A A A A A
Bible in one year
June 17

2 Reyes 22:1-20
1. Cunapachatï Josías wawajj quimsakallko maranïna ucqhawa reyïña kalltäna, ucatsti Jerusalén marcanjja quimsa tunca mayan maraw apnakäna. Taycapasti Jedida sat sutinïnwa, jupasti Boscat chekanquir Adaía chachan phuchapänwa.
2. Josías reyin luratanacapasti Tatitun nayrakatapanjja chekapänwa; jupasti arcänwa cunjämtï David nayra awquipajj sarnakcäna uqhamaru, jan ucat cawcsar sarakasa.
3. Cunapachatï Josías reyejj tunca quimsakallkon mara apnakascäna ucqhawa reyejj qhitäna Tatitun temploparu Azalía chachan Safán yokap kellkeriparu, jupasti Mesulam chachan allchhiparaquïnwa. Reyisti sänwa:
4. “Saram Hilcías sumo sacerdoten ucaru, ucatsti sanim: “Tatitun temploparu kollkenac apanipqui ucanac apthappan, uqhamarac puncu uñjirinacasa jakenacata kollke apthapipqui ucanacsa” sasa.
5. Ucatsti churapjjpan Tatitun templopa lurañataqui jaytatäpqui ucanacaru, jupanacan pagapjjañapataqui qhitinacatejj Tatitun templopana asquichasipqui ucanacaru:
6. carpinteronacaru, sum yatipqui ucanacaru, albañilanacaru, uqhamarac alapjjañapataqui maderanaca, ch'iyat kalanaca templo asquichañataqui.
7. Ucatsti saraquim: “Kollke churcäta ucatsti janiw jacthapiñatac maycätati, jupanacajj chekaparuwa apnakapjje uca laycu” sasa.
8. Hilcías sumo sacerdotejja yatiyänwa Safán sat kellkeriru, Tatitun templopana leyi libronaca jicjjatatapata. Ucsti churänwa Safán chacharu, jupasti leet'araquïnwa.
9. Ucat Safán kellkerejj ucjjata yatiyiriw saräna, aqham sasa: —Juma reyin sirvirinacamawa templona utjcäna uca kollke umatatayapjje, ucatsti churapjjewa Tatitun templopa asquichayañataqui qhitinacatejj utt'ayatäqui ucanacaru —sasa.
10. Ucjjarusti Safán kellkerejj reyirojj yatiyaraquïnwa, Hilcías sacerdotejj mä libro jupar churatapata, ucatsti Safán sat kellkerejj reyitaquejj leet'arapïnwa.
11. Ucat reyejj ley librojj cuntï siscäna ucanac ist'asinjja, isipwa ch'iyanokasïna.
12. Ucat ucspachawa reyejj säna Hilcías sacerdoteru, Safán chachan Ahicam yokaparu, Micaías chachan Acbor yokaparu, Safán kellkeriru, reyin Asaías sat oficialaparu, aqham sasa:
13. “Sarapjjam naya laycu Tatitur jisct'iri, uqhamarac take Judá orakenquir jakenac laycuraqui, aca jicjjatata libron cuntï sisqui ucjjata; Tatitusti wali coleratäpachawa jiwasanacataqui. Nayra awquinacasajja janiw aca librojj cuntï sisqui ucarojj ist'apcänti, ni lurapcaraquïnsa cuntejj aca libron kellkatäqui ucarjamajja.”
14. Ucatsti sarapjjänwa Hilcías, Ahicam, Acbor, Safán, Asaías ucanacajja, Salum chachan profetisa Hulda warmipan ucaru; Salum chachasti Ticva chachan yokapänwa, uqhamarac Harhas chachan allchhiparaquïnwa, qhititï templo isinac uñjañapataqui utt'ayatäcäna uca. Hulda profetisasti Jerusalén marcana machak marcäquis ucanwa jacäna, cunapachatï jupar parlapjjäna ucqhajja,
15. profetisa warmejj jupanacarojj sänwa: “Acawa Israelan Tatit Diosapan arupajja: ‘Yatiyapjjam qhititejj nayar jisct'iri qhitanipctam ucaru.
16. Naya Tatitusa sistwa: ‘Mä jan walt'añwa aca chekarusa, jakenacapjjarusa apayanëjja, cunjämtï Judá marcanquir reyejj leet'qui uca libron cuntï yatiyqui uqhamaru.
17. Jupanacasti nayar apanucusinjja yakha diosanacaruwa inciensonaca naqhayapjje, uqhamatwa take luratanacapampi nayar colerayapjjetu; ucatwa nayan colerajjajj akti aca chekataqui, ucasti janiw t'acurcaniti’ ”.
18. Judänquir reyirojj sapjjamaya, qhititejj qhitanipctam Tatitur jisct'añataqui: “Ucatsti Israelan Tatit Diosapajj ucjjarojj saraquiwa: ‘Cuntï ist'ta ucar amuyt'añaru uchasitamatsti,
19. chuymaman llaquisitamata, nayarusa jutatamata arsutanacajja ist'asina aca orake contra, uqhamarac take utjirinacap contraraqui, tucjatäñapataqui, maldicitäñaparaqui. Ucatsti isima ch'iyanokasitamata, uqhamarac nayan nayrakatajjana jachatamatsa, nayajj jumarojj ist'smawa. Naya Tatituwa ucjja sisma.
20. Uca laycu nayajj cusisitaqui jiwjjañamwa waquiyta, nayra awquinacamampi jiquisiñataqui, janiw uñjcätati cuna jan walt'añtï nayajj aca chekataqui apayancä ucjja’ ” sasa. Reyin qhitatanacapasti cuttjjapjjänwa reyiru uca arunaca yatiyiri.

2 Reyes 23:1-37
1. Ucatsti reyejj jawsayanïnwa Judá orakenquiri, Jerusalén marcanquiri jilïr jakenacaru, jupamp chica tantachasipjjañapataqui.
2. Ucjjarusti Tatitun temploparuwa sarapjjäna reyisa, Judá orakenquiri take jakenacasa, uqhamarac Jerusalenanquir jakenacasa, sacerdotenacasa, profetanacasa, uqhamarac wawanacasa, jach'a jakenacasa, take marcpachaw sarapjjäna. Tatitun templopansti jach'atwa reyejj jupanacatac leet'arapïna cuntï sumancäwir mantat librojj siscäna uca cawquïr librotï Tatitun templopana jicjjatatäcäna ucata.
3. Ucjjarusti reyejj templon sayirinacap jac'aruwa sayt'asïna, ucatsti arsusïnwa Tatitun nayrakatapana jupar ist'añataqui, cheka cancañampi camachi arunacaparu, ewjjanacaparu, uqhamarac leyinacaparusa suma phokhas lurañataquiw arsüna, uqhamarac libron sumancäwir mantat arunacajj kellkatäqui ucanac phokhañataquisa. Ucjjarusti take jakenacaraquiwa phokhañataqui arsusipjjaraquïna.
4. Ucatsti reyejj Hilcías sumo sacerdoterusa, payïri sacerdoterusa, uqhamarac puncu uñjirinacarusa aqham sänwa: “Tatitun templopatjja apsunipjjam Baal diosan, Asera diosan take yänacapa, uqhamarac alajjpachanquir warawaranacan yänacapsa” sasa. Ucatjja ucanacjja ninampiwa naqhantayäna Jerusalén marca ankäjjana Cedrón chekana, ucatsti Betel chekaruw khellanacapjja apjjäna.
5. Ucatjja apakayänwa Judá oraken reyinacajj cawquïri sacerdotenacarutejj utt'ayapcäna yakha diosanacaru alto chekan santuarionacapan inciensonaca naqhayañapataqui Judá oraken marcanacapana, uqhamarac Jerusalén muytpachansa. Uqhamaraquiw apakaraquïna cawquïr sacerdotenacatejj incienso naqhayapqui Baal diosaru, intiru, phajjsiru, yakha planetanacaru, uqhamarac alajjpachanquir take warawaranacarusa.
6. Tatitun templopanccäna uca Asera diosjja Jerusalenata ankäjjaruw apanucüna. Ninampiwa naqhantayäna khellar tucuyañcama Cedrón sat jawira umakatana, ucatjja uca khelljja willtänwa jakenacan amaya imäwipjjaru.
7. Uqhamaraquiw tucjayaraquïna chachapura juch lurañataqui waquichatäcäna uca utanacsa, ucasti lurasïnwa Tatitun templopana yakha diosar yupaychasina, ucanracwa warminacajja isinaca p'itapjjäna Asera sat diosapataqui.
8. Ucatjja Judá marcanacanquiri take sacerdotenacaruwa jawsayäna, ucatsti uca diosanacan take santuario utanacapjja taquichasipjjänwa, Geba chekata Beerseba chekcama, cawqhantejj uca sacerdotenacajj incienso naqhayapcäna ucqhana, ucatjja supayanacan altaranacapjja tucjänwa, marca apnaker Josué gobernadoran puncupanccäna uca, ucasti marca mantañancänwa ch'eka tokena.
9. Ucampis yakha diosanacan santuario utapanquiri sacerdotenacajja janiw sarapcänti Jerusalenanquir Tatitun altaraparojja, jan ucasti mayni sacerdote masinacapampejja jan levaduran t'ant'anacwa mank'apjjäna.
10. Josías reyisti taquichasiraquïnwa Ben-Hinom sat vallenquiri naqhayañäqui uca, jan qhitis yokalla imilla wawaparusa Moloc diosataqui sacrificion loktapjjañapataqui.
11. Ucatjja apakayaraquïnwa Judänquiri reyinacajj intiru loktapcäna uca caballonaca; ucanacasti jicjjatasïnwa Tatitun temploparu mantañawjana, Natán-melec uca chachan utap jac'ancaraquïnwa. Jupasti cunanacatejj ucan utjcäna ucanac uñjirïnwa, ucatjja intir yupaychañ carronacapsa naqhantayaraquïnwa.
12. Ucjjarusti tucjaraquïnwa Judänquir reyinacajj Acaz chachan salapana alto chekaru altaranaca lurayapcäna ucanaca, uqhamarac tucjaraquïna Manasés chachajj altaranac luraycäna Tatitun templo patiopana, ucanaca; tucjasinjja t'unanacapjja Cedrón sat jawira umakataruwa willtanïna.
13. Reyisti taquichasiraquïnwa diosanacan alto chekan santuario utanacapajj Jerusalén marcata inti jalsu tokena utjcäna ucanaca, Olivos kolluta aynachana. Ucansti Israelan Salomón reyipaw lurayäna sidonionacan Astarté sat ajjtcañ diosapataqui; moabitanacan uñiscaña Quemos sat yakha diosapataqui; amonitanacan uñiscaña Milcom sat yakha diosapataqui.
14. Ajjsarata kalanaca, lawanacsa jisc'a jisc'wa tucjaraquïna, ucatsti ucanacajj cawqhancapcäntejj ucqhanacarojja jake ch'aqhanacampiwa phokhantäna.
15. Nabat chachan Jeroboam yokapajj israelitanacar juch luraycäna ucasti Betel chekana mä altara, yakha diosanacan santuario utap luraycäna ucjja, Josías reyiw k'al tucjäna lak'ar tucuyañcama, ucatsti ninampiwa naqhantayäna, uqhamarac Asera diosan lantiparusa.
16. Cunapachatï Josías reyejj cutt'anjjäna ucqhajja, uñjänwa pachpa kollu patan sepulcronaca, uca sepulcronacatjj apsuyänwa ch'aqhanaca, ucatjja altaranwa naqhantayäna taquichasiña amuyumpi. Uqhamawa Tatitun arupajj phokhasïna, cuntejj profetajj uca toketa arscäna ucajja.
17. Ucatjja jisct'änwa: —¿Qhitir amtañatac lurayatas qhaya sayqui ucajja? —sasa. Marcanquir jakenacasti ucjjarojj sapjjänwa: —Cawquïr profetatejj Judá marcat jutcäna ucan sepulcropawa; jupawa yatiyäna, cuntejj juma reyejj Betelanquir altarampejj lurcta ucatjja —sasa.
18. Ucatsti Josías reyejj sänwa: —Jaytapjjam uqhamäsquiri. Jan qhitis ch'aqhanacapa llawk'panti —sasa. Uqhamawa ch'aqhanacapajj jan camachatäcänsa, Samariata jutcäna uca profetan ch'aqhanacapajja.
19. Samariana yakha diosanacan santuario utanacapajj utjcäna, cawquïrinactejj Israelan reyinacapajj Tatitur colerayañatac lurapcäna ucanacjja, Josías reyejj k'alwa tucjäna, cunjämtï Betel marcan lurcäna uqhama.
20. Ucatjja uca diosanacan santuario utanacapan sacerdotenacajj utjcäna ucanacarusti altar patjjanwa jiwarayäna; ucatjja uca patjjarojja take ch'aqhanacwa naqhantayäna. Ucatsti Jerusalén marcaruw cutt'anjjäna.
21. Reyisti take marcaruwa yatiyäna Pascua fiesta lurapjjañapataqui Tatit Diosapar jach'achañataqui, cunjämatï sumar mantäwi libron kellkatänacäna uqhamaru.
22. Pascua fiesta lurapcäna uqhamjja janipuniwa cunapachasa uqham lurapjjerïcänti, jilïr chachanacajj Israel marcaru apnakapcäna uca urunacatjja, ni Israelan, ni Judá oraken take reyinacapan apnakäwipanjja.
23. Cunapachatï Josías reyejj tunca quimsakallkoni mara apnakascäna ucqhawa Jerusalén marcana uca Pascua fiestajja lurasïna, Tatitur jach'achasina.
24. Josías reyejj tucjaraquïnwa take laykanacaru, yatirinacaru, utan wali munat c'ari diosanacaru, yakha diosanacarusa, uqhamarac cunanacatejj utjcäna yupaychañataqui ajjtcaya yänaca, Judá orakena uqhamaraqui Jerusalenansa. Ucsti jupajj luränwa Hilcías sacerdotejj Tatitun templopana jicjjatcäna uca ley libron kellkatanacar phokhasina.
25. Janipuniw qhiti reyisa jupat nayrajja, khepatsa jupjama utjcänti, take chuymampi, take almampi, take ch'amampiraqui Tatitun cuttanirejja, cunjämatï Moisesan leyipajj sisqui uqhamaru.
26. Ucampis Tatitojj Judá orakenquirinacataquejj colerataquïscänwa, Manasés reyejj cuna ñankhanactejj Dios nayrakatapana lurcäna ucanacata.
27. Ucatwa Tatitojj yatiyäna jupan nayrakatapata apakaña Judá marcaru, cunjämtï Israel marcaru apakcatayna uqhama, apanucuñwa munäna ajllisit Jerusalén marcapa, uqhamarac cawquïr templontï sutipa ucancañapa muncäna ucsa.
28. Ucat ucjjar Josías reyin sarnakäwipasa, uqhamarac take cun luratanacapasa kellkatawa Judá ucanquir reyinacan crónicas sat libropana.
29. Jupan urunacapansti Egiptonquir faraón Necao sat reyejja, Eufrates sat jawiraruwa saräna Asiria marcanquir reyiru yanapañataqui. Josías reyisti jupar jicjjatiriw mistüna, ucampis Meguido sat chekanwa Necao sat faraonajj jupar uñjasinjja jiwayäna.
30. Ucatsti oficialanacapajj jiwat janchipa mä carroru uchasinjja Meguido chekatjja, Jerusalén marcaruw apjjapjjäna, ucanracwa imt'jjapjjäna. Marcanquir jakenacasti Josías reyin Joacaz yokaparuw awquip lanti reyita utt'ayapjjäna.
31. Cunapachatï Joacaz chachajj pä tunca quimsani maranïna ucqhawa reyïña kalltäna, ucatsti Jerusalén marcanjja quimsa phajjsiwa apnakäna. Taycapasti Hamutal sat sutinïnwa, jupasti Jeremiasan phuchapänwa, uqhamarac Libna chekanquiriraqui.
32. Ucampis Tatitun nayrakatapanjja luratanacapajj jan walinacänwa, cunjämtï nayra awquinacapanjama.
33. Ucatjja Necao sat faraonajja juparojj Hamat sat orakena, Ribla chekanwa preso catuntäna, jan Jerusalén marcan apnakañapataqui; ucatjja marcarojja mayïnwa impuesto pagapjjañapataqui quimsa waranka quimsa patacani kilo kollkenaca, uqhamarac quimsa tunca quimsani kilo korinacaraqui.
34. Ucjjarusti Necao sat faraonajja Josías reyin Eliaquim sat yokaparuwa reyit utt'ayäna awquip lanti, sutipsa yakha sutimpiw uchäna Joacim sasa. Ucatjja Joacaz reyirojj Egiptoruwa apjjaruwayäna, ucanracwa jiwjjaraquïna.
35. Joacim reyisti Necao sat faraonarojja churänwa cuntï maycäna, kollke, kori take ucanaca, ucanac apthapiñataquejja, Judá orakenquir jakenacaruwa wayt'äna apthapipjjañapataqui. Ucatjja sapa mayniwa kollksa, korsa impuesto pagapjjäna cunjämarutejj amuyt'ascäna uqhamaru, Necao sat faraonaru churañataqui.
36. Cunapachatï Joacim chachajj pä tunca pheskan maranïna ucqhawa reyïña kalltäna; ucatjja Jerusalén marcanjja tunca mayan maraw apnakäna. Taycapasti Zebuda sat sutinïnwa; jupasti Pedaías chachan phuchapänwa, Ruma chekanquiriraqui.
37. Ucampis luratanacapajja jan walinacänwa Tatitun nayrakatapana, nayra awquinacapjamaraqui.

2 Reyes 24:1-20
1. Joacim reyejj apnakascäna ucqhajja, Babilonianquiri Nabucodonosor reyiwa Judá orakeru catuntir mantanïna. Ucatsti Joacim reyejj quimsa marawa jupar jaysäna. Ucatjja janiw jaysañ muncjjänti, jan ucasti jupataquiw sayt'asjjäna.
2. Ucampis Tatitojj Joacim reyitaquejj lunthata caldeo, sirio, moabita, amonita, jakenacwa apayanïna. Judá jakenacaru tucjapjjañapataqui, cunjämtï Tatitojj yatiycäna sirviri profetanacap toke uqhamaru.
3. Acasti lurasïnwa Judá orakempi Tatitojj uqham wact'ayatap laycu, jupan nayrakatapata apakañataqui Manasés reyina take juchanaca luratap laycu,
4. uqhamarac jan juchan wila wartatap laycuraqui; ucatsti uca lurañampiraqui Jerusalenar phokhantatapata. Ucatwa Tatitojj jan juc'amp perdonañ muncänti.
5. Ucat ucjjaru Joacim reyin sarnakäwipasa, uqhamarac take cun luratapasa kellkatawa, Judá marcanquir reyinacan crónicas sat libropana.
6. Cunapachatï jupajj jiwjjäna ucqhajja Joaquín sat yokapaw jupa lantejj reyëjjäna.
7. Ucat ucsarusti Egiptonquir reyejj janiw wastatampi orakepata mistuncjjänti, Babilonianquir reyiwa take orake catuntasjjäna, Egipto jawirata, Eufrates jawircama uca laycu.
8. Cunapachatï Joaquín chachajj tunca quimsakallkoni maranïna ucqhawa apnakañ kalltäna, ucatsti Jerusalenanjja quimsa phajjsiwa apnakäna. Taycapasti Nehusta sat sutinïnwa, jupasti Elnatán sat chachan phuchapänwa, Jerusalén marcanquiriraqui.
9. Ucampis jupan luratanacapajj jan walinacänwa Tatitun nayrakatapana, cunjämtï nayra awquinacapjama.
10. Qhaya urunacansti Babilonianquiri Nabucodonosor reyin ejercitopajja Jerusalenaruw saräna, ucatjja muyuntapjjänwa nuwantañataqui.
11. Cunapachatï marcaru nuwantasipcäna ucqhawa Nabucodonosor reyejj purinïna.
12. Ucatsti Judá ucanquir Joaquín reyejja, taycapampi, oficialanacapampi, jilïrinacapampi, uqhamarac wali uñt'at jakenacapampejj Babilonianquiri reyiruwa catuyasjjapjjäna, ucatjja jupanacarojj preswa catuntapjjäna. Acasti lurasïnwa cunapachatï Nabucodonosor reyejj quimsakallko mara apnakascäna ucqha.
13. Ucatjja Nabucodonosor reyejj take imatanacwa apsüna Tatitun templopata, reyin palaciopata, cunjämtï Tatitojj yatiycäna uqhamaruwa phokhasiscäna, Israelana Salomón reyipajj cuna yänactejj korita luraycäna Tatitun templopataqui ucanacwa tucjäna.
14. Ucatjja Jerusalenanquir take jakenacaruwa preso apasjjäna, take jilïrinacaru, suma soldadonacaru, take amparamp luririnacaru, herreronacaru, tunca waranka preso jakenacaru phokhachañcama. Judá orakenjja janiw qhitis kheparcjjänti, jan ucasti wali pobre jakenacaquiwa kheparjjäna.
15. Nabucodonosor reyisti presjja aparaquïnwa Joaquín reyiru, taycaparu, warminacaparu, oficialanacaparu, uqhamarac uca orakenquir wali aytata jakenacaruraqui. Jupasti presjja apänwa Jerusalenata, Babilonia marcaru.
16. Babilonianquiri reyejj takpacha wali aytata preso jakenaca apcäna ucanacajja pakallk warankänwa; amparamp luririnacata, herreronacatsa mä warankaraqui, ucjjarusti aparaquïnwa wali ch'aman jakenaca, nuwasiñataquis ch'iqhinacaraqui.
17. Ucjjarusti Babilonianquiri reyejj Matanías chacharuwa reyita utt'ayäna Joaquín sobrinop lanti, sutipsa yakha sutimpiw uchäna Sedequías sasaraqui.
18. Cunapachatï Sedequías chachajj pä tunca mayan maranïna ucqhawa reyïña kalltäna, ucatsti Jerusalenanjja tunca mayan maraw apnakäna. Taycapasti Hamutal sat sutinïnwa, jupasti Jeremías chachan phuchapänwa, Libna marcanquiriraqui.
19. Ucampis jupan luratanacapajj jan walinacänwa Tatitun nayrakatapana, Joacim ucan luratanacapjamaraqui.
20. Ucatwa Tatitojj colerasïna Jerusalén marcampi, uqhamarac Judá orakpachampisa; ucatsti jupan nayrakatapatjja jakonucünwa. Ucatjja Sedequías reyejj Babilonianquir rey contrawa tucjjäna.

Salmos 74:18-23
18. Tatay, janiquiy armasimti, timasirejj jisc'achtamwa, jan amuyt'asir marcasti sutim jisc'achi.
19. Janiquiy nanacat armasipjjestati, tórtola jamach'ir uñtat pisi ch'amäpjjtwa; janiquiy ajjsarcañ animalanacar catuyapjjestati.
20. Nanacamp arust'äwi luratamat amtasim, acapachajj jan wali lurañanacamp phokhantatawa.
21. T'akhesiyat jakejj janiquiy p'enk tucpati, jan cunan jakenacarusa, llaquitanacarusa, sutim jach'añchir tucuyam.
22. Diosay, sartasiquimaya, amtatamajj amtatapunïpan, jan amuyt'an jakenacan jumatac ñankha luratanacap amtasim.
23. Janiquiy timanacaman ojjotanacap armasimti, janirac jumar kallantañatac wararitapats armasimti.

Proverbios 19:3-3
3. Jakejj jan amuyt'asirïtap laycojja suma sarnakañapjja chhakhayiwa, ucatsti jakejj Tatituruquiw juchañchi.

Hechos 2:22-47
22. “Ist'apjjam Israelanquir chachanaca, cuntejj sapcäma uca: Diosajj jumanac taypinjja Nazaretanquir Jesusampejj cunayman muspharcaña uñacht'äwinacwa luri. Uca tokeraquiw Jesusajj Diosan asquit uñt'atäna. Uca luratanacsti jumanacajj sumwa yatipjjta.
23. Ucampisa, cunapachatï Jesusajj jumanacar catuyatäcän ucqhajja, phokhasiscänwa cunjämtï Diosajj nayratpach amtcatayna uqhamarjama. Jumanacasti jucharar jakenacan amparanacap tokew catuntapjjtajja. Ucatsti jiwayapjjaractawa, mä cruzar ch'accatasina.
24. Ucampis Diosajj Jesusarojj jactayiwa, jiwañar atipjayasa. Jiwasti janiraquiw juparojj atipcaspati.
25. Rey Davidasti Jesusjjat parlcasinjja aqham sänwa: ‘Nayajj Tatiturojj uñjapunirïtwa nayrakatajjancasquiri. Jupasti cupëjjajjanquiwa, jan qhitis nayar ajjsarayañapataqui.
26. Ucatpï nayan chuymajjajj cusisiñan phokt'atajja, ucatsti cusisiñ arunac parlaractjja. Ucataracwa janchejjas Diosar catuyat samarani.
27. Ucatpï jumajj nayan almajj-jja jiwatanac taypir jan jaytcätatejja. Janiraquiw muncätati munat sirviriman janchip ñusjañapsa.
28. Uñacht'ayaraquistawa jacañar irpir uca thaqui chek sarañsa. Nayan jac'ajjancañamampisti, cusisiñampiw phokhantaraquitäta.’
29. “Jilatanaca, takenejjay yatstanjja David awquisan jiwatapjja, imasitapsa. Jupan sepulturapasa jiwasanac taypincascchejjaya jichhürcama.
30. Davidasti profetäsinjja, yatiraquïnwa cuntejj Diosajj juramentompi jupar siscatayna uca: ‘Juman tronomarojj, jumat saraker mayni wawamaruw utt'ayä’ sasa.
31. Davidajj nayratpachas uñjcaspa uqhamwa parlawayäna Jesucriston jactäwipatjja. Saraquïnwa: ‘Almapajj janiw jiwatanac taypinjj kheparcaspati. Janiraquiw janchipas ñusjcaniti’ sasa.
32. Uca quicpa Jesusaruw Diosajj jiwatat jactayi. Ucjja take nanacaw sum uñjapjjta.
33. Uqhamasti Jesusajj Diosan cupi amparapampi aptatawa. Ucatsti Dios Awquitjja Kollan Ajayu catokaraqui, arsutaparjama. Cuntï jichhajj jumanacajj uñjapcta ist'apcaracta, ucajj Diosatwa juti.
34. Chekpachansa janiw Davidajj alajjpachar maqhatcänti. Ucampis jupa quicpaw säna: ‘Tatitojj Tatitojjarojj siwa: Cupëjjajjar kont'asim,
35. cunürutejj juman uñisirinacamarojj cayumar usccä ucürcama.’
36. “Take Israel marcpachaw yatipjjañamajja, jumanacas ch'accatapctasa uca Jesusar Diosajj Cristo Tatitu tucuyatapjja.”
37. Take acanac ist'asinsti, chuymanacapan wali llact'ataw uñjasipjjäna. Ucatsti Pedrompiru mayni apostolonacampirojj jisct'asipjjänwa: —Jilatanaca, ¿cuns lurapjjäjja? —sasa.
38. Ucjjarusti Pedrojj jupanacarojj sänwa: —Sapa mayni jumanacajja cutiquipstapjjam, uqhamarac bautisasipjjam Jesucriston sutiparu, juchanacamata perdonatäpjjañamataqui. Ucatwa Diosajj Kollan Ajayu churapjjätam.
39. Diosan aca arsüwipasti jumanacataquiwa, uqhamarac wawanacamampitaqui, jayanquirinacampitaqui, kawkhanirutejj Dios Tatitusajj jawscaraquini ucanacampitaqui —sasa.
40. Aca arunacampi, yakha arunacampi cunaw Pedrojj jupanacar ewjjt'äna, saraquïnwa: —Jethektapjjam aca ñankha jucharar jacañata —sasa.
41. Qhitinacatejj Pedron arunacapar ist'asinjja jaysapcän ucanacajja, Diosaruw cutiquipstanjjapjjäna bautisasisina. Ucürusti mä quimsa warank jakenacjamaw iyawsirinacarojj yapjjattäna.
42. Takeniw sum arcapjjäna cunjämtejj apostolonacajj yatichcäna uqhamarjama, maynit maynicama suman jacasisa. Uqhamaraquiw tantachasipjjäna Diosat mayisiñataqui, t'ant'a pachjañataquisa.
43. Take jakenacaw wali sustjasipjjäna muspharasipjjaraquïna. Apostolonacasti walja jach'a milagronaca uñacht'äwinacampi lurapjjäna.
44. Take qhitinacatejj Jesusar iyawsapcän ucanacajja, mayaquïpjjänwa. Take yänacapasa takenincaraquïnwa.
45. Jupanacajj aljapjjänwa yänacapsa uqhamarac orakenacapsa. Ucanacsti takeniruw laquintapjjaraquïna sapa mayniru cunataquïy munapjjchi ucarjama.
46. Sapüruw templon tantachasipjjäna. Utanacapansti mayaquiw t'ant'a pachjasajj mank'asipjjäna take cusisiñampi, llamp'u chuymampiraqui.
47. Diosarusti wal yupaychapjjäna, take jakenacansa wali munatäpjjaraquïnwa. Tatitusti sapüruw iglesiar yapjjattayäna qhitinacatejj khespiyasiñapäcän ucanacampi.