A A A A A
Bible in one year
March 21

Deuteronomio 3:1-29
1. “Ucatsti yakha thaquinjam sarapjjtan Basán toker sarasina, ucampis uca marcan Og sutini reyipajj takpach ejercitopampiw jiwasampi nuwantasiñatac mistunïna Edrei sat chekaru.
2. “Ucatsti Diosajj nayarojj sitänwa: ‘Jan jumajj ajjsaramti, nayaw juparu, ejercitoparu, uqhamarac take marcaparu amparamar catuysma, uqhamata Sehón sat amorreonacan reyiparus lurcta uca quipca lurañamataqui, cawquïritï Hesbón marcan jaccäna uca’ sasa.
3. “Uqhamaw cunjämatï Tatitu Diosajj jiwasan amparanacasaru catuyistäna Og reyiru uqhamarac take ejercitoparusa. Ucatsti takeniruw jiwarayapjjtan jan maynirus jilt'ayasa.
4. Uqhamaraquiw take marcanacapsa catuntapjjtan, janiraquiw mä marcas jan catuntatajj uñjascänti. Takpachasti sojjta tunca marcanacänwa, take Argob sat chekanquir marcanaca, uqhamaraqui takpach Og sat Basán reyis apnakcäna uca marcanaca.
5. Take uca marcanacasti suma thuru uqhamaraqui jach'a alto perkanacan muyuntatänwa, jach'a puncunacani, uqhamaraqui wali thuru hierrot lurat barranacani, ucatsti yakha jan perkanïqui uca marcanacasti janiw jaqhutäcänti.
6. Take uca marcanac t'unjapjjtan, cunjämatï Hesbón marcan Sehón reyimpejj lurapctan uqhama, uqhamaraqui chachanacarusa, warminacarusa, wawanacarusa jiwarayasa.
7. Ucatsti jiwasataquejj take uywanaca, uqhamaraqui take cunanacatï jila alanïcän ucanacacwa catuntasipjjtanjja.
8. “Uqhamaw qhä tiemponjja uca pä amorreo reyinacan orakenacapajj jiwasan catuntatäna, cawquïrinacatï jacapjjäna Jordán jawirat inti jalsu tokena, Arnón jawira chekata Hermón sat kollunaccama.
9. (Aca Hermón kollurojj sidonio jakenacajj Sirión sasaw sutichapjjäna, amorreo jakenacasti Senir sasaraqui.)
10. Take pata pampanacan marcanacarac catuntapjjayätan, Galaad, Basán, sutin orakenaca Salca, Edrei chekacama, cawquïri marcanacatï Og reyin apnakatäcäna Basán marcana take ucanaca.
11. (Og sat reyiquiraquiw refaítas sat jach'a tansa jakenacatjja kheparjjäna. Iquiñapasti hierrot luratänwa; largorojj pusi metro anchorusti pä metroraqui, cunjämatï ucajj jichhacama amonitanacan Rabá sat marcapancasqui.)
12. “Cawquïri orakenactï catuntapcäyätan ucanacsti Rubén uqhamaraqui Gad uca tribunacaruw churäyäta, cawquïri oraketï Aroer sat chekat sarqui Arnón jawir thiyanjama, Galaad chicat kollunaccama takpach marcanacampi cuna.
13. Ucatsti cawquïri kollunacatï Galaad oraket jilt'ascäna, uqhamaraqui take Basán orakenaca Og reyejj apnakcäna ucanaca, ucatsti takpach Argob orakenaca, cawquïritï refaítas sat jach'a jakenacan jacäwipat uñt'atäcän take ucanacaracwa churäyäta chicat Manasés triburojja.
14. (Manasés tribun Jair sutini yokapajj Argob sat orakenacwa catuntasjjäna, Gesur, Maaca orakenacampis korpasqui uca chekacama, ucatsti sutinchänwa Basán orakerojja Havot-jair sasa pachpa sutipampi, cawquïr sutimpitï jichhürunsa uñt'atäsqui uqhama.)
15. Maquir chacharusti Galaad orakwa churäyäta.
16. Rubén, uqhamarac Gad tribunacarusti Galaad oraketa Arnón jawircamäquis uca orakenacwa churäyäta chica vallenjam pasasa, Jaboc sat jawircama, cawquïritï amonitanacan orakepat korpäqui ucacama.
17. Qhursa inti jalsu tokerusti Arabá sat orake churäyäta, Pisga sat kollun inti jalsu tokeru, cawquïri oraketï Jordán jawirampi korpasqui, ucatsti Cineret kota toketa sararaqui Jayun kotar puriñcama, cawquïritï Mar Muerto satäqui ucacama.
18. “Uca urunjja nayajj yakha ewjja churapjjaraquïyäsmajja: ‘Jumanacan Diosamaw aca orake amparanacamar catuyapjjtam. Ucatsti cawquïri jakenacatï nuwasiñ yatipcta ucanacajj armanacam apjjarusisin israelit jilanacaman nayrap sarapjjam.
19. Cawquïri marcanactï churapcäma ucanacanjja warminaca, wawanaca, uqhamarac uca walja uywanacamaquiw kheparjjani. Nayasti yattwa jumanacan walja uywanacanïpjjatamjja.
20. Cunapachatï Tatitojj jilanacamar samarañ churcani, cunjämatï jumanacar churapjjsma uqhama, uqhamarac jupanacas Jordán jawirat qhursancqui uca orakenac catuntasjjapjjani, ucapachaw jumanacajj cuttanjjapjjäta, cawquïri oraktï churapcsma ucarojja’ sasa.
21. “Josué chacharusti aca ewjja churaraquiyätjja: ‘Juman quipca nayranacamampiw uñjta cunjämtï Tatitu Diosamajj uca pä reyinacarojj lurqui ucjja. Uqhamaraquiw take marcanacampis lurani cawqhanjamtï pascäta ucanacansa.
22. Janirac jumajj jupanacaru ajjsaramti, juman Tatitu Diosamaw jumanacat arjjatasa nuwasiscani’ sasa.
23. “Uca pachpa horasanaracwa Diosarojj mayista:
24. ‘Dios Tata, jumaw aca sirvirimar ch'amam uñacht'aytajja. Janiraquiw yakha Diosajj jumjamajj utjquiti alajjpachansa ni acapachansa, cunjämatï jumajj jach'a uñacht'äwinac lurcta uqhama.
25. Jumaruwa achict'asma nayan maqhatañajjataqui qhursa Jordán jawira tokeru, nayasti uñjañ munta qhä suma orake, uqhamarac qhä suma kollunacsa, Líbano sat oraksa’ sasa.
26. Ucampis Diosajj nayataquejj colerasïnwa jumanacan jucha luratanacam laycu, janiraquiw mayisitajjarojj ist'añ munquitänti. Ucat sipansa aqham situwa: ‘¡Uqhacamaqui! Jan juc'ampi ucjjatjja parlistati.
27. Jichhasti maqhatamay qhä Pisga sat kollu pataru, uca patataraqui uñatatam amstaru, aynacharu, uqhamaraqui inti jalsu tokeru, inti jalanta tokerusa, ucampis janiraquiw Jordán jawir qhurcatarojj maqhatcätati.
28. Jichhajj churamay Josué chacharojj ewjjanaca, uqhamarac juparojj ch'amañcham, thuru sayt'asiyaraquim, jupaw marcan nayrap sarani, uca orakenacsa catuntaraquini, cawquïrtï jichhajj uñjta ucanaca’ sasa.
29. “Ucatsti jiwasajj Bet-peor uñcatas valleruw kheparjjayätanjja.

Deuteronomio 4:1-49
1. “Jichhasti Israelit jakenaca, ist'apjjam cawquïri leyinactï, yatichapcsma ucanaca. Uqhamarac uca leyinacar phokhasarac sarnakapjjam, jacapjjaraquimsa, cawquïri oraktï awquinacaman Tatitu Diosapajj churapctam ucanjja.
2. Janiraqui cawquïri ewjjanactï churapcäma ucanacarojj jiljjatayapjjamti ni apakapjjamsa. Jaysapjjam Tatitu Diosaman camachi arunacap churapcsma ucarojja.
3. Jumanacasti uñjapjjtaw cuntï Tatitojj Baal-peor sat chekanjja lurqui ucjja, uqhamaraquiw uñjapjjta cunjämsa jumanac taypit jiwarayäna take cawquïri jakenacatï uca chekanquir diosaru yupaychapjjäna ucanacarojja.
4. Ucampis cawquïrinacatï jumanacat Tatitu Diosamaru take iyawsañampi arcapjjta ucanacajj jacasipctawa.
5. Nayasti jumanacarojj yatichapjjsmawa take cawquïri leyinactï Tatitu Diosajj ewjjawayquistu ucanaca, jumanacan uca leyinacarjam sarnakapjjañamataqui cawquïr oraktï churapcsma ucana.
6. Uqhamaraqui uca leyinacjja jumanacampi chica imapjjam ucar phokhasaraqui sarnakapjjam, uqhamatwa take marcanacas yatipjjani, jumanacan suma amuyt'anïpjjatama; cunapachatï uca leyinac yatipjjani ucqhajj jupanacajj sapjjaniwa: ‘Cunja suma amuyt'an marcas aca marcajj’ sasa.
7. Jichhasti, ¿cawquïri jach'a marcarac utji, diosanacapampi jupanac jac'ana, cunjämatï jiwasan Tatitu Diosasajj jac'asancqui, sapa cuti cunapachatï jupar mayistan uqhama?
8. Uqhamaraqui, ¿cawquïri jach'a marcaraqui utji leyinacapasa, arsutanacapas cheka, cunjämtï nayajj aca yatichäwinac jumanacar churapjjsma uqhamajja?
9. Jichhasti sum imapjjam, janirac armasipjjamti take cuntï uñjapcta ucanacjja ni chuymanacamatsa mistpanti, ucat sipansa yatichapjjam wawanacamansa wawanacaparu.
10. “Cunapachatï jumanacajj Diosan nayrakatapan jicjjatasipjjäyäta Horeb kolluna ucqhajj, Tatitojj nayarojj sitänwa: ‘Tantachthapim takpach marcaru arunacajj ist'apjjañapataqui, uqhamaraqui ajjsarapjjañapataqui jacañ urunacapana, ucatsti wawanacapar quipca yatichapjjañapataqui’ sasa.
11. Jumanacasti kollu thiyarojj jac'achasipjjtawa, cawqhattï mistüna akasquir ninanaca wali altocama, uñjasiraquïnwa ch'iyar jiwk'e ch'amac kenaya.
12. Ucatsti Tatitojj nina taypitwa parlanipjjäyätam. Jumanacasti ist'apjjtaw arunacapjja, ucampis janiraquiw cuna jakëtapsa uñjapctati.
13. Tatitusti uñacht'ayapjjtamwa jupan suma arust'äwipjja, cawquïritï Tunca Camachinacana, pä kalanacar kellkata, jumanacan uca camachinacarjam sarnakapjjañamataqui.
14. Nayaruw Tatitu Diosajj ewjjetu jumanacaru leyinaca, arsutanacapa yatichañataqui, cawquïri oraktï churapctam ucan phokhañanacamataqui.
15. “Cunurutï Tatitojj parlapcäyätam nina taypita, Horeb kollunjja, ucqhajj janiw cunsa uñjapctati. Ucanacatsti walirac amuyasipjjam,
16. jan jumanacan uca yakha diosanac lurañ jucharu puripjjañamataqui, cawquïrinacatï chacharu, warmiru uñtat luratäqui ucanacjja,
17. ni animalanacaru, jamach'inacaru,
18. asirunacaru ni chawllanacar uñtatsa.
19. Cunapachatï alajjpach uñtasina intiru, phajjsiru, warawaranacaru uqhamaraqui take ucanacar uñtapjjät ucqhajj jan ucanacar yupaychapjjamti, ucanacsti Dios Tatitu Awquisaw luri take acapach orakenquir marcanacataqui.
20. Ucasti jumanacarojj Tatituw irpsunipjjtam qhä Egipto hierro umatatayañ hornota, uqhamarac jupan marcapa tucuyapjjtam, cunjämatejj jichhajj jicjjatasipjjta uqhama.
21. Ucampis Tatitu Diosajj jumanacan juchanacam laycuw nayatac colerasi, ucatsti juramento luri nayan Jordán jawir jan maqhatañajjataqui ni uca suma orak churapctam ucar mantañajjataquisa.
22. Uqhamasti nayajj aca marcan jiwä, janiraquiw Jordán jawirsa qhurcataru maqhatcäti, ucampis jumanacajj uca jawirjja maqhatapjjätawa, uca suma oraksa jumanacataquiw catuntasipjjäta.
23. Ucampis amuyasipjjam janirac armasipjjamti cuna suma arust'äwirutï Diosampi mantapcta ucanacjja. Janiraqui cuna casta ni cunar uñtat yakha diosanacsa lurasipjjamti, cawquïri lurañjjattï Tatitojj sapctam: ‘Janiw cunsa lurapjjätati’ sasa.
24. ¡Jumanacan Tatitu Diosamasti, tumpasir Diosawa, take cuns naqhantir ninjamawa!
25. “Cunapachatejj jumanacajj wawanacanëjjapjjäta, uqhamarac allchhinacani, jumanacajj awquëjjapjjäta uca orakena, ucqhajj jumanacajj yakha diosanac lurasisa jucharu puripjjäta, cuna animalar uñtatsa, uqhamat Tatitu Diosama nayrakatana mä jach'a jucha lurasina ucata jupar colerayapjjät ucqhajj,
26. nayaw jichha uruna mä testigot uscta alajjpachampiru acapachampiru jumanacan chhaktañanacamataqui Jordán jawira qhursa tokena. Janiraquiw walja urunaca uca orakenjja jacapcätati, jan ucasti take jumanacaw t'unjatäpjjäta.
27. Tatitusti take jumanacaruraquiw yakha marcanacar ananucupjjätam, ucatsti mä juc'aniquiraquiw jumanacatjja uca marcanacan jilt'apjjaraquïta.
28. Ucansti jaken lurat diosanacaruw sirvipjjäta kalata, lawata lurat diosanacaru, jupanacasti janiw uñjapquiti janiraquiw ist'apquisa, mank'apquisa ni samsupquisa.
29. Ucampis jumanacatï uca chekan Tatitu Diosaru thakhapjjäta take chuymampi, take jacañampi ucqhajj jicjjatapjjätawa.
30. Cunapachatï jumanacajj take uca t'akhesiñanaca, llaquisiñanaca pasapjjäta, uqhamaraqui Tatitu Diosarus cuttapjjäta, iyawsapjjaraquïta ucqhajj,
31. Diosasti suma chuymanïtap laycojj janiw jaytanucupcätamti ni t'unjapcätamsa, janiraquiw armascaniti cawquïri arust'äwirutï awquinacamampi mantawayqui ucanacsa, ni arupampi arsuwayqui ucanac phokhañsa.
32. “Jichhasti thaktapjjam jumanacat juc'ampi nayra tiemponaca, cunapachatï Tatitu Diosas jakeru lurcäna aca orakena uca tiempotpacha; sarapjjaraquim take acapach orakenjamsa, ucatsti jisct'apjjam cunapachach aqham jach'a lurasïwinacajj paspachäna cunjämtï jichhajj pasqui uqhama.
33. ¿Utjpachati cawquïri marcasa jumanacjam Tatitu Diosar ist'iri nina taypitpach parlasinquiri?
34. ¿Utjaracpachati mä diosasa marcaparu ajlliri yakha marcanac taypita, wali yant'anacampi, unanchanacampi, milagronacampi, guerranacampi, ucatsti wali ch'aman amparampi catuntasaraqui, uqhamaraqui wali ajjsarcaña luräwinac lurasaraqui, cunjämatï Tatitu Diosajj jumanacataqui lurqui Egipto marcan uqhama?
35. Ucanacsti jumanacarojj uñacht'ayapjjsmawa jumanacan chekpach Diosätapa yatipjjañamataqui, uqhamaraqui jupat sipansa jan yakhajj utjatapa.
36. Jupasti alajjpachatpachwa jumanacar yatichapjjtam, aca orakensti jach'a ninapjja uñacht'ayapjjaractamwa, arunacapsti nina taypit ist'apjjaractajja.
37. Juparaquiwa nayra awquinacamarojj munäna, ucatsti wawanacaparuw ajlliraquïna, Egipto marcat jach'a ch'amapampi khespiyanisa.
38. Jumanac nayräjjatsti walja marcanacaruwa, jumanacat sipansa juc'ampi ch'amani marcanacaruw jakonucu, ucat orakenacapa catuntasipjjañamataqui, cunjämtï jichhajj lurasqui uqhama.
39. “Uqhamasti suma amuyt'asipjjam, Tatitaquiw Diosajja alajjpachansa, acapachansa, janiw yakhajj jupat sipan utjquiti.
40. Phokhapjjam jichhüruna cawquïri leyinaca, camachinactï churapcsma ucanaca, ucatsti sumaquiw sarnakapjjäta, jumanacasa, wawanacamasa, uqhamaraqui walja maranacaw jacapjjäta cawquïri oraktï Tatitu Diosajj churapcätam ucanjja.”
41. Ucatsti Moisesajj quimsa marcanac ajllïna Jordán jawirat inti jalsu tokeru,
42. cawquïri jaketï masiparu jan muncasin jiwaycaspa jan cuna nuwasisina ucajj uca marcaru jaltjjañapataqui, jan juchañchatäñataqui uqhamata khespiyasiñapataqui.
43. Uca marcanacasti acanacänwa: Beser marca, wasara pata pampana; Rubén sat tributaqui; Ramot sat marca, Galaad orakena, Gad sat tributaqui; ucatsti Golán sat marca Basán orakena, chicat Manasés tributaqui.
44. Aca yatichäwinacwa Moisesajj Israel marcaru churäna,
45. cawquïri camachinaca, leyinaca, arsutanacaptï Moisesajj Israel marcaru churcäna, cunapachatï jupanacajj Egipto marcat mistunipcäna ucqha,
46. cunapachatï jupanacajj Jordán jawirat inti jalsu tokena jicjjatasipjjäna, cawquïri valle Bet-peor sat orake uñcatasincqui ucqhana; Sehón sat amorreonacan reyipan orakepana. Sehón reyisti Hesbón marcan jacäna, ucatsti Moisesampi Israel marcampiw juparu atipjapjjäna, cunapachatï israelitanacajj Egipto marcat mistunipcän ucqha.
47. Israelitanacasti takpach orakenacapwa catuntapjjäna, Og sat Basán marcan reyipan orakenacapamppacha, cawquïri pani amorreo reyinacatï jacapcäna Jordán jawirat inti jalsu tokena ucanaca.
48. Jupanacan orakenacapasti muytanïnwa Aroer chekata, Arnón jawira lacanacata, Sirión sat kollunaccama, cawquïr kollutï Hermón sutinïcaraquïna.
49. Ucatsti take Arabá sat orakenaca, Jordán jawirat inti jalsu tokena, Mar Muerto kotacama Pisga sat kollu cayu irancama.

Salmos 36:7-12
7. ¡Diosay, munasiñamajj muspharcayawa! Chhekhanacamamp imantayasiñataquiw jakenacajj jumar thakapjjtam,
8. utaman utjir mank'ampejj sist'atäpjjewa, mojjsa uman jawirat umayaractajja:
9. juman jacquir umajj utji, khanamasti khan uñjayapjjetu.
10. Jumar uñt'irinacarojj qhuyapt'ayascaquim, k'oma chuymaninacarusti chekapar uñjascaquim;
11. jach'a jach'a tucurin cayupajj jan taquisitpati, ñankha lurir jaken amparapas janirac jakonucutpati.
12. Ñankha luririnacan aynacht'añap uñjapjjpan, jan mayampitac tincur uñjapjjaracpan.

Proverbios 12:7-7
7. Ñankha jakenacajj aynacht'apjjewa, ucatsti ucaraquiw tucuyapajja, ucampis asqui jaken utapasti janiw tucjatäcaniti.

Lucas 1:1-20
1. Walja jakenacawa, cunatï jiwas taypinjj pasawayqui ucanacatjja cunjämäquitejj ucjja saräwiparjam kellkañ yant'apjjäna.
2. Cunjämatï kalltatpach uñjapcäyätans ucanacajj uqhampachwa jiwasarojj yatichapjjestu, uqhamaraquiw jupanacajj Diosan arunacap yatiyañans yanapapjjäna.
3. Nayasa uqhamaraquiw wali amuyumpi take ucanacatjja kalltatpacha suma yatjjatta. Ucat nayataquejj walicjamaquiw amuyasi, acanac saraparjama jumar kellkaniñajja, munat Teófilo,
4. cawquïri cheka arunactï yatichapcäyätam ucanac sum yatiñamataqui.
5. Cunapachatejj Herodesajj Judean reyïcänjja ucqhasti mä sacerdotew utjäna, Zacarías sata. Jupasti Abdías castaraquïnwa. Warmipasti Elisabet satänwa, ucasti Aarón sacerdoten familiapat jutiriraquïnwa.
6. Dios nayrakatanjja panpachaniw asqui jakëpjjäna, uqhamaraquiw Diosan camachi arunacapsa, leyinacapsa phokhapjjerïna. Uqhamata jupanacarojj janiw qhitis, ni cunats juchañchañïrjamäcänti.
7. Janiraquiw wawanïpcänti, Elisabetasti janiw wawachasirïcänti. Uqhamarus jupanacajj wali chuymanëjjapjjänwa.
8. Mä uruwa Zacarías casta sacerdotenacarojj incienso loktañajj wact'äna.
9. Sacerdotenacan luräwinacaparjamasti, Zacariasaruw suertet wact'äna Tatitun utapan santuarior mantasin incienso loktañapajja.
10. Cunapachatï jupajj incienso loktascän ucqhajja, take jakenacajj ankäjjan Tatitut mayisipcäna.
11. Ucapachaw Tatitun mä angelapajj Zacariasarojj incienso altaräquis uca cupëjj thiyan sayt'at uñstäna.
12. Zacariasasti angelar uñjasinjja wali sustjataw kheparäna walirac ajjsaräña.
13. Angelasti juparojj sänwa: —Zacarías, jan ajjsaramti, juman mayisitamarojj Diosajj ist'tamwa, Elisabet warmimasti mä yokall wawa wawachasini. Ucarusti “Juan” sasaw sutichäta.
14. Ucatsti wali cusisitäyätawa, waljaniraquiw jupan nacitapatjja cusisipjjani.
15. Aca wawajj Dios nayrakatanjja jach'äniwa. Janiraquiw umcaniti vinsa, ni cuna casta umañanacsa. Jupajj janïr nasquis ucqhatpacha Kollan Ajayun phokt'atäniwa.
16. Israelan wawanacapatjj waljaniruraquiw Tatitu Diosapar cutiquipstayanini.
17. Aca Juanasti Tatitun nayrakatap sarani, Elías profetan ajayupat ajayuni, uqhamarac ch'amapat ch'amani, awquinacaru wawanacapampi sumancthapiyañataqui, jan jaysasirinacarusti jaysañ yatekapjjañapataqui. Uqhamatwa jakenacarojj waquichani Tatitur catokapjjañapataqui —sasa.
18. Zacariasasti angelarojj jisct'änwa: —¿Cunjämats uqham phokhasiñap yatiristjja? Nayajj niya chuymanëjjtwa, warmejjas chuymanëjjaraquiwa —sasa.
19. Angelasti sänwa: —Nayajj Gabrielätwa, Diosan munañap luririraqui. Jupaw nayarojj qhitanitu aca suma yatiyäwinac jumar yatiyañataqui.
20. Ucampis jichhajj cuntejj siscsmas uca arunacar jan iyawsatam laycuw amutu tucüta, ucatsti janiw parlcjjätasa arscjjätasa wawaman naciñapcama. Acasti horasaparojj phokhasiniwa —sasa.