A A A A A
Bible in one year
March 22

Deuteronomio 5:1-33
1. Moisesasti Israel marcaru tantachthapisinjja sänwa: “Israelanquir jakenaca, sum ist'apjjam cawquïri leyinaca, arsutanactï jichhüru yatiyapcäma ucanacaru. Sum p'ekenacamar yatekapjjam, ucatsti take sarnakäwiman ucarjam sarnakapjjaraquim.
2. “Jiwasan Tatitu Diosasasti mä suma arust'äwiruw mantawayi Horeb sat kolluna.
3. Janiraquiw Diosajj awquinacasampiqui uca suma arust'äwir mantawayquiti, jan ucasti take jiwasanacampiwa, qhitinacatï jichhüruna aca chekan tantacht'atäsctan ucanacampi.
4. Diosasti jumanacampejj parlänwa ajanuy ajanu, mä nina taypita.
5. Nayasti ucancascäyätwa jumanacampi Tatitu Diosampi chica taypina, Diosan arunacapa jumanacar yatiyañataqui, jumanacajj ninaru ajjsarapjjatam laycu, ucatwa jan kollurojj maqhatapcäyätati. Ucatsti Tatitu Diosajj sänwa:
6. ‘Nayätwa juman Tatitu Diosamajja, nayaraquiw Egipto marcatsa irpsuniracsma, cawqhantejj esclavot sirviscäyät ucana.
7. ‘Janiw yakha diosanaca utjcätamti nayat sipanjja.
8. ‘Janiw yakha diosanac lurasïtati ni cunar uñtatsa, alajjpachanquirir uñtatsa, ni aca orakenquirir uñtatsa, ni kota mankhanquirir uñtatsa.
9. Janiw ucanacar quillt'asïtati ni yupaycharaquïtasa; nayätwa Diosamajja wali ch'amani, janiraquiw muncti yakhampïpjjañamsa. Awquinacan juchanacapatsti wawanacan wawanacaparuw azot'iraquëjja, qhitinacatejj uñisipquitu ucanacaru.
10. Ucatsti waranka warankanacaruw munasiñampi uñjaracta, qhitinacatejj nayaru munapquitu, camachi arunacajjsa phokhapcaraqui ucanacarojja.
11. ‘Janiwa Tatitu Diosaman sutipjja ina ch'usat aytasïtati. Diosasti mutuyaniwa qhitinacatï ina ch'usat sutip aytasqui ucanacarojja.
12. ‘Amtasïtawa samarañ urutjja, Tatitu Diosaru uca urun yupaychañamataqui, cunjämatï Diosamajj ewjjawayctam uqhama.
13. Sojjta uruw trabajäta take luräwinacama,
14. ucampis pakallko urojj samarätawa Diosamataqui. Janiraquiw jumajj cunsa lurätati, ni yokamasa, ni phuchamasa, sirvirimasa, uywatamasa, ni uywamasa, asnomasa, ni cawquïri animalamasa, ni yakha marcat jutiri utaman utjquis uca jakesa, uqhamata uywatamasa, sirvirimasa jumjamaraqui samarañapataqui.
15. Amtasiraquim Egipto marcan esclavot sarnakatama, ucatsti Tatitu Diosamaw apsuntam jach'a ch'amapampi, ucatwa Diosamajj amtaytam jumaru uca urun samarañamataqui.
16. ‘Awquimaru, taycamaru jach'añcham, cunjämtï Tatitu Diosamajj ewjjawayctam uqhama, uqhamata walja maranaca jacañamataqui aca Diosan churat orakena.
17. ‘Janiw jiwayätati.
18. ‘Janiw wachok jucha lurätati.
19. ‘Janiw lunthatasïtati.
20. ‘Janiw jake masim contra c'ari arunac parlätati.
21. ‘Janiw jake masiman warmip munapayätati; janiraquiw munätati utapsa, ni orakenacapsa, ni sirviripsa, ni uywatapsa, uywanacapsa, ni asnopsa, ni cunatejj jupancqui ucanacsa.’
22. “Aca arunacsti Tatitu Diosaw jach'at parläna mä nina ch'iyara kenay taypita, cunapachatejj take jumanacajj kollu thiyana tantachasipjjäyäta ucqha. Ucatsti Tatitojj janiw cunsa arscjjänti, uqhamaraquiwa uca arunacsa pä kala tablanacaru kellkäna, ucsti nayaruwa catuyitu.
23. Ucampis cunapachatï jumanacajj uca Tatitu Diosan arunacap ist'apcäyäta uca ch'amac mankheta ucqhajj uñjapjjtawa kollun nina akascatapa, ucatsti take jumanaca, tribunacan jilïrinacapa, uqhamaraqui Israelan jilïrinacapa ucanacaw nayampi parliri jutapjjtajja.
24. Ucatsti sapjjestawa: ‘Chekpachapuniwa jiwasan Tatitu Diosasajj uñacht'ayistu jach'a cancañapa, jach'a ch'amapsa, uqhamaraqui arupsa ist'aractanwa nina taypit mistuniri. Jichhüruw uñjtan Tatitu Diosan jakempi parlañ munatapa jan jakeru jiwayasa.
25. Ucat sipansa, ¿cunatarac jiwasasti jiwañäni uca ninan naqhantata? Wastattejj Diosan arup ist'añäni ucqhajj jiwañäniwa.
26. ¿Cawquïri jakerac utjaspa jacquir Diosan arup ist'iri, nina taypit parlasquiri, cunjämatï jiwasajj ist'tan janirac jiwctanti uqhama?
27. Ucampisa jumay Diosaru jac'achasim, ucatsti ist'araquïtaw take Diosan parlatanacapsa, ucatwa nanacar yatiyapjjetäta cuntï parlcätam ucanaca; nanacasti phokhapjjäwa cuntï sapquitäta ucanacjja’ sasa.
28. “Cunapachatï jumanacajj nayaru parlasipcäyät ucqhajj Tatitu Diosajj take parlatanacamwa ist'äna, ucatwa nayarojj sitäna: ‘Take aca marcan parlatanacap ist'ta, waliquiwa cuntï sapctam ucanacajja.
29. ¡Inampich jupanacajj uqham amuyunïpjjaspa, ucatsti jach'añchapjjetaspa, take urunacana camachinacajjsa phokhapjjaraquispa, uqhamatwa wawanacapasa, jupanacasa wiñayataqui sum sarapjjaspa!
30. Jichhasti sanim jupanacaru: Cuttjjapjjam carpanacamaru, sasa.
31. Ucatsti jumajj nayampi aca chekan kheparam. Nayaw churäma camachi arunaca, leyinaca, arsutanacajja, jupanacar yatichañamataqui, uqhamata sarnakäwinacapan uca camachi arunacarjam sarnakapjjañapataqui cawquïri oraktï churcä ucana.’
32. Uqhamasti Diosan take ewjjanacaparjamay jacäwinacaman sarnakapjjam jan cawcsarusa jithektasa.
33. Sarapjjamay cawquïri thactï Tatitu Diosajj uñacht'ayapctam ucanjama, uqhamata sum sarañanacamataqui, walja maranaca jacapjjañamataquiraqui cawquïri oraktï Tatitu Diosajj churapcätam ucana.

Deuteronomio 6:1-25
1. “Aca camachinaca, leyinaca, arsutanacapwa Tatitu Diosajj nayaru churitu jumanacar yatichañataqui, cawquïri orakenactï churapcätam ucan phokhapjjañanacamataqui.
2. Uqhamatwa jumanacan Tatitu Diosamarojj jach'añchapjjäta, phokhapjjaraquïta camachi arunacapa, leyinacapa churapcsma ucanacaru take jacäwinacamana; uqhamaraqui wawanacaman wawanacapasa, uqhamatwa walja maranaca jacapjjaraquïta.
3. Uca laycu ist'apjjam israelit jakenaca, ch'amañchasipjjaraquim uca arunac phokhañataqui. Uqhamatwa cusisita sarnakapjjäta, ucatsti mä jach'a marcaw uca oraken tucupjjaraquïta, cawqhantï leches misq'is umjam jalasqui, cunjämatï awquinacaman Diosapajj arupampi arsuwaycän uqhama.
4. “Ist'am Israel marca: Jiwasan Tatitu Diosasti mä sapaquiwa.
5. “Tatitu Diosamarusti take chuymamampi, take jacañamampi, take ch'amamampi munam.
6. “Juman chuymamaruy catokam cawquïri camachi arunactï jichhüruna churcsma ucanacjja.
7. Ucatsti wawanacamaruw yaticharaquïta; utamanccasina, thaquinjam sarcasina, uqhamaraquiw parlaraquïta iquintañataqui, sartañataquisa.
8. Uqhamaraquiwa uca camachi arunacjja amparamaru ñach'antata aparaquïta, paramansti mä chimpur uñtata.
9. Uqhamaraquiw kellkantäta uta puncuman postenacarusa, uqhamarac quipca uta puncumarusa.
10. “Jumanacan Tatitu Diosamasti cawquïri oraktï Abraham, Isaac, Jacob awquinacamaru churä siscatayna ucaruw puriyapjjätam. Uca orakesti wali jach'a, uqhamarac suma marcanacaniwa. Uca marcanacasti janiw jumanacan luratäcaraquiti.
11. Utanacas suma yänacan phokhantata, ucanacasti janiw jumanacan phokhantatäquiti, uqhamaraqui uma phuch'unacani, uca phuch'unacasti janiw jumanacan allitäquiti; uva uqhamaraqui olivo yapunacani, uca yapunacasti janiw jumanacan yapuchatäquiti; ucatsti take ucanacatwa jumanacajj mank'apjjäta sist'asiñcama.
12. Take ucanac pasjjani ucqhajj janipun jumanacajj Tatitu Diosat armasipjjamti, qhititï Egipto marcat irpsunipjjtam, cawqhantï esclavot sarnakascayäta ucata.
13. Jach'añchapjjam jumanacan Tatitu Diosamaru, jupa saparuquiraqui yupaychapjjam, ucatsti cunapachatï juramento lurapjjät ucqhajj Tatitu Diosan sutip aytasisina lurapjjaraquim.
14. Janiraqui yakha marcanacan diosanacaparus yupaychapjjamti.
15. Jumanacampïqui uca Tatitu Diosasti janiw munquiti yakhampïpjjañama, ucatsti jumanac tokwa colerasispa, take jumanacaru t'unjañataqui.
16. “Janiraqui jumanacan Tatitu Diosamarojj yant'apjjamti, cunjämtï Masah sat chekan lurapjjta uqhama.
17. Take chuymampiraqui phokhapjjam Tatitu Diosaman camachi arunacapjja, uqhamaraqui take ewjjanacapsa, leyinacapsa churapctam ucanaca.
18. Ucatsti lurapjjaraquim cunatï chekäqui, sumäcaraqui Diosan nayrakatapana ucanaca, uqhamat suma sarapjjañamataqui cawquïri oraktï Diosajj arupampi arscäna awquinacamar churañataqui ucaru mantapjjañamataqui.
19. Uqhamat Tatitu Diosajj take uñisirinacamaru jumanac nayräjjat ananucuñapataqui, cunjämtï arupampi arscäna uqhama.
20. “Cunapachatï wawanacamajj mä uru jisct'apjjätam: ‘¿Cun sañsa muni uca camachi arunaca, leyinaca, arsutanaca, cawquïrtï Tatitu Diosasajj churawayquistu ucanacajja?’ sasa.
21. Jumanacasti jupanacarojj sapjjätawa: ‘Jiwasasti faraón reyin esclavopäyätanwa, Egipto marcanjja, ucatsti Diosaw irpsunipjjestu wali ch'amapampi.
22. Jiwasasti uñjtanwa Diosan jach'a uñacht'äwinacapa, jach'a milagronacapsa, Egipto marcan luratapa faraón contra, uqhamaraqui take utapanquiri jakenac contra.
23. Ucatsti jiwasarojj irpsunipjjestuwa uca chekatjja, cawquïri oraktï arupampi arsusina awquinacasaru churä siscatayna ucaru, ucatwa jiwasaru aca orak churistu.
24. Ucatsti Tatitu Diosajj take uca camachi arunaca phokhañwa jaytistu, ajjsartañ chuymampi, uqhamata take uruna suma sarañasataqui, cunjämatï jichhürcam sarnakasctan uqhama.
25. Uqhamwa jiwasajj uca camachi arunacapa take chuymampi Dios nayrakatana cunjämtï ewjjawayquistu uqhamana phokhasajj walic lurasctanjja’ sasa.

Salmos 37:1-4
1. Ñankha lurir jakenacar uñjasajj jan k'apisimti, janirac ñankha luririnacarus yatjjäsimti,
2. janc'aquiw jupanacajj alinacjam pharsupjjani, ch'ojjña korjamaw wañsupjjaraquini.
3. Tatiturojj take chuymamp alcatam, asc luraraquim, oraken jacasim, chekaparac jacam;
4. Tatiturojj suma chuymamp munasim, jupasti chuyma mankheman mayisitamarjamaw churätam.

Proverbios 12:8-8
8. Yatiñan jakejj, yatiñapatjamajja jach'ar aptatäniwa, ucampis jan amuyt'ani ñankha jakejja jisc'achatäniwa.

Lucas 1:21-38
21. Ucchañcamasti, jakejj ankäjjan Zacariasarojj suyasipcäna. Ucch'a horasa templon chhakatäjjatapatjja jupanacajj mayjt'asipjjänwa: ‘Cunach pasjjpacha’ sasa.
22. Zacariasajj ankar mistjjän ucqhasti, janiw jakenacarojj parlañataqui ch'amanïcänti; ucapachaw jupanacajj Diosan utapan santuario satäquis ucqhan mä visión uñjatapa amuyapjjäna. Ucatsti jupajj señanacampiquiw parläna, amutütap laycu.
23. Cunapachatï Zacariasan Diosan utapan sirviñapajj tucusjjän ucqhajja, jupajj utaparuw sarjjäna.
24. Uca khepatsti Elisabet warmipajj usur jakëjjänwa, ucatsti pheska phajjsiw utapat jan mistcänti:
25. “Jakenacan jan juc'amp nayar jisc'achañapataquiw Tatitojj acjja luri nayampejj” sasa.
26. Sojjta phajjsi sarakatarusti Diosajj Gabriel angelaruw qhitanïna Galileanquiri Nazaret sat marcaru,
27. María sat mä virgen warmir uñjaniñataqui. Jupasti Joseampi casarasiñatac parlatänwa. Joseasti Davidan familiapat jutirïnwa.
28. Angelasti Marian ucar mantasinjja sänwa: —¡Aruntsmawa, María! ¡Diosan asquipamp phokt'ata! Tatitojj jumampiwa, [take warminacat sipana Diosan bendecitaraquïtawa] —sasa.
29. Mariasti angelar uñcatasinjja, uqhamarac uca arunacap ist'asinjja wal sustjasïna. Ucatsti chuymapan jisct'asi: “¿Cunats uqham aruntpachïtu?” sasa.
30. Ucat angelajj juparojj säna: —María, jan ajjsaramti, jumajj Diosan nayrakatapanjja asqui qhuyapayasiñapwa jicjjattajja.
31. Jichhajj usur jakeptätawa, ucatsti mä yokall waw wawachasïta; juparusti JESÚS sasaw sutichäta.
32. Jupasti jach'äniwa, uqhamarac: ‘Alajjpach Diosan Wawapaw’ sataraquïniwa. Ucatsti Dios Tatituw juparojj reyit utt'ayani nayra Davidarjama,
33. Israel marcar wiñay apnakañapataqui. Jupan uca marcar apnakañapajj janipuniw tucuscaniti —sasa.
34. Ucat Mariajj angelar jisct'äna: —Janïrajjay nayajj chachanïcstejja. ¿Cunjämatarac acasti uqham lurasispasti? —sasa.
35. Angelasti sänwa: —Kollan Ajayuw jumjjaru jutani, ucatsti alajjpach Diosan ch'amapaw mä kenayjam jumarojj imjjattätam. Ucatwa nascan uca wawajj Diosatac yakhachatäni, ucatsti Diosan Wawapa sataraquïniwa.
36. Uqhamaraquiw Elisabet familiamajj niya chuymanëjjasinsa, mä wawa wawachasini. Juparusti jakejj sapjjaraquïnwa: ‘Janiw wawanïcjjaspati’ sasa, ucampis niya sojjta phajjsëjjewa usur jakëjjatapajja.
37. Diosataquejj janiw cunas ch'amäquiti —sasa.
38. Ucat Mariajj säna: —Nayajj Tatitun sirviripätwa. Jupajj arsutaparjam nayampejj lurpan —sasa. Ucatwa angelajj sarawayjjäna.