A A A A A
Bible in one year
May 15

2 Samuel 1:1-27
1. Saúl reyin jiwjjatapatsti, Davidajj Siclag chekaruw cuttjjäna, amalecitanacaru atipjasinjja, ucansti pä uruw kheparäna.
2. Ucampis quimsa uru pasatatsti, Saúl reyin campamentopatjja mä jakew puriniraquïna, isinacapas ch'iyanokata, p'ekepas lak'ampi jach'jjatata, llaquipa uñacht'ayañataqui. Cunapachatejj purinïna ucapachasti, Davidan nayrakataparuw alt'asiraqui take ajjsartañ chuymampi.
3. Davidasti jisct'araquïnwa: —¿Cawquitsa jutta? —sasa. —Israelitanacan campamentopatwa jaltanta —sasaw uca jakejj saraquïna.
4. —¿Cunarac pasisti? ¡Avist'itaya, jan uqhamämti! —sasaw Davidajj saraquïna. —Soldadonacaw nuwasïwit chhuctjjapjje. Jupanacatsti waljaniraquiw jiwarapjje. ¡Saúl reyisa, uqhamarac Jonatán yokapasa jiwataraquiwa! —sasaw uca jakejj saraquïna.
5. —¿Cunjämataraqui Saúl reyimpina, Jonatán yokapampina jiwatätapsti yatta? —sasaw Davidajj uca yatiyäwi apaniri uywatarojj jisct'araquïna.
6. Uca uywatasti saraquïnwa: —Nayajj Gilboa kolluncascäyätwa. Uqhamaruw Saúl reyirojj pachpa lanzapjjaru liwjjattir uñjta, uqhamaraqui enemigon nuwasiña carronacapasa, caballeriapasa jac'achasiniraquïnwa niya jicjjatañatacjama.
7. Ucapachaw jupajj khepäjja uñtaniraquïna, nayar uñjasinsti jawsaraquituwa. Nayasti jawsataparojj ist'aractwa.
8. Ucat nayarojj janc'aquiw jisct'araquitu: ‘¿Qhitïtasa?’ sasa. Nayasti: ‘Amalecita jakëtwa’ saractwa.
9. Ucat nayarojj jac'aparu jawscatasitu, ucat: ‘Mäpita jiwayjjeta’ sasaw saraquitu. Niya jiwirjamäscaraquïnwa, ucampisa jacascaraquïnwa.
10. Uqhamasti nayajj jac'achasisinjja juparojj jiwayjjaractwa, nayasti amuyaraquïyätwa, jupan aynacht'jjatapatjja janiw jaquirjamäcjjänti. Ucatsti janc'aquiw p'ekepanccäna uca corona apakta, uqhamaraqui amparapanccäna uca brazaletsa, juman ucar apanjjañataqui, tata —sasa.
11. Uqhamasti Davidajj, jupampïpcäna uca jakenacasa isinacapwa llaquisiñatjja ch'iyanokasipjjäna.
12. Saúl reyimpina, Jonatán yokapampina jiwatapatsti wali jachapjjäna, wararipjjaraquïna, uqhamaraqui israelitanacajj atipjata uñjasipjjatapatsa. Dios Tatitun ejercitopajj atipjatätapata jayp'ucamaw ayunapjjaraquïna.
13. Ucatsti Davidajj uca yatiyäwi apaniri waynarojj jisct'ascaquïnwa: —¿Jumajj cawquinquirïtasa? —sasa. —Nayajj yakha marcanquiri amalecita jakëtwa —sasaw jupajj saraquïna.
14. —Uqhamasti, ¿cunjämarac jumasti Tatitun ajllita reyi contrasti amparam ayttasti? —sasaw Davidajj jach'at arsuraquïna.
15. Ucat jupampi chicäcäna uca jakenacat mayniru jawsasinsti saraquïnwa: —¡Saram, ucatsti aca jakerojj jiwt'ayanim! —sasa. Ucat jupajj uca amalecita jakerojj chhojjriñchrantasina, jiwt'ayaraquïnwa.
16. Davidasti ucatjja saraquïnwa: —Jumapachaw jiwatamat juchanïsctajja, jumapacharaquiw juchamsa arsusiscaractajja, Tatitun ajllit reyiparu jiwayatamjja —sasa.
17. Davidasti aca k'ochwa jacht'asisa k'ochüna, Saúl reyita, uqhamarac Jonatán yokapampina jiwatapatjja,
18. ucatsti uca k'ochojj take Judá oraken yatichasiñapataquiw arsuraquïna. Aca jachaña k'ochusti Asqui Jaken Libropan kellkatawa:
19. “¡Oh, Israel! ¡Juman jach'a cancañamajj kollunacan t'unjatawa! ¡Cunjämaraqui jan ajjsaririnacasti aynacht'apjjesti!
20. Gat sisqui uca chekansti jan yatiyapjjamti, janiraqui Ascalón callenacansa parlapjjamti, uqhamat filisteo warminacajj jan cusisipjjañapataqui, uca jan Diosar uñt'iri warminacajj jan cusisiñat sinc'upjjañapataqui.
21. “¡Gilboa kollunaca, jumanacjjarojj jan jichhajj jallusa, ni sullasa purpati, jumanacajj jiwaña lugaräpjjatam laycu! Atipjirinacan escudopasti ucanwa taquisita uñjasiraquïnjja. Saúl reyin escudopan c'ajatapasa ucanwa tucusiwayjje.
22. “Saúl reyimpi, Jonatanampisti janipuniw espadanacapsa, ni flechanacapsa jan enemigon wilapampiru, liq'ipampiru chilltasajj cuttanipjjerïcänti.
23. “Saúl reyimpi, Jonatanampisti, sinti munasipjjäna jacañansa, jiwañansa, janiw jaljtapquiti. ¡Jupanacajj jach'a pacanacat sipansa wali jalirïpjjänwa! ¡Leonanacat sipansa juc'ampi ch'amanïpjjänwa!
24. “¡Israelanquir imill wawanaca, Saúl reyit jichhajj jachapjjam, jupasti púrpura sat, uqhamaraqui lino isinacampiw isiyapjjayätamjja; korit lurat yänacampiw jumanacarojj c'achachapjjäyätamjja!
25. ¡Cunjämarac ch'amani jakenacasti nuwasïwin aynacht'apjjesti! ¡Jonatanasti kollu patamana jiwayataraqui!
26. “¡Jonatán jilajja, jumatjamajj wali llaquitaw uñjasta! ¡Cunja suma chuymampis nayarojj uñjayätajja! Nayataquejj munasiñamajj warminacan munasiñapat sipansa jilt'atänwa.
27. ¡Cunjämarac ch'amani jakenacasti aynacht'apjjesti! ¡Armanacas k'ala t'unjataraquiwa!” sasa.

2 Samuel 2:1-32
1. Uca khepatsti Davidajj Tatituruw jisct'asiraquïna, saraquïnwa: —¿Cawquïri marcanacatejj Judá tokencqui ucanacar sarañajj waquisispati? —sasa. Tatitusti saraquïnwa: —Jïsa, sarañamajj waquisiwa —sasa. —¿Cawquirus sarañajjajja? —sasaw Davidajj jisct'asiraquïna. Tatitusti ucjjarojj saraquïnwa: —Hebrón marcar sarañamaw —sasa.
2. Uqhamasti Davidajj ucaruw pä warmipamp cuna sarjjäna: Ahinoam sat warmimpi, cawquïritejj Jezreel marcanquirïcäna, uqhamaraqui Abigail warmimpi, Carmel tokenquiri Nabal jaken ijmapäcaraquïna ucampi.
3. Uqhamaraquiw jupampi chicäcän uca jakenacjja irpasjjäna take familianacapampi, ucatsti Hebrón token utjir marcanacaruw utjnokapjjäna.
4. Ucaruw Judá tokenquir jakenacajj purintanipjjaraquïna, ucanwa Davidarojj Judá marcan reyipäñapataqui utt'ayjjapjjaraquïna. Davidarusti yatiyapjjaraquïnwa Jabes de Galaad sisqui ucsa jakenacan Saúl reyir imantjjatapa.
5. Ucat Davidajj qhitanaca qhitäna aqham sapjjañapataqui: “Tatituw jumanacar bendicipjjätam uqham suma chuymampi Saúl reyir uñjapjjatamata, jumanacar apnakerimaru imt'jjapjjatamata.
6. Tatitusti jumanacarojj qhuyapayasiñampi, cheka chuymampiraqui uñjpan. Nayasti, jumanacarojj aca lurapjjatanacamatjja sumaqui uñjapjjaraquïma.
7. Jichhasti jumanacajj ch'am catjjatapjjam, janirac thayjtapjjamti jumanacar apnakeri Saúl reyejj jiwatäcchi ucasa, jichhasti Judá tribuw nayarojj reyit utt'ayaraquitu jumanacar apnakañataqui.”
8. Ucampisa Ner jaken yokapa Abner chachajja, qhititejj Saúl reyin ejercitopan jach'a jilïrïcän ucajja, Is-boset Saúl reyin yokaparuw irpjjaruwayi, ucatsti Mahanaim sat chekaruw irparaquïna.
9. Ucanwa reyit utt'ayäna aca marcanacjjaru: Galaad, Gesuri, Jezreel, Efraín, Benjamín, uqhamaraqui take Israel marcjjaru.
10. Cunapachatejj Is-boset jakejj Israel marca apnakañ kalltcän ucapachasti pusi tunca maranïnwa, ucatsti pä mararaquiw apnakäna. Ucampisa Judá tribujj Davidaruraquiw reyipat uñt'asïna.
11. Uqhamasti Davidajj Judá triburojj apnakaraquïnwa pakallko mara, sojjta phajjsini, jupasti Hebrón jach'a marcatwa apnakaraquïna.
12. Abner jakesti uqhamajj Mahanaim chekat mistuwayasinjja Gabaón chekaruw puriraquïna, Is-bosetan tropanacap nayräjjaru.
13. Mä toketsti Sarvia sat jaken Joab yokapajja, uqhamaraqui Davidan soldadonacapasa, Hebrón toketjja mistunipjjaraquïnwa, ucatsti jupanacampejj Gabaón estanque jac'an jiquintasipjjäna. Paypacha ejercitonacasti uñcatasi puraw waquichrantasipjjäna, mayninacajj uca uma estanquet maysana, mayninacasti maycatanaraqui.
14. Ucat Abnerajj Joab chacharojj saraquïna: —Waynanacajj nanacat nayräjja mistupjjpan nuwasiñataquejja —sasa. —Waliquiwa —sasaw Joab chachajj saraquïna.
15. Uqhamapï Benjamín tributa, uqhamaraqui Saúl reyin yokapa Is-boset jaket arjjatasisajja, mayscatarojj tunca payani sirvirinacaw maqhatapjjaraquïna, ucat yakha tunca payanisti Davidat arjjatasisaraquiw sayt'asipjjäna.
16. Sapa mayniw uñisiriparojj p'eket catuntasin, mä espadampi puracapat chhokhontäna, uqhamat takeni jiwarata uñjasipjjäna. Ucatwa uca chekajj, cawquïritejj Gabaón marcancqui ucajj Helcat-hazurim satajja.
17. Uca urusti nuwasiñajj wali jach'apunïnwa, uqhamasti Abner jakempi, uqhamaraqui Israelan tropanacapampejj k'ala atipjataw uñjasipjjäna, Davidan soldadonacapaw jupanacarojj atipjaraquïna.
18. Ucancapjjaraquïnwa Sarvia jaken quimsa yokanacapajja: Joab, Abisai, Asael ucanaca. Aca khepäqui ucasti mä pampa cabritjamaw wali jaliriraquïna,
19. ucatsti Abneraruw arctäna, janiraquiw jaltayañataquejj tiempo churcänti.
20. Abnerasti kheparu uñtasajj jach'at arsuraquïna: —Jumajj Asael chacharaquitasä —sasa. —¡Jïsa, nayätwa! —sasaw jupajj saraquïna.
21. Ucat Abnerajj saraquïna: —Jan juc'ampi arcnakjjestati. Ucampisa, mä kawkha uywatanacaru catum, ucatsti cunanactejj jupanacajj apapqui take ucanacampi kheparjjaraquim —sasa. Cunjämatejj Asael chachajj jan antutañ muncänti,
22. wasitat Abnerajj sascaquïnwa: —¡Jan juc'ampi arcnakjjestati, jan ucasti orakeruw jaknokäma! Ucatsti, ¿cuna ajanumpiraqui Joab jilamarusti uñstästi? —sasa.
23. Cunjämatejj Asael jakejj jan antutañ muncänjja, Abnerasti puracapat lanza puntapampiw chhokhontäna, khepäjjaru junsuñcama, ucat Asael jakejj ucqharpachaw jiwata uñjasïna. Take qhitinacatejj uca chekaru purinipcäna ucanacajja, cawqhantejj Asaelajj jiwcatayna ucanacasti sayt'asipjjänwa jupar uñjañataqui.
24. Ucampisa Joab, uqhamaraqui Abisai jakempejja Abnerarojj arctasipcaquïnwa. Inti jalanta ucqharusti Ama sat kollu pataruw puripjjäna, Gía uñcatasina, Gabaón tokeru sarañäquis uca wasara tokena.
25. Ucanwa benjaminitas sat jakenacajj Abneramp tantacht'asipjjäna, ucatsti mä ejército waquicht'asisinjja kollu pata tokenacaruw utjnokapjjäna.
26. Ucat Abnerajj Joab chacharojj art'araquïna: —¿Janit aca jiwarayäwejj tucuscani? ¿Janit amuycta aca luräwejj jan walt'añaqui apanirapistani ucjja? ¿Cunapachas jakenacamarojj ordenaraquïta jilanacaparu jan juc'ampi arcnakjjapjjañapataqui? —sasa.
27. Joab chachasti ucjjarojj saraquïnwa: —Nayajj juramentompiw Dios nayrakatana arsurapsma, janitejj aca khanañchcasamän ucqhajj, jakenacajjajj khanjtaniñapcamaw jilanacaparojj arcnakaraquisapäna —sasa.
28. Ucatsti ucspachaw Joab jakejj ordenaraqui trompeta toct'apjjañapataqui, ucatsti take jakenacaw suyt'apjjäna, israelitanacarusti janiraquiw juc'ampi arcanakjjapjjänti, uqhamaraqui janiraquiw jupanac contras juc'ampi nuwascjjapjjänti.
29. Abner jakempi, jupampi chicäpcän ucanacampisti Arabá sisqui uca pampanjamwa uca pakari arumajj sarapjjäna, ucatsti thaqui chekañchjjasinsti, Jordán jawir maqhatawayapjjäna, Bitrón sisqui uca cheka pasawayasasti Mahanaim sisqui uca chekaruw puripjjäna.
30. Joab chachasti Abner jakempiru, qhitinacatejj jupampi chicäpcän ucanacarusti janiraquiw juc'ampi arcnakjjänti, lista pasasinsti yatisiraquïnwa tunca llätuncani oficialanacan jiwarapjjatapa, ucanacasti Davidan oficialanacapänwa, uqhamaraqui Asael chachas jiwaraquïna.
31. Ucampisa Davidan arquirinacapajja quimsa pataca sojjta tuncani jakenacaruw jiwarayapjjaraquitayna, Benjamín tribunquirinacata, uqhamaraqui Abneran jakenacaparusa.
32. Ucat juc'ampi kheparusti, Asael jaken amayapajj Belenaru apatäjjaraquïnwa ucaruw imjjapjjaraquïna, awquipan sepulturaparu. Joab chachampi jakenacapampisti uca arum pakariw sarapjjaraquïna, khanjtanirusti Hebronaruw puripjjaraquïna.

Salmos 62:1-4
1. Dios sapanac ajayojjajj samarañ jicjjati, khespiyasiñajjajj jupat juti.
2. Jupaquiw khespiyitu, arjjataraquitu. Janiw pächascäti, jupaw imantasiñajjajja.
3. ¿Cunapachcamarac nuwañatac arcnakapjjetätasti? ¿Cunapachcamarac tincuyañ munapjjetätasti? ¿Cunapachcamarac llojjesir perkarjam uñjapjjetätasti? ¿Cunapachcamarac tincuñampïsquir uyurjam uñjapjjetätasti?
4. Nayar tincuyañac lup'isipqui, c'arisiñajj walpun cusisiyi; lacaquiw jach'añchapjjetu, chuymampisti ñankhachapjjetuwa.

Proverbios 16:10-12
10. Tatituw reyerojj yanapi amtäwinacapana jan pantjasisa chekapar uñjañapataqui.
11. Pesanacasa, tupuñanacasa Tatitunquiwa, chekaparu uñjañapataqui; take pesanacawa jupan lurata.
12. Reyinacajja jan wali luräwinacarojja uñisiwa, reyi konüñan chekapa lurañanacjjaru utt'ayatätap laycu.

Juan 4:1-30
1. Fariseonacajj yatipjjänwa Jesusajj walja arquirinïtapa, uqhamarac Bautisir Juanat sipansa juc'amp bautisatapa,
2. chekpachansa Jesusajj janiw bautiscänti, jan ucasti discipulonacapaw bautisäna.
3. Uc yatisinjja Jesusajj Judeat Galilearuw cuttawayjjäna.
4. Saräwipansti Samaria cheka pasañapänwa.
5. Samaria chek pascasinjja Sicar sat marcaruw puri, Jacobojj José yokaparu herencia orake churcatayna uca chekaru.
6. Ucawjanwa utjäna uma phuju, Jacobon phujupa sata. Jesusajj thac jutcäwin karjatänwa, ucatsti Jacobon phujupjjaruw kont'asi. Ucqhasti niya chica uru horasänwa.
7. Ucancquipansti Samarianquir mä warmiwa uca phujuru purini um apsusiñataqui. Jesusasti warmirojj sänwa: —Um wajjt'ita —sasa.
8. Discipulonacapasti ucchañcamajj mank'añ aliriw sarapjjatayna.
9. Samarianquir warmisti Jesusarojj saraquïnwa: —¿Cunatsa jumajj judiöcasina um mayista naya samaritänarusti? (Samaritanonacajj judionacampejj janiw walincapcänti.)
10. Ucjjarusti Jesusajj saraquïnwa: —Cuntejj Diosajj churqui uctejj yatismajja, uqhamarac qhititejj um mayctam uc yatiraquisma ucajja, jumaw nayarojj um mayitasmajja, nayasti jacquir umwa churaraquirisma —sasa.
11. Warmisti Jesusarojj saraquïnwa: —Tata, janiw cunamp um apsuñamas utjquiti, phujusa wali mankheraquiwa. ¿Cunjämatsa jacquir um churitasma?
12. Nanacan nayra Jacob awquejjaw aca phojjja jaytawayapjjetu; aca pachpa phujutwa jupajj umäna, uca pachparaqui wawanacapasa, uywanacapasa. ¿Jumasti jupat sipansa juc'ampïsmati? —sasa.
13. Jesusasti saraquïnwa: —Qhitinacatejj aca umat umapqui ucanacajj wasitampis pharjayasiscaquiniwa.
14. Ucampis qhititejj naya churcta uca umat umcani ucajja, janiw mayampis pharjayascjjaniti. Cawquïr umtejj nayajj churcta ucajja jupa pachpanwa jalsuni wiñay jacañ churañataqui.
15. Ucjjarusti warmejj saraquïnwa: —Tata, uca umay churita, jan mayampis pharjayasiñajjataqui, ni aca phujuru wasitat um apsur jutascañajjataquisa —sasa.
16. Jesusasti saraquïnwa: —Saram, chachamar jawsanim, ucatsti acar jutam —sasa.
17. Warmisti saraquïnwa: —Janiw chachanïcti —sasa. Jesusasti ucjjarojj saraquïnwa: —Chekacwa sasctajja: ‘Janiw chachanïcti’ sasajja.
18. Ucampis jumanjj pheska chachaw utjäna, jichha utjctam ucasa janiw chachamäquiti. Uca arsutamajj chekaquïsquiwa.
19. Uc ist'asinjja warmejj sänwa: —Tata, amuyatajjatjja mä profetjamaquïtawa.
20. Nayra samaritano awquinacajjajj acana, aca kollunwa Diosar yupaychapjjerïna, ucampis jumanac judionacajj sapjjtawa ‘Jerusalén marcawa yupaychañ chekajj’ —sasa.
21. Jesusasti saraquïnwa: —Warmi, ac siscsma ucajj chekawa, jan aca kollur ni Jerusalenar sarasin Diosar yupaychaña horasajj niyaw purinini.
22. Jumanac samaritanonacajj yupaychapjjtaw jan yatisina, ucampis nanacajj yatipjjtwa yupaychatanacajj-jja; khespiyasiñasti judionacatwa juti.
23. Ucampis horasajj puriniwa, anchhichhawa, Awquiru chekpach yupaychirinacajj Ajayun, uqhamarac cheka cancañampin yupaychapjjani. Awquejj uqhamwa yupaychayasiñ muni.
24. Diosajj Ajayuwa, qhitinacatejj jupar yupaychapqui ucanacajja Ajayuna, uqhamarac cheka cancañampina yupaychapjjañapawa.
25. Ucjjarusti warmejj saraquïnwa: —Nayajj yattwa Cristo sutini Mesiasan jutañapa; cunapachatejj jupajj jutcani ucqhawa take cun yatichistani —sasa.
26. Jesusasti juparojj saraquïnwa: —Ucajj nayätwa, qhititejj jumamp parlqui uca.
27. Uqhamäquïpanwa discipulonacapajj purinipjjäna. Jesusar mä warmimp parlquiri uñjasinjja muspharapjjewa. Ucampis janiw qhitis jisct'añataquejj ch'amanïcänti cuntejj uca warmimp parlcäna ucjja.
28. Ucatsti uc ist'asinjja warmejj uma wayuñap jaytasinwa marcarojj jali, ucatsti jakenacaruw yatiyaraquïna:
29. —Jutapjjam uñjiri, mä chachaw take luratanacajj khanañchitu. ¿Janit Cristöcpacha? —sasa.
30. Ucatsti marcat mistusinjja sarapjjänwa cawqhanccäntejj Jesusajj ucqharu.