A A A A A
Bible in one year
July 6

2 Crónicas 7:1-22
1. Cunapachatï Salomonajj aca oración luraña tucuyäna ucqhajja, alajjpachatwa mä ninajj sarakanisina naqhantäna cuna loktäwitejj naqhantayañataqui waquichatäcäna ucaru, uqhamarac sacrificionaca loktäwinacarusa, ucatsti Tatitun jach'a cancañapasti templonjja phokhantänwa,
2. sacerdotenacajj janiw templor mantañ muncjjapjjänti.
3. Israelit jakenacasti ninampi, Tatitun jach'a cancañapampi templor sarakaniri uñjapjjatap laycujja, jupanacajj quillt'asisinjja orakcamawa alt'asipjjäna p'eke parapampi orakeru puriyañcama, ucatsti jupanacajj Tatiturojj yupaychapjjänwa, uqhamarac yuspagarapjjaraquïnwa, aqham sasa: “Jupasti suma Diosawa, munasiñapasa wiñayataquiraquiwa” sasa.
4. Ucjjarusti reyimpi, uqhamarac take marcpachampejja Tatituruwa sacrificionaca loktapjjäna.
5. Salomón reyisti sacrificionjja loktänwa pä tunca payan waranka orko vacanaca, uqhamarac pataca pä tuncani waranka ovejanacaraqui. Uqhamawa reyisa, take Israel marcasa Diosan templopa loktapjjäna.
6. Sacerdotenacasa, levitanacas pachpancasipcaquïnwa kollana musicanaca tocañ instrumentonacampi, ucanacsti reyiw lurayäna k'ochunacampi tocañataqui aqham sasa: “Munasiñapajj wiñayataquiwa” sasa, cunapachatï Davidajj jupanacampi k'ochcäna ucqha. Ucatsti sacerdotenacajj jupanac uñcatasinjja trompetanacwa tocapjjäna, uccañcamasti Israel jakenacajj sayt'atäpjjänwa.
7. Salomonasti uqhamaraquiw loktaraquïna Tatitun templopa nayrakatancqui uca uta ankäjja, ucansti jupajj take naqhata loktäwinaca, sumaru mantäwi loktäwinacan liq'inacapa, jupajj bronceta altara luraycäna ucatjja phokharjjänwa take naqhata loktäwinacasa, granonacata ofrendanacasa, uqhamarac liq'inacasa.
8. Uca urunsti Salomonajj chhujllanacan fiestapwa luräna take Israel jakenacampi, jupanacasti walja jakenacawa jutapjjäna Hamat sat mantañawjata, Egipto jawiratpacha.
9. Khepürusti mä jach'a fiestwa lurapjjäna, jupanacasti pakallko uruw fiesta lurapjjäna altara loktasina, uqhamarac yakha pakallk uruw chhujllanacan fiestap lurapjjaraquïna.
10. Pakallkür phajjsina pä tunca quimsani urunaca sarakataruwa reyejja jakenacarojja qhitanucjjäna utanacapar cusisita sarjjapjjañapataqui, uqhamarac Davidaru, Salomonaru, Israel marcaparusa Tatitojj asqui luratapata.
11. Cunapachatï Salomonajj Tatitun templopa wali suma tucuyäna, reyin palaciopsa, uqhamarac cuntï amtcäna ucanacan lurañataqui ucqhajja,
12. Tatitojj arumaw juparojj uñstäna, aqham sasa: “Nayajj mayisitamjja ist'twa, uqhamarac aca cheksa templojjataqui, sacrificionacataquiw ajllisiracta.
13. Uqhamasti, nayatejj waña pacha apayanëjja, jan jallu puriyasa, jan ucajj t'ijut'ijunacarusa yapunaca tucjayäsa ucasa, jan ucajj cunayman usunacsa marcajjaru apayanï ucasa,
14. ucampis sutejja apqui uca marcajjatejj jisc'ar tucusina nayat mayisitani, thaktaraquitani, uqhamarac jan wali sarnakäwinacapsa apanucuni ucajja, nayajj alajjpachatpachwa ist'äjja, juchanacapsa pampacharaquïwa, ucatsti marcapan nayrakatar sartañapsa cuttayjjaraquïwa.
15. Jichhat ucsarusti take chuymawa ist'äjja aca chekana oración luratjja,
16. nayajj aca templorojja ajllistwa, loktaractwa sutejjajj ucan wiñaya ucancañapataqui. Nayasti imäwa, uqhamarac amtasipuniraquïwa.
17. Jichhasti waliquiwa, jumatejj nayan nayrakatajjan sum sarnakäta David awquimjama lurasina, take cunanactejj lurañatac churcsma ucanaca, uqhamarac jaysaraquïta leyinacajjarusa, ewjja arunacajjarusa ucajja,
18. nayasti sumwa sayt'ayä reinomjja cunjämtï David awquimampi suma amtäwir mantcäyäta uqhamaru. Juparusti arsüyätwa jupat saraker wawanacapatjja utjapuniniwa Israel marcaru apnakañapataqui.
19. Ucampis jumanacatejj nayat sarakapjjetäta, janiraqui leyinacajjsa, ewjja arunacajjsa churapcsma ucanac phokhapcätati, jan ucasti yakha diosanacaruraqui sirvipjjäta, yupaychapjjaraquïta ucajja,
20. jumanacarojj apsupjjämaw cawquïr oraktejj jumanacaru churapcsma ucatjja, uqhamarac nayan nayrakatajjatsa apanucuraquïwa cawquïr templotejj nayajj yakhachascta ucjja, ucatsti aca chekjja sapa cuti larusitäñataquiw tucuyä take marcanac taypina.
21. Aca templon jach'achatäñapajja tucuyatäniwa jach'a tucjat lakayaru, ucatsti take qhititï uca chekanjama pascani ucajja muspharaniwa, ucatjja jisct'asiraquiniwa: ‘¿Cunatsa Tatitojj uqham luri aca orakempi, uqhamarac aca templompisa?’ sasa.
22. Ucatsti juparojj sapjjaraquiniwa: ‘Aca jakenacajj nayra awquinacapan Tatit Diosaparuw apanucupjje, qhititï Egiptot apsuncäna ucaru, ucatsti jupanacajj yakha diosanacaruwa sirvipjje, yupaychapjjaraqui; ucatwa take aca jach'a jan walinaca jupanacjjaru jutayi’ ” sasa.

2 Crónicas 8:1-18
1. Salomonajj Tatitun templop luraycäna, uqhamarac jupan palaciopsa ucqhatjja, pä tunca maraw pasjjäna,
2. ucatsti cawquïr marcanactejj Hiram chachajj catuycäna ucanacwa asquichayäna, ucatjja israelita jakenacwa ucanacar utjantayäna.
3. Ucatsti Soba chekanquir Hamat marca contra sarasinwa uca marca catuntasïna.
4. Ucjjarusti asquichayaraquïnwa wasarancqui uca Tadmor marca, uqhamarac Hamat chekana luraycäna ucan mank'añanac imañ take marcanacaraqui.
5. Uqhamaraquiw asquichayaraquïna patäjjanquir Bet-horón, aynachanquir Bet-horón ucanaca, uca marcanacasti nuwasiñatac lurat perkanacani, puncunacani, uqhamarac barranacanïnwa.
6. Ucjjarusti asquichayaraquïnwa Baalat marca, ucat ucjjar mank'añanaca imañ yakha marcanacaraqui, ucjjarusti nuwasiñ carronacan cuartelanaca, caballería cuartelanaca, take cunanactejj Jerusalenana Líbano ucansa lurayañ muncäna ucanaca, ucatsti jupajj take orakpacharu apnakqui ucanacaruraqui.
7. Ucatsti hititas, amorreos, heveos, ferezeos, uqhamarac jebuseos uca jakenacajj kheparapcäna, qhitinacatejj jan israelitanacäqui,
8. jupanacat saraker wawanacapajj uca orakena kheparapcäna jupanacat ucjjaru, israelitanacajj jan tucjapcäna uca jakenacarusti, Salomonajj ch'ama lurañanacaruwa uchäna, uqhamäsipquiwa jupanacajj jichhürcama.
9. Ucampis janiw qhiti israelita jakerusa mä esclavjama luräwinacapanjja sirviyascänti, jan ucasti jupanacajj soldadonacäpjjänwa, jilïrinaca, capitananaca, uqhamarac comandantenacäpjjänwa nuwasiñ carronacampin, caballerianacampina.
10. Salomón reyejj pä pataca pheska tuncani lurayir jakenacanïnwa.
11. Salomonasti faraonan phuchaparojja Davidana marcapatjja aptayjjaraquïnwa, jupataqui palacio luraycäna ucaru, jupajj amuyänwa Israelanquir David reyin palaciopanjja, warmipan ucan jacañapajj jan asquïtapa, cawqha chekanacarutejj Tatitun arust'äwi arcapajj mantcäna ucqhanacajja kollanätap laycu.
12. Salomonasti take naqhatanac loktäna Tatitun altarapana, jupajj templo mantañawja nayräjjaru altara luraycäna ucqhana,
13. cawquïri urunacantejj Moisesan leyiparjama loktañajj waquisqui uqhamaru, samarañ uruna, sapa phajjsina kallta urunacana, uqhamarac marcpachana quimsa fiestanacajj utjqui ucanacanaraqui: jan levaduran t'ant'anaca fiestana, semananacan fiestapa, uqhamarac chhujllanacana fiestapanaraqui.
14. Uqhamaraquiw utt'ayaraquïna sapüru luräwinacapa, cunjämatï David awquipajj wact'äwaycäna uqhamaru, uqhamata sacerdotenacajj sirvipjjañapataqui, uqhamarac levitanacasa Tatitur yupaychapjjañapataqui, sapüruna cunanacantejj sacerdotenacajj yanapt'atäña munasqui ucanacan yanapt'asinaraqui. Uqhamaraquiw utt'ayaraquïna sapa puncuna uñjirinacan luräwinacapa, uqhamawa wact'ayawayäna Diosanquir Davidajja.
15. Uqhamasti, janipuniw cunapachas jupanacajj onjjtapcänti cawcsarusa Davidan arsüwinacapatjja, sacerdotenacasa, levitanacasa, uqhamarac imat yänaca uñjirinacasa.
16. Take cuntï Salomonajj lurañapäcäna ucanacasti lurasïnwa, cunüruttï templona cimientopa uchascäna ucqhat kalltasa tucuyatäñapcama. Tatitun templopasti sumawa tucuyatäna.
17. Ucatsti Salomonajj saränwa Ezión-geber sat chekaru, uqhamarac kota lacanquir Elat chekaru, ucasti Edom orakenwa jicjjatasi.
18. Hiram chachasti jilïri jakenacap tokejj barconaca, jakenaca jupar yanapapjjañapataqui apayäna, jupanacasti kotan sarnakañjja sumwa yatipjjäna, ucatsti jupanacajj Salomonan sirvirinacapamp chicaw sarapjjäna Ofir chekar puriñcama. Uca chekatsti korinacjja niya tunca pheskan waranka kilo aptaniwayapjjäna, ucatsti Salomón reyin ucaruw apapjjäna.

Salmos 80:1-6
1. Israel marcan awatiripa, ist'apjjaquitaya, tamar uñtat Josean marcapar irpiri, jaysapjjaquitaya; angelanac taypin khapak konuñaman kont'asiri, ist'apjjaquitaya.
2. Efraín, Benjamín, Manasés uywatanacamarojj qhuyapayasiñampiy uñtanim. ¡Sartasiquimaya, ch'amamamp khespiyiriy jutapjjeta!
3. Diosay, cunjämäpcäyättejj uqhamaruy cutjtayjjapjjeta, ¡qhuyapayasiñampiy uñtanipjjeta, nanacasti khespiyataw uñjasipjjä!
4. Take ch'aman Dios Tatay, ¿cunapachcamarac marcaman mayisitapampisti k'apisitaquïscätasti?
5. Mank'añ lantjja, jachañ churapjjesta, uma lantsti, juc'amp jachañanac utjayarapipjjesta;
6. marca jac'a masinacajjan sawcascañaruw tucuyapjjesta, timanacajjasti nanacat larusipjjetuwa.

Proverbios 20:15-15
15. Acapachan korinacata sipana, uqhamarac suma yänacat sipansa, juc'amp asquiwa qhititejj yatiñampi parlqui ucajja.

Hechos 13:26-52
26. “Jilatanaca, Abrahaman wawanacapa, uqhamarac qhitinacatejj jumanac taypit Diosar ajjsartas sarnakapcta ucanaca, take jumanacataquiw aca khespiyäwi arunacajja.
27. Jerusalén marcan jaquirinacampi jilïrinacampejja, janiw Jesusan qhitïtaps yatipcänti. Janiraquiw amuyt'apcänti cuntejj sinagogana sapa samarañ uruna profetanacan kellkatanacap leepcän ucsa. Ucampis Jesusar jiwayasajj jupanac quicpaw uca profecía arunacjja phokhapjje.
28. Jupar jiwayañataquejj janiw cuna juchsa jicjjatapcänti. Uqhamäquipansa jupar jiwayañataquejj Pilatorojj mayisipcaquïnwa.
29. Ucatsti take cunatï jupjjat kellkatäcäna ucanac phokhasjjepanjja, cruzat apakasinjja sepulturaruw imjjapjjäna.
30. Ucampis Diosaw jiwatanac taypit juparojj jactayi.
31. Jesusasti walja urunacawa, uqhamaraqui walja cutiraquiw uñstäna, Galileat Jerusalenar jupamp chica maqhatapcäns ucanacaru. Jichhasti ucanacaw jupatjj jakenacar yatiyapjje.
32. “Nanacasti jumanacarojj cuntï Diosajj awquinacasar arsuwaycäna uca suma arunacwa yatiyapjjsma.
33. Ucsti jiwasa jupan wawanacaparojj Diosajj arsutapjja phokhestuwa, Jesusar jactayasa, cunjämtï payïr salmonjja kellkatäqui: ‘Jumaw nayan wawajjätajja. Nayaw jichhajj jumar jacañ chursma’ sasa.
34. Diosasti jiwatanac taypit jactañapjja yatiyaraquïnwa, janchipan jan ñusjañapataqui. Kellkatansti saraquiwa: ‘Jumanacaruw churapjjäma cuntï Davidar churañ amtcäyät uca bendicionanacjja’ sasa.
35. Ucatpï saraquejja yakha salmonjja: ‘Janiw juman munat sirviriman janchip ñusjañapjja munätati’ sasa.
36. Chekpachansa Davidajj jupa tiempo jakenacaru Diosan sataparjam sirvisinjja, jiwjjänwa. Ucatsti awquinacapampi chicaraquiw imt'atäjjäna, janchipasti ñusj-jjaraquïnwa.
37. Ucatsipana, qhitirutejj Diosajj jactayqui ucan janchipajj janiw ñusjcänti.
38. Jilatanaca, jumanacajj ac yatipjjañamawa: Juchat perdón utjatapajja, Jesús tokew jumanacarojj yatiyasi.
39. Ucatwa jupar iyawsirinacajj jupa toke perdón jicjjatapjje, take cunattï Moisesan kellkataparjama jan perdón jicjjatañ puedepcän ucanacata.
40. Amuyasipjjam, ucataraqui profetanacan aqham sas arsutanacapasti jumanacjjar phokhasiscaspan:
41. ‘Yatipjjam, larusirinaca, muspharapjjam, ina ch'usar tucupjjaraquim. Naya Diosaw jumanacan urunacamanjja jach'a luräwinac lurta. Ucanacarusti janiw jumanacajj: ‘Chekaw’ sapcätati, ni qhiti jumanacar ucanac yatiyquïpansa.’ ”
42. Pablompi mayni jilatanacampi judionacan sinagogapat mistjjepansti, jan nacïwitpach judiöpquis ucanacaw jupanacar achict'apjjäna, jutir samarañ uruna wasitata jupanacar ucanacjjat parlapjjañapataqui.
43. Sinagoga tantachasïwi tucuyjjatatsti, judionacat waljaniw Pablompi Bernabeampirojj arcapjjäna. Judionacan sarnakäwinacaparjam suma judío tucurinacasa arcapjjaraquïnwa. Pablompi Bernabeampisti jupanacarojj ewjjt'apjjaraquïnwa Diosan munasiñapan ch'aman sayt'apjjañapataqui.
44. Jutir samarañ urusti, niya marcpachaw Diosan arunacap ist'añataquejj tantachasipjje.
45. Uqham walja jakenac uñjasinjja, Judionacajj wal colerasipjjäna. Pablon arunacaparusti: ‘Janiw chekäquiti’ sapjjänwa. Juparusti cunaymanwa tokepjjaraquïna.
46. Ucapachasti Pablompi Bernabeampejj jan ajjsarasaw sapjje: —Waquisipunïnwa nayrakata jumanac judionacar Diosan arunacapa parlañajja. Ucampis jumanacajj janiw catokañ munapctati. Janiraquiw wiñay jacañatacjam amuyasipctasa. Ucatpï jichhajj nanacajj jan judionacäpquis ucanac taypirojj sarjjapjjäjja.
47. Tatitusti aqham sasaw nanacarojj sapjjetu: ‘Marcanacan khanapataquiw jumarojj uchsma. Uqhamaraquiw juma toke take acapachanquir jakenacan khespiyasiñapataqui’ sasa.
48. Uc ist'asinsti, jan judionacäpquis ucanacajj cusisipjjänwa. Sapjjaraquïnwa: “Tatitun arunacapajj wali sumapuniwa” sasa. Ucatsti qhitinacatejj wiñay jacañatac waquichatäpcän take ucanacajj iyawsapjjaraquïnwa.
49. Uqhamaw Tatitun arunacapajj parlasïna take uca chekanacana.
50. Ucampis judionacajj mä kawkha asquit uñt'at warminacaru, uqhamarac uca marcan wali aytat chachanacampiruw parlapjje. Jupanacarusti Pablo uqhamarac Bernabé contra sayt'apjjañapataquiw amtayapjjaraqui uca marcat jaksuñcama.
51. Uqhamïpansti Pablompi Bernabeampejj uca jakenacataqui cayunacapat lak'a polvonac thalarasisinjja, Iconio marcaruw sarjjapjjäna.
52. Tatitur iyawsirinacasti wali cusisitäpjjänwa. Kollan Ajayumpi phokt'atäpjjaraquïnwa.