A A A A A

Bir il Bibliya


Fevral 23


Levililər 15:1-33
1. رب موسايا و هارونا ددي:
2. "ائسرايئل اؤولادلارينا دانيشيب ديئن: «بئر نفرئن کئشئلئک عوضوونده آخينتي اولسا، آخينتيسي نجئس ساييلسين.
3. آخينتيسينا گؤره بو اونون نجئسلئيي‌دئر: کئشئلئک عوضوونون آخينتيسي ائستر آزاد آخسين، ائستر قاتيلميش، او شخص نجئس ساييلير.
4. اوستونده ياتديغي هر ياتاق و اوتوردوغو هر شي نجئس ساييلسين.
5. کئم اونون ياتاغينا توخونسا، پالتاريني يوسون، سو ائله يويونسون؛ و آخشاما قدر نجئس ساييلسين.
6. هر کس کي، بدن آخينتيسي اولان شخصئن اوستونده اوتوردوغو اشيانين اوستونده اوتورور، پالتارلاريني يوسون، سو ائله يويونسون، و آخشاما قدر نجئس ساييلسين.
7. هر کس کی، بدن آخينتيسي اولان شخصئن بدنئنه توخونور، پالتاريني يوسون و سو ائله يويونسون، و آخشاما قدر نجئس ساييلسين.
8. اگر بدن آخينتيسي اولان شخص تمئز آداما توپورسه، او آدام پالتاريني يوسون، سو ائله يويونسون. و آخشاما قدر نجئس ساييلسين.
9. بدن آخينتيسي اولان شخصئن مئندئيي هر يَهر نجئس ساييلسين.
10. اونون آلتيندا اولموش هر شيه توخونان هر کس آخشاما قدر نجئس ساييلسين. اونلاري داشييان دا پالتارلاريني يوسون، سو ائله يويونسون، و آخشاما قدر نجئس ساييلسين.
11. بدن آخينتيسي اولان شخص اللرئني يوماميش کئمه توخونسا، او آدام پالتارلاريني يوسون و سو ائله يويونسون، و آخشاما قدر نجئس ساييلسين.
12. بدن آخينتيسي اولان شخصئن توخوندوغو هر ساخسي قاب سينديريلسين، آمّا هر تاختا قاب سو ائله يويولسون.
13. بو آدام، اؤز آخينتيسي کسئلدئيي حالدا، تمئزلنمک اوچون يدّي گون گؤزله‌سئن، سونرا پالتاريني يوسون، بدنئني آخار سو ائله يوسون و تمئز ساييلسين.
14. سکّئزئنجي گون ائکي قومري قوشو و يا ائکي گؤيرچئن گؤتوروب ربّئن حوضور چاديرينين گئرئشئنده ربّئن حوضورونا گلسئن و بونلاري کاهئنه ورسئن.
15. و کاهئن اونلاري تقدئم اتسئن، بئرئني گوناه قورباني، او بئرئني ده يانديرما قورباني. بونلارلا کاهئن او شخص اوچون آخينتيسينا گؤره ربّئن حوضوروندا کفّاره اتسئن.
16. توخومو تؤکولن هر کئشي بوتون بدنئني سو ائله يوسون و آخشاما قدر نجئس ساييلسين.
17. اوستونه توخوم تؤکولولن هر پالتار و يا دَري اشيا سو ائله يويولسون و آخشاما قدر نجئس ساييلسين.
18. کئشي آروادلا ياخينليق ادئب توخومو تؤکولسه، ائکئسي ده سو ائله يويونسونلار و آخشاما قدر نجئس ساييلسينلار.
19. آيباشي واختي قان آخماسي اولان هر آرواد يدّي گون نجئس ساييلسين، اونا توخونان هر کس ده آخشاما قدر نجئس ساييلسين.
20. آيباشي مودّتي آرواد نه‌يئن اوستونده اوزانيب و يا اوتورسا، نجئس ساييلسين.
21. او آروادين ياتاغينا توخونان هر کس اؤز پالتاريني يوسون، سو ائله يويونسون و آخشاما قدر نجئس ساييلسين.
22. او آروادين اوتوردوغو هر شيه توخونان هر کس ده پالتارلاريني يوسون، سو ائله يويونسون، و آخشاما قدر نجئس ساييلسين.
23. اگر بئر آدام او آروادين ياتاغينا، يا دا اوستونده اوتوردوغو شيه توخونسا، او آدام آخشاما قدر نجئس ساييلسين.
24. اگر کئشي او آروادلا ياخينليق اتسه، قان آخما نجئسلئيي اونا دا بولاشار. کئشي ده گرک يدّي گون نجئس ساييلسين؛ کئشئنئن ياتديغي هر ياتاق دا نجئس ساييلسين.
25. آيباشي واختيندان کنار، يا دا سونرا نچه گون داوام ادن قان آخماسي اولان آرواد، بوتون بو آخينتي مودّتي آيباشي نجئسلئيي دؤورونده‌کي کئمي نجئس ساييلسين.
26. بوتون آخينتي واختي، آيباشي نجئسلئيي واختي کئمي، اوستونده ياتديغي هر ياتاق و اوتوردوغو هر شي نجئس ساييلسين.
27. اونلارا توخونان هر کس ده نجئس ساييلسين. قوي او، پالتاريني يوسون، سو ائله يويونسون و آخشاما قدر نجئس ساييلسين.
28. اگر آخينتيسي کسئلسه، او آرواد يدّي گون گؤزله‌سئن، سونرا تمئز ساييلسين.
29. سکّئزئنجي گون همئن آرواد ائکي قومري قوشو، يا دا ائکي گؤيرچئن گؤتوروب حوضور چاديرينين گئرئشئنده، کاهئنئن يانينا گتئرسئن.
30. کاهئن قوشلارين بئرئني گوناه قورباني، او بئرئسئني ده يانديرما قورباني اولاراق تقدئم اتسئن. بونلارلا کاهئن بو آرواد اوچون آخينتيسينئن نجئسلئيئني ربّئن حوضوروندا کفّاره اتسئن.
31. بلجه ائسرايئل اؤولادلاريني اؤز نجئسلئيئندن آييرين کي، آرالاريندا اولان خيمه‌مي، نجئسلئکلري ائله نجئس ادئب اؤلمه‌سئنلر.
32. بو قانون بدن آخينتيسي اولان آداملار اوچون و توخومو تؤکولمکله نجئسلَنَن هر کئشي اوچون،
33. آيباشي اولوب نجئسلَنَن هر آرواد اوچون، آيري بئر آخينتييا دوچار اولان هر کئشي و هر آرواد اوچون، نجئس آروادلا ياخينليق ادن هر کئشي اوچوندور.

Levililər 16:1-34
1. هارونون ائکي اوغلونون ربّئن حوضورونا ياخينلاشيب اؤلدويوندن سونرا، رب موسا ائله دانيشدي.
2. رب موسايا ددي: "قارداشين هارونا دِه کي، پرده‌نئن ائچ طرفئنده‌کي موقدّس يره، سانديق اوستونده‌کي کفّاره قاپاغينين قاباغينا هچ واخت کچمه‌سئن، يوخسا اؤلر؛ چونکي من بولوددا کفّاره قاپاغينين اوستونده گؤرونه‌جيم.
3. بونا گؤره هارون آنجاق بونلارلا موقدّس يره گئره بئلر: گوناه قورباني اوچون بئر گاميش، و يانديرما قورباني اوچون بئر قوچلا.
4. موقدّس کتان خئرقه گيسئن، اَينئنده کتان آلت پالتاري دا اولسون، بِلئنه کتان قورشاق باغلاسين، باشينا کتان عمّامه قويسون. بونلار موقدّس پالتارلاردير. هارون اوّل بدنئني سو ائله يوسون، سونرا اونلاري گيسئن.
5. ائسرايئل اؤولادلارينين جاماعاتيندان گوناه قورباني اوچون ائکي اِرکَک کچي و يانديرما قورباني اوچون بئر قوچ گؤتورسون.
6. سونرا هارون اؤزو اوچون گوناه قورباني اولان گاميشي تقدئم اتسئن کي، هم اؤزو، هم ده عايئله‌سي اوچون کفّاره اتسئن.
7. هارون ائکي کچئني گؤتوروب، حوضور چاديرينين گئرئشئنده ربّئن حوضورونا گتئرسئن.
8. هارون بو کچئلرئن آراسيندا پوشک آتيب، بئرئني رب اوچون، او بئرئسئني ده عَزازئل اوچون سِچسئن.
9. سونرا هارون پوشکله ربّه عاييد اولان کچئني گوناه قورباني اولاراق تقدئم اتسئن.
10. لاکئن پوشکله آزاد بوراخيلماق اوچون سچئلن کچئني ربّئن قاباغيندا دئري ساخلاسين کي، کفّاره‌ني اونون اوستونه قويوب عَزازئل اولاراق چؤله آزاد بوراخسين.
11. سونرا هارون گوناه قورباني اولان گاميشي تقدئم ادئب، بونونلا اؤزو ائله عايئله‌سي اوچون کفّاره اتسئن و اؤزو اوچون گوناه قورباني اولان گاميشي کسسئن.
12. ربّئن حوضوروندان، قوربانگاهدان گؤتورولَن کؤزَرمئش کؤمورله دولموش بئر بوخوردان گؤتوروب، ائکي اوووج دولو نارين اَزئلَن خوش عطئرلي بوخورلا پرده‌نئن ائچ طرفئنه کچسئن.
13. ربّئن حوضوروندا بوخورو اودا قويسون. بلجه بوخورون توستو بولودو شهادت سانديغينين اوستونده اولان کفّاره قاپاغيني اؤرتسون، يوخسا اؤلر.
14. گاميشين قانيندان بئر آز گؤتوروب، بارماغي ائله کفّاره قاپاغينين شرق سمتئنه، هم ده اونون موقابئلئنه بارماغي ائله قاندان يدّي دفه سَپسئن.
15. سونرا خالق اوچون گوناه قورباني اولان کچئني کسسئن و اونون قانيني پرده‌نئن ائچ طرفئنه گتئرئب، قانيني گاميشين قاني کئمي کفّاره قاپاغينين و اونون موقابئلئنه سَپسئن.
16. بونونلا هارون ائسرايئل اؤولادلارينين نجئسلئکلرئنه، بوتون گوناهلاري اوچون اولان تقصئرلرئنه لاپ موقدّس ير اوچون کفّاره اتسئن؛ حوضور چاديرينا دا کي، اونلارين نجئسلئيئنئن آراسيندا يرله‌شئر، بله اتسئن.
17. لاپ موقدّس يرده کفّاره اتمَيه گئرندن چيخانا قدر، حوضور چاديريندا هچ کئم اولماسين. هارون اؤزو، عايئله‌سي و بوتون ائسرايئل جاماعاتي اوچون کفّاره اتسئن.
18. سونرا ربّئن حوضوروندا اولان قوربانگاها گدئب، اونون اوچون کفّاره اتسئن؛ گاميشين و کچئنئن قانيندان بئر آز گؤتوروب، قوربانگاهين بوينوزلارينين هر طرفئنه چکسئن.
19. هارون قوربانگاهين اوستونه بارماغي ائله يدّي دفه قاندان بئر آز سَپئب اونو تمئزله‌سئن. بلجه اونو ائسرايئل اؤولادلارينين نجئسلئکلرئندن تقدئس اتسئن.
20. هارون لاپ موقدّس يري، حوضور چاديريني، و قوربانگاهي کفّاره ادئب قورتاراندان سونرا، صاغ قالان کچئني تقدئم اتسئن.
21. ائکي الئني او دئري کچئنئن باشينا قويوب، ائسرايئل اؤولادلارينين بوتون گوناهلاريني و اونلارين خاطالاري اوچون اولان بوتون تقصئرلرئني اعتئراف اتسئن. و اونلاري کچئنئن باشينا قويوب، بو ائش اوچون تعيئن اولونان آدامين واسئطه‌سئله اونو چؤلده‌ بوراخسين.
22. کچي اونلارين بوتون تقصئرلرئني اؤز اوستونده آياق ديمه‌مئش تورپاغا آپارار. و کچئني چوله آزاد بوراخسين.
23. هارون حوضور چاديرينا گئرسئن و لاپ موقدّس يره گئرمه‌دن قاباق گيمئش اولدوغو کتان پالتاري چيخارديب اورادا قويسون.
24. موقدّس بئر يرده بدنئني سو ائله يوسون و اؤز پالتاريني گيسئن و گلئب کفّاره اوچون اؤز يانديرما قوربانيني و خالقين يانديرما قوربانيني تقدئم اتسئن.
25. گوناه قوربانينين پئيئني ده قوربانگاهدا توستوله‌دئب يانديرسين.
26. عَزازئل کچئسئني آزاد بوراخان آدام دا پالتاريني و بدنئني سو ائله يوسون، سونرا دوشَرگه‌يه گئرسئن.
27. لاپ موقدّس يرده کفّاره اتمک اوچون قاني اورايا گتئرئلَن گوناه قورباني اولان گاميش ائله کچئنئن دَرئسي، اَتي و باغيرساقلاري دوشَرگه‌نئن کنارينا آپاريليب يانديريلسين.
28. اونلاري يانديران آدام پالتاريني و بدنئني سو ائله يوسون، اوندان سونرا دوشَرگه‌يه گئرسئن.
29. بو سئزئن اوچون ابدی بئر قايدا اولسون. يدّئنجی آيين اونونجو گونونده اؤزونوزو هر شيدن محروم ادئب هچ بئر ائش گؤرمه‌يئن؛ هم يِرلی‌لرئنئز، هم ده آرانيزدا ياشايان ياد‌اِلّي‌لرئنئز بله اتسئن.
30. چونکي او گون سئزي تمئزلمک اوچون کفّاره اولونسون کي، ربّئن حوضوروندا بوتون گوناهلارينيزدان تمئزلنه‌سئنئز.
31. او گون سئزئن اوچون سَبّت گونونه بَنزَر ائستئراحت گونودور، اله کي، سئز جانلارينيزي موته‌واضِع اده‌سئنئز. بو ابدی بئر قايدادير.
32. آتاسينين يرئنه کاهئنلئک اتمک اوچون مسح ادئلمئش وظئفه‌لي کاهئن بله کفّاره اتسئن: او، موقدّس کتان پالتارلاريني گيئب
33. موقدّس مکان، حوضور چاديري و قوربانگاه اوچون کفّاره اتسئن؛ کاهئنلر و بوتون جاماعات اوچون ده کفّاره اتسئن.
34. ائلده بئر دفه ائسرايئل اؤولادلارينين بوتون گوناهلارينين کفّاره ادئلمه‌سي اوچون بو، سئزه ابدی قايدا اولسون." رب نجه موسايا امراتمئشدي، او دا اله اتدي.

Zəbur 26:6-12
6. معصوملوقدا اللرئمي يويورام، سنئن قوربانگاهيني طواف ادئرم، يارب کي،
7. حمدئني اوجا سسله اشئتدئرئم، بوتون عجئب ائشلرئني اعلان ادئم.
8. ياشاديغين اوي، يارب، جلالينين ساکئن اولدوغو يري سوئرم.
9. جانيمي گوناهکارلارلا، حياتيمي آدام اؤلدورنلرله بئر يره گتئرمه.
10. او آداملارلا کي، پئسلئک اللرئنده‌دئر، صاغ اللري روشوتله دولودور.
11. لاکئن من کاماللا ياشاييرام؛ مني خئلاص ات، منه رحم اله.
12. آياغيم دوزلوکده دورور؛ جاماعاتلار ائچئنده ربّه حمد اده‌جيم.

Süleymanın Məsəlləri 10:8-8
8. اوره‌يي حئکمتلي اولان آدام امرلري قبول ادر، آمّا سفه-سفه دانيشان آدام ييخيلار.

Mark 4:1-20
1. عئسا گئنه دهنزئن قيراغيندا تعلئم ورمه‌يه باشلادي. اونون يانينا او قدر آدام ييغيلدي کي، او دهنزئن قيراغيندا سو اوستونده اولان قاييغا مئنئب اوتوردو. بوتون او جاماعات دهنزئن قيراغيندا دورموشدو.
2. عئسا اونلارا مثللر​له چوخ شيلر تعلئم وردي و اؤيرتدئکلرئنده اونلارا بله ددي:
3. "قولاق آسين. بئر اَکئنچي توخوم سپمه‌يه چيخدي.
4. توخوملاري سپنده اونلاردان بعضئسي يولون قيراغينا دوشدو و قوشلار گلئب اونو يدئلر.
5. بعضئسي تورپاغي چوخ اولمايان داشليغا دوشوب تز بئتدي، چونکي تورپاغين درئنلئيي يوخ ائدي.
6. گون چيخاندا گونش اونو يانديردي و کؤکو اولماديغي اوچون قورودو.
7. توخوملاردان بعضئسي تئکانلار آراسينا دوشدو و تئکانلار بئتئب، اونو بوغدولار و ثمره ورمه‌دي.
8. او بئرئلري ده برکتلي تورپاغا دوشوب بئتدئلر و بؤيويوب بعضئسي بئره اوتوز، بعضئسي بئره آلتميش، و بعضئسي ده بئره يوز ثمره وردئلر."
9. عئسا اونلارا ددي: "اشئتمه‌يه قولاقلاري اولان اشئتسئن!"
10. تک اولان زامان، اون‌ائکي شاگئرد و اونلارلا اطرافيندا اولان آداملار بو مثل حاقّيندا اوندان سوآل سوروشوردولار.
11. عئسا اونلارا ددي: "تارينين پادشاهليغينين سئرّئني بئلمک سئزه ورئلئب. آمّا اشئگده اولانلارا هر شي مثللرله اولور کي،
12. باخا-باخا گؤرمه‌سئنلر، قولاق آسا-آسا آنلاماسينلار، مبادا دؤنوب باغيشلانسينلار."
13. و اونلارا ددي: "بو مثلي باشا دوشمورسونوز؟ بس اؤزگه مثللري نجه باشا دوشه​جکسئنئز؟
14. اکئنچي کلامي سپئر.
15. يول قيراغينا دوشنلر اونلارديرلار کي، کلامي اشئدئرلر، آمّا شيطان تزلئکله گلئب اونلارا سَپئلن کلامي گؤتوروب آپارير.
16. بلجه ده داشليق يرلره دوشنلر: کلامي اشئدئب آنَن اونو شادليقلا قبول ادئرلر.
17. آمّا اونلاردا کؤک يوخدور. بئر آز زامان قاليرلار، و سونرا بو کلامدان اؤتري سيخينتي و اذئيّت باش ورنده، آنَن ائماندان دوشورلر.
18. تئکانلار آراسينا دوشنلر اونلارديرلار کي، کلامي اشئدئرلر،
19. آمّا بو دونيانين اوموراتي، مال-دؤولتئن آلداديجيليغي، و آيري شيلرئن هوسلري آرايا گئرئب کلامي بوغور و او، ثمره​سئز اولور.
20. برکتلي تورپاغا دوشنلر اونلارديرلار کي، کلامي اشئدئب اونو قبول ادئرلر و بئره اوتوز، بئره آلتميش، و بئره يوز ثمره ورئرلر."