A A A A A

Bir il Bibliya


Yanvar 3


Yaradılış 5:1-32
1. آدَمئن نسئل تارئخچه‌سي بله‌دئر. تاري ائنساني ياراداندا اونو اؤزونه بنزر ياراتدي.
2. تاري اونلاري کئشي و آرواد ياراتدي، اونلارا برکت وردي و ياراتديغي گون اونلاري "ائنسان" چاغيردي.
3. آدَمئن يوز اوتوز ياشي اولاندا، اؤزونه بنزر، اؤز صورتئنده بئر اوغلو اولدو و آديني شِت قويدو.
4. شِت دوغولاندان سونرا، آدَم داها سکّئز يوز ائل ياشادي. اونون داها اوغوللار و قيزلاري اولدو.
5. آدَم دوقّوز يوز اوتوز ائل عؤمور سوروب اؤلدو.
6. شِت يوز بش ياشيندا اولاندا اوغلو اِنوش دوغولدو.
7. اِنوش دوغولاندان سونرا شِت سکّئز يوز يدّي ائل ياشادي. اونون داها اوغوللار و قيزلاري اولدو.
8. شِت دوقّوز يوز اون ائکي ائل عؤمور سوروب اؤلدو.
9. اِنوش دوخسان ياشيندا اولاندا اوغلو قِنان دوغولدو.
10. قِنان دوغولاندان سونرا، اَنوش داها سکّئز يوز اون بش ائل ياشادي. اونون داها اوغوللار و قيزلاري اولدو.
11. اِنوش دوقّوز يوز بش ائل عؤمور سوروب اؤلدو.
12. قِنان يتمئش ياشيندا اولاندا، اوغلو مَهه‌له‌لِل دوغولدو.
13. مَهه‌له‌لِل دوغولاندان سونرا قِنان سکّئز يوز قيرخ ائل ياشادي. اونون داها اوغوللار و قيزلاري اولدو.
14. قِنان دوقّوز يوز اون ائل عؤمور سوروب اؤلدو.
15. مَهه‌له‌لِل آلتميش بش ياشيندا اولاندا اوغلو يِرِد دوغولدو.
16. يِرِد دوغولاندان سونرا، مَهه‌له‌لِل داها سکّئز يوز اوتوز ائل ياشادي. اونون داها اوغوللار و قيزلاري اولدو.
17. مَهه‌له‌لِل سکّئز يوز دوخسان بش ائل عؤمور سوروب اؤلدو.
18. يِرِد يوز آلتميش ائکي ياشيندا اولاندا اوغلو خَنوخ دوغولدو.
19. خَنوخ دوغولاندان سونرا، يِرِد داها سکّئز يوز ائل ياشادي. اونون داها اوغوللار و قيزلاري اولدو.
20. يِرِد دوقّوز يوز آلتميش ائکي ائل عؤمور سوروب اؤلدو.
21. خَنوخ آلتميش بش ياشيندا اولاندا اوغلو مَتوشِلَخ دوغولدو.
22. مَتوشِلَخ دوغولاندان سونرا خَنوخ اوچ يوز ائل تاري ‌ائله ياخين ياشادي. اونون داها اوغوللار و قيزلاري اولدو.
23. خَنوخ اوچ يوز آلتميش بش ائل ياشادي.
24. او، تارييا ياخين ائدي. سونرا قِيب اولدو، چونکي تاري اونو اؤز يانينا گؤتوردو.
25. مَتوشِلَخ يوز هشتاد يدّي ياشيندا اولاندا اوغلو لَمِک دوغولدو.
26. لَمِک دوغولاندان سونرا، مَتوشِلَخ داها يدّي يوز هشتاد ائکي ائل ياشادي. اونون داها اوغوللار و قيزلاري اولدو.
27. مَتوشِلَخ دوقّوز يوز آلتميش دوقّوز ائل عؤمور سوروب اؤلدو.
28. لَمِک يوز هشتاد ائکي ياشيندا اولاندا اونا بئر اوغول دوغولدو.
29. اوغولون آديني نوح قويوب ددي: "ربّئن لعنت اتدئيي بو تورپاغي بِجَردئيئمئز واخت، بو اوغول بئزه چکدئيئمئز اذئيّتلرده و الئمئزئن زحمتئنده تسلّي وره‌جکدئر."
30. نوح دوغولاندان سونرا، لَمِک داها بش يوز دوخسان بش ائل ياشادي. اونون داها اوغوللار و قيزلاري اولدو.
31. لَمِک يدّي يوز يتمئش يدّي ائل عؤمور سوروب اؤلدو.
32. نوح بش يوز ياشيندا اولاندان سونرا سام، خام و يافَت آديندا اوغوللاري اولدو.

Yaradılış 6:1-22
1. ائنسانلار يِر اوزونده چوخالماغا باشلاديلار و اونلارا قيزلار دوغولدو.
2. ائلاهي وارليقلار گؤردولر کي، ائنسان قيزلاري چوخ گؤزلدئرلر و بَيَندئکلري هر قيزي اؤزلرئنه آرواد اتدئلر.
3. رب ددي: "منئم روحوم ائنساندا اَبده‌جک قالماياجاق، چونکي اونلار آنجاق جئسمدئرلر. اونلارين عؤمرو يوز ائيئرمي ائل اولاجاق."
4. ائلاهي وارليقلارين ائنسان قيزلاري ائله اِوله‌نئب اوشاق صاحئبي اولدوقلاري گونلرده، و داها سونرا، ير اوزونده "نِفئلئم" وار ائدي. بونلار قَدئم دؤورانين قهرمان و آدلي-سانلي آداملاري ائدئلر.
5. رب گؤردو کي، ير اوزونده ائنسانين شرارتي بؤيوکدور و هر زامان اونون اوره‌يئنده‌کي فئکئرلرئن نئيّتلري آنجاق پئسلئکدئر.
6. او، يِر اوزونده ائنساني ياراتماغينا پشمان اولدو و اوره‌يئني قم باسدي.
7. رب ددي: "ياراتديغيم ائنساني ير اوزوندن محو اده‌جيم، بونو ائنسانلارلا بئر، حيوانلارين، سوروننلرئن و گؤيده‌کي قوشلارين دا باشينا گتئره‌جيم، چونکي اونلاري ياراتماغيما پشمان اولموشام."
8. آنجاق نوح ربّئن گؤزونده لوطف تاپدي.
9. نوحون تارئخچه‌سي بله‌دئر: نوح صالح و اؤز نسلي آراسيندا قوصورسوز بئر آدام ائدي. او، تارييا ياخين ياشاييردي.
10. نوحون اوچ اوغلو وار ائدی: سام، خام و يافَت.
11. تارينين نظرئنده ير اوزو فسادا چکئلمئش و قدّارليقلا دولموشدو.
12. تاري ير اوزونده ائنسانلارين نه قدر چوخ فاسئد اولدوقلاريني گؤردو، چونکي دونيادا اولان بوتون بشر يولدان آزميشدي.
13. تاري نوحا ددي: "قاباغيمدا اولان بوتون بشرئن آخيري چاتيب، چونکي ير اوزو اونلارين سببئندن قدّارليقلا دولوب. باخ، من اونلاري ير اوزو ائله بئر محو اده‌جيم.
14. اؤزونه گوفِر آغاجيندان بئر گمي دوزلت، اونون ائچئنده اوتاقلار دوزلت، اوستونه ائچه‌رئدن و چؤلدن قَطران وور.
15. گمئني بله دوزلت: اونون اوزونلوغو اوچ يوز قول‌‌آچ، اِني اَلّئ‌قول‌آچ، بويو دا اوتوز قول‌‌آچ اولسون.
16. گمئنئن اوستوندن بئر قول‌آچ آشاغي پنجره آچارسان و قاپيني يان طرفدن قويارسان. گمئنئن اوچ مرتبه‌سي اولسون: بئري آلتدا، بئري اورتادا، بئري ده اوستده.
17. باخ، من، بلي من، ير اوزونه سلي گتئرئرم کي، گؤيون آلتيندا حيات نَفَسي اولان بوتون جانلي‌لار محو اولسونلار؛ ير اوزونده اولانلارين هاميسي آرادان گده‌جک.
18. لاکئن عهدئمي سنئنله باغلاياجاغام. سن، اوغوللارين، آروادين و گلئنلرئنله بئر گمئيه مئنه‌جکسن.
19. بوتون جانلي مخلوقلاردان بئر جوتونو، اِرکَک و دئشئسئني گمئيه گؤتورَرسن کي، سنئنله بئر دئري قالسينلار.
20. جئنسلرئنه گؤره قوشلارين، حيوانلارين و يرده سوروننلرئن هر بئرئندن بئر جوتو سنئن يانينا گله‌جک کي، دئري قالسين.
21. سن گرک يِمه‌لي اولان هر شيي ده گؤتوروب، آنبار اده‌سن؛ اونلار هم سنه هم ده اونلارا يمک اونلارلار."
22. نوح دا اله اتدی: تاري اونا نجه امر اتمئشدی، او دا هر شيي اِلَجه يرئنه يتئردی.

Zəbur 2:7-12
7. من ربّئن امرئني اعلان اده‌جيم؛ او منه ددي: "سن منئم اوغلومسان. بو گون من سنه آتا اولدوم.
8. مندن ائسته، من مئلّتلري سنه مئراث وره‌جيم، ير اوزونون دؤرد بوجاغيني سنه مولک وره‌جيم.
9. اونلاري دمئر دينکله قيراجاقسان، کوزه‌گر قابلاري کئمي اونلاري تئکه-تئکه اده‌جکسن."
10. ائندي اي پادشاهلار، عاغيلّي اولون! اي دونيانين حاکئملري، عئبرت آلين!
11. ربّه قورخو ائله قوللوق ادئن، تئتره‌يه-تئتره‌يه شادليق ادئن.
12. اوغولو اؤپون کي، قضبلنمه‌سئن، يوخسا توتدوغونوز يولدا محو اولارسينيز، چونکي آز قاليب قضبلنسئن. بختور بوتون اونا پناه آپارانلار!

Süleymanın Məsəlləri 1:10-19
10. اوغلوم، اگر گوناهکارلار سني آزديرماق ائسته‌سه‌لر، راضي اولما.
11. اگر دسه‌لر: "بئزئمله گل، قوي قان تؤکمک اوچون گئزله‌نک، ناحاق يره گوناهسيز ائنسان اوچون کمئنده گؤزله‌يک.
12. گل اونلاري اؤلولر دئياري کئمي دئري-دئري اوداق، دئبسئز قبئره دوشنلر کئمي تامامن اوداق.
13. جوربه‌جور قئيمتلي شيلر تاپاريق، قارت مالي ائله اِولرئمئزي دولدوراريق.
14. بئزئمله آياق اول، قوي کئسه‌مئز بئر اولسون."
15. اوغلوم، اونلار گدن يوللاري گتمه، آياغيني اونلارين يولوندان اوزاق ساخلا.
16. چونکي اونلارين آياقلاري پئسلئک اوچون قاچير، قان تؤکمه‌يه تله‌سئرلر.
17. دوغرودان دا، بئر قوشون گؤزو قاباغيندا تور سرمک فايداسيزدير.
18. لاکئن اونلار اؤز قانلاريني تؤکمک اوچون گئزله‌نئرلر، اؤز جانلاري اوچون کمئنده گؤزله‌يئرلر.
19. حاقسيز قازانجا طاماح ادن هر کسئن يوللاري بله‌دئر؛ طاماحي اونون جانيني آلار.

Matta 3:1-17
1. او گونلرده تعمئد ورن يحيا ظوهور اتدي و يهودئيه چؤلونده وعظ ادئب، ديئردي:
2. "تؤوبه ادئن، چونکي گؤيون پادشاهليغي ياخيندير."
3. بو، او شخص ائدي کي، اشعيا پيغمبرئن واسئطه​سئله ديئلمئشدي: "چؤلده بئرئنئن سسي نئدا ادئر: ربّئن يولونو حاضيرلايين، يوللاري اونون اوچون دوز ادئن."
4. يحيانين دَوه توکوندن پالتاري، بلئنده ده دَرئدن قاييشي وار ائدي؛ يدئيي چيئرتکه و چؤل بالي ائدي.
5. اورشلئمدن، بوتون يهودئيه​دن و اوردونون بوتون اطرافلاريندان خالق اونون يانينا گلئردي
6. و گوناهلارينا اعتئراف ادئب، اوردون چاييندا اوندان تعمئد آليردي.
7. لاکئن او زامان کي، يحيا فرئسئلر و صادوقئلردن بئر چوخلوسونو گؤردو کي، تعمئد آلماق اوچون اونون يانينا گلئرلر، اونلارا ددي: "اي افعئلر نسئلي! کئم سئزي خبردار اتدي کي، گله​جک قضبدن قاچاسينيز؟!
8. ائندي تؤوبه​يه لايئق ثمره گتئرئن.
9. و اؤزونوز-اؤزونوزده دوشونمه‌يئن کي، «آتاميز ائبراهئمدئر.» سئزه ديئرم: تاري قادئردئر کي، بو داشلاردان ائبراهئمه اؤولاد ياراتسين.
10. آرتيق بالتا آغاجلارين کؤکونه ياتير؛ بلجه ياخشي بار وِرمه‌ين هر آغاج کسئلئر و اودا آتيلير.
11. من سئزي تؤوبه اوچون سو ائله تعمئد ورئرم، آمّا مندن سونرا گلن، مندن داها قووّتلي‌دئر. من اونون آياق‌قابيسيني داشيماغا بله لايئق ديئلم. او، سئزي، موقدّس روح و اودلا تعمئد وره​جک.
12. اونون شنه​سي الئنده​دئر. خرمنئني تمئز سووروب، بوغداسيني آنبارا ييغاجاق، لاکئن ساماني سؤنمه‌ين اودلا يانديراجاقدير."
13. او زامان عئسا جلئلدن اوردونا، يحيانين يانينا گلدي کي، اوندان تعمئد آلسين.
14. لاکئن يحيا قويماييب، ددي: "من سنئن طرفئندن تعمئد آلماغا مؤحتاجام، سن منئم يانيما گلئرسن؟!"
15. عئسا اونا جاواب ورئب ددي: "ائندئلئک راضي اول، چونکي بئزه بله ياراشير کي، دوز اولان هر شيي يرئنه يتئرک." او زامان يحيا راضي اولدو.
16. عئسا تعمئد آليب درحال سودان چيخدي. او آندا گؤيلر آچيلدي و تارينين روحونو گؤردو کي، گؤيرچئن کئمي انئب اونون اوستونه قوندو.
17. و گؤيدن بئر سس ددي: "بو منئم سوگئلي اوغلومدور، اوندان چوخ راضي‌يام."