A A A A A
Bible in one year
July 16

2 Crónicas 28:1-27
1. Acaz reyejj cunapachatï pä tunca maranïna ucqhawa apnakaña kalltäna, ucatsti jupajj Jerusalén marcanjja tunca sojjtan maraw apnakäna; ucampis jupan luräwinacapajja Tatitun nayrakatapanjja janiw chekapäcänti, nayra David awquipjamajja.
2. Jan ucasti Israelanquir reyinacan sarnakäwinacaparuwa arcäna, uqhamaraquiw lurayaraquïna c'ari diosanaca metalata umatatayasa, ucanacasti Baal diosan lantinacapänwa.
3. Ben-hinom Vallenjja incienso naqhayäna, uqhamarac wawanacaparusa sacrificion loktasina naqhantayäna, cunjämatï Tatitojj israelitanaca nayrakatapata ajjtcaña luräwinacani marcanacaru jakonuccäna uca luräwinacapa lurasa.
4. Ucjjarusti sacrificionacwa loktäna, uqhamarac inciensonaca naqhayäna c'ari diosanacan santuarionacapana, alto chekanacana, uqhamarac walja laphinacan koka mankhëjjanacanaraqui.
5. Ucatwa Tatit Diosapajj catuyäna sirianquiri reyin amparaparu, ucatsti sirio jakenacajja jupar atipjasinjja walja preso jakenacwa Damasco marcar apapjjäna. Uqhamaraquiw Tatitojj catuyaraquïna Israelanquir reyin amparaparu, juparusti mä jach'a atipjäwimpiw atipjäna.
6. Remalías chachan Peka yokapasti mä sapa urunacwa Judá orakenjja jiwarayäna pataca pä tuncan waranka wali aytata take jakenacaru, jupanacajj nayra awquinacapan Tatit Diosapar apanucupjjatap laycu.
7. Efraín orakenquir Zicri chachajj, wali nuwasirïnwa, jupasti reyin Maasías yokaparuw jiwayäna, uqhamarac palacion Azricam jilïriparu, uqhamarac reyin Elcana nayrïri oficialaparu.
8. Ucjjarusti Israelanquir soldadonacajja pä pataca waranka presonaca catuntapjjäna Judá orakenquir warminacata, yokalla, imilla wawanacatsa, uqhamarac aparapjjäna, ucatjja walja yänacwa Samaria marcaru apasipjjäna.
9. Ucansti Tatitun mä profetapaw utjäna Oded sata, jupasti ejercitojj Samariaru mantasincäna ucar jicjjatiriw saräna, aqham sasa: —Jumanacan nayra awquinacaman Tatit Diosapaw Judá marcatac colerasi, ucatwa jupanacaru jumanacan amparamaru catuyapjjtam. Ucampis jumanacajj wali colerasiampiwa jupanacarojj jiwayapjjtajja, uca luratanacamasti alajjpachcamawa puri.
10. Uqhamarusa amtapjjtawa Judá, Jerusalén ucanquirinacarojj esclavonaca tucuyaña chachatsa warmitsa. Ucampis, ¿janiti jumanac pachpasa Tatit Diosam nayrakatan jucha lurapctasti?
11. Uqhamïpansti ist'apjjeta, preso catutanacjja cutt'ayjjapjjam, jupanacasti jumanacana jilanacamawa, Tatitusti wali coleratawa jumanacataquejja.
12. Ucatjja Johanán chachan Azarías yokapasa, Mesilemot chachan Berequías yokapasa, Salum chachan Ezequías yokapa, uqhamarac Adlai chachan Amasa yokapasa Efraín marcanjja wali aytat jilïrinacapjjänwa. Jupanacasti nuwasïwita cutt'anipcäna ucanacan nayrakataparuwa sayt'asipjjäna,
13. ucatsti sapjjänwa: —Jan acar apanipjjamti presonacaru, ucanacasti Tatitun nayrakatapanjja juchanitwa ut'ayistani. Cuntï jumanacajj lura munapcta ucanacampejja walja juchanacasaruwa juc'amp jiljjatayapjjäta, ucatsti Tatitojj Israelampejj sinti colerasini —sasa.
14. Ucatsti soldadonacajja preso catutanacarojja antutnucjjänwa, uqhamarac yänaca aparanipcäna ucanacjja jilïrinaca, take jakenaca nayrakataparuwa uchjjapjjäna.
15. Ucatsti utt'ayatäpcäna uca chachanacawa presonacaru uñjapjjañapataqui uchatäpjjäna, ucatsti yänaca aparanipcäna uca pachpatwa isinaca apsupjjäna jan isininacaru isthapiyañataqui, sapatt'ayañataqui, ucatjja mank'aña, umaña churapjjäna, usuchjatanacapsa kollt'apjjaraquïna, jan sartirjamäqui ucanacarusti asnota lat'jjatayasawa Jericó marcacama irpjjapjjäna familianacapan ucar jaytasa, palmeranacani marcaru. Ucatsti jupanacajj Samariaruwa cutt'jjapjjäna.
16. Uca urunacansti Acaz reyejj qhitanacwa Asiria marcaru qhitäna yanapa mayiniapataqui.
17. Ucampisa Edom orakenquiri jakenacawa mantantanisa Judá marcar atipjasa mä kawkha jakenacar preso apapjjäna.
18. Yakha toketjja filisteonacaraquiw pampanquiri marcanacatjja aparapjjäna, uqhamarac Judá orakenquir Néguev marcatsa. Jupanacasti catuntasipjjänwa Bet-semes chekatjja Ajalón, Gederot ucanaca, Soco chekatjja Timna, Gimzo ucanacaraqui jisc'a marcanacapamppacha, ucatjja uca marcanacanaracwa utjnoktapjjäna.
19. Tatitusti Judá marcarojj jisc'achatäñaruwa puriyäna, Judá marcanquir Acaz reyip laycu, uqhamarac Acaz reyin Judá marcar jan wali lurañaru sarayatapata, uqhamarac Tatit nayrakatan jan wali luratapataraqui.
20. Asirianquiri Tiglat-pileser reyisti Acaz reyimpi nuwasiñataquiwa jutäna. Jupasti yanapcamayajja, jan walt'añaruwa uchäna.
21. Acaz reyejj Tatitun templopata wali jila alan yänaca apsuncchïna ucasa, reyin palaciopatsa, uqhamarac jilïrinacan utanacapatsa asirianquiri reyiru impuestota churañataqui, janiw ucampejja cunsa jicjjatcänti.
22. Acaz reyejj uqham jan walt'añanccasasa, Tatitutaquejj sayt'asiscaquïnwa. ¡Uqhamänwa Acaz reyejja!
23. Jupasti Damasconquir diosanacaruw sacrificionaca loktäna, uca diosanacajj jupar aynacht'ayqui ucanacaru. Jupajj amuyänwa: “Sirianquiri diosanacatejj uca pachpa marcanquiri reyinacaru yanapcchïna ucajja, nayarojj yanaparaquitaspawa nayatejj sacrificionaca ucanacaru loktä ucajja” sasa. Ucampis uca yakha diosanacawa apt'ascäna jupan tucjatäñapataqui, uqhamarac take Israelpachansa.
24. Ucatsti Acaz reyejj Diosan templopanquiri yänaca tantthapisinjja, jisc'a jisc'wa tucjäna, templon puncunacapsa jist'antayänwa, ucatjja yakha diosanacataqui altaranacwa lurayäna Jerusalenan take esquinanacaparu.
25. Ucatjja Judá orakena take marcanacana yakha diosanacataqui santuarionacwa lurayäna, yakha diosanacar incienso naqhayañataqui, uqhamata nayra awquinacapan Tatit Diosapar colerayasina.
26. Ucat ucjjar sarnakäwipasa, uqhamarac take luratapatsa, kalltata tucuycamajja kellkatawa Judá, uqhamarac Israel marcanacan reyinacapan libropana.
27. Cunapachatï jupajj jiwjjäna ucqhajja, nayra awquinacapampi chicaw imt'jjapjjäna Jerusalén marcana, ucampis janiw apapcänti Israelanquir reyinacan imäwiparu. Ucatsti jupa lantejja Ezequías yokapawa apnakjjäna.

2 Crónicas 29:1-36
1. Ezequiasajj cunapachatï pä tunca pheskan maranïna ucqhawa apnakaña kalltäna, ucatsti Jerusalén marcanjja pä tunca llätuncani maraw apnakäna. Jupan taycapasti Abi satänwa, Zacarías chachan phuchaparaquïnwa.
2. Ezequiasan luratanacapasti chekapänwa Tatitun nayrakatapana, cunjämatï nayra David awquipanjama.
3. Juparaquiw Tatitun templopana puncunacapa jist'arayäna apnakaña kalltcäna uca mara kallta phajjsina, uqhamarac asquichayaraquïna.
4. Ucatjja jawsayänwa sacerdotenacaru, levitanacaru, inti jalsu tokenquir plazar tantachasina,
5. ucatsti jupanacarojj aqham sänwa: “Ist'apjjeta levitanaca: jumanacajj jichhpach k'omachasipjjam, uqhamarac k'omachapjjaraquim nayra awquinacaman Tatit Diosapan templopsa. Santuariotjja apsunipjjam take cunatï k'añüqui ucanaca.
6. Jiwasan nayra awquinacasajj janiw phokhapcänti uca laycu, uqhamarac luratanacapasa janiw chekapäcänti Tatit Diosasan nayrakatapana, ucatjja apanucupjjänwa. Jupanacasti Tatitun utjäwiparojja jisc'achapjjänwa, janiw ut'cjjapjjänti.
7. Manta puncunacsa jist'antapjjänwa, lamparanacsa jiwt'ayapjjänwa, ucatsti apanucupjjänwa incienso naqhayañanaca, uqhamarac naqhata loktañanacsa Israelana Diosapan santuariopana.
8. Ucatwa Tatitojj Judá, Jerusalén ucanacampi colerasïna, ucatsti wali sustjascaña, uqhamaraqui ajjsarcañaruwa tucuyäna cunjämtï jumanacajj ujapjjtajja uqhama.
9. Ucatwa awquinacasajja nuwasïwina jiwarapjjäna, ucatsti preso apataraquïnwa yokalla, imilla wawanacasasa, warminacasasa.
10. Ucatwa nayajj amtasta Israelan Tatit Diosampisa suma parlt'äwiru mantañataqui, jiwasata colerasiñapa apakjjañapataqui.
11. Uca laycu, wawanacajja jan samarapjjamti, Tatituw jumanacarojj ajllipjjtam jupan arsutanacaparu phokhapjjañamataqui, sirvipjjañamataqui, incienso loktapjjañamataquiraqui” sasa.
12. Cawquïr levitanacatejj ucspacha luraña kalltapcäna ucanacajja, acanacäpjjänwa: Coat chachat saraker wawanacapatjja, Amasai chachan Mahat yokapa, ucatjja Azarías chachan Joel yokapa; Merari chachat saraker wawanacapatsti, Abdi chachan Cis yokapa, uqhamarac Jehaleel chachan Azarías yokapa; Gersón chachat saraker wawanacapatsti, Zima chachan Joa yokapa, uqhamarac Jua chachan Edén yokapa;
13. Elizafán chachat saraker wawanacapatsti, Simri, uqhamarac Jehiel; Asaf chachat saraker wawanacapatsti, Zacarías, uqhamarac Matanías;
14. Hemán chachat saraker wawanacapasti, Jehiel, uqhamarac Simei, ucatsti Jedutún chachat saraker wawanacapatsti, Semaías, uqhamarac Uziel.
15. Nayrakatajj familianacaparuw tantacht'äna, ucatjja takeniw k'omachasipjjäna; ucatjja temploruwa mantapjjäna k'omachañataqui, cunjämtï reyejj jupanacar siscäna Tatitun ewjja arunacaparjama uqhamaru.
16. Ucatsti sacerdotenacajj templo mankheruwa mantapjjäna k'omachañataqui. Ucatsti jupanacajj templon ankäjjaparuwa apsunipjjäna take cuna k'aunacatejj templo mankhena jicjjatapcäna ucanaca, ucatsti levitanacajj ucanacjja Cedrón jawiraruw apapjjäna.
17. Jupanacasti kalltapjjänwa k'omachaña kallta phajjsina, kallta uruna, uca phajjsina quimsakallko uru sarakatarojja purinjjapjjänwa Tatitun templopa puncuparu. Ucat ucjjar templon k'omachajja yakha quimsakallk urunwa k'omachapjjäna, ucatsti tunca sojjtan urutaquisti k'omachajja tucuyjjapjjänwa.
18. Ucatjja Ezequiasan palacioparu mantasinjja aqham sapjjänwa: “Nanacajj templjja takwa k'omachapjjta: nact'ayata loktäwinac loktañ altara, take yänacapamppacha, uqhamarac loktat t'ant'anaca uchaña mesa take yänacapamppacha.
19. Uqhamaraquiw suma apthapipjjta, k'omachapjjaracta Acaz reyejj apnakcäna ucqhajja take yänaca apanuccäna Tatitump jan sum saratap laycu ucanaca, jichhasti ucanacajj Tatitun altarapan nayrakatapancjjewa” sasa.
20. Ucatsti Ezequías reyejj wali alwata sartasisinjja marcanquiri take autoridadanacaruw tantachäna, ucatjja temploruw saräna.
21. Jupanacasti apapjjänwa pakallk vaca kallunaca, pakallk ovejanaca, pakallk mä maran orko ovejanaca, uqhamarac pakallk cabritonaca ofrendata loktañataqui reyin familiapana juchanacapata, templotsa, uqhamarac Judá marcatsa. Reyisti Aarón chachat saraker sacerdotenacaparojj ucanacjja nact'ata loktäwitwa loktayaraquïna Tatitun altarapana.
22. Sacerdotenacajj vaca kallunacjja jiwarayapjjänwa, wilanacapa aptasinjja altararuwa ch'ajjch'uquipapjjäna. Ucjjarusti uqhamaraquiquiw ovejanacampejja lurapjjäna, mä maran orko ovejanacampisa.
23. Ucatsti juchat ofrenda loktañ cabritonacjja reyin ucaruw apapjjäna, uqhamarac jakenacan nayrakatapana, ucatjja jupanacajj amparanacapwa uca uywanacjjaru uchapjjäna.
24. Ucjjarusti sacerdotenacajj ucanacar jiwayasinjja wilapjja wart'apjjänwa altar patjjaru, juchata ofrenda loktasina, take Israelana juchanacapata perdón jicjjatañataqui, reyejj uca loktäwjja Israel marcpachatac loktatäñapataquiw arsüna.
25. Ezequiasasti Tatitun temploparojj ucharaquïnwa levitanacaru platillonacani, salterionacani, uqhamarac citaranacani, cunjämatï lurañataqui churawaycäna Davidasa, reyin Gad profetapasa, uqhamarac Natán profetasa ucanacarjama. Uca lurasti Tatituw churäna profetanacap toke.
26. Levitanacasti sayt'atcamäpjjänwa Davidan instrumentonacapampi, uqhamarac sacerdotenacasa trompetanacampiraqui.
27. Ucatsti Ezequiasajj nact'ata loktäwinacjja loktayänwa Tatitun altarapana. Ucatjja cunapachatï nact'ata loktäwi loktañ horasäjjäna ucqhajja, kalltapjjaraquïnwa k'ochuña Tatitur jach'achasina, uqhamarac trompetanacasa tuct'asiraquïna, David reyin instrumentonacapamp tocata musicapampi chica.
28. Cunapachatï k'ochurinacajj k'ochupcäna, sacerdotenacasa trompetanaca tocapcäna ucqhajja, jakenacasti quillt'atcamawa yupaychapjjäna. Uqhamawa jupanacajj lurapjjäna nact'ata loktäwi loktaña tucuyacama.
29. Cunapachatï ucajj tucuyjjäna ucqhajja, reyisa, uqhamarac take qhitinacatejj jupamp chicäcäna ucanacasa quillt'asipjjänwa yupaychañataqui.
30. Ucatjja Ezequías reyejja, autoridadanacampejja levitanacarojj sapjjänwa: Tatiturojj yupaychapjjam Davidana, Asaf profetana salmonacapampi, sasa. Jupanacasti wali cusisiñampiwa k'ochupjjäna, uqhamarac quillt'asipjjaraquïna yupaychasina.
31. Ucatsti Ezequiasajj jakenacarojj sänwa: “Jumanacajja jichhajja Tatiturojj loktasjjapjjtawa, jichhajj jac'achasinipjjamaya, uqhamarac apanipjjaraquim loktäwinaca, Tatitur yuspagarañ churañ ofrendanaca Tatitun templopataqui” sasa. Ucatsti jakenacajj apanipjjänwa loktäwinaca, Tatitur yuspagarañ ofrendanaca, ucatsti qhitinacatejj asqui chuymanïpcäna lurañataqui ucanacasti, nact'ata loktäwinacwa loktapjjäna.
32. Jakenacajja nact'at loktäwinaca loktañataqui uywanaca apapcäna ucanacasti acanacänwa pakallk tunca orko vacanaca, pataca ovejanaca, uqhamarac pä pataca mä maran orko ovejanacaraqui. Take ucanacasti Tatituru nact'ata loktäwi loktañataquïnwa.
33. Takpacha uywanaca loktapcäna ucanacasti sojjta pataca orko vacanaca, uqhamarac quimsa waranka ovejanacaraquïnwa.
34. Sacerdotenacajj juc'aniquïpjjatap laycujja, nact'ata loktäwinaca loktañataqui uywanacan lip'ichinacapjja janiw take apakaña tucuyapcänti, jupanacan levita jilanacapawa yanapapjjäna uca lurañana tucuyañataqui, mayni sacerdotenacana k'omachasiapcama; levitanacasti juc'amp janc'aquïpjjänwa k'omachasiñataqui sacerdotenacat sipansa.
35. Uqhamarusa waljawa utjäna nact'ata loktäwinaca loktañanacajja, uqhamarac sumancaña sacrificionacata liq'inacasa, uqhamarac nact'ata loktäwinacampi chica lurascäna vino ofrendanacasa. Uqhamawa wasitat kalltasïna Diosar yupaychañajja Tatitun templopana.
36. Ucatsti Ezequiasasa, take jakenacasa cusisipjjänwa Diosajj cuntï jakenac laycu lurcäna ucanacata, take ucanacasti mäquiwa lurasïna.

Salmos 84:8-12
8. Take ch'aman Diosay, mayisitajjarojj ist'aquimaya, Jacobon Diosapa, arnakasitajjarojj jaysaquimaya.
9. Nanacar arjjatir Diosay, juman ajllit reyerojj qhuyapayasiñampiy uñtanim.
10. Mä uruquis utaman kamañajj juc'amp sumawa, warank urunac ankancañat sipana. Nayajj Diosan templopancañ munta, ñankha lurañ chekawjan jacañat sipana.
11. Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.
12. ¡Take ch'aman Diosay, jumar alcatir jakenacajj cusisiñaniwa!

Proverbios 21:6-8
6. C'arimpi kamir cancaña jicjjatatajj, mäquiwa chhaktawayjje; amtañanacapan pantjasiritaquisti jiwañaquiwa utji.
7. Jucharar jakerojj jupa pachpan jan wali luratapawa tucjani, cheka cancañana jan sarnakañ munirïtap laycu.
8. Jucharar jaken sarnakäwipajj k'ewinucuta jan waliwa, ucampis cheka lurir jaken luratanacapajj k'omawa.

Hechos 19:21-41
21. Ucanac khepatsti Pablojj Macedonia, Acaya tokenaca uñjt'aniñwa amtäna, ucatsti Jerusalenar sarjjañataquiraquiw jupajj säna: “Jerusalenar sarjjatatsti, Roma marcar sarañajjaraquiwa” sasa.
22. Jupasti pani yanapt'irinacaparuw nayrakat Macedonia marcarojj qhitäna, ucanacasti Timoteompi, Erastompïnwa. Pablosti mä kawkha urunacampiw Asian kheparäna.
23. Ucürunacansti mä ch'ajjwaw utjäna, Tatitun thaquipjjata.
24. Mä chachaw utjäna, Demetrio sutini. Jupasti kollketa jisc'a templonac lurirïna, Diana diosan templopar uñtata. Uqham lurasinsti jupamp chic irnakerinacarojj wal kollkenchäna. Uca Demetriopï uca ch'ajjwanac utjañapataquejj juchanïnjja.
25. Jupasti take jupamp chic irnakerinacaruw jawsthapiyi, uqhamarac yakha jupanacjam luririnacamp cuna. Jupanacarusti saraquïnwa: —Tatanaca, jiwasajj aca luratasampejjay sum jacasipjjstanjja.
26. Jichhasti jumanacajj uñjapjjtawa, ist'apjjaractawa cunjämtï aca Pablo jakejj sarnakasqui: ‘Jaken lurat diosanacajj janiw cheka Diosäquiti’ sasa ucjja. Uqham sasaw jupajj walja jakenacarojj mayjt'ayäna, uca pachpa Éfeso marcansa, uqhamarac niya takpach Asia tokenquirinacarusa.
27. Ucasti janiw walïquiti. Uqhamatjja aljasiñanacasaw aynacht'aspa. Uca pachparaquiw Diana diosan jach'a cancañapajj jan yäkatäjjaraquispati. Jichhacamajj juparojj take Asianquirinacasa uqhamarac orakpachansa yupaychasipquiwa —sasa.
28. Uc ist'asinsti jakenacajj wal colerasipjjäna. Ucatsti jach'atwa art'apjjäna. “¡Jacpan Diana, Efesonquirinacan diosapajj jach'awa sasa!.”
29. Uqhamatwa marcpachan mayjt'asiñajj utjäna. Ucatsti Gayompiru, Aristarcompiruw catuntapjjäna. Ucanacajj Macedonianquir chachanacänwa. Jupanacasti Pablomp chicaw jutapjjaraquïna. Jakenacasti jupanacar catuntasinjja katatipjjewa marcan tantachasïwi utapcama.
30. Pablosti uc yatisinjja, marcanquir jakenacamp parliriw utarojj mantañ munaraquïna, ucampis iyawsirinacajj juparojj jan mantañapataquiw jarc'apjjäna.
31. Uqhamaraquiw Asianquir yakhep autoridadanacajj juparojj ewjjt'awayapjje: “Janiw waquisquiti uca tantachasïwir sarañamajja” sasa. Uca autoridadanacajj Pablon amigonacapänwa.
32. Ucchañcamasti uca tantachasïwinjja jakenacajj wal ch'ajjwapjjäna. Mayninacajj mayjwa arsupjjäna, yakhanacasti yakharac arsupjjaraquïna. Jil pach jakesti janiw cunatac aywthapitapsa yatipcaraquïnti.
33. Judionacajj Alejandro sutin chacharuw nayräjjar nucsupjje. Jupasti ampar aytasaw jakenacar amuct'ayañ munäna, jupanacar arjjatañataqui takenin nayrakatapana.
34. Jakenacasti jupan judiötap yatisinjja, juc'ampiw arnakapjjäna: “¡Jacpan Diana, Efesonquirinacan diosapa!” sasajj niya pä horjamaw arnakasipjjäna.
35. Ucatsti Éfeso marcan secretariopajj jakenacaru amuct'ayasinjja sänwa: “Efesonquir tatanaca, take jakew yatipjje Éfeso marcajj Diana diosan templop uñjirïtapjja. Acaruraquipï mä jupar uñtatajj alajjpachat jalaktanejja.
36. Takeniw ac yatipjjejja. Uqhamasti jan juc'amp colerasipjjamti. Janirac cuns lurapjjamti, jan sum yatjjatcasinjja.
37. Irpanipctas uca jakenacasti janiw qhitirus cuna ñankhsa lurapquiti. Janiraquiw jumanacan Diana diosamatsa jan wal parlapcaraquiti.
38. Ucampis Demetrion cuna quejapas utjchejja, uqhamarac qhitinacatejj jupamp chic irnakapquis ucanacansa, uca queja uñjañataquejj juesanacaw utji. Uca autoridadanacaruw jupanacajj quejasipjjañapa, uqhamat sapa maynis arsusipjjañapataqui.
39. Jumanacan amtäwinacamatejj yakhäscchejja, yakha suma tantachäwinwa ucajj suma amuyt'atäñapajja.
40. Jichhajj niyaquitejj aqham ch'ajjwancstanjja, janiw walt'csnati. Juchañchistaspaw jilïrinac contras sayt'csnas uqhama. Jupanacatejj jisct'istaspa ucapachajja, janiw cun saña puedcsnati” sasa.
41. Take acanac arsutatsti, jupajj uca tantachäwjja tuct'ayjjänwa.