A A A A A
Bible in one year
November 3

Lamentaciones 1:1-22
1. ¡Walja jakenacani marcajj cunja sapaquis uñjasjje! Marcanacan jilïripa marcajja mä ijma warmir uñtataquëjjewa. Ch'ama irnacañanacampi t'akhesiyataw jichhajj uñjasi, uñtcañ suma marcajja.
2. Arumanacasti jachcäwiw tucusiscaraqui; ajanunacapansti jachaquiw jalascaraqui. Take munirinacapasti janiw maynis jupar chuymachirejj utjquiti. Take amigonacapasti mayswa uñtjjapjje, uñisirinacapaw tucjjaraqui.
3. T'akhesiñanacampitsa, ch'ama tucuñanacampitsa, Judá marcajj jichhajj preso apatawa. Qhititejj nayrajj marcanac taypin apnakcäna ucasti jichhajj janiw samarañ jicjjatcjjeti. Jupar arcnakerinacasti, jicjjatapjjaraquiwa, ucatsti jan walt'añanacanwa uñjasiyapjjaraqui.
4. ¡Sionan thaquinacapajj llaquiscayawa! ¡Janiw qhitis cusisiñaru jutirejj utjcaraquiti! Marcan puncunacapasti ch'usa wasarar tucutawa; sacerdotenacasti jachapjjaraquiwa, tawakonacas wali jachapjjaraqui, Jerusalén marcasti wali t'akhesiraqui.
5. Uñisirinacapaw jichhajj apnakapjje, uñisirinacapasti kamirquipstapjjaraquiwa. Tatitupï uqham t'akhesiyejja, sinti jach'a juchanac luratap laycu. Wawanacapasti jaya marcar preso apatawa, uñisirinacapan apatawa.
6. Uqham suma Sión marcan sarnakäwipasti jichhajj chhakatawa; jilïrinacapasti tarujanacar uñtataw, pasto thakhasa sarnakapjji; jiwayirinacap nayrakatansti cayu katatisisaw nayraru sarasipcaraqui.
7. Jerusalenasti qhaya urunacatwa amtasi, cunapachatï sapaqui, llact'ata kheparcäna uca urunacata. Cuna kamir cancañapatejj nayrajj utjcäna take ucanacatwa amtasi; cunjämsa uñisiripajj amparapar purïna take ucanacwa amtasi, janiraqui qhitis jupar yanapt'irejj jutcänti ucanacwa amtasi, uñisirinacapasti jupar uñjasinjja, aynacht'atapatjja larusipjjänwa.
8. Jerusalenajj sintpunwa juchañchjasiraqui, jisc'achayasiñcamaw juchañchjasiraqui. Qhitinacatejj nayrajj jach'aru aptapcän ucanacasti jichhajj jisc'achjjapjjaraquiwa, juparojj k'alala uñjapjjatap laycu. Ucatpï jichhajj jachasquejja, p'enkapatsti maysa uñtjjaraqui.
9. Isipasti k'ala k'añuchjatapuniwa; janiw uqhamar puriñjja amtcaraquïnti. Aynacht'atapasti jan amuyt'cayapuniwa; janiw jichhajj qhiti chuymachiris utjcaraquiti. ¡Tata, nayan t'akhesitajj uñtanita, uqhamarac uñisirejjan jach'ar tucutapsa!
10. Uñisirinacaw Jerusalén marcan kamir cancañapjja catuntasjjapjje. Marcasti, jan Diosar uñt'ir jakenacan ch'amampi templor mantirwa uñjaraqui. ¡Cawquïri jakenacarutejj jumajj ‘Janiw nayan utajjar mantapjjätati’ siscta ucanacaw mantapjje!
11. Take jakenacapaw jichhajj wali jachapjje, mank'añ thakasaw sarnakasipcaraqui; kamir cancañanacapsti mank'ampiquiw trocasjjapjje, uqhamat jan mank'atjama jiwascañataqui. ¡Tata, nayan aynacht'atajj uñtanimaya, ñankht'atajjsa amuyaraquimaya!
12. Jumanaca, thaqui saririnacasti amuyapjjaraquimaya, ¡nayan t'akhesitaj-jjamajj utjpachati, nayarojj acatake t'akhesiyjjetu! ¡Tatituw nayarojj aca t'akhesiñ apayanitu, colerasiñapa nayataqui sartayasitap laycu!
13. Tatitojj alajjpachatpachwa mä nina apayani nayaru ch'aqhacama nacsuñapataqui; saräwejjarusti mä sipita uscuraqui, ucampisti kheparuw cuttayaraquitu; nayarojj apanucutuwa, sapa cuti t'akhesiñaruw catuyaraquitu.
14. Juchanacajjsti Tatituw yatisqui, jupa quipcaraquiw uca juchanacjja chincatitu. Uca juchanacasti mä yugöcaspasa uqhamaw jatjjattaraquitu; ch'amas janiquiw utjcaraquituti. Pachpa Tatituw jupanacan amparaparu catuyaraquitu, janiw jichhajj uca juchat jaltcaraquiristti.
15. Tatitojj qhitinacatejj nayaru ch'amampi arjjatapquitäna take ucanacarojja jayaruw apanucjje. Nayjjarusti mä ch'amani ejército apayaniraqui, uqhamat nayan jan ajjsariri jakenacajjaru tucjañataqui. Tatitojj Judá marcarojj mä wawa tawakorjamaw tacsu, cunjämatejj uvajj vino ch'irwsuñataquejj tacsutajj uqhama.
16. Take ucanacasti nayarojj jachayituwa, nayrajjasti jachampi phokhantataraquiwa, janiraquiw nayar qhiti chuymachiris utjquiti, janiw nayar qhiti ch'amañchiris utjquiti. Wawanacajjasti t'unjata perkanac taypincasquiwa, uñisirinacasti nanacat sipansa juc'ampi ch'amaniraquiwa.
17. Sionasti yanapa mayisawa amparap loktasinqui, ucampisa janiw qhiti chuymachiripasa utjquiti. Tatituw Jacoborojj uñisirinacapampi muyuntayi uñisirinacapasti muyuntaraquiwa; Jerusalén marcasti jupanacataquejj jisc'achcaña marcaraquiwa.
18. Tatitojj lurañapwa lurasqui, nayan camachi arunacapataqui sayt'asitajj laycu. ¡Take marcanaca, ist'apjjeta; t'akhesitajjsa uñjapjjaraquim! ¡Marcajjanquiri waynanacasa, tawakonacasa, preso apataw uñjasipjjaraqui!
19. Munirinacajjaruw yanap mayta, jupanacasti nayataquejj mayswa uñtjjapjje. Marcajjanquiri sacerdotenacasa, jilïri chuymani jakenacasa, pachpa marcanwa jiwarata uñjasipjje. ¡Mank'a thakasaw sarnakapjjaraqui; jan mank'atjama jiwascañataqui!
20. ¡Tatay, nayan t'akhesitajj uñtanimaya! ¡Chuymajjasa waystañwa munitu! T'akhesiñaw chuymajjar llupt'itu; cunapachatejj juchajjata amthapista ucapachajja. Qhaya ankansti wawanacajjarojj espadampiw jiwarayapjje, aca mankhansa jiwañaquiw utjaraqui.
21. Jakenacajj wararitajj ist'asipquiwa, ucampisa janiw qhiti chuymachiris utjcaraquituti. Take uñisirinacajjaw aynacht'atajj-jja yatipjje, Juman nayaru t'akhesiyatamatsti cusisipjjaraquiwa. Juman urumasti purinpanaya, ucatsti jupanacarojj cunatejj nayaru purquitu ucaraqui purpan.
22. Juman nayrakatamarusti take ñankha luratanacajjajj purinpan; jupanacarusti juchanacaparjamaraqui uñjam, cunjämatejj nayaru uñjquista uqhama; ¡walpunwa jacharactjja, chuymasa wali usjjaraquitu!

Lamentaciones 2:1-22
1. Tatitun colerasiñapajj sinti jach'apuniwa, ¡ucqha suma Sión marcarusti k'alwa chhaktayaraqui! Israel marcan sumäñapsa pampa t'unjaraqui, alajjpachat acapacharus jakocancaspa uqhama. Colerasiñapansti janiraquiw pachpa cayunacapan utt'äwipatsa amtasquiti.
2. Tatitojj Jacobun utanacapjja jan mayanwa pampa t'unjawayi, Judá marcana suma perkanacapsti, colerasiñapanjja janq'aquiw t'unjawayi. Marcarusa, uqhamaraqui jilïrinacaparusa pampa sarjayawayaraqui.
3. Colerasiñapajj ninjama aktasinsti, Israelan ch'amapjja mayacwa k'allunucuwayi. Jupan arjjatiri ch'amapsti apakjjaraquistuwa, uñisirinacasaru catuyasajja. ¡Jacobon orakepansti mä nina nactayawayaraqui, uca ninasti take cunwa naqhantawayaraqui!
4. Tatitusti uñisirïcaspasa uqhamaw flechapjja flecht'añataqui waquichasi. Uñisirinacäcaspasa uqhamaraquiw take cunatejj sumäqui ucanacjja t'unjawayi; mä ninjamaw ucqha suma Sión marcjjarojja colerasiñapajj jacjjataniraqui.
5. Tatitojj uñisirïcaspasa uqhamawa uñjistu, Israel marcarusti k'alwa tucjaraqui, palacionacapsti k'alwa t'unjaraqui; suma jach'a perkanacapsa pampa tucuyaraqui. Ucqha suma Judá marcarusti, t'akhesiñatsa t'akhesiñampiwa phokt'araqui.
6. Kollana chekawjarusti, mä lunthatjamaw t'unjawayi, tantachasiñ chekawjsti k'alwa t'unjawayaraqui. Tatitusti Sión marcanjja, samarañ urunacatsa fiesta urunacatsa armasiyaraquistuwa. Akquiri colerasiñapansti sacerdoterusa, reyirusa apanucuwa.
7. Tatitojj altarapjja apanucuwa, kollan utapsa jisc'acharaquiwa. Marcaru imiri jach'a perkanacsa uñisirinacan amparaparuw catuyaraqui. ¡Tatitun utapansti jakenacan arnakasitapaquiw ist'asi, mä fiesta urücaspasa uqhama!
8. Tatitusti ucqha suma Sión marcan perkanacapjja t'unjañwa amtasiraqui. Jupaw t'unjañataqui waquicharaqui, uca waquichäwipsti phokharaquiwa, jan samart'asa. Uca jach'a perkanacsa, jupajj llaquimpiw phokhanti, uca perkanacasti pampaw tucuraqui.
9. Marcasti jan puncuni, jan jist'catañaniw uñjasi, puncunacasti t'unjata, pampanwa liwisisipqui. Reyinacapasa, jilïrinacapasa jan Diosar uñt'ir jakenacampi chicaquëjjewa; janiraquiw Diosan leyipas utjcjjeti. ¡Janiraquiw profetanacapasa Tatitutjja uñjäwinac catokcjjapjjeti!
10. Ucqha suma Sión marcanquiri chuymani jakenacasa amuquiw oraken konurjjapjje, p'ekenacapjjarusti lak'anacwa jach'jjatasipjje, chhanqha isinacampiw isthapisipjjaraqui. Jerusalén marcanquir tawakonacasti orakcamaw p'ekenacapsa alt'asipjjaraqui.
11. Jachcäwisa nayrajj usjjetuwa, chuymas waystañjamacwa munjjetu. Jakenacajjan marcapa t'unjata uñjasajja, callenacan wawanacaru mank'atjama jiwarasquiri uñjasasa janiw ch'amajj utjcjjetuti.
12. Wawanacasti taycanacaparojj sapjjaraquïnwa: “Janiw t'ant'asa, vinosa utjcjjestuti” sasa. Marcan callenacapansti jiwaratjamaw liwirtapjjaraquïna, taycanacapan amparanacapanwa samcäwi amuct'awayjjapjjaraquïna.
13. Suma muncaña Jerusalén marca, ¿cunampiraqui jumarusti chicachasiyirisma? Suma muncaña Sión marca, ¿cunampiraqui jumarusti chuymachirisma? Juman t'unjäwimasti jach'a kotar uñtata jach'araquiwa; ¿qhitirac jichhasti jumaru chuymachiristamsti?
14. Cuna uñjäwinactejj profetanacamajj yatiycäyätam ucanacajj mä c'ari arunacaquïnwa. Juman juchamsti janiraquiw khanaru apsupcänti, uqhamat juman cutiquipstañamataquejja; c'ari uñjäwinacwa jumarojj yatiyapjjäyätamjja, ucanacarusti jumajj iyawsaraquïyätawa.
15. Thaqui sariri jakenacasti uqham jumar uñjasajja, larusisaw amparanacapsa t'ajjllirasipjjaraqui; qhuyusipjjewa, p'eksa qhiwipjjaraqui, sapjjaraquiwa: “¿Acati cawquïri marcattejj wali parlapcäna, uqhamaraqui wali suma marcaw sapcäna ucasti?” sasa.
16. Take uñisirinacamaraquiw jumataqui jichhajj arsupjje qhuyusisa, ajjsaraña arunaca arsusaraqui, sapjje: “K'alpuni t'unjtanjja, acpunwa suyascäyätanjja, jichhasti cunjämtejj uñjañ muncäyätan uqhamwa uñjtanjja” sasa.
17. Tatitusti amtäwinacampejja phokhewa, arsutanacapsa phokharaquiwa. Cuntejj nayratpacha t'unjañ amtcän ucjja, jichhajj jan qhuyapt'ayasisaw t'unjawayi. Uñisirinacamampisa larusiyaractamwa, uñisiriman ch'amapsa jach'aruw aptaraqui.
18. Suma Sión marca, Tatitut yanapa mayim. ¡Jachanacamasa jawirar uñtata uruy aruma jalarayam! ¡Jachascaquim jan samart'asa, nayranacamasa janiraqui samarpati!
19. Sartasim, ucatsti arumanacas arnakasiraquim, ucqhat ucqharu arnakasiraquim; chuymamsti Tatitun nayrakataparu ucharaquim, umjama chuymamas jalaracpan; amparanacamsti juparu mayt'asisa loktaraquim, wawanacaman jacañapataquisa jupat mayiraquim, uca wawanacamasti calle esquinanacanwa mank'atjama jiwarasipcaraqui.
20. Tatay, nanacar uñtanipjjeta, amuyt'araquim, janipuniw qhitirusa nanacarjamajj lurjctati. ¿Taycanacansti waquisipunpachati ñuñusquiri wawanacaparu mank'antasiñapasti? ¿Sacerdotenacansa, profetanacansa kollan utaman jiwarayatäñapapuniti waquispacha?
21. Callenacansti waynanacampi, chuymani jakenacampiquiw jiwarata liwirtasipqui; marcajjanquiri waynanacasa, tawakonacasa, espadampi jiwarayataw uñjasipjje, colerasiñama urunsti jiwarayañcamaw chhojjriñchjaractajja; ¡jan qhuyapt'ayasisaw jiwarayaractajja!
22. Jan walt'añanacsti ucsata acsatwa apayaniractajja, mä fiestarusa jutapcaspa uqhamaw purintanipjjaraquejja; Tatay, juman colerasiñama urunsti, janiw qhitis khespcaraquiti. Cawquïrinacarutejj nayajj uywcta, yatichcaracta, ucanacarusti uñisirinacaw jiwayawayjjaraqui.

Salmos 119:137-144
137. Tatay, jumajj asquïtawa, camächit arunacamajj chekapawa.
138. Takpach arsutanacamajj asquiwa, arunacamajj chekaparaquiwa.
139. Arunacamar munañaw take cun armayitu, uñisirinacajjajj arunacamat armt'asipjje.
140. Arsutamajj wali yant'ataw uñjasi, uywatamasti arsutamaruw munasi.
141. Jan yäkataquïtwa, jisc'achataraquïtwa, ucampis janiw arunacamat armascti.
142. Chekapar uñjañamajj wiñay asquiwa, yatichäwimasti chekaparaquiwa.
143. Llaquisiñanacamp jan walt'añanacampiw catuntitu, arunacamasti cusisiyituwa.
144. Arsutanacamajj chekapapuniwa; amuyt'a cancañay churita, nayasti jacañ jicjjatä.

Proverbios 28:9-10
9. Qhititejj Diosan leyiparu jan ist'añ muncani ucarojja, Diosajj janiw mayisitapjja ist'caraquiniti.
10. Qhititejj asqui jakenacaru jan wali thaquinjama irpani ucajja, jupa pachpan sipita waquichataparuwa jalantascani, ucampis jan juchan jakenacajj cunatejj asquïqui ucwa catokapjjani.

Tito 3:1-15
1. Iyawsirinacarojj amtayaraquim, marca apnakerinacaru, jilïr autoridadanacarus ist'apjjañapataqui, uqhamarac cunatejj sumäqui uc lurañataquis janc'aquïpjjañapataqui.
2. Janiraqui qhiti toksa jan waljja parlapjjpati, jan ucasti sumanquirïpjjpan, uqhamarac munasiñani llamp'u chuyma takenirusa uñacht'ayasa.
3. Jiwasajj nayrajj uqham jan amuyt'anïpjjaraquïyätanwa, Diosar jan jaysiri, chhaktata, uqhamarac cunayman jan wali munañanacan esclavopäyätanwa. Ñankha lurañanacana, envidiasiñanacana jacascaraquïyätan uñisita, uqhamaraqui jiwascam uñisisisa.
4. Ucampis cunapachatejj Khespiyir Diosajj qhuyapayasiñapa, munasiñapsa take jakenacaru uñacht'ayistojja,
5. janiw cuna asqui luratas laycuti, jan ucasti qhuyapayasiñap laycuwa khespiyistu jarekäwi toke. Kollan Ajayu toke machakat naciyaraquistu machak jacañ churasa.
6. Khespiyir Jesucristo tokew Diosajj Kollan Ajayu jilarquir churistu,
7. uqhamat qhuyapayasiñapan jiwasar catokañapataqui, uqhamarac wiñay jacañ suyt'ctansa uc catokañasataqui.
8. Aca arunacasti chekawa, nayajj juman ch'aman sayt'asiñam munta, qhitinacatejj Diosar iyawsapjje ucanacajj asqui lurañanacaru uchasipjjañapataqui. Ucanacajj asquiwa sumaraquiwa taketaquisa.
9. Ucampis jan munamti jan wali jisct'anaca, nayra arunaca, ch'ajjwanaca, uqhamarac Moisesan leyipjjata ch'ajjwañanaca. Ucanacajj inamayawa, jan cunatac asquiraquiwa.
10. Maynitejj iglesian jan walt'aycchi jaljtayasa, ucarojj mä pä cuti ewjjt'am, ucattejj jan ist'ätam ucqhajja, ankar jakonucjjam.
11. Ucampejj yattawa uca jakejj aynacht'jjatapa, juparusti pachpa juchapawa juchañchasqui.
12. Cunapachatejj qhitancäma Artemasaru jan ucajj Tiquicorusa ucapachajja, jutañamapuniwa nayamp Nicopolisan jiquisiri, juyphi horasasti ucancañwa amtasta uca laycu.
13. Jumajj yanapt'apunïtawa cunansa Zenas abogadorojja, uqhamarac Apolosarusa cunajj waquischi uc churasina, uqhamat jupanacajj sarasipcañapataquiqui, janiraqui cunas pist'pati jupanacan saräwinacapana.
14. Uqhamaraqui jiwasanquirinacajj yatekapjjpan asqui luraña, yanapt'añansa pist'ayasiñ horasanacajja, jacäwinacapan asquïñapataqui.
15. Take qhitinacatejj nayampïsqui ucanacajj aruntanipjjtamwa. Iyawsañan munat jilatanacasaru aruntaraquim. Diosajj qhuyapayasiñapa take jumanacjjaru churanpan.