A A A A A
Bible in one year
May 6

1 Samuel 14:1-52
1. Saúl reyin Jonatán yokapajj mä urojj yanapiriparojj sänwa: “Jutam, jawir maqhatañäni, ucat uca jawira qhurcatanquir filisteonacar nuwjaniñäni” sasa. Ucampisa Jonatanajj janiw uca toketjja cunsa awquiparojj yatiycänti.
2. Awquipasti mä kollu pataruw utjantasiraquitayna, mä granado koka c'uchuncascaraquïnwa, trigo jawk'añawjana, mä tropa soldadonacaw jupa chicäscaraquïna, ucanacasti sojjta pataca chachanacaraquïnwa.
3. Efod sata isi apiristi, Ahitob sat jaken Ahías yokapänwa. Uca Ahitob jakesti Icabod jaken sobrinopänwa, ucasti Finees sat jaken yokaparaquïnwa, Elí chachan allchhiparaqui, qhititejj Silo sat chekan Tatitun sacerdotepäcän uca. Jakenacasti janiw Jonatanan saratapjja yatipcataynati.
4. Jupasti ucañcamajj cawqhanccäntejj filisteonacajj ucar puriñataquiw ch'amachascäna. Uca cheka pasañasti pä jach'a karka taypincänwa, Boses uqhamarac Sene satanaca.
5. Maynïrejj amsta tokena, Micmas uñcatasina; maynïristi aynach tokenaraqui Gabaa uñcatasina.
6. Jonatanasti yanapiriparojj sänwa: —Jina, mäpit qhurcataru maqhatañäni, cawqhancquitejj uca jan Diosar uñt'ir jakenacajj ucacama. Inampis Tatitojj mä cunsa jiwasataqui lurascaspa, jupataquisti janiw cuna ch'amäquisa jiwasar atipjaña churañajja, walja jakempisa jan ucajj juc'a jakempisa —sasa.
7. —Take cuntejj amtcta ucanacjja lurascaquim, nayasti uca amtäwinacamanjja yanapascaquïmawa —sasaw yanapirejj saraquïna.
8. Ucat Jonatanajj saraquïnwa: —Acajjay jichhajj qhurcataruw maqhatañäni cawqhancquitejj uca chachanacajj ucaru, ucatsti uñjayasiraquiñäniwa.
9. Jupanacatejj jiwasaru: ‘Suyt'apjjeta sarakanipjjañajjcama’ sistani ucapachasti, ucaruquiw kheparañäni, janiw jupanacan ucarojj maqhatcañäniti.
10. Ucampisa jupanacatejj: ‘Maqhatanipjjam’ sistani ucapachasti, maqhatañäniwa, ucasti jiwasataquejj mä unanchäniwa, Tatitun jiwasaru atipjäwi jupanacjjaru churañapataqui.
11. Uqhamaw filisteonacampejj jupanacajj panpachani uñjayasipjjäna. Acanacasti uñjasajj sapjjänwa: “Uñtapjjam, hebreonacajj cawquïri putunacarutejj imantasipcatayna ucanacatjja misturanjjapjjataynawa” sasa.
12. Ucat ucspachaw Jonatanampiru yanapiripampirojj art'anipjjäna: “¡Maqhatanipjjam acaru, may jumanacaru yatiyapjjäma!” sasa. Ucat Jonatanajj yanapiriparu saraqui: “Nayar arquita, Tatitojj jupanacarojj israelitanacan amparanacaparuw catuyani” sasa.
13. Jonatanasti cumpucamaquiw uca amsta maqhatawayäna, yanapiripasti khepat arcaraquïna. Cawquïrinacarutejj Jonatanajj korumt'ayancän ucanacarojja, yanapiripaw jiwarayaraquïna.
14. Aca nayrïri nuwasiñansti Jonatanampi yanapiripampejj pä tunca chachanacwa jiwarayapjjäna, mä juc'a horasanaqui.
15. Take qhitinacatejj campamentoncapcäna, uqhamarac campamento ankäjjancapcäna, ucanacasti walpun ajjsarayasipjjäna. Ucanquir soldadonacasa, uqhamarac uca guerrilleronacasa wali ajjsarayasipjjäna. Uqhamarus mä orak qhathatiw sartaraquïna, ucat takenisa ajjsarañat qhathatisipcäna.
16. Saúl reyin centinelanacapasti, qhitinacatejj Benjamín oraken Gabaa sisqui uca chekancasipcän ucanacasti, filisteonacarojj ucsar acsar chhuqhunakerwa uñjapjjäna.
17. Ucat Saúl reyejj ejercitoparojj saraqui: “Uñarapjjam, qhitinacas jiwasan ejercitosatjja chhakhata, ucanac yatiñataqui” sasa. Uqham uñarasinsti yatipjjänwa, Jonatanampi, yanapiripampi chhakhatätapa.
18. Ucürusti Diosan efod sat isipajj israelitanac taypincascänwa, ucat Saúl reyejj Ahías jakeru saraquïna: “Acar apanim uca Diosan efod sat isipa” sasa.
19. Saúl reyejj uca sacerdotempi parlañapcamasti, filisteonac taypinjja juc'ampiw sartäna jan walt'añanacajja. Ucat Saúl reyejj sacerdoterojj saraquïna: “Jan apancamti” sasa.
20. Ucapacharaquiw Saúl reyejj take ejercitopampejj tantacht'asisin sarapjje filisteonacampi nuwasiñataqui. Filisteonacasti sinti jan walt'añanwa jicjjatasipjjäna, jupanaccamaraquiw jiwarayasipjjäna.
21. Uqhamarusa cawquïri hebreo jakenacatejj nayratpacha filisteonacampïcäna, uqhamarac ejercitopampi chica jutapcatayna, ucanacasti nuwasiñ horasajj israelitanacan ejercitoparuw jakcattanjjapjjäna, cawquïri ejercitotejj Saúl reyina, Jonatanampina irpatäcän ucaru.
22. Cawquïri israelitanacatejj Efraín kollunacan imantasitäpcän ucanacasti, filisteonacan chhuctjjatapa yatisinsti, tucjañataquiw arctapjjäna.
23. Nuwasiñansti jupanacajj Bet-avén sisqui ucacamaw puripjjäna, Tatitusti Israel marcaparojj uca urunjja khespiyaraquïnwa.
24. Ucampisa israelita jakenacajj uca urojj wali karjtatäpjjänwa, janiraquiw qhitis cunsa mank'cänti, Saúl reyin juramentompi arsutap laycu, take jakenacaru aqham sasa: “Jiwayatäpan qhititejj janïr jayp'untquipan mä cunsa mank'antani ucajja, janïra nayan uñisirinacajjar phoksusquipana” sasa.
25. Soldadonacasti mä ch'umi chekaruw puripjjäna, cawqhantejj misq'ejj oraken utjcatayna uca chekaru.
26. Cunapachatejj jakenacajj ch'umiru mantapjjän ucqhasti, misq'ejj umjamaw jaläna; ucampis janiw qhitis mallt'cänti juramentompi Saúl reyejj wayt'atap laycu.
27. Ucampisa Jonatanajj janiw ist'cataynati, cuntejj awquipajj juramentompi take ejercitopar siscatayna ucjja. Ucat cuna vara ayt'atäcäntejj uca varampiw misq'i apsusïna, mank'antaraquïna, ucampejj suma ch'amaniw tucuraquïna.
28. Ucat mayni israelita soldadojj juparu saraquïna: —Awquimajj juramentompiw ejercitorojj wayt'i, ‘qhititejj mä cunsa mank'ani ucajj jiwayatäniw’ sasa. Ucatwa jichhajj jakenacajj wali karjtatäpjje —sasa.
29. Ucat Jonatanajj saraquïna: —Awquejjajj jan wal luri aca marcarojja. Uñjam cunjämsa nayajj uca mä juc'a misq'i mallt'asajj ch'amani tucuractjja,
30. juc'amp ch'amaniw jakejj tucusapäna, jichhüru uñisirisat aparanctan ucanacat mank'asapän ucajja. ¡Cunjsa filisteonacarojj tucjasänjja! —sasa.
31. Uca urusti israelitanacajj filisteonacarojj atipjapjjänwa, Micmas sisqui uca chekat sartasina Ajalón sisqui uca chekar puriñcama. Ucampisa israelitanacajj wali karitäpjjänwa.
32. Uqhamasti ejercitojj cuntejj uñisirinacapat aparapcatayna, ucaruw jaljjatapjjäna; ucat ovejanaca, vacanaca, vaca kallunaca catusinsti qharirapjjänwa, ucat aychapjja wilamppacha mank'antapjjäna.
33. Ucampisa yakhepanacajj Saúl reyir yatiyiriw sarapjjäna: —Jakenacajj Tatitu contraw jucha lurasqui, aycha wilamppacha mank'asajja —sasa. Ucat Saúl reyejj saraqui: —¡Jumanacajj jan wali jakenacäpjjtawa! Mä jach'a kala acacama korumiyasa apanirapipjjeta.
34. Uqhamarus jakenacarojj sapjjaraquim, sapa mayni acaru ovejanacapa, vacanacapa apaniñapataqui, uqhamat jumanaca qharirapjjañamataqui, ucat mank'apjjañamataqui, janiraqui jucha lurapjjamti Tatitu contrajja, aychanaca wilamppacha mank'asajja —sasa. Uca arumpachaw sapakat mayni jupapacha vacanacapa apapjjäna, ucat ucan qharirapjjäna.
35. Saúl reyisti mä toketjja, Tatitutaqui mä altar luraraquïna, uca altarasti jupan nayrakata catuyataraquïnwa.
36. Ucatsti Saúl reyejj saraquïnwa: —Jichhajj aca aruman filisteonacar arctiri sarakapjjañäni, ucatsti khanjtaniñapcama saqueyjapjjaraquiñäni, janiraquiw maynirus uqhamaqui jaytancañäniti, jan ucasti takeniruw jiwarayaniñäni —sasa. Ucatsti takeniw arsupjjaraquïna: —Cunatejj amuyatamatjja walïqui ucanacjja lurascaquim. Ucampisa sacerdotejj saraquïnwa: —Janïr cunäquipana Diosaru jisct'añäni —sasa.
37. Ucat Saúl reyejj Diosaru jisct'i: “¿Filisteonacarojj arcnakäti? ¿Jupanacarusti israelitanacan amparaparuti catuyäta?” sasa. Ucampis Tatitojj janiw uca urojj cunsa juparojj jaysancänti.
38. Ucat Saúl reyejj saraqui: —Jichhajj jac'achasinipjjam take ejerciton jilïrinacapa; yatjjatapjjam qhitis jichhürojj uca jucha luri.
39. -¡Israel marcan khespiyiri Tatitun sutipjjaruw arsta juramentompi, qhititejj jucha lurqui, pachpa Jonatán yokajjäscpasa, ucajj jiwayatäniwa! —sasa. Soldadonac taypitsti janiw qhitis arsuncänti.
40. Ucatwa Saúl reyejj take israelitanacarojj saraquïna: —Jumanacajj acsaru sayt'asipjjam, maysatsti Jonatán yokajjampi nayampiraquiw sayt'anipjjä —sasa. —Cunatejj amuyumanjja walïqui ucanac lurascaquim —sasaw soldadonacajj sapjjaraquïna.
41. Ucat Saúl reyejj art'araqui: —Tatitu, Israelan Diosapa, ¿cunatsa jichhürojj jan ist'ista naya sirvirimarojja? Nayatejj juchanïstjja, jan ucajj Jonatán yokajjas juchanïchejja, suerte jaktatatjja Urim ucaw mistuni; ucampisa juchatejj israelita jakenacancchejja, suerte jaktatasti Tumin ucaraquiw mistuni —sasa. Suertesti Saúl reyimpiru Jonatán yokapampiruw mistüna, uqhamat janiw jakenacajj juchañchatäcjjänti.
42. Ucat janc'aquiw Saúl reyejj saraquïna: —Jichhajj Jonatán yokajjampita nayampitaraqui suerte jaktapjjam —sasa. Suertesti Jonatán yokapjjaruw purïna,
43. ucatwa Saúl reyejj Jonatanarojj saraquïna: —Jichhajj khanañchita cuntejj lurcta uca —sasa. Jonatanasti arsusiraquïnwa: —Chekpachansa, nayaw mä juc'a misq'i aca vara ayt'atäcäyät ucampi mallt'ta. Ucampisa acajjay nayajj jichhajj jiwañataquis janc'aquiraquïtwa —sasa.
44. Saúl reyejj art'asiraquïnwa: —¡Diosajj nayar jiwayitpan take ch'amapampi janitejj jiwcäta ucapachajja, Jonatán! —sasa.
45. Marcasti Saúl reyirojj saraquïnwa: —¡Cunjämaraqui Jonatanasti jiwanisti, jupajjay Israel marcarojj mä jach'a atipjäwi churchistojja! ¡Janiw jiwcaspati! ¡Tatitu laycu, janiw mä ñic'utapas orakerojj jalaktcaniti! Cuntejj jichhüru lurqui ucjja Diosan yanapapampiw luraraqui —sasa. Uqhamatwa marcajj Jonatanarojj jiwañat khespiyäna.
46. Saúl reyisti filisteo jakenacaru arctañjja jaytjjaraquïnwa, jupanacasti orakeparuraquiw cuttjjapjjäna.
47. Uqhamawa Saúl reyejj Israel marca apnakasajja atipjäna take chekanwa uñisirinacapampejj nuwasiraquïna ucanacasti acanacänwa: Moab, Amón, Edom, Soban uqhamarac filisteonacan reyipa. Cawquirutejj sarcäna ucanacarojj atipjaquipunïnwa.
48. Mä jach'a ejército tantacht'araquïna ucat Amalec ucarojj atipjaraquïna. Uqhamatwa israelitanacarojj uca lunthata lluch'susirinacatjja khespiyäna.
49. Saúl reyin yokanacapasti: Jonatán, Isúi, Malquisúa ucanacänwa. Pani phuchanacapasti Merab satänwa jilïrejja, sullcasti Mical sataraqui.
50. Saúl reyin warmipasti Ahinoam sataraquïnwa, Ahimaas jaken phuchapa. Ejercitopan generalapasti Abner sataraquïnwa, Ner sat jaken yokapa, ucasti pachpa Saúl reyin tioparaquïnwa.
51. Saúl reyin awquipa Cis ucasti, uqhamarac Abner ucan Ner awquipasa Abiel ucan yokanacaparaquïnwa.
52. Filisteonac contra nuwasiñasti walipunïnwa, Saúl reyin jacañapanjja, uca laycuraquiw Saúl reyejj mä suma ch'amani ejercitonaca sayt'ayaraquïnjja, take ch'amani uqhamarac jan ajjsariri chachanacasti ejercitorcama jawsataraquïnwa.

1 Samuel 15:1-35
1. Mä uruw Samuelojj Saúl reyiru säna: —Tatitojj Israel marcan jumaru reyit utt'ayañataquiw qhitanitu. Uca laycu jichhajj ist'am cuntejj Tatitojj sañ munctam uca.
2. Take ch'amani Tatitojj aqham siwa: ‘Amalecita jakenacarojj mutuyäwa, cuntejj israelitanacaru lurqui ucanacatjja. Jupanacajj chica thaquiruw sayantasipjjäna cunapachatejj israelitanacajj Egiptot jutapcäna ucapachajja.
3. Uca laycu, jichhajj saram ucatsti t'akhesiyaraquim; jupanacarusa uqhamarac yänacapsa takpach t'unjaniraquim, janiraqui jupanacatjja qhuyapt'ayasimti. Chachanacsa, warminacsa, wawanacsa, asu wawanacsa, uqhamarac vacanacsa, ovejanacsa, camellonacsa, asnonacsa takpach jiwarayanim’ —sasa.
4. Saúl reyisti take jakenacaruw jawsayäna, ucat Telaim sisqui uca chekanwa uñarasa muytaraquïna. Infantería soldadonacasti pä pataca waranka chachanacänwa, Judá toketsti tunca waranka chachanacaw jutapjjaraquitayna.
5. Ucatsti Saúl reyejj Amalec sisqui uca marcan jach'a capitalaparuw saräna, jawira jac'aruw purintapjjaraquïna.
6. Ucat quenitas sat jakenacarojj saraquïna: “¡Sartapjjam ucqhata! ¡Jumanacajj amalecita jakenac taypit mistuwayjjapjjam, jan nayan jumanacaru jupanacampi chica t'unjañajjataqui, jumanacasti sumaquiracwa uñjapjjayätajj israelitanacarojj, cunapachatejj Egiptot jutapcän ucapachajja!” sasa. Quenitas sat jakenacasti amalecitas sat jakenac taypitjja mistuwayjjapjjänwa.
7. Ucat Saúl reyejj amalecita jakenacarojj nuwantäna Havila sisqui uca chekata, Shur sisqui uca mantañcama, ucasti Egipto korpanquiwa, ucat jupanacarojj atipjaraquïnwa.
8. Agag sata, amalecitanacan reyiparusti preso catuntaraquïna, ucat take ejercitoparusti espadampiw jiwarayaraquïna.
9. Ucampisa Saúl reyimpi ejercitopampisti Agag reyirojj janiw jiwayapcänti, uqhamarac cawquïrinacatejj suma ovejanacäqui ucanacsa, suma vacanacsa, suma liq'i vaca kallunacsa, suma orko ovejanacsa janiw jiwarayapcänti, wali jila alani yänacsa janiraquiw t'unjapcänti, juc'a alani yänac t'unjapcchïn ucasa.
10. Ucat Tatitojj Samuelompi parlasinsti saraquïnwa:
11. “Saúl chachar reyit utt'ayatajjatsti walpun amtta, nayatsti jithektituwa, arsutanacajjsti janiraquiw phokquiti” sasa. Samuelosti uca ist'asajj wali mayjt'ataw kheparäna, ucat uca aruma pakariraquiw Tatituru mayïna.
12. Khepärmanthi alwasti Samuelojj Saúl reyimpi jiquisir sarañataquiw wali alwata sartasïna, ucampis Saúl reyin Carmel sisqui ucsaru sarjjatapwa yatiyapjjaraquïna, ucan mä jach'a pilar sayt'ayatapa, ucat ucsa toke muytasinsti, Gilgal tokeru sarascaquitapa.
13. Ucat Samuelojj Saúl reyin ucaru saräna, ucat Saúl reyejj saraquïnwa: —Tatitojj jumaru bendispan. Tatitun arsutanacapjja phokjjtwa —sasa.
14. —Uqhamasti, ¿cunatarac ovejanacan jachatapa, vacanacan wararitapsa ist'asctsti? —sasaw Samuelojj saraquïna.
15. —Amalec ucatwa ucanacjja apanipjjta —sasaw Saúl reyejj saraquïna. —Ucampisa jakenacajj suma ovejanacampi, suma vacanacampjja janiw jiwarayapquiti jan ucasti Tatitu Diosamaru sacrificio loktañataquiw imasipqui. Ucampisa ucat juc'ampjja k'alwa jiwarayjjapjjta —sasa.
16. —¡Amuct'am, cuntejj Tatitojj juma toket wasayp'ojj sisquitu ucwa yatiyäma! —sasaw Samuelojj tokentaraquïna. —Parlascaquim —sasaw Saúl reyejj saraquïna.
17. Ucat Samuelojj säna: —¿Janit jumajj jan yäkcañac amuyascäyätajja? Ucampisa Israel tribunacan jilïripaw tucuwaytajja, Tatitusti Israelan reyipatwa utt'ayaractamjja.
18. Jichhajj Tatitutejj jumaru uca ñankha jucharar amalecita jakenacaru k'ala t'unjaniñamataqui qhitchhïyätamjja,
19. ucapachasti, ¿cunataraqui arsutanacaparusti jan phoktasti, ucat cuntejj enemigot aparapcta ucjja jumataqui catuntastasti, uqhamat Tatitun nayrakatapan jan walinac lurasa? —sasaw Samuelojj säna.
20. Saúl reyejj saraquïnwa: —Nayajj Tatiturojj jaysapuntwa, arsutanacapsa, uqhamarac cuna lurañtejj jaytquitu ucanacsa phokhascapuntwa: Agag reyirusti preso apaniractjja, amalecitanacarusti k'alwa t'unjaractjja.
21. Ucampisa soldadonacajj cawquïritï suma ovejanacäqui uqhamarac suma vacanacäqui ucanacjja jilt'ayasipjjewa, Gilgal sisqui uca chekan Tatitu Diosamaru sacrificio loktañataqui —sasa.
22. Ucat Samuelojj saraquïna: “Tatitutaquejj arsutanacapar phokhañaw juc'ampi sumajja, sacrificionaca, uqhamarac holocaustonaca loktañat sipansa; arsutap phokhañaw, uqhamarac jupar ist'añawa sumajja, ovej liq'inaca sacrificiot loktañat sipansa.
23. Jupa contra sayt'asirejja, qhititejj laykasiñanac lurqui ucampi sasiwa; yakha diosanacar yupaychirimpi sasiwa qhititejj jupar jan ist'qui ucajja. Cunjämatejj jumajj arunacapar apanuctajja, jichhajj uqham luratam laycuw jupajj reyitjja apanucjjtam.”
24. Ucat Saúl reyejj Samuelorojj saraquïna: —Jïsa, juchwa lurtjja, Tatitun arunacaparu jan yäkasajja, uqhamarac juman arsutanacamar jan ist'asisa. Jakenacaruw ajjsaräyäta, ucat jupanacan mayitaparu jaysta.
25. Ucampisa nayajj achict'assmawa, juchajjat perdonitaya, ucat nayampi chica cuttjjam Tatitur yupaychañataqui —sasa.
26. —Janiw jumampi chica sarquiristti, Tatitun arunacapar jan jaysatam laycu. Jichhasti jupajj jumarojj Israelan reyipäñatjja apanucjjtamwa —sasaw Samuelojj saraquïna.
27. Samuelosti cuttanjjañataquiw sartjjäna, ucampisa Saúl reyejj capa puntapatwa waythapïna, ucat ch'iyakaraquïna.
28. Ucat Samuelojj Saúl reyirojj saraquïna: —Cunjämtejj ch'iyakquistajja uqhamaracwa jumarojj Tatitojj Israelan tronopatjja ch'iyakjjaractamjja. Juman mayni marca masimar catuyjjañataquiw apakjjtam, cawquïritejj jumat sipansa juc'ampi wali asquïqui ucaru.
29. Israelan jach'a Diosapäqui ucajja, janiw c'ariscaspati, ni amtcaraquispasa, jupasti janiwa aleka jakequïquiti amtañataquejja.
30. —Chekpachansa, nayaw juchjja lurta —sasaw Saúl reyejj säna. Ucampisa take Israel marcan jilïri jakenac nayrakatanwa uqhamarac take Israel marcpacha nayräjjanwa achict'assma, nayarojj mä reyirjama uñjaquitaya. Uqhamajj nayampi chica sarañäni, Tatit Diosamar yupaychañataqui, —sasaw Saúl reyejj säna.
31. Uqhamasti Samuelojj Saúl reyimp chicaw saräna, ucat jupajj Tatituru yupaychäna.
32. Ucspachaw Samuelojj saraquïna: “Acaru nayan nayrakatajjaru amalecita jakenacan Agag sat reyipa irptanirapipjjeta” sasa. Ucat Agag reyejj jan cunaquiw Samuel nayrakatarojj uñstäna chuymapansti amuyaraquïnwa: “Uca jan wali jiwañajjajj pasjjpachawa” sasa.
33. Ucampis Samuelojj sänwa: “Jumajj espadamampiw walja warminacarojj jan wawani jayttajja. Jichhajj taycamajj jupanacjamaraquiw kheparani” sasa. Ucatsti Tatitu nayrakatana jan ajjsarasaw Samuelojj Agag reyerojj Gilgal sisqui uca chekan pusiruw qharinokäna.
34. Ucatsti Ramá chekaruw cuttawayjjäna, Saúl reyisti utaparuraquiw cuttanjjäna, Gabaa sisqui uca chekaru.
35. Samuelosti janipuniw mayampsa Saúl reyirojj uñjcjjänti, chuymapanjja wali llact'atäcchïnsa cunatï Tatitojj wali amtasitapa Saúl reyiru Israel marcan reyipat utt'ayatapata.

Salmos 57:1-3
1. Nayat qhuyapt'ayasit Diosajjay, nayat qhuyapt'ayasita, jumamp arjjatayasiñataquiw thaksma. Jan walt'añ nayat jithekañapcamasti amparamamp imantayasiñ munta.
2. Alajjpachanquir Diosaruw art'asï, take cunan yanapir Diosat mayisï.
3. Jupaw alajjpachat khespiyäwip apayanitani, jupaw nayar jiwayañ munirinacarojj pejjtuntani, qhuyapayasiñapamp, cheka cancañapamp apayanitani.

Proverbios 15:24-25
24. Jacañar irpir thaquejj amstaruwa sari, ucatsti yatiñan jakerusa khespiyaraquiwa jiwaña aynacharu puriñatsa.
25. Tatitojj jach'a jach'a tucurin utapjja tucjiwa, ucampis ijma warmin orakep janiw jittayquiti.

Lucas 23:1-25
1. Ucapachasti takeniw sartasipjjäna, ucatwa Jesusarojj Pilaton ucar irpapjjäna.
2. Ucanwa juchañchañ kalltapjjäna aqham sasa: —Aca jakerojj jakenacasar pejjtusquirwa jicjjatapjjta: ‘Impuestjja janiw romano emperadorarojj pagañasäquiti’ siwa, uqhamaraquiw ‘Cristöt’ saraquiwa, mä arunsti ucajj ‘rey’ sañ muni.
3. Ucatwa Pilatojj juparu jisct'äna: —¿Jumätati judionacan reyipajja? —sasa. Jesusasti sänwa: —Cunjämtejj sisctajja, uqhamawa —sasa.
4. Ucapachasti Pilatojj sacerdotenacan jilïrinacaparu, uqhamaraqui jakenacarusa sänwa: —Janiw cuna juchsa aca jaken jicjjatcti —sasa.
5. Jupanacasti sasipcaquïnwa juc'amp ch'amampi: —Take Judeanquir jakenacaruw yatichäwinacapampi mayjt'ayi. Galileat kalltani, ucatsti lurascaquiw acäcansa —sasa.
6. Ucapachasti Pilatojj uc ist'asin jupanacar jisct'i: ‘¿Aca jakejj Galileanquiriti?,’ sasa.
7. Ucatsti Galileanquiriwa sipanjja, Herodesan ucaruw apayi qhititejj Galilea apnakascäna ucaru. Ucasti uca urunacanjja Jerusalenancascaraquïnwa.
8. Jesusar uñjasajj Herodesajj wal cusisïna, jupasti walpun jupar uñjañ munäna. Jupasti yakhanacatwa jupjjat parlirjja ist'atayna, ucat jupajj suyascänwa mä milagro lurir uñjañataqui.
9. Jupasti wal jisct'äna, Jesusasti janiw cuns arscänti.
10. Ucancasipcaraquïnwa sacerdotenacan jilïrinacapajja, ley yatichirinacasa, ucanacasti walpunwa juchañchapjjäna.
11. Ucapachasti Herodesampi, soldadonacapampejj wal jisc'achapjjäna, ucatsti p'enkachañat juparojj suma isinacampiw ist'ayapjje mä reyirjama. Ucat Herodesajj wasitat Pilaton ucar qhiti.
12. Ucürunwa Pilatompi Herodesampejj sumancthapjjapjjäna; ucat nayrasti janiw walincapcänti.
13. Ucapachaw Pilatojj sacerdotenacan jilïrinacaparu, autoridadanacaru uqhamarac take jakenacaruw tantthapïna.
14. Ucatsti sänwa: —Jumanacaw aca jakjja nayarojj irpanipjjesta: ‘Jakeruw pejjtu’ sasa. Nayasti jumanac nayrakatanwa jisct'aracta, niya uñjapjjaractawa, janiw cuna juchsa jicjjatcti jumanacan juchañchatanacamatjja.
15. Herodesas janiraquiw jicjjatquiti, ucataracwa cutt'ayanjjestu. Uñjapjjaractawa janiw cuna juchsa lurquiti jupajj jiwayatäñataquejja.
16. Jawk'jäwa, ucatsti antutjjäwa —sasa.
17. [Pilatojj fiesta urunacanjja jakenacampi munayasiñataquejj mä preso antutañapänwa.]
18. Ucampis takeniw mayac art'apjjäna: —¡Cunarus jupajj tucpan! ¡Barrabasar antutam! —sasa.
19. Aca Barrabasarusti carcelaruw apantapjjatayna, marca apnakerinac contra pejjtutapata, uqhamarac jaker jiwayatapampita.
20. Pilatosti Jesusaruw antutañ munäna, ucat wasitat jakenacarojj parläna.
21. Jupanacasti juc'amp jach'atwa art'apjjäna: —¡Ch'accatam! ¡Ch'accatam! —sasa.
22. Quimsïr cutimpiw Pilatojj jupanacar saraqui: —¿Cuna jan walsa lurejja? Janiw nayajj jupanjj cuns jicjjatcti jiwayatäñapataquejja. Jawk'jä, ucat antutjjäwa —sasa.
23. Jupanacasti arnakasipcaquïnwa: ¡Ch'accatam!, sasa. Uqham jupanacampi sacerdotenacan jilïrinacapampi wal arnakapjjatap laycuw jicjjatapjje cuntejj munapcän uca.
24. Pilatosti amtiwa cuntejj jupanacajj mayipcän uc luraña.
25. Uqhamaw antutjjäna, mayipcäna uca jakerojja, cawquïritejj marca apnakeri contra sayt'catayna, jake jiwayatapat carcelanccäna ucarojja. Jesusarusti jupanacan munañanacaparuw catuyjjaraquïna.