4. لاکئن باشلاريني قالديريب باخاندا، داشي بئر يانا دئيئرلنمئش گؤردولر. او داش چوخ بؤيوک بئر داش ائدي.
5. قبئره گئردئلر و صاغ طرفده آغ پالتار گيئنمئش بئر جاواني اوتورموش گؤره‌نده حيرت اتدئلر.
6. جاوان اونلارا ددي: "حيرت اتمه‌يئن! سئز چارميخا چکلئمئش ناصئره​لي عئساني آختاريرسينيز. او دئرئلئب، بورادا ​ديئل. باخين، اونو قويدوقلاري​ ير بورادير.
7. ائندي اونون شاگئردلرئنئن و پطروسون يانينا گدئن و اونلارا ديئن کي، او سئزدن قاباق جلئله گدئر. ددئيي کئمي اونو اورادا گؤره​جکسئنئز."
8. اونلار قبئردن چيخيب قاچديلار، چونکي تئتره‌مه و حيرت اونلاري بوروموشدو. قورخدوقلاريندان هچ کسه بئر شي دمه‌دئلر.
9. هفته​نئن ائلک گونو سحر ارکن، عئسا دئرئلندن سونرا اوّلجه اؤزونو مجدللي مريمه گؤرستدي. عئسا مريمدن يدّي ناپاک روح قووموشدو.
10. مريم گدئب عئسا ائله اولانلارا خبر وردي. اونلار ياس توتوب آغلاييرديلار.
11. لاکئن عئسانين دئري اولوب اونا گؤروندويونو اشئدنده ائنانماديلار.
12. بو شيلردن سونرا، عئسا اونلاردان ائکئسئنه، آيري بئر صورتده کنده گدن واخت گؤروندو.
13. بونلار قاييديب شاگئردلره خبر وردئلر، آمّا اونلار بونلارا دا ائنانماديلار.
14. و اوندان سونرا عئسا اؤزونو او اون​بئر شاگئرده، اونلار سوفره باشيندا اولاندا ظاهئر اتدي و اونلاري ائمانسيزليقلاري و داش اورکلي اولدوقلاري اوچون دانلادي. چونکي اونلار اونون اؤلولردن دئرئلندن سونرا اونو گؤرنلرئن سؤزلرئنه ائنانماميشديلار.
15. عئسا اونلارا ددي: "بوتون دونيايا گدئن و ائنجئلي بوتون خالقا وعظ ادئن.
16. ائمان گتئرئب تعمئد اولونان نئجات تاپاجاق؛ لاکئن ائمان گتئرمه‌ين محکوم اولاجاقدير.
17. بو علامتلر ائمان گتئرنلرله گده​جک: منئم آديملا ناپاک روحلاري قوواجاقلار. تزه دئللر​له دانيشاجاقلار.
18. ائلانلاري اَللري ائله توتاجاقلار. اؤلدورن زَهَر ده ائچسه​لر، اونلارا زئيان يتئرمه‌يه​جک. ناخوشلار اوستونه اللرئني قوياجاقلار و اونلار صاغالاجاقلار."
19. بلجه رب عئسا اونلارلا صؤحبت ادندن سونرا گؤيه قالخدي و تارينين صاغيندا اوتوردو.
20. شاگئردلر ده گدئب، تارينين سؤزونو هر يرده يايديلار. رب اونلارلا ائدي و کلامي آرخادان گلن علامتلرله تصدئق ادئردي.