A A A A A
Bible in one year
April 1

Deuteronomio 25:1-19
1. “Cunapachatejj yakhepanacajj ch'ajjwañana sarnakapjjani, ucanacajj tribunalaruwa uñstapjjañapa, juezanacan uñjañapataqui, ucatsti juezanacaw cawquïritejj juchanïqui ucarojj juchañchascani, jan juchanïqui ucarus janirac juchañchcaniti.
2. Juchan jaketejj mutuyatäñapajj waquischi, ucapachasti juezajj orakeruw liwnokayani, ucatsti jupa nayräjjanwa jawk'jayani, cuna juchanactejj lurqui uqhamarjama.
3. Janiw cunäquipansa pusi tuncat juc'ampjja azot'ipjjätati, jan uca jilanacaman juc'ampi usuchjatäñapataqui, uqhamat jumanac nayräjjan jan p'enkachatäñapataqui.
4. “Trigo tacsuri vacarojj janiw ñucu uscupjjätati.
5. “Cunapachatejj pä jilanacajj mayana jacapjjani, ucatsti maynejj jan wawani jiwjjani, ucapachasti uca ijma warmejj janiw casarasiñ puedquiti yakha jakempejja; jan ucasti chachapan jilapaw ijmarojj warmipat uñt'asjjañapa uqhamat uca warmimpejj familiachasjjani.
6. Cawquïri tayna wawatejj jupat nacini, ucajj jiwir jilapan sutipwa aparaquini, uqhamat sutipajj jan Israel marcan chhakhañapataqui.
7. Ucattejj uca jakejj jan cuñadapampi casarasiñ muncan ucqhajj warmejj tribunalar uñstiriw sarani uca jilïrinacar aqham siri: ‘Nayan cuñadojjasti janiw jilapan sutipajja Israel marcan jacañapjja munquiti, janiraquiw nayampis familiachasiñsa munquiti’ sasa.
8. Ucapachasti marcan jilïrinacajj juparojj jawsayapjjaniwa jupampi parlañataqui, ucattï jupajj jan muncani uca warmimpi casarasiñjja,
9. ucqhasti cuñadapajj uca jakerojj jac'achasisinjja, take jilïrinacan uñjcataw cayupatjja wisqhupa apsuni, ucatsti ajanupat thuscataraquini, aqham sasa: ‘Aqhamaw lurañajj cawquïri jaketï jan jilapan sutip sarayañ munqui ucarojja’ sasa.
10. Ucatsti take familiapajj Israel marcanjja: ‘Jan wisqhun familia’ sat sutimpi uñt'atäniwa.
11. “Cunapachatejj pani jakenacajj nuwasisipcani, ucat mayni jaken warmipajj jac'achasini chachapat arjjatasiñataqui, ucatsti maynirojj chhojjorasiñat catuntani,
12. ucqhasti uca warmirojj jan cuna qhuyapt'ayasisaw maysa amparap qharekapjjäta.
13. [13-14] “Alasiñansa, aljasiñansa janiw c'ari pesanac apnakapjjätati.
14. ***
15. Ucat sipansa tupunacamajj suma phokhatäpan jan faltquiri, uqhamat walja maranac jacapjjañamataqui, cawquïri oraktejj Tatitu Diosamajj churapcätam ucana.
16. Diosataquejj uqham luririnacajj ajjtascañätap laycu, uqhamaraqui jan cheka cancañan sarnakerinacasa.
17. “Amtasipjjam jumanacajj cunjämtejj Amalec sat marcajj thaquin lurapctam ucanacjja, cunapachatejj Egipto marcat mistusinipcäyät ucapacha.
18. Ucatsti amtasipjjaraquim cunjämsa jan Tatitu Diosarus ajjsarasa, thaquinjja nuwjapctam jumanacaru, karjata, ch'ama thayjtata uñjasina; khepäjjatarac nuwantanïna, ch'ama thayjtat khepa jutirinacarusa.
19. Uqhamasti Tatitu Diosamajj take uñisirinacamat khespiyätam, uca uñisirinacamasti cawquïri oraktï churcätam ucan muyuntatawa; jumanacasti Amalec jakenacjja aca oraketjja k'alwa chhaktayapjjäta, uqhamat jan qhitis jupanacat amtasiñapataqui. ¡Uca phokhañsti jan armasipjjamti!

Deuteronomio 26:1-19
1. “Cunapachatejj Tatitu Diosamajj churcätam uca oraker mantäta uqhamaraqui ucansa jacaraquïta,
2. ucapachajj cosechamat nayrakat achuri achunacapwa uca orakenacamatjja apäta, mä canastaru, cawqha chektejj Tatitu Diosamajj ajllisqui juparu yupaychañataqui uca chekaru.
3. Uca chekansti sacerdote utt'ayatäqui ucaruw uñstäta, ucatsti saraquïtawa: ‘Nayasti Tatitu Diosajja nayrakatanwa arsta: Jichhürunjja purjjtwa cawquïri oraktejj Tatitu Diosajj arupampi arsusina jiwasan awquinacasaru churä siscatayna uca orakeru’ sasa.
4. Ucatsti sacerdotejj uca canasta jumat apakasinjja, Tatitu Diosaman altärap nayrakataruw ucharaquini;
5. ucapachasti jumajj aca arunacwa Diosam nayrakatan khanañchäta: ‘Nayan awquinacajjasti, arameo jakenacäpjjänwa, juc'aniquiraquïnwa. Egipto marcaruw sarjjapjjäna, cawqhantejj jupanacajj jacañatac kheparapjjäna, ucatsti mä jach'a marcaw tucjjapjjäna, wali ch'amani, uqhamarac waljaniru tucusa.
6. Ucampis egipcionacajj janiw wal uñjapquitänti, azot'ipjjetänwa, llaquisiyapjjaraquitänwa, uqhamaraquiwa wal t'akhesiyapjjetäna mä esclavor tucuyasa.
7. Ucapachasti nanacajj awquinacajjan Tatitu Diosaparuw mayipjjäyäta jupan yanapt'añapataqui, ucatsti Diosajj ist'apjjetuwa nanacan mayisitanacajjarojja, uqhamaraquiw uñjaraquïna pist'añan sarnakatanacajjsa, wali inakatanacajsa, wali t'akhesit sarnakatanacajjsa.
8. Ucatsti Diosajj jach'a ch'amapwa uñacht'ayäna uqhamaraqui jach'a unanchanacampi, ajjsarcañ luräwinacampiw Egipto marcatjja irpsunipjjetu,
9. aca chekar irpanisina, cawqhantejj leches misq'is umjam jalasqui ucaru.
10. Ucatwa jichhajj apanta, Diosajj churquitus uca oraken nayrïri achunacapa’ sasa. “Ucjjarusti uca canastjja Tatitu Diosaman nayrakataparuw uchäta, ucat jupan nayräjjaparuraquiw quillt'asïta.
11. Ucatsti mä fiesta luraraquïta take cuntejj Diosamajj churtam jumaru, uqhamaraqui familiamaru ucanacata. Uqhamaraquiwa jumampi chicajj cusisipjjani take levitanaca, uqhamaraqui jaya marcat jutir jakenaca, qhitinacatï jumanac taypin jacapqui ucanaca.
12. “Cunapachatejj quimsïri marajj purinjjani, cawquïri maratejj take cosechanacamat sapa tuncat maya churañäqui uca mara, ucatsti apakaracsta sapa tuncat maya take achunacata, uqhamaraqui levitanacaru, yakha marcat jutir jakenacarus chursta, uqhamarac wajcharusa, ijmanacarusa jupanacan marcamana sist'asiñcam mank'apjjañapataqui ucapachasti,
13. jumajj Tatitu Diosamarojj sätawa: ‘Utajjatwa apanjjta take cunatejj cosechajjata jumar churatäqui ucjja, uqhamaraquiwa laquintjjaracta levitanacaru, yakha marcat jutir jakenacaru, wajchanacaru, uqhamaraqui ijmanacarusa, take ewjjanacamar phokhasa, jan cawquïri camachi arunacam armasaraqui.
14. Ucanacatsti janiraquiwa cunsa mank'caractti, cunapachatejj llaquisitäcta ni juchanacan jicjjatascta ucqhasa, ni jiwatanacarus churcaractti. Nayan Diosajja; take arunacamaruw jaysta, uqhamarac phokharacta.
15. Uñtanimay alajjpachatpacha, uca kollana jacäwimata, ucatsti bendicim Israel marcamaru, cawquïri oraktejj churapquista ucarusa, cawqhantejj leches misq'is umjam jalasqui, cunjämatejj awquinacajjaru arumampi arsuwaycäyäta uqhama’ sasa.
16. “Tatitu Diosamaw jichha urun ewjjtam juman uca leyinacaparjama, camachi arunacaparjama jacañamataqui. Take chuymampi, take jacäwimampiraquiw uca yatichäwinacarjama sarnakäta.
17. Jumaw jichhürun khanañchtajja, Tatitu Diosajj juman Diosamätapa, ucatsti arumampiraquiw arstajja jupan thaquipan arcañataqui, leyinacapa, camachi arunacapa wiñayatac phokhañataquisa.
18. Uqhamaraquiwa Diosajj jichhüruna khanañcharaqui, juma Israel marcajj jupan marcapätama, cunjämatejj arupampi arsuwaytam uqhama, take camachi arunacapa phokhañamataqui.
19. Juparaquiwa jumarojj jilïri marca, kollana, takenins jach'aru aptata jach'a cancañani marca tucuyaraquïtam, take marcanacat sipansa; cunjämatejj jupajj sisqui, Tatitu Diosamaru catuyat marcwa tucuyaraquïtam.”

Salmos 39:7-11
7. Jichhasti, Tatay, ¿cuna suyt'añajjarac utjisti? Jumaquiw nayan suyt'añajjätajja.
8. Take juchanacajjat khespiyita, t'ajjmar jakenacan nayat larusiñap jan munamti.
9. “Nayasti amutuw tucta, janiw lacajj jist'arcti, juman take cun sarayascatam yatta.
10. Janiquiy nayarojj juc'amp t'akhesiyistati, amparaman ch'amapajj tucjasquituwa.
11. Jumaw jakerojj juchapat mutuyasajj chekachtajja; thuthar uñtataw yänacap thuthanoktajja: jakejj mä samsump sasiquiwa.

Proverbios 13:4-6
4. Jayra jakejj walwa cunsa muni, ucampis janiw jicjjatquiti; k'apha jakesti walja yänacwa jicjjati.
5. Cheka jakejj c'ari arunacarojja uñisiwa, ucampis ñankha lurir jakejja jan wali parlatapatwa p'enkachata uñjasi.
6. Cheka luräwinacapaw cheka lurir jakerojj arjjati; jucharar jakerusti ñankha luratanacapaw tucji.

Lucas 6:1-26
1. Mä cutejj Jesusajj samarañ uruna trigo yapu taypwa sarascäna. Discipulonacapasti uca taypi pascasinjja trigo achunac q'ichirasipjjäna ucat amparanacapampi qhaqhurasisin mank'apjjäna.
2. Yakhep fariseonacasti uc uñjasinjja Jesusarojj jisct'apjjänwa: —¿Cunats jumanacajj uqham lurapjjta cunatejj samarañ urunjj jan waquisqui ucjja? —sasa.
3. Jesusasti jupanacarojj saraquïnwa: —¿Janit jumanacajj leet'apcta, cuntï mä cutejj Davidajj amigonacapampi mank'at awtjatajj lurcän ucjja?
4. Davidajj Diosan utaparuw mantäna ucatsti cunatejj sacerdotenacan mank'añapaquïcäns uca kollanäquis uca t'ant'anac mank'antäna, uqhamarac jupampïpcäns ucanacarus churaraquïnwa.
5. Ucjjarusti sascaquïnwa: —Jaken Yokapajj samarañ urjjarus munañaniraquiwa —sasa.
6. Yakha samarañ urunjja Jesusajj sinagogaruw mantäna ucat yatichañ kalltäna. Ucancascaraquïnwa cupi ampar pharsut mä jakejja.
7. Ley yatichirinacampi, fariseonacampisti Jesusarojj jamasat uñch'uquisipcäna samarañ urunjj kollanit janicha uc yatiñataqui, uqhamata juparu juchañchañataqui.
8. Ucampis Jesusajj yatïnwa cuntejj jupanacajj lup'ipcäna ucjja, ucat ampar pharsut jakerojj säna: —Sartasim, ucatsti qhä taypiru sayt'asim —sasa. Jakesti sartasinjja iyawsasaw ucqharu sayt'asi.
9. Ucatwa Jesusajj mayninacarojj saraquïna: —May jisct'apjjäma: Samarañ urunjja ¿cuna lurañas waquisi, asqui lurañati, jan ucajj ñankha lurañacha? ¿Jaker jiwañat khespiyañati, jan ucajj jiwayañach waquisi? —sasa.
10. Ucapachaw Jesusajj jupar muyuntatäcäna ucanacaru uñti, usut jakerusti siwa: —Amparam ayatatam —sasa. Jupasti iyawsasaw amparap ayatatäna, amparapasti c'umaräjjänwa.
11. Jakenacasti wal colerasipjjäna, ucat jupanaccamaw jisct'asipjjäna: ¿Camachsnas aca Jesusarojja?, sasa.
12. Uca urunacansti Jesusajj mä kolluruw oración lurir saräna, ucan jupajj arum pakariw Diosat mayisïna.
13. Willjtarusti arquirinacaparuw jawsäna, ucatsti tunca payaniruw jupanacat ajllisïna, ucanacarojj “apostolonaca” sasaw sutichäna.
14. Ucanacasti acanacänwa: Simón, juparusti Jesusajj Pedro sasaw sutichäna; Andrés, Simonan jilapa; Jacobo, Juan, Felipe, Bartolomé,
15. Mateo, Tomás, Alfeon yokapa Jacobo, Simón, jupasti cananista partidonquirïnwa.
16. Jacobon jilapa Judas, uqhamarac Judas Iscariotempi, khepatsti jupajj Jesusaruw aljantäna.
17. Kollut Jesusajj sarakanïna arquirinacapamp chica, mä pamparuw puripjjäna. Ucansti walja jakeraquiw utjäna take Judeapachata, Jerusalenata, Tiro, Sidón ucsa thiyampita. Acanacasti Jesusar ist'iri, uqhamarac usunacapat kollatäñataquiw jutapjjatayna.
18. Qhitinacatejj ñankha ajayunacan t'akhesiyatäpjjäna ucanacasti c'umarachatäpjjaraquïnwa.
19. Take jakenacaw Jesusarojj llamct'añ munapjjäna, ch'amapampi takerus jupajj waliptayatap laycu.
20. Jesusasti ucapachawa discipulonacapar uñtasinjj saraqui: “Cusisiñanïpjjtaw jumanaca pobrenacajja, Diosan reinopasti jumanacanquiwa.
21. “Cusisiñanïpjjtaw jichha awtjayasirinacajja, jumanacasti sist'atäjjapjjätawa. “Cusisiñanïpjjtawa jichha jachirinacajja, kheparusti larusipjjätawa.
22. “Cusisiñanïpjjtaw cunapachatï jakenacajj uñisipcätam ucapachajja, uqhamarac jupanacat jakonucupcätam, cunayman jan wali sapjjaraquïtam, uqhamarac sutinacamsa ñankha sutjam amuyapjjaraquini, Jaken Yokap laycu ucapachajja.
23. Wal cusisipjjam uqham t'akhesisajja, alajjpachan catokañanacamajj jach'äniwa; quicparacwa nayra awquinacapajj profetanacarojj lurapjjerïna.
24. “Ucampisa ¡ay, camachapcaquïta jumanaca kamirinaca, cusisiñanacamjja catokjjapjjtawa!
25. “¡Ay, camachapcaquïta jichha sist'atanaca, jumanacajj awtjayasipjjätawa! “¡Ay, camachapcaquïta jichha larusirinaca, jumanacajj jachapjjätawa!
26. “¡Ay, camachapcaquïta jumanaca, cunapachatï takenis jumanacata ‘Waliquiw’ sapcani ucapacha! Uqhamaracwa awquinacapajj c'ari profetanacarojj lurapjjerïna.