A A A A A
Bible in one year
May 23

2 Samuel 17:1-29
1. Ucatsti Ahitofelajj Absalonarojj saraquïnwa: —Nayajj tunca payani waranka jakenaca ajllisï, jichha arumpachaw Davidar arctä.
2. Cunapachatejj jupajj ch'ama thayjtata, karitaraqui jicjjatasiscani ucapachaw nayajj jupar jaljjatä, ucatsti wali sustjaraquï, take qhitinacatejj jupampïqui ucanacasti jaltjjapjjaraquiniwa.
3. Ucampisa reyiruquiw jiwayäjja, ucatsti janc'aquiw take marcpacha jumampi sumancthapiyaraquï, cunjämatejj mä casarasiri warmejj chachapampi sumancthapquejj uqhama. Jumasti mä jaken jiwañapwa thakhasctajja, ucatsti take jakenacaw sumancjjapjjaraquinejja —sasa.
4. Uca amtäwisti, Absalonataquisa, uqhamaraqui Israel marcan amuyt'irinacapataquisa wali sumaraquïnwa.
5. Ucampisa Absalonajj arquita Husai jaquiruw jawsayaniraquïna, jupajj cuntejj amuyt'qui uca sañapataquiraqui.
6. Cunapachatejj Husai jakejj Absalón nayrakataru purinïna ucapachasti Absalonajj saraquïnwa: —Ahitófelan amtäwipajj aqhamawa. ¿Waquisispati uca lurañajj janicha? ¿Camstas jumajja? Amtäwimay sapjjeta —sasa.
7. Husai chachasti saraquïnwa: —Jichhamänjja, Ahitofelan amtatapajj janiw walïquiti.
8. Jumajj asquiw yattajja, awquimampi uqhamaraqui cawquïri jakenacatejj jupampi chicäqui ucanacasti wali ch'amani chachanacawa, janiraquiw cunsa ajjsarapquiti, jichhasti wali coleratapunïsipcpachawa, cunjämatejj mä osa animalajj wawanacap apakatajj wali coleratajj uqhama. Uqhamarus juman awquimajj guerran nuwasir jakeraquiwa, arumajj janiraquiw mayni jakenacamp chicäpcpachati.
9. Jichhas yakha chekan mä putun imantatäscpachawa. Uqhamaraqui juman soldadonacaman mä kawkhani jiwakatapatejj ist'asini nayrïri nuwasiñanjja, ucapachasti yakhepanacajj amuyjjapjjaraquiniwa, juman arquirinacamajj k'ala t'unjatäpcaspas uqhama.
10. Wali ch'amani, uqhamaraqui mä leonjam wali chachacht'asirïqui ucasa, k'alaw mayjt'asjjaraquini, Israel marcansti takeniw yatipjje awquimampi arquirinacapampejj jan cunsa ajjsariri jakenacäpjjatapjja.
11. Jichhasti nayajj amuyt'ayirismawa take israelitanacajj tantacht'asipjjpan jumampi Dan sisqui uca chekata Beerseba sisqui uca chekacama; uca jakenacasti kota irananquiri ch'allar uñtasitawa jan jact'cayaraqui, ucatsti juma quipca nuwasiñanjja jupanacaru sarayañama.
12. Ucapachasti awquimarojj cawqui chekansa catuntaquiñäniwa, jupjjarusti cunjämtejj sullajj orakeru purquis uqhamaw puriraquiñäni; janiw maynis khespcaniti, ni jupa, ni jakenacapasa.
13. Mä marcaru imantascani ucasa, take israelita jakenacaw lazonaca apasiñäni, ucatsti k'alwa uca marcjja mayat mayat kalanacapsa jawirarcama khocht'añäni, uca marcansti janiraquiw mä kalas kheparcaniti —sasa.
14. Absalonampi take israelitanacampisti, Husai chachan arunacaparojj: “Waliquiw” sapjjaraquïnwa, Ahitofel jaken amtäwipatsa juc'ampi sumaraquïnwa. (Tatitusti Ahitofel jaken amtäwinacapjja t'unjaraquitaynawa uqhamat Absalonarojj jan walt'añaru uscuñataqui.)
15. Ucatsti Husai jakejj Sadoc uqhamaraqui Abiatar sacerdotenacaruw Ahitofel jaken amtatanacapjja yatiyaraquïna, cuntejj jupajj Absalonar amtaycatayna ucanaca, uqhamaraquiw jilïri jakenacaru yatiyaraquïna, cuna amuyt'äwi arunactejj jupajj churcatayna uca tokenacatsa.
16. Uqhamat janc'aqui Davidaru yatiyapjjañapataqui, uca arumajj jan uca wasara pampanacan kheparañapataqui, jan ucasti Jordán jawirat qhurcataru maqhatjjañapa, uqhamat jan juparusa ni jakenacaparusa jiwarayapjjañapataqui.
17. Cunjämatejj Jonatanampi uqhamaraqui Ahimaasampejj En-rogel chekancasipcänjja, janiw jupanacajj marcanjja uñjayasiñ munapcänti, mä uywataraquiw jupanacar yatiyirejj saräna, ucatsti jupanacajj janc'aquiw rey Davidar yatiyir sarapjjaraquïna.
18. Ucampisa mä k'ajjo waynaw uñjaraquitayna, ucatsti uca waynajj Absalonar yatiyiriw sararaquïna. Ucampisa jupanacajj janc'aquiw sarapjjäna, ucatsti Bahurim sat marcan mayni jaken utaparuw puripjjaraquïna, uca utanjja ankan mä phuch'uw utjäna, ucaruw imantasjjapjjaraquïna.
19. Uca utanin warmipasti uca uma phuch'jjarojj mä tapampiraquiw imantäna, uca patarusti trigo jawk'ata willitataraquïna. Ucsti janipuniw qhitis yatcänti.
20. Cunapachatejj Absalonan arquirinacapajj purinipjjän ucapachasti, warmirojj jisct'apjjänwa: —¿Cawquincapjjes Ahimaas jakempi Jonatanampejja? —sasa. —Aca chekwa pasawayapjje, jawir tokeruw sarapjjaraqui —sasaw warmejj ucjjarojj saraquïna. Ucatsti Absalonan arquirinacapajj janc'aquiraquiw thaktiri sarapjjäna, ucampisa jan jicjjatjjasajja, Jerusalenaruw cuttanjjapjjäna.
21. Absalonan arquirinacapan sarjjatapasti Ahimaasampi, Jonatanampejj uma phuch'utjja mistunjjapjjänwa; David reyir yatiyiriw janc'aqui sarapjjaraquïna, ucatsti sapjjaraquïnwa: “Sartasim janc'aqui, jawir qhurcataru maqhatjjam” sasa, Ahitofel jakejj jupanacaru nuwantañataqui amuyt'äwi churatap laycu.
22. Ucatsti Davidampi uqhamaraqui kawkha jaketejj jupa chict'atäcaraquïna ucanacampisti sartasinjja janc'aquiw Jordán jawir qhurcataru maqhatjjapjjäna. Khepärmanthi alwasti takeniw maqhatjjaraquitayna, janiw maynis kheparcaraquitaynati.
23. Uqhamat Ahitofel jaken amtatanacapajj jan phokhascataynatejja, ucatpï asnopa waquicht'asisinjja, utaparuw sarjjäna; nacïwipa marcapansti, familianacaparu jan walt'añanaca take cunsa sumaru asquicht'jjasinsti, jaychcatasjjänwa. Uqhamaw jupajj jiwjjäna, ucatsti awquipan sepulturaparu imantatäjjaraquïnwa.
24. Davidasti Mahanaim chekaruw purïna cunapachatejj Absalonajj take israelita jakenacampi Jordán jawira maqhatascän ucapacha.
25. Absalonasti, Joab lantjja Amasa jakeruw take ejerciton sarayiripatjja uscuraquitayna. Amasa jakesti mayni ismaelita jaken yokaparaquïnwa, uca jakesti Itra sataraquïnwa, jupasti Abigail sat warmimpiw sarnakaraquitayna, uca warmisti Nahas sat jaken phuchapänwa, Sarvian cullacapa, cawquïritejj Joab chachan taycapäcän uca.
26. Absalonasti take israelita jakenacampejj Galaad orakeruw purintapjjaraquïna;
27. cunapachatejj Davidajj Mahanaim sat chekaru purïn ucapachasti mistunipjjaraquïnwa juparu catokerejja Subi sat Nahas jaken yokapa, jupasti Rabá de Amón sisqui ucanquirïnwa; uqhamaraquiw Maquir sat jakes mistuniraquïna, ucasti Amiel sat jaken yokaparaquïnwa, Lodebar chekanquiriraqui; uqhamaraqui Barzilai sat jakes mistuniraquïnwa, cawquïritejj Rogelim de Galaad sisqui uca chekan utjasirïcän uca.
28. Jupanacasti Davidataquejj apapjjaraquïnwa, iquiñanaca, platonaca, ñek'e phuqhunaca, uqhamarac trigo, cebada, jac'u, grano jamp'ita, habas, lentejas,
29. misq'i, mantequilla, vaca lechet lurat queso, uqhamaraqui oveja lechet lurat queso, Davidan mank'asiñapataqui, uqhamaraqui jakenacapasa; jupanacasti amuyapjjaraquitaynawa Davidan wasara toket jutatapa, jupasa uqhamaraqui jakenacapasa wali mank'at awtjatäpjjatapa umatsa pharjatäpjjataparaqui.

2 Samuel 18:1-33
1. Davidasti ejercitopjja suma uñaquiparaquïna, ucatsti sapa waranka soldadonacjjaruw mä jilïri uscuraqui, uqhamaraqui sapa pataca soldadonacjjarusa.
2. Ejercitopa quimsaru jaljasinsti, mayïrïqui ucjja Joab chachaw sarayäna, payïrïqui ucsti Abisai jakew sarayaraqui, cawquïritejj Sarvia sisqui ucan yokapa, Joab chachan jilapäcaraquïna uca; quimsïrïqui ucsti Itai sisqui uca jaken sarayañapataquiw uscüna, uca Itai jakesti Gat marcanquiriraquïnwa. Ucat takpach ejercitorusti saraquïnwa: —Nayajj jumanac chicaw nuwasiri sararaquï —sasa.
3. Ucampisa jupanacajj sapjjaraquïnwa: —Janiwa, jach'a rey, jan ucjja luramti, uñisirisataquejj janiw cunäquis nanacan jaltjjapjjañajjajja, jan ucajj chicatpacha jiwarapjjañajjasa, ucampisa jumajj, jach'a rey, tunca waranka jakenacat sipansa juc'ampïtawa. Ucatwa walïnejja, jach'a reyejj, marcaru kheparañapajja, uqhamat nanacataquejj juc'ampi ch'amañchäwi jan ucajj yanapa qhitaniñapataqui —sasa.
4. —Cunjämatejj jumanacataquejj walïqui uqhamarjamaw lurä —sasaw reyejj saraquïna. Ucatsti janc'aquiraquiw jitjtäna marcaru mantañatjja maysaru, uccañcamasti ejercitojj waranka soldadonacata, uqhamaraqui pataca soldadonacat formt'ataw mistuscäna.
5. Uqhamarus reyejj Joab, Abisai, uqhamaraqui Itai jilïrinacarojj ewjjt'araquïnwa, reyi laycojj Absalonarojj suma uñjapjjañapataqui, takpach soldadonacaraquiw ist'apjjäna cuntejj reyejj jilïrinacaru siscäna ucjja, Absalonaru sum uñjapjjañapataqui.
6. Uqhamaw soldadonacajj pampa tokeru sarapjjäna Israelan soldadonacapampi nuwasiñataqui. Jupanacasti Efraín sisqui uca ch'umi chekanwa nuwantasipjjäna,
7. Israelanquir jakenacasti, Davidan soldadonacapampi atipjatäpjjaraquïnwa. Uca urusti mä jach'a jiwaräwi urupunïnwa, pä tunca waranka jakenacaw jiwarapjjaraquïna.
8. Guerrasti take marcpacharuw mantaraquitayna, uca urusti uca ch'umi laycuw jilpach jakenacajj jiwarapjjaraquitayna espadampi jiwarayatäñat sipansa.
9. Absalonasti mä mular lat'jjatataw sarascaraquïna, ucatsti acatjamatwa Davidan soldadonacapampi jiquintasïna. Ucat uca mulajj mä jach'a encina sat kokaruw jalantäna, Absalonasti uca kokan ramanacaparuraquiw ñic'utapajj q'ithuntasïna, ucat uca kokan ramanacapan warccatat uñjasïna, uccañcamasti mulajj jalascaquïnwa.
10. Uqham Absalonaru warcusisquirsti mayniw uñjaraquitayna, ucat Joab chachar yatiyiriw sararaquïna: —Absalonarojj mä kokat warcusisquir uñjta —sasa.
11. —Uñjsta ucapachasti, ¿cunatarac jan uca pachpar jiwt'aytasti? Nayajj cusisisaw jumarojj tunca kollke chuririscasamäna, uqhamaraqui mä cinturonampi cuna —sasaw Joab chachajj saraquïna.
12. Ucampisa uca jakejj Joab chacharojj saraquïnwa: —Waranka kollke churquitasamän ucasa, janipuniw nayajj reyin yokaparojj jiwayquiriscäyätti; nanacasti ist'apjjtwa cuntejj reyejj jumanaca, Joab, Abisai, uqhamaraqui Itai jach'a jilïrinacarojj sapctam, Absalonaru sum uñjañataqui ucjja.
13. Mä toketsti nayatejj jiwayiriscäyätjja, inamayaraquïsapänwa, reyitaquejj janiraquiw cunas imantatajj utjquiti, jumasti ucapachajj janiraquiw nayarojj arjjatquitasamänti —sasaw uca jakejj Joab chacharojj saraquïna.
14. —Janiw jumampi tiempo pasañajjajj waquisquiti —sasaw Joab chachajj saraquïna; ucatsti quimsa flechanac aptasisinjja, jupapachpaw Absalonan chuymapat quimsa flechanacampi chhokhontäna, jacasquiriru, cunapachatejj uca encina kokat warcusisincäna ucapacha.
15. Ucatsti Joab chachan yanapirinacapat tuncaniw Absalonaru muyuntasina jiwjayjjapjjäna.
16. Ucjjarusti Joab chachajj saraquïnwa trompetanaca phust'apjjañapataqui, soldadonacasti janiraquiw juc'ampi israelitanacarojj alisnakjjapjjänti, jan ucasti Joab chachaw suyt'ayjjatayna.
17. Ucatsti Absalonan janchipa catusinjja, uca ch'umin mä jach'a p'iyaruw jakontapjjaraquïna, jupa patjjarusti kalanacampiw montonjjatapjjäna. Ucatsti take israelitanacajj utanacaparuw jaltjjapjjaraquïna.
18. Jaccasinsti Absalonajj mä jach'a kala perka sayt'ayasiraquïna, ucasti Reyin Vallepanwa jicjjatasiraqui, uca perkarusti sutipwa kellkantaraquitaynajja, jani wawanïtap laycu, uqhamat sutipajj jan chhakhañapataqui. Jichhacamas uca perkajj “Absalonan perkapa” satäscapuniwa.
19. Ucjjarusti Ahimaasajj, qhititejj Sadoc jaken yokapäcän ucajj Joab chacharojj saraquïnwa: —Nayajj achict'assmawa, reyin ucar aca suma yatiyäwi yatiyir sarañajjataqui, Tatitusti chekaparuw uñji, uñisirinacapatsa khespiyaraquiwa —sasa.
20. Ucampisa Joab chachajj saraquïnwa: —Janiw munascapuniti jichhpacha reyir uca yatiyäwi yatiyañamajja, khepürojj yatiyaquïtawa. Ucampisa jichhajj jan cunsa siscamti, yokapan jiwatap laycu.
21. Ucampisa Joab chachajj mä etiope soldadoruw saraquïna: —Saram, uqhamaraqui cuntejj uñjcta ucanac reyir yatiyanim —sasa. Etiopesti Joab nayrakataruw quillt'asïna, ucatsti jalacamaquiw jalaraquïna.
22. Ahimaas jakesti Joab chacharojj sascaquiraquïnwa: —Cunäpasaya, etiope jaken khepap jalaquëjjaya —sasa. Ucampisa Joab chachajj saraquïnwa: —¿Cunarus jumajj jalañ muntajj nayan wawajja? Uca yatiyatamatjja janiw cunsa catokcätati —sasa.
23. —Janiw ucajj waquisquiti, jalaquëjjaya —sasaw Ahimaas jaquejj saraquïna. —¡Uqhamajj saramaya! —sasaw Joab chachajj saraquïna. Uqhamasti Ahimaasa jakejj uca vallenjam jalawayäna, etiope soldadorusti nayrt'awayaraquïnwa.
24. Uccañcamasti Davidajj marcar mantañäquis uca pä puncu taypin konuscäna, uñch'uquiripasti azotea patjjaruw misturaquitayna, perka puncu patjjana. Uñatatasinsti uñch'uquirejj mä jakeru jalasinquir uñjäna,
25. ucat reyirojj jach'at art'anisaw yatiyäna. Reyisti art'araquïnwa: —Sapaqui jutchi ucqhajja, suma yatiyäwinacwa apanpacha —sasa. Uca jaken jac'achasiniñapcamasti,
26. uñch'uquirejj yakha jaker jalasinquirwa uñjaraquïna, ucat puncunquir uñch'uquirirojj art'araquïna: —¡Yakha jakejj jalaniraquiquiwa! —sasa. —Suma yatiyäwinacaracwa apaniracpacha —sasaw reyejj art'araquïna.
27. Uñch'uquiristi saraquïnwa: —Jalanitapajj Sadoc sacerdoten Ahimaasa yokapan jalanitapjamaquiwa —sasa. —Jupajj wali suma jakewa, suma yatiyäwinacarac apanpacha —sasaw reyejj saraquïna.
28. Ahimaasasti niya jac'achasinjjaraquïnwa, reyi nayräjjan orakcama alt'asisinsti, reyirojj aruntänwa, saraquïnwa: —Bendicitäpan Tatitojja, juma jach'a reyin Diosapajja, jichhasti jupajj, qhitinacatejj juma, jach'a rey, contra sayt'asipcän ucanacarojj apakjjewa —sasa.
29. —¿Absalón waynajj waliquïsquiti? —sasaw reyejj jisct'araquïna. Ahimaas jakesti saraquïnwa: —Joab chachajj qhitanquitu, ucat nayajj mistuncta ucapachasti wali jach'a ch'ajjwanacaw sartäna, ucampisa janiw yatcti cunatejj pascatayna ucjja —sasa.
30. Ucatsti reyejj saraquïnwa: —Acsa tokeru sayt'asim, ucatsti uca pachparu kheparam —sasa. Ahimaas jakesti uqhamarjamaraquiw kont'asïna.
31. Ucapachaw etiopejj puriniraqui, ucat saraquïna: —Aca suma yatiyäwinac catokam, jach'a rey. Jichhüruw Tatitojj juma jach'a reyirojj chekaparu uñjtam, qhitinacatejj juma contra sayt'asipcän ucanacatjja khespiytamwa.
32. Reyisti etiope jakerojj jisct'araquïnwa: —¿Absalón waynajj waliquïsquiti? —sasa. Etiope jakesti saraquïnwa: —Juma jach'a reyin uñisirinacamasti, uqhamaraqui juma contra sartir jakenacasa, uca Absalonjamaraqui tucusipjjpan —sasa.
33. Reyisti chuymapwa ch'alljjtayasïna, ucatsti puncu patanccäna, uca utaru mantasinwa wali jachäna. Sarnakcasasti saraquïnwa: “¡Absalón, wawajja, Absalón wawajja! ¡Nayaw juma lanti jiwañjja muniriscäyäta! ¡Wawajja, Absalón wawajja!” sasaw jachäna.

Salmos 66:16-20
16. Diosar arquirinaca, ist'ir jutapjjam, nayatac luratanacap yatiyapjjäma:
17. juparuw lacajjajj art'asi, lajjrajjasti juparuw jach'añchi.
18. Jan wali amuyutejj utjitasapänjja, Tatitojj janiw ist'quitasapänti;
19. Diosasti ist'ituwa, achict'asiñamp mayisitajjarojj jaysituwa.
20. Diosajj jach'añchatäpan, mayisitajjarojj janiw inar tucuyquiti, janiraquiw munasiñaps jithektayquituti.

Proverbios 16:31-32
31. Jank'o ñic'utanëjjañajja mä suma coronjamawa, cheka thaquin sarnakatata jicjjatatajja.
32. Paciencianïñaw asquejja, jan ajjsarir jaket sipansa; marcanacar catuntañat sipansa, juc'amp asquiwa jiwasa pachpa apnakasiñajja.

Juan 7:28-53
28. Ucanac ist'asajj Jesusajj templon yatichcasinjja, jach'atwa arsüna: —¡Uqhamajj uñt'apjjestawa, yatipjjaractawa cawquit jutatajjsa! Ucampis janiw nayan munañajjat jutcti, jan ucasti nayajj juttwa chekpachansa maynin qhitanita, ucarusti jumanacajj janiw uñt'apctati.
29. Nayajj uñt'twa, jupat jutatajj laycu, juparaquiw qhitanitu —sasa.
30. Ucatsti preso apañ munapjjäna, ucampis janiw qhitis catuntañ yant'cänti horasapajj janïr purincatap laycu.
31. Ucampis waljaninacaw jupar iyawsapjjäna, sapjjaraquïnwa: —Cristojj jutcani ucqhajja ¿juc'ampi milagronaca unañchanactï luraspa aca jaket sipansa? —sasa.
32. Fariseonacajj ist'apjjänwa cuntejj jakenacajj Jesusjjat parlapcäna uca. Ucatsti jupanacajj sacerdotenacan jilïrinacapamp cunaw templo uñjirinac qhitapjjäna Jesusar preso catunipjjañapataqui.
33. Ucatsti Jesusajj saraquïnwa: —Nayajj jumanacampejj juc'ataquiquiw acancä, ucatsti qhitanquitu ucaruw cutt'awayjjä.
34. Jumanacajj thakapjjetätawa ucampis janiw jicjjatapquitätati, cawquinccätejj ucarojj janiw jumanacajj sarapcasmati.
35. Uc ist'asinsti judionacajj jupanac puraw jisct'asiñ kalltapjjäna: —¿Cawquïrurac sarjjpachänisti jiwasanacan jan jicjjatañataquisti? ¿Griegonaca taypincqui uca mayni judionacan ucarut sarpachäni griego jakenacar yatichiri?
36. ¿Cun sañs muni aqham satapampejja: ‘Thakapjjetätawa ucampis janiw jicjjatapquitätati,’ sasajja?
37. Fiesta tucuy urojj juc'amp jach'a urünwa. Ucürunwa Jesusajj sayt'asisina jach'at arsüna: —Qhitich umat pharjatäsqui ucajja jutpan nayaru, ucatsti umaracpan.
38. Cunjämtejj Kellkatanjj sisqui, qhititejj nayar iyawsquitu, ucan chuymapatjja jacañ umaw jawirar uñtat jalsuni —sasa.
39. Ucampejj Jesusajj sañwa munäna, qhitinacatejj iyawsapcani ucanacajja Kollan Ajayu catokapjjani. Janïraw Kollan Ajayojj jutcataynati, Jesusajj janïra alajjpachar aptatätap laycu.
40. Yakhepanacajj uc ist'asajj sapjjänwa: “Chekpachansa aca jakejj jutañapäcän uca profetawa” sasa.
41. Mayninacajj sapjjaraquïnwa: “Acajj Cristowa” sasa. Ucampis mayninacajj sapjjaraquïnwa: “¿Cunjämarac Galileat Cristosti jutaspasti?
42. Kellkatanjja siwa: ‘Cristojj rey Davidan wawanacapatwa sartañapa, Belenanquirïñaparaquiwa, Davidan pachpa marcapata’ ” sasa.
43. Uqhamasti jakenacajj Jesús laycojj t'akjtawayapjjänwa.
44. Mayninacajj preso apañ munapjjäna, ucampis janiw qhitis catuntcänti.
45. Templo uñjirinacajj cutt'awayjjapjjänwa fariseonacan ucaru, ucatsti sacerdotenacan jilïrinacapajja, uqhamarac fariseonacasa jisct'apjjänwa: —¿Cunatsa jan irpanipjjta? —sasa.
46. Templo uñjirinacasti sapjjaraquïnwa: —¡Janiw cunapachas qhitis uca jakjamajj parlquiti! —sasa.
47. Fariseonacajj ucjjarojj saraquïnwa: —¿Jumanacamppachat sallkjayasipjjta?
48. Jilïrinacatsa, uqhamarac fariseonacatsa ¿qhitis juparojj iyawsi?
49. Ucampis aca jan ley uñt'iri jakenacajj maldecitawa.
50. Ucanacat maynïri fariseojj Nicodemönwa, cawquïritejj Jesusan ucaru aruma sarcatayna uca. Jupasti saraquïnwa:
51. —Leyinacasarjamajj janiw qhiti jakerus juchañchcsnati janïr nayrakat cuntejj lurcatayna uc ist'casinjja —sasa.
52. Juparusti sapjjaraquïnwa: —¿Jumajj Galileanquiriraquïtati? Kellkatanac uñjjatam, ucatpï yatïtajja jan qhiti profetas Galileat jutatapjja —sasa.
53. [Ucatsti sapa mayniwa utaparcama sarawayjjäna.