A A A A A
Bible in one year
July 12

2 Crónicas 19:1-11
1. Judá marcanquir Josafat reyejja c'umara, sumaquiwa Jerusalén marcan palacioparu cutt'anjjäna.
2. Ucampis Hanani chachan Jehú yokapaw jupar jicjjatiri saräna, aqham sasaw jisct'araquïna: —¿Cunatsa ankha jakeru yanapta, uqhamarac Tatitun uñisirinacapampisa sumancaractajja? Uca laycuwa Tatitojj jumampejja colerasejja.
3. Ucampis yakha suma luratanacamawa jumanjja utji, jumasti Asera diosan lantinacapajj aca orakena utjcäna ucanacaruwa tucjtajja, uqhamarac Tatitur thaktañarusa uchasiractawa —sasa.
4. Josafat reyisti Jerusalén marcanwa jacäna, ucatsti jupajj marcaparojj sarapunïnwa uñjt'iri Beersebat kalltasina, Efraín kollucama, jakenacaru nayra awquinacapan Tatit Diosapar cutt'ayaniñataqui.
5. Ucjjarusti juezanacwa utt'ayäna Judá orakena nuwasiatac waquichata take marcanacana.
6. Ucatsti juezanacarojj sänwa: “Cuntï lurapcäta ucanacjja sumwa amuyasipjjäta, janiw jakenacan sutiparu chekar ujapjjätati, jan ucasti Tatitun sutiparuwa chekapar uñjapjjäta, juparaquiw jumanacampïscani cunapachatï pantasipjjäta ucqhasa.
7. Uqhamasti Tatiturojj ajjsarapjjam, uqhamarac suma amuyasipjjaraquim cuntï lurapcäta ucanacanjja, jiwasan Tatit Diosasasti janiw alekaqui uñjcaniti jan chekapar luratjja, mä kawkhaniruqui uñjatarusa, ni kollke chilltañanacsa” sasa.
8. Uqhamaraquiw Josafat reyejj Jerusalén marcana utt'ayäna levitanaca, sacerdotenaca, uqhamarac Israelana familianacapat jilïrinacaparusa, juezata sirvipjjañapataqui Diosar arcañana, uqhamarac Jerusalenanquiri jakenacan ch'ajjwatanacapa uñjañataquisa.
9. Jupanacarusti aca ewjjanacwa churäna: “Jumanacasti Tatitur ajjsarasawa lurañanacamjja lurapjjäta, suma phokhasina, chekaparu lurasinaraqui.
10. Marca masinacamajja cawquïr marcanacatsa mä ch'ajjwa apanipjjani jumanacana chekapar uñjapjjañamataqui, mä jiwayatajj juchati janicha; uqhamata leyinacarjama, arsutanacarjama, cheka sarayañanacaru, ewjja arunacaru uñjatäñapataqui. Ewjjapjjam jan Tatitun nayrakatapana jucha lurapjjañapataqui, uqhamata Tatitojj jan jumanacataqui colerasiñapataqui, uqhamarac jupanacataquesa. Jumanacasti acanac phokhapjjam, ucatsti juchajj janiw jumanacanccaniti.
11. Amarías jach'a jilïri sacerdotewa jumanacar ujapjjätam Diosan arunacap toketjja, ucatsti marca toketa uñjerejja Ismael chachan Zebadías yokaparaquïniwa, jupajj Judá tribunjja jilïriwa; ucatjja levitanacajja jumanacan yanapirinacamäpjjaniwa. ¡Uqhamasti ch'amachasipjjam, ucatsti phokhapjjaraquim! ¡Tatitojj qhititejj asqui lurcani ucampïpan!” sasa.

2 Crónicas 20:1-37
1. Ucat kheparusti moabitanacasa, amonitanacasa, meunitanacampi mayacht'asisinwa Josafat reyir nuwiri jutapjjäna.
2. Ucatsti mayninacawa Josafat reyir yatiyiri sarapjjäna: “¡Edom Mar Muerto sat kotäqui uca qhursa toketwa mä jach'a ejercitojj jumampi nuwasir juti! ¡Jupanacasti Hazezón-tamar ucancjjapjjewa!” sasa. (Hazezón-tamar ucasti En-gadi sañaracwa munaraqui).
3. Josafat reyisti walwa ajjsarayasïna, ucatsti Tatitur maqhatjjawa amtasïna. Ucatjja ayunañataquiw take Judá orakpacharu yatiyäna,
4. Judá orakenquir jakenacajja Tatitur yanapa mayiñataquiw tantachasïna. Judá orakena take marcanacapatwa jakenacajj purinipjjäna.
5. Josafat reyisti Judá chekanquiri jakenacajj Jerusalenana tantachasipcäna uca taypiruwa sayt'asïna, Tatitun templopa machaka uta ankäjja nayrakatana,
6. Ucatsti art'änwa: “Nayra awquinacajjan Tatit Diosapa, ¡jumätawa alajjpachanquiri Diosajja, jumaraquiw take marcanacarus apnakasctajja! ¡Juman amparamanquiwa ch'amasa, munañanïñasa, janiw qhitis jumataquejj sayt'asiñapäquiti!
7. Nanacan Diosajja, jumawa Israel marcana nayrakatapata jakonuctajja aca oraken jaquir jakenacarojja, ucatsti juman munata Abrahaman wawanacaparuw wiñayataqui churtajja.
8. Ucana suma utt'asjjasinjja, mä templo lurayäna jumataqui, aqham sasa:
9. ‘Jiwasarutejj cuna jan walisa mä mutuyäwisa jutani mä guerrasa, ususa, mank'at t'akhesiñasa ucqhajja, aca templo nayrakatanwa tantachasipjjäjja, jumajj aca temploncatam laycu, nanacasti t'akhesitanacajjanwa yanapa mayipjjäma, jumasti ist'apjjetätawa, ucatsti khespiyapjjaraquitätawa’ sasa.
10. Jichhasti acajjaya amonitanacasa, moabitanacasa, uqhamarac Seir kollunquirinacasa, cunapachatï Egiptot israelitanacajj jutasipcäna ucqhajja janiw jumajj muncäyätati uca orakenacaru mantañanacapjja, jan ucasti jupanacatjja saraktapjjänwa, ucatsti janiw tucjapcänti.
11. Jichhasti ucata ñankha cutiyañataquiwa nuwir jutapjje orakemata apanucuñataqui, aca oraksti jumaw churapjjestajja nanacan catusianacajjataqui.
12. Nanacan Diosajja, ¿janit jumajj jupanacar mutuycätajja? Nanacansti janiw ch'amanacajjajja utjapquituti uca jach'a ejercitojj nuwir jutapquitu ucampi nuwasiñataquejja. ¡Nanacasti janiw cun lurañataquis ch'amanïpcti, ucatwa jumaruqui utanipjjsmajja! ” sasa.
13. Judá orakenquir take jakenacawa Tatitun nayrakatapancapjjäna, uqhamarac warminacapasa, wawanacapasa, jisc'a wawanacapasa.
14. Uqhama take jakenacajj tantachatäsipcäna ucqhajja, Zacariasana Jahaziel yokapa qhititï Benaía chachan allchhipäcäna, jupasti Jeiel chachan yokaparaquïnwa, uqhamarac Matanías chachan allchhiparaqui, qhititï Asaf chachan saraker wawanacapat levitäcäna ucajja, Tatitun ajayupanïnwa.
15. Jupasti sänwa: “Judá, uqhamaraqui Jerusalén marcan jaquir jakenaca, uqhamarac juma Josafat reyisa, Tatitusti aqham sapjjtamwa: ‘Jan ajjsarapjjamti, janiraqui uca jach'a ejército uñjasinsa sustjasipjjamti, aca nuwasiñajja janiw jumanacancquiti, jan ucasti Diosanquiwa.
16. Jumanacasti arumanthiwa alwat nuwantir sarapjjäta. Jupanacasti Sis sat uca amstwa maqhatasinipqui, ucatsti jumanacajj jicjjatapjjätawa Jeruel wasara ucatasi jawira tucuyana.
17. Janiw jumanacati nuwasipcätajja, ucampis jumanacajj sum waquichasipjjam, alekt'apjjaquiraquim, ucatsti uñjapjjätawa cunjämtï Tatitojj jumanacar khespiyapcätam uca. ¡Jerusalenanquiri, Judá orakenquir jakenaca, jan ajjsarapjjamti, janirac sustjasipjjamsa; arumanthi alwasti jupanacamp nuwasir sarapjjam, Tatitusti jumanacampïsquiwa!’ ” sasa.
18. Ucatsti Josafat reyejj quillt'asisinwa p'eke parapampi oraker puriñcama alt'asïna, uqhamaraquiw Judá orakenquiri, Jerusalén marcanquiri jakenacasa quillt'asipjjaraquïna Tatitun nayrakatapana yupaychañataqui.
19. Ucatsti Coat chachat saraker wawanacapat levitanacasti, uqhamarac Coré chachat saraker wawanacapasa Israelan Tatit Diosaparu jach'at k'ochuñ kalltapjjäna.
20. Khepärmanthisti wali alwatwa sartasipjjäna Tecoa wasara tokeru sarañataqui. Mistuña horasansti Josafat reyejj sayt'asisinwa säna: “Ist'apjjeta Jerusalenanquiri, uqhamarac Judá orakenquir jakenaca: Tatit Diosamaru iyawsapjjam, ucatsti janiw ajjsarapcätati; jaysapjjam profetanacaparu, ucatsti take cunasa jumanacataquejj waliquïscaniwa” sasa.
21. Marcaru jisct'asinsti, yakhep k'ochurinacwa utt'ayäna kollana isinacampi isthapita, uqhamarac soldadonacapan nayrakatap sarasinaraqui Tatiturojj k'ochunac k'ochupjjäna: “Tatiturojj yuspagarapjjam, munasiñapasti wiñayataquiwa” sasa.
22. Ucatsti cunapachatï wali cusisita k'ochunaca k'ochuña kalltapjjäna ucqhajja, Tatitojj jan walt'ayawa kalltäna amonitanaca moabitanaca, uqhamarac Seir sat kolluta jutirinaca taypina, qhitinacatejj Judá marcar nuwir jutapcäna ucanacana. Jupanacasti atipjatäpjjänwa.
23. Moabitanacampi amonitanacampejja nuwapjjänwa Seir kollut jutirinacaru, ucatsti takwa tucjapjjäna, ucatjja jupanacar tucjasinjja jupanaccamaraquiwa tucjasipjjaraquïna.
24. Cunapachatï Judá marcanquiri jakenacajj cawcqhattï wasarajj utascäna ucqhar purinisajja, uisirinacapan ejercitopa uñtasinjja, jiwatanacaqui oraker liwirtatcamacwa uñjapjjäna; ¡janiw maynis khespcataynati!
25. Ucatsti Josafat reyimpi jakenacapampejja jalapjjänwa cunanactejj uisirinacapajj jaytawayapcäna ucanaca aptasiri, ucatjja jupanacajj jicjjatapjjänwa walja uywanaca, armanaca, isinaca, uqhamarac wali jila alani yänacaraqui, take ucanacwa catuntasipjjäna. Walja yänacawa utjäna, janiw jupanacajj apthapiñataqui ch'amanïpcänti. Waljätap laycusti quimsa uruwa uca yänaca apthapipjjäna.
26. Pusïri urunsti Beraca sat vallena tantachasisinwa Tatitur bendicipjjäna. Ucatwa uca chekajj Beraca valle sat sutichatäna, uca sutimpïsquiwa jichhürcama.
27. Ucatsti Judá, uqhamarac Jerusalenanquir take jakenacawa Josafat reyin khepapa wali cusisita Jerusalén marcar cutt'anjjapjjäna, Tatituw jupanacarojj cusisiña churäna uñisirinacapata khespiyasina.
28. Cunapachatï Jerusalenaru puripjjäna ucqhasti, Tatitun temploparuwa sarapjjäna salterionacampi, cítara, uqhamarac trompetanacan tocañanacapampi.
29. Tatitojj Israelan uisirinacapampi nuwasitap yatisinjja, take marcanacawa Diosaru ajjsarapjjäna.
30. Uqhamawa Josafatan reinopajja sumaqui sarantäna, Diosaw jupar samara churäna marca jac'anacapampi.
31. Josafat reyejj uqhamawa Judá marcjja apnakäna. Jupasti cunapachatï quimsa tunca pheskani maranïna ucqhawa apnakaña kalltäna, ucatsti pä tunca pheiskcani marawa Jerusalenana apnakäna. Taycapasti Azuba sat sutinïnwa, jupasti Silhi sat chachan phuchapänwa.
32. Josafat reyisti Asa awquipjamawa cheka cancañampi sarnakäna. Jupan luratanacapasti chekapänwa Tatitun nayrakatapana.
33. Ucampis yakha diosanacan santuarionacapajja janïrawa aparpayatäcänti, marcasti janiw suma thurt'atäcänti nayra awquinacapan Diosapar arcañataquejja.
34. Ucat ucjjar sarnakäwipasti kalltata tucuycamajja kellkatawa Hanani chachan Jehú yokapana crónicas sat libropana, uqhamaraquiw kellkt'ataraqui Israelan reyinacapan libropansa.
35. Khepjjarusti Judá orakenquir Josafat reyejj Israelanquir Ocozías reyimpiwa mayachasïna, jupasti ñankha lurir chachänwa.
36. Josafat reyisti jupar jakcattasawa barconaca lurañaru uchasïna, Tarsis marcar sarañataqui, ucatsti Ezión-geber chekanwa lurapjjäna.
37. Ucatsti Dodava sat chachan Maresa chekanquiri Eliezer yokapaw aca arunaca jutir urunacata Josafat reyitaqui parläna: “Tatitusti jisc'a jisc'wa tucjani cuntï jumajj lurctajja ucanaca, Ocoziasampi mayachasitam laycu” sasa. Chekpachansa barconacajja jisc'a jisc'awa tucusïna, ucatsti janiw Tarsis marcarojj sarcjjapjjänti.

Salmos 82:1-8
1. Diosajj alajjpach tantachasïwin sayt'asïna, angelanacan muyuntataw taripirinacarojj taripäna:
2. “¿Cunapachcamarac jan wal taripapjjätasti? ¿Cunapachcamarac ñankha lurir jakenacar arjjatapjjätasti?
3. Jan yäkat jakeru, wajchar yanapt'apjjam, jan cunan jakeru, pist'ayasir jaker chekapar uñjapjjam,
4. jan yäkat jakeru, jan cunan jakenacar arjjatapjjam, ñankha lurir jakenacat tuwakapjjam.
5. “Jumanacasti janiw yatipctati, janiraquiw amuyt'apctasa, ch'amacan sarnakapjjtajja. Aca oraken utt'äwipasti qhathatisquiwa.
6. Nayajj khanañchapjjsmawa: Jumanacajj diosäsipcamsa, takpachanis Alajjpachanquirin wawapäsipcam,
7. take jakjamaw quipcac jiwapjjäta, munañan cancañamp apnaker jilïrinacjamaw aynacht'apjjaraquïta” sasa.
8. Diosay, sartasiquimaya, orakerojj taripamaya, jumanquiw takpach marcanacajja.

Proverbios 20:29-30
29. Jach'a jach'a tucuñasti waynanacanjja ch'amanacapanquiwa; chuyman awquinacanjja jank'o ñic'utanacapawa mä jach'añchäwejja.
30. Jaken ñankhanac luratapatjja, jawk'jjañampi usuchnokañampiw kolli; uca jawk'jatanacawa chuymapjja waliptayi.

Hechos 17:1-15
1. Pablomp Silasampisti Anfípolis, uqhamarac Apolonia sat marcanac pasasinjja, Tesalonicaruw puripjjäna. Ucansti judionacan mä sinagogapaw utjäna.
2. Pablosti luräwiparjamajj uca sinagogaruw saräna. Ucansti quimsa semanaw jupanacampejj sapa samarañ urun parläna.
3. Kellkatanacarjamaw Pablojj jupanacar khanañchäna: “Cristojj t'akhesiñapapunïnwa, ucatsti waquisiraquïnwa jiwatata jactañapajja. Qhitittï nayajj jumanacar parlapcsma uca Jesusapï Diosan qhitanit Cristojja” sasa.
4. Uca arunac ist'asinsti, yakhep judionacajj iyawsapjjänwa. Ucatwa Pablompir Silasampir jakcattapjje. Diosar yupaychir griego jakenacasti waljaniraquiw iyawsapjjäna, uqhamarac wali aytat warminacatsa.
5. Ucampis jan iyawsir judionacajj colerasisina callenquir khoru jayra jakenacwa irpthapipjjäna. Ucanac anthapisinsti marca jakenacaruw amtayapjjäna, ucat pejjtunacajj sarti. Jasonan utapar chhuct'asinsti, Pablompir Silasampiruw thaktapjjäna, ucat waysusin jakenacar catuyañataqui.
6. Uca utan jan jicjjatasinsti, Jasonaruquiw catuntasin katatjjapjjäna, mä kawkha jilatanacampir cuna, marca jilïrinac nayrakataru. Ucatsti jach'at irsupjjäna. “¡Aca jakenacajj take chekanwa jakenacar pejjtupjje. Jichhasti acaruraquiw jutapjje.
7. Ucanacarusti Jasonaw utapar catoke. Jupanacasti Romanquir jach'a reyin leyinacap contraw sayt'apjje: ‘Yakha reyiw utji, Jesús sata!’ sasa.
8. Ucanac ist'asinsti, jakenacampi marca jilïrinacampejj wal ojjtapjjäna.
9. Ucampis Jasonampi, maynïr jilatanacampejj, jilïrinacarojj kollke churapjjäna, ucatwa jupanacar antutapjjäna.
10. Uca arumpachaw jilatanacajj Pablompir Silasampirojj Berea marcar qhitjjapjje. Uca marcar puris ucspachaw jupanacajj judionacan sinagogapar sarapjjäna.
11. Uca marcanquir judionacasti juc'amp suma chuymanïpjjänwa, Tesalonicanquir judionacat sipansa. Jupanacasti take chuymaw Pablompir Silasampirojj isch'uquipjjäna. Sapüruraquiw Kellkatanacsa yatjjatapjjäna —Uca arunacajj ¿chekapunïpachati janicha? —sasa.
12. Ucatsti waljaniw jupanacatjj iyawsapjjäna, uqhamaraquiw walja griego chachanacasa, wali aytat griego warminacasa.
13. Ucampis Tesalonicanquir judionacajja, Pablon Berean Tatitun arunacap parlataparaquiqui yatisinjja, ucarojj sarapjjaraquiquïnwa. Ucatsti jakenacarojj ucanjj uqhamaraquiw ojjtayapjjäna.
14. Ucat ucspachaw jilatanacajj Pablorojj jach'a kota thiyar qhitapjjäna. Ucampis Silasamp Timoteompiquiw pachpa Berean kheparjjapjjäna.
15. Pablor irpapcän ucanacasti, Atenas marcacamaw juparojj irpjjapjjäna. Uca irpirinacasti cuttanjjasinjja ewjja arunacwa apanïna Silasamp Timoteompejj janc'aqui Pablon ucar sarjjapjjañapataqui.