A A A A A
Bible in one year
July 2

1 Crónicas 28:1-21
1. Davidajj Jerusalén marcanjja Israelanquiri jilïri chachanacaruwa tantacht'äna, tribunacan jilïrinacaparu, reyin sirvirinacapäpqui uca take soldadonacan jilïrinacaparu, batallonanacan comandantenacaparu, compañíanacan jilïrinacaparu, take orakenacapa, uywanacapa, reyin wawanacapa uñjirinacarusa wali aytata chachanacaru, ejerciton take aytata oficialanacaparusa.
2. Ucatsti Davidajj sayt'asisinjja sänwa: “Ist'apjjeta, jilatanacajja, uqhamarac marcajja: Nayajj amtayätwa mä uta lurayaña, cawqhantejj Tatitun arust'äwi arcapajj wiñayataqui ucan uchatäcaspa, uqhamarac jiwasan Diosasajj tronopa ucarusa uchasiraquispa ucaraqui. Ucatsti nayajj wact'ayasiyätwa lurayañataquejja.
3. Ucampis Diosajj situwa: ‘Janiw jumajj nayataqui mä templo luraycätati, jumajj wali nuwasirïtawa, uqhamarac wilsa wartaracta uca laycu’ sasa.
4. Ucampis Israelan Tatit Diosapajja nayaruw ajllisitu take familiajja taypita Israelan wiñay reyïñajjataqui. Juparaquiw Judá tribu ajlliwayi apnakañapataqui uca tributa mistuñapataqui, uca Judá tributjja nayan familiajjaruw ajllisiwayi, uqhamarac jilanacajj taypitjja nayaruw ajllisiraquitu Israelan reyïñajjataqui.
5. Wawanacsti jupa Tatituraquiw waljani churaraquitu, jichhasti take wawanacajj taypitjja Tatituwa Salomón wawajjaru ajllisiraqui Tatitun marcapa, Israelpachana tronopan kont'asiñapataqui.
6. Tatitojj ucjjarojj saraquituwa: ‘Salomón wawamawa nayan templojja lurayarapitani, uqhamarac uta ankäjjanacapamppacha, nayaw jupar wawajjata ajllista uca laycu, nayasti jupataquejj awquipäyäwa,
7. ucatsti jupan reinopjja wiñayataquiw sayt'ayäjja, jupatejj ch'amañchasiscani camachi arunacajja phokhañataqui, ewjjanacajjsa cunjämatï jichhürcama phokhatäsqui uqhamäni ucajja’ sasa.
8. “Jichhasti, take Israel jakenacan nayrakatapana, Tatituna aca tantachäwipana, uqhamarac Tatitusa ist'ascaraquistuwa, jumanacasti take chuyma Tatitu Diosaman camachi arunacapjja imapjjam, uqhamata aca suma orakejj jumanacancañapataqui, ucatsti wawanacamarusa wiñayataqui herenciata jaytawayapjjañamataqui.
9. Juma Salomón munat wawajjasti, uñt'ätawa awquimana Diosaparu, ucatsti take chuymaraquiwa jupar sirvïta, uqhamarac suma amtampiraqui, Tatitusti take chuymanacjja sumwa uñji, uqhamarac yatiraqui cuna amtäwinacsa, lup'ïwinacsa. Uqhamasti jumatejj jupar thaktätajja, jupasti jumarojj jicjjatayasïtamwa, ucampis jumatejj jupat sarakäta ucajja, jupasti jumarojj wiñayataquiw jakonucütam.
10. Jichhasti sum amtasim Tatituw jumarojj ajllistam jupataqui mä templo lurayañamataqui, ucaw jupan kollan utapäni. Ucatsti, ¡ch'amañchasim, uqhamarac jichhajj luraraquim!” sasa.
11. Ucatsti Davidajj Salomón yokaparojj plano churäna, templon puncupata, utanacapata, imaña utanacata, utanacapata, patäjja utanacapatsa, mankhëjja utanacapatsa, uqhamarac Sinti Kollana utatsa.
12. Uqhamaraquiw ucjjarojj churaraquïna cuna amtäwinacapatï lup'ïwipana utjcäna templona ankäjj utanacapataqui ucanaca, uqhamarac cawquïr utanacatejj uca muytpachana luratäñapäqui ucanacatsa, tesoronacataqui, uqhamarac kollana ofrendanaca imañäqui uca utanacatsa.
13. Uqhamarac sacerdotenacajj jaljasipjjañapäqui lurañanaca, levitanacasa uca utanacatsa, uqhamarac templon take sirviñanacatejj utjqui ucanacatsa, uca pachparaqui templona yänacajj utjqui culto lurañataqui ucanacsa.
14. Uqhamaraquiw churaraquïna walja korinaca, kollkenaca, cuna yänacatejj koritsa, kollketsa lurascani cultona apnakatäñataqui ucanacataquejj jilpachänwa;
15. candelabronacataqui, lamparapamppachataqui, koritsa, kollketsa, churänwa cunjämatejj sapa mayasa cuna pesonïñapäqui uqhamaru;
16. uqhamaw churaraquïna sapa maya mesanacataqui koritsa, kollketsa, cawqharutejj kollan t'ant'anacajj sekequi uchasiñapäqui ucanacataqui.
17. Uqhamaraquiw kori churaraquïna tenedoranacataqui, tasonanacataqui, uqhamarac jarronacataquisa, koritsa, kollketsa copanaca luratäñapataquejj waljaraquiw utjaraquïna, cunjämarutejj sapa mayas pesopataqui munasqui uqhamaru.
18. Churaraquïnwa suma kori incienso altarataqui waljaraquiqui, ucjjarusti kori churäna carro lurayañataqui, cawquïrinacatejj angelar uñtata chhekhanacapajj Tatitun arust'äwi arcapjjaru aytatcamäpqui ucanacataqui.
19. “Take acanacaw kellkatäna Tatitojj Davidaru uñstasina arut aru kellkaycäna ucajja, ucansti take lurañanacaw suma khanañchatäna, cunanacatejj planorjama lurasiñapäcäna ucanacajja.”
20. Ucatsti Davidajj Salomonarojj sänwa: “¡Ch'amañchasim, janirac mayjt'asimti, uqhamarac jichhajj lurañaru uscusim! ¡Janipun ch'am thayjtayasimti, ni ajjsaramsa, Tatitu Diosajjasti jumampïscatap laycu! Jupasti janiw jaytanuccätamti, ni apanuccätamsa, take lurañanacajj Tatitur sirviñataqui templona tucusiñapcama.
21. Acajja sacerdotenacana, uqhamarac levitanacan lurañanacapajja, janc'aquïpjjewa templona sirviñataqui; take lurañanacataquejja utjaraquïtamwa take cuna lurañanacataquis suma chuymaninaca, yanapirinaca, jupanacasti yatipjjewa take cuna lurañanaca; ucatsti jilïrinacasa uqhamarac take marcasa juman arsutaruraquiw ist'apjjaraquini” sasa.

1 Crónicas 29:1-30
1. Ucatsti Davidajj take tantachasïwi jakenacaruraquiw saraquïna: “Salomón wawajjasti, Diosajj jupa saparuquiw ajllisi, jupasti wawa waynaquïsquiwa, ucampis lurañasti wali jach'awa, uca lurañasti janiwa jaketaqui palacio lurañäqui uqhamäquiti, jan ucasti Tatit Diosataqui templo lurañäqui ucawa.
2. Take ch'ama tucuñampiw nayajj waquichta cunanacatejj munasqui ucanacjja Diosajjan templopataquejja: kori, kollke, bronce, hierro, madera, sapa mayataquis yakha yakha. Uqhamaraquiwa waquicharacta cornalina, kalanaca lip'suyañataqui, mezcla, kalanaca mosaicotaqui, take casta muncañ kalanacaraqui, uqhamarac walja alabastronaca.
3. Templotaqui take cuna waquichta ucanacat sipansa, Diosajjan templopataqui munasiñajjajj utjatap laycojja, Diosan templopataquejja nayan korejja, kollkejja churaracta:
4. pataca waranka kilo suma korinaca, pä pataca quimsa tuncani waranka kilonaca suma kollke uca utanacan perkanacaparu apaquipañataqui.
5. Take korisa, uqhamarac kollkesa waljawa cuna casta metalampi lurañataquisa, uqhamarac cuna lurañanacatejj luririnacapajj munapcani ucanac lurañataquisa. Jichhasti ¿qhitisa asqui chuymampi churañ muni Tatitutaquejja?” sasa.
6. Ucatsti familiata jilïrinacasti, Israelana tribunacapata jilïrinacasa, batallonanacana, compañianacan jilïrinacapasa, reyitaqui irnakapqui ucanacan jilïrinacapasa churäwinacwa asqui chuymanacapampi churapjjaraquïna.
7. Jupanacasti templo lurayañataquejja churapjjänwa: pataca sojjta tunca pheskani waranka kilo korinaca, tunca waranka kori kollkenaca, quimsa pataca quimsa tuncani waranka kilo kollke, uqhamarac niya sojjta pataca waranka kilo bronce, ucatsti quimsa millona quimsa patacani waranka kilo hierroraqui.
8. Uqhamaraquiw qhitinacatejj suma muncaña kalanacanïpjjäna ucanacasa churapjjaraquïnwa templona imañ utaparu, take ucanacasti catuyatänwa Gersón chachat saraker Jehiel chacharu.
9. Jakenacasti uqham walja churapjjatapatjja walwa cusisipjjäna, jupanacajj take chuymawa Tatitur churapjjäna uca laycu. David reyisa wali cusisitaraquïnwa.
10. Ucatsti Davidajj take tantachäwi jakenacan nayrakatapanwa Tatiturojj bendicïna, aqham sasa: “¡Israel awquejjana Tatit Diosapa, wiñayataquiw bendicitäyäta!
11. ¡Jumanquiwa, Tata, jach'a cancañamasa, ch'amamasa, jach'ar aptatäñamasa, apnakañasa, jach'a reyi cancañamasa! Cunatejj alajjpachansa, aca orakensa utjqui ucanacajja jumanquiwa. Jumancaraquiwa apnakañamasa, jumajj Tata takenjjarusa jilïrïtam laycu.
12. Jumataracwa jutaraqui kamir cancañasa, jach'äñasa. Jumaw take cunsa apnakascta. Ch'amasa, munañanïña cancañasa amparamanquiwa, ucatsti juman amparamancaraquiwa takeniru churañataqui kamir cancaña, uqhamarac munañanïñasa.
13. Ucatwa jichhajja nanacan Diosajja yuspagarapjjsma, uqhamarac jach'a sutimsa yupaychapjjaracsma;
14. Nayasa, marcajjasa, ¿qhitïpjjaractsti walja yänaca jumar churañataquisti? Chekpachansa takew jumatjja juti, nanacasti churapjjsmawa cuntï jumat catokapcsma ucaqui.
15. Juman nayrakatamanjja cunjämatï jaya jakejj saräwincquejja uqhamaquïpjjtwa, uqhamaraqui cunjämäpcäntï nayra awquinacajjajja uqhamaquïpjjaractwa, ucatsti nanacan jacäwinacajjajja aca orakenjja mä ch'iwir uñtataquiwa, jan cuna suyt'añani.
16. “¡Nanacan Dios Tatitojja, take aca kamir cancañanaca kollan sutimataqui templom lurañataqui waquichapcta ucanacajja, jumanquiwa, jumataracwa jutaraqui!
17. Nayasti yattwa Diosajjay, jumajj chuymanaca uñantirïtama, ucatsti jumataquejj cheka cancañaraquiwa asquejja. Ucatwa, cheka chuymampi take acanac chursmajja. Jichhasti cusisitaw uñjaracta marcamajj acan tantachatäsina, walja ofrendanacapjja jumaruw churapjjtam.
18. Abrahamana, Isaacana, uqhamarac Israelan nayra awquinacajjana Tatit Diosapa, utjayapunim marcamana chuymanacapanjja aca suma amtampi churañäqui ucjja, ucatsti chuymanacapjja juma tokeru wayusiyam.
19. Salomón wawajjarusti take chuymäña churam, camachi arunacama phokhañapataqui, uqhamarac ewjjanacama, leyinacama, take ucanacaru phokhasina, ucatsti templo lurayañapataqui, nayajj ucataquiraquiw waquicharacta” sasa.
20. Ucjjarusti Davidajj take tantachäwi jakenacaruwa saraquïna: “Jichhasti Tatit Diosamaru yupaychapjjam” sasa. Ucatjja take tantachäwi jakenacawa nayra awquinacapana Tatit Diosaparu yupaychapjjäna, ucatsti quillt'asisaraquiwa Tatitutaquisa, reyitaquisa alt'asipjjäna.
21. Khepürusti Tatiturojj loktapjjaraquïnwa sacrificionaca, nact'ata loktäwinaca: waranka vaca kallunaca, waranka ovejanaca, uqhamarac waranka mä maran ovejanaca, vino ofrendanacapamppacha, ucatsti Israel marcana walja sacrificionacaparaqui.
22. Qhä urunjja wali cusisitawa mank'apjjäna, umapjjaraquïna Tatitun nayrakatapana. Ucjjarusti paya cutinwa Davidan Salomón yokaparojj reyita utt'ayapjjäna, ucatsti Diosaruw loktapjjäna take munañanita, uqhamarac Sadoc chacharusa sacerdoteta loktapjjaraquïna.
23. Uqhamaw Salomonajj Tatituna tronopana reyita kont'asïna, David awquipa lanti, ucatsti jupajj nayraruw sartäna. Juparusti take Israel marcaraquiw ist'araquïna.
24. Ucatjja take jilïrinaca, guerran nuwasir chachanacasa, Davidan take wawanacapamppachasa Salomón reyirojj yanapapjjänwa.
25. Tatitojj Salomonarojj take jach'a cancañwa churäna Israel jakenaca nayrakatana, reinoparojja suma cancañaracwa churäna, uqhamsti janiw qhiti reyis Israel marcanjja churatäcänti.
26. Isaí chachan David yokapajj, take Israel marcpachanwa reyipäna.
27. Jupasti Israel marcanjja pusi tunca marawa apnakäna, ucanacatjja Hebrón marcanjja pakallk maraw apnakäna, Jerusalenansti quimsa tunca quimsani mararaqui.
28. Jupasti jiwjjänwa suma awqui horasana, walja maranacani, kamir cancañani, jach'achäwinacani. Jupa lantisti Salomón yokapaw apnakjjäna.
29. David reyin sarnakäwipasti kalltata tucuycamajja, Samuel profetan crónicas sat libropana kellkatawa, uqhamarac Natán profetan crónicas libropana, ucatsti Gad profetanaraqui;
30. ucanacasti uchatawa reinopata, ch'amapata, uqhamarac cunanacatejj jupampi lurascäna ucanacata, Israel marcarusa, uqhamarac mayni orakenacarusa ucjjataraqui.

Salmos 78:67-72
67. Josean wawanacaparus jakonucünwa, janiw Efraín ayllurojj ajllcänti:
68. Judá aylluruw ajllïna, Sión munat kollupampiruw chhijlläna.
69. Kollan chekawjapjja, alajjpachjam utachäna, orakerjamaw wiñayatac thuriñchat sayt'ayaraquïna.
70. David uywataparuw ajllisïna, uywa uyut juparojj irpsüna;
71. ovej tamanacan khepap sarañat irpakäna, Jacobon marcapar awatiñapataqui, Israel marcan awatiripäñapataqui.
72. Davidasti takpach chuymampiw Tatitun marcapar awatïna, ch'iqhi cancañampiw uñjäna, irparaquïna.

Proverbios 20:6-7
6. Walja jakenacawa sapjje: “Suma asqui jakëtwa” sasa, ucampis janiw qhitis asqui jakejj utjquiti.
7. ¡Take cunans asquinwa cheka jakejj jacawayi cusisiñanïpjjewa jupan wawanacapajja!

Hechos 10:24-28
24. Uca khepürusti Cesarearuw puripjjäna. Corneliosti familianacaparu, suma munat amigonacapampir jawsthapisinwa jupanacarojj suyäna.
25. Pedrojj utar puripansti, Corneliojj ankar mistunisinjja quillt'asisaw juparojj catokäna yupaychañataqui.
26. Ucampis Pedrojj aqham sasaw juparojj wayti: —Sayt'asim, tata. Nayajj jumjam jakequiraquïtwa —sasa.
27. Ucatsti Pedrojj Corneliomp parlasinjja, utaruw mantäna. Ucansti walja tantacht'at jakenacaruw jicjjatäna.
28. Pedrosti jupanacarojj sänwa: —Jumanacajj yatipjjtawa, mä judío jaketaquejj jan walïtapa mä yakha marcanquir jakempi parlañapajja, uqhamarac utapar mantañapasa. Ucampis Diosaw nayarojj yatichitu jan qhitirus: ‘Jan wali jakëtaw’ saña, uqhamarac jan qhitirus jisc'achañataqui.