A A A A A
Bible in one year
November 20

Ezequiel 31:1-18
1. Quimsïri phajjsina mä uru sarakatarusti, tunca mayani mara sarakatarojja, Tatitojj nayan ucaru jutasinjja, saraquituwa:
2. “Faraón reyirojja uqhamaraqui Egiptonquiri take jakenacarusa saraquim: ‘¿Cunampisa uñtasispa juman jach'ätamajja?
3. Libanonquir cedro kokar uñtatawa, cawquïri suma kokanacatejj ch'uminjja ch'iwichqui uqhama, wali jach'araqui, puntapas kenayanaccamaw maqhataraqui.
4. Jallumpi, orakenquir umanacampiw suma jiltayapjjtamjja; cawqharutejj ayruntatäcayät uca chekanacanjja jawiranacaw uñstaraqui, uca jawiranacan umanacapasti take ucsa tokenquir kokanacaruw karparaquïna.
5. Cunjämtejj walja umanaca utjänjja, take kokanacat sipansa juc'ampi jach'aw jilaraquïnjja. Ramanacapasti walipuniw jilantäna, waljaruwa tucuraquïna.
6. Uca ramanacarusti alajjpach jamach'inacaw tapanacapa tapachasipjjaraquïna. Montenquir animalanacaraquiwa uca koka c'uchunacan wawachasipjjaraquïnjja. Ch'iwinacap c'uchunacansti walja marcanacaw jacapjjaraquïnjja.
7. Mä suma kokapunïnwa, wali jach'a, layminacapas wali jach'anacaraqui, saphinacapajj uma jac'ancapjjatap laycu.
8. Diosan yapupanjja janipuniw cawquïri cedro kokas jupjamajj utjcänti; janipuniw cawquïri pinos juman layminacamjama layminacanïcänti, janipuniw cawquïri castaño kokas jumjam laphinacanïcänti, janipuniw cawquïri kokasa Diosan yapupanjja jupjam sumajj utjcänti.
9. Nayaw juparojj uqham suma lurta, walja ramanacani cuna; Diosan Edén sat yapupanquiri yakha kokanacasti, jupatjja envidiasipjjaraquïnwa.
10. “Waliquiw jichhajja, Tatitusti aqham saraquiwa: Uca kokajj sinti jach'apuniw tucjjänjja, puntapasti kenayanaccamaw purjjaraquïnjja; ucampisa uqham sinti jach'aru jiltjjasinsti wali jach'a jach'araquiw tucjjänjja.
11. Ucatpï nayajj juparojj apanuctjja; jichhajj mä yakha marcanquirin jilïripan amparaparuw jalt'ayaraquëjja, jupasti cunjämarutejj ñankha luratanacapatjja waquisqui uqhamaruw purjjaraquini.
12. Uca yakha marcanacanquiri khoru jakenacajj qhuchhunucusinwa apanucuwayapjjani; ramanacapasti take ucsa kollunacaruw liwirtapjjaraquini p'aquirtatcama, valle tokenacarusa, jokhe mankhanacarusa, cawquïri marcanacatejj uca kokan ch'iwipan utjapcän ucanacasti apanucuwayasinwa jaltjjapjjaraquini.
13. Uca liwinucuta kokarusti cunayman casta jamach'inacaw jaquir jutapjjani, ucatsti cunayman casta montenquiri animalanacaraquiw uca kokan layminacaparojj liwirtapjjani.
14. Uqhamapï jichhajj acat kheparojj janipuniw mä kokas uqham wali jach'ajj jilcjjaniti, kawkhas uma jac'ancascpan, wali suma karpatäscpasa, janipuniw puntapajj kenayanaccama maqhatcaniti, wali alayarus jilcaraquiniti. Takeniwa jiwaratäñataqui apanucutäpjjani, mankhapacharu sarapjjañapataqui, cawquïrinacatejj jiwjjapjjäna ucanacampi jiquisiñataqui.
15. “Aqham siwa Tatitojja: Cunapachatejj uca kokajj jiwatanacan marcaparu sarcani ucapachasti, llaquisiñatsa jach'a kotjja wañt'ayäwa; jawiranacsa, jalir umanacsa sayt'ayaraquïwa; jupa laycuraquiw Líbano kollusa llact'ata uñjasini, uqhamaraqui pampanquiri take kokanacas wañsuwayjjaraquini.
16. Cunapachatejj nayajj juparojj jiwatanacan marcaparu sarakaycä, uqhamat jiwatanacampi jiquintasiñapataqui, ucapachasti jupan liwisitapasti yakha marcanacarojj qhathatiyaniwa. Uca orak mankhanracwa Edenanquiri kokanacajj chuymachasiña jicjjatapjjaraquini, cawquïrinacatejj Líbano kollun wali sumäpqui, suma umanacampisa karpatäpqui ucanacajja.
17. Jupanacasti jupjamaraquiw uca jiwatanacan marcaparojj sarakapjjani, uca qhitinacatejj guerran jiwarapqui ucanacampi jiquintasiñataqui. Cawquïrinacatejj uca kokan ch'iwinacapan jacapcäna ucanacasti yakha marcanacaru ananucutaw uñjasipjjaraquini.
18. Edenanquiri kokanacatsti janipuniw maynis uca kokampi uñtasirejj utjcänti, sumäñapampi, jach'äñapampisa; ucampisa Edenanquiri yakha kokanacampi chicaw sarakaraquini, uca orake mankhanquir chekaru jan Diosar uñt'irinacampi chica jacañataqui, cawquïri jakenacatejj guerran jiwarapcäna ucanacampi chica jacañataqui: ‘Uca kokasti Faraón reyiwa uqhamaraqui take jakenacapampi. Naya Tatituw ucjja arsta.’ ”

Ezequiel 32:1-32
1. Tunca payani phajjsi sarakatarusti, kallta urunjja, tunca payani mara sarakatarojja, Tatitojj nayan ucaru jutasinjja, saraquituwa:
2. “Egipto marcanquiri Faraón reyitaqui aca alma imäwi k'ochu k'ochurapim: ‘Marcanacan leonanacapjamätawa; kotanquiri jach'a ajjsarcañ lak'or uñtatätawa, jawiraman umapan sunt'isiractajja, cayunacamampisti uca umjja konchuptaytawa, jalir umsti tirctayaractawa, sasa.
3. ‘Aqham siw Tatitojja: Walja marcanac taypincascamsa, nayajj känajjwa jumjjarojj jakjjatanëjja, ucampiw catuntaraquïma.
4. Waña orakeruw katatsunïma, ucat orakeruw liwinucuwayaraquïma. Juma patjjarusti alajjpach jamach'inacwa sayt'ayaraquëjja, uqhamaraqui juman aychamampejj montenquir animalanacasa sist'asipjjaraquiniwa.
5. Juman jiwat janchiman aychapampisti kollunacsa vallenacsa phokhantaraquïwa.
6. Oraksa wilamampiw ch'allsuraquëjja, ucasti kollunaccamaw puriraquini, jawiranacasa uca wilampiraquiw phokt'asipjjaraquini.
7. Cunapachatejj nayajj jumaru t'unjcäma ucapachasti alajjpachas ch'amact'aniwa, warawaranacas janiw khancjjapjjaniti, intirusa kenayanacampiw chhaktayaraquëjja, phajjsisa janiraquiw juc'ampi khancjjaniti.
8. Juma laycusti take alajjpacha khananacsa jiwt'ayaraquïwa, marcamsti ch'amacampiw phokhantaraquëjja.’ Naya Tatituw ucjja arsta.
9. “Cunapachatejj jumar t'unjañajj yakha marcanacan yatisini, cawquïri marcanactejj jumajj jan uñt'cta uca marcanacana, ucapachasti walja marcanacaw wali mayjt'ata sartasipjjaraquini.
10. Juma laycusti walja marcanacanwa cunayman ajjsarañanaca sartayaraquëjja; reyinacapas wali mulljataw uñjasipjjaraquini, cunapachatejj nayajj espadajj jupanac nayrakatan qhiwtcä ucapachajja. Cunapachatejj jumajj aynacht'cäta ucapachasti, jupanacajj jiwañar ajjsarasaw qhathatipjjaraquini.
11. “Tatitusti siwa: Babilonia reyinquir espadapaw jumjjarojj purini.
12. Walja jakenacamarusti khoru jakenacan espadaparuw jalt'ayaraquëjja. Egipton jach'a cancañaparusti tucusiyapjjaraquiniwa, walja jakenacapsa tucjapjjaraquiniwa.
13. Take uywanacamarusti, cawquïrinacatejj umanacapat umqui ucanacarusti t'unjaraquïwa, janipuniw mayampsa jakenacasa, animalanacasa umanacamjja konchuchapcjjaniti.
14. Ucapachaw umanacjja suma ch'uwa tucuyä, aceitjamaw jalapjjani. Naya Tatituw ucjja arsta.
15. Cunapachatejj nayajj Egiptoru mä wasararu tucuycä, uqhamaraqui uca marcapsa ch'usa antutcaraquï, ucapachaw jupanacajj nayan Tatitütajja yatipjjani.’
16. “Acasti mä alma imäwi k'ochuwa, uqhamwa walja marcanacanquiri warminacajj jachapjjani Egiptor uñjasajja, uqhamaraqui walja jakenacapa uñjasasa. Naya Tatituw ucjja arsta.”
17. Tunca payani phajjsina, tunca pheskani uru sarakatarusti, tunca payanïri maranjja, Tatitojj nayan ucaru jutasinjja, saraquituwa:
18. “Jumasti chacha, yakha marcanacanquiri warminacampi chica aca alma imäwi k'ochu k'ochuraquim Egiptonquiri walja jakenac laycu, uqhamaraqui take jilïrinacap laycusa: ‘Ch'amaninacasti mankhapacharuw sarjjapjje, qhitinacatejj sepulturancjjapjje ucanacampi chica.
19. ¿Jumasti mayninacat sipansa wali sumätati? Sarakam, ucatsti Diosar jan uñt'irinacampi chica liwisiraquim.’
20. “Jupanacasti guerran jiwaririnacampi chicaw aynacht'apjjani. Espadasti niya waquicht'ataraquiwa. Ucanacampi chicaraquiw walja jakenacapajj sarjjapjjani.
21. Cawquïri jilïrinacatejj wali ch'amanïpqui ucanacaw jiwatanacan marcapanjja egiptonquir jakenacarojj catokapjjani, uqhamaraqui jupanacampi mayachasipcäna ucanacarusa, ucatsti sapjjaraquiniwa: ‘Sarakanjjapjjewa. ¡Uca Diosar jan uñt'iri jakenacasti guerran jiwariri jakenacampi chicaw aynacht'apjjatayna!’ sasa.
22. “Ucancaraquiwa Asiria marcajja, take soldadonacapampi, sepulturaparu muyuntata. Take jupanacasti guerranwa jiwarapjjänjja.
23. Sepulturansti juc'ampi wali mankharu imantatäjjaraquiwa. Soldadonacapasti cawquïrinacatejj jacasipcäna ucanac taypinsti ajjsarcañanacwa sartayapjjaraquïna, ucampisa guerran jiwarataw uñjasipjjaraquïnjja, jichhasti Asirian sepulturaparu muytatäpjjaraquiwa.
24. “Ucancaraquiwa Elam marcasa, take soldadonacapampi, sepulturaparu muyuntata. Take jupanacasti guerranwa jiwarapjjaraquïnjja, Diosar jan uñt'iri jakenaca, mankhapacharuw sarapjjaraquïnjja. Cawquïrinacatejj jacasipqui ucanac taypinsti ajjsarcañanacwa sartayapjjaraquïna, ucampisa jichhajj jan yäkatawa cawquïrinacatejj sepulturaru imantatäpqui ucanaca chicaraquejja.
25. Elam marcasti jiwarat soldadonacap taypincaraquiwa, take jupanacasti Diosar jan uñt'irinaca, guerran jiwaririnacäpjjaraquiwa. Jichhasti sepulturaparu muyuntatäpjjewa. Jaquirinac taypinsti ajjsarcañanacwa sartayapjjaraqui, jichhasti jan yäkataraquiw jiwatanac taypincasqui. Jaken jiwarayata jakenac taypincaraquiwa.
26. “Ucancasipcaraquiwa Mesec uqhamaraqui Tubal ucanacajja take soldadonacapampi sepulturaparu muyuntata, take qhitinacatejj Diosar jan uñt'apqui ucanacajj guerran jiwaratäpjjewa, jupanacasti jaquiri jakenac taypinjja ajjsarcañanacwa sartayapjjaraqui.
27. Jupanacasti janiw nayra aytat jakenacamp chica imantatäpquiti, qhitinacatejj nuwasiñ armanacapamp chica mankha pacharu jakontatäpqui, espadanacapas p'ekep mankhana, escudonacapas janchip patjjana, jaquirinac taypin jach'a ajjsarcañanac sartayirinaca.
28. “Ucancaraquïtaw jumas Egipto marca, Diosar jan uñt'iri jakenac taypina, k'ala t'unjataw uñjasïta, guerran jiwariri jakenac taypin jicjjatasiraquïta.
29. “Ucancascaraquiwa Edom marcasa, take reyinacapampi, marca apnakerinacapampi. Wali ch'amanïpcchïn ucasa, jichhajj qhitinacatejj guerran jiwarapcän ucanac taypinwa jicjjatasi, Diosar jan uñt'iri jakenac taypina, guerran jiwaririnacampi chica imantataraquiwa.
30. “Ucancasipcaraquiwa amsta tokenquiri take jilïrinacajja, cunjämatejj Sidón marcanquir jilïrinacajj ucancapqui uqhama. Jupanacajj wali ch'amanïpjjänwa, jaquirinac taypinsti cunayman ajjsarañanacwa sartayapjjaraquïna, ucampisa jichhajj qhitinacatejj guerran jiwarapqui ucanacampi chica imantataw uñjasipjjaraqui, ucanacampi chicaw mankhapachar jakontatäpjjaraqui, mä p'enkaraquiw ucan jichhajj jicjjatasipjje. Jupanacajj Diosar jan uñt'irïpjjewa, ucatsti jan cuna jach'añchañani guerran jiwaririnacampi chica imantatäpjjaraquiwa, qhitinacatejj sepulturaru sarakapqui ucanacamp chica.
31. “Cunapachatejj Faraonajj uñjani ucapachasti, jakenacapan jiwaratanacapatjja chuymachasjjaraquiniwa, jupasa, take soldadonacapasa guerranwa jiwarapjjänjja. Naya Tatituw ucjja arsta.
32. Faraonajj jaquirinac taypinjja cunayman ajjsarcañanacwa sartayänjja, ucatpï jichhajj Diosar jan uñt'iri jakenacampi chica imantatajja, qhitinacatejj guerran jiwarapqui ucanacampi chica, walja ejército soldadonacapamp chica. Naya Tatituw ucjja arsta.”

Salmos 130:1-4
1. Tatay, jach'a t'akhesiñ taypitpach art'asinsma:
2. Tatay, arojjarojj ist'aquimaya; achict'asiñamp mayisitajjarojj jaysaquimaya.
3. Dios Tatay, jumatejj takpach juchanac amjjäsiscaquismajja, ¿qhitirac nayrakataman sayt'aspasti?
4. Ucampis jumaw juchanacat pampachapjjesta, uqhämat jumar wakaychañ yatichapjjesta.

Proverbios 28:28-28
28. Cunapachatejj ñankha lurir jakenacajj atipjapqui ucqhajja, jakenacajja imantasjjapjjewa; cunapachatejj uca jan wali jakenacajj tucusipqui ucqhasti, asqui jakenacajj juc'ampiw utji.

Santiago 1:1-27
1. Naya Santiago, Diosan uqhamarac Jesucriston sirviripätwa, aruntaractwa Israelan tunca payani tribunacaparu, qhitinacatejj aca orakpachana ch'eketatatäpqui ucanacaru.
2. Jilatanacajja, jumanacajj wali c'uchiquïpjjañamawa cunapachatejj cunaymani yant'anac pasapcta ucapachajja.
3. Yatjjapjjaractawa cunapachatejj jumanacan iyawsañanacamajj cunayman yant'anac pasqui ucqhajja, jumanacajj wali llamp'u chuymanïñwa yatekapjjtajja.
4. Ucampisa munapjjamaya ch'amacht'asitanacamasti suma asqui tucuñapataqui, uqhamata jumanacajj suma jiltatäpjjañamataqui, janiraqui cunas pist'añapataqui.
5. Jumanacat maynintejj jan yatiñ cancañapajj utjcchi ucapachajj, Diosat maypan, Diosasti juparojj churaniwa. Jupasti jilarquirwa churi, qhitirus jan cuns sasaw churaraqui.
6. Ucampis take iyawsañampiw mayiñapa, jan acch'as pächasisa. Pächasiri jakesti kota mathapimpi sasiwa thayampis ucsar acsar apata.
7. Uqhamajj qhititejj pächasisqui ucajj janiw cunsa Tatitut catokañataquejj suyt'añapäquiti,
8. jupatejj jichhürojj may munani, khepürusti yakha munaraquini ucajja. Uqham may may amtiri jakejja janiw cuns sum lurcaspati.
9. Cawquïr jilatatejj menosancchi ucajja cusisiñapawa, Diosasti juparojj jach'aruw aptani.
10. Cunapachatejj kamirejj aynacht'ata uñjasi ucqhajja, cusisitaquïñaparaquiwa, kamirïñasti kora pankaramp sasiwa, janiraquiw wiñayäquiti.
11. Cunapachatejj intejj jalsuni ucatsti wal lupt'ani ucqhajja, korajj wañsjjaquiwa, pankarapasti jalaktjjaquiraquiwa, uqhamwa sumäñapajj tucusjje. Uqhamaraquiw kamir jakejj tucusini luräwinacapamp chica.
12. Cusisiñaniwa qhititejj yant'anacjja llamp'u chuymampi catokqui ucanacajja. Uca yant'ar atipjas misturinacasti churäwi catokapjjani mä coronar uñtata, uca churäwisti cuntejj Diosajj jupar munirinacaru jacañ churaña arscänjja ucawa.
13. Cunapachatejj maynejj cuna jan wal lurañataquis yant'ata uñjaschi ucajja, janiw amuyañapäquiti Diosas yant'caspa uqhamjja. Diosasti janiw cuna jan walimpis yant'quiti, ni qhitirus yant'ar puriycaraquiti.
14. Ucampis cunapachatejj maynejj uca jan wali amtatanacapampi atipjayasisquejja, ucqhaw tentacionarojj purejja.
15. Uca jan wali amtäwinacatwa juchajj sarti, ucatsti cunapachatejj uca juchajj jach'äjje ucqhajja, jiwañaquiw purinjjaraqui.
16. Munat jilatanaca, jan pantjasipjjamti.
17. Take cunatejj asquïqui uqhamarac chekäqui ucajj alajjpachatwa juti, qhititejj alajjpach khananac lurqui uca Diosawa churistu. Diosajj pachpaquipunïsquiwa, janiraquiw jupanjja sarir ch'iwir uñtatas utjquiti.
18. Jacañwa churistu cheka arunacap toke, uqhamata jiwasajj nayräwiri achunacjamäñasataqui, cuntï jupajj lurqui ucanjja. Jupasti uqhamäñasracwa muni.
19. Ucatpï munat jilatanaca, sapa maynis jumanacatjja janc'aquïñapaw ist'añataqui, ucampis janiw janc'aqui cunsa parlañapäquiti ni colerasiñapäcaraquisa.
20. Colerat jakesti janiw cunatejj Diosataquejj sumäqui ucjja lurquiti.
21. Uqhamapï jumanacajj cunatejj k'añüqui ucjja apanucupjjam, uqhamarac jan walinacas wali phokhantatäqui ucsa. Cuna arunacatejj jumanacan chuymanacaman yapuchatäqui ucjja llamp'u chuymampi catokapjjam, uca arunacasti ch'amaniwa almanacam khespiyañataquejja.
22. Ucampis cuntejj Diosan arunacapajj yatichquistu uc lurapjjaraquim, janiraqui alek isch'uquirinacaquïpjjamti, uqham alek isch'uquisajja jumanacpachaquiw sallkjasisipcasma.
23. Qhititejj alekaqui uca arunac isch'uqui, ucatsti janiraqui phokquiti ucajja, cunjämtejj mä jakejj ajanup espejot uñcatasquejja uqhamaquiwa.
24. Ucapachajj uñcatt'asiwa cunjämäquitejj uca, ucatsti sarjjasinjja armt'asjjewa cunjämäcäntejj ucjja.
25. Ucampis qhititejj jan armt'asqui cuntejj ist'qui ucjja, jan ucasti sum Diosan leyipatjja amuyt'asi, cawquïr leyitejj khespiyat sarnakasiñ churquistu ucarjam sum sarnakasa, phokasaraqui, uca jakejja cusisiñaniwa.
26. Maynitejj Diosar arcatap amuyaschejja ucatsti cuns parlascacchi ucajja, jupa pachpaw c'arintasisqui, Diosar arcatapasti inamayaquiraquiwa.
27. Cuna Diosar arcañatejj k'omäqui chekapäcaraqui Dios Awqui nayrakatan ucajj acanacawa: Wajchanacaru, ijmanacaru, llaquitanacaru yanapt'aña, ucatsti janiraqui acapach k'añu lurañanacampejj k'añuchasiña ucawa.