A A A A A
Bible in one year
April 8

Josué 5:1-15
1. Jordanat inti jalanta token utjiri, amorreos sat marcan reyipajj ist'ataynawa uqhamarac Mediterráneo sat jach'a kota jac'an utjiri cananeos sat marcan reyipas ist'araquitaynawa cunjämtejj Tatitojj Jordán jawir wañt'aycatayna Israel marcapan pasaniñapcama uca, ucatsti wal ajjsarapjjäna Israel marcampi nuwasiñjja.
2. Ucapachaw Diosajj Josué chacharojj saraquïna: “Jumasti kalat cuchillonac lurasim; wastat israelit jakenacaru circuncidaraquim” sasa.
3. Uqhamaw Josué chachajj Diosaru ist'asina israelitanacarojj circuncidäna Aralot sisqui uca kolluna.
4. Josué chachasti uqhamwa luräna Egipto marcat mistunipcatayna uca guerran nuwasir jakenacajj thaquin jutcasina wasaran jiwarjjapjjatap laycu.
5. Take Egiptot mistunir jakenacasti circuncidatcamaquïpjjänwa; cawquïrinacatï wasaran jutcasina nacipcän ucanacajj janiw circuncidatäpcänti.
6. Cunjämatï israelit jakenacajj pusi tunca maranaca wasaran sarnakapjjänjja ucatsti cawquïri jakenacatï nuwasiñataqui ajllitäpcän uca jakenacajj, Egipto marcat mistunisajj takeniw thaquin jiwarjjapjjäna. Uca jakenacasti janiw Diosarojj ajjsartapcänti, ucatwa Diosajj jupanacarojj jan uñjaycänti cawquïri oraktï churapjjämaw siscatayna uca orakjja, uqhamaraqui cawquïri orakentï leches misq'is umjam jalcän uca orake.
7. Ucatwa Diosajj israelit jaken wawanacaparu ajllitayna, ucatsti Josué chachajj jupanacaruw circuncidäna, aca jakenacasti janiw circuncidatäpcataynati saräwincapjjatap laycu.
8. Cunapachatejj israelitanacajj take circuncidatäjjapjjän ucqhajj, jupanacajj campamentonac kamarapjjäna, uqhamata take circuncidatanacajj c'umarachasiñapcama.
9. Ucatsti Diosajj Josué chacharojj sänwa: “Aca lurasinwa jumanacat apakjjapjjsma Egipto marcan p'enkapa” sasa. Ucatwa uca chekarojj Gilgal sat sutini jichhürcama.
10. Israelitanacajj Gilgal sat chekaruw puripjjäna, ucatsti phajjsit tunca pusini urunac sarakataruw jupanacajj Pascua fiesta amtapjjäna, Jericó marca thiyana.
11. Pascua fiesta urusti israelit jakenacajj jan levaduran t'ant'a, uqhamarac trigo jamp'ita ucac mank'apjjäna, uca khepa urutsti yaputa achcäna ucaraqui mank'jjapjjäna.
12. Ucatsti Diosajj janiw maná sat mank'jja juc'ampi apayancjjänti, israelitanacasti cuntejj Canaán oraken achcänjja ucacwa uca marajj mank'apjjäna.
13. Mä urojj Josué chachajj Jericó marca jac'ancasina, jupan nayräjjaparojj mä jakew uñstäna mä espada ayt'ata. Josué chachasti uc uñjasajj mäquiw uca jake jac'aru maqhatäna aqham jisct'asa: —¿Jumasti nanac castätati jan ucajj timajjätacha? —sasa.
14. Uca jakesti saraquïnwa: —Janiw nayajj cawquïrictsa, nayasti juttwa Diosan ejercitop toketa —sasa. Ucatsti Josué chachajj p'ekep oraker alt'asin jisct'äna: —¿Cun sasas Diosajj sirvirip qhitanitu? —sasa.
15. Diosan ejercitopan jilïripasti aqham sänwa: —Wisqhum cayumat apsusim, cawqha chekarutï tact'cta ucqhajj kollanawa —sasa. Ucatsti Josué chachajj uqhamwa luräna.

Josué 6:1-27
1. Jericó marcan take puncunacapasti jist'antatänwa, janiraquiw qhiti jakes mistcänti ni mantcaraquïnsa israelitanacan jan mantapjjañapataqui.
2. Ucampis Josué chacharojj Diosajj sänwa: “Nayaw jumaru aca Jericó marca amparamar catuysma, uqhamaraqui reyipsa, soldadonacapsa.
3. Jumanacasti israelit soldadonaca, sojjta uruwa, urun mä cuti, Jericó marca muytapjjäta.
4. Pakallko sacerdotenacaw Diosan arcap nayräjjap sarapjjani sapa mayni mä pututu apt'ata, pakallko uröjjani ucqhajj, pakallko cutiw marcaru muytapjjäta, ucatsti sacerdotenacajj pututu phust'apjjani.
5. Cunapachatejj pututu phust'iri ist'apjjät ucqhajj, jumanacaw wali jach'at art'apjjäta, ucatsti take Jericó marcan perkanacapajj tincuraniwa. Ucatwa take jumanacajj chekaqui Jericó marcar mantapjjäta” sasa.
6. Josué chachasti sacerdotenacaru jawsasinjja sänwa: “Jumanacasti Diosan arcap apapjjam, ucatsti pakallkonirac sarapjjam pututunac apt'ata Diosan arcap nayrakata.”
7. Jakenacarusti saraquïnwa: “Jumanacasti marca muytapjjäta, cawquïri jakenacatï nuwasipcan ucanacasti Diosan arcap nayrakataparac sarapjjpan” sasa.
8. Takenis cunjämtï Josué chachajj siscäna uqhamwa lurapjjäna, pakallko sacerdotenacasti pututunacap phust'añ kalltapjjäna, Diosan arcap nayrakat sarasina.
9. Cawquïri jakenacatï nuwasiñatac sarapcän ucanacajj, sacerdotenacan nayrap sarapjjäna, khepat jutir jakenacasti Diosan arcap khepäjjaparac jutapjjäna, sacerdotenacasti jan samart'asaraquiw pututunacap phusapjjäna.
10. Josué chachasti israelitanacarojj sänwa: “Janiw cuna arus ist'asiniti janiraquiw cunsa parlapjjätati, nayaw sasipcäma cuna horasatejj jach'at art'apcäta ucjja” sasa.
11. Josué chachasti, Diosan arcapajj Jericó marca mä cuti muytpan, sänwa, uqhama lurasinjja jupanacajj campamentoruw cuttanjjapjjäna uca arumajj ucan kheparañataqui.
12. Khepärmanthisti Josué chachajj wali alwat sartasïna, ucatsti sacerdotenacajj Diosan arcap apjjarusinjja nayrakataruw sarapjjäna.
13. Uca pakallko sacerdotenacasti Diosan arcap nayrakat sarapjjäna pututunac phust'asisa, jupanacan nayrapa nuwasir jakenacajj sarapjjaraquïna, mayninacasti Diosan arcap khepataraqui jutapjjäna, janiraquiw pututunacas amuct'apcänti.
14. Khepa urusti jupanacajj mä cutiw Jericó marcarojj muytapjjäna, ucatsti campamentoruw cuttanjjapjjaraquïna; sojjta ururaquiw uqham lurapjjäna.
15. Pakallko uru purinipanjja, israelitanacajj alwat sartasinjja marcaruw muytañ kalltapjjäna, uca urusti pakallko cutiraquiw Jericó marcarojj muytapjjäna.
16. Cunapachatejj sacerdotenacajj pututunacap phust'apjjäna pakallko cutina ucqhajj, Josué chachasti takpacha Israel marcaruw säna: “¡Jichhasti jach'at art'apjjam! Diosasti Jericó marcjja jumanacaruw catuyapjjtam.
17. Aca marcanquirinacasti k'alaw tucjatäni, ucajj Tatitur loktatäcaspas uqhama, ucatsti Rahab warmiruquiw jacañapjja khespiyapjjäta uqhamaraqui take familiaparusa jupajj uñakeri jakenacasaru utapar catokatap laycu.
18. Jumanacasti janiraquiw cunsa aptasipjjätati, ni cunsa llamct'apjjaraquïtati aca marcanjja, jan ucasti takew t'unjatäñapa Tatitur loktatäcaspas uqhama. Jumanacatï jan uqham lurapcäta ucqhajj Diosan maldicionapaw aca Israel marcaru jutani.
19. Ucampisa kori, kollke, uqhamarac bronce, hierro ucanacajja Diosaru loktatäniwa, Diosataqui imataraquïniwa” sasa.
20. Uqhamaw takpach Israel marcajj jach'at art'apjjäna, sacerdotenacas pututunacap phust'apjjaraquïna, ucatsti mayac Jericó marcan perkanacapajj tincjjäna. Ucatsti take Israel jakenacaw marcarojj catuntañatac chhuqhuntapjjäna.
21. Ucjjarusti jiwarayapjjänwa espadampi take jakenacaru, warminacaru, waynanacaru, chuymani jakenacar cuna; uqhamaraquiw take uywanacaru, vacanacaru, ovejanacaru, asnonacarusa. Take cunatï Jericó marcan utjcäna ucanac jiwarayapjjäna, Diosaru mä sacrificio loktasina.
22. Josué chachasti uca pani uñaker sarir jakenacarojj sänwa: “Sarapjjam uca Rahab sat warmin utaparu, ucatsti irpsunipjjam take familiapamp chica, cunjämtï jumanacajj sapcatäta uqhamar phokhasa.”
23. Uca pani uñaker sarir jakenacasti Rahab warmin utaparu mantasinjja, juparu, awquiparu, taycaparu, jilanacaparu, take familianacaparuw ankaru irpsunïna, ucatsti campamentotjja juc'ampi jaya chekaruw jaytanipjjäna jupanacar jan cunas camachañapataqui.
24. Ucjjarusti israelit jakenacajj ninampiw Jericó marca phichhantapjjäna, take cunatï utjcäna ucanacampi. Kori, kollke, broncet, hierrompit lurat yänacacwa Diosatac jilt'ayjjapjjäna.
25. Josué chachasti Rahab warmirojj jacañapjja khespiyänwa uqhamarac familiaparusa, uca warmejj pani uñaker sarir jakenacaru utaparu imantatap laycu. Uca urut jichhürcamaw Rahab warmin wawanacapajj israelit jakenacampi chica jacasipqui.
26. Josué chachasti uca tiemponjja aca arunacwa Israel marcarojj arsuwayäna: “Diosasti maldispan cawquïri jaketï aca Jericó marca wastat sayt'ayani ucarojja; utan cimientopas jilïr yokap patjjaruraqui sayt'ayaspan, puncunacapasa sullca yokap pataruraqui sayt'ayaspan” sasa.
27. Uqhamaw Diosajj Josué chacharojj yanapäna, uqhamarac sutipasa take jakena aytataraquïnwa.

Salmos 42:6-11
6. Almajjajj llaquisqui ucapachajj jumat amtassma, Jordán jawiratpacha, Hermón, Mizar kollunacatpacha.
7. Mic'ay mankhanacatpach ist'asi, uma waraktaman khothutinacapajja; juman apayanit llojjma uma waraktanacajj, naya patjja llumiquipi.
8. Uru tokerojj Tatituw qhuyapayasitu, arum tokerusti janiw k'ochuñ karjascti, janiraquiw jacayir Diosajjat mayisiñs armascti.
9. Arjjatir Diosajjarojj sistwa: “Karkajjay, ¿cunatarac armasistasti? ¿Cunatarac llaquit sarnakañajjast waquisi, uñisirejjan t'akhesiyatasti?” sasa.
10. Timanacajjan sawcasitanacapatjja, ch'aqhanacajjamppachaw usutu, urpachaw sapa cut jisqhipjjetu: “¿Cawquincarac Diosamasti?” sasa.
11. Almajjay, ¿cunatarac llacthapistasti?, ¿cunatarac ajjsarthaptasti? Diosaruc suyt'am, wasitat jach'añchjjäta: ¡Jupaw cusisiñajjasa, Diosajjasa!

Proverbios 13:19-21
19. Amtäwiru phokherïñajja cusisiñawa; jan amuyt'an jakenacasti, janiw jan walinacat jithektañ munapquiti.
20. Suma yatiñan jakenacamp chica sarnakerejja, suma yatiñaniraquïniwa; jan amuyt'an jakenacamp chica sarnakeristi, jan walt'añaruwa puriraquini.
21. Jucharar jakenacajja jan walt'añampi arcnakatäpjjewa, ucampis asqui jakenacajja asquinacwa catokapjjani.

Lucas 9:18-36
18. Mä urojj sapaquiw Jesusajj Diosat mayisiscäna; ucaruw discipulonacapajj jutapjje, ucat Jesusajj jupanacar jisct'äna: —Jakejj ¿qhitiw sapjjetus nayarojja? —sasa.
19. Jupanacajj sapjjewa: —Yakhepanacajj: ‘Bautisir Juanaw’ sapjjtamwa; yakhepanacasti: ‘Eliasaw’ sapjjaractamwa. Mayninacasti: ‘Nayra profetanacat mayniw jactanpacha’ sapjjaractamwa —sasa.
20. Ucjjarusti jupanacaruw jisct'araqui: —Jumanacasti, ¿qhitiw sapjjestasa? —sasa. Pedrosti juparojj sänwa: —Jumajj Diosan qhitanit Cristo Tatitütawa —sasa.
21. Jesusasti walpun ewjjt'äna jan qhitirus acjj yatiyapjjañapataqui.
22. Ucat saraqui: —Jaken Yokapajj wali t'akhesiñapapuniwa; jilïri jakenacans jisc'achataraquïniwa, sacerdotenacan jilïrinacapampisa, uqhamarac ley yatichirinacampisa. Jiwayapjjaniwa, ucampis quimsür jiwatatjja jactaniniwa.
23. Ucjjarusti takeniruw saraquïna: —Maynitejj nayar arcañ munchitu ucajja, jupa quicpat armt'aspan, crusap apt'at sapüru arquitpan, jacañap apt'asirjamächi ucasa.
24. Jacañap khespiyasiñ munirejj apt'asiniwa, ucampis naya laycu jacañap apt'asiristi khespiyasiniwa.
25. ¿Cuna asquiraquïspa jaketaquisti aca orakpachajj jupancjjaspa, ucat jacañap apt'asispa ucasti?
26. Maynitejj nayat p'enkaschitu, uqhamarac arunacajjatsa ucajja, Jaken Yokapajj jupatjja p'enkasiraquiniwa cunapachatï Reyjam jutcani Awquipan jach'a cancañapampi, uqhamarac kollan angelanacampi ucqhajja.
27. Khanacwa sapjjsma, acancapqui ucanacat yakhepanacajj janiw jiwapcaniti janïr Diosan reinop uñjcasajja —sasa.
28. Acanac satapat quimsakallko uru sarakatarjamaw Jesusajj mä kollur oración lurir maqhatäna Pedrompi, Santiagompi, Juanamp cuna.
29. Ucatsti oración lurquipanwa Jesusan ajanupajj mayja tucuwayäna, wali jank'o lliphipquiri tucusa.
30. Ucapachaw pani chachanacajj uñstanisin jupamp parlapjjäna, ucanacasti Moisesampi Eliasampïnwa.
31. Mä jach'a alajjpach khanan muyuntataw jupanacajj uñjasipjjäna. Jupanacasti Jerusalén marcan Jesusan t'akhesis jiwañapjjatwa parlapjjäna.
32. Pedrompi chicäpcän ucanacajj wali iquimpi atipjatäpjjchïn ucasa uñnakasipcaraquïnwa, ucat jupanacajj Jesusan jach'a khanap uñjapjjäna, uqhamarac Jesusampi chicäcäns uca pani jakenacarusa.
33. Cunapachatï uca jakenacajj Jesusat jithektawayasipcäna ucqhawa, Pedrojj säna: —Yatichiri, sumaw acancatasajja. Quimsa chhujlla lurapjjä; mayjj jumataqui, mayrac Moisesataqui, maysti Eliasataqui —sasa. Pedrosti janiw cun satapsa amuyascänti.
34. Uqham parlquipanwa mä kenayajj jutasin jupanacarojj imantjjäna, ucat kenay taypincjjasina wal ajjsarapjjäna.
35. Ucapachaw kenay taypitjja mä arojj ist'asi, aqham sasa: “Acaw munat Wawajjajja, juparu ist'apjjam.”
36. Uca aru ist'atatsti Jesús saparuquiw uñj-jjapjjäna. Jupanacajj amuquïpjjänwa, janiw qhitirus cuns yatiyapcänti uñjapcataynas ucatjja.