A A A A A

Bir il Bibliya


Yanvar 11


Yaradılış 21:1-34
1. رب ددئيي کئمي سارايا نظر سالدي و اونا ددئيي سؤزو يرئنه يتئردي.
2. سارا بويلو اولدو و ائبراهئمئن قوجاليق واختيندا، تارينين اونا ددئيي زامان بئر اوغول دوغدو.
3. ائبراهئم سارادان دوغولان اوغلونا ائسحاق آديني قويدو.
4. تارينين ائبراهئمه امر اتدئيي کئمي او، اوغلو ائسحاقي دوغولاندان سکّئز گون سونرا ختنه اتدي.
5. ائسحاق دوغولاندا ائبراهئمئن يوز ياشي وار ائدي.
6. سارا ددي: "تاري منئم اوزومو گولدوردو. بونو اشئدن هر کس منئمله بئرلئکده گوله‌جک."
7. او گئنه ددي: "کئم ائبراهئمه دئيَردي کي، سارا اوشاق اَمئزدئره‌جک؟ آمّا قوجاليق واختيندا من اونا بئر اوغول دوغموشام."
8. اوشاق بؤيويوب سوددن کسئلدي. ائسحاقين سوددن کسئلدئيي گون، ائبراهئم بؤيوک بئر ضئيافت وردی.
9. سارا گؤردو کي، مئصئرلي هاجرئن ائبراهئمه دوغدوغو اوغلو اونا گولور.
10. سارا ائبراهئمه ددي: "بو کنئزي و اونون اوغلونو قوو. بو کنئزئن اوغلو منئم اوغلوم ائسحاقلا بئرلئکده وارئث اولماياجاق."
11. ائبراهئم بو اوغلوندان اؤتري چوخ ناراحات اولدو.
12. تاري ائبراهئمه ددي: "اوشاقدان و کنئزدن اؤتري ناراحات اولما. سارانين سنه ددئيي بوتون سؤزلره قولاق آس، چونکي سنئن نسلئنئن وارئثي ائسحاق اولاجاق.
13. آمّا کنئزئن اوغلوندان دا بئر مئلّت تؤره‌ده‌جيم، چونکي او دا سنئن نسلئندندئر."
14. ائبراهئم سحر تزدن قالخدي، چؤرک و بئر تولوق سو گؤتوروب هاجرئن چئينئنه قويدو. اوشاغي دا اونا ورئب، اونو يولا سالدي. هاجر گدئب «بئر شئبا» چؤلونده آوارا گزئردي.
15. تولوقدا سو قورتارديقدا، هاجر، اوغلونو بئر بوتانين آلتينا قويدو.
16. سونرا اورادان بئر اوخ مسافتي قدر آرالانيب، اونون قاباغيندا اوتوردو. "اوغلومون اؤلومونو گؤرمه‌يئم" ددي و اوشاغين قاباغيندا اوتوروب، هؤنکور-هؤنکور آغلادي.
17. تاري اوغلانين سسئني اشئتدي. تارينين مله‌يي گؤيدن هاجري چاغيريب ددي: "سنه نه اولوب، هاجر؟ قورخما، چونکي اوغلانين اوتوردوغو يردن تاري اونون سسئني اشئدئب.
18. قالخ، اوشاغي قالدير، اونون الئندن توت. من اوندان بؤيوک بئر مئلّت تؤره‌ده‌جيم."
19. تاري هاجرئن گؤزلرئني آچدي و او، بئر سو قويوسو گؤردو. گتدي و تولوغو سو ائله دولدوروب، اوشاغا ائچتئردي.
20. تاري بو اوغلانلا ائدي. او بؤيويوب، چؤلده‌ ياشاماغا باشلادي و اوخ آتان اولدو.
21. او، پاران چؤلونده ساکئن اولدو. آناسي اونا مئصئردن بئر آرواد آلدي.
22. او زامان اَبئمِلِک و اونون قوشون باشچيسي فئکول ائبراهئمه ددئلر: "سن نه اده‌سن، تاري سنئنله‌دئر.
23. ائندي بورادا تارينين حاقّينا منه آند ائچ کي، نه منه، نه اوغلوما، نه ده نوه‌مه خيانت اده‌جکسن: من سنه محبّت اتدئيئم کئمي، سن ده منه و ساکئن اولدوغون تورپاغا محبّت ات."
24. ائبراهئم ددي: "من آند ائچئرم."
25. آمّا ائبراهئم اَبئمِلِکه، اونون نؤکرلرئنئن قَصب اتدئيي سو قويوسوندان اؤتري شئکايت اتدي.
26. اَبئمِلِک ددي: "بئلمئرم، بو ائشي کئم ادئب. اونو نه سن منه بئلدئر‌دئن، نه ده بو واختا کئمي اوندا خبرئم وار."
27. ائبراهئم سورو و مال-حيوان آليب ابئمِلِکه وردی. بلجه ائکئسي بئر عهد باغلاديلار.
28. ائبراهئم سوروسوندن يدّي دئشي قوزونو آييردي.
29. اَبئمِلِک ائبراهئمه ددي: "آييرديغيم بو يدّي دئشي قوزو نه اوچوندور؟"
30. ائبراهئم ددي: "بو يدّي دئشي قوزونو منئم اَلئمدن آلمالي‌سان کي، بو قويونو قازديغيما شهادت اولسون."
31. بونا گؤره ده او بوراني «بئر شئبا» چاغيردي، چونکي اونلارين ائکئسي ده اورادا آند ائچدئلر.
32. بلجه بئر‌شئبادا عهد باغلاديلار. سونرا اَبئمِلِک و اونون قوشون باشچيسي فئکول قالخيب، فئلئسطلی‌لرئن اؤلکه‌سئنه قاييتديلار.
33. ائبراهئم بئر‌شئبادا بئر گَز آغاجي اَکدي و اورادا ربّئن آديني، ابدی اولان تارينين آديني چاغيردي.
34. ائبراهئم فئلئسطلی‌لرئن اؤلکه‌سئنده اوزون مودّت قالدي.

Yaradılış 22:1-24
1. بو شيلردن سونرا تاري ائبراهئمي ائمتاحانا چکئب اونا ددي: "اي ائبراهئم!" ائبراهئم ددي: "بورادايام!"
2. تاري ددي: "سودئيئن يگانه اوغلون ائسحاقي گؤتور و مورئيا اؤلکه‌سئنه گت. اورادا سنه گؤرسده‌جَيئم بئر داغدا اوغلونو يانديرما قورباني تقدئم ات."
3. ائبراهئم سحر تزدن قالخدي و اِششه‌يئني پالانلادي. اؤزو ائله ائکي نؤکرئني و اوغلو ائسحاقي گؤتوردو. او، يانديرما قورباني اوچون اودون ياردي و قالخيب تارينين ددئيي يِره يولا دوشدو.
4. ائبراهئم اوچونجو گون باشيني قالديريب اوزاقدان او يِري گؤردو.
5. او، نؤکرلرئنه ددي: "سئز اِششَکله بئرلئکده بورادا قالين، من اوغوللا اورايا گده‌جيم. پرستئش ادئب، يانينيزا قاييداريق."
6. ائبراهئم يانديرما قورباني اوچون اودون گؤتوروب اوغلو ائسحاقين کوره‌يئنه قويدو، لاکئن اودو و بيچاغي اؤزو گؤتوردو. اونلار بئرلئکده گتدئلر.
7. ائسحاق آتاسي ائبراهئمه ددي: "آي آتا!" ائبراهئم جاواب وردی: "بورادايام، اوغلوم". ائسحاق ددي: "باخ، اود و اودون وار، بس يانديرما قورباني اوچون قوزو هارادادير؟"
8. ائبراهئم ددي: "اوغلوم، يانديرما قورباني اوچون قوزونو تاري اؤزو حاضيرلاياجاق." اونلار بئرلئکده گتدئلر.
9. سونرا تارينين ائبراهئمه ددئيي يِره گلدئلر. ائبراهئم اورادا بئر قوربانگاه دوزَلدئب اودونلاري دوزدو و اوغلو ائسحاقين اَل-قولونو باغلاييب قوربانگاها، اودونلارين اوستونه قويدو.
10. ائبراهئم اَلئني اوزاديب اوغلونون باشيني کَسمک اوچون بيچاغي گؤتوردو.
11. آمّا ربّئن مله‌يي گؤيدن اونو چاغيردي: "ائبراهئم، ائبراهئم!" او ددي: "بورادايام!"
12. مَلَک ددي: "اوشاغا اَل اوزاتما و اونا بئر شي اتمه. ائندي بئلدئم کي، سن تاريدان قورخورسان؛ اؤز يگانه اوغلونو مندن قييمادين."
13. ائبراهئم باشيني قالديريب باخدي و آرخاسيندا بئر قوچ گؤردو کی، بوينوزلاري کوللوغا ائلئشمئشدی. ائبراهئم گدئب قوچو گؤتوردو و اوغلونون عوضئنه يانديرما قورباني تقدئم اتدي.
14. ائبراهئم او يِري «يَهوِه يئرِه» چاغيردي؛ بونا گؤره ده ائندئيه قدر بله ديئلئر: "ربّئن داغيندا حاضيرلاناجاق."
15. ربّئن مله‌يي گئنه گؤيدن ائبراهئمي چاغيريب ددي:
16. "رب ديئر: اؤز وارليغيما آند ائچمئشم کي، سن بو ائشي اتدئيئنه و يگانه اوغلونو قييماديغينا گؤره
17. سنه بؤيوک بئر برکت وره‌جيم، نسلئني گؤيده‌کي اولدوزلار و دهنز ساحئلئنده‌کي قوم قدر آرتيريب چوخالداجاغام. سنئن نسلئن اؤز دوشمنلرئنئن شهرلرئنه صاحئب اولاجاق.
18. دونيانين بوتون مئلّتلري سنئن نسلئنئن واسئطه‌سئله برکت آلاجاق، چونکي سن منئم سؤزومه قولاق آسدين."
19. سونرا ائبراهئم اؤز نؤکرلرئنئن يانينا قاييتدي و اونلار قالخيب، «بئر شئبايا» گتدئلر. ائبراهئم «بئر شئبادا» ساکئن اولدو.
20. بئر مودّت سونرا ائبراهئمه خبر ورئب ددئلر: "باخ، مئلکا قارداشين ناخورا اوشاقلار دوغدو:
21. ائلک اوغلو اوس، اونون قارداشي بوز، اَرامين آتاسي اولان قِموعِل،
22. کِسِد، خَزو، پئلداش، يئدلاف و بِتوعِل."
23. بِتوعِلدن رئبقا اولدو. بو سکّئز اؤولادي مئلکا، ائبراهئمئن قارداشي ناخورا دوغدو.
24. اونون رِعوما آدي اولان جارئيه‌سي ده تِبَخي، قَخَمي، تَخَشي و مَعَکاني دوغدو.

Zəbur 6:6-10
6. ناله‌مدن جانا گلمئشم؛ بوتون گجه آغلاماقدان ياتاغيم ياشدير، گؤز ياشلاريملا دؤشه‌يئمي ائسلاديرام،
7. قم اوزوندن گؤزومون ائشيغي سؤنور، بوتون دوشمنلرئم اوزوندن آرادان گدئر.
8. مندن اوزاق اولون، سئز يامانليق ادنلر، چونکي رب آغلاماغيمين سسئني اشئدئب.
9. رب منئم يالواريشيمي اشئدئب؛ رب منئم دوعامي قبول ادئر.
10. هامي دوشمنلرئم اوتاناجاق، پرئشان اولاجاق؛ دؤنوب قفئلدن خجالت ائچئنده اوتاناجاقلار.

Süleymanın Məsəlləri 3:5-6
5. بوتون اوره‌يئنله ربّه توکّول ات و اؤز آنلاغينا دايانما.
6. بوتون يوللاريندا اونو تاني؛ او، سنئن يوللاريني دوز ادر.

Matta 8:18-34
18. عئسا اطرافيندا بؤيوک بئر جاماعاتي گؤرن واخت، بويوردو کي، گؤلون او تايينا کچسئنلر.
19. بو زامان بئر دئن عالئمي گلئب، اونا ددي: "اوستاد! هارايا گده​سن، سنئن دالينجا گله​جه‌يم."
20. عئسا اونا ددي: "تولکولرئن يوواسي وار، گؤي قوشلارينين دا يوواسي؛ لاکئن ائنسان اوغلونون باشيني داياماغا بئر يري يوخدور."
21. آيري بئر شاگئرد عئسايا ددي: "يارب، منه ائجازه ور، اوّلجه گدئم آتامي باسديريم."
22. لاکئن عئسا اونا ددي: "سن منئم داليمجا گل. قوي اؤلولر، اؤلولرئني باسديرسينلار."
23. عئسا قاييغا مئندئيي زامان، شاگئردلري ده اونون دالينجا گتدئلر.
24. بئردن​بئره گؤلده بؤيوک بئر کولک باشلادي، اله کي، قاييق شپه​لر​له اؤرتولدو. لاکئن عئسا ياتميشدي.
25. شاگئردلر ياخينلاشديلار و عئساني اوياديب ددئلر: "بئزي خئلاص ات يارب، هلاک اولوروق."
26. عئسا اونلارا ددي: "اي آز ائمانلي‌لار! نه اوچون قورخورسونوز؟» سونرا دوروب، کوله‌يه و گؤله آجيقلاندي و بؤيوک بئر آرامليق دوشدو.
27. آداملار مات قاليب ديئردئلر: "بو، کئمدئر کي، هم کولک، هم ده گؤل اوندان ائطاعت ادئر؟"
28. عئسا، گؤلون او تاييندا اولان "جَدَرئلَرئن" دئيارينا گلدئيي زامان، ائکي نفره راست گلدي کي، قبئرلئک ماغارالاردان چيخيرديلار. ائبلئس الئنده اسئر ائدئلر. اونلار چوخ دلي ائدئلر و هچ کئم او يولدان کچه بئلمزدي.
29. بئردن باغيريب ددئلر: "اي تارينين اوغلو، بئزدن نه ائسته‌يئرسن؟ مگر گلئبسن کي، واختيندان قاباق بئزه عذاب وره​سن؟"
30. اونلاردان اوزاقدا بؤيوک بئر دونگوز سوروسو اوتلاييردي.
31. ائبلئسلر عئسايا يالوارديلار: "اگر بئزي قوواجاقسان، ائجازه ور کي، بو دونگوز سوروسونه گئرک."
32. عئسا اونلارا ددي: "گئرئن." اونلار دا چيخيب، دونگوز سوروسونه گئردئلر. او آندا سورونون هاميسي اوچورومدان گؤله آتيليب، سودا بوغولدولار.
33. اونلاري اوتارانلار قاچديلار و شهره گئرن واخت، بونلارين هاميسيني و ائبلئس الئنه توتولموشلارين باشينا گلن احوالاتي خبر وردئلر.
34. بونا گؤره، شهرئن بوتون خالقي عئسانين پئشوازينا چيخديلار و اونو گؤرن زامان يالوارديلار کي، اونلارين دئياريندان گتسئن.