A A A A A
Bible in one year
July 7

2 Crónicas 9:1-30
1. Sabá marcanquir reinasti yatïnwa Salomonan jach'a cancañapata, ucatsti jupajj Jerusalén marcaruw saräna wali ch'ama jisct'anacampi yant'añataqui. Jupasti purïnwa wali jach'a cancañampi, caballonacapanjja perfumenaca qhumt'ata, uqhamarac walja korinaca, muncañ kalanacasa qhumt'ataraqui. Cunapachatï Salomonan nayrakataparu purïna ucqhajja, take cuntï amtatäcäna ucanac jisct'äna.
2. Salomonasti take jupan jisct'anacaparuwa arusjjatäna. Janiwa mä jisct'asa jupataquejj ch'amäcänti arusjjatañataquejja.
3. Sabá marcanquir reinajj muspharänwa Salomonan yatiñ cancañapat ist'asinjja, uqhamarac palacio luraycäna ucatsa,
4. mesapan mank'añapatsa, uqhamarac jilïri jakenacapan lurañanacapatsa, uywatanacapana apnakapjjatapatsa, isinacapatsa, coperonacapatsa, uqhamarac isinacapatsa, cunjämsa templor maqhatapcäna ucatsa walipuniw muspharäna.
5. Ucatsti jupajj reyirojj sänwa: “Cuntï marcajjana ist'ta juman luratanacamata, uqhamarac yatiñ cancañamatsa ucanacajja chekawa;
6. ucampis nayajj janiw iyawscäyätti jupanacan arunacaparojja, nayajj jutasina, uqhamarac nayrajjampi uñjasinwa amuyta. Chekpachansa janiw jupanacajj juman yatiñ cancañamatjja ni chicatarus yatiyapquitütuti, ucampis jumajj jilanctawa nayajj ist'cäyäta ucat sipana.
7. ¡Warminacamajj wali cusisitäpjjpachawa, uqhamarac sirvirinacamasa jumamp chicäsinjja yatiñan arunacamsa isch'uquipjjaracpacha!
8. ¡Tatit Diosamasti bendicitäpan, jumarusti suma chuymampiwa uñjtam, uqhamarac tronoparus ucharactam reyipäñamataqui! ¡Juman Diosamajj Israelaru munatap laycu, uqhamarac wiñayataqui apnakañamaquiraquiw jumarojja reyit utt'aytam jupanacaru cheka cancañampi, cheka lurañampi apnakañamataqui!” sasa.
9. Ucatsti jupajj Salomón reyirojj churänwa quimsa waranka llätunca pataca sojjta tunca kilo korinaca, uqhamarac walja k'apquir perfumenaca, muncañ kalanaca churaraquïna. Israel marcarojj janipuniw ucqhama k'apquir perfumenacajj purirïcänti, Sabá marcanquir reinajj Salomón reyiru churcäna uqhamjja.
10. Ucjjarusti Hiram chachana, uqhamarac Salomonan sirvir jakenacapajj Ofir chekata kori apanipcäna ucanacajja, apanipjjaraquïnwa sándalo sat madera, uqhamarac muncañ kalanaca.
11. Sándalo sat maderampisti reyejj lurayänwa gradanaca templotaqui, uqhamarac reyin palaciopataquisa, arpanaca, salterionaca, musiconacataqui. Uqham quipcasti janipuniw cunapachasa Judá orakenjja uñjañäcänti.
12. Salomón reyisti chuymatjama churänwa Sabá marcanquir reinarojja take cuntï jupajj maycäna ucanaca, reinajj churcäna ucatsa juc'ampwa churäna. Ucatjja reinajj orakeparojj cutt'jjänwa jupan sirvirinaca jakenacapamp chict'ata.
13. Salomonajj sapa mara take korinaca catokcäna ucanacasti pä tunca payan waranka kilonacänwa,
14. janiw jaqhutäcänti alaquipirinacana, yakha marcar saririnacana impuestonaca pagapcäna ucanacajja. Ucjjarusti arabianquiri take reyinacasa, uqhamarac marca pachpanquiri jilïri apnakerinacasa Salomonataquejj apanipjjänwa kori, kollke.
15. Salomón reyisti pä pataca escudonacwa lurayäna koritcamaqui, sapa maya escudonacarojja sojjta kilo koriwa mantäna.
16. Uqhamaraquiw lurayaraquïna quimsa pataca jisc'a escudonaca, sapa escudonacarojja quimsa kilo jila koriw mantäna, ucatsti palacioruw uchayäna, “Bosque del Líbano” sat chekaru.
17. Ucjjarusti lurayaraquïnwa mä jach'a trono marfilata, ucatsti korimpiw lip'iquipayäna.
18. Tronosti sojjta gradanïnwa, uqhamarac cayu tact'asiñapasa koritänwa tronompi mayachataqui, kont'asiñana sapa thiyapanjja ampar ayjjatasiñanacapaw utjäna, ucamp chict'atasti pä sayt'ata leonanacaw utjäna.
19. Uqhamaraquiw tunca payan sayt'ata leonanacajj utjaraquïna, sapa thiyana sapa maya gradanacana. ¡Uqhamsti janipuniw cawqha reinonsa lurascänti!
20. Uqhamaraquiwa reyin take copanacapasa korit luratcamäquïnwa, uqhamaraquiwa “Bosque del Líbano” sat uca palacionquiri copanacapasa koritcamaraquïna. Janiw cunas kollketa luratajj utjcänti, Salomonan urunacapanjja kollkejj jan ancha yäkatätap laycu.
21. Reyin barconacapasti Tarsis marcaruw sarirïna Hiram chachan sirviri jakenacapampi, jupanacasti sapa quimsa marata may cutiwa purinipjjerïna kori, kollke, marfil, mononaca, pavo realanac apt'ata.
22. Salomón reyisti aca orakenquir take reyinacarojja atipänwa kamir cancañana, uqhamarac yatiñ cancañansa.
23. Ucatsti aca orakenquir take reyinacawa jupar uñjaña munapjjäna, uqhamarac Diosajj churcäna uca yatiñapat ist'añsa.
24. Ucatsti takeniwa mä wajjt'äwi apapjjerïna sapa mara: korit kollketa lurat yänaca, capanaca, armanaca, k'apquiri kollanaca, caballonaca, uqhamarac mulanacsa.
25. Salomonanjja pusi waranka caballo uñjirinacapaw utjäna uqhamarac carronacapataqui, tunca payan waranka caballjjat jalir jakenaca, jupanacarusti qhitänwa nuwasiñ carronacan cuartelanacaru, uqhamarac Jerusalenanquir reyin guardiaparusa.
26. Ucatsti Salomonajj wali munañani reyïnwa, take reyinacat sipana, Eufrates jawirata kalltasina, filisteonacana orakepcama, uqhamarac Egipto korpacamaraqui.
27. Reyisti Jerusalenanjja utjayänwa walja kollkenaca kalanacar uñtata; uqhamarac utjayaraquïna walja cedronaca, pampa higo alinacar uñtata.
28. Caballonacasti apayanitänwa Muzri sat chekata, uqhamarac yakha marcanacataraqui.
29. Salomonan ucat ucjjar sarnakäwipajj kalltat tucuycamajja Natán profetan crónicas sat libropan kellkatawa, ucatsti Silo chekanquir Ahías profecía arunacapancaraquiwa, uqhamarac Iddo sat profetan jutir urunacat parlatap arunacanraqui, ucanacasti parlatänwa Nabat chachan Jeroboam yokapata.
30. Salomonasti Jerusalenanwa apnakäna take Israel orakpacharu pusi tunca maranaca.

2 Crónicas 10:1-19
1. Roboamasti Siquem chekaruw saräna, ucawjarusti take Israel jakenacawa sarapjjäna juparu reyita utt'ayañataqui.
2. Ucsti Nabatan Jeroboam yokapajj yatïnwa, jupasti Egiptoncascänwa cawqharutejj jaltjjäna, Salomón reyita ucatsti Egiptotjja cutt'anjjänwa.
3. Cunapachatï jupar jawsayanipjjäna ucqhajja, Jeroboam chachampi uqhamarac take Israel jakenacampiwa parlir sarapjjäna Roboam chachampi, aqham sasa:
4. —Awquimajj nanacataquejj wali khorünwa; jichhasti jumajj cuntejj awquimajj jaytawayapquitu uca wali ch'ama tucuñampi sirviñäqui ucjja mä juc'a apakt'apjjitaya, ucatsti nanacajj jumarojj servisipcämawa —sasa.
5. Roboamajj jupanacarojj sänwa: —Acat quimsa ururuw nayan ucar cutt'anipjjäta —sasa. Jakenacasti sarjjapjjänwa,
6. Roboam reyisti jisct'asïnwa, Salomón awquipana jacañapan sirvipcäna uca jilïri jakenacaru. Jupasti jisct'änwa, aqham sasa: —¿Cuns jumanacajj nayar amuyt'ayapjjetasma aca jakenacar sañajjataquejja? —sasa.
7. Jupanacasti sapjjänwa: —Jumatejj aca jakenacaru sumampi uñjäta, mayipctam ucanacsa churañ munaraquïta, uqhamarac suma arunacampiraqui arusjjataraquïta ucajja, jupanacajj wiñayataquiw sirvipjjätam —sasa.
8. Ucampis Roboamajj janiw jilïri jakenacan amuyt'a arunacaparojj ist'cänti, ucatsti jisct'asiraquïnwa jupamp chica jilasipcäna, uqhamarac jupar sirvipcäna uca waynanacaru,
9. aqham sasa: —¿Cuns jumanacajj nayar amuyt'ayapjjetasma awquejjajj uchawaycäna ucata aca jakenacajj ch'ama tucuñampi sirviñata mä juc'a apakt'añajja mayipjjataparojja? —sasa.
10. Uca waynanacajj jupamp chica jilapcäna ucanacajja sapjjänwa: —Uca jakenacajj mayipctam awquimajj uchawaycäna uca ch'ama tucuñampi sirviñata mä juc'a apakt'añamataqui ucanacarojja, aqham sañamawa: ‘Awquejjatejj khorüchïna ucajja, nayajj juc'amp khorüyäwa;
11. jupatejj churapjjchïyätam ch'ama tucuñampi sirviña ucajja, nayajj juc'amp ch'ama tucuñampi sirviñwa churapjjäma; jupatejj lazompi jawk'apjjchïyätam ucajja, nayasti hierro puntan chicotempiw jawk'apjjäma’ —sasa.
12. Quimsa uru pasatatsti Jeroboam chachajj take marcpacha jakempiwa Roboam reyin nayrakataparu uñstapjjäna, cunjämtï jupajj siscäna uqhamaru.
13. Ucampis Roboam reyejj jupanacarojj wali khoru arunacampiwa saraquïna jilïri jakenacan amuyt'a arunacapar jan ist'asina,
14. ucatsti cunjämtï waynanacajj amuyt'a arunaca churapcäna uca pachpwa arsuraquïna: —Awquejjatejj khorüchïna ucajja, nayajj juc'amp khorüyäwa; jupatejj churapjjchïyätam ch'ama tucuñampi sirviña ucajja, nayasti juc'amp ch'ama tucuñampi sirviñwa churapjjäma; jupatejj lazompi jawk'apjjchïyätam ucajja, nayasti hierro puntan chicotempiw jawk'apjjäma —sasa.
15. Reyisti janiw marcarojj ist'añ muncänti, Tatituw uqham pasañapataqui wact'ayatayna uca laycu, uqhamarac lurascäna ucajj phokhasiñapataqui cuntï Nabat chachan Jeroboam yokapar arscäna uca, Silo chekanquiri Ahías chacha toke.
16. Ucatsti take Israel marcpacha reyin jan jupanacar ist'añ munatapa uñjasinjja, aqham sasaw jupanacajj arsupjjaraquïna: “¡Janiw cuna lurañanacajjas Davidampi utjapquituti! ¡Isaí chachan yokapampejj janiw cuna herencia jaljasiñas utjapquituti! ¡Israelitanaca, sapa maynisa utanacasarcama sarjjapjjañäni! ¡Davidasti familiaparuqui uñjasiscpan! ” sasa. Ucspachawa take israelita jakenacajj utanacaparcama sarjjapjjäna.
17. Ucampis cawquïr israelitanacatejj Judá marcanacana jacapcäna ucanacarusti Roboam reyejj jupanacarojj apnakascaquïnwa.
18. Cunapachatï Roboamajj qhitäna Adoram chacharu, qhititï ch'ama lurañanacana phokhayiricäna ucaru ucqhajja, israelita jakenacajja juparojj kalamp c'upjascamaw jiwayapjjäna. Ucatsti Roboam reyejj mäqui carroparu maqhatasinjja, Jerusalén marcaruw jaltjjäna.
19. Uqhamatwa Israel marcajj David casta reyinac contra tucüna, jichhürunaccama.

Salmos 80:7-13
7. Take atipir Diosay, cunjämäpcäyättejj uqhamaruy cutjtayjjapjjeta, ¡qhuyapayasiñampiy uñtanipjjeta, nanacasti khespiyataw uñjasipjjä!
8. Jumaw Egiptot uva alir apsuntajja, Diosar jan uñt'ir jakenac jakonucusin ayrunttajja;
9. jumaw orak korsusajj k'omachtajja, uva alisti, saphintänwa, orakpacharuw phokhantaraquïna;
10. ch'iwipajj kollunac imt'äna, layminacapasti jach'a kokanacaruw imt'araquïna;
11. layminacapajj lamar kotcamaw purïna, ch'ichtir alinacas Eufrates jawircamaw puriraquïna.
12. ¿Cunatarac muyuntat perkanacap tincunucuytasti? ¿Cunatarac thac saririnacamp uva alinac jiq'iraytasti?
13. Ch'uminquir qhuchejj yap k'alpun tucji, ch'umi mankhanquir animalanacasti mank'supjjaraquiwa.

Proverbios 20:16-18
16. Qhititejj jan uñt'at jaket garantiata sayt'qui ucajja isipas apakatäniwa; ucatsti isipajj prendata jaytatäniwa.
17. Jaketaquisti sumawa c'ari arunaca mank'añajja, ucampis uca khepatjja lak'sa mank'caspa uqhamaw tucjje.
18. Suma amtäwinacajja suma ewjja arunacampiwa wact'ayasi; uqhamarac guerran nuwasiñataquisa wali yatiñampi sarañawa.

Hechos 14:1-28
1. Iconio marcanjja, Pablompi Bernabeampejj judionacan sinagogaparuw parlir mantapjjäna. Jupanacan parlatapatsti waljaniw iyawsapjjäna, judionacatsa jan judionacatsa.
2. Ucampis jan iyawsir judionacajja, jan judiöpquis ucanacaruw amtayapjje jilatanac toke jan walinac amtapjjañapataqui.
3. Ucatwa Pablompi Bernabeampejj uca marcanjja jaypach urunac kamarapjjäna. Jan ajjsarasaraquiw parlapjjäna Tatitur catuyasisina, Tatituw jupanacarojj ch'am churaraquïna uñacht'äwinacampi milagronacampi lurapjjañapataqui. Uqhamatwa Tatitojj cuntejj jupanacajj Diosan munasiñapat parlapcäna uca arunacan chekätapjja khansuyi.
4. Ucampis uca marcanquir jakenacajj payaruw t'akjtäna, chicatajj judionacar jakcattasa, chicatasti apostolonacar jakcattasaraqui.
5. Ucatsti judionacampi jan judiöpquis ucanacampejj uqhamarac autoridadanacampisa, arust'apjjänwa apostolonacar tokjjañataqui, uqhamarac kalamp c'upjañataqui.
6. Pablompi Bernabeampejj uc yatisinjja, Listra uqhamaraqui Derbe uca marcanacaruw jaltjjapjjäna. Uca marcanacajj Licaonianquiwa. Uqhamaraquiw uca thiya marcanacar sarapjjäna.
7. Ucawjanacansti Tatit toke khespiyasïwi utjatapwa parlapjjaraquïna.
8. Listranjja mä chachaw utjäna, jan sartiri. Jupasti ucan kont'atäscänwa, nacïwitpach cojötap laycu. Uca chachajj janipuniw sarnakerïcänti.
9. Uca jakesti Pablon parlataparuw isch'uquiscäna. Pablosti jupar uñcatasinjja, amuyänwa c'umaraptañatac iyawsañanïtapjja.
10. Ucatwa jach'at juparojj saraqui: —Chek sayt'am —sasa. Ucat uca jakejj may thoktasin sayt'asi. Ucatsti sarnakaraquiwa.
11. Pablor uqham lurir uñjasinjja, jakenacajj Licaonia aruta jach'at arsupjjäna: “¡Diosanacaw jaker uñtat jiwasanac taypir sarakanitayna!” sasa.
12. Bernabearojj: “Júpiter diosaw” sasaw sapjjäna. Pablorusti: “Mercurio diosaw” sapjjaraquïnwa, jupan wali parlirïtap laycu.
13. Júpiter diosan templopasti marcar mantañancänwa. Uca diosan sacerdotepasti orko vacanacampi pankaranacampi cunwa apanïna. Jupampi jakenacampisti apostolonacarojj take ucanac sacrificiot loktasaw yupaychañ munapjjäna.
14. Bernabeampi Pablompisti, jakenacan uqham lurañ amtatap amuyasinjja, isinacap ch'iyanokasiñ kalltapjjäna. Jupanac taypir jalantasinsti jach'at arsusinwa sapjjaraquïna:
15. —¡Tatanaca! ¿Cunats ucanac lurapjjta? Nanacajj jumanacjam jakequïpjjaractwa. Nanacajj uca inamay lurañanac apanucupjjañamataquiw jumanacar parlir jutapjjta ucanac apanucusina, jacquir Diosar arcapjjañamataqui. Jupaw alajjpacha, acapacha, jach'a kotsa lurir Diosajja, uqhamarac take ucanacan utjirinacsa.
16. Nayra urunacanjja Diosajj take jakenacarojj munañanacaparjamaquiw sarnakayäna.
17. Ucampis Diosajj jupanacarojj yatiyänwa jupan jacatapa, jakenacar asqui luratap toke. Jupajjay jallsa, suma cosechanacsa churchistojja, uqhamarac walja mank'añanacsa jiwasanacan cusisiñasataqui —sasa.
18. Jupanacan uqham parlquipansa, jakenacajj sacrificionac loktañjj munasipcaquïnwa. Apostolonacasti wali ch'am tucusaw uca lurañanac jupanacarojj apanucuyapjjäna.
19. Ucapachasti mä kawkha judionacaw purinipjjäna, Antioquiampita Iconiompita. Jakenacar amtayasinsti Pablorojj kalampiw c'upjayapjjäna, ucatsti: “Jiwatäjjew” sasaw marca ankäjjarojj katatnucunipjjäna.
20. Cunapachatejj Tatitur arquirinacajj Pablo nayrakatar sarthapipjjäna ucapachajja, jupajj sayt'asisinwa wasitat marcar mantjjäna. Khepürusti Bernabeampejj Derbe marcaruw sarjjapjjäna.
21. Uca Derbe marcansti Tatit toke khespiyasïwi utjatapwa parlapjjaraquïna. Uqham parlapjjatapatsti waljaniw Tatiturojj iyawsapjjäna. Ucatsti Pablompi Bernabeampejj Listraru, Iconioru, Antioquiampiruw cutt'jjapjjäna.
22. Uca marcanacansti Tatitur iyawsirinacarojj ch'amañcht'apjjänwa. Sapjjaraquïnwa: “Tatitur iyawsañanacamanjja ch'aman sayt'apjjam. Diosan marcapar mantañataquejja, t'akhesiñajj waquisipuniwa” sasa.
23. Sapa iglesianracwa jilïri jakenac utt'ayawayapjjäna. Ucatsti oracionampi ayunompi lurasinjja, cawquïr Tatiturutï iyawsapcäna ucaruw catuyawayapjjaraquïna.
24. Uca khepatsti Pisidia tokenaca pasasinjja, Panfilia chekanacaruw puripjji.
25. Perge marcana Diosan arunacap parlawayasinjja, Ataliaruw sarjjapjje.
26. Ucatsti Antioquiaruw barcot sarjjapjjaraqui, cawquïr marcantejj jilatanacajj Diosan munasiñapar catuyasin, jupanacar Tatitutac irnaker qhitapcäna ucaru. Uca lurañanacjja jupanacajj phokhanjjapjjänwa.
27. Antioquiar purisinsti, iglesia jilatanacaruw jawsthapipjjäna. Ucat jupanacarojj take cunanactejj Diosajj jupanac toke lurcatayna ucanacwa yatiyapjje. Uqhamaraquiw yatiyapjjäna cunjämtejj Tatitojj jan judionacäpquis ucanacan iyawsapjjañapataqui punc jist'arcän ucsa.
28. Pablompi Bernabeampisti uca marcanjja, walja urunacaw Tatitur iyawsirinacampejja kamaräna.