A A A A A
Bible in one year
March 6

Números 9:1-23
1. Israelitanacan Egipto marcat mistunipjjatapatsti, pä mara sarakatarusti, nayrïri phajjsinjja, Tatitu Diosajj Moisesaruw parläna, Sinaí wasarana, aqham sasa:
2. “Israelitanacajj Pascua fiestjja amtapjjañapaw cuna urutaquitejj amtatäqui uqhamarjama.
3. Tunca pusini uru sarakatarusti, aca phajjsina jayp'thapirusti, cawquïri yatichäwinactejj churapcsma uqhamarjamaw amtapjjäta.”
4. Ucatsti Moisesajj saraquïnwa israelitanacarojj Pascua fiesta amtapjjañapataqui.
5. Uqhamaw jupanacajj lurapjjäna, phajjsit tunca pusini uru jayp'thapqui uca uruna, Sinaí wasarana, cunjämatejj Tatitu Diosajj Moisesaru siscäna uqhamarjama.
6. Ucampisa mä kawkha jan k'omachat jakenacaw utjäna, jupanacan jiwat jaquir llamct'atanacap laycu; jupanacasti janiw uca urunjja Pascua fiestancapjjañapäcänti. Jupanacasti uca urpachaw Moisesan uqhamarac Aaronan ucaru sarapjjäna.
7. Moisesarusti sapjjaraquïnwa: —Nanacajj mä jiwat jake llamct'apjjta, ucatwa jan k'omachasipcti. ¿Uqhamasti janit nanacasti Tatitu Diosaru ofrenda loktapquiriststi, cawquïri urutejj amtatäqui uca urunjja, mayni israelitanacampi chicajja? sasa.
8. Moisesasti jupanacarojj sänwa: —Suyt'apjjam Tatitojj jumanacat yatichäwinacapa churquitani uca urcama —sasa.
9. Tatitu Diosajj Moisesaruw parläna, israelitanacar aqham sañapataqui:
10. “Take jumanaca, uqhamarac wawanacamasa, nayan jach'a cancañajjaruwa Pascua fiesta amtapjjañama, cawquïrinacatejj jan k'omäpqui, mä jiwatar llamct'atap laycu, uqhamarac cawquïrinacatejj jayan jicjjatasipqui, uqhamarac saräwincasipqui,
11. ucanacasti payïri phajjsit tunca pusin uru sarakataruw amtapjjani uca jayp'una. Jupanacasti ovej-jja mank'apjjaniwa jaru koranacampi, jan levaduran t'ant'amp cuna.
12. Janiw khepärmanthitaquejj cunsa uywatjja jilt'ayapjjätati, ni uywan cawquïri ch'aqhapsa p'acjapjjätati. Pascua fiestjja amtapjjätaw cawquïri yatichäwinactejj churapcsma uqhamarjama.
13. Ucampisa cawquïritejj Pascua fiesta amtañ apanucuni, k'oma jicjjatascasina, uqhamarac jan saräwinccasina, ucajj jilanacap taypitjja apanucutäniwa, uqham Tatitu Diosar jan ofrenda loktatap laycu, juchanacapatjja mutuyäwi catokaraquini.
14. “Cawquïri jaya marcat jutir jakenacatejj jumanac taypina jacasipqui ucanacasti Pascua fiestjja amtapjjaraquiniwa, nayan jach'a cancañajjaru, take cawquïri yatichäwinactï churcta uqhamarjama. Uca quipca yatichäwinacaraquiw lurasini yakha marcat jutir jakenacampejja, uqhamarac marca quipcan nacir jakenacampisa.”
15. Cunürutejj Arust'äwi Carpa lurapcän ucqhajj, kenayawa ucarojj muyuntäna. Jayp'untjjepansti, Arust'äwi Carpa patjjanjja, mä ninaraquiw uñstjjäna, ucatsti khepa uru khantatcamaw uca patancäna.
16. Uqhamapuniw lurasirïna. Kenayaw urunacajj carparojj muyuntäna, arumasti ninaraqui.
17. Cunapachatejj kenayajj carpa patjjat sartawaycän ucqhajj, israelitanacajj sarjjarupjjaraquïnwa, ucatsti cawqharutejj kenayajj sayt'cäna ucqharuraquiw jupanacajj puripjjäna.
18. Tatitun aruparjamaw israelitanacajj sarapjjäna, uqhamarac sayt'apjjänsa, uca chekaruw kheparapjjaraquïna, cunapachatejj kenayajj Arust'äwi Carpjjaru muyuntcän ucqhajja.
19. Cunapachatejj kenayajj walja urunaca Arust'äwi Carpa patjjan sayt'äna ucqhajj israelitanacajj sayt'apjjaraquïnwa Tatitu Diosar sirviñataqui.
20. Kenayatejj Arust'äwi Carpa patjjan juc'a urunacaqui sayt'än ucqhajj Tatitu Diosan arsutaparojj janc'aquiw sarjjarupjjäna, ucatsti Tatitu Diosan arsutaparjamaraquiw sayt'apjjäna.
21. Yakhepa horasajj kenayajj arumaquiw kheparäna, ucatsti khepärmanthejj wali alwat sartawayjjaraquïna; ucapachasti jupanacajj sarjjarupjjaraquïnwa. Uqhamaraqui, arumäpasa, urüpasa, cunapachatejj kenayajj sartawaycän ucqhajj jupanacajj sartawayapjjaraquïnwa.
22. Ucampis cunapachatejj kenayajj Arust'äwi Carpa patjjan pä uru, mä phajjsi, mä mara sayt'äna ucqhajj israelitanacajj sayt'apjjaraquïnwa, janiw juc'ampi sarcjjapjjänti. Ucampisa cunapachatejj kenayajj sartawayän ucqhajj jupanacajj sartawayapjjaraquïnwa.
23. Tatitu Diosan arsutaparjamaraquiw sayt'apjjäna, arsutaparjamaraquiw sarantapjjäna. Ucampisa Tatituruw sirvipjjäna, cunjämtejj jupajj Moisesaru arscatayna uqhamarjama.

Números 10:1-36
1. Tatitu Diosajj Moisesarojj sänwa:
2. “Pä kollke trompetanac lurasim martillompi lek'suta, ucasti jakenacar tantachañataqui, uqhamarac sarjjaruñataquiraquïniwa.
3. Cunapachatejj uca paypacha trompetanacajj phust'asini, ucapachajj takpach marcaw juma nayräjjaru tantacht'asini Tatitu Diosampi Jiquisiñ Carpäquis uca mantañaru.
4. Ucampisa cunapachatejj mä sapa trompetaqui phust'asini ucqhajj tribunacan jilïrinacapaquiw tantacht'asini.
5. Cunapachatejj trompetanacajj arnakasiñanacampi phust'asini ucqhajj cawquïrinacatejj inti jalsu tokena utjapqui ucanacaw sarjjarupjjani.
6. Payïri phust'äwirusti, aynach token utjapqui ucanacaw sarjjarupjjaraquini. Trompetanac phust'añatejj arnakasiñampïchini, ucajj sarjjaruñataquiraquïniwa.
7. Ucampisa trompetatejj alekaqui phust'asini ucajj marcan tantacht'asiñataquiquïniwa.
8. Sacerdotenacampi, Aarón chachan wawanacapampiquiw trompetanac phust'añataquejj utt'ayatäpjjani. Aca leyinacajj jumanacataquejj wiñayatac uchatäniwa.
9. “Cunapachatejj uñisirinacamajj quipca orakepan nuwantapjjätpan, jumanacan nuwasiri mistupjjañamataqui, ucqhajj trompetanac phust'apjjam, uqhamarac wali jach'at art'asipjjam. Uqhamatwa naya Tatitu Diosamajj jumanacat amtasï, ucatsti uñisirinacamatwa khespiyapjjäma.
10. Uqhamaraqui trompetanacjja phust'asipjjam, cusisiña urunacansa, fiesta urunacansa, machak phajjsïqui ucapacha, cunapachatejj nactayasin sacrificionac loktapcäta, uqhamarac sumancaña sacrificio loktasipcäta ucapacha. Uqhamatwa nayajj jumanacat amtasipjjäma. Nayaw jumanacan Tatitu Diosamätjja.”
11. Pä mara, payïri phajjsina pä tunca urunaca sarakatarusti, kenayajj sartawayjjänwa Arust'äwi Carpa patjjatjja.
12. Israelitanacasti Sinaí wasaratjja sartawayjjapjjaraquïnwa. Kenayasti Parán sat wasararuw sayt'araquïna.
13. Cunjämtejj Tatitojj Moisesaru siscatayna uqhamarjama.
14. Nayrakatasti cawquïri ejercitotejj Judá tribun wiphalapanïcäna ucanacaw sarantapjjäna, jupanacan jilïripasti Naasón sat Aminadab chachan wawapänwa.
15. Isacar tribun ejercitopan nayrakataparojj, Natanael sat Zuar chachan wawapaw sararaquïna.
16. Uqhamarac Zabulón tribun ejercitopa nayrakataparojj, Eliab sat Helón chachan wawapaw sararaquïna.
17. Ucapachasti, Arust'äwi Carpa jararasinjja Gersonan, uqhamarac Merarin wawanacapaw apjjarusin thaquinjam apapjjäna.
18. Ucjjarusti sarapjjänwa cawquïri ejercitotejj Rubén tribun wiphala panïqui ucanaca; jilïripasti Elisur sat Sedeur chachan wawapänwa.
19. Simeón tribun ejercitopa nayrakatarojj Selumiel sat Zurisadai chachan wawapaw sararaquïna.
20. Gad tribun ejercitop nayrakatarojj Eliasaf sat Reuel chachan wawapaw saräna.
21. Ucjjarusti Coat chachan wawanacapaw sarapjjäna. Kollan yänac apt'asita. Cunapachatejj jupanacajj puripjjän ucqhajj, niyaw Arust'äwi Carpajj sayt'ayatäjjäna.
22. Ucjjarusti, cawquïri ejercitotejj Efraín tribun wiphalapanïcän ucanacaw sarapjjäna, jilïripasti Elisama sat Amiud chachan wawapänwa.
23. Manasés tribun ejercitop nayrakatarojj Gamaliel sat Pedasur chachan wawapaw saräna.
24. Benjamín tribun ejercitop nayrakatarojj, Abidán sat Gedeoni chachan wawapaw saräna.
25. Mayni ejercitonac khepatsti sarapjjänwa cawquïri ejercitotejj Dan tribun wiphalapanïcäna ucanaca. Jilïripasti Ahiezer sat Amisadai chachan wawapänwa.
26. Aser tribun ejercitop nayrakatarojj, Pagiel sat Ocrán chachan wawapaw saräna.
27. Neftalí tribun ejercitop nayrakatarojj saränwa, Ahira sat Enán chachan wawapa.
28. Uqhamwa israelitanacan ejercitopajj sarapjjäna, cunapachatejj thaquinjam sarapcän ucapachajja.
29. Moisesasti mä urojj warmipan jilaparuw jawsäna, ucasti Hobab satänwa, Reuel sat madianita chachan wawaparaqui, ucatsti sänwa: —Nanacajj sarasipctwa cawquïri oraktejj Tatitojj churämaw sapquitu ucaru. Jutam, nanacampi chica sarañäni, sum uñjapjjaraquïma, Tatitojj arupampiw arsu Israel marcar munasiñampi uñjañataquejja —sasa.
30. Ucampis Hobab chachajj juparojj sänwa: —Janiw sarquiristti, orakejjaruquiw cuttjjä, cawqhancquitejj familianacajjajj ucaru —sasa.
31. Moisesasti sascaquïnwa: —Jan sarcamti, jumajj sum uñjtajja cawqharutejj wasaran puripquirista ucjja, uqhamarus jumawa irpapjjetasmajja.
32. Jumatejj nanacampi chica saräta ucqhajj jaljasiñäniw cawquïri suma yänactejj Tatitojj churquistan ucjja —sasa.
33. Uqhamaw Tatitun kollupat sarjjapjjäna. Tatitu Diosan suma Arust'äwiru Mantayir Arcapajj jupanacan nayrap saräna, quimsüru sararusti mä cheka thakapjjäna samart'añataqui.
34. Urusti, Tatitun kenayapajj jupanac patanjamwa saräna, cunapachatejj jupanacajj thaquinjam sarjjarupcän ucqhajja.
35. Cunapachatejj Diosan arcapajj sarjjarüna ucqhajj Moisesajj sänwa: “¡Sartasim Dios Tatitu! ¡Uñisirinacamas ananucutäpan!, ¡jumaru uñjasajj uñisirinacamajj jaltjjapjjpan!” sasa.
36. Ucampis cunapachatï arcajj sayt'cäna ucqhajj, Moisesajj sänwa: “¡Jichhajj cutt'anim Tata, israelan jan jact'caya ejercitoparu!” sasa.

Salmos 31:6-14
6. Jumajj acapach diosanacar yupaychirinacarojj uñistawa, nayasti Tatituruw take chuymamp iyawsta;
7. qhuyapayasiñam laycuw cusista, c'uchirasiracta. Jumaw llaquinacajj amuyistajja, jacañajjan chijinacap uñjaractajja;
8. janiw uñisirejjan amparapar catuyquistati, suma thaquiruw cayunacajj tact'ayistajja.
9. Tatay, nayat qhuyapt'ayasita, jan walt'añar jalantirjamätwa: nayranacajjajj llaquimp ch'amact'atawa, takpach janchejjasa, chuymajjas tucusisquiwa.
10. Jacañajjajj llaquimpiw aynacht'asqui, sarnakañ urunacajjajj aykoñampiw tucusisqui; ch'amajjajj llaquinacampiw t'uqhasisqui, janchejjas tucusiscaraquiwa.
11. Takpach timajjataquejj larusiñaquëjjtwa, uta jac'a masejjataquis sawcasiñaquëjjtwa, nayar uñt'irinacataquis ajjsarcañätwa, nayar uñjasajj cawqhans jaltjjapjjaquiwa.
12. Jiwatarjamaw armanucjjapjjetu, jiq'illitar uñtataquëjjtwa.
13. Jakenacan c'achhat parlasitanacap ist'twa, take cunaw ajjsarayitu; mayar tuct'asaquiw nayar aynacht'ayañataquejj amuyt'apjje, ¡nayar jiwayañataquiw amtapjjaraqui!
14. Nayasti, Tatay, jumaruw take chuymamp alcatsma: “Jumaw nayan Diosajjätajja” saracsmawa.

Proverbios 11:7-11
7. Cunapachatï jucharar jakejj jiwjje ucqhajja, tucusjjewa amtäwinacapasa, suyt'äwinacapasa.
8. Diosajj asqui jakerojj t'akhesiñatjja khespiyiwa, ucatsti jupa lantejj jucharar jakeruwa t'akhesiñaru uchi.
9. Jucharar jaken arunacapajj masinacaparojj tucjiwa, ucampis asqui jakenacan ch'iqhi cancañapaw khespiyi.
10. Asqui jakenacan nayrar sartatapatjja marcajj cusisiwa; ñankha jakenacan jiwatapatjja cusisiñat t'iscti.
11. Asqui jakenacan suma luratanacapampiwa marcajj jach'ar aptasi, ucampis jucharar jakenacan arunacapasti tucjiwa.

Marcos 9:30-50
30. Uca chekat sarjjasinsti, Galilea chekwa pasawayapjjäna, Jesusasti janiw qhitin yatiñaps muncänti.
31. Jupajj discipulonacapar yatichasajj sänwa: —Jaken Yokapajj jakenacan amparapar catuyatäniwa; jupanacasti jiwayapjjaniwa, ucatsti quimsüru jiwatat jactjjani —sasa.
32. Jupanacasti Jesusan parlatapjja janiw amuyt'apcänti, jupar jisct'añsa ajjsarapjjaraquïnwa.
33. Ucatsti Capernaum marcaruw puripjjäna. Utancjjasinsti, Jesusajj discipulonacaparuw jisct'äna: —¿Cunjjatarac jumanacasti thaquin ucatak parlapjjtasti? —sasa.
34. Jupanacasti janiw arsuñ munapcänti: “¿Qhitis jiwasanac taypin jilïrejja?” sasa thaquin parlapjjatapata.
35. Jesusasti kont'asisinwa tunca payani discipulonacaparojj jawsäna. Ucatsti saraquïnwa: —Qhititejj jilïriña muni ucajja jisc'ar tucuñapawa, takenir sirviñaparaquiwa —sasa.
36. Ucatsti Jesusajj mä yokall wawaruw jupanac taypir sayt'ayäna. Amparanacapar ichjjarusinsti, sänwa:
37. —Qhititejj aqham wawaru nayan sutejjan catokqui ucajja nayaruw catoketu. Nayar catokeristi janiw nayarus catokquituti, jan ucasti qhitanquitu ucaruw catokaraqui —sasa.
38. Juanasti Jesusarojj sänwa: —Yatichiri, mayniruw uñjapjjta sutimana ñankha ajayunac alissusquiri. Ucampis nanacajj jarc'apjjtwa jan jiwasanacamp chic sarnakatap laycu.
39. Jesusasti sänwa: —Jan jarc'apjjamti, janiw qhitis nayan sutejjar milagronac lurasinjja nayjjat jan walinac parlcaspati.
40. Qhititejj jan jiwasanac conträqui ucajja, jiwasanacampïsquiwa.
41. Qhititejj jumanacar Cristoncapjjatam laycu mä vaso umacsa nayan sutejjan wajjt'apjjätamjja, chekpachanwa jupajj mä churäwi catokani.
42. “Qhititejj nayar iyawsir jisc'a wawanacaru juchar puriyaspa ucqhajj, uca jakejj walïspawa mä jach'a molino kalampi cuncar chinuntasina kota mankharu jakontatäñapajja.
43. Amparamatejj juchar puriyañ munstamjja, walïspaw qharekjjañamajja, ucatsti juc'amp sumäspaw wiñay jacañar ch'ulla amparan mantañamajja; pä amparanpacha infiernor mantañamat sipansa, jan jiwarir ninan naqhañat sipansa.
44. [Qhayanjja lak'onacajj janiw jiwarquiti, ninas janiraquiw jiwarcaraquiti.]
45. Cayumatejj juchar puriyañ munstamjja, walïspaw qharekasjjañamajja, ucatsti juc'amp sumäspaw ch'ulla cayuni wiñay jacañar mantañamajja, pä cayunpacha infiernor jakontatäñamat sipansa, jan jiwarir ninan naqhañat sipansa.
46. [Qhayanjj lak'onacajj janiw jiwarquiti, ninas janiraquiw jiwarcaraquiti.]
47. Nayramatejj juchar puriyañ munstamjja, apsjjam, ucatsti juc'amp sumäspaw Diosan marcapar ch'ulla nayran mantañamajja, pä nayranpacha infiernoru jakontatäñamat sipansa.
48. Qhayanjj lak'onacajj janiw jiwarquiti, ninas janiraquiw jiwarquiti.
49. “Takeniw ninampejj jayumpjam jayunchatäpjjani, [take sacrificionacasti jayunchataraquïniwa].
50. Jayojj sumawa. Ucampis cunapachatejj jayojj ch'aphakäjjaspajja, ¿cunampirac suma jayu tucuyapjjasmasti? Jumanacanjja jayojj utjpan, ucatsti sumancañan jumanac purajj jacapjjaraquim.”