A A A A A

Bir il Bibliya


Oktyabr 13


Yeremya 11:1-23
1. ربدن اِرِميايا بو سؤز نازئل اولدو:
2. "بو عهدئن سؤزلرئنه قولاق آس، يهودا آداملارينا و اورشلئمده ياشايانلارا ديئب
3. بئلدئر کي، ائسرايئلئن تاريسي رب بله ديئر: «لعنت اولسون او آداما کي، بو عهدئن سؤزلرئنه قولاق آسمير.
4. بو عهد باره‌سئنده من آتالارينيزي مئصئر تورپاغيندان، دمئر اَرئدن کوره‌نئن ائچئندن چيخارتديغيم واخت امر ادئب ددئم: ‹منئم سؤزومه قولاق آسين، سئزه امر اتدئيئم هر شيي ادئن. او واخت سئز منئم خالقيم، من ده سئزئن تارينيز اولارام.
5. بله اده‌سئنئز، من ده آتالارينيزا آند ائچئب وعده وردئيئم شيه عمل اده‌رم، بو گون سئزئن اولان تورپاغي سود و بال آخان تورپاغي سئزه وره‌رم.›»" او واخت جاواب ورئب ددئم: "آمئن، يارب."
6. رب منه ددي: "بو سؤزلرئن هاميسيني يهودا شهرلرئنده و اورشلئم کوچه‌لرئنده جار چکئب دِه: «بو عهدئن سؤزلرئنه قولاق آسين، اونلارا عمل ادئن.
7. بلی، من آتالارينيزا اونلاري مئصئر تورپاغيندان چيخارتديغيم گوندن ائندئيه قدر جئدّي ائخطار وردئم. اونلارا دفه‌لرله ائخطار ورئب ددئم: ‹منئم سؤزومه قولاق آسين.›
8. آمّا گئنه ده اونلار قولاق آسماديلار، دئقّت اتمه‌دئلر. هر کس پئس اوره‌يئنئن عئنادکارليغينا موطابئق ياشادي. بونا گؤره ده، من بو عهدده ديئلَن بوتون جزالاري اونلارين باشينا گتئردئم. من اونلارا بو عهده عمل اتمه‌يي امراتمئشدئم، آمّا اونلارعمل اتمه‌دئلر.»"
9. سونرا رب منه ددي: "يهودا آداملاري و اورشلئمده ياشايانلار آراسيندا بئر قصد اوزه چيخيب.
10. اونلار سؤزلرئمه قولاق آسماق ائستمه‌ين اَجدادلارينين گوناهلارينا قاييديبلار، باشقا آللاهلارين طرفداري اولوب اونلارا قوللوق ادئرلر. ائسرايئل و يهودا نسلی اونلارين آتالاري ائله باغلاديغيم عهدئمي پوزوبلار.
11. بونا گؤره ده رب بله ديئر: «باخ، من اونلارين اوستونه بلا گتئره‌جيم و اوندان قاچا بئلميه‌جکلر؛ اونلار منه اوز توتوب فرياد اده‌جکلر، لاکئن من اونلاري اشئتميه‌جيم.
12. او زامان يهودا شهرلرئنئن اهالئسي و اورشلئمده ياشايانلار گدئب بوخور يانديرديقلاري آللاهلارا اوز توتوب فرياد اده‌جکلر، آمّا بو آللاهلار بلانين گلدئيي واخت اونلاري اصلا نئجات ورميه‌جکلر.
13. چونکي ای يهودا، شهرلرئنئن سايي قدر سنئن آللاهلارين وار؛ سئز اورشلئم کوچه‌لرئنئن سايي قدر اوتانديريجي شيلره قوربانگاهلار، بَعَل بوتلرئنه بوخور يانديرماق اوچون قوربانگاهلار دوزَلدئبسئنئز.»
14. بونا گؤره ده، سن بو خالق اوچون دوعا اتمه، اونلار اوچون يالواريب خاهئش ده اتمه. چونکي فلاکتلرئندن اؤتري منه طرف فرياد ادنده قولاق آسماياجاغام.
15. سِوئملي خالقيمين، بو قدر پئس عمللر اتدئيئندن سونرا، منئم اِوئمده نه حاقّي وار؟ تقدئس اولونموش اَتئن چوخلوغو ائله مگر اوستونوزدن بلا چکئلر، اِله کي، سن سِوئنه‌سن؟
16. رب سنئن آديني «ياخشي مئيوه‌سي اولان، گؤزل گؤرونوشلو ياشيل زيتون آغاجي» قويدو. ائندي آمّا بؤيوک طوفانين گورولتوسو ائله آغاجي اودلاييب، اونون بوداقلاري قيريليب.
17. سني اَکَن قوشونلار ربّی قرار ورئب کي، باشينا فلاکت گتئرسئن. چونکي ائسرايئل و يهودا نسلی پئسلئک ادئبلر و بَعَل بوتلرئنه بوخور يانديرماقلا منی قضبلَندئرئبلر."
18. او واخت رب اونلارين اتدئکلرئني منه بئلدئردي. او بونو منه آشکار اتدي، من ده خبردار اولدوم.
19. آمّا من کَسئلميه آپاريلان موطئع قوزو کئمي ائدئم؛ بئلمئردئم کي، اونلار منئم جانيم اوچون قصد حاضيرلاييب ديئرلر: "گلئن، آغاجي و مئيوه‌سئني محو اِدَک، اونو دئرئلر دئياريندان يوخ اِدَک کي، آدي بئر داها خاطيرلانماسين."
20. آنجاق، ای قوشونلار ربّي، اورَکلري و فئکئرلري ائمتاحانا چکن، عدالتلي حاکئم، منه ائمکان ور کي، اونلاردان آلاجاغين قئصاصيني گؤروم! چونکي من اؤز ائشئمي سنه تاپشيرميشام.
21. بونا گؤره ده رب سني اؤلدورمک ائسته‌ين و "ربّئن آدي ائله نبئلئک اتمه، يوخسا بئزئم اَلئمئزده اؤلرسن" دئين عَناتوت خالقي باره‌ده بله ديئر:
22. "بلی، قوشونلار ربّی ديئر: «باخ، من اونلاري عنقرئب جزالانديراجاغام! جاوانلاري قيلينجلا هلاک اولاجاقلار، اوغوللاري و قيزلاري آجليقدان اؤله‌جکلر.
23. صاغ قالان اولماياجاق، چونکي من عَناتوت خالقينين باشينا فلاکت گتئره‌جيم، بو اونلارين جزا ائلي اولاجاق.»"

Yeremya 12:1-17
1. اگر سنئنله موباحئثه اِتسَم، سن حاقلي چيخارسان، يارب. لاکئن گئنه ده عدالت باره‌ده سنئنله دانيشماق ائسته‌يئرم. نه اوچون پئس آداملار عمل‌لرئنده اوغور قازا‌‌نيرلار، بوتون خائنلر دئنج ياشاييرلار؟
2. اونلاري سن اَکئبسن، کؤک ده ساليبلار، بؤيويورلر، بار دا وردئلر. سن اونلارين دئل‌لرئنه ياخينسان، آمّا اورَکلرئندن اوزاقسان.
3. آمّا منی، يارب، سن تاني‌ييرسان، منی گؤرورسن؛ اوره‌يئمئن سنه اولان دوشونجه‌لرئني ائمتاحان ادئرسن. اونلاري قوربانليق قويون کئمي آيير، هلاک گونو اوچون حاضيرلا.
4. نه واختا قدر اؤلکه ياس توتاجاق، بوتون چؤل اوتلاري قوروياجاق؟ اورادا ياشايانلارين پئسلئيي اوزوندن حيوانلار و قوشلار محو اولوبلار. چونکي ائنسانلار ديئبلر: "تاري عاقئبتئمئزي گؤرميه‌جک."
5. "ای اِرِميا، اگر سن پئيادالارلا قاچاندا يورولدون، آتلارلا نجه قاچا بئلرسن؟ اگر اَمئن-آمانليق اولان تورپاقدا ييخيلاسان، اوردون چايينين کنارينداکي سيخ مِشه‌ده نه اده‌جکسن؟
6. حتّا اؤز قارداشلارين-آتا اِوئن ده سنه خيانت ادئبلر، اونلار دا سنئن دالينجا اوجادان باغيريبلار. سنه ياخشي سؤزلر دِسه‌لر ده، اونلارا ائنانما.
7. اِوئمي ترک اتمئشم، ائرثئمي اَلدن ورمئشم، جانيمين سِوگئلئسئني دوشمن اَلئنه تسلئم اتمئشم.
8. ائرثئم منئم اوچون مِشه‌ده‌کي آصلان کئمي اولوب. اوستومه نعره چکئب؛ بونا گؤره ده اوندان نئفرت اتمئشم.
9. ائرثئم منئم اوچون مگر آلابَزَک ييرتيجي قوش کئمي‌دئر؟ مگر هر طرفدن ييرتيجي قوشلار اونون اوستونه تؤکولورلر؟ گدئن، بوتون وحشي حيوانلاري ييغين، يِيئب-قورتارماق اوچون اونون اوستونه گتئرئن.
10. بئر چوخ چوبان اوزوم باغيمي وئران ادئب، زَمئمي تاپدالاييب اَزئبلر، سِوئملي زَمئمي بوش چؤله چِوئرئبلر.
11. اونو خارابا قويوبلار، خاراباليق ائچئنده حوضورومدا ماتم توتوب. بوتون اؤلکه وئران قاليب، لاکئن هچ کسئن وِجئنه ديئل.
12. چؤلده‌کي بوتون چيلپاق تپه‌لره محو ادنلر گلئب، چونکي اؤلکه‌نئن بئر اوجوندان او بئري اوجونا قدر ربّئن قيلينجي قيريب-تؤکور. هچ کئم اوچون اَمئن-آمانليق قالمير.
13. اونلار بوغدا اَکئبلر، لاکئن تئکان بئچئبلر. زحمت چکئبلر، آمّا خيئر گؤرمه‌يئبلر. ربّئن آلوولانان قضبئندن اؤتري، محصول‌لارينيزدان اوتانين!"
14. رب بله ديئر: "بوتون پئس قونشولاريما گلئنجه، اونلارا کي، خالقيم ائسرايئله ائرث اولاراق وردئيئم مولکه توخونورلار، من اونلاري تورپاقلاريندان چيخارديب آتاجاغام، اونلارين آراسيندان يهودا نسلئني ده چيخارديب آتاجاغام.
15. آمّا اونلاري چيخارديب آتديقدان سونرا، گئنه اونلارا رحم اده‌جيم. هر کَسي اؤز ائرثئنه، اؤز مولکونه قايتاراجاغام.
16. اگر اونلار خالقيمين يوللاريني حقئقتن اؤيرَنسه‌لر؛ خالقيما بَعَل آدي ائله آند ائچمه‌يي اؤيرَتدئکلري کئمي، «وار اولان ربّه آند اولسون» ديئب منئم آديملا آند ائچسه‌لر، او زامان خالقيمين آراسيندا برقرار اولاجاقلار.
17. آمّا اگر قولاق آسماسالار، او زامان بله بئر مئلّتي کؤکوندن بوسبوتون چيخارديب، يوخ اده‌جيم" رب بله بويورور.

Zəbur 118:10-14
10. بوتون مئلّتلر مني موحاصئره‌يه آلديلار، لاکئن ربّئن آديندا اونلاري محو اتدئم.
11. مني دؤوره‌له‌دئلر، بلي، مني دؤوره‌له‌دئلر؛ لاکئن ربّئن آديندا اونلاري محو اتدئم.
12. بال چئبئنلري کئمي مني دؤوره‌له‌دئلر؛ لاکئن تئکان آلووو کئمي سؤندولر؛ چونکي ربّئن آديندا اونلاري محو اتدئم.
13. مني شئدّتله ائتله‌دئن کي، ييخيليم، آمّا رب منه کؤمک اتدي.
14. رب منئم قووّتئم و پرستئش نغمم‌دئر، منه نئجات ورن اودور.

Süleymanın Məsəlləri 27:8-8
8. يوواسيندان آزان قوش نجه‌دئر، يرئندن آوارا اولان آدام دا اله‌دئر.

Koloslulara 4:1-18
1. اي آغالار، قوللارينيز باره​سئنده عدالت و ائنصاف گؤرسه‌دئن. بئلئن کي، سئزئن ده گؤيده بئر آغانيز وار.
2. اؤزونوزو دوعايا وقف ادئن و اوندا شوکورله اوياق اولون.
3. همن حالدا بئزئم اوچون ده دوعا ادئن کي، کلام اوچون تاري بئزه بئر قاپي آچسين و مسئحئن سئرّئني اعلان ادئم کي، اونون خاطئرئنه ده زئندانا دوشموشم.
4. اِله کي، اونو واضح بئر شکئلده نجه کي، گرکدئر، بيان ادئم.
5. خارئجده‌کئلرله حئکمتله رفتار ادئب، هر واختي قَنئمت بئلئن.
6. قويون سؤزونوز همئشه فيضلي اولسون، دوز قاتيلميش کئمي اولسون کي، هر کسه نجه گرک جاواب وره​جه‌يئنئزي بئله​سئنئز.
7. سوگئلي قارداش و امئن خئدمتکار و ربده همکاريميز اولان تئخئکوس هامي احواليمي سئزه بئلدئره​جک.
8. من اونو آنجاق بونون اوچون سئزئن يانينيزا گؤنده‌ردئم کي، سئز بئزئم احوالاتيميزدان خبردار اولاسينيز و اوره‌يئنئزه تسلّي ورسئن.
9. امئن و سوگئلي قارداش اونسئموس دا کي، سئزدندئر، اونونلادير. اونلار سئزه بورانين هامي احوالاتيني بئلدئره​جکلر.
10. منئمله بئرلئکده محبوس اولان اَرئسترخوس دا سئزه سالام گؤنده‌رئر؛ هم ده بارنابانين باجيسي اوغلو (کي، اونون باره​سئنده سئزه سئفارئش اولوب کي، اگر يانينيزا گلسه، اونو قبول ادئن.)
11. و يوستوس چاغيريلان عئسا دا؛ ختنه اهلئندن آنجاق بونلار منئمله تارينين پادشاهليغي اوچون همکارديرلار و منه تسلّي ورئبلر.
12. سئزدن اولان اِپِفراس کي، اؤزونو عئسا مسئحئن قوللوغونا وقف ادئب، سئزه سالام گؤنده‌رئر و هر زامان دوعالاريندا سئزئن اوچون جهد ادئر کي، سئز تارينين بوتون ائراده​سئنده کامئل يقئنله کامئل داياناسينيز.
13. اونون حاقّيندا شهادت ورئرم کي، سئزئن اوچون و لاودئکئيه و هئيراپولئسده اولانلار اوچون چوخ قيرتلي‌دئر.
14. سوگئلي حکئم لوقا و دئماس دا سئزه سالام گؤنده‌رئرلر.
15. لاودئکئيه​ده اولان قارداشلارا سالام گؤنده‌رئن، نئمفا و اونون اوئنده اولان کئلئسايا دا.
16. بو مکتوب سئزئن آرانيزدا اوخوندوقدان سونرا، لاودئکئيه​لئلرئن کئلئساسيندا دا اوخونسون. سئز ده لاودئکئيه​دن گلن مکتوبومو اوخويون.
17. آرخئپوسا ديئن: "ربده سنه تاپشيريلديغي خئدمته دئقّت ات کي، اونو باشا چاتديراسان."
18. من پولوس بو سالامي اؤز ​اَلئمله يازيرام. حبسده اولدوغومو يادينيزدا ساخلايين. فيض سئزئنله اولسون.